رواية بعد فوات الأوان الفصل الرابع 4 - بقلم آنين الليل

مروه
تقريبا الساعه التسعه ونص وصلنه البيت معن ذاك البيت الي كان ممكن بيوم من الايام يصير بيتي لوما انانية
ابوي وحقارة جمال اتلگتنا ام معن ورحبت بينا احنا چنا بين الخوف والخجل گعدنا بالصاله وامه ترحب بينه
ومعن مجرد ما باس راسها صعد فوك يمكن الغرفته الدرج چان داخل الصاله بشكل كلش حلو البيت مرتب
والاثاث جديد

ام معن كسرت السكوت وهي تگل الامي //عيني ام امين الله كريم لاتخافون يصير الها حل ان شالله
امي بحسره // الله كريم احنه سوينه عليكم زحمه
ام معن //رحمه خيه الناس للناس وانتي هاي شمسويه بوجهج
امي //من الهبطه والخوف على الولد والله يا ام معن الي سووا ابو باقر وابنج الله يحفظه ما يسوي الا كل
واحد ابن اصول
ام معن باوعتلي انا وسماح وگالت //ياالله حبيباتي ادخلوا للمطبخ حضروا العشا انا كل شي محضره انتو
بس صبوا الصحون يمكم بالكاونتر
انا وسماح وحده تباوع للثانيه بخجل ام معن ردت گالت //ياالله خاله البيت بيتكم لا تستحن

امي اشرت بعيونها رحنا انا وسماح للمطبخ الي چان عباره عن شي حلو وذوق جدا رفيع لگينه كباب عروك
وكبه وشوربه وبتيته وطماطه وزلاطه  وفواكه سماح بقت مبهوره من الشي الي شافته صبينه وكملنه ورحنا
وخلينه الاكل ع الطاوله مالت المطبخ واجينه للصاله وام معن گالت
ياالله كلنه خلي نروح للمطبخ ناكل

راحت قبلنه وزينب وعلي راحوا يغسلون بالمغسله امي بقت رجعت عليها ام معن وهي تكلها
: هاي شنو منج ام امين البنات مبين عليهن ما ماكلات ياالله عيني گومي واكلي ويانه وصدگي كل
مصيبه تبدي چبيره وبعدين تزغر انتي بس گولي يا الله وكل مشكله والها حل
امي گامت وسالت ام معن //وينه معن خلي يجي ياكل
ام معن //لا هو من يجوع ينزل وياكل هذا شغله بس اكيد صعد يرتاح
امي رفعت ايدها بالدعاء //الله يريح گلبه ويستره

گعدنا واكلنه شويه لان ما نحس بلذة الاكل وراحت امي غسلت ولحگتها ام معن زينب وعلاوي بقوا
ياكلون وانا صرت اجمع بالصحون وبعدها صبت سماح چاي واخذته الامي وام معن وانا بقيت اغسل
بالصحون وارتب المطبخ لان شفتها مو حلوه ناكل ونگوم ولحگتني سماح وهي تكلي

: مراوي علوا تصيرين من قسمة معن اقلها نحس بشي جديد بتغيير ولا هالضيم العايشين بي
باوعتلها = هسه مو وكت هالحچي
سماح //يا مو وكته ما شفتي شلون اجه ويباوعلج ويحچي وهو يگل الامي لا تخافيين خاله
= وج سماح اسكتي احنه بياحال
سماح //ليش اسكت ما شفتي محد اجه ولا اتصل لا خال لا گرايب وعمتج امل شردت هي ورجلها
بدون حتى ما تعرف شصاير

= عمه امل حالها من حالنه هم تخاف على ولدها وبناتها
: ما كلت شي بس شوفي البيت والخير ياريت تصيرين من وصيبه وانا اخذ ابن حماة عمتي
= سماح اسكتي شنعرف شنو راح يصير
سماح //وشصار عركه وهسه يصير الها حل
=وج ياحل نسيتي الي صار بينه والناس الي هجموا وما ندري شصاير وانتي تفكرين اصير المعن لو ما اصير
كافي خلي نطلع عيب هسه المره تگول شيسون بالمطبخ
طلعنه وام معن تگول //شنو خاله تعالن اگعدن شنو جايات تشتغلن
جاوبتها =لا ما سوينه شي

نزل معن  وسلم علينه وباوع الامي وهو. يگول //خاله لو تبقون اهنا احسن
امي // لا خاله مشكور ما قصرت الي سويتو محد يسوي بس اولاد الاصول
ام معن //بيتكم هذا ام امين
:رحم الله والديج والله يدوم البيت واهله بس لازم نروح يم الولد ونشوف شصاير نعرف ونتاكد

معن //بكيفج خاله هسه اتحضروا حتى اخذكم
امي //لا خاله ولو نسوي عليك زحمه اتاجرنه سياره ونروح بيها
معن عگف حواجبه //شنو هاي شتحچين انا اوديكم
:لا والله ما قصرت تبقى يم امك، بس على عرفك بلكي سياره
ام معن //اي ماما خابر حسين ابن جوارينه عنده سياره كيا يوديهم احسن
امي بابتسامه باهته //ايي مثل ما تگول الوالده

معن باوع الامه وطلع التلفون وخابر الولد وباوع النه //هسه يجي يوديكم
خمس دقايق واجه السايق ومعن گال// اروح وياكم بس امي ما قبلت // تسلم خاله فضلك ما ننسا
معن //اي فضل خاله انا حاضر الكل شي
امي رفعت اديها بالدعاء //ان شالله بالافراح نجازيك
معن ابتسم وباوعلي امه گالت //اي ان شالله عن قريب لان شفتله  بت حلال گرايبنه وهم مدرسه وخوش بنيه
ان شالله بس نتمم كل شي نعزمكم

امي ردت // ان شالله بالتوفيق والله يمهله ويفرحج بي وتشوفين اولاد اولاده
شفت معن ضاج وما قبل على كلام امه الي ردت على امي //بحياتج ام امين وان شالله تفرحين بالولد
والبنات والله ياربي ايفكم من هاي المصيبه
رحنا للسياره وصعدنا وره وامي تمشي وتدعي الام معن بطول العمر وان شالله يخليلها ابنها الي وصلنه للسياره
وهو ايگل الامي //خاله لا تهتمون الشي ان شالله تخلص على خير وترجعون البيتكم وكل شي يتصلح

امي //الله يسمع منك ويخليك ويسترك انت ما قصرت
معن //لا خاله ما سوينه اله الواجب (باوعلي )انتم عزيزين علينه اي شي تحتاجونه بس خلي امين يرمش
: مشكور يمه نعم الله عليكم وجزاك الله الف خير الله يخليك الامك ويستر عليك
معن //خاله انا دليت الولد وانتي خابري امين حتى يدليكم وابد لا تطلعون واي شي تحتاجونه خابروني
امي //ان شالله خاله مع السلامه وان شالله تتهنى بخطبتك وزواجك ويصيرون عندك ذريه صالحه

بهذا الكلام كأنما  امي قطعت اي امل بان ننجمع انا ومعن وما اعرف ليش
وطلعنه بالسياره الي بقت تمشي وانا عيوني ما بطلن دموع ما اعرف ليش وعلى شنو بقت السياره تمشي تقريبا
نص ساعه او اقل لمن ما دار السايق على امي وكلها //خاله بلا زحمه خابريلي واحد من الولد خلي يدليني الطريق
:اي يمه هسه (اتصلت امي على امين وانطت التلفون للسايق الي كله اندليت )
وصلنه ولگينه ولد اكبر من امين منتظرنه بالباب
الشقه چانت بالطابق الارضي هو بس شافنه گال الامي
:اتفضلوا خاله اهنايه هلا بيكم

وفتح الباب لگينه امين وصادق منتظرينه بالصاله امي سلمت ع الولدالي چان اسمه جهاد وبس شافت اخواني صارت
تبچي وهي تگول // يمه شصاير شلون هيج صار بينه
جهاد //خاله على كيفج اگعدوا وارتاحوا
امي باوعتله وهي تبجي //يمه ياراحه لو تشوفون الصار بينه وانوب ابوكم ما كو لا خابر لا گال
امين// خابرني يمه خابرني

: اي يمه وشصاير فهمني
امين نفخ //يمه احنه ما ندري حالنه من حالكم انتي خابرتيني وجهاد جابني للشقه وصادق راحله محمد ابن ابو
باقر واجينه لهنا
امي باوعت الجهاد // يمه ما قصرت الله يستر عليك
:خاله ما سوينه اله الواجب ارتاحي
امي //خاله شرتاح وانا ياساعه يدخلون علينه ويكتلون الولد وهمه يصيحون احنه نريد الحريم ما
ندري شنو القصه كل شي ما مفتهمين (باوعت الامين ) لو ابوكم الي ما نعرف عنه اي شي لا اتصل
ولا گال انتو وين شصار ما صار بيكم

جهاد //خاله هم اعذري الرجال ما يعرف شيسوي المصيبه چبيره
: يمه غير اتفهمونه
امين نفخ وكال //يمه مثل ما سمعتي مصيبه ومصيبه چبيره وما نشوف يصير الها حل
امي //اسم الله يمه لاتحجي هالشكل ان شاالله تنحل
صادق // شوف امي شتنحل وجمال خاطفله ابنيه بسيارته ومن صايره تصيح وتريد تشمر نفسها مگلوبه السياره
وماتت البنيه وهسه اهلها گالبين الدنيا
كلنه اتفاجئنا وامي گالت // صادق يمه تحچي صدك

صادق //اي شنو قابل اتشاقى
امي تضرب على خدها //يبووي الله لا يطيك ياجمال شمحصلين منك بس التعب
امين // اي ناقص شتترجيين منه
امي //وصدك هوه مات وياها
امين //  اي مات وخلانه ما نعرف شنسوي لو شلون انسدها

امي ضربت على خدها واحنه صرنا نبچي ما نعرف عليمن على جمال لو على العشره لو على نفسنا
امي صارت تبچي بصوت عالي وهي تگول// ليش ولك ليش هيج سويت بحالك وسويت بينه ليش
خايب عمه راح شبابك الحلو حرامات اوووف يمه ما ادري ابچي عليك ما ادري على الصار بينه
من سولف معن الله يخلي وكال جمال خاطفله بنيه وميت هوه وياها كلت يجوز چذب بس هسه صدكت

امين گال الامي //كافي يمه جمال وهو عدل حقير وهو ميت بالينه بفضيحه ومصيبه ما ندري شلون نطلع منها
امي // اااخ يمه امين وابوك شيگول
صادق باستهزاء // ابوي ما اتصور يبقى عايش وره ما مات جمال اصلا لا اتصل ولا گال اي شي
:هاا

امين // اي يمه انا اتصلت بي كل الگاله الي ضموا نفسكم ولا تطلعون
جهاد // خاله هسه رايح الوكت اخذي البنات وروحي الوحده من الغرف والصبح ايحلها الحلال
وانت امين اخذ صادق وعلاوي وناموا بغرفتي
امين //وانت
جهاد // اني اروح انام بالورشه مثل كل يوم وحتى البنات ياخذن راحتهن

امين //لا جهاد شلون حچي هذا شنو تنام بالورشه تطلع من بيتك
جهاد مشى صوب الباب وهو يگول //هذا بيتكم ناموا وارتاحوا( واتقرب يم امي باس راسها )
خاله ام امين ما طول ولدج وبناتج يمج وهمه سالمين كل الي يروح وراح الف فدوه المهم انتوا سالمين
امي ما جاوبته بس تبچي جهاد طلع وهو يگول// اني خال بالثلاجه مخضر وفواكه وخبز وجبن واذا يعجبكم اطبخوا
المهم لحد يطلع بيناتنا التلفون واني امر عليكم
امين //تسلم جهاد  ما قصرت

راح جهاد وامي سدت الباب ورا واحنه گاعدين والسكوت هو سيد الموقف الى ان حچى صادق وگال
خلي انگوم انام لان كلش تعبنا
امي //اي بس خلي انام كلنه سووا كل شي يصير
صادق //شيصير يمه محد يعرف بينه احنه اهنا والكاتبه الله يصير
امي //والنعم باالله هاي تالي الدلال والعيطه ابوك اذا راد يحچي جمال سندي حزام ظهري جمال ابني افديله
ويلادي تلاثتهم خوش سووا بينه تاليتها خاطفله وحده وما ندري مني وبت من وليش
امين //يمه بعد هذا الصار امر واقع غصبن ما علينه نتقبله

امي //احنه ما النه شغل
امين يهز بايده //شنو ما النه شغل من دون بيوت گرايبنا اجو على بيتنا وصاروا يرمون ويتهددون يمه الناس تدري
بي عايش عدنا وغصبن ما علينه احنه مسؤولين عنه
امي // امين يمه انت خابرت ابوك
:اي خابرته چان مكسور وگوه يحچي وگال اطلعوا من البيت وديرو بالكم على نفسكم
سماح //والله سووا زحمه شعجب ما سب ما فشر
امين //لو بيده كل شي يحچي بس تلكينه محتار

امي // ايي هم حقه المصيبه چبيره
صادق //شوف امي عبالها محتار بينه تلگينه محتار شلون يطلع جمال وياخذه يدفنه
رن التلفون امين گال //اسكتوا هذا ابوي
جاوبه // الو ها بابا
:اي احنه ابيت جهاد صاحبي
:اجت امي واخواتي هذول يمنه
:وانت بابا وين وشنو راح تسوي

: ايي بابا مي خالف (امين باوع النه وهو فاتح عيونه ويهز براسه ويگول ) بابا على كيفك لايصير بيك شي
:الله يرحمه هسه مو وكت الحچي خلي انطيك العنوان يجوز تريد تجي
: اي طبعا لازم تشوف حل وهم لازم تجي ويانه

وانطا امين العنوان الابوي وبعدين سد التلفون وهو يباوع ويهز بايده ويگول
:لو واحد من عدنا ميت طالب ماسووا علي هالشكل حتى صوته مبحوح يحاچيني وهو يبچي
امي مسحت دموعها وتگول //لاتلومونه يمه ابن اخو  ربا وتعب علي وهم راح شاب
صادق // ايي شاب طايح حظه يضحك على بنات الناس
امين //كافي صادق ياالله خلي انام

دخل صادق وامين للغرفه وانا وسماح وزينب ويانه علاوي دخلنه للغرفه الثانيه وامي بقت بالصاله نعرف
خايفه علينه
احنه من التعب والخوف الي مرينه بي نمنا ثاني يوم الظهر اجه جهاد وره ما خابر امين وهو جايب غدا من المطعم
وهم معن اتصل بامين وساله اذا محتاجين شي وامين اتشكر منه

بالليل اجه ابوي ودخل علينه وهو متنگب بالچفيه وعيونه ما بطلت تنزل دموع صدگوني من شفته
اتمنيت يكون ميت ويه جمال گعد بدون ما يحچي وما بطل اتصالات بناس وكل همه انو ياخذ الجنازه ويدفنها
الي عرفته من خلال كلامه بالتلفون انو اهل البنيه محاوطين الطب العدلي الي بي جثة جمال يتمنون بس احد يجي
ياخذها حتى ينتقمون منه ويكتلونه وابوي ايگلهم شلون ما يندفن ونسمع الي يحچون ويا ناس تعيط بصوت عالي
وناس تحچي بعصبيه ويمكن حتى يسبون بجمال

نمنا وگعدنا الصبح  سوينه ريوگ وشفنا ابوي كاعد ويدخن وهو بس يبچي خلينه الريوك گدامه
ورحنا سوينه ريوگ الامين وصادق الي چان كلش مقهور لان ما يداوم وراح تفوته دروس بس
انا فهمته انو ابو باقر راح ايفهم المدير ويعتبروك مجاز الى ان الله ايحلها

المشكله احنه طلعنه بطرگ الملابس الي علينه هاي تلث تيام وحتى اخواني امين بملابس الشغل وصادق بملابس
الدوام امين اخذ ملابس من جهاد وانطى الصادق وسبحوا بس انا والبنات بقينا نسبح ونرجع ملابسنا علينه بعد
ان نغسلهن ونشفهن بسرعه يجفن لان چان نهاية شهر الثالث والجو حار بالبصره يعني مو مثل باقي المحافظات
انا وسماح وزينب كتلنه الفراغ وقررنا انا وسماح انظف الشقه اقلها نگضي وكت وفعلا بدينه بالمطبخ رتبنا
ومسحنا الكاونتر هي الشقه زغيره مال نفرين يعني بسرعه تتنظف بعدين رحنه طبخنه الغدا
واحنه نشوف ابوي منتچي على دوشگ بالگاع وهو منگب ويبچي وبنفس الوكت تلفونه ما بطل اتصال لو هو
يتصل لو ناس تتصل بي

امي گاعده على صفحه وساكته وره المغرب نريد انسوي العشا انا وسماح ولو محد يشتهي ياكل اجه امين وگال
حضروا چاي زين الحجي جاي علينه
سالته = منو الحجي
:صاحب الشغل يريد يجي يشوفنا
= گلت الابوك
: هسه اگله
راح امين وامي گالت السماح// تعاي شيلي الفراش بسرعه

وانا سويت الچاي وحضرت الاستكانات واجه صادق فهمته من يجي الرجال يصبله چاي هو والويا
اندك الباب بعد ان جهاد خابر امين ورحنه للغرفه وامين فتح الباب والحجي اتحمحم ودخل وهو يگول ياالله
سلم على ابوي وعلى امين وصادق وكعدوا
ابوي //الله بالخير
الحجي //الله بالخير

وصادق جاب ماي وصب الچاي الحجي گال //اشلونك ابو امين
ابوي //اشلوني حجي هاي المصيبه شلوني (ابوي بچى )
الحجي كال //افه عليك ابو امين تبچي هاي الزلم كل شي يصير عليها
ابوي بصوت مكسور //حجي ابچي على جمال الي الهسه ما مدفون على شبابه الي راح حرامات
الحجي //الله يرحمه ما سووا شي زين (جر نفس ونفخ ) المهم ابو امين اليوم العصر اجو جماعه وسالوا على
امين وقبلها خابرني نسيبك ابو عبدالله وهم جايين علي نفس الجماعه

ابوي //ايي هم خابرني
الحجي //يعني شنو معناتها ابو امين
ابوي //والله ما ادري
الحجي // لا تدري امين مو زغير معناتها يردون ايكتلون امين لان جمال مات فانتم ديرو بالكم

امي بس سمعت نشغت وخرطت خدها وصارت تضرب على وجهها انا لزمت ايدها وگتلها
=يمه الله يخليج اسكتي خلي نسمع
امي سكتت وهي بس دموع تنزل الحجي گال الابوي //من اجو الجماعه گلولي حجي ندري بامين يشتغل يمك
وهم ندري بيك تندل مكانه
انا جاوبتهم // اي صدك يشتغل عدي وصدك اندل مكانه
:اي حجي دلينه وين
:شنو بابا ادليكم منو گللكم انا زعطوط لو اتهدد
:لا محشوم حجي بس احنه طلابت ثار

جاوبتهم //على نفسكم انا رجال غريب وامين مجرد عامل يشتغل عدي وبس صارت الحادثه لكف اخو وراحوا
ما ندري وين
واحد من الهداده //ايي حجي كلامك كله صدك بس انت ابن عشاير وتعرف امين وابو وعشيرته مطلوبين واذا
نصادفه يم احد نكتله هو واليفزعله
:عمي جاي اگللكم الولد بس سمع دار وجهه وراح وين ما نعرف
الحجي باوع الابوي وگله // همه راحوا وهسه انا اجيت اگلك الناس دمها فاير والعرض عزيز والسوا ابن اخوك
شي چبير ياريت بس خاطف البنيه لا وانوب ماتت تدري هاي شراح يترتب عليها
ابوي سكت ما حچى ولا دافع عن جمال الحجي گله //لذلك ابو امين انت لا تسكت الناس بايعه ومخلصه ولو
بايدهم مو بس يمنعونكم ما تاخذون الجنازه لا صدك ايطلعونه ويحرگونه گدام الناس انت خلي شيخكم يتحرك
ع الاجاويد

ابوي //والله حجي ابو عادل ما مقصر الرجال وحتى التهديد وصل البيته خو هو الرجال بعيد بس همه هددو
الحجي //بس مو مثلك انت واولادك ذوله لو يصح بايدهم حتى يعتدون ع النسوان
ابوي //والحل حجي
الحجي // انا اگلك خويه ظلتكم اهنا بيها خطر عليكم لازم تطلع منا وباسرع وكت ممكن تره ثق من يدرون لو
يشمون خبر يحرگون الشقه عليكم وارجع واگول حقهم

ابوي هز راسه وقبل لا يجاوب الحجي گله // اسمعني خويه(مد ايده على جيبه ) هاك هاي مفاتيح بيت بالتنومه
هي گاع زراعيه وبيها بيت بسيط اخذ عيالك وروحو اكعدوا بيها على ما تسوولكم حل هي بعيده عن العين
ابوي //طال عمرك حجي فضلك ما ننسا
الحجي //الفضل ال الله امين ابني اسم على مسمى ربى عدي وحاسبه واحد من الولد الله شاهد
امين //الله يخليك عمي

الحجي //البيت قديم بس ينسكن انا اشوف الفجر جهاد يجيبلكم سياره وترحون اگعدوا بي على ما الله يسويلكم حل
تره هي شده وتزول ما تبقى
ابوي //كثر الله خيرك مجازاتك على رب العالمين
الحجي مد ايده بجيبه وطلع فلوس وانطاهن الامين //هاك بابا خليهن جوه ايدك واشتري الكم فراشات وغراض
على ما الله يسويلكم حل وانا هم ما راح اسكت راح اتحرك واشوف ناس بلكي اياثرون على اهل البنيه

اخذهن امين وهو ساكت الحجي گله //لاتضوج يمته ما تجي شغلك موجود وراتبك يوصلك كل شهر عسا ما تبقى
عشر سنين لا تهتم
الحجي باوع الابوي وهو يگله //امين خوش ولد وعمره ما دنت نفسه لو على فلس حرام لذلك يمته ما يجي مكانه
محفوظ وشيريد يدلل ابنك متربي وشريف
حسيت بامين يريد يبچي وابوي اتشكر من الحجي الي طلع وجهاد گال الامين
: الفجر اجيب سياره واخذكم البيت الحجي

وراح جهاد والحجي وامي طلعت وهي تگول //الله لا يوفقك ياجمال مو متت وبعدك ما مدفون الله لا يرحمك
ع السويته بينه
اول مره اسمع امي هيج تحچي بعصبيه وصوت عالي وابوي ساكت اجه صادق گلها
: يمه اسكتي مو وكت الحچي هسه
امي //چا يمته هاي سنين ومنيين وانا ساكته وماكله تبن وجمال يصول ويجول وهسه من مات الناس تدورعليكم
تريد تكتلكم ابداله لان النگس خاطفله بنيه
ابوي گلها //انچبي وسكتي يابت النعال ياهو النگس

امي باوعت الابوي وخلت عينها بعينه //النگس ابن اخوك الي سووا هاي المصيبه وخلى الناس تتهادد علينه
وهمه يكولون احنه نريد الحريم لو متعارك وكاتله واحد اگول زلم اتعاركت ابيناتهم بس بايگله مره يصير
اكبر نگس
ابوي //اسهيمه انچبي واسكتي لا اگص السانج
امي // ايي الك حق تگص الساني مو سبيت العنب
اجه امين وكال //كافي يمه كافي منا ناس لا تسمعنه

امي اتحسرت //ايي يمه لا تسمعنه الناس ويجون الهداده ايكتلونكم الخاطر جمال خطيه مشتريله بيت العمه
والناس غادرين بي وكتله واحد
امين // يمه روحي للغرفه باچر الفجر جاينه جهاد ونمشي
امي صارت تبچي// ايي يمه حوبتنا ما ندري ورامن اتجهولنه من بيتنا ومنطقتنا وما ندري وين الوكت يذبنا
امي دخلت ويانه وامين اجه وهو ينفخ ويگل الامي// يمه الحچي بعد ما يفيد الموضوع چبير وبس الله يستر
هزت راسها امي //ادري يمه وحتى خابرت خوالك وگالولي المصيبه چبيره

اميين //اففف الله كريم هاچ يمه هاي الفلوس الي انطاني اياهن الحجي ضميهن الله اعلم شكد
راح نبقى وشراح يصير بينه
امي اخذتهن وگالتله //شگد ذني
امين حچى بصوت ناصي //مليون يمه ضميهن عاد نصرفهن اكل
:ايي يمه وانا هم جبت فليساتك الضامتهن
امين يباوع الامي باستغراب وهي هزت راسها // ايي يمه ضامه الك فلوس من التنطيهن اليه تره وداعتك
شغلك على عيوني ودوم ادعي الله يوفقك

ابتسم امين وباس راسها وراح ينام والفجر اتصل جهاد واجه امين گعدنا گال خلي نطلع وراح ويانه جهاد مشت
بينه السياره اكثر من ساعه بعدها دخلنه على منطقه زراعيه مابيها هلگد بيوت الى ان وصلنه وره ساعه القطعه
مزروعه حشيش بقت تمشي السياره وصلنه يم بيت مبني بلوك دخلنه البيت شفنا قديم بلوك والارضيه مصبوبه سمنت
غرفتين ومطبخ وديوانيه وصحيات فارغ ما بي اي اثاث ولا اي شي والبيت مليان تراب صرنا واحد يباوع للثاني
واحنه ساكتين ابوي طلع وره البيت وامي واحنه بقينا نباوع البعضنا امي كالت

: جهاد خاله ما طولك اهنا وياك السايق اريدك تروح وياي للسوك نشتري فراشات ونشتري بنكات (مراوح ) الدنيا
حاره والبيت كل شي ما بي
جهاد //اي خاله مي خالف  وهم تندلين منين ترحين للسوك ومنين تجين
امي //هاا
جهاد //اي ام امين الطلعه هالوكت مو بصالح الولد الدنيا مگلوبه عليهم
امي //حسبي الله ونعم الوكيل ياالله خاله امشينه وانتن (باوعت علينه )نظفن البيت على ما اجي

هزينه راسنا جاوبتها = جيبي مكانيس وياج وصونده
وعلاوي اجه يم امي وهو ايگلها //يمه جوعان
امي غوركت عيونها وهي تگله //اي حبيبي هسه اروح واجيب اكل
من طلع جهاد وامي اسمع ابوي صاح علي وگله
:عمي خابر ابو حازم ودلي على مكانه لان هنا ماكو تغطيه
اي عمي مي خالف لازم تطلع قريب الشارع وبالشافعات تحصله الشبكه ضعيفه انطيني الرقم وانا اخابره
:اي هاك عمي وعود انا هم احاول اتصل بي

وراحت امي وجهاد وابوي گللها //جيبي بسط للديوانيه
امي ردت// ايي فلوس الحجي اجيب بيها غراض ليش مو گاعدين ابيتنا ليش ياربي

انا وسماح وزينب ما نعرف شنسوي لان حتى مكناسه ما لگينه امي گالت اطلعوا بره اگعدوا بالفياي على ما اجي
وراحت امي اتاخرت اكثر من اربع ساعات واجت هي وجهاد والسايق وهي جايبه طباخ غاز ابو عينين وقنينه وثلاجه
زغيره بس قديمه ومراوح اثنين وجايبه فراشات ومواعين ومسواك
سماح گالت الها //يمه ما جبتيلنه ملابس
امي //والله يمه نسيت اليوم تكزرن بهاي الهدوم وباچر اروح اجيب الچن

جهاد سلم على ابوي والولد وراح رغم امين لزم بي بس هو گال //لا مو وكتها ارجع الكم غير وكت
وابوي يوصي بي //خابرلي فلان وخابرلي علتان وانطيهم العنوان وهو يگله صار عمي ابطن عيني
ورحنه سوينه ريوك واكلنه  امين سأل امي //يمه ليش ما جبتي ملابس للبنات والنه
امي جاوبته //اتعمدت ما جبت
صادق //وليش باالله

امي //تشوفون هاي الغراض جهاد ما خلاني ادفع لو فلس كله من جيبه انوب اروح اشتري هدوم
امين //تحچيين صدك
امي //ايي والله يمه جهاد حتى الريوك اشترا صدك الزلم تبين عد الشده

وانا وسماح وزينب صرنا نغسل بالبيت وامين وصادق يركبون بالمراوح
وعرفنا بعد اهنا راح نبقى يجوز يوم ويجوز سنه ويجوز بعد ما نرجع
بيومها ما تغدينه لان اكلنه فايت وكت والمغرب وره الصلاة گلينه طماطه واتعشينا البيت وحشه
وكأنما عايشين بالصحراء ما نسمع شي وابوي گاعد بالديوان ابحده وندري بي يبچي على جمال
نمنا بعمق كلنه يمكن من التعب والخوف الي مر بينه وگعدنا الصبح تقريبا بالتسعه رحت اسوي الريوك وامي
باوعتلي وگالت //خلي نتريك ونروح انا وياج نشتري ملابس ونشتري تنور ونجيب مواد غذائيه

ابوي گللها //مو امس رحتي ما اشتريتي فد نوب
امي ردت علي //والله استحييت من الولد ما خلاني ادفع فلس احمر انوب اگله خلي اشتري هدوم وتنور وتمن وطحين
(باوعت الامين )يمه اميين عفيه عليك انت خوش ولد وتعرف شلون تصاحب

رحنا انا وامي واول مره ابوي ما يحچي مشينا من غير طريق گالت امي جهاد مدليها علي وصلنه ع الشارع العام
وگفت النه سياره تكسي وركبنه بيها امي گالت له للسوك خاله
وصلنه للسوك وبدينه تشتري ملابس امي اشترت دشاديش سود من باوعت الها گالت
: ايي يمه نلبس على مصيبتنا موعلى ذاك الصگط وحتى ابوج ما يكول متشمتات

ما جاوبتها ورحنه اشترينه تراكات للولد وبعدها اشترينه تنور ومواد غذاىيه جافه واشترينه ما طور ماي ورجعنه
وصار هذا روتينه اليومي بس صرنا نطلع بره البيت لان محد يجينه بقينه اسبوع وراها العصر اجه جهاد واجت
ويا خاله ام باقر وهي جايبه ملابس وفواكه ومخضر ومواعين احنا من شفناها صرنا نبچي وهي تحچي وتبرد علينه
وتكول //ان شالله يصير الها حل
ابوي راح يتمشى بالكاع واحنه كعدنا يمها وهي تسال بينه وعن احوالنه بعدين باوعتلي وگالت
: خيه ام امين انا دزاني معن عليكم يريد يخطب مروه يگول ما طول ابن عمها مات يعني بعد ما كو عذر

امي ردت عليها //خيه ام باقر احنه بيا حال ما تشوفينه ترديني افاتح طالب والله يذبحنه وما يرفله جفن
ام باقر //خيه حقكم بس معن وداني حتى افهمج هو متمسك بيكم
امي // ام باقر انتي عرفتي امه شگالت
:خيه لا تاخذين بكلامها تخاف على ابنها مو مال مشاكل

امي هزت راسها // لا المره ما چذبت گالت صدك ابني يريد بتكم بس انا ما اقبل اخذله وحده اهلها اصحاب
مشاكل وهم حقها تخاف على ابنها بعد شلون معن يدزج خيه هو وداج من دون ما تعرف امه لا خيه مو احنه الناخذ
ولد وامه ما قابله كليله خلي يشوف حياته احنه على گولة امه ناس اصحاب مشاكل

وراحت ام باقر وثاني يوم اجه جهاد ويا تلث زلم
وكعدوا بالديوانيه  ولان الديوان برانيه وبيها شباك رحنا انا وسماح وصرنا نتسمع للحچي عرفنا هذا الشيخ عشيرتنا
جاي  ويا اثنين وهم عرفنا انو الناس انطوا عطوه عشر تيام ولازم نتحضر للفصل چانت الناس تحچي
وابوي كل همه جمال اندفن لو بعده
واسمع الشيخ يگله //احترگت لشته عم على العشيره جهولها الساقط
ابوي ما حچى والشيخ رد علي //اي راحلهم سيد ورجال خيير وقبلوا ينطوهم الجثه امس اخذه السيد ودفنه بالنجف

امين سال الشيخ // وبيتنا وغراضنا
الشيخ //الله كريم وره العطوه تبين لو ترجعون لو تبقون تره عمي مو بس انتم كل الناس الموجوده
بالمنطقه (يقصد البصره) كلها اتجهولت وشالت والناس عافت اشغالها وعافت بيوتها وبس الله اليستر
امين //شيخنا هالتشوفنا تره طلعنا بطرك الملابس العلينه وخلف الله على الحجي الاشتغل عده وهذا صاحبي
همه انطونه فلوس واشترينه بيهن غراض واكل

الشيخ //مي خالف عمي اتحملو هاي العشر تيام وبعدها يصير خير
الشيخ باوع الابوي وگله //طالب لازم نودي للناس فرشه شگد عدك ما عدك
ابوي //هاا ابو عادل انت شتكول
شگول طالب هاي فسده ابن اخوك سوواها وانتم تتحملونها
ابوي //بس بعد ما متاكدين
الشيخ بنتر // اگلك طالب انت تغشم نفسك منين نتأكد من الموته هسه مو وكت هذا الحچي دبر النه فرشه

ابوي // ايي ان شاء الله
الشيخ //ياالله هم ياالله نروح
گاموا الزلم وطلعوا و ابوي باوع الجهاد وگله
عمي ولو اثقل عليكً بس اريدك تروحلي الهذا العنوان وهناك الولد يطيك خمس ملايين توديهن لابو عادل
جهاد //مي خالف بس الولد شلون يعرفني
امين //بويه اكتبله رساله للولد من نقالك ودز رقم جهاد
ابوي //مو شبكه ماكو
امين //انا اروح وياهم وانزل نص الطريق بس اتاكد وصلت الرساله

ابوي كتب مسج ودزا المن ما ندري وراح وياهم امين الي وره اكثر من ساعتين رجع وهو مشتري تلفزيون
وصحن ورسيفر وذاك اليوم عبالك عدنا حفله لان فعلا كتلتنا الوحاشه واشوف ابوي لو بيده يكسر التلفزيون
على راسنا لكن سكت وصار ابوي يطلع ويرجع بحكم العطوه وره عشر تيام صار لازم يگعدون للفصل وصار
لازم اخواني ما يحضرون ولا يوصلون لان حسب كلام الشيخ الناس فاير دمها وبس يردون يلزمون واحد من اخوتي
حتى يكتلونه ويبردون گلوبهم

/////////////////////////يتبع