رواية بعد فوات الأوان الفصل الثالث 3 - بقلم آنين الليل

السلام عليكم
احدى العزيزات
كاتبه مبتدئه اسمها (دعاء حميد الفتلاوي )
تكتب قصص واريد دعمكم الها احدى قصصها اسمها (حكاية لقاء)
وقصه ثانيه اسمها ( انا وقريني ) حبيباتي محتاجه دعمكم
شكرا
احبكم كومايااات
آنيين الليل
/////////////////////////////
مروه
بعد ان فهمت ام باقر على قراري ما سمعت شي عن معن ولا هي اجتنا ولا حتى امي مرت عليهم
وامين اخوي ما حچى وياي ولا گلي معن مار علي او لا يعني سدينه الموضوع وانا احاول ابتعد عن جمال
يعني من يجي ادخل للغرفه وما اطلع منها اله اتأكد انو هو طلع او صعد الغرفته

وبقينا بنفس روتينه اليومي انا وسماح مرات نخيط اشياء بسيطه وانا ولا كانه مخطوبه ما حاولت اشتري
شي لان بصراحه محد انطاني شي وهالايام جمال يطلع الصبح مو مثل كل مره يطلع الضحى او وره الظهر
ومن امي سالته وهو ع الريوك جاوبها //عندي شغل مهم

اكثر من مره اجت ملاك وباتت يمنا وهي ابد بعدهي بتكبرها اواوامرها علينه ولاجابت طاري انو اخوها
خاطبني او اشترى بيت اصلا ما حچت باي شي وبس من تشوف ابوي او جمال تروح تكعد وتسولف وتضحك
ومن راحت ابوي شال فلوس وانطاها وهي كأنما تسمع بينه

: عمو مو كل ما اجي تنطيني مو ذاك اليوم مريت عليه وهم انطيتني من غير المسواك الي جبته اشكال
ابوي جاوبها // لا عمو شمنطيج هاج بابا اخذيهن واي شي تحتاجين بس اتصلي عليه

انا وامي واخواتي نباوع واحنه نشوف خباثة ابونه وتفرقته وهذا الشي ما عرفت سببه اللحد هسه
وره ما يقارب شهر اجت ملاك وثاني يوم اجت عمتي  امل هم وبيومها حچت ويه ابوي بس
هالمره گدامنا
: طالب حميده حماتي دزتني عليكم تريد تجي تخطب سماح الابنها
ابوي بعدم اهتمام //ياهو منهم
:كرار
ابوي //ها وشيشتغل

عمتي //ويه ابو بمحل الكهربائيات وخوش ولد ومؤدب بعد تعرف ابو شگد خوش انسان
ابوي //اي همه خوش ناس بس هسه ما اگدر انطيها السماح وتتزوج
امل //ليش شنو المانع
ابوي // خلي تتزوج اختها
امل //واختها شمتانين هاي اكثر من سنه شو سكته
ابوي بنتر// امل شبيج شو كل ما تجين تسويلج مشكله

عمتي // يا مشكله طالب بنيه اجت قسمتها لو تريدها مثل مروه اليوم باچربعد شهر خلي الم نفسي
ابوي گال //انا گلت سماح ما تتزوج اله مروه تتزوج
امي //بس ابو امين سماح ما الها غرض باختها اذا خوش ولد اتوكل على الله وانطي
ابوي خزر امي //ايي وبعد شعدج احچي لا تضميين شي (وگف وصار اياشر بااصبعه )
اسمعوني كلام زايد ما اريد سماح ما تخطي اله تتزوج مروه

امي وگفت وباوعتله // ما طول هيج هذا ابن اخوك گاعد يمك،وگله يمته تتنازل وتاخذ بتي
ابوي عض شفته وكال //والله خوش صار عدج السان وتحچين
امي / /. انا ما گلت ش...
قاطعها //اسكتي بت النعال لا اگص السانج شتردين مو شرطتن اله بيت قابل الولد يگطع روحه جاي
يحضر الچن بالبيت
امي //بس ما شفنه لا بيت ولا حتى غرفه
جمال باوع الامي // هاا عمه شقصدج اچذب انا

امي بنفاذ صبر تحجي وترجف خوف من ابوي //ايي عمه اتچذب تدري ليش لان ما تريد بتي وابوها جابرك عليها
جمال //هذا شلون حچي منو گالج هذا الكلام
امي وهي تأشر على ملاك //اختك هاي الگاعده يمك اصلا من حچيت وياها ضحكت وگالت انتي تتشاقين
عمه اصلاجمال ما يشوف مروه اله مثل اخته وجمال مو يمه الزواج هالوكت وانت اذا ما تريدها لاتكسر بختها

ابوي انبهت من سمع هذا الكلام وفك عيونه والكل استغرب اتقرب امين وگله
:جمال كلام اختك صحيح لو تتشاقى
ملاك // انتو تحچون صدك(باوعت الجمال ) جمال شنو القضيه فهمني
امين // ها يعني ما تدرين جمال صار خاطب اختي اكثر من سنه خاطبها بس بالكلام وكل ما يجون عليها
ناس وهو يگول انا اولى بيها
وگف جمال وگال بعصبيه // ايي انا اولى بييها بت عمي يمته ما اريد اخذها

امين خزره وگله //لا بالله مو هي محبس تريده تلبسه ما تريده تشمره اسمعني جمال من الاخير تريد اختي
الك اسبوع تعد وتعقد ما تريدها وره الاسبوع اي احد يتقدم نوافق وما الك يمنا اي مره
ابوي بنتر // ايي مو هي بكيفك
امين //اي هالمره بكيفي لان انت ما عادها بتك عادها سلعه يمته ما يريدها جمال يشتريها ويه التخفيض

ابوي وگف يريد يضرب امين //انچب حقير
امي صارت بيناتهم // لا تضرب امين ما گال شي هذا ابن اخوك افتهم منه ما يريدها خلي ايكول
ابوي صار يتهدد على امي //انتي هسه اموتج طلعتي عيون الولد والله اعلم انتي والبنات شتسووين
امي //خلف الله عليك مو جديد عليك هذا الكلام اتعودنا تگوله النه بس اسمعني انت وابن اخوك يريد البت يعقد
عليها ويتزوجها ما يريدها خلي تمشي بحال سبيلها كافي اذا جمال مستحي من عدنا ومثل ما گالت اخته عادها
مثل ملاك ما بيها شي بعدهم لا نيشنو ولا عقدوا

امل باوعت الجمال // اسمع عمه اذا انت تقبل على اختك هيج همه يقبلونها على بتهم اختك بس اجه عليها گرايب
امك هذا ابوك ما جبرها خيرها بين المدرسه وبين الزواج وقبلت تتزوج وبشهر كل شي كمل
جمال هز راسه وگال // هذا هو اسبوع الجاي اعقد واعد مقدم ومؤخر
امين // وكلام ملاك
جمال رفع اكتافه // ما تدري لان بعدني جاي ارتب اموري وما حچيت گلت اكمل واجي اخذها وهي تجي تخطبلي

ابوي يباوع النه //هاا بعد اكو شي ابالچ سهام خانم
امي //انا ما اريد جمال ينجبر على مروه ياخذها لان يستحي منك جمال ابنه ومروه اذا مو بت عمه اخته
جمال اتقرب من امي وباس راسها وهو يگلها // عمه لا يظل بالج مروه بت عمي واريدها وباسرع وكت اخذها
اختنكت ودي اصرخ واگلهم = انا ما اريده هذا حقير چذاب بس اتذكر شنو ممكن يحچي وشنو راح يصير

امين تعبان گلي افرشيلي بالديوان لان عنده شغل بالورشه من وكت وصادق لحگه هو وعلي وعمتي راحت اجه
عليها زوجها وهو تقريبا اخذ ملاك الساعه 11 راح يوصلها وابوي راح الغرفته وكل واحد راح المكانه
انا بقيت گاعده ما اجاني نوم متوتره وضايجه امي طلعت شافتني گاعده امسح بالكاشي گلتلي
: متوازيه مو الصبح هم راح تنظفينه
باوعت الامي وسالتها = يمه انتي خابرتي على عمتي
امي هزت راسها //اي حچيت ويه ملاك عمه جمال ما لگاله بيت
هي ردت المن
اله العرسه
ليش هو يريد يتزوج
شني ما تدرين خاطب مروه
ملاك ضحكت هههه تتشاقين
لا عمه عود صدك ما تدرين
لا والله ولا عندي علم اصلا جمال ما يشوف مروه اله مثلي يعني مثل اخته وشكم مره گتله خلي نخطبلك وحده من
بنات عمك يگلي مثل اخواتي ما الي بيهن نفس

عاد انا خابرت عمتج  وفهمتها گلت خلي اذبحها على قبله چا شنو يضحك علينه  ويكسر بختج
امي باوعتلي وحچت بقهر // روحي يمه نامي الله يقدم البي الخير
= لا ما جايني نوم خلي ارتب غراض المطبخ بلكي انعس وانام
: بكيفج انا زايحه تصبحين على خير
= وانتي من اهله

امي راحت تنام وانا دخلت للمطبخ وصرت اطلع بغراض الكاونتر اريد ارتبهن لان كل فتره انزل شكو غراض
واغسلهن وارتبهن صرت اغسل وانشف بالكاونتر من داخل وبديت اريد ارتب الغراض حسيت بي اجه ودخل
للمطبخ فتح الثلاجه وهو ساكت طلع
ماي شرب وباوعلي گلي //سويلي عشا

چان تقريبا الساعه بالوحده الصبح هو طلع انا رحت طلعت بيض من الثلاجه ورحت خليت الطاوه ع النار وفتحت النار
لمن ما حسيت ايد سحبتني وطلعتني بره من الباب الثاني للمطبخ شفته جمال الي متقرب عليه وهو ريحة حلگه تطلع الروح
گلي // ها اشلوني ان شالله اعجبج
هو متقرب عليه كلش وانا صرت ارجف گتله = هدني لا اعيط واخلي ابوي واخوتي يجون
هو صار قريب بحيث نفسه يطخ بخشمي // ههههههه عيطي وخليهم يجون

كمشني من شعري وملشني وگلي //عيطي ياالله خلي يجون يشوفوني لازمج لان حقي مو بس الزمج
واموتج خلاص عيطي
خلي يشوفوني لگيتج بره بالترك ويمج واحد وبس شافني طفر السياج (باوعلي وهو يتشفى ) ها شلوني اعجبج مو
جاوبته = انت اكبر حقير ولك انا عرضك يانذل
لزمني وعتني حييل وگلي وهو صاك على سنونه //هذا النذل هسه يگدر يغتصبج ويذبج مثل الچلب بس انا راح
اخليج فد سنه بهذا العذاب يوميه فلم ومن اخذج اذلج واخليج يوميه تبوسين قندرتي بس حتى اخفف عنج العذاب الي
راح تشوفينه مني

هو اتقرب اكثر وصار يشم برگبتي وقرب جسمه عليه وانا مثل السعفه ارجف صار نفسه يطخ بوجهي برگبتي
وانا اشم ريحته الكريهه درت وجهي گلي
:ريحتي ما تعجبج موو لازم تتعودين عليها لان انتي الي راح تحضريلي المزاج
= تحلم هسه اعيط واخلي امين يجي ويفضحك

:  هههههه خلي يجي لج علوا يحچي واطلع بعد ما اگول وين شفتج او ويامن وامين وياج هوه الگ...
بعدها اطلع والزمله الدرب ومثل ما خطفني ويه جماعتج اخطفه بس شنو اقتله وادفنه لو ليش اخلي بي عاهه
ما يگوم منها
= ليش انا بت عمك ورابيين سوا
: لان عجبتيني ومنعتيني واخوج ذلني فمستحييل انسالج او انساله الي سوا
= خسيس ون

خله ايده على رگبتي وخنگني وهو يگول //لازم تتعودين عليه وعلى اخلاقي ونذالتي

انا انگطع نفسي وحسيت الدنيا صارت سوده وهو اصابعه على حنجرتي ظليت احاول انزع ايده مني بدون فائده
هو وخرها وهو يضحك بشماته وراح ضليت لازمه رگبتي واكح حييل واجر نفس لمن ما بلعت ريگي ودخلت
للمطبخ وانا مو بس خايفه لا انا عرفت انو كلشي بحياتي انتهى وانكتب عليه العذاب دخلت للمطبخ
وبسرعه دخلت الغراض بدون لا امسحهن ولا ارتبهن ورحت للغرفه واتمددت على فراشي وغطيت وجهي وانا
احتسب على جمال وعلى الساعه الي صار بيها ابن عمي

بقيت ابچي واشكي الربي وراها سمعت اذان الفجر گمت من فراشي ورحت اتوضيت وصليت وبقيت گاعده
رافعه اديه واناجي ربي واشكيله ظلم ابوي وجمال بيه وشلون انا ما اگدر اسولف الاخوي لان اكيد راح يكتل
جمال ايموته او يسوي ويا مشكله وجمال يتبلى علينه ياربي انت على كل ظالم وانت قوي فوك كل قوي ومتجبر
يارب العالمين
بقيت ابچي وبعدين نمت ما گعدت الصبح لا گعدت تقريبا الساعه عشره رحت اتريگت وامي تگول

: شنو اول تالي باقيه الهلوكت
جاوبتها= راسي يوجعني
:زين اتريگي وشربي چاي انا اطبخ
=لا يمه انا اطبخ هسه بس اكمل
: بكيفج انا سلگت اللحم
=اي اكمل وامرك الفاصوليا
: لا ابوج يريد تشريب لحم
هزيت راسي = اي صار

اكلت شويه ورحت نگعت التمن وطبخت المرگ واجت زينب من المدرسه  الساعه 11لان دوامها ثلاثي
يعني وياهم مدرستين وهمه لان متوسطة بنات فدوامهم كله صباحي زينب دخلت وهي تكول //جوعانه
جاوبتها = هسه بس يجي صادق نصب
اووو صادق يتاخر مدرسته بعيده ويجي مشي وهمه دووم ياخذون ست دروس
= خو مو مثلكم دوامكم ثلاثي طلعيلج خبزه وخلي بيها خضره وطماطيه واكليها على ما نصب

علي چان دوامه عصري يروح الساعه 12 وراح للغرفه يبدل وانا اگله
=علاوي ملابسك معلگات كويتلك القميص
ورجعت للمطبخ وانا كل فكري ويه النذل جمال وشنو راح ايسويلي من يتزوجني بحيث اصفن وارجع
اريد اشتغل اتذكر كلامه
وما نحس اله رمي قوي على بيتنا رمي ما اگدر اوصفه اله بجبهة حرب انا بوكتها بالمطبخ
كلنه صرنا نصرخ ما نعرف شنسوي لان حسينا البيت راح يوگع علينه اتجمعنا بالصاله الداخليه واحنه بس
نصرخ وما نعرف شنو صاير امي تگول //علاوي وين علاوي كون طلع

واجت سماح تزحف وهي لازمه علاوي وتگول //هذا علاوي يمه لا تخافين
ما نعرف شكو بس نسمع ناس دخلت للطارمه وصوت ابو باقر جيرانه يگلهم //عمي ارجعوا بس حريم بالبيت
واحد ايرد علي // احنه نريد الحريم
واحد من الجوارين //من كل وعقلكم اله ما عدنا غيره وننطيكم الحريم

وصار حچي ومعايط واحد من جوارينه گلهم // تعرفون اذا تفوتون ع البيت اله كلنه تكتلونه وشوفوا احنه شكم
عشيره وين ترحون
صوت ايگلهم //عمي ما النه وياكم طلابه طلابتنا ويه ذوله صيروا على صفحه واتكتروا

وبقوا يحجون وسمعت صوت البيتونه يندگ وردت اروح بس امي ما قبلت خافت وهي تگول
: لا يمه يجوز صعدووا علينه لا ترحين
انا جاوبتها بخوف = لا يمه بس بيت ام باقر على سطحنه ما معقوله صعدوا من يمهم خلي اشوف منو
رحت وانا ازحف وصلت يم الباب گلت = منو
ام باقر // خاله افتحوا الباب واندارو البيتنا بسرعه
سالتها = خاله شكو
ام باقر //هسه مو وكتج بساع تعالن اعبرن على بيتنا

نزلت على امي واخواتي وگتلها انا لبست عبات امي الي معلكتها والبنات خلن شالات على شعرهن واخذنا
علاوي وامي كالت //روحن هسه اجي وراچن خلي اجيب الجنطه الزغيره
عبرنا على بيت ابو باقر وانا بقيت منتظره امي الي اجت وهي تضرب على خدها وتگول
: يمه شصاير اكيد الولد متعاركين بس شصاير وهيج اجت الناس هجمت علينه

سمعنا اصوات رمي من داخل البيت و صياح رياجيل المنطقه وطلعوا واسمع واحد يگول ياجماعه هذا البيت مطلوب
ثار طفل شاب مره رجال يتقربله نكتله
امي من سمعت هذا الشي خرطت خدودها وطلع منهن دم وهي تضرب على وجهها لمن ما اجه  ابو باقر
وهو يخابر بابوي ويگله //شصاير
:يمنا لا تخاف بس انت وين
:زين افهم النه شنو صاير
سد التلفون امي //خويه ابو باقر شصاير

جاوبها //خابري امين بسرعه وانا وديت محمد يلاگي صادق بالمدرسه وياخذه البيت معن على ما نشوف شيصير
امي // خويه غير افتهم
ابوباقر بعصبيه // يمعوده خابري امين بالاول
امي اتصلت بامين وگلتله //يمه امين انت متعارك ويه احد
امين مستغرب من كلامه وماكد الها ما عنده علم بشي ابو باقر اخذ النقال من امي وفهمه الي صار وگله
عمي لا تبقى بالمحل هسه بسرعه تطلع اطيني استادك
وصار ابو باقر يحچي ويه الحجي ويفهمه واحنه كل شي ما مفتهميين

گعدنا بالهول الداخلي ونسمع الحچي ومانعرف شي عن كل الي صار ومنو ذوله وليش هجموا على البيت
ويردون الحريم قبل الزلم وليش دخلوا وكسروا او حرگوا ما نعرف شي احنه خايفات ونرجف
گعد ابو باقر وهو يگول //لاحول ولاقوة الا باالله العلي العظيم
امي //فدوه حجي شنو صاير
اندك باب بيت ابو باقر حييل هو گال //ابقن اهنا لحد يطلع لو شنو ما يصير
راح ابو باقر ونسمع واحد ايگله //حجي طلعنه النسوان بالتي هي احسن

ابو باقر //يانسوان عمي
:حجي جيرانكم الشردن عدكم
: روح بابا روح منا ما عدنا كل احد
صار يعيط ويگله //حجي اگلك طلعهن النه لا هسه ندخل نسوي الدم للركب

التموا الجوارين وابو باقر گال //خايب انچب زلمه انت ادخل وشوف اله انت وعشيرتك تتوذر شنو هيته تايهلك
واحد رد علي // عمي الحچي وياك اذا النسوان عدك طلعهن النه
ابو باقر //النسوان مو عدي واسمعوني لو عدي انعال وحده مو هي لا انعالها ما اطيكم ايا اله انا او ولدي وگرايبي
مكتلين شنو انت. منين جاي ما تعرف بسناين العشاير روحوا عمي انشدوا چبيركم اذا دخييل موجود شلون اطي
اله ما براسي غيره
واحد من الجوارين گالهم //روحوا منا وتكفوا الشر دخلتوا للبيت وما لگيتوا شي الناس شارده ومحد موجود
والبيوت الها حرمه الزلم تدور زلم مو نسوان

وراحوا وهمه يتهددون ويسبون ويغلطون على ابوي وعلينه واحنا ما ندري شكو دخل ابو باقر وچنته جابتله ماي
وهو يگول // استغفر الله لا آله الا الله
امي //خويه ليش يردونه
ابو باقر //والله ياخويه ما ندري الناس تگول واحد من الولد متعارك وكاتله واحد بس ليش يردون النسوان
امي صارت تخرط بخدها دمته وهي تگول وريگها يابس //لا خويه وليداتي ما يسوونها مو هالحچيت ويه امين
ابو باقر //ايي صحيح وهسه يجي محمد ونتاكد منه
جبتلها ماي وسالته = عمي وابوي من خابرته

هز راسه ابو باقر وگال //اي عمي هم ما يدري شكو جايين بنفس الوكت وصايرين يرمون المعرض ورايدين
ابوج بالاسم والناس مطلعينه على ابو رجال غريب جاي يشتري سياره
ام باقر //ياستار ياربي وما گالك شي
هز راسه //لا حتى هو ما يدري شني صاير
امي //شلون ياربي شلون بينه وليداتي
ام باقر // سمي بالرحمن خيه وگولي ياالله

امي رافعه اديها للسما //ياالله ما عدنا غير الدعاء
ابو باقر خابر محمد الي گله دقيقتين او اوصل وراح ابو باقر فتح الباب ودخل محمد للهول وامي راحت تسأله
واحنه اتقربنا يم الباب
ابو باقر //هاا يابه شسويت
محمد //حجي رحت وبس حل اخذت تكسي وديته البيت خالي ابو معن بس هو ما قبل كال اروح للورشه يم امين

ابو باقر //زين بابا سالته هو متعارك
محمد //اي حجي سالته لا متعارك ولا اي شي
:زين بابا شفتهمت
:بابا ما اعرف منو متعارك وكاتله واحد
:الله يستر الله يستر
امي //وهسه شلون بينه
ابو باقر //ام امين خلي نفتهم ويصير خير انا طالع وانتو ديرو بالكم (باوع لام باقر ) حجيه يندك الباب انتي افتحي
لاتخليين اي احد يفتحه بس انتي

وطلع ابو باقر واحنه بقينه ما ندري شنسوي امي خابرت امين وسالته انت وين هو گللها رحت ويه جهاد للشقه مالته
امي// يمه ما عرفت شصاير
:لا يمه وجاي اتصل بابوي وما يجاوبني
:الله يستر يمه
امين // يمه خو محد اتعرض الكم
:لا يمه الجوارين الله يسترهم ما قصروا بس همه كسروا كل شي ماخلوا
امين //ديري بالج ع البنات جهاد راح يستفسر شصاير وبس اعرف شي اخابركم
امي //انت دير بالك يمه وين صادق
: هذا يمي لاتخافيين وديروا بالكم ابد لا تطلعن

اتصلت عمه امل وهي تگول// انتو وين يگولون هاجمين عليكم
امي //اي خيه فهميني امل شصاير
امل //حالنه من حالكم ما ندري اجه جمعه واخذنه البيت حماتي ومحد يدري شكو هو طالب وين
امي //هم ما ندري يگول جوارينه مطلعينه العمال
امل //شنو سهام الولد متعاركين ؟
امي // لا ابد ولدي واحد بالورشه والثاني بالمدرسه خابرناهم وراحوا الغير بيت
:چا شنو سهام

امي //هاي المصيبه ما خطت جمال شوفي اذا ما طلع مسويله مصيبه چبيره
امل // الله يستر على ولدنا سهام
امي وهي تدعي //اي والله الله يستر عليهم

غاب ابو باقر بالساعه واحنه نترقب على نار ورجع وهو يگول //ما نعرف اي شي ولا ندري ليش هجموا على البيت

امي اتصلت بخوالي الي گلولها اجو يدورون اهنا وهددوا وگالوا الكم بس اختكم
ام باقر //خيه مبينه الشغله چبيره يعني يدرون بيج غريبه مو من عشيرة رجلج هلگالوا هيج
سالتها =يعني شنو
امي //يعني ناهيين خوالج نروح الهم لو نوصل يمهم
ام باقر //استهدي بالرحمن لا تخافيين الها حلال

بقينا گاعدين اللحد الساعه بتلاثه العصر محد اتصل ومرت باقر صبت النه غدا لكن احنه منو اليشتهي ام باقر لحت
علينه احنه جاملناها كل وحده اكلت لكمه وعلي راح للديوانيه يتغدا ويه ابو باقر او ولده

بقينه للمغرب واحنه ما نعرف الي صاير ومحد خابرنه الى ان اتصل علينه امين وهو يگول الامي لازم نطلع
من المنطقه الامر ما يتحمل ان نبقى محاوطين المنطقه كل شي يصير يجوز ايهجمون ع البيت ويحرگونه
والجوارين يتعاركون وياهم وتصير كاتل ومكتول
امي سالته// يمه شصاير فهمني
امين //يمه صايره مصيبه بس لازم تطلعون
: شلون نطلع اذا انت تگول محاوطين المنطقه

امين //هسه خابرت معن راح يجي ويدخل السياره ابيت عمته وتركبون ويا وهو يوصلكم لان چان دزيت جهاد
بس هواي ناس تعرفه صاحبي يجوز يجون ورا
امي //ها بكيفك بس گلي يمه شنو صاير
:بعدين يمه بعدين
امي صارت تضرب على وجهها وهي تگول //مبينه مو شغلة كتل
ام باقر //استهدي بالرحمن ام امين البنات خافن

: خيه شلون وين نروح وين ننطي وجهنا والهسه محد يدري شصاير (باوعت المرت باقر ) فدوه خاله ولو
اسوي عليج زحمه بس اذا عدج عبايه اسلاميه السماح نطلع بيها
ام باقر //وين تطلعون
: امين يكول لازم نعوف المنطقه ما تعرفون هاي الناس شنو تسوي اذا دروا احنا اهنا
ام باقر //دخيلك ربي شصاير
:ما ادري بس صايره مصيبه چبيره بس الله اليستر
:وشلون تطلعون

: امين مخابر ابن اخوج معن راح يجي يدخل السياره ويطلعنا بيها بس ما اريد ابن الناس ينضر
ابو باقر// اذكري الله ام امين راح نشوف شنسوي
سماح //عمي مو تگول اجو. الشرطه
ابو باقر //ايي عمي اجو وراحوا لان ما لگوا شي
ام باقر// هاي الزلم الهدت والسلاح وما لگوا شي
هز راسه ابو باقر //ايي الشرطه يعرفون بامور العشاير لازم تنحل ابيناتهم
جاوبته = بس عمي تكولون بيها كتل

ابو باقر رفع اچتافه // والله ما ندري ياعمي منو الكاتل منو المكتول
امي تتصل بابوي يرن تلفونه وما يرد رحت يمها وگتلها= كافي يمه لاتتصلين الله اعلم شصاير
:اي غيير يتصل ايفهمنا
ابو باقر //خويه الرجال حاله من حالكم شيتصل هو هم ما يدري وخلف الله ع العمال مطلعينه
ام باقر //يعني حتى ابو امين ما يعرف
:اي بكل شي ما عنده علم اصلا العمال گايلين الحجي يريد يشتري سياره

ام باقر //سترك يارب العالمين كافينه الشر
رن تلفون ابو باقر شافه معن الي گله //انا جاي افتحولي الباب
وراح محمد فتح الباب واجه سلم على ابو باقر ودخل ا للديوان واجه علي گال الولد يريد يجي يحچي ويه امي
احنه هم گعدنا عدل وهو دخل صارت عينه بعيني وسلم وباوع الامي الي من شافته وگفت وسألته
ها خاله شنو صاير
معن //خاله ام امين من خابرتني امي اتصلت بولد صديقي ضابط شرطه بالمركز التابع للمنطقه وگال ......
دنگ وجر نفس وامي //بروح ابوك خاله شصاير
معن //خاله ابن حماج جمال خاطف ابنيه ومگلوب هو وياها  وهذوله الي اجو اهل البنيه

كلنه نشغنا بصوت عالي وامي صارت تضرب على وجهها وهي تگول //يبووي يعني جمال متهوم بخطف ابنيه
معن //خاله ما متهوم البنيه ويا بالسياره
ام باقر //يممه الله يستر شلون مصيبه
مرت باقر //مو جمال هو نفسه الي خاطب مروه
امي //ايي هو شيجينا من ورا بس الفضايح 

امي بچت حييل وبعبره واتقربت عليها ام باقر وهي تگلها
خيه ام امين على كيفج
امي گالت //والله ما ادري عليمن ابچي على جهوالنه ومصيبتنا لو ابچي من الخوف ع البنات والولد
معن گلها //خاله اتوكلي على الله الصار صار وهسه لازم نتصرف بصوره صحيحه
والله يايمه ما ادري شسوي
معن //هسه اهم شي تطلعون منا
ابو باقر //وين توديهم
:امين خابرني گال اجيبهم للشقه مالت صاحبه جهاد
امي //اگلك يمه وهسه جمال وين ما گالك صاحبك

معن //خاله جمال مات والبنيه ماتت وهي تدافع عن نفسها لان لگوا ايدها على ستيرن السياره
امي //دخيلك ربي سترك شلون مصيبه وفضيحه
معن //ياالله خاله خلي نطلع
ابو باقر //بس دير بالك خاف مراقبين السياره ويلحگونك
اعرف لذلك راح نروح البيتنا وتالي اوديهن الامين (جر نفس وهو يگول ) ياالله خاله
امي //تعبناكم ويانه مجازاتكم على الله
ام باقر وهي تبچي // شتگولين سهام احنه اهل الله لا ينطي الفرقنا

صارت امي وام باقر يبچن وهي تگل الامي //الله كريم بلكي يصير الها حل وترجعون
امي ترد عليها //شنرجع خيه ما سمعتي خاطفله وحده وميته بسيارته
:على كيفج ام امين عينكم بعين الله
جابت مرت باقر عبايه اسلاميه الزينب ورحنه ركبنا امي بالصدر لان ابو باقر گال يجوز ناس تجي ورانه
من يشوفوني راكب بالسياره وانا والبنات ركبنا وره وعلاوي نيمته على رجليه وطلعنا معن يسوق وتمينا ساكتين بعدين
معن گال الامي
خاله راح تنزلون يمنه بالبيت
امي جاوبته //لاخاله نروح الامين
:خاله اعرف بس بالبدايه خلي نتاكد محد ورانه ما اريد اجازف بالولد كل شي يصير المشكله چبيره والناس فاير دمها

امي جاوبته//الله يستر
وصلنه البيت معن ونزلنه بعد ان دخل السياره جوه چان الكراج چبير والبيت حلو دخلنه واتلگتنه امه سلمنه وامي اتگلها
ما نعرف شلون نجازيكم
ام معن //لا تحچيين هالشكل الناس للناس اهم شي الله يستر عليكم
:ويستر عليكم ويخليلج معن
فدوه العينج احبيبه

بقينا گاعدين بالصاله واشوف معن صعد فووك وانا اباوع للبيت الي لو ما حقارة جمال چان ممكن يكون بيتي بس
هو ما هان علي يشوفنا مرتاحيين وذبانه بمصيبه ما نعرف شنو تاليها وبس الله يستر من الي راح يصير

///////////////////////////////////////////////يتبع
اعزائي جاي اكتب واتعب والتفاعل قليل اذا ما عاجبتكم القصه اوقفها
تحياتي 😘😘😘😘😘