رواية بعد فوات الأوان الفصل الرابع عشر 14 - بقلم آنين الليل

تنويه
دائما من انشر بارت وخصوصا بهاي القصه يكون تعليقكم السرد معاد
وبعدين تطالبوني ابارت طويل
لو نجي للبارت القبله مجرد اربع اسطر عدتها ابين بيها معاناة مروه ويوسف وتگلولي ما بي احداث مهمه بس
مروه بالمستشفى وحامل

زين وكلام سالم
ومراجعة ضحى للطبيبه
وسبب دخول مروه للمستشفى من جراءنكل الگواني والتعب والجوع

تعرفوني انا كل شي انطي حقه لو كاتبه مروه داخت ونامت مستشفى وطلعت حامل ماراح تسالوني عن سبب وگعتها
بعدين انا كل بارت اكثر من 3500كلمه يعني لازم اقفل البارت على تشويق فما اتصور البارت قصير
وتطالبوني يوميه انزل بارت تعرفون مراجعة البارت شكد تاخذ مني وقت

صدگوني بين تصحيح الاخطاء الاملائيه وتدخيل بعض الجمل وحذف البعض الاخر ياخذن اكثر من تلث ساعات
لان البارت اذا ما اراجعه ما انشره
بعد يمته الحك انزل يوميه انتو لازم تعذروني وبنفس الوكت اكدر اختصر الكم القصه بعشر بارتات طويله بس
صدگوني هواي اشياء وحقائق راح تضيع وشخصيات راح تنغبن 😱😱

بالاخير الي يهمنه نوصل الفكره والاستفاده منها ومو بس هيج انو اهم شي القصه توصل القلوبكم قبل
ان تقرووها 💙❤️💙
وهذا هو النجاح الي انا اريده 🤲🤲💐
بالاخير اتحملوني شويه 😜😜
وانا احبكم هواااااي ❤️❤️❤️❤️
تحياتي #آنيين الليل #
/////////||||//////|||||//////

يوسف
اتفاجأت بكلام الطبيبه لمن تكلي زوجتك حامل وانت رجال وما عوزك شي ليش مستغرب
اتذكرت كلام ضحى وهي تكلي الطبيبه تكول اكيد زوجج هو الي عنده ضعف

اخذت مروه للمستشفى وهي تقريبا مغمي عليها لان نفسها تلعب مره تتقيأ ومره تغيب عن الوعي چانت تتقيأ
وهي ساكته بس لازمه علاگه بايدها وتذب من راسها  بوكتها خجلت وانا اتذكر شگد  صرت لئيم وياها البارحه
لمن رجعت من السروح وهي بدون اكل وبدون حتى ما انطيتها مجال بس ترتاح شغلتها شغل عمال اثنيين او
تلاثه حسيت بمرارة تحملها

بقينا انا وام بشير ساكتين الى ان وصلنه للمستشفى واخذت غرفه بالجناح الخاص وطلبوا جنسيتها وانا انطيت هويتي
تبقى يمهم على ما اجيب الجنسيه ورحتلها للغرفه لكيتها متمدده ومعلگيلها مغذي اخذت ام بشير على صفحه وانطيتها فلوس
وفهمتها تبقى يمها هي ردت عليه
روح خاله ولا يهمك

بعدها اجت طبيبه فحصتها وشافت ضغطها سالتني //انت زوجها
رديت ::اي نعم
- من يمته زوجتك ما ماكله
ام بشسر جاوبت //دكتوره هو مو يمها عنده شغل انا اكلج هي من امس ما خاله شي بحلگها وهي دووم
اكلها قليل
الطبيبه // اي مبين عدها سوء تغذيه وفقر دم وطبيبتها كاتبه تحتاج تبقى بالمستشفى شكم يوم يمها العافيه
ام بشير // الله يعافيج

باوعت لام بشير وانا اوصيها :: ديري بالج وانا الصبح اجيكم اذا اگدر
- خاله لا تخاف علينه واذا ما تكدر براحتك حتى لو العصر
هزيت راسي -  اي هم صحيح لا تنسين عندي دوام زين ورا الدوام اجيب جنسيتها واجي اشوفكم
(اتقربت يم مروه واول مره اطيل النظر بوجهها سالتها ) وين جنسيتج ؟
هي فتحت عيونها وردت بتعب بدون ما تباوعلي = بالجنطه جوه الملابس

ورجعت غمضت عيونها انا طلعت ولحگتني ام بشير وهي توصيني
- خاله مو تنسى تكل البشير اتاخر اربع تيام خمسه وخلي مرت بشير توديلي وياك ملابس
والمرتك همه جيبلها
::ان شالله باچر اجي واجيبهن انتي ديري بالج
- ما علينه شي

ركبت السياره وانا حانق على نفسي واحچي ويه روحي
::يعني مروه حامل ومن اول ليله زين شلون تكول ضحى لازم اراجع طبيب صحيح الطبيبه گايله الها لو هذا
كيد نسوان انا لازم اتاكد
::ليش يوسف انت ما متاكد من نفسك من مراجعات ضحى الي كل ما تروح للطبيب ترجع ضايجه بس هسه
صار عندك الضعف من اتزوجت
جاوبت نفسي وانا احچي ::لا يوسف انت ما عندك ضعف بس يمكن انت ضعيف شخصيه

ضربت ع الاستيرن وحجيت بعصبيه :: شنو ضعيف شخصيه
::اي تستقوى بس على الفقره الي ما الهم ظهر
::انا ما اخاف من اكبر واحد
::بس سكتت على سالفة سحر
::سمعت بعد فوات الاوان وهي گالت من المستحيل تفكر ترتبط بيه بعد ليش اخرب علاقتي ويه ابوي وامي

::ومروه
::مروه
::اي مروه يوسف
::مروه چانت خطيبة غريمي وبت عمه ولا يمكن اسامحها لو تجيبلي عشر ولد
::تكرهها
::اي اكرهها اموت منها
::اذا تكرهها ليش اليوم بالدائره صورتها وهي تنكل الكواني ما فارگتك ليش كل شويه تصفن وتكول خطيه
ليش من خابرتك ام بشير فرفح گلبك واجيت ما تندل دربك وهسه تگول اكرهها
ما لگيت جواب التساؤلاتي جريت نفس وگفت السياره وگلت ::والله انا الخطيه

اتصلت ضحى ما رديت واتصلت مره ثانيه شغلته وخليته صامت وصلت للحقل ودخلت للغرفه ورحت للجنطه
طلعت ملابس الها ورحت على بشير وكتله على امه وزوجته دزت علاگه
بيها ملابس الها وگلي بشير //  انتظر شويه خلي نودي ترمز چاي وياك لان امي تحب تشرب چاي
انا جاوبته :: لا على شنو الچاي خليت يمها فلوس وشنو تريد تشتري بعدين انا باچر اروح الها ومن توصي على
شي اجي واگلكم

طلعت وانا اوصي بشير الي گلي // لا يظل بالك بس لو تاخذ النقال يم امي
:: لا بشير امك خليتها بغرفه خاصه وكل شي يمها وبعدين باچر او عگبه بس تصير زينه تطلع
بشير بضحك گلي // ابو يعگوب تره المريضه مرتك مو امي

ابتسمت وركبت سيارتي ورحت طلعت للبيت لاگتني امي وضحى وگالن // سلامات وين چنت
جريت نفس ::شغل بالدائره
ضحى // يا دائره هاي الباقيه الهسه وليش ما ترد على التلفون
اتقربت منها وخزرتها :: مو تشوفين نفسج جاي تفوتين زايد من يمته تتقررين بكلامج
امي اتدخلت // هاي شبيك هي شگالت
رديت بنتر ::ما گالت بس تحچي بزمخ ناقص تضربني
- شنو هالحچي هي خايفه عليك
:: مره ثانيه تحچي باحترام ولا تستغل سكوتي

صعدت للغرفه وانا ضايج من كلام ضحى :: هاي شبيها من راحت للحقل وياي ورجعت وهيه متخبله

باوعت ع الميز شفت علاكة العلاج مالتها فتحته وبسرعه اخذت الورقه مال الدوا وخليتها بالمحفظه ودخلت
سبحت ونزلت وانا ساكت طلعت  للطارمه ادخن وبعدها صعدت الغرفتي وضحى صعدت وراي
حاولت تتقرب مني وتعتذر انا درت وجهي وكتلها

::طفي الگلوب اريد انام
-ما تريد تتعشى
::طفي الگلوب گلت
هي طفت الكلوب وطلعت وانا احچي :: صحيح كلام بشير لو ماخذ النقال الامه اقلها اتصل واطمن

ظليت  گاعد واتگلب بفراشي رغم اجت ضحى ونامت بحضني وهي شابكتني لكن انا ما اعرف ليش هيج
ضايج شنو بيه صرت اتنفس قوي كعدت على حيلي جريت نفس ضحى گعدت والنعاس بعيونها
- خير يوسف بيك شي
دخنت جگاره وكتلها ::نامي ما بيه شي
هي اتقربت مني وگالت //يوسف حبيبي لا تزعل مني تدري بيه شگد احبك
جاوبتها بدون نفس :: اي ادري

حضنتني واخذت الجگاره وصارت تبوسني وتشمني وهي تكلي// احبك واغار عليك من هذا الهوى
وانت تعرف انا شگد احبك
ما جاوبتها رجعت نمت وگعدت الصبح سبحت ومشطت وصارت عيني على علاج
ضحى ولا اراديا ضربت جيبي اتاكد من المحفظه
ونزلت اتريگت ع السريع وانا اكول:: عدنا جرد يجوز اتأخر مو مثل امس تخبصوني
امي //الله وياك بس اذا تتاخر انطينا علم

باوعت الضحى وابتسمت واتقربت يم امي وبستها واگللها :: يدلل الحلو
امي //هههههه شو صاير اخفيف مو مثل كبل ثكيل
::ليش حجيه شمسوي
- ادري بيك تغازل بمرتك
هزيت راسي ::لا اغازل بيج
- ولك اتگول يدلل الحلو منيلي الحلا انا ضحى الحلوه

:: هو انتي اكو بحلاتج اكول ابوي ليش صبر على عصبيتج لان حلوه
- انچب مو بس حلوه ابوك صبر لان يحبني
هزيت راسي وطلعت ركبت بالسياره چنت اتمنى اروح اشوف مروه لكن  بيومها مطلوب مني اكمل شغل بالدائره
اسوق واكول
:: هسه لو ما اتاخر چان رحت واطمنت عليها
:: ها يوسف شبيك مشتاق المروه لو فرحان لان حامل

////////////////////////////////

امين
بعد ان صار الي صار واخذوا اختي فصليه بيومها يمكن لو ذابحيني بسچينه عميه ومعذبيني ولا اختي راحت فصل
لكن شسوي قدمت حياتي وما صارت بيومها وگفت بنص البيت صرت اسب بجمال واحرك بروحه واسب بعمي
چاسب گدام ابوي الي صار يرجف واتقرب يمي
رفع ايده يريد يضربني لزمتها وعتيتها وهاي اول مره اسويها اول مره اخلي عيني بعينه بتحدي

گتله بعصبيه // هاا اتحرك شعورك لان سبيت جمال وحرگته
ابوي وهو يرجف //كافي امين لا تسب ولا تغلط
انا صرت احچي بصوت عالي // اسمع انعل ابو لاابو الخلفه لا ابو الي يدافعله انا بعد ما اسكت وسماح لا يمكن
انطيها واخليها تروح

بوكتها اشوف صادق يمسح دموعه بايده وسماح وزينب واگفات يبچن وعلي صافن انا من قهري ضربت راسي
بالحايط وهمه التمو عليه والكل حظني وسماح تگلي
- امين كلنه فدوه النعالك بس لا تنقهر لا يصير بيك شي

من سمعت كلام سماح وشفت دموع اخواني انقهرت وسكتت وانا اشوفهم شلون يحضنون بيه واباوع
الابوي الي طلع وهو يمسح دموعه بچفيته ما اعرف دموع ندم لو دموع قهر وليلتين ما غمض الي جفن
وما طلعت للشغل وانا احس قطعه من گلبي راحت الى ان اجت امي وعمتي
اشوف الحزن بعيونهن خصوصا امي الي من شافتني بچت وگالت

- اختكم زينه وما ينخاف عليها وتسلم عليكم
صادق بحرگه //يمه اذا زينه ليش تبچين
عمه امل تهز بايدها // ليش تبجي شنو الفرگه شويه
سالت عمتي// عمه لا تضمون علينه مروه شلونها
- وداعتكم احلى عروس وزفتين  سوولها واسالوا حجي عبد

جاوبتها // خابرته وسولفلي بس اريد من رحتوا هناك
امي دنگت وعمتي جاوبتني //همه منو عدهم بس امه ومرته واخو حتى جاهل ماكو بالبيت وامورهم عدله انتم
لايبقى بالكم
امي دموعها تنزل وصلت يمها وحضنتها // يمه غير افتهم اذا مروه زينه ليش تبچيين شضامه عليه والله اروح
هسه للحله وادك الباب عليهم وارجع اختي والي يصير يصير

امي وهي تمسح بدموعها وتشهك من البجي //مثل ما گالت عمتكم الفركه مو هينه وانوب وراها ياخذون سماح
جاوبت بعصبيه //ما انطي سماح لو تتثالث الدنيا
امي نشغت //لا يمه شنو ما تنطوها الناس طيبين ومثلنه فقره واسالوا عمتكم
- اي عمه وكلها سنه واختكم تجي وتشوفونها عمه السوا الملطوم بيهم مو شويه بس مروه سباعيه ومن اول
يوم احتوتهم وسموحه هم ما ينخاف عليها وخطيبها خوش ولد

سالتها // وين شفتي ؟
عمتي //ياا مو اگللكم خوش ناس وشالونه بالصلوات چا منو وصلنه للگراج غير سالم وراد ياخذلنه تكسي ابحدنا
بس احنه ما قبلنه
امي هزت راسها // صدك يمه ومروه تكول يدير باله على شغله ويلم نفسه
- ان شالله يمه بس كون كلامچن صحيح
عمتي // خاب شنو نچذب عليك زعلت بعد هاي هيه
رحت عليها وحضنتها وانا اتصنع الابتسامه // امل مو وكت زعلج

- لا وكته خلي اخابر جمعه يجي ياخذني
-وين ترحين اليوم تباتين اهنا (غمزتلها بعيني واشرت براسي يعني الخاطر امي )
امل // خوش ابات واظل العگب باچر بس بشرط
- انتي تأمرين مو تشرطين
- باجر اريد سمج شوي
- صدك چذب واخابر عمي جمعه يجيب العيال كلهم ويتغدون اهنا بعد عمه

- عساك سالم يابعد العمه الله يوفقك
صادق // عمه شوفي سماح من گلتي سالم عبالها خطيبها
الكل ضحك وكلنه ندري ضحكنا جاي نچذب بي على نفسنا

ومرت الايام وانا يوميه احاول اعرف من امي شنو صار من راحو للحله وليش دووم اشوفها تبچي وبس تشوفني
تسكت وچان نفس الجواب ابچي من الفراك
وصرت اروح الشغلي الي بديته بنجارة اشياء بسيطه ابساطة الناس الموجودين واجه حجي عبد هو وجهاد
وشاف شغلي وباركلي وچانت اكو قطعه بصف المحل گلي اخذها وسويها مفروشات انا باوعتله وهو هز
راسه وگلي //اصلا انت صاحب هاي الفكره شنو نسيت

ما جاوبته ودنگت هو گلي //امين بابا لا تلزمك الفلوس انت بس اتوكل وانا اخابرلك التاجر الي ابغداد ينطيك
ع التصريف
انا وجهاد فرحنا وهو يگول//ولو ما چنت اتمنى تبعدون عني بس هاي حال الدنيا
جاوبته //حجي لو ما الصار ما ابعد عنك وطول العمر ابقى ازغر صانع عدك انت ابوي الي رباني
حجي عبد //انت وجهاد اكثر من اولادي باجر بلش بالقطعه وما عليك بالفلوس

وصرت اشتغل وجهاد يبقى يتردد عليه لان يستحي يترك الحجي
ومشى شغلنا انا وجهاد ومن كثر ما صرت احب الشغل صرت ابات بالورشه وساعات يجي وياي صادق يبات
ومرات نتجمع انا وصادق وجهاد نبات كلنه سووا ونگعد نسولف ونضحك لكن ضحكنا بي نوع من المراره
وصرت احصل خير من الله وصارو يشتغلون وياي اثنين عمال من اهل المنطقه وجهاد دووم يجي ما تركني
واروح للبيت وانا محمل مسواك وشغلات يوصني  البنات واخواني وامي دووم دمعتها بعينها على مروه

وتباوع السماح وتبچي چنت اعرف انو مروه الي انقطعت اخبارها عنه من يوم الي تزوجت اعرف بيها
جاي تعاني اذا مو من زوجها وعيالها فاكيد من الاشتياق النه
حاولت اتصل بابو عادل واگله بس يجيبوها تشوفنا لكن هو گلي
بعد خلي نشوف يمته ياخذون الثانيه وبعدها نطلب منهم تجي وتشوفوها

ساعات من ارجع يتخايلي انو هي الي تفتحلي الباب وتحضرلي الحمام وهي الي تسولف عليه وتشاقه وياي
وتشكيلي من ابوي وتصرفاته بعدها تغلبني دمعتي عليها واسأل نفسي
- اختي وين شنو صاير بيها
وبمجرد هذا التفكير انطي اليوسف العذر بالي سووا لان اتذكر شنو صار بيه لمن مروه سولفتلي وانا
بذاك الوكت عمري 13 سنه
بعد مو هو رجال واخته مخطوبه ويجي واحد خاين مثل جمال ويخطفها وتموت بحادث

اما ابوي فتقريبا ابتعدنا عنه ما صرنا نحچي ويا وهو هم صار يغيب عن البيت ايام وبعدها يجينه
وهم هو مو مثل قبل يحچي وعصبي ويصيح لا صار هادئ
وحصلت قطعه زراعيه بنفس المنطقه الي اشتغل بيها وسعرها مناسب وقررت نشتريها ونبنيها بيت
النه وفاتحنه ابوي الي كال //انتم من كل عقلكم تبيعون طابوا وتشترون زراعي نبقى اهنا واول وتالي نرجع البيتنا

جاوبته وسط ذهول امي واخوتي //بس احنه ما نريد نرجع
ابوي //شنو ما نرجع اول وتالي السالفه تبرد ونرجع البيتنا واساسا الناس اهل ال انا شالوا بعد شكو باقيين
- بابا اهنا عيشتنا وانا بعد ما اعوف هذا المكان لو شنو يصير
ابوي بعصبيه //خوش ابقى انت اهنا واحنه بس تبرد السالفه نرجع وعود انت كل اسبوع عشر تيام تعال النه

صادق //كلنه نبقى ويه امين
ابوي اتقرب من صادق وگله بنتر //احچي عن نفسك شنو كلنه نبقى
امي //ايي كلنه نبقى اهنا وما ارد للبيت الي انهجم على راسي وراس بتي
ابوي اياشر على امي //ها مدسترينها
اتقربت من ابوي وگتله //بابا اعرض البيت للبيع وخلينه نشتري القطعه ونبنيها

ابوي باستهزاء // ايبااخ وانا انطي تعبي الحضرت جنابك تبنيلك مهجوم اهنا على ابو شغلي اسمعوني زين
نبقى اهنا بعد شهر شهرين سنه وتالي نرد هذا اخر كلام
اتقربت امي منه وكالت //انا ما ارد ابقى ويه ابني والبيت ينباع
ابوي استغرب من رد امي //والله صارلج السان وصرتي تحچين وتامرين البيت ينباع مو هو بيت الخلفج

امي ردت //لا مو بيت الخلفني بس ما كملته لو ما فلوسي من ورث الخلفني الفلوس الي كملت بيهن البيت
والبقى منهن بنيت ل اجميل غرفه فوك تتذكر لو اذكرك لمن امين هالطوله يكد ع البيت وبالليل نشتغل عماله
وانت وجمال وملوكه سوالفكم وضحكم وتالي استخسرت تبني الاولادك غرفه بنيتها للنذل الچلب

اتقرب ابوي والغضب مبين بعيونه وهو يگول //الزمي السانج لا اشعل صفحة الخلفوج
امي اجت ترد لكن انا سبقتها وحچيت ابرود //بابا مثل ما سمعت انا ما راح ارجع وامي واخوتي يبقون يمي لان
انا الي اكد عليهم
ابوي //وما طولك صرت اتعيرني بمگدتك  انا ما ابيع البيت
- لا بابا تبيعه وتنطي فلوس ورث امي ابني بي البيت والباقي اخذهن الك لو تريد يرجعون وياك انا من هاللحظه
اشيل ايدي من كل شي واشتغل النفسي و بس
ابوي اتفاجأ من ردي وسكت ما جاوبني

واجه جهاد وسولفتله هو گلي // هسه انت عامل على الگاع واخذها والبناء شويه شويه
وصار جهاد كل ما يصير عنده مجال يجيني   ونراجع سجلات البيع والشرا ومرات نبقى بالمحل انبات ومرات
لا نروح للبيت
وره اربع تشهر من زواج مروه اجتني طلبية مفروشات من بغداد جهاد الي مشتريها وصادف يوم اثنين فهو
خابرني وگلي // جايك بس اخلص شغل بايدي استاذن من الحجي واجيك
وفعلا الساعه بالاربعه العصر اجه وصرنا نچيك بالبضاعه وبعدين گعدنا نراجع الحسابات وصارت الساعه
بالخمسه ونص راد يرجع انا لزمت بي // لاترجع بات عدنا والصبح اطلع من غبشه

  جهاد هز راسه // لا هسه ارجع زحمه من الحجي وهالايام هذا ابنه  الوسطاني آوس يجي ويدقق بكل شي
واحس بي يضوج لان الحجي كل اعتماده عليه
جاوبته //اي هذا آوس دوومه ايغار ونفسيته حامضه ومتكبر
جهاد //والله يا امين لو ما الحجي صاحب فضل عليه ما بقيت بس الي ينكر ابن حرام
  لزمته من چتفه والتسمت // خلي نروح نتعشى اكو واحد يسوي كباب على راك الشط
-خاف نتاخر وما احصل سياره
-تحصل بعد وكت امشي خلي نتعشى

جهاد ابتسم // امين وين ما تحط رجلك خضره ما شاء الله بدا السوك يتوسع
ابتسمت //الله يرزق الوادم اهنا الناس على گد حالهم وطيبين
عزلنه وطلعنه نتمشى قبل ما نوصل واتصلت بيه عمتي امل جاوبتها
- الو هلا عمه
امل //هلا بيك همزين حصلتك
-ايي مو بعدني بالسوك اشلونج عمه
امل //الله يسلمك عمه
- عمه شكو شبيج مو على بعضج

هي بسرعه گالت //امين خابرتني مروه
انا فزيت //مروه
-ايي عمه مروه وتريدنه هسه نروح الها
-شبيها مروه او. وين نروح الها
- عمه مروه خابرتني من المستشفى
-مستشفى شكو عمه (اباوع الجهاد فتح عيونه وصار يتنفس بقوه )

-والله ماكو شي بس هي خابرتني وتگول سويتها حجه انام بالمستشفى بس حتى تجون واشوفكم
- عمه تحچيين صدك اختي ما بيها شي
- شبيك امين بيها شي واخابرك هسه ما جايتكم وگالبه الدنيا بس هي گالت مشتاقه الكم واريد اشوفكم وما
يجيبوني رحت للطبيبه وطلبت انام مستشفى حتى اخابركم
جاوبتها //عمه انطيني رقمها

عمتي //منيلها رقم خابرتني من الفراشه البلمستشفى اسمعني عمه لازم هسه نروح الها جيب امك وتعال بسرعه
حتى نوصل نص الليل محد يشوفنه
رديت بنتر //شنو بايگين
- عمه نسيت اختك شنو
- اتحضري جاي

- بس لاتخلي ابوك ياخذ علم تره يسويها مشكله ويمنعك
هزيت راسي //لا تخافيين انا اتصرف
- وانا واگفه بس توصلون رمش عليه دگلي هورن واطلع الكم كاظه عباتي بايدي
سديته من عمتي جهاد بارتباك سالني // شكو شبيها مروه
سولفتله وانا امشي بسرعه // ولازم اخذ امي واروح
هو گلي // على كيفك امين امشي خبر امك وانا احضر سياره واروح وياك
باوعتله باستغراب // لا وين رايح

هو بتردد //اروح وياك امين بدل ما تاخذ تكسي اروح واوكف بره المستشفى خاف يجي رجلها حماها
ياالله ياالله لا تضيع وكت
بقيت صافن من ردة فعل جهاد الي وگف تكسي گله //تودينه للبصره بس اول نمر ناخذ خالتي
وصلنه للبيت جهاد گلي //انزل وخليها تجي بسرعه
نزلت وانا اكول //يمه يمه
- ها يمه الله يساعدك

-هله بيج اكلج هاي سياره طالعه للزياره ترحين
امي بتردد //ها هسه لا ما اكدر
- شعدج ما تگدرين امشي وياي الولد هو وامه وانتي وانا ياالله يمه ياالله بسرعه
ورحت السماح گتلها//بسرعه حضريلي ملابس وقنعي امي تروح
سماح //وين رايحين امين
- بعدين داخل اغسل

رحت غسلت ع السريع وبدلت ملابسي ولكيت امي لابسه عبايتها ومتحضره اما ابوي بيومها ما چان موجود
وهذا ما نعرف شبي هالايام يغيبله يومين تلاثه ويرجع واحنه ما نساله لان نريد نتكفى شره
طلعنه انا وامي وهي تكلي //حتى ما اخذت وياي دشداشه
- يمه مناك شتردين نشتري احنه صد رد
ركبنا بالسياره وامي شافت جهاد اتعجبت سلمت علي وهي تسألني // وين رايحين امين
- شبيج يمه مو اگلج للزياره

-چا صاحبك هو وامه وين شو هذا جهاد عليك الله امين شصاير كلي
- والله ما صاير شي (لزمت جهاد من چتفه ) الله عليك صاير شي
جهاد دار على امي وهو يبتسم // لا خاله شنو ما صايره ترحين للزياره

بقينا ساكتين ومشت السياره بينه واسمع جهاد اتصل و يگله //حضرلي الجهاز وخلي بي شريحه جايينك
وسد النقال واتصل //غزوان السياره حضرها
وصلنه للبصره ولگينه غزوان منتظرنه ونزلنه انا وجهاد وامي الي ركبت وره وانا ويا بقينا ما ركبنا
سالته // شنو الجهاز والشريحه
جهاد //امشي خلي نركب بالسياره وبعدين افهمك خابر عمتك

جهاد يسوق وانا گعدت بالصدر وامي تسالني
- امين يمه وين رايحين شصاير كلي
- ما صاير شي رايحين للزياره
جهاد نزل وانا نزلت ويا وهو. يگلي //وصيت على جهاز وشريحه تخلي يم اختك حتى اذا ما بيها شي تخلي يمها
ويمته ما تريد تتصل عليكم وتتطمنون عليها

ولكينه ابو المحل منتظرنه اخذنا الجهاز وطلعنه گبل على بيت عمتي وبس رمشت طلعت وركبت اهنا امي
گالت //لو هسه تگلولي شصاير لو تنزلوني
امل باوست امي وهي تكللها //والله خيه ما صاير شي
درت عليها وگلت //يمه رايحين المروه

امي صار وجهها اصفر وشفتها بيضه سالتني بخوف //يمه شبيها مروه
امل //ما بيها شي خابرتني وكالت تعالو مشتاقه اشوف امي واخوي
امي تهز بايدها //لا لا تچذبون عليه بتي بيها شي
امل // بيها شي وهيچي احنه شبيچ والله خابرتني وكالت تعالو اشوفكم
وطلعنه والدرب كله امي تحلف بينه واحنه اناكدلها // ما بيها شي

وهدت شويه وعمتي سولفت الها على مخابرة مروه الها وبالطريق ما قبلت تنزل للمطعم بس عمتي امل گلتلها
الشباب النهار كله تعبانيين بالشغل واجو بدون لا عشا ولا شي النص ساعه ما راح تعطلنه
ونزلنه اكلنه ع السريع وشربنا چاي وامي خطيه ما خلت لگمه بحلكها
الى ان وصلنه للمستشفى وما قبلو يدخلونه اله بعد ان اتوسلنه بيهم وامي صارت تبچي من شافوها وعرفوا جايين
من غير محافظه دخلونه
وهمه يگولون لا تتاخرون
جهاد بقى كاعد يم الاستعلامات وگلي // اي شي يصير اتصل عليك انت اخذ الوالده وعمتك الغير ردهه وانا اجي وراك

ورحنا دخلنه على مروه وگلوبنا سبقت عيونه ولگيناها متمدده عبالنه نايمه بس فتحنه الباب كعدت على حيلها
وامي ركضت عليها وهي تبوس بيها وتبچي والمره الوياها كعدت وعمتي سلمت عليها بعدين رحت حضنت
اختي توأم روحي وانا گوه لازم نفسي ما ابچي كعدنا وانا اباوع المروه شكد ضعفانه واديها سوود وخشنات
المره الوياها كالت //راح اطلع شويه
عمتي ما قبلت المره ردت عليها وهي تبتسم //لا ابقو يم ابنيتكم

صرنا كلنه نسال بوكت واحد وهي هم بعدين انتبهنا النفسنا كلنه جاي نبجي ونسأل مروه كالت
= انا ما بيه شي بس اشتاقيت الكم ورحت للطبيبه اتوسلت تنومني مستشفى حتى اكدر اتصل
امي // منو هاي المره الوياج وانتي يمه ليش هيج ضعفانه
مروه سولفت = يوسف وره زواجنا وداني للحقل مالته بس حتى ما تصير مشاكل بين مرته وبيني وهاي المره
ام الرجال الي يشتغل ويا
عرفت من كلامها بي نوع من الچذب سالتها //انتي متغيره هواي
باوعت وابتسمت = اتغير الجو عليه وهسه من الحمل

وكأنما هذا الخبر خلانه ننسى الزعل والقهر فرحنه لان نحس هذا الطفل هو طوق النجاة وامي رفعت اديها وهي تكول
- ربي انت اعلم بحالي ما الي غيرك توطن البنيه وتحنن گلوبهم عليها
وصارت تبجي ومروه تبتسم ودموعها يطيحن على خدها وهي تگول = يمه ما بيه شي لا تبچيين

من هدات شويه طلعت الموبايل وكتلها انا خليت بي رقمي ورقم امي وعمتي احنه ما نتصل بس انتي كل ما يصير
عدج مجال اتصلي طمنينه عليج
امي تباوعلي //يمه تدري اذا لگا شيسوي وين تضمه
مروه اخذته وكالت = اضمه يمه لا تخافين عليه

اخذته وخلته جوه مخدتها وعمتي راحت صاحت الام بشير الي اجت وانا باوعت الها وحچيت وياها
- خاله الله ينطيج ويوفقج مروه سولفت عنج وشگد انتي حنينه عليها ما نعرف شلون انجازيج
ام بشير //لا يمه هي مثل بتي ما مسويتلها شي تره ويوسف خوش ولد بس شويه عصبي
صارت امي تبجي وتوصي بمروه // بتي بتي ديري بالج انتي السويتي كله على مود هذا
(واشرت عليه ) وصدوقي مو على مود الچلب ذاك يمه فلازم تصيرين عد حسن ظنه بيج
اهم شي مرضاة رب العالمين ومرضاة رجلج والرجال كل شي يسوي وبت الاصول اهنا يبين معدنها اذا اتحملت
رجلها وحافظت على اسمه وعلى بيته
ام بشير //والله كلامج ذهب ياخيه وبتج ذهب صافي

بعدها قررنا لازم نرجع وما اسولف الكم على موقف امي وهي تبوس بيها وتشمها وتبچي وهي تگلها
- شبيدي يايمه لو ما اخوتج ما نعيني والله اجي واحچي ويه رجلج وابوس ايده ورجله بس حتى يخلينه نشوفج
ام بشير //گولي ياالله ام امين وداعتج هاي فورة دم وتروح اول وتالي تهدا النفوس وتصير ابنيتكم تجيكم
وتشوفونها وتشبعون منها
امي ترفع ايدها للسما //الله يسمع منج ياخيه والله احنه ما مسوين شي بس ما اكول اله الله لا ينطي السواها
امل //كافي سهام
امي باوعتلي وسكتت ومروه ابتسمت رغم بچيها وهي تگل الامي

= مو انتي توچ توصين بيه وتگليلي اصبري هسه بس يجيكم طفل كل شي يتبدل
امي هزت راسها وهي عيونها يجرن وشفايفها يرجفن حتى ام بشير بچت بعدها اتقربت عمتي امل وشاورت امي
وامي هزت راسها واتقربت من مروه // مودعتج الله (وباوعت لام بشير ) ما اوصيج عليها والله ما النه بالمصيبه
لا ناقه ولا جمل
ام بشير //عين الله خيه لا تخافين على مروه سباعيه وتفتهم مو جابتكم بليلتكم من البصره للحله لا تخافون عليها

امل //خيه هاي امانه وجيتنا اذا ...
ام بشير //عود صدك اسألنها منوجابت النقال من الفراشه لاتخافن وأمنن بس شي واحد ما اوعدكم بي
الكل باوع لام بشير الي استردفت //بس ما اتدخل بين الرجال ومرته
امل // الله يطيج العافيه ويخلي وليداتج
ام بشير //الله يسلمج
تباوسن وياها وانا اتقربت من مروه وشلت فلوس كتلها //خليهن جوه ايدج

مروه = المن امين اصلا الفلوس الي انطيتهن الامي بيوم عرسي بعدني ما صارفه منهن
هزيت راسي // مي خالف ضميهن اكيد تحتاجيلهن
ورحت على ام بشير وشلت مية الف وانطيتها //خاله ذني مصرف الج
هي ردت ايدي وكالت //افه مع الاسف عبالكم اسوي هيج على ...

ما خليتها تكمل جاوبتها //انتي مو تكولين مروه مثل بتچ وانا مثل بشير ومو عيب الولد ينطي الامه مصرف
امل //اخذيهن خيه لو ننطيج ماي عيونه ما نطلع من امجازاتج
ام بشير //ما سويت شي (اخذتهن ) نعم الله عليك يمه
وطلعت امي وعمتي وراهن ام بشير وبقيت يم مروه وفهمتها//  اي شي يصير تخابريني وانا بلمح البصر اجيج

هي هزت راسها وهي مبرطمه كتلها //اذا تبچيين اتاني يوسف والي يصير يصير
هي كالت = لا والله ما بيه شي بس راح اشتاقلك
- وداعتج مراوي ما يبقى الوضع هالشكل اول وتالي ينحل واذا ما صارت چاره انا احلها
هي ما ردت بس اشوف عيونها شلون غرگانه بالدموع بستها بخدها وكتلها

- خويه احنا ظلمناج وانتي زغيره ظلمج ابوي وبطلج من المدرسه وبعدها ظلمج جمال الحقير من صار يتحرش
بيج وخطبج وهو ما ناوي ياخذج بس كسر قسمتج واخر شي انا ظلمتج لان صرت جبان وخفت من الموت بس
صدكيني مروه سكتت بسبب صادق ادري بي مندفع ومتهور واله انا اخلي اخواتي يرحن فصليات
عبالج انا مرتاح لو نايم ليلي لا وداعتج بس هذا الشي مو بيدي

جاوبتنبي =لا امين لا تلوم على نفسك انت رجال وخليت الناس كلها تحسبلك الف حساب
صفگت بايدي بالم //شنو الفايده وانا اختي فصليه لا وفوكها اسيره (اتقربت يمها وكلت)
ادري بيج تشتغلين بالحقل واديج مو من الجو بس احنه الخاطرج صدگنا لكن
من توصل حدها هذا يوسف حگه طلقه بالف

////////||||||||///////////////////////||||////////////||||||///////////يتبع