رواية بعد فوات الأوان الفصل الثاني عشر 12 - بقلم آنين الليل

مرحبا
احدى العزيزات طلبت مني ان اغير اسم القصه وهي مو اول وحده تطلب مني تغيير الاسم
الكثير غيرها لان حسب كلامهم انو قصص الفصليات صارن مملات بسبب الكم الهائل من الكذب
الموجود بالقصص ولان هاذي القصه حقيقيه وغريبه احداثها ارتأيت ان اخذ رأيكم واخلي مسميات كثيره الها
احب تشاركوني بالاسم
الصراحه عجبني اسم (بعد فوات الاوان )
لكن رايكم يهمني
هاي العناوين وانتو اختاروا

-بعد فوات الاوان
-ليس ذنبي
-غريبه
-ضحية شرف
-سجن بلا جريمه
-ويبقى الامل
- لسنا جواري

اتمنى اتشاركوني اراءكم واذا عدكم عنوان اكتبو خلي اقرا واقرر
تحياتي
# آنيين الليل #
/////////////////////////////
سالم
انا سالم ابن عم يوسف واخو ضحى انا ازغر من يوسف بشي سنتين مكمل سادس اعدادي من زمان متعلق بالشغل
الحر ابوي عنده خير من الله وانا احب شغل السيارات مو البيع والشرا لا احب اشتغل بالسيارات الكبار لذلك
صار شغفي بالتريلات واشترالي ابوي تريله وصرت اشتغل بيها احمل للمحافظات وراها بسنه اشتريت تريله
ثانيه وثالثه  وشغلتهن وصرت احصل خير من الله

انا وضحى امنا متوفيه الي هي تصير اخت خالتي ام يوسف يعني يوسف ابن عمي وابن خالتي
ابوي اتزوج ورا وفاة امي بسنه وحصل بنات تلاثه واولاد اثنيين وهو اتعلق كلش بجهاله وللامانه ما فرق ابيناتنا
بس الي صار يمكن لان اخواني بعدهم زغار فاهتم بيهم

استلمت تقريبا اغلب الشغل من صار عمري 22فكرت بالارتباط ابت اخ  زوجة ابوي چان اسمها وصال بنيه
بوكتها تدرس مرحله اولى كليه تربيه شفتها جايه العمتها ويه امها چانت حلوه بشكل وهادئه انعجبت بيها وفاتحت
زوجة ابوي الي فرحت وانا بوكتها طلبت منها تاخذ رأي البنيه حتى بعدين اتقدم

وراحت زوجة ابوي وحچت ويه البنيه الي كالت الها انا بالوقت الحاضر ما افكر بس بدراستي من اكمل ما عندي
مانع يجي ويتقدم
محد عرف بالشي الي صار بيني وبين زوجة ابوي بس اختي ضحى

وبقيت اشتغل وصارت ازهار بت عمي تجي للبيت من انا موجود ومرات تبات ويه ضحى  وبعدها صارت تطلب
مني اطلعهن هي وضحى لا ن ضايجات ومن اجي تعبان وهي  موجوده تروح اتحضرلي الحمام وتدخل الغرفتي
تجيبلي ملابس

مره اجيت تعبان ولگيتها موجوده وهي بس شافتني راحت للغرفه جابت المنشف وملابس وكالت ادخل اسبح
ومن طلعت اجيت الغرفتي لگيتها متمدده على فراشي وهي بس شافتني استحت وكالت ما اعرف دخت واتمددت
ومرت من يمي شميت عطرها هو نفسه الي استعمله وگفتها وكلت
انتي تستعملين عطر رجالي
هي باوعتلي بخجل وكالت وهي مدنگه
لا لا شميت العطور الي على ميزك وعجبني هذا العطر وخليت منه
بوكتها شلت العطر وانطيته الها هي كالت //لا انا اشتري منه

وانا رديت عليها - مو عيب تشترين وهو موجود اي شي تردي اطلبي مني وانا اجيبه الج
اخذت العطر واشوف الفرحه بعيونها وكالت //بس هم اشتري مثله
-وليش
ردت عليه //راح احتفظ بهاي لان منك ومستحييل افرط بيها

صارت ازهار دائما عدنا وبيوم الي ما تجينه ابوي ياخذ ضحى ويروح لان حسب كلام خالتي
ضحى وازهار وحده ما تفارك الثانيه
من تجينا ازهار للبيت اشوف مرت ابوي تضوج من وجودها لكن هي ما تهتم خصوصا وهي تشوف
محبة ابوي الها فچانت من تشوفني تكول

هاي شبيها مرت عمي هلكد تضوج مني شنو قابل انا جايه البيتها
سالتها //شكو شبيج
ازهار وهي ضايجه //مرت ابوك متنگه بوجهي عبالك جايه البيتها (باوعتلي وابتسمت ) عاد انا اليوم
گلت تجيبلنه كلنه عشا بس لا روح جيب بس الي لان هاي الحيه مرت ابوك ما تستاهل
سالتها //وضحى
وضحى همه لا تجيبلها
ضحى // ياخبيثه ليش مو انا بت عمج

ازهار //مو صافه ويه مرت ابوج روحي خلي تعشيج
اتقربت منها //زين وانا اجيبلي لفه وياج لو لا
هي باوعتلي وكالت //حتى لو ما تجيب اكسم لفتي وياك ليش هي تنبلع اذا مو انت تشاركني بيها

بيومها حسيت انو ازهار معجبه بيه ويمكن تحبني وهذا الشعور خلاني اشوف نفسي انسان مرغوب بي وحتى خالتي
حسستني انو انا مسؤول عن ازهار وصارت تطلب مني   مره اخذها البيت صاحبتها لان يوسف ما يقبل ياخذها
ومره اخذها للطبيب اليوم داخت
اليوم هبط ضغطها اخذها قيسه الها
ضايجه هي وضحى طلعهن خلي يتونسن وانت ابقى وياهن
واخذهن وازهار تگلي //خلي ناكل 

وتمشي شويه وتگلي  اشتريلي هاي اللعابه اشتريلي نفس العطر الي تخلي منه
صرت من اروح للشغل اتمنى بس ارجع واشوفها واذا ما لگيتها اخذ ضحى ونروح وابتعدت عن مرت
ابوي وما صرت اسال عن وصال
وفاتحت ابوي باعجابي بازهار وابوي بذيج اللحظه الفرحه ما وسعته وراح وحچى ويه عمي الي گله
انا هم اربد ضحى اليوسف

ورحت وحچيت ويه ضحى الي شفت بوكتها وجهها صار احمر مبين موافقه من الفرحه الي بينت عليها
لكن اتفاجئنا بيوسف يطلب من امه وابو ان يخطب بنيه چانت ويا بالمعهد وبما انه اتعين يعني بعد ماكو مانع من
ان يتقدم الها
انا ما ادري بهذا الشي لان چان عندي حمل ابغداد
ومن رجعت هو گلي راح يخطب بنيه اله علاقه بيها وشفته فرحان كلش وهو يگلي
همزين اجيت حتى تروح ويانه للخطبه 

باركتله وانا احچي ويه نفسي //يعني شنو عمي صرف نظر ما يريد ضحى اليوسف  لان عرف بي يريد بنيه
غيرها بوكتها انا فرحت اليوسف لكن ضجت على ضحى
طلبت من ابوي ان يصرف نظر عن خطبتي الازهار الى ان تكمل خطوبة يوسف لكن اشوف خالتي متوتره
وعمي هم الي قهرني بالموضوع ضحى يمكن تحب يوسف لان اشوفها ضايجه بس تحاول تبين طبيعيه

عرفت انو خالتي رايحه ومفاتحه اهل البنيه بموضوع الخطبه بعد حوالي عشر تيام عمي ابو يوسف خابر ابوي
وگله نروح الابو البنيه نحجي ويا لان همه تقريبا موافقين بس قبل لا ناخذ الجاهه نگعد ويا ونشوف طلباته
وحتى ابو البنيه هم طلب يشوف عمي ويوسف
وابوي وافق وهو مبتشر يعني ما مهتم لان ما راح ياخذ ضحى وطلب مني اروح وياهم

ورحنا كلنه وهناك الاب استقبلنا بحفاوه ما تخلو من التكبر وجابولنه گهوه وطول الحديث وهو يحمد بنفسه وهاي
الكهوه جابوها مخصوص من فلان مكان وسافرت لفلان دوله وعجبتني هاي التحفيه واشتريتها بسعر خيالي
لان انتيكه   بعدها عمي ساله وكله قبل لا نجيب الجاهه نريد نسمع منك شنو طلباتكم انا ما حبيت اودي ام يوسف
كلت اسمع منك

هو خله رجل على رجل وطلب البته بيت ابحدها ومهر غالي ما متعارف علي
عمي گله // هذا الشي تعجيزي شنو هي سلعه
ابوسحر //لا انا بتي اريدها ترتاح ما اريد ربع الشهر تحتاج شي وما تگدر تشتري
اهنا يوسف وگف وگال بعصبيه. ::هذا هو وصل جوابكم شكرا الكم

وطلع واحنه طلعنه ورا بالطريق ابوي گله //عمي يوسف ولاتهتم انا اعين واعاون لو اعرف ابيع كل املاكي
اشتريلك بيت وانطيك فلوس اعداد البنيه
لكن يوسف بقى ساكت ما جاوب واهنا ابوي اصر ان نمر للبيت

  اجو ويانه للبيت بعد الحاح من ابوي الي طلب من ضحى تسوي چاي وگله
- عمي يوسف لا تهتم ولا تضوج اجتك ضحاوي هديه مني الك
يوسف اتفاجأ وعمي رد على ابوي // نعم الله عليك خويه
ابوي هز ايده // چا شنو اخلي يوسف ينكسر خاطره
يوسف باوع وهو ضايج :: لا عمي ما اريد تجبر ضحى على شي هي ما موافقه علي
ابوي // شنو اجبرها هسه نسمع موافقتها

بعدها صارت الخطبه وانا اشوف بوجه يوسف عدم القبول والموافقه لكن كان يجامل
عكسي انا الي الدنيا ما سايعتني من الفرحه لان راح اخذ ازهار والي شرطت ما نتزوج اله تكمل كليه
واتزوج يوسف خلال شهر ورا ست تشهر من زواجه ابوي اتوفى ورا بسنه عمي ابو يوسف اتوفى
انا وازهار چنا نبقى للصبح نسولف ونضحك مرات نتزاعل واتخبل عليها اذا شفتها تطلع بدون ما تاخذ اذني
دائما بسفراتي اجيب هدايا ودائما تكلي ذوقك مو حلو بس تاخذهن لان تحبني وانا چنت اموت عليها وما اتخيل نفسي
بدونها

وفهمتها بعد التطبيق تبدي تجهز لان انا جهزت البيت وكملته من كل شي غرفة نوم على ذوقها حجزتها ما
قبلت اجيبها وفرشت البيت واشتريت اثاث للديوان وللصاله والمطبخ كاونترات والكهربائيات وكل شي حضرت
حتى البردات فصلتهن

چنت اسعد انسان بالدنيا خصوصا ويوم بعد يوم وصار يقرب وكت زواجنا
بالليله القبل الحادثه چنت يومها توني واصل من اربيل جايب الها وياي ملابس كومه وملابس نوم وتراكات
وجايب وياي شغلات للغرفه خابرتها وكتلها باجر اجيبهن الج لكن هي كلتلي
لا خليهن بجنطتهن من نجيب الغرفه انعلكهن ونرتبهن
وصرنا نحجي ونسولف وگتلها // الصبح اجي اخذج للمدرسه
هي ردت عليه // لا لا تجي اصلا باچر دوامي مو بالمدرسه اروح للكليه

اتفقنا انو اجي للبيت اتغدى يمهم والعصر نطلع انا وياها نشتري للبيت حاجات على ذوقها
بعدين حسيت بيها نعست لان صارت تخربط بالكتابه ونامت وهي تكتب وياي وانا هم نمت وكعدت الضحى
على صوت اختي ضحى وهي تصرخ بالتلفون وتگول //ازهار بالمستشفى مدعومه
انا صرت مثل المخبل يمكن سويت الطريق دقايق ورحت وانا اشوف خالتي وهي تلطم على وجهها وياها ضحى
وبعدين اجت زهره اما يوسف فوصل وهو يتساءل بعيونه عن الي صار

عرفنا انو ازهار انخطفت من طالعه من البيت وحاولت تدافع على نفسها لذلك من صارت الحادثه لگو ايدها
بالاستيرن يعني هي ارتضت على نفسها الموت بس في سبيل تدافع عن شرفها

صرت مثل المجنون چان كل همي انو اكتل اي احد من اقارب جمال بيومها انعميت من الغضب اتمنيت
بس كون اخذ وحده من بناتهم حتى انتقم الشرفي الي اعتدى علي بساعتها رحت ويه يوسف واولاد عمي
واحنا مانشوف گدامنا بس الثار والشر بين عيونه وهجمنا على بيت جمال وحاولنه ندخل لكن الجوارين منعتنا
بعدين دخلنه عنوه ما لگينه احد وكسرنا البيت ما خلينه بي شي على حاله وهددنا الجوارين اي احد ايلفيهم يصير
مطلوب النه  ورجعنا للمستشفى ومنعنه اي احد يستلم الجنازه

وصارت تجي علينه ناس والحچي بايد. يوسف الي دووم مخليني بالصوره على اعتبار ازهار بت عمي وخطيبتي
وبعد شهر تصير زوجتي
لكن انا ما قبلت على يوسف لان وافق يدفنون الجنازه واحنه ما ماخذين ثارنه وزعلت اكثر من انطاهم يوسف
عطوه وانا بوكتها ما قبلت لكن يوسف فهمني انو يريد ايمللهم حتى من يكتل محد ايلومه

لكن بعدين وبضغط من الناس قبل يوسف بالفصل وهو ياخذ فصليه وانا اخذ وحده باعتبار ازهار چانت خطيبتي
وبعد شهر تكون زوجتي.

وبعدها يوسف شال من البصره كلها وخيرني وانا شلت وياهم بالبدايه گعدت وياهم بالبيت بعد ان قفلت بيتي
الي بالبصره والي صرت ما اشتهي امر او اكعد بي وحتى فكرت ابيعه واجي اشتري بالحله يم يوسف
لكن اتأنيت لان صرت اشوفه يتصرف من راسه بدون ان يرجعلي

يوسف من استلم فلوس الفصل رجعلي المهر مالت اخته وكلي باقي الفصل البنيه الي راح تتزوجها وانت مخير
اذا تريد اخذ ابمكانها فلوس من اهلها انطيهن الك تتزوج وتشوف حياتك
اتعجبت من كلامه وكان البنيه سلعه ممكن استبدلها باي وقت وصرت اتساءل ليش هيج يتصرف وما گدرت
اسأل ضحى لان اشوفها مقهوره لان يوسف راح  يتزوج وطلب مني اروح ويا للبصره بسيارتي الي لونها اسود
وهناك ابيت الشيخ اتفق ان تصير الزفه من بيت ابوها القديم وتجي سيارات زلم كلها بيضه وسووا عشا

وفعلا رحت انا وهي وامها وعمتها صعدن وره وحجي عبد صعد گدام
ما حجن بس متلفلفات بالعبي لكن اتذكر حجي عبد گلي
سالم انت هم شد حيلك حتى تتزوج وهالمره يوسف يزفلك مرتك
جاوبته //ان شالله بوجودك حجي

انا متعجب شلون يوسف الانسان الهادي الرزن المؤدب هيج يسوي والصبح انا اخذت العروس هي
وامها وعمتها
الي طول الطريق ابد ما حچن ولا طلبن شي ويوسف كدامنا بسيارته ومن وصلن للحله خلوهن بدون عشا
والصبح خابرني گلي وصلهن للكراج ولا تدفع كروتهن وما بقى ويه زوجته للصبح

وشفتهن نازلات ام مروه وعمتها والبيت صنطه انا كتلهن اتفضلن خلي اوصلكم
عمتها ردت // لا خاله احنه هسه ناخذ تكسي يوصلنه للكراج ومناك نركب للبصره
- - مي خالف حجيه انا اوصلكم للكراج
ركبن واشوف امها مختنكه من البچي وعمتها تشاور بيها تكلها //اسكتي الها الله

هي سألتني //خاله انت هم بيتكم بالحله
لا حاليا بالبصره بس افكر انتقل اهنا
ايي الجو حلو اهنا
اي حجيه وحتى ناسها طيبين
الطيب النفسه ياابني والمو زين هم على نفسه

امها جاوبت وهيه تسحب خشمها من كد البجي //  الموزين يعم على ناس كل شي ما مسويه
- - اسكتي ام امين مو وكتها اعذرنا خاله بس انت تعرف گلب ام
ما جاوبتها عمتها گالت // ام امين خيه الله يهدي النفوس
ام امين // شيهدي النفوس ما تشوفينه عبالك اسرى حتى ماي محد انطانه لو العريس الي راح بات يم
مرته الچبيره
وانوب انطردنه بدون ريوك ومنعوا النقال والله العليم شراح يصير بيها وبعد وراي ضيم سماح ما ادري شنو
يسوون بيها ما يسوون

  - - الهن الله كافي عميتي عيونج
ام امين // الله لا يرحمك ياجمال كون بنار جهنم ع السويته وحطمت بناتي
عمت مروه گالت // خاله بلا زحمه عليك بس نشتري بطل ماي خطيه يبس ريكها ولا يرتفع عدها السكر

وكفت السياره وصحت ع الولد الي يبيع ماي جابلي بطلين دفعت فلوسهن وبدون ما اباوع انطيتهن هي اتشكرتني وكالت
هاج ام امين اشربي ماي وغسلي وجهج طريقنا بعيد لا تطيحين عليه واحتار بيج
هي اخذت شربت بعدها انطتني وكالت
- - هاك خاله هاي كليجه سويناها للعراريس بس من خلونه بدون عشا اكلناها والبقى جبنا نتريك بي
جاوبتها //لا خاله شكرا
- - اخذ خاله عليك الله هاي اختها سوتها بايدها مو مالة سوك
- - شكرا خاله

واخذتهن منها استحيت اردها وصلنه للكراج ومن نزلن نزلت وياهن بس هنه كالن // لا خاله ارجع نعم الله عليك
- - مي خالف بس اطمن ركبتن
اتقربت مني ام امين وكالت // خاله اعذرني والله مو قصدي احچي وانتم هم حقكم بس والله احنه ما النه بالصار
لا ناقه ولا جمل انا ابجي على بتي وهم على بتي الثانيه الما ندري يمته تاخذونها
     هزيت راسي // الله كريم خاله معذوره

وركبن بمنشأه من هاي الجدد وراحن وانا رجعت وبوكتها زاد استغرابي من عرفت يوسف اخذ العروس
وطلع بيها وره اكثر من ساعتين رجع عرفنا اخذها المزرعة العجول واحنه نشوفه متوتر وعصبي فما نسأله
خصوصا وهو كل الوقت متواجد بالبيت يروح للدوام الصبح ويرجع وره الظهر يبقى بالبيت ومرات يطلع بس ولا
مره نام بره البيت

اعرف هو سووا حقل ابقار وشغله خير من الله  لكن مال ياخذ زوجته تشتغل بي هذا الشي بصراحه عجبني
///////////////////. /////////// /////. ///////////////////////////

يوسف
من اخذت مروه للحقل وهي صارت تحچي وياي انا حتى صوتها اكرهه رغم چان هادئ لكن حب الانتقام خلاني
اكره كل شي بيها ضربتها واذيتها حييل وانا اشوفها جوه ايدي شلون تفرفح عبالك طير مذبوح ما كفاني هذا الشي
الي سويته لا سحبتها واغتصبتها رغم هي زوجتي لكن كل ما اكون بقربها اتخيل انو انا اغتصبها واعذبها
لان اتخايل  شلون ابن عمها احتمال يكون مغتصب اختي

بعد الي صار وياها هي ابد ما صارت ترفضلي اي طلب وانا صرت اضيق عليها الخناق واطلع الها شغل
صرت اشوف وجهها شلون اتغير واديها شلون صارن سود وشلون ضعفت من التعب وقلة الاكل
   والصراحه هيه اشوفها انسانه گدامي

چنت اريدها بس تگلي لا لو تناقشني حتى اكتلها حتى اشفي غليلي لكن هي چانت تتجنبني
مره لزمتها من كف ايدها حسيت شگد صايره خشنه باوعت اله شفته متشققه وسوده باوعت الوجهها
شفت اخدودها امشگات وصايرات طبقه سوده شفتها شلون ضعفانه وعيونها غايرات كل هذا الشي ما حرك
بيه احساس او رافه بحالها

واليوم الي اروح يمها العصر وارجع بالليل چنت الكى امي تبچي على بتها وضحى گالبه وجهها
كل هذا ما يهمني لان انا ما انام مثل الناس ولا اگعد انا ما مستقر وانا اتخايل جمال شلون اغتصب عرضي
ومن اصير عصبي اروح افرغ عصبيتي بيها اضربها واسب واغلط واغتصب
فد يوم امي گالت // ضايجين خلي نطلع

انا هزيت راسي وهنه اجن گتلهم وين نروح امي گالت //اخذنا للحقل خلي نشوفه خصوصا الجو حلو وبارد
نروح نتعشى ونرجع
::ياالله خلي نتوكل
طلعنا انا وسالم بالصدر سالم يسوق وبسام وامي وضحى وره نزلنه بالطريق اخذت فواكه ودجاج وخضره واخذت
حلويات وتمر خلوهن بعلاگه ثانيه البيت بشير وركبنا بالسياره امي گالت

-ما طول سالم ويانه اريد احچي
سالم //اي خاله اسمعج
-اريدك تتزوج
اندار سالم وگال //بعد وكت خاله
امي //شنو ياوكت اخذلك مره اليمته تبقى هالشكل شوف بت حلال وانا اخطبها
بسام رد // مو سالم ياخذ الفصليه بعد شتخطبيله

امي ردت بعصبيه //بسام اسكت لا تحچي شنو سالم ياخذله فصليه بالاول ياخذله مره يخطبها ويتزوجها وانوب ياخذ
الصخميه الفصليه
بسام /|وليش سالم اذا مو اباله وحده ياخذ البنيه الي فصلوها شكو مدهور نفسه وماخذله مره وانوب ياخذ ثانيه
جاوبته :: هاا بسام هسه انا مدهور نفسي
بسام // انا ما احچي لان من احچي كلامي ما يعجب
::شقصدك وضح

امي اتلافت الموضوع // اهووو جايين حتى تتناگرون خاله سالم لازم تشوفلك ابنيه بت حلال وانا اروح
اخطبها الك
اتذكرت بوكتها سحر الي گالتلي شلون امي وازهار راحن البيتهم وهسه امي جاي تتوسل بسالم ياخذ مره قبل
لا ياخذ الفصليه

وصلنه وسالم وبسام راحو يم بشير وام بشير اجت وسلمت على امي وضحى وعزمتهن للبيت بس امي
طلبت مني تروح تشوف مروه وهي بره تسرح بالابقار وضحى كالت //ايي انا هم يوسف اروح يعجبني اشوفها
اعرف بيهن يردن يرحن يتشفن بيها ومن احچي امي تگلبها مناحه وضحى تصير تحچي كلام ما احب اسمعه
اخذتهن وشافنها وهي متوزره ومنگبه وبايدها العصا وامي گلتلها //بساعج ارجعي سويلنه اكل

هي ما جاوبت احتارت شلون تخلي البقر ابحدهن بس ام بشير اشرت الها من بعيد احنا رحنا وانا اشوفها تمشي
وشايله كارة الحطب على راسها يعني حتى ما شلتها بالسياره وصلت ونزلت المسواك امي وضحى گعدن بالغرفه
وهي بوجهها راحت اخذت المسواك وصارت تغسل وتحضر للطبخ باب الغرفه مفتوح وهي گعدت بالطارمه تعجن
وضحى تسمعها

- خاله خوش غرفه مو
امي باستهزاء// اي خوش غرفه ردتها طين بس شسويله اليوسف
هي ما جاوبتهن ولا كانه الكلام عليها اتقربت يمها وكلت ::سوي عشا زين افتهمتي

هي ما جاوبتني بس رفعت وجهها وشفت عيونها مليانه دموع لكن تكابر ورحت يم بشير وسالم وبسام
احس نفسي مختنك تعبان طلعت بره الحقل وصلت يم ام بشير سلمت عليها وسالتها ::شلونها هايه
جاوبتني //ياهي
:: ام بشير شنو ما تعرفينها
لا اعرفها بس انت الما تعرفها
::جاي اگلج اشلونها
خوش بنيه مؤدبه
::زين ام بشير ورانه رجعه روحي وياها ساعديها وانا ابقى اهنا
ايي تدلل

راحت ام بشير دارت عليه ورجعت گالتلي //خاله يوسف تشوف هاي الشجره (واشرت على شجره قريبه )
هزيت راسي ::اي شبيها
تگدر تعد ورگها (اوراقها )
انا بابتسامه ::لا ليش
ام بشير لملمت حلگها وگالت //مروه بگد ورگ هاي الشجره تبچي بينها وبين ربها انت دير بالك
::ادير بالي منين
من دمعة المظلوم

كلمة ام بشير هزتني جريت نفس وگلت :: على شنو تبچي اكيد على حبيب الگلب المات وهو خطف اختي والله
يامروه اله اذلج اله اخليج تتمنيين الموت وما تلگينه هيج لمن ما انتي تكتلين نفسح بايدج

وبقيت بالحقل لحكوني بسام وسالم وبشير وصرنا نسولف بكلام عادي رجعنا العصر كلش وراحو الشباب كعدو
بالديوان مال بشير وانا اجيت لگيت ام بشير گاعده ويه امي وضحى ومن شافتني ام بشير اجت وگالت
-خاله مروه ما قبلت اساعدها بشي نادره طابخه على حطب ولگيتها تخبز
باوعت لام بشير وامي وگلت ::اذا كمل العشا اخذوالجدوره هناك صبو للشباب وانا وضحى نبقى اهنا نتعشى

امي ضحكت بشماته ومروه صبت عشا الي والضحى والباقي اجه بسام وبشير راحوا هناك يصبون وام بشير
وامي راحن هي جابت العشا وام بشير دزت بايد ابن بشير جكاية لبن وطاسة روبه ضحى گالت
- مااحب اشرب لبن الابقار

وصرنا ناكل ومروه بره گاعده على الگاع وهي تخدر بالچاي ادري بيها جوعانه بحكم روحتها من الصبح لكن
هذا الشي ما همني كملنه اكل وطلعنا نغسل وهي راحت للغرفه شالت الصينيه انا خليت شويه من صدر الدجاج
ومن رجعنا للغرفه هي جابتلنه كوبين جاي وخلتهن گدامنا وهي ساكته ضحى گلتلي

- يوسف عفيه بعدكل اسبوع جيبني اهنايه الجو رومانسي يخبل
هي ولا اهتمت ولا كأنه الكلام يمها طلعت وشربنا الجاي وطلعت الصينيه شفتها گاعده تتدفى ع الجمر وتاكل
خبز ولبن
المنظر هزني لان ما گلت الها تخليلها اكل بس هي چانت تاكل بكل ثقه وما مهتمه وكانه الي جاي اسوي
شي عادي مو نكايه بيها اصلا ما معتبره وجودي انا وضحى او ما مهتمه الوجودنا رجعت سديت باب الغرفه
ونمت ويه ضحى كاي زوجين واعرف بيها هي گاعده بالبرد فكرت ويه نفسي

::اذا انبات وين هي تنام معقوله تروح يم بيت ام بشير علوا تروح حتى تصيرلي اكبر حجه حتى اموتها من الكتل
طلعت وشفتها كاعده يم الجمر تدفى
كتلها :: شيلي الماي خلي بالحمام
شالت الماي وطلعنه انا وضحى ودخلنه للحمام ومن طلعت گتلها
روحي عدلي افراشنا لان راح نبات اهنا بس انا ومرتي بالغرفه

صرنا نتدفى ع الجمر وشفت الخوف بعيونها والحيره ودخلنه للغرفه ولگينه الفراش مفروش وهي طلعت
بطانيه وبساط عرفت هي راح تنام بره وراها اجه سالم وبسام وياهم امي وام بشير انا طلعت وگلت
:: سالم ضحى عاجبها تبقى اهنا باچر الصبح مرالنه
دخلنه وانا اشوف لمعه بعيون امي واستغراب بوجه ام بشير راحو وانا سديت الغرفه من داخل

چنت اتمنى الصبح الگاها نايمه ابيت ام بشير حتى الگالي عذر اضربها لكن الشي الفاجأني طلعت نص الليل
للحمام وشفتها متلفلفه بالبطانيه يم الجمر ونايمه وهي كاعده الصدك الموقف هزني وبنفس الوكت عجبني
واسولف ويه روحي :: شنو من بشر ما تحچين ما تگولين لا لويش تردين تموتين مثلا

رجعت للغرفه واخذت بطانيه ثانيه وخليتها عليها لان الدنيا بره بارده
ورجعت للغرفه اشوف ضحى نايمه واباوع للغرفه شگد وحشه هاي شلون تنام بيها ما تخاف ما تستاحش
وصرت ادخن وانا اكول
::جمال لعب على عرضي وانتي خطيبته لازم اذلج مثل ما ذلني وانتو الي بديتو والبادي اظلم
::جمال چان يخاف عليج لان انتي عرضه ما يتقربلج لكن يتقرب على اعراض الناس

الصبح طلعنا انا وضحى نغسل وهي محضره الريوك وجابته للغرفه خلته كدامنا حاچيتها بدون ما اباوع الها
::منو طلع بالحلال
جاوبتني بدون ما تباوعلي وبهدوء= ام بشير اخذته وگالت من تكملين الحگيني
چان صوتها هادئ رغم حزين بقت واگفه ضحى حاچتها بنتر // ياالله هذا هو روحي ليش واكفه
طلعت بره وانا باوعت الضحى اليگالت وهي تسمعها //واگفه گبالي عبالك شمعة فگر

اتريگنا وطلعت شفتها جاي تنگل علف للعجول رحت وراها وانا اشوفها شلون تخلي الاعلاف وكانها صار زمن
بهاي الشغله هي ساكته وانا ما حچيت وياها بس اراقبها ورجعت بعدها سالم اجه ودك هورن وطلعنه انا وضحى
وانا اوصي بشير اي شي يحتاجه ايگلي

ركبنا بالسياره واباوع الها ما كأن هذا الشي يعنيها او انو احنه نعنيلها شي
ضحى گالت // يوسف حباب جيبنه كل اسبوع اهنا الجو يخبل والمنظر حلو
سالم جاوبها // ليش انتي يمته طلعتي وشفتي المنظر اشو لازگه اليوسف عبالك ما شايفته
ضحى //اقصد على الهوا والواحد هم يغير جو
سالم //لا قصدج يتشفى شويه

ضحى ردت باستغراب //سالم هاي شبيك
-ما بيه شي بس متعجب
ضحى //بشنو متعجب
سالم ما جاوب ضحى گالت //هسه ما علينه شگلت على الكلام الي گالته خالتي
سالم عكف حواجبه // اي كلام
ضحى // نسيت لو تغشم نفسك
جر حسره وگال //اسكتي ضحى مو وكته

ضحى //يمته وكته مو هم ياالله تنسى حزنك وتنتبه النفسك بيتك بالبصره مقفول وانت هنا ما مستقر
سالم // ضحى گتلج سدي النوضوع
رديت على سالم ::ضحى وياها حق لازم تنسى حزنك وترتب امورك
ضحى //شنو قابل انت متعجب ياما ناس ماتو هاليتهم واتزوجو ونسو

عرفت قصدها عليه ما جاوبتها وصلنه للبيت واتلكتنه امي وهي تباوس بضحى عبالك عروس انا كتلها
:: ضحى الحگيني
اجت وراي وهي تحضن بيه وتگلي //ها حبيبي
لزمتها من ايدها وگعدتها ع الچربايه وانا اگللها // اسمعيني كلش زين هاي التصرفات ما اريدهن
ضحى //اي تصرفات

:: تصرفاتج وكلامج ويه سالم ياما ناس نست حزنها واتزوجت اعرف قصدج عليه بس انا ثولتها وهذا انذار
بعدين لمن ما مروه جابت الريوك ليش زمختي عليها منو گلج هي جايبها خدامه الچ
ضحى بعصبيه //هاا انت ما مغثوث من كلامي ويه سالم مغثوث لان نترت على مروه مو
هزيت راسي ::اي مو هالمره اعبرها بمزاجي مره ثانيه ما يصير خير
نزلت وهي تحجي بصوت عالي //ما ادري ازهار هلگد عدك رخيصه

انا نزلت اريد اضربها ولگيتها حاضنه امي وتبچي وامي تهدي بيها //كافي ضحى لا تبچيين شنو انحسدتو
خاله ما حچيت شي كلها قحط فصليه
سالم //منو گال قحط لا المفروض تتعامل باحترام لان هاي القحط حقنت دم

من سمعت كلام سالم سكتت ورحت بيومها للغرفه الي جمعتني انا ومروه والي تحاول ضحى ان تدخلها بشتى الوسائل
وصار روتين حياتي الدوام واروح بالاسبوع مره او مرتين اطل ع الحقل ساعتين تلاثه وانا اشوف مروه وهي
تشتغل وهي ساكته لكن يوم عن يوم اشوفها جاي تتغير وتضعف وضحى كل اسبوعين تلاثه تروح للطبيبه
على مود الحمل ومن تسالها امي تكلها سويت سونار وحتى علاج ما انطتني بس مقويات وتكلي كل شي ما بيج
اي عارض او مانع ما عندج حتى ما تحملين

امي گالت //خلي نشوف غير درب الاطباء
جاوبتها ::شنو يعني
يعني ناخذها نسعى بيها الناس تقرا وتعرف بهذا الشي
:: انتي مو كلتي ضحى  مثلي تتاخر وبعدين تحمل
امي // اي بس انا من اتزوجت ابوك الله يرحمه راسا حملت بعلاء بعدين صرت اتاخر بين طفل وطفل
جاوبتها ::يمه اخذيها بس انا ما اروح

وصارت امي وضحى يطلعن يرحن للعارفه ودوم اجي واشم بخور بالبيت واشوف امي ترش ورغم هذا ضحى
ما عافت طريق الاطباء يعني تروح يقروون عليها وترجع تروح للطبيبه
يوم الجمعه الصبح راحت ضحى للطبيب ورجعت وهي ضايجه وبيدها اوراق وكالت
هايه تحاليلي ما بيهن اي شي والطبيبه گالت خلي رجلج يسوي تحليل لان احتمال عنده ضعف
امي //انتي شتحچين خاله

ضحى بعصبيه //شنو شاحچي جاي اگلج الطبيبه تگلي ما بيچ شي واذا ما مصدگه امشي وياي
امي //هاا قصدج الصوج من ابني
رفعت امتونها //شكو بيها خلي يسوي تحليل
اتقربت منها وگلت :: اسمعيني ما طول ما بيچ شي هذا هو انا يمته ما يعجبني اراجع طبيب
ضحى وهي تضرب بالكاع // بس انا اريدلي طفل

::وانا ما اريد
امي // يوسف هو هذا شلون حچي
هزيت راسي ::اي يمه مثل ما سمعتي ضحى صار تلث سنين وهي تروكض من طبيبه الطبيبه مره عدها ضعف
ومره تاخذ منشط ومره زيادة هرمون ومره اشعه ملونه هسه انگلبت الايه صرت انا بيه ضعف
امي //استهدي بالرحمن يمه وخلي ناخذكم للعارفه انت وياها
::اخذي بت اختج انا ما اروح ومن اريد اروح اروح بمزاجي
رن تلفوني شفته ماهر

::الو هلا ماهر
-هلا بيك يوسف انا يم بيت خالي
:: جايلك
- اي تعال اتغدا وياي
رحتله واتغدينه ابيت خاله وجبته البيتنا وسالني عن احوالي بعدين قررت اخذه للحقل وبالطريق صار يسالني
-ليش الهسه ما صار عندك اطفال

جاوبته ::احتمال الشغله وراثه
-شلون
::امي من تزوجت حملت بعلاء واتاخرت حملت بزهره وهم اتاخرت اربع سنين حملت بيه وخالتي هم جابت سالم
وراها بشكم سنه جابت ضحى

باوعلي وگال - زين يوسف وزوجتك الثانيه
بدون انتباه رديت :... يازوجه
- شبيك يوسف مرتك الي اخذتها فصل

سكتت ما عرفت شنو اجاوبه وصلنه لكن هالمره على الطريق العكسي يعني نمر ع مكان الي تسرح بي مروه
وبعدين ع الحقل شفتها من بعيد تحش والابقار يمها وهي ما انتبهت الوجودنا او ما همها
طلعنا للحقل وتلگانه بشير ورحنا گعدنا بالديوان
بشير كال //اليوم العشا يمي

بعدها طلعنا انا وماهر يشوف الحقل الي انعجب بي وگلي// زين تسوي خوش مشروع
واحنه نتمشى سالني //يوسف ما جاوبتني
::على شنو ماهر
- ليش الهسه ما صار عندك طفل
::ارادة الله
- امنت باالله وزوجتك الثانيه صدك ما گتلي هي ويه اهلك

باوعتله ونفخت وعضيت شفتي ماهرگلي// شبيك يوسف
::ما بيه شي بس انت تكلي زوجتي الثانيه
هز راسه //اي بيش غلطت
نفخت حيل ::ماهر مو زوجه فصليه
ماهر باستهزاء//لا باالله شنو بكيفك عايشين بيا زمن ومي خالف الفصليه مرتك ما حملت

جاوبته بعصبيه :: انت شخبصتني مرتك ومرتك شفت لمن اجينه ومرينا ع الگاع الي بيها الابقار
- ايي
:: المره التحش هاي هي
ماهر باستغراب //هيه منو
::الفصليه
حك راسه وگلي //يعني انت جايبها اهنا

::ايي
-وهي مخليها تسرح وتحش
::وتعلف العجول وكل شي تسوي
-وليش كل هذا
::شنو ليش
- جاي تعاقبها بذنب ما الها بي تره هاي مرتك
انا بقلة صبر ::هم گال مرتك
- ليش تستهزأ يجوز ما عاقد عليها محكمه بس امام الله والناس هي مرتك

::اي وانا ما مسويلها شي حالها من حال اي مره رجلها عده حقل وعدهم حلال
ماهر هز ايده //يوسف وين مثالياتك وين كلامك شنو الي غيرك
::يا مثاليات الله يخليك احنه البشر عايشين بهاي الدنيا بچذبه چبيره وعايشين ونكابر نسولف ونضحك وكله چذب
ماهر // يوسف تتذكر ام عبيد العامله الچانت بالمعهد
باوعتله //ايي شبيها

-تتذكر لمن اجت ايدها مكسوره وعرفنا رجلها ضاربها وكاسر ايدها بوكتها انت شسويت
اتففت ::ذاك وكت
هز راسه //لا يوسف نفس الوكت اتذكر صرت تتهدد وكلت اله اروح واطيح حظه لان ما عدها احد
وهيج استقوى عليها وفعلا رحت ورحنا وياك شكم واحد ولزمته من ياخته وگتله اذا مفكر محد الها
شوفنا احنا كلنه اهلها اذا مره ثانيه مديت ايدك عليها بايدي اخذها واخليها تشتكي عليك وتنسجن
واخليها تتطلك وتعيش براتبها
ومن راد يحچي شلون حصرته بالحايط وگتله //بس تفك حلكك اجنزك انا اخوها ومسؤول عنها ومن يومها شلون
صار يحترمها وهي بس تدعيلك

:: الوين تريد توصل ماهر
- اريد اگلك انت غيرتك واخلاقك حامت لام عبيد لان فقيره وما عدها احد وهاي الي تحش وصاهرتها الشمس
ومو غريبه عنك زوجتك وشايله اسمك هيج تسوي بيها
::ماهر هاي الي صاهرتها الشمس هاي غريمتي عدوتي اريد منها الزله حتى اكتلها خلاص

ماهر ما رد عليه ورجعنا البيت بشير الي لگينا شاويلنه لحم غنم فخذ وضلوع على حطب وخبز حار وروبه وفاكهه
ماهر اكل شويه ومن شربنا چاي كال //نرجع لان باچر اسافر للبصره
انا ما مريت على مروه الي اشوفها رجعت بالابقار ودخلت تعلف بالعجول  المربوطه
رجعنا الطريق كله وماهر ساكت وعلى اساس يبات يمي لكن هو گال
ابات ابيت خالي حتى اغبش
::هاي شنو مو على اساس تبقى تلث تيام وتبات يمي

هز راسه بدون ما يباوعلي وگال // لا ارجع مناك زوجتي واطفالي
سلمت علي وانا احس بي من يگول زوجتي واطفالي وكأنما يسمعني ويفهمني انو ما يگدر يفاركهم
ورجوعه بسرعه لان يشوفني انا ظالم بحق نفسي وبحق مروه مروه الي كاتلني برودها وهدوئها والامبالاة
وصرت اسأل نفسي هذا الهدوء يجي يوم من الايام ويصير اعصار او حتى نار تحرك اليابس والاخضر
////////////////////////////////////يتبع
هذا البارت اكثر من 4600 كلمه اكيد استاهل تصويت اذا عجبكم
تحياتي #آنيين #