رواية بعد فوات الأوان الفصل الثاني والعشرون 22 - بقلم آنين الليل

مرحبا ياخير الاصحاب
ردت اخربط بالبارتات يعني اقدم الحاضر وبعدين ابلش بالماضي بس اعرف بيكم ما تحبون هذا الشي تردون
تسلسل الاحداث

وعفيه لحد يگلي البارت قصير لان اقل بارت اكتبه 3500 كلمه بدون لا مقدمه ولا شرح ولا شعر ولا خاطره
لان اريدكم تعيشون الاحداث وتتصورون الابطال بذهنكم

ولا تگلولي نزلي واستعجلي تره للعلم بعدني مريضه لكن جاي اتسلى بالكتابه لان ضجت من العزل 😢😢
والادويه فاانا ابلغكم اكتب حسب حالتي الصحيه 😷🤒
اتمنى الكم قراءه ممتعه ولا تنسوني من دعاءكم 🤲🤲
#آنيين الليل #

//////////////💙❤️💙////////////

يوسف
ما اعرف يمته نمت گعدت الصبح اتوضيت وصليت وچنت ضايج كلش من كلام امي او من تصرف
ضحى وحتى من انذار ماهر
نزلت و شفت امي كاعده وضحى بالمطبخ والوجوه ثگيله عليه
انا سلمت ورحت وصلت يم باب الصاله امي حچت //شنو ما تتريك

::لا اتريك بره
-وعلاجك
::مو مهم اجي واخذه
امي //بس مو زين عليك
- زين حجيه لا تهمين بيه
امي //اذا ما اهم بيك بيمن اهم
:: ماعليه بس الخير

رجعت بست راسها وهي شاورتني //مرتك ما الها احد غيرك
::ليش شمسويلها
امي //كل شي ما مسوي بس دير بالك عليها
هزيت راسي ورحتلها للمطبخ ::محتاجه شي اجيبه وياي
هي بدون ما تباوعلي //لا بس انت دير بالك
هزيت راسي وحضنتها وهي تگلي //ليش البارحه ما نمت بغرفتك
:: ذيج هم غرفتي

طلعت اخذت تكسي ورحت يم الفيتر سلمت علي وهو رد عليه السلام سالته
::انت مار عليك هواي حوادث
باوعلي مستفهم انا استرفت
::اقصد حوادث سيارات
جاوبني //اي استاذ ليش تسأل
::بمثل سيارتي شتقيم الاصابه
حك شعره وگال //الصدگ انت انكتب الك عمر جديد

::ها وليش
-لان معجزه طلعت سلامات انت مسوي شي زين بحياتك الحمد لله ع السلامه وانا منك هاي السياره ولا ابيعها
ضحكت وسالته ::ليش باالله
-مبخوته يا خي گتلك گلبتك قله اليطلع منها سلامات
::الحمد لله والشكر

شربت چاي يمه وانطيته دفعه من الفلوس وطلعت اتصلت
::الو شيخنا الفاضل بس لا گعدتك من النوم
- هلا يوسف حتى لو نايم اگعدلك
::رايدك بشغله
-تدلل
::وين انت
-بالبيت
::يعني اجيك لو مشغول
-هلا بيك بيتك

ورحت وصلت دگيت الباب طلعلي ولد يجي عمره تسع سنين گتله ::عمو موجود بابا
جاوبني بكل ادب //اي عمو اتفضل منتظرك
دخلت تلگاني شيخ عون سلمت علي وهو يباوع الايدي ويگلي //سلامات سلامات
::حادث بسيط شيخنا
-الحمد لله على سلامتك وهلا وكل الهلا بيك اشلونك
::الله يخليك (طلعت چگاره  قدمتله هو خله ايده على صدره وگلي ما ادخن انا ورثتها وباوعتله وحچيت  )

::ابو فضل جايلك بمسأله شرعيه
- هلا بيك اسمعك
::الفصليه اذا عقد عليها الرجل شتكون
هو باوعلي باستفسار //ليش اكو فصليه بهالوكت
هزيت راسي ::ايي اكو

هو سكت وكأنما يفكر وگلي //شوف الفصليه بالشرع ما تجوز تنوخذ اله برضاتها حالها حال اي امرأه
ومن يعقد عليها الرجل تكون مرته شرعا
والها كل الحقوق خصوصا اذا كانت مطيعه وحافظة لغيبة زوجها
::واذا چانت مجبوره وما موافقه
- اذا ما موافقه الزواج باطل
انتفضت من مكاني ::استغفر الله
-اي يوسف دينه يحترم المرأه والها مكانه ما تقل عن مكانة الرجل

هزيت راسي وگلي// يوسف انا اعرفك من قبل سنه اجيت للدائره وانت گضيتلي الشغله ما خليتني اوگف
اكراما الي رغم ما كنت تعرف انو اخوي زميلك بالشغل وبعدين صرنا تقريبا اصدقاء وانت الك مواقف
ويه المحتاج والفقير بس اريد اسألك شنو قصة الفصليه
باوعتله وجاوبته ::شيخ عون انا ماخذ فصليه
هو اتعجب ورد عليه //لا باالله تحچي صدك
هزيت راسي ::اي شيخنا احچي صدك
-يعني زواجك قبل كم شهر من عزمتني

جريت نفس ::ايي شيخ وجاي استشيرك
- فهمني شلون واحد مثقف ودارك مثلك ياخذ فصليه وبهذا الوكت الي الناس تعرف بي الحلال من الحرام
::شنو قصدك
-قصدي گبل ياغافلين الكم الله بس هسه القنوات الاسلاميه تحچي بالحلال والحرام الجوامع وبكل مكان
ابسط مثال انت مو رفعت النقال ودكيت رقمي واتصلت بيه واجيتني

بقيت مدنك وعاض شفتي من جوه شيخ عون كال //يوسف اذا ما تريد تحجي بكيفك
سولفتله الحادثه وشلون اجينه من غير محافظه وشلون انحلت بفلوس ونسوان
هو قبض على لحيته - ماشي اذا موافقات بس لازم عدم الاساءه
باوعتله وانا اسحب نفس من الجگاره  هو هز راسه وكلي //انت ما تكدر تتعايش وياها
دنگت ما اعرف شجاوبه رد عليه // الايه الكريمه (فسرحوهن سراحا جميلا )
انطيها حقوقها وشنو العرف ابين اهلها وبينك وطلكها انت تعيش حياتك وهي تشوف حياتها

ما اعرف ليش انعصر گلبي من سمعت كلمة طلگها مع العلم دووم اسمعها من امي وضحى وحتى
سالم وماهر لكن من سمعتها من شيخ عون صار عندي ردة فعل قويه ظليت ابحث على اعذار هو رد عليه
- ليش اتعذب نفسك يوسف اذا ما تگدر تتعايش ويه الوضع طلگها
::هي حامل

- (اتحمحم وكلي )خلي اسألك وانت جاوبني بس لاتعتبرني شيخ ودارس حوزه وجاي
تستشيرني اعتبرني صديقك
::وانت صديقي وانا اتشرف بيك
- طال عمرك الي اقصده احيانا الواحد يفضفض الصديقه اكثر من اخو واكثر من مديره بالشغل
::صحيح
-يوسف افرض هسه انت متت شنو تصورك عن القبر وحياة البرزخ ها واكيد ما يعرف بيها بس الله سبحانه لكن
الانسان الله خلقله تصور بعقله يتصور الاشياء المجهوله

::يعني اكيد ليله عظيمه ع الشخص
-الشخص ليش گلت الشخص مو الجماعه
::لان الانسان يروح وحيد
-ها شنو ياخذ ويا
::بس عمله
-سواء صالح او طالح
:: ايي

- يعني ما يفيده بالكبر بس العمل
::ايي اكيد هذا الشي الكل يعرفه
- وما طول كل واحد يعرفه اذن يا صاحبي ليش اتحمل نفسك آثام واحنه بحاجة الحسنه
::شيخ ممكن اسأل سؤال ولو استبعده وما اريد اي احد يكون بمكاني
-اعرفه تريد تسالني لو انت بمكاني شتسوي اول شي اسلم امري ال الله وثاني شي اقبل بالفديه لان هاي الله آمر بيها
::والنساء
- المرأه مو جاريه بسوق الرقيق

::فرضا
- ايي اخذها واخاف الله بيها انت يوسف بهاي افعالك  ويه زوجتك لاراح ترضي ربك ولا ترضي نفسك
والدليل صحوة الضمير الي اجتك
:: شتنصحني
- كلامي مفهوم انت اذا كرمت زوجتك كرمت نفسك واذا هنتها هنت نفسك لاترضي غيرك على حساب ربك لان
محد يدخل وياك للگبر من تموت

خله ايده على كتفي //فكر يوسف انت خوش ولد
انا سحبت ايده اريد ابوسها هو سحبها مني وكال //استغفر الله تره كلنه مذنبين وظالمين انفسنا ونريد من الله الغفران
هزيت راسي وگتله ::مشكور زاحمتك وانا اترخص
- الله وياك
من طلعت وصلني للباب وحاچاني //يوسف الله سبحانه من تستغفره يغفر النه الزلات الخاصه بي

باوعتله وانا عاكف حواجبي رد گلي //الاخطاء بحق الاخرين لازم بالبدايه همه يغفرونها النه دير بالك المرأه
مخلوق حساس مو ضعيف بس والله من تنطيها المجال تكون بمية رجال وزوجتك انسانه صابره رغم هي يجوز
مجبوره عليك لكن حافظتك وحافظه اسمك

تسالمت ويا وطلعت ما اعرف وانا امشي ليش غلبتني دموعي خوف او ندم او يمكن ...
طلعت وانا ما اعرف جبال من الهموم انزالت عني لكن اجتني جبال من الهموم الجديده جثمت فووك صدري
صرت امشي وگفت تكسي اجرته للحقل مرجع بس قبلها گتله ينتظرني اتسوك اخذت فواكه وخضروات
ورحت المحل اخذت كيك وعصائر وحليب وبعدها اخذت سفري كباب وطلعنه وانا اعاتب نفسي واگول
:: هاي شكم يووم انا اهنا ومخليها بدون اكل صدك انا حيوان
ويجيني الرد :: لا انت انسان ما تخاف من الله

طلعت سبحتي وصرت استغفر الله وكلام الشيخ يدن باذني اذا ما تريدها طلگها وقررت اخيرها بين تبقى
وبين ترجع الاهلها وكلت ما اجبرها على شي شنو تريد اوافق كافي الي صار ازهار ماتت والمسبب مات
واخذنا فصل بعد ليش هالاجرام
::والناس
::شنو الناس احسن لو رب العالمين
::ايي هسه بس اشوفها اخيرها اهم شي تسامحني

وصلنه الظهر نزلت العلاليك ورحنا انا والسايق على بيت بشير وهم نزلت مسواك الهم وتلگاني بشير وهو
يتحمدلي السلامه ودخلنه للديوان انا والسايق رحت اتوضيت وصليت ابيت بشير بعدها اخذته على صفحه وگتله
:: من باجر تشوف واحد يسرح بالحلال
هز راسه وگلي //صار اعرف واحد خوش ادمي
::منو هذا ؟
بشير حك شعره وگال //اخو الفلاح الي عد بيت حجي ناصر رجال فقير واهم شي قريب ويروح ويرجع
::اي والله علوا بس كون يقبل
- هو گلي يريد يشتغل هسه اخابر اخو واخلي يجي وانت اتفاهم ويا

::بشير انا ما علي المن مخليك
-هذا هو تدلل
::وين الوالده ؟
-هسه اصيحها يمه يمه
طلعت ام بشير وشافت ايدي والكدمات الي على وجهي وهي نشغت //ها يمه يوسف شبيك شصاير
::حادث خاله
- اسم الله الرحمن حادثيش

بشير //يمه هاي اله اسبوع من يوم الي راح بالليل
خزرت بشير //وانت تدري ووما گتلي
بشير هز ايده // وانا يمته دريت اول امس من خابرني وگلي تعال ويوسف طلب ما اجيب طاري
- خاله يوسف الحمد لله على سلامتك الله باوع الهلمسكينه (واشرت على الغرفه يعني المروه )
::الله يسلمج خاله روحي المروه گليلها خلي تجي وانت بشير شوفلي الرجال
- هسه اخابره واخلي يجي من باجر

ام بشير //يارجال ؟
بشير //يمه الرجال الذاك اليوم اجه وراد شغل
ام بشير // اي والله علوا خطيه مرتك بيها وما تثگل
حكيت گصتي باصبع السبابه وهزيت راسي هي گالت //انا راح ابقى بمكانها واخليها تجي
:: روحي خاله بس مو تگليلها ع الحادث
- لا يمه تنهبط خطيه

رحت للغرفه بعد ان كلت البشير يخلي غدا للسايق دخلت للغرفه وانا اشوفها شبيهه بالسجن والدنيا حاره وبس
مروحه وگلوب شفتها اجت دخلت وهي فرحانه لكن اتفاجأت بيه او خلي اگول انرعبت من شافتني صارت ترجف
وهي تباوع الايدي او وجهي انا مجرد ما شفتها راسا اتقربت منها بدون اي مقدمات
::مروه سامحيني
هي بقت واگفه وفتحت عيونها ع الآخر رجعت عدت كلامي
::مروه سامحيني انا غلطت بحقج
هي بلعت ريگها وما حچت كتلها :: ياالله روحي غسلي وتعالي خلي ناكل لازم ارجع

هي اتحركت عبالك لعابه اخذت ملابس وراحت للحمام ما اتاخرت بسرعه طلعت وهي لافه الخارلي على شعرها
شعرها الاسود الي بي لمعه واجت فتحت العلاليك وخلت الاكل بصينيه وجابته خلته گدامي انا باوعت الها
وحاچيتها //تعاي اكلي وياي
هي بعدهي متفاجئه گعدت وخرت الخاولي وصرت اباوع الشعرها الاسود وهو نازل على متونها رغم مو كلش طويل
بس حلو عليها ولايك  انا ثلمت الخبزه بايد وحده وخليت بيها شويه دجاج وكلتها الها وانا ابتسم

هي اخذت اللگمه اكذب اذا ما اگلكم هي اخذتها وتلوچ بيها ودموعها ينزلن اتقربت عليها ومديت ايدي ومسحت
دموعها وحضنتها هي تشهك وانا اتذكر كلمة ام بشير //دير بالك من دمعة المظلوم
حسيت بدگات گلبها ورجفتها وانا اگلها :: كافي لا تبچيين
هي وجهها بصدري سالتني =شبيها ايدك
::حادث
باوعتلي = حادث شنو ؟
:: سيارتي انگلبت وطلعت بمعجزه
هي اتفاجأت اكثر = يمته اشو ام بشير ما گلتلي

:: من رحت ذاك اليوم ع الشارع العام وطلعت بمعجزه اكيد انتي دعيتي عليه
هي بخوف تهز بايدها = لا صدگني صدگني ما دعيت
بچت بخوف انا هدأتها اعرف ::يجوز شورتي بيه
بستها براسها :: يمكن هذا الشي الصار بيه حوبتج
هي سكتت وبسكوتها عرفت انو الصار بيه نتيجة ظلمي الها لزمتها من حنچها وابتسمت بوجهها حسيت بانفاسها
الحاره جاوبتها :: انا لازم اروح اجي غير وكت انتي اكلي زين واي شي تحتاجي اطلبي من ام بشير
وبعد من اجي لا تلفيين شعرج بالحجاب خلي نازل

سالتني //اتحبه الشعري
جاوبتها بدون تفكير :: احب كل شي بيج
شفت بعيونها استغراب عرفت تريد تگلي = اذا تحبني ليش تعذبني
لكن هي ما حچت طلعت وسلمت على بشير او وصيته ع الشغل ورجعت انا وابو التكسي وصلني يم البيت دخلت
امي گاعده ع القنفه بس شافتني گالت //شنو وين چنت
باوعت الها وانا رافع حواجبي مستفسر هي ردت //اگوول اتاخرت
::يم السياره
- ها ما كملت
:: وين بيها شغل هواي
-انخليلك غدا
::لا ما اشتهي اريد انام عندي شغل ضروري العصر

صعدت للغرفه انسندت ع الچربايه بايدي وانا كل تفكيري بمروه ما تقبل تروح عن بالي يمكن غفيت نص ساعه
بملابسي گعدت لگيت روحي عركان دخلت للحمام سبحت وطلعت بعدها اخذت فلوس ونزلت ضحى گالت
- يوسف تريد اخليلك غدا
::لا ما اشتهي اريد بس چاي
راحت جابتلي كوب چاي وانا طلعت امي گالت //هم طالع ليش ما تبقى ترتاح

::شغل عندي بعدين تعبت من الگعده
امي //هم صدك اگلك يوسف
::ها حجيه
- ضحى تريد تروح البيت اخوها اخذها وصلها بدربك

باوعت صفح الضحى ورجعت باوعت الامي وانا اگول ::شنو اشتاقت لو تروح تكمل الباقي
امي رادت تحچي رفعت ايدي ::كافي يمه الي صار ثاني يوم والبارحه كلش كافي وانتي (باوعت الضحى ) اكعدي
بالبيت مو استقتلتي بس حتى ترجعين
ضحى // شنو اريد اروح اشوف اخوي
حاچيتها بنتر :: لا تردين ترحين تسوين مشاكل اتركي الولد هو ومرته كافي واخوج ما يريد يشوفج

امي باستهزاء//هاي يامره الفصليه
::ايي الفصليه مره غصبن عليه وعليج
امي //ادري بيها مره بس لو تصعد للزرگه هي فصليه (وصارت تهز بايدها ) وهسه انت  ما تخلي ضحى
تروح البيت اخوها لان تضوجه
::يمه ما النه شغل سالم حر ابيته وبمرته
ضحى //انا ضايجه اريد اطلع شويه

::خلي بسام ياخذج انتي وامي للزياره
امي //خو انت روح ويانه ليش بسام
ما جاوبت طلعت وانا افور من العصبيه واكول ::هاي شبيها ضحى تحتار شتسوي

رحت للسوك ودخلت على محل كهربائيات سلمت واخذت من عنده مبرده وثلاجه زغيره وتلفزيون
وطباخ ابو الفرن
وخليتهن يمه بعدها رحت اخذت كنتور ابو تلث ابواب الباب الوسطاني بي امرايه وحملتهن وانطيت السايق
العنوان وگتله يشتري قنينة غاز بطريقه وخابرت بشير ان ينزل الغراض يم مروه ويشوف السايق مشتري قنينه او لا
ويسوي التلفزيون وانا احچي ويه نفسي
::شنو انت من جاي تسوي هالشكل حتى ترضي ضميرك بالعكس انت جاي اتاذي ضميرك اكثر

::انا هم واكع بين نارين نار امي واختي الي راحت لو ضحى هاي مسكينه يمكن هم ظلمتها وياي  وهي
هالايام ما اعرف شبيها
اكيد غيره واكيد حقها لكن هي مو اول وحده زوجها يتزوج عليها وانا ما چان بنيتي الزواج لو ما انفرض عليه
:: وهم نار خوفي من الي صار اكيد هذا درس لازم اتعلم منه واغير من تصرفاتي

رجعت للبيت واتعشيت وبالي يم مروه وبصراحه اتذكر من حضنتها ما اعرف فد شي خلاني احس بحراره بوجهي
واشتياق الها اتمنيت اروح اشوفها واتخايل الفرحه
الفرحه الي عمري ما شفتها على وجهها واتمنيت اروح انام هناك يمها ُخابرت بشير
::الو شلونك ابو بهاء
بشير //هلا بيك ابو يعكوب
::هاا وصلن الغراض

بشير //اي وصلن وجاي اشد بيهن بس عندي عتب عليك
::خير بشير شو مو على بعضك صاير شي
- لا ماكو شي
::گول بشير
- - من وصلت سيارة الغراض دزيت امي على ام يعكوب حتى تروح البيتنا بين ما اكمل شد اشوهي
ما قبلت وراحت گعدت ورا المقطوره مالت الماي ليش يوسف احنه شبينه
::لا ما بيكم بس الخير بس هي تستحي

بشير //لا انت موصيها تره البيت مو بيتنا بيتك واحنه نشتغل عمال عندك
حسيت فعلا ماخذ من خاطره رديت علي ::لا بشير متوهم انت حالك حالي صاحب ملك بس صدگني هي تستحي
- ياالله انا كملت باقي بس ابحث القنوات
::تسلم ابو بهاء
-الله يسلمك

سديته وحاولت انام لكن بقيت افكر بيها اجت ضحى بدلت ونامت يمي وخلت وجهها بصدري
وانا اتقربت الها لكن الصراحه كل شويه متذكر مروه وخفگت گلبها من حضنتها
نمت وگعدت سبحت وصليت الفجر ردت بس الصبح يطلع اتمددت وغفيت گعدت بالتسعه وضحى بعدهي نايمه
بصفي گمت لبست ونزلت لگيت امي گاعده
::صباح الخير
صباح النور تعال اتريك
گعدت صبتلي جاي ودنتلي ماعون البيض سالتني //وين مبدل وطالع

::اروح اشتري غراض للسياره
-شنو غير مخليها عد المصلح وهو يشتريلها غراض ومو امس هم رحت على اساس تشتري
:: اي صحيح بس ما لگيت المطلوبات فهسه لازم ارجع ادور واشتريهن على ايدي احسن
امي // خوش من تكمل تعال اتغدا مو تبقى بالكراج
::لا شعندي ابقى بس اذا اتاخر انتوا اتغدوا
- اي ان شالله اگلك يوسف عود اليوم اخذ ضحى للطبيبه خاف تجي وما تلگانه

::اي عادي اخذيها
-يوسف ليش ما انت تاخذها
جاوبتها باستهزاء ::هههه لا حجيه انتي اخذيها عندج فلوس ؟
امي هزت راسها //اي عندي
مديت ايدي على جيبي وانطيتها :: هاج يمه خاف العلاج غالي يجوز يعجبكم شي تحبون تشترونه

امي اخذتهن وانا طلعت اجرت تكسي ورحت اتسوكت واخذت دجاج من المطعم الي والبيت بشير ورحت
للحقل حاسبته السايق هو راح واجاني بهاء //ها عمو اشلونك
ما شاء الله ما چن عمره خمس سنين سالته //وين ابوك
- راح بشغل
بسته وانطيته مسواگهم

وانا رحت للغرفه لكيتها ظلمه وبس ضوه التلفزيون الي جان ناصي شفتها متمدده او يمكن نايمه انا خليت
الاغراض واجيت يمها اتمددت هي جفلت انا بقيت اشم برگبتها وگتلها:: مشتاقلج
هي بقت بمكانها احس ابرود اتجاهي رغم دگات گلبها بس اعرف هاي دكات خوف حضنتها وظليت اتنفس
قوي وانا العب بشعرها واشم بي سالتها
::عجبنج الغراض
= ايي شكرا
::شنو عجبج اكثر شي

هي بسرعه جاوبتني = الطباخ الطباخ لان الحطب حيل اياذيني الدخان بس كلهن مهمات شكرا
ظليت امسد على ظهرها هي حاولت تكوم سالتها ::وين
=اروح احضرلك غدا
::ابقي جبت جاهز
= زين شكرا
اتساءلت ويه نفسي :: ما عدها غير كلمة شكرا ويكون الجواب لاتنسى الي سويته بيها

ما اعرف ليش احس براحه من احضنها بقيت متمدد وهي رادت تگوم لكن اشوفها متاذيه سالتها :: شبيج
= رجليه مورمات
::هاا ليش
= ما اعرف
::شگد صار الهن
=اربع تيام بس اليوم اكثر
::يجوز من العلاج
=اي يجوز
:: باچر حضري نفسج اخذج للطبيبه لان اليوم تعبان
=بكيفك

رحت اتوضيت وهي هم اتوضت وصلينه بعدهي جابت الغدا وخلته كدامي باوعت الها وهي تطلع بطل لبن جاوبتها
::بعد تاكلين وياي
حسيت ما مهتمه رغم اللمعه الي بعيونها اتغدينا وسوتلي چاي وصدك اشوفها مورمه
:: بس انام شويه واخذج اليوم حتى لو نتاخر مو مشكله

اتمددت وسحبتها بس على كيف نيمتها بحضني احس بانفاسها الحاره وبنفس الوكت خجلها وحسيت بحركه الطفل
ما اعرف شنو الي صارلي فرحت واتوترت گعدت وخليت راسي على بطنها وانا اگله
::بابا حبيبي تدري شگد مشتاقلك
رجع اتحرك ضحكت وگتله :: شنو تغار على امك مني
هي ابتسمت ورجعت غفيت گعدت فايت وكت وشفتها نايمه بحضني باوعت للساعه بالخمسه فاكيد ما نلحك
ع الطبيبه هي حست عليه شافت روحها حاضنتني يمكن خجلت او اتفاجأت گتلها

::هسه ما نلحك نروح بين ما تبدلين والطريق واحتمال ما نلگاها باچر احجز ونطلع من وكت
هي هزت راسها جاوبتها ::هذا العطر الي خالته خرافي
حمحمت وهي مدنگه =جبته وياي
::اي دووم خلي منه لان عجبني
هي دنگت ما جاوبتني ::ياالله انا اروح هم محتاجه شي اجيبلج وياي
هزت راسها وكانما ما تريد تحچي وياي

درت وجهي اريد اطلع رديت عليها بستها براسها ::احب من احچي تجاوبيني مو تهزين راسچ
هي ماجاوبتني رفعت حنچها وشفت ابتسامه بوجهها طلعت رحت على بشير وگتله يوصلني بسيارته للشارع العام
وصلني وبقى واگف الى ان اجرت سياره گتله:: باچر اجي اخذها السيارتك
بشير //تدلل ولو ما باچر عندي شغل من غبشه چان هسه اخليك تاخذها
::مشكور وما تقصر ياالله فيمان الله

وصلت للبيت  دخلت ولگيت امي وضحى گاعدات سلمت ورحت اريد اصعد امي گالت
-والله مع الاسف هاي تاليها اتچذب عليه
باوعت الها  باستغراب رجعت عليها  ::يمه انا چذاب ؟
امي بعصبيه //واكبر چذاب
::هاا وبيش چذبت
- اسأل نفسك تگول چنت طالع من الدائره وانگلبت طلعت جاي من يمها

بقيت ساكت ما رديت عليها هي استردفت// باالله مو عيب عليك اتچذب رايح يم الفصليه. وخوش حصلت
ضليت انفخ امي صارت تبچي وهي تگول //نستك بت عم ابليس الي باك اختك ومن ورا عفنا بيتنا وحلالنا ومالنه
وتالي رايح يمها ومگلوب زين ما متت شنو عبالك اذا ضميت عليه ما راح اعرف
:... يمه ليش البچي شنو يعني ما اروح
هزت راسها //اي ما تروح هذا هو خليتلها مهجومه وجاي تتسمم كافي
::بس هذا الشي حرام والحرام عليه انا تره هي بشر مو حيوان

امي بنتر //يوسف كافي تره گوه صابره لاتخليني ارووح هسه واكسرها اتكسر وانعل ابوها لاابو
عشيرتها والله زين اخذت الفصليه حتى تعوف بيتك ومرتك وتكابلها
:...بس الفصليه هم مرتي
اتفاجئن اثنينهن بالرد امي //شنو شتگول
جاوبت ابهدوء ::اگول الفصليه مرتي ما ناهبها ولا عايشه وياي بالحرام ومثل ما ضحى مرتي الفصليه مرتي هم
(باوعت الضحى واشرت بااصبعي ) وحالها من حالج

ضحى اتقربت مني وهي تگول باستزغار  //عمت عينها تجيب الفصليه الي
امي // انعل ابوها بت الكلب لا ابو الخلفها شنو تگول حالها من حال ضحى
::يمه هذا الكلام جاي تحچينه لان ما تردين اروح بس هي بالواقع مرتي الشرع والقانون يقرون هذا الشي
- ياشرع ياقانون ولك هاي تعرفها منو
::منو ما تكون مرتي
ضحى // وشدعوه مشلوع گلبك عليها

اتقربت وخليت اصبعي على صدرها ::لان حالها من حالج وكافي لازم تعرفن مروه مرتي وضحى  انتي
هم مرتي افرضي يمه انا متزوج ثانيه شنو هم هيج ترديني اعاملها
ضحى اتخوصرت //وليش تتزوج ثانيه انا شبيه
::انا گلت افرضو وصدگيني لو ما چنت متزوج مروه من يوم الچذبتي عليه اتزوج وحده ثانيه مو
عبالج ساكت تره بمزاجي  (باوعت الهن وانا اهز بايدي )بعدين انتي وامي ناصبات محكمه وجاي
اتحاكمني شنو اخاف مثلا منتظر اخذ رايج ضحى خاتون

امي //يوسف شنو هالحچي
:: يمه ماكو غير كلام انتي نفسج گلتي اخذ فصل وفضها لاتكبر وانا اخاف عليكم
امي //ايي ما ناكره گتلك اخذها واكسرعين اهلها وعوفها مثل الچلبه مو تركض وراها
اتقربت منها وگلت ::انا الچلب يمه انا الچلب  لان ظلمت البنيه وهي ما الها ذنب

ضحى //شوف  خاله شلون ساحرته مثل اختها الطيحت حظ سالم من اول يوم
خزرتها ولزمتها من ايدها ::احترمي نفسج واحچي عدل لا اعرف شغلي وياج
ضحى //حاچيه عدل بس انت الي ما اعرف شبيك
:: تره دخت  هو انا صوجي واجيت

ضحى //روحلها روح ليش تخليها ابحدها خاف تستاحش
ابتسمت بتشفي :: وانتي كلتيها رايح وممنوع احد يتصل عليه تره اتشوفون شي ما تتوقعونه
درت وطلعت وانا اسمع ضحى شلون تسب بمروه وامي شلون تدعي عليها
امشي وانا اجر نفس قوي  مريت اخذت جكاير وبعدها اخذت تكسي ورحت العيادة الطبيبه لگيت
بس السكرتيره حجزت على ثاني يوم

ورجعت اجرت تكسي للحقل وصلت بحدود الساعه تسعه بالليل  طلعت المفتاح فتحت باب الغرفه
لكن لگيتها مسرگيته من داخل دگيته هي جاوبت بخوف = منو
:: انا يوسف افتحي
فتحتلي وشفتها متفاجئه بجيتي لكن ما سالتني كتلها ::سويلي عشا
راحت وره شويه جابتلي طماطه وبيض وچاي انا گتلها
:: تعالي اتعشي
= لا اكلت فواكه ما اثكل بالليل

اتعشيت وغسلت وطلبت منها تغسل التيشيرت مالتي هي ساعدتني انزعه وراحت غسلته واجت نزلت فراش
ع الجهه الثانيه فرشته سالتها :: ليش فرشتي اهناك
جاوبتني  = لان انا الليل كله اتكلب من الوجع
::جيبي اهنا (واشرتلها يمي )

جابته وفرشته واتمددت وانا اشوفها متاذيه لكن تلقائيا حضنتها ونمت وحتى هي نامت ثاني يوم
كعدتني وجابتلي ريوك لبست ورحت اتمشى بالحقل وكلام امي وعياطها ودعاويها يرنن باذني
رجعت صليت الظهر وجابتلي غدا

بعدها سبحت واخذتها للطبيبه الي سوت الها تحليل وطلع عدها زلال جدا قوي وهو السبب بورم
رجليها وصتها بالراحه ولازم تدير بالها اكثر وما تتعرض الاي انفعال ولا تشيل ثگل ولا ولا توصيات
الطبيبه وكتبت الها علاج

رجعنا للحقل بالطريق سالتها اذا تحب تنزل تشتري شي يعجبها بس هي ما قبلت وگالت ترجع للبيت لان تعبانه
بقيت يمها ست تيام كلامها كان قليل وياي او بالاحرى ماكو موضوع تحچي
اباوع الها شلون تطبخ بالشمس واحچي ويه نفسي :: مو كافي رضيت غرورك
اتقربت يمها وگتلها ::مروه (هي باوعتلي ) راح ابني مطبخ وغرفه ثانيه

فتحت عيونها تلقائيا حضنتني بفرحه وگالت =  رحم الله والديك
حسيت بيها شكد عفويه بقيت حاضنها وانا اگلها ::مشتاق تره
هي ابتسمت وسدت الطباخ واجينه للغرفه اتبادلنه الحب وانا احس بخجلها هدوءها الطاغي على كل شي ونظافتها
وترتيبها وبهاي الست تيام ما اتصلت بامي ولا باي احد
بالليل اجاني اتصال من سالم رديت

:: هلا سالم
-هلا بيك يوسف شنو وين
::موجود
-ايدك شلونها
::زينه الحمد لله
سالم // الحمد لله انت تعرف انا ما اگدر اجي من ...

قاطعته ::ادري سالم معذور
سالم // الله يخليك اگلك يوسف اريد اجيب سماح يم اختها لان باجر عندي سفره
:: اي مي خالف
-خو ماكو زحمه
::لا عليمن هالزحمه هلا بيكم

عرفت سالم اصلا ما متصل بضحى ولا عنده علم انا يم مروه
ثاني يوم الساعه بالتسعه الصبح  فهمت مروه انو اختها راح تجي تبقى شكم يوم وانا بخلال هاي اليومين
اشوف واحد يجي يبني
هي لمعت عيونها واجه سالم وسماح وتفاجئوا بوجودي بعدها انا رجعت ويه سالم وسماح بقت يم اختها

من رجعت دخلت للبيت لكيت امي گاعده وضحى بالمطبخ سلمت امي ردت عليه ولا كان شي  صاير وضحى
اجت وكالت // الله يساعدك
اتا رديت عليهن ابرود صعدت للغرفه سبحت وغيرت ملابسي وبقيت الظهر اجت ضحى وگالت
- - انزل اتغدا
نزلت محد بيهن سالتني على شي كملت صعدت للغرفه واجت ضحى نامت بحضني وهي تگلي
- - اشتاقيتلك حبيبي

بهاي الايام بقينه هادئيين صلحت السياره وطلعت واحد يبني مطبخ   وصرت اروح المروه وارجع
محد يسأل او ايعقب
وانتهت اجازتي ورجعت للدوام وفكيت الجبس من ايدي وكملت المطبخ وحتى ماي اسستله وجبت كاونتر بسيط
وگتلها ابلش بالغرفه من تولدين بالسلامه واشوف الفرحه بوجهه وحتى صارت احلى من قبل

وبهاي الايام  صار وياي شي غريب وانا بالدائره چنت اراجع سجلات وفجأه گلبي صار يدك قوي كأنما يريد يطلع
من جسمي وگفت وراسا گعدت لان حسيت بتعب وعرگت زميلي بالشغل شافني اجه يمي وسالني
- يوسف شبيك
جريت نفس وانا اگله :: گلبي يوجعني
ن
جاب ماي وبعدها استاذنت ورحت وانا تعبان امي شافتني سالتني
ها يمه خيير
:: ما اعرف تعبت بالشغل
امي //اصعد ارتاح وعلى كيفك بالجگاير

صعدت واجت يمي ضحى بعدها صرت زين ونزلت اتغديت
هاي الايام دووم انا  قلق ومتضايق ودووم تصير عندي رجفه بگلبي وخنگه رحت للطبيب سوالي فحوصات
ما لگى شي كتبلي فيتامينات وگلي حاول تطلع واتغير جو

وفعلا قررت اروح للزياره بعد ان اخذت اجازه امي ما قبلت تروح ويانه گالت رووح انت ومرتك
ورحنه زرنا ومناك البغداد بقينا يومين اتونسنا ما صرنا نرجع للفندق اله نص الليل واحنه فرحانيين ونتبادل
الحب ورجعت للشغل وانا هناك صرت اشتاق الضحى ما اريد افارگها وبس تجي يمي اشوفها بصورة مروه
وچنت اريد اروح اشوفها لكن بسرعه اغير رايي

وانا بالشغل قررت اروح اشوفها المروه  ورحت دخلت للغرفه وهي لاگتني وابتسامه خفيفه بوجهها
انا من شفتها نفس الرجفه والخنگه هي گلتلي = الله يساعدك 
رديت وانا ضايج :: هلا
هي سكتت ما جاوبت سالتني ::اسويلك اكل
جاوبتها بدون اهتمام. ::لا ما اريد
اختنكت وانا گاعد يمها اخذت السويج والباكيت وطلعت مجرد ما ركبت بالسياره صرت احاسب نفسي
::ليش هالشكل سويت

بقيت كل عشر تيام اروح وبس اوصل اضوج وتطلع روحي وما اباوع الها وهي نفس سكوتها چنت اتمنى تحچي وياي
حتى اضربها لكن هي تتحاشاني
چنت بالدائره لمن ما بشير خابرني وگلي //مروه مريضه وتگول ياريت تجي تاخذها للطبيب
:: خير شكو
بشير // والله ما اعرف امي راحتلها وشافتها كلش تعبانه وهيه موصيتها ابلغك

صار گلبي يدك خفت عليها من گال مريضه :: ان شالله وره الدوام اجي واخذها
خابرت ضحى وگتلها راح اتاخر بالدائره جايتنه لجنه
هي ردت // زين حبيبي دير بالك وحاول ترجع من وكت لان مشتاقتلك
:: وانا اكثر بس اكمل الشغل اجي
هي ضحكت // وانا بانتظارك

من خلص الدوام طلعت حجزت الها يم السكرتيره ورحت للحقل وصلت لگيتها متمدده
اجيت  يمها سالتها
:: شبيج مروه
هي گوه تحچي من الالم وگعدت على حيلها = ما اعرف وجع قوي كلش
::شنو يعني تولدين
= لا بعدني بالثامن
:: بس انتي موجوعه مو
هي بتعب = ايي حييل  ( باوعتلي ) ام بشير تگول لاتخافيين كل حامل هالشكل يصير وياها

عبالك هاي الكلمتين قنبله لزمتها من ذراعها وگتلها بعصبيه :: بت الكلب يعني تضحكين عليه تكولين مريضه
ردت عليه باستغراب او يمكن اتفاجآت من ردة فعلي =  هاي شبيك اتخبلت
من سمعت كلمة اتخبلت ما اعرف شلون اتصرف صرت اضرب بيها واگلها
:: اي اتخبلت ولازم اموتج مو انا مخبل ما عليه حرج لازم اموتج

ظليت اضرب واضرب وخنگتها هي فتحت عيونها ع الاخير وحاولت تفك اديه الي غرزتهن برگبتها ظلت
اتفرفربين اديه
شمرتها  بالگاع وصرت ارفس بيها واباوع شلون حتى ما صارت تدافع عن نفسها كانما صارت بحالةاغماء
من شفتها ما تتحرك عبالي ماتت واباوع  اشوفها  تنزف
ما اعرف شسوي خليت اذني على گلبها شفته يدك قوي حاولت اكعدها وانا اگول

::مروه مروه اگعدي
لكن هي صار وجهها اصفر واشوفها شلون تنزف شلتها خليتها بالسياره وصحت الام بشير الي اجت
تركض واتعجبت وهي تشوفها شلون تنزف وتشوف الزراك الي بوجهها جابت ماي بارد غسلت وجهها
وذبت شويه على گلبها انتبهت مروه ونت وشربتها ام بشير شويه ماي من انتبهت رجع الالم اكثر
صارت تصرخ وتگول = خاله راح اموت مو
ام بشير حاضنتها وتسور عليها  //لا خاله ما بيج اله العافيه
اول مره اسمعها تحجي بصوت عالي = خاله الحگي عليه ما اگدر اتحمل
ام بشير //گولي ياالله
= ياالله مالي غيرك فدوه خاله الحگيلي

اسوق بكل سرعه وصلنه للعياده وجبت العربانه ودخلتها ع الدكتوره الي اتفاجئت من شافتها
وباوعتلي باتهام وگالت بعصبيه
- هاي معنفه (سالتها ) مروه تسمعيني منو وياچ احچي لا تخافيين
هي ساكته باوعتلي وكالت //اطلع اريد افحصها وثق باالله اذا اعرف انت معتدي عليها راح اعرف شغلي وياك

طلعت وبقت ام بشير يمها عشر دقايق الطبيبه دگت الجرس والسكرتيره گالت ادخل
دخلت الطبيبه باوعتلي وكالت
-:شوف انا متاكده مليون بالميه متعرضه لاعتداء بس هي رادت تحميك ما اعرف ليش اگدر اتخذ
بحقك اجراء هاك  ( شمرت عليه ورقه ) گبل للمستشفى لازم عمليه
ام بشير //شنو دكتوره البنيه بالثامن
الطبيبه //اي حجيه بس البنيه تگول وگعت من الدرج وانا ادري هي ما واگعه لذلك حالتها مو مال حچي

حكيت خدي ::دكتوره اوديها مستشفى اهلي
-بكيفك تريد اهلي ؟
::ايي
- هاي ورقه وانا راح اخابر الطبيب هناك واشرحله الحاله هو كلش شاطر ياالله اخذها

اخذتها وهي تصرخ وتگول ::راح اموت ما عندي قابليه خاله الحكيني
ام بشير //. الله يتولاج بكيفه
صارت تتنفس بقوه //. خاله اريد امي راح اموت جيبيلي امي الله يخليك

ام بشير تهدي بيها خابرت سالم جاوبني
- الو هلا يوسف
::سالم بسرعه جيب سماح وتعال المستشفى النور الاهلي
- ليش خير شصاير
::مروه اجاها نزيف وما اعرف شنو الوضع تعال سالم لاتتاخر

وصلت للاستعلامات انطيت جنسيتي وابو الاستعلامات گلي انت دزتك دكتوره روضه
هزيت راسي وگال للعامل  جيب عربانه وفوتها منا الطبيب بانتظارك وارجعلي اكمل اجراءات
اخذها. العامل وانا رحت وراهم ودخلوها الغرفه اجه الطبيب وشافها تصرخ باوعلي كلي //انتظر بره
انتظرت وانا اسمع صوت صريخها الي ملا المستشفى اجه سالم وسماح الي تبچي وهي تكول

شبيها مروه شصاير
ما جاوبتها طلع الطبيب سالني //انت زوجها
::اي دكتور انا زوجها
- زوجتك معتدين عليها بالضرب المبرح واكيد انت لكن هي تكول واگعه من الدرج هسه حالتها حرجه
وانت لازم توقعلي ولازم واحد من اهلها يجي ايوقع
جاوبه سالم //دكتور اهلها بالبصره طريقهم بعيد

الطبيب //اتصلو  بيهم خلي اسمع الموافقه ( باوع الي ) لان راح توقعلي على انسانه ميته
الله العليم شگد نسبة نجاح العمليه
سماح صارت تضرب على وجهها وهي تكول // شبيها مروه شسويت بيها
سالم //اسكتي سماح خلي نفتهم
وهي تبچي كالت السالم //الله يخليك اتصل بامين
سالم جاوبها //ما اعرف رقمه
سماح //انا اعرفه

ملته السالم الي خابره وگله // السلام عليكم امين مو
- - انا سالم زوج سماح
- - حياك الله هاك  هاي سماح وياك
هي اخذت التلفون وحچت وهي تبچي //امين مروه تنزف وحالتها خطره  رووح خلي امي تدعيلها
-لا شيجيبك منو يكول اتلحك هذا الطبيب وياك
اخذ الطبيب التلفون وفتح الحاكيه // الو انت شتعود للمريضه

- اخوها دكتور
-شنو اسمها الرباعي
امين انطى اسمها الطبيب گال - لازم هسه نسوي العمليه اذا ننتظر على ما تجي يجوز نفقد المريضه
واختك خطره تقبل اسويلها العمليه
امين بتوتر // دكتور شكد نسبة النجاح
الطبيبي الحقيقه يم الله بس كل ما نستعجل يكون احسن
امين //. اتوكل دكتور
تمام

رجع الطبيب التلفون  السماح وامين يسالها // شبيها مروه
- ما اعرف رجلها خابر وگال تنزف وسالم راسا جابني للمستشفى
-زين انا راح اجي
جاوبت وهي تباوعلي //لا خويه لا تجي چنا بواحد نصير  باثنيين خلي امي تدعيلها دعاء الام مستجاب
     امين //. سماح من كل وعقلج اعوف مروه جاي انا
       امين بداعة مروه رووح الامي خليها تدعيلها ياالله رايحه انا
سدته واجو كالو نريد دم انا رحت سماح گالت بعصبيه // اوكف يوسف

///////////////////////////////////يتبع