رواية بعد فوات الأوان الفصل الثالث عشر 13 - بقلم آنين الليل

مروه
من اول ما خطت رجلي بالسياره  السوده بيوم الزفه عرفت هاي مو صدفه عرفت اكو شي ضامينه الي
ويمكن هاي رساله اليه انو راح تكون حياتي سوده مثل لون هاي السياره
اتقبلت هذا الشي وانا انا حافظه كل توصيات امي وعمتي امل والكلام الي سولفنه على الفصليه والفصل ولازم
كل شي تتحمل

وبيومها من اخذني وهو ساكت وطلع نام بغير غرفه وخلونه بدون عشا كله هذا الشي نذير اليه انا الي راح
اعيش وياهم
وانا اشوف رجفة امي وخوفها والصبح لمن راحن ابحدهن حتى بدون محد يسلم عليهن  حظنت امي وگتلها وانا ابتسم
= لا تخافيين عليه يبقى يوسف احسن الف مره من جمال المهم الله خلصني منه والي سوا يوسف ردة فعل للي
سوا جمال شوفي بيت احسن من بيتنا وهو ولد شاب لاتخافيين عليه اطمني

صرت اجمل بصورة يوسف بس حتى امي تهدا ومن طلعت وعمتي توصيني وتگلي
- احفظي رقمي رقم امج واخوج امين ما تعرفين الوكت شضاملج
وراحت امي وعمتي وانا ابتسم بوجههن حتى ايأمنن وما يخافن عليه وحتى ما يسولفن الامين وصادق وذوله شباب
ما اعرف شنو يطلع منهم
مجرد ما راحت امي وعمتي اجتني نفس البنيه وجابتبلي خبزه وكوب چاي وغابت شويه ورجعت وگالت
- خالي يگول تجمع الها ملابس وتتحضر

انا بدون ما ارد عليها طلعت جنطه زغيره وخليت بيها شكم دشداشه وملابس داخليه لان هي البنيه گالت دشداشه
فاانا ما خليت بس تراك واحد وعطورات واخذت الفلوس الي انطاهن الي امين وطلعت العشره الي سجلت بيها رقم
امين وعمتي وامي اتاكدت منهن وخليتهن ويه الفلوس بالوسط وضميتهن جوه القاعده مالت
الجنطه وياهن جنسيتي وشهادتي لان بصراحه خفت يعني عروس ويدز عليه خلي تلم ملابسها

بقيت گاعده شويه بعدين فتحت باب الغرفه شفت البنيه واگفه تنتظرني هي بدون ما تحچي نزلت قبلي
وانا نزلت شفت البيت صنطه عبالك فارغ هي وصلت للصاله وصارت عيني بعين يوسف رجلي واكف
وبدون ما يباوعلي
طلع وانا طلعت ورا هو فتحلي باب الصدر صعدت وطلع بالسياره هو يدخن هواي وانا ساكته اباوع للامام
وانا اسأل  بنفسي =هذا وين موديني

ورحنا على حقل العجول وخلاني كل شي اسوي غصبن عني وخوف منه من يوم الي اجه وگتله انا كل شي
ما اعرف وانجبرت وبيومها كفر بيه من الضرب والمسبه قررت كل شي اسوي لان انا مجبوره ومحد وياي
ولان بعدهم يطلبون ثار صرت اشتغل كل شي وبمساعدة ام بشير الي شلت الفلوس والذهب ضميتهن عدها
وصرت اشتغل وهي تعلمني  اعلف واورد واسرح واحش واجمع حطب واخبز بتنور طين
واطبخ على حطب ابد ما چنت احچي ويا ولا اسولف يجي اكله الله يساعدك هو ما يرد عليه

چان يجي يومين او تلاثه بالاسبوع دووم جيته العصر احضرله عشا ويغتصبني ويروح بدون اي كلام وبدون
اي مراعاة المشاعري چنت ما اعرف عنه اي شي بس اسمه وانو هو اخو البنيه الي خطفها جمال  والي انا اخذني
ابدالها فصليه

صرت اتمنى اغير فد شي بحياتي لكن اي شي مو بايدي اسوي لذلك قررت اتعامل ويا على اني انسانه خرسه
بدون اي كلام مجرد سلام واي سؤال ثاني يكون جواب ما ادري وهو اساسا ما يسالني عن شي

چنت مرات اگعد بالليل ابچي من الوحاشه والخوف وانا اتذكر امي واخواتي واخواني واتذكر اختي سماح والي
راح يصير بيها ويه هيج ناس وهي مو مثلي ما تكدر تتحمل

انا ابد ما حسيت بيوسف زوج الي ولا سند ولا اصلا هو معتبرني زوجه ومن اكعد بالگاع ابحدي اصفن على
حالي وارجع واگول  = مي خالف كل شي اقبل المهم افتكيت من جمال الي من اتذكره تلعب نفسي
وبقيت اشتغل وام بشير الله ينطيها تجي يمي وتساعدني وانا ولا يوم رحت لو شفت بيتهم لو حتى مرت بشير
او جهاله اجو يمي ما اعرف ليش ولا انا سألت ام بشير

اما اهلي فما ادري اي خبر عنهم ولا چنت اتجرا اساله او اطلب منه اروح اشوفهم او همه يجوني
وبعمري ما راح انسى لمن اجه هو وزوجته وامه الي صارت تتشفى بيه من قرر ان يبات بالمزرعه
وانا طلعت بره
رغم اجت ام بشير وتوسلت ان اروح انام ابيتهم لكن انا ما قبلت لان اعرف بي يريد الزله عليه حتى ينتقم مني
ويضربني لذلك نمت وانا گاعده اتدفى  على جمر الحطب الي طبخت علي العشا
الصبح گعدت لكيت روحي نايمه ومتغطيه ابطانيه ثانيه

كل هذا ما همني باي شي لان مجرد ما زمخت مرته عليه وامه اتشفت بيه عرفت يوسف هذا لا يمكن بيوم من الايام
ان يكون سندي ويحميني ومن يومها عاهدت نفسي انو اعتبر حالي يتيمه وبنفس الوكت ارمله
اي لا تتعجبون ارمله رغم وجود رجل متزوجني لكن احنه اغراب عن بعض فاانا مهمتي اشتغل واعيش نفسي
بلي ايجيبه من اكل وياخذ حقه مني تعب واغتصاب

اي شي ما يربطني بي وچنت اتحاشا  ومن يجي اطلع الف شغل وشغل يعني صرت اغلبه بالشغل بحيث ما اخليله
اي مجال يطلب مني اي شي

بقيت على هذا الحال اكثر من شهرين واتمزقت عباتي وطلبت من ام بشير ابره وخيط واتعمدت من يجي اطلعها
واخيطها هو يباوعلي وانا اخيط ما حچى اي شي وره يومين جاب جنطه بيها ملابس وعبايه

ومن اخذتهن ما اتشكرت منه ولا هو حاجاني وصار اكثر من اربع تشهر وهذا حالي الى ان فد يوم اجيت العصر
وشفت سياره چبيره تنزل گواني وچياسه نايلون ما اهتمييت رحت اخذت الابقار المكانهن وبانتظار ام بشير تجي
تربطهن وياي حتى اخذ الجت للعجول وبيومها اجه بسيارته وگف ويه العمال الي ينزلون الگواني
وكتها احنا بداية  شهر الثالث وغيمت الدنيا توني اريد اسوي عشا اجه يوسف وگلي

:: ترحين تشيلين الكواني وتدخليهن للمخزن
فتحت عيوني مستغربه من طلبه = مو لازم العمال يشيلوهن
رد عليه بعصبيه :: العمال راحو يجيبون الوجبه الثانيه وغيمت واذا مطرت ولگيتهن مبللات انتقم منج افتهمتي

هو راح للغرفه وانا رحت يم المخزن واشوف الگواني والجياسه هواي حمل سياره جريت نفس وبديت اسح
بالگواني الي ما اعرف شگد عددهن ومطرت الدنيا وانا جوه المطر القوي صرت اشيل بسرعه واخلي وبعدين
صرت ارتب احس روحي انتهيت من التعب وبردت حييل مطر وظلمه وجوع

صدگوني اذا اگللكم طلع الفجر عليه وانا اشتغل بحيث صرت ما احس برجليه وگلبي صار يدك ما اگدر اتنفس
صارن دموعي يجرن عرفت راح اموت لكن حاولت اوگف وان اجر بالنفس لمن ما اجه باوع بدون ما يحچي باوع
وراح اكيد اجه يشوف اذا ما مرتبتهن اكيد ناوي يكتلني ودخلت ام بشير الي تباوعلي وهي متعجبه وتسألني
من يمته انتي اهنا
ما جاوبتها لان ما عدي قابليه احجي باوعت وافترت بيه الگاع وگعت

ام بشير صاحت الچنتها الي اجن وشالني ودني للغرفه وخلني على الفراش وجابت ماي غسلت وجهي وضربتني
على خدي كعدت وانا اباوع والدنيا تفتر بيه راسا كعدت ذبيت من راسي
ام بشير كالت الچنتها خلي تسبح دفيلها ماي وفعلا الينيه دفتلي ماي واخذتني هي وام بشير الي باوعت الچنتها
وكالت

روحي سويلها ريوك مبين من البارحه كل شي ما ماكله
ودخلت وياي للحمام واتا ارجف سبحتني وغيرت ملابسي ورجعتني للغرفه
واجت مرت بشير جايبه الريوك وام بشير كالت //اكلي لو شويه
انا چنت جوعانه واكلت بيض وشربت چاي لكن بسرعه اتقيأته

وما گدرت اوگف رجعت اتمددت وانا الهث ونفسي مگطوع =خاله ما اكدر اوگف
ام بشير عرفت انا خايفه لان ما اگدر اروح اسرح جاوبتني //نامي وارتاحي ما عليج
=خاف يجي ومن يشوفني ...
قاطعتني وكالت //اصلا هسه اخلي بشير يخابره ويجي يشوفج شنو راح تموتين لازم ناخذج للطبيب

جاوبت بتعب =لا مو هسه الظهر خلي ايخابره وانتي اخذيني للطبيب وجيبي الفلوس وياج
ام بشير //مي خالف بس ارتاحي (وبچت ) نامي خاله
رجعت نمت ما ادري شگد يمكن العصر اجه يوسف ما اعرف بيش چانت الساعه اجه وكف بالباب وهو
يحچي ويه ام بشير :: گليلها تگعد
ام بشير //خاله ما تگدر تگعد
جاوبها باستهزاء ::كعديها
اجت يمي وهي تگلي //خاله مروه شو اگعدي اكليلج لگمه

گعدت وانا اباوع الها ونفس الشي الگاع تفتر بيه هي گالت اگعدي وكومي غسلي مجرد ما وگفت وگعت
فتحت عيوني وانا نايمه على السديه والدكتوره اتگلي //ها شلونج هسه
اتثاوبت وجاوبتها بتعب = الحمد لله
بعدهي نفسج تلعب
هزيت راسي وكتلها = ايي ومعدتي حييل مأذيتني
الطبيبه سالت ام بشير //انتي امها
هزت راسها //لا

شتعوديلها
انا قبل ما تجاوب ام بشير رديت = دكتوره الله يخليج نيميني مستشفى
باوعتلي باستغراب وگالت //هو انا مقرره تدخلين مستشفى بس ليش هذا الاصرار
ما اتحملت بچيت الطبيبه گالت // ممكن اعرف ليش تبچيين
ام بشير //دكتوره البنيه تعبانه ماله من شغل الحقل والسروح
الطبيبه بدون اهميه //ايي هذا الي ينطي للعشاير
ام بشير //لا دكتوره گولي هاي الي تروح فصل

وبدت ام بشير تحچي على معاناتي ،والطبيبه متفاجئه ا وهي تقيس ضغطي لزمت كف ايدي كالت //شنو هاي الخشونه
= من الحش وتجميع الحطب
واهلج
= ماعدهم علم كل هذا الي سويته الخاطر اخوي
يعني تردين تدخلين مسشفى حتى ترتاحيين
= دكتوره راح اموت

والطبيبه تهز راسها  گالت لام بشير //صيحي الزوجها
طلعت وانا اتوسل الها //الله يخليج مو تكليله والله يذبحني
دخل وهو يگلها :: السلاام عليكم
الطبيبه بدون ما تباوعله // عليكم السلام
(ودگت جرس ) اجت ممرضه گالت الها //اخذيها للغرفه يمج وخليها ترتاح على ما تطلع نتيجة التحليل
باوع للطبيبه هي ما انطته مجال يسأل //استاذ هاي زوجتك

باوعلي وهز راسه يعني ايي
الطبيبه //هسه ننتظر نتيجة التحليل وتجوني هي ما تكدر تمشي حاول اتشيلها اذا ما عندك عربانه
الممرضه بحزم //تعال اخذ العربانه الي بغرفتي

هو ما حچى اي شي راح جاب العربانه واخذني للمختبر بالعربانه وسحبولي دم ورجعني الغرفة الممرضه الي گلتله
-خليها ع السديه
هو رد :: ليش مو هسه تطلع النتيجه ونرجعها للدكتوره
هي بحزم // ونرجعها شنو المشكله اذا اتمددت  ما تشوفها شلون تعبانه مو الطبيبه كالت خليها تنام ع السديه

اجه شالني خلاني على سديه اتمددت وانا احس بمعدتي نار اكثر من نص ساعه طلع التحليل الممرضه گالت
اخذ زوجتك وادخل ع الطبيبه وخلاني بالعربانه وانطى التحاليل للطبيبه باوعت وسالته
- انتو شگد صار متزوجين
جاوبها :: تقريبا اربع تشهر
باوعتله // انت شتشتغل
::موظف بدائرة ...

- البنيه تعبانه  ولازم على الاقل تنام فد اسبوع او خمس تيام بالمستشفى ضروري
رد عليها :: دكتوره يا مستشفى
- مستشفى  حكومي لان يمكن حالتك ما تساعدك بس اذا تريد اكو جناح خاص موجود
هو حس على كلامه :: مو هذا قصدي بس ليش
باوعتله //هذا السؤال انت تجاوب علي
:: انا مو طبيب حتى اجاوب

- انت مو طبيب لكن انسان ما اريد ادخل بغير امور زوجتك عدها جرثومه بالمعده نتيجة فقر الدم الحاد ولازم نخليها
تحت المراقبه لان حالتها جدا ما تسمح بالوقت الحاضر ان تطلع ولان الحمل مهدد بالاسقاط
هو بتعجب :: الحمل
الدكتوره باوعتله بنص عين //اي زوجتك حامل والطفل مهدد بالاسقاط وهذا الشي خطر على حياتها لان هي تقريبا
دم ماكو بجسمها نتيجة سوء التغذيه هاك (انطته ورقه ) اخذ هاي الورقه وبوجهك للمستشفى
الطبيبه باوعت لام بشير // اخذيها بره

طلعتني ام بشير وهو بقى يمها وره عشر دقايق اجه وانا ما اكدر افتح عيوني ركبني وره وام بشير بالصدر
من سمعت الطبيبه كالت حامل الدنيا ضاكت عليه انا حامل والمن وليش الهذا الي ما بكلبه ذرة رحمه
هو گال بهدوء // ام بشير تبقيين يمها بالمستشفى
- اي خاله مي خالف
دخلنه للمستشفى  وحجى ويه الاستعلامات وجاب عربانه واخذتني عامله الردهه مكتوب عليها الجناح الخاص

دخلتني الغرفه واتمددت على السرير اجه گال الام بشير::  ابقي وياها وانا اروح اجيب جنسيتها وملابس الها
ام بشير // رووح الله وياك
::انتي ديري بالج انا ما اتاخر
من راح اجت العامله على اساس تشوف الغرفه انا صحتلها وشاورت ام بشير تنطيني فلوسي وطلعت العشر تالاف
الي بيها ارقام تلفونات اهلي وشلت عشر تالاف انطيته للعامله وگتلها 
= هاي الج وانطيني مبايلج اخابر منه دقيقتين بس
اشرت لام بشير توگف بالباب اخاف يرجع يوسف ويشوفني اخابر العامله باوعتلي گتلها
= اخابر اهلي واطمنهم عليه

انطتني التلفون وبوكتها كأنما توجتني اميره اخذته وانا ارجف وما مصدكه راح اسمع صوت امي لو اخوي
بعدين فكرت گلت = لا خلي اخابر عمتي وافهمها بسرعه لا يجي كل شي يصير
واتصلت بعمتي امل وانا ارجف  رن ما جاوبت اتصلت مره ثانيه وثالثه هي جاوبتني
-الو
جاوبتها وانا ارجف = الو عمه انا مروه
عمتي بين الفرح والاستغراب احس گلبها يريد يطلع وهي تكلي  //ولچ چذب انتي مو مروه
نزلت دموعي = لا عمه مروه انا عمه اسمعيني هذا مو رقمي انا بالمستشفى
عمتي نشغت //اسم الله عمه شبيج

حاولت الزم نفسي وابين الها انا زينه = ما بيه شي بس سويت هالشكل حتى تجوون وتشوفوني عمه كون اليوم نص الليل
انتو يمي اريد اشوفكم راح اموت اذا ما اشوفكم
-استهدي بالرحمن  عمه انتي ما بيج شي
=بيش احلفلج ما بيه شي
- زين هسه هسه انا وامج نجيج

=وامين عمه وما اريد احد يدري انتي فهميهم بطريقتج
-صار هسه اربع ساعات واحنه يمج
=عمه تره اذا ما تجون اليوم بعد ما تشوفوني
-لا عمه جايين لا تخافيين انتي باي مستشفى

وانطيتها العنوان ورقم الغرفه ورجعت النقال للعامله بعد ان مسحت الرقم
ام بشير بذهول //خاله شسويتي تدرين من يسمع شيصير
جاوبتها بعدم مبالاة = خاله شيصير خلي يصير اريد اشوف امي
-والله خايفه عليج
= لا تخافيين ما راح يصير بكد الصار

//////.  ///////..////////./////////...//////./////../////...///////

يوسف

الي سووا جمال بيه وباخوتي وحتى بعشيرتي مو شويه واعرف الناس تحچي وتتقول انو يجوز
معتدي عليها
ومغتصبها الي عرفته انو جمال ما عنده بس اخت وحده وعايش ابيت عمه وخاطب
بت عمه من اكثر من سنتين

يعني جمال محافظ على عرضه ويلعب على اعراض الناس واتمنيت يرفضون من طلبت منهم
يجيني امين  وابوحتى اكتل ويصيرلي عذر وهم اتمنيت يرفضون الفصليات لان هذا الشي استنكرو
هواي ناس وحتى رجال دين لكن همه قبلو وبيوم الي قررت اتزوج خطيبته وانا اعرف بهاي السنتين شنو 
الي صاير بيناتهم

يعني بالعقل واحد خاطب وحده سنتين وعايش وياها بنفس البيت اكيد صاير بيناتهم هواي اشياء لذلك
كرهت مروه قبل ما اشوفها
وكرهت  كل شي بيها وصرت احاول انتقص منها ومن كرامتها بالشغل والجوع والذله خصوصا
من اخذ حقي الشرعي منها

مروه ما انطتني مجال اضربها واعنفها بس اول يوم الي وصلت بي للحقل ولاسنتني ضربتها لا بل كفرت بيها
ومن ذاك اليوم صرت ما اسمع صوتها چانت تشتغل بدون تذمر بدون ما تحچي واعرف هذا الشغل جديد عليها
لكن هي من النوع الي بسرعه تتعلم

واتذكر لمن اخذت امي وضحى وشلون طردتها من الغرفه واتمنيت تروح تنام ابيت ام بشير حتى الگى حجه
وافرغ كل غضبي عليها لكن اتفاجأت بيها نايمه بره وهيه گاعده ومخليه الحطب يمها تدفى عليها
وهي ترجف ومن التعب غافيه

لاراديا رحت جبت بطانيه وغطيتها ورجعت للغرفه وانا اشوف ضحى نايمه بمكان مو الها بقيت ادخن
وانا واكف ما مستقر ما اعرف تايه وسط مشاعر حزن وقهر وانتقام

يمكن مرات احن عليها لكن لمجرد اتذكر هي خطيبة ذاك النذل انقهر وتصير گدامي هواي امور
انا صرت كلش حاقد وصرت بعيد عن المثاليات الحزن وحب الانتقام سيطر عليه

وانا بعيد عنها اتمنى اجي اشوفها واشوف عيونها وهي تباوعلي لكن من اوصل اكرهها ويتراوالي
هواي امور فاصب جم غضبي عليها

اعرف الي اسوي اكبر غلط وحتى بعيد عن الرجوله لكن انا انسان مشتت مقهور مبيوك عرضه منداس على كرامته
اختي البنيه الشابه الحلوه  الي وضحكتها ما تفارك وجهه جاي تحضر العرسها  وتشتري ملابس ومكياجات
تحب ابن عمها وسوت المستحيل حتى تاخذه يجي واحد جبان يخطفها ويتسبب بموتها والي قهرني انو
هذا الجبان خاطب ومحافظ على عرضه ويدور باعراض الناس

من اجينه انا وامي وضحى وسالم وبسام اشوف الرضا بعيون امي والتشفي بعيون ضحى اما سالم فاشوفه
ما قابل على تصرفاتي بالعكس حسيته ضاج واستهجن ولمن ما ضحى گالت
-يوسف هي وين نامت
انا بدون اهتمام :...بره
ضحى باستهزاء //لو مخليها تنام بوحده من غرف العلف

راسا سالم وگف السياره وباوعلي انا كتله ::شبيك دست بريك
هو باوع الضحى وخزرها وگال //ماكو شي

وصلنه للبيت واتغدينا على وكت لان سالم چان يريد يروح للبصره يشوف شغله وهاي دووم يسافر
ومن طلعت ويا اتفاجأت بكلامه //يوسف موكافي
باوعتله :...كافي شنو ؟
سالم // كافي البنيه ما الها دنب ذاك الكلب ابن الكلب هو الي باگنا هي شنو ذنبها

عرفت جاي يحچي على مروه بقيت ساكت سالم عادها //يوسف كافي حرام عليك البنيه ما الها ذنب
انا رديت بقلة صبر :: اعرف ما الها ذنب بس انت ما حاس بالنار الي بگلبي
سالم // لا حاس واعرف بيك وانا مقهور مثلي مثلك بس كل شي اله نهايه 

اتحسرت ::شسوي ما اگدر انسى عرضي انفات علي اريد اهججها حتى يصيرلي عذر اكتل واحد من اخوتها
سالم غمض عيونه ونفخ // يوسف اسألك سؤال
باوعتله هو استردف // بشرفك تريد تكتل واحد من اخوتها
هزيت راسي وگتله ::ادري همه ما الهم ذنب وانت وانا سألنه عنهم ما الهم اي ذنب اريد حجه اتخلص منها

رفع حاجبه // وشنو الفاىده
جريت نفس هو اتقرب مني وگلي //اي واحد بمكاني خطيبته وبت عمه خطفها واحد نذل يگلك ايي بعد عذبها
وسوي اكثر خصوصا وهي نازله ضره على اختي لكن دائما اتذكر شجاعة اخوها واتذكر مروءتك لمن گلت اله
انت ما الك ذنب ما اكتلك بذنب ابن عمك بس اليوم الي شفته لو كاتل اخوها احسن عاد دم بدم وكل شي ينتهي

اتعجبت من ردة فعل سالم جاوبته :: انت المفروض تكون  اول المؤيدين اليه
-وليش باالله
::لان انت شريكي مصيبتي مصيبتك بس تكلي كافي ما الها ذنب خلي اگلك كلامك  صحيح شسوي
هذا الشي الي جاي اسوي مو بيدي مجرد ما اشوفها گدامي تتحرك عندي رغبة الانتقام

لزم چتفي // طلگها يوسف طلگها ليش تاخذ خطيتها
::وهو هذا الي راح يصير بس مو هسه خلي بعد شويه وعلى ما انت تاخذ اختها
سالم ركب سيارته وكال //يوسف دير بالك من الحوبه شگد ما طالت تره تصيب وما تخيب

اما ماهر صديقي حسيت اني سقطت من عينه لان چنه يوميه هو لو انا نتصل ونسولف صار ما يخابرني
ومن اخابره يرد عليه ابرود ومرات ما يرد انا هم ابتعدت ما صرت اخابره اله كل فتره

علاقتي ويه ضحى نفس ما هي  من قبل ما اتزوج مروه وبعدها يعني علاقه زوجيه تقليديه ومن اتزوجت مروه
صارت ضحى تهتم بنفسها اكثر وهي دائما يم امي ما تفارگها وكايمه بواجبي ودووم اشوف القهر بعيونها لان
ما كو طفل وانا ارد عليها هذا الشي بايد الله

   روتيني اليومي اروح للدائره وارجع للبيت والعصر اروح للحقل وهناك اشوفها وهي تسرح وهي تحش وهي تعلف
اشوفها وهي ساكته اتمنى تحچي وياي تراددني اتمنى تسولف عليه لكن هي ابد مجرد كلمة اي
بعد ما تحچي وياي  ولا كلمه وحده لاسؤال ولا طلب ولاحتى تذمر ما شفتها مبتسمه چانت دائما حزينه
واعرف حزنها على خطيبها الي مات وما اتهنت ويا

فد يوم وانا بالدائره خابرني التاجر الي اشتري منه العلف والي هوه عباره تمر وشعير
خابرني وگلي السياره بالطريق ينزلون وحده ويرجعون يحملولك الثانيه
بس رجعت للبيت غسلت واتغديت وطلعت گتلهم :: اليوم راح ابات بالحقل جاياتني سيارت العلف
ضحى گالت// خلي اروح وياك

هزيت راسي بالنفي
امي //خليها تروح وياك يوسف
::يمه المن رايحه عمال واعلاف شتسوي تروح اليوم كله شغل بعدين ناسيه الصبح عندي دوام يعني شنو
تبقى هناك ابحدها
امي باستهزاء //شكو بيها خليها تبقى
هزيت ايدي باستهزاء :: انتن بطرانات اروح احسنلي

اعرف ضحى تريد تروح حتى تتنمر على مروه وتتشفى بيها وانا هذا الشي ما يهمني لكن عمال وتنزيل وتسفيط
لازم اوگف وياهم مو بحالها

وصلت شفتها بعدهي جاي تسرح ومدنكه تحش وصلت للغرفه دخلت بيها لگيتها نظيفه ومرتبه رغم كل شي ما بيها
بس فراش بسيط  وميز زغير چان كل شي بيها نظيف اتمددت على الفراش وتقريبا ربع ساعه وصلت اول سياره
محمله اعلاف وياها اثنين عمال وبدوا ينزلون وخلوها بره ما دخلوها للمخزن سالتهم على السياره الثانيه السايق جاوب
-السياره الثانيه طلعت البغداد هسه نروح نحمل الباقي ونجيبه وينزلونه وبعدين يرتاحون شويه ويبدون يدخلونه للمخزن
ويرتبونه حسب الاصول

باوعلي السايق //راح انبات يمك ونغبش من الصبح
انا جاوبتهم ::  هلا بيكم بس استعجلو
واحد من العمال //تدلل عمي ساعتين تلاثه احنه يمك
وراحو اجاني بشير وسالني // شنو  ليش ما دخلوا الاعلاف

:: يجيبون السياره الثانيه ويدخلوهن سووا بس اريدك تسويلهم عشا لان ما لحكت اجيب مسواك اذوني بالاتصال
راح نوصل ولازم نلكاك گدامنا فراسا اجيت
بشير // تدلل صدك چذب كله من خيرك
:: خير الله
بشير باوع للسما // اكلك چنها دنيانه مطاره
:: لا يمعود بس غيم

بشير //لاتنسى اذار ابو العواصف والامطار
:: ما اعتقد تمطر
بشير // زين اروح انا ومن تحتاج شي اتصل عليه
:: الله وياك

يمكن تسالوني ليش بشير ما ينگل العلف ويرتبه
بشير مهمته يحرس ويبيع ويشتري اما باقي الشغل بالحقل چانوا عمال باليوميه ومرات اسبوعيه او شهريه فمن
اجت مروه استغنيت عنهم صار بشير يجيبهم من يصير يبيع ويشتري يساعدونه بتحميل المواشي

اجت مروه ومبين التعب عليها وراحت بوجهها اخذت الجت وراحت تعلف وصارت الدنيا تمطر رحت
وراها گتلها
::بسرعه شيلي الاعلاف دخليهن للمخزن
هي ردت عليه //مو لازم العمال يشيلوهن
عضيت شفتي وحاجيتها بنتر ::العمال راح يجيبون الحمل الثاني واذا مطرت واتبللن انتقم منج

هي ما ردت عليه راحت يم الكواني وصارت تسح  بيهن وانا رجعت للغرفه وصرت اراقبها ادري بيها جوعانه
وما لحكت حتى ترتاح شويه وتتمدد وصارت الدنيا تزخ وهي تنگل وتسح ودخلت للمخزن وهي ترتب خابرني
بشير وكلي // العلف يخرب بس يلوحه ماي
گتله :: لا المره جاي تشيل بي
هو كلي //شنو تگدر راح اجي انا اشيل وياها
::لا ابقى كملت جاي ترتب بيهن بالمخزن

-زين اودي وياها ام بهاء
::لا لا هيه تكملهن
- زين تعال اتعشى
:: الگاع  طين شيطلعني بهالمطر ما اكدر اجي
- راح اجيبلك عشا واجيك

وجابلي بشير عشا وقوري چاي وسالني //هم رحت شفتها
:: لا عليمن تعرف شغلها
بشير // بس هذا شغل العمال وانت دافعلهم
باوعتله :...يعني اخلي الاعلاف تخرب
بشير //لا بس چان ممكن انا وياك نغطيهن بنايلون
::تدري فاتتني
- ياالله فيمان الله اروح انام

::شعجب
- باچر اروح اشوفلي شكم راس بمزرعة ابو عيسى
::شو ما گتلي
-گبل شويه خابرني كلي خوش شروه لا تفوتك
:: زين يابه ما اوصيك
- لا توصي حريص وبيت حجي غافل يردون خمس عجول
:: وخاصمتهم بالسعر

-اي وباچر يكملون الفلوس ويجون  ياخذوهن
هزيت راسي ::تمام
- ياالله من تحتاج شي خابرني
:: مشكور الله وياك
اتعشيت وغسلت وشربت چاي ودخنت وما اعرف يمته نمت لمن ما گعدت الصبح بعدهي الشمس
ما طالعه باوعت النفسي نايم بالغرفه ومحد يمي اتذكرت مروه رحت للمخزن شفتها گاعده  متسنده على
گواني شبه متمدده

ما حاچيتها لان خجلت من نفسي طلعت ركبت سيارتي وانا خجلان من نفسي واحچي
::يمكن مثل ما گال سالم  لو كاتل اخوها ولا هذا العذاب
وصلت الصبح للبيت لگيت ضحى نايمه وانا سبحت وبدلت وطلعت للدوام تقريبا الساعه بالوحده 
اتصلت ام بشير
-الو ها بشير
الو لا انا خالتك ام بشير
::هلا خاله خير

ام بشير // خاله مرتك ما ادري شبيها بس توگف تدوخ وتطيح او وجهها اصفر
سالتها ::يعني ما طلعت للگاع
ام بشير //خاله ياگاع البنيه خربانه
:: زين عود اجي العصر واشوف
ام بشير //تره ردت اخذها للطبيب بس گلت خاف انت ما ترضى
::اجي واشوف

سديت النقال وانا ادري هي وگعت من التعب والجوع وانقهرت عليها  لكن ما اعرف بس اوصل
يمها كمية الكره والحقد مجرد ما اشوفها اختنك واكرهها
انتهى الدوام وخابرت امي گتلها راح اشوف الحقل لان بشير مشتري شكم عجل زغير ورحت شفتها نايمه ولكيت
ام بشير يمها سالتها گالت
بس توگف تطيح واي شي ما يركد بمعدتها

وفعلا طلبت من ام بشير تگعدها ومن شفتها چان لون وجهها اخضر وشفايفها بيض كالت الها ام بشير
مروه كومي غسلي وجهج واكليلج لگمه
وهي مجرد. ما وگفت راسا  وگعت
انا كلت لام بشير ساعديها خلي تلبس واخذتها للطبيب انا وام بشير وهي كعدت ورا والطريق كله وهي تتقيأ

وصلنه واخذنا باص ومن شافو حالتها دخلونه وبقت وياها ام بشير والطبيبه دزت عليه وگالت اجيب الها عربانه
واخذها للتحليل وانيمها بغرفة الممرضه وبعدها الدكتوره قررت تنام مستشفى وگالت ضغطها هابط جدا
وعدها فقر دم وسوء تغذيه
ومن كتبتلي الطبيبه العلاج الي لازم اخذه للمستشفى ورحت حتى تاشر علي سالتني

—- شگد عمرك ؟
باوعتلها باستغراب ورديت ::30
الطبيبه //يعني مو زغير ولا مراهق
باوعتلها باستغراب ::ليش دكتوره شكو داعي الهذا الكلام
-الداعي يا استاذ متعجبه من انسان المفروض يكون  واعي ومثقف يسوي سوايتك
::شنو سوايتي ؟

الدكتوره // - تسوي نفسك ما تعرف انت جاي تغتصب البنيه وتعرضها للتعنيف اگدر اعرف ليش
::هي اشتكت الج
- ليش شنو شايفني ما اعرف لو ما افتهم ومجرد ردك معناتها فعلا هي معنفه المفروض اتخذ بحقك اجراء لكن
هي من سالتها گالت زوجي زين وياي فااريد انصحك انتبه الزوجتك لان راح تصير ام ابنك
اتفاجئت من الكلمه الاخيره :: شنو ؟

الطبيبه //ليش مستغرب ما شاء الله رجال واكيد كل علاقه زوجيه نهايتها اطفال زوجتك حامل وهسه
بوجهك للمستشفى لازم ترتاح ونعلك الها مغذي واله الطفل مهدد بالاسقاط
/////.  ..//////...////////....//////.....//////....يتبع
اتمنى عجبكم البارت
لحد يكلي جاي اعيد بالاحداث لا ما اعيد لكن تسلسل القصه يحتم عليه اذكر بعض الاحداث المعاده