رواية بعد فوات الأوان الفصل الرابع وأربعون 44 - بقلم آنين الليل

مرحبا
راح اسرع بالاحداث واحاول اختصرها وذلك بسبب منعي من الكتابه لكن لان بديت وياكم لازم انهي القصه
الطبيب منعني بالوقت الحاضر من الكتابه بسبب رگبتي والخلع الي بكتفي اما الكسر فبسبب البرد
كلش اياذيني الله لايراويكم لذلك انا وبدون محد يدري جاي اكتب من اصيرلي فرصه ان اكون ابحدي
لذلك راح اختصر الكثير من الاحداث

تحياتي واتمنى الكم قراءه ممتعه
وارجو ان تعذروني لان اتاخرت بالنشر بس صراحه جسمي كله تعبان
وممنونه منكم لسؤالكم وامنياتكم الي بالصحه والعافيه 😘😘😘
# آنيين الليل #
//////////////////////////////////

يوسف
الفجر صليت وبعدها رجعت نمت بالسبعه گعدت لبست ورحت للدوام وصلت شفت منال موجوده سلمت هي ردت
ولمعة خجل بعيونها گعدنا وبدينه نكمل معاملات الناس تقريبا الساعه عشره جابتلي تفاحه اخذتها وگلت شكرا
هزت راسها ورجعت المكتبها وانا اكلتها كملنه الدوام واحنا كل واحد يريد يعرف شنو بضمير الثاني طلعنا هي ركبت
يمي بالسياره واجه علينه مناف وهو يضحك ويگول //هاي شدعوه من لگى احبابه نسى اصحابه حتى ما تسالني
اوصلك بطريقي

هي دنگت انا جاوبته :: ليش شبيها سيارتك وتريدني اوصلك
مناف //لا مو هذا قصدي بس انت هالايام ولا الك خلك
هزيت راسي ::اي والله من النماذج المتعايش وياها
هو بضحكه سالني //بس لا انا واحد منهم ؟

:: منا وهيچ تصير منهم
- احضرينا ست منال
هي باوعتلي  //لا استاذ مناف خوش انسان
ابتسمت وجاوبتها :: اذا انتي تشوفينه هالشكل ماشي (باوعت المناف ) هسه تسمحلنه نروح حضرت الخوش انسان
- - روحوا عيني الك الله يالفقير
::دخيلك ربي من عينك
- - ههههه خليتني حسود خلي اروح احسنلي

راح مناف وانا سقت السياره وصلنه للمطعم دخلنه وگعدنا وسالتها ::شتحبين تتغدين
- - قبل الغدا اريد اسمعك
:: انا جوعان ومن اجوع ما اعرف اسولف شتحبين تاكلين
- - اي شي
:: نطلب دجاج
- - بكيفك
:: لو سمج

ردت بابتسامه // - - لا السمج يرادله گعده بالگاع
::هههه حلوه عفويتج
تسلم

وطلبنه دجاج وصرنا ناكل هي ما اكلت اله شي قليل بعدها اكتفت ان مسحت ايدهاوحلكها بمنديل طلبنه چاي هي
لازمه الخاشوكه وتخوط بعدها گالت //اسمعك اتفضل احچي
:: شنو تردين تعرفين
- - كل شي (رفعت راسها ) او بالاحرى ما يخص موضوعك ليش
::شنو ليش
-اقصد ليش تريد تتزوج
::اريد استقر

اتنفست // استاذ مو انت متزوج
هزيت راسي ::بس ما مستقر
- - فهمني
وبديت احچيلها عن ظروف زواجي بضحى وشلون اتزوجتها نزولا لرغبة ابوي وعمي وحتى راويتها ورقة طلاگها
وشلون رجعتها سالتني
- -  استاذ هذا كل شي
::ممكن بدون استاذ
- - طيب هذا كل شي
:: شقصدچ ؟

- - اقصد حزنك وقهرك وحتى اجايزك ما اتصور كل الي انت بي سببه ضحى
باوعت الها هي كملت كلامها // يعني بالعقل انت ما تحبها وهي ما مأثره عليك وانت اتعايشت ويه واقعك
:: صحيح
- - اذن هذا مو سبب الحزنك لازم تصارحني بكل شي واي شي تضمه بمرور الوقت راح ينكشف والمقابل راح
يفقد الثقه بيك سواء كنت انا او اي وحده غيري

هي رفعت راسها // وقبل لا تگلي بالشي الي مضوجك خلي اگلك شي حتى يصير البساط احمدي مثل ما يگولون
انا قبل اربع سنوات انخطبت وعقدت وفسخت
باوعت الها هي ابتسمت بحزن وردت //مو اتفقنه ع الصراحه
هزيت راسي :: ليش فصختي
جرت نفس قوي وگالت //ضروري تعرف 
:: لا مو ضروري
- - حتى لو ما تسالني انا لازم اگلك ليش فصخت لان الولد يشك

::شلون يعني
- - يعني من خطبني يعرف بيه انا موظفه وهو ما مانع بدوامي لكن هو يريدني اداوم بلا ما احچي ويه موظف
ولا ويه مراجع واذا اتصل وما رديت تنگلب الدنيا ولازم ابررله ولازم انطي تقرير مفصل عن يومي شلون گضيته
وهواي امور فارتأيت اطفر النهر من البدايه بعدها فقدت الثقه باغلب الناس ورفضت هواي قسم اجتلي
::ليش ؟
- - ما اريد اكرر الشي الي صار وياي ما اريد اظلم نفسي واظلم ابن الناس الي حيرتبط بيه

::ليش تظلمينه حسب كلامج انتي مو غلطانه
- - بصراحه صرت اخاف من الارتباط ما اريد اغلط بحق نفسي
::وانا
- - انت شبيك
:: يعني انا شنو بالنسبه الچ
لملمت حلگها // ما انكر اعجابي بشخصيتك ورزانتك ً ًواعتقد انت هواي يتمنن الارتباط بيك
::وانتي
- - انا حذره من هاي الناحيه ما اگدر انطي جوابي اله بعد ان اعرف عنك كل شي
:: واذا عرفتي
- - اذا عرفت راح يكون ردي بالموافقه او عدم الموافقه على حسب

:: توعديني الي احچي يبقى سر
- - بدون ما اوعدك لازم يكون ابيناتنا احترام للمشاعر
::  عجبني ردج وانا راح اسولف الج كل شي واتمنى الي تسمعي ما يطلع الاي كان
هزت راسها //وعد

وبديت اسولف الها عن زواجي من مروه وشلون اخذتها فصليه لان ابن عمها (خطف اختي ) طبعا ضحكت على
نفسي وانا اسولف هاي الچذبه الى ان وصلت وياها انو زوجتي هاجرت بعد ان سافرنا انا وياها
باوعتلي // ليش تركتها اتسافر اذا تحبها
::لان فاجأتني بتصرفها
- - وليش ما سافرت وياها
:: لان اعرف هناك راح تطلب الطلاك
- - بس حسب كلامك انت بالبدايه ردت تهاجر وياها

:: صحيح لكن بعدين حسيت انو ما اگدر اعيش بالغربه من صارحتها وطلبت منها نرجع هي ما قبلت وخلتني
امام الامر الواقع لذلك انا طلگتها
- - انت تحبها
صفنت وانا بعيوني مروه وابتسامتها هزيت راسي وجاوبتها :: اي احبها واحبها هواي
منال باوعتلي وكالت // ممكن توصلني لان اتاخرت
ركبنا بالسياره وبقينا ساكتين الى ان وصلتها قريب على بيتهم من نزلت گالت //يوسف انطيني وقت افكر

هزيت راسي ورحت للمشتمل ثاني يوم داومنا انا ما حبيت اسالها وهي ما ابدت شي اتجاهي وثالث يوم
نفس الشي بالليل اجتني رساله من منال
- - يوسف انت ليش تريد تتزوجني
رديت عليها ::ما فهمت
- - كلامي واضح انت ليش تريد تتزوجني
بقيت ساكت هي جاوبتني // انا اكلك انت تريد تنتقم من ضحى بيه

:: لا مو هذا الشي بس
- - لعد شنو احنه اتفقنا ع الصراحه
:: يمكن اريد انتقم من ضحى بس هم اريد زوجه تنسيني مروه
- - تتصور تگدر تنساها
:: هذا السؤال انتي تجاوبين علي
- - متأكد يوسف
:: متأكد اريد ارتبط بيج واعيش حياتي

ما ردت عليه بقيت منتظر ردها الى ان غفيت گعدت الصبح شفتها دازه رساله
- - يوسف انا موافقه تدري ليش ......
ما كملت الجمله حسيت بنوع من الراحه داومت وهي اجت متاخره وسلمت ردينه عليها من گعدت رحت يمها
:: يمته اجي واتقدم
باوعتلي بخجل // خلي افاتح امي واخواتي
:: ليش ما كملتي الجمله
ياجمله

:: الي وره تدري ليش
هي بارتباك //ما قاصده شي
ابتسمت :: حتى لو هسه يمته اجي
مستعجل
:: هواي بس قبلها خلي افهمج اجي انا واخوي وابن عمي لا امي ولا زوجتي تجي
- - شلون يصير

:: بعد انتي وشطارتج قنعيهم وهمه خلي يسالون عني وشنو يردون من معلومات انا حاضر
- - الله كريم
::انا اليوم راح افاتح منتصر شتگولين
- - بكيفك

وصرت اوصلها من نرجع وهي قنعت امها واخوانها طبعا بمساعدة منتصر واختها  وصار الاتفاق انو اجي انا وبسام
ودزيت على بشير ومناف وجماعه اصدقائي
وتمت الخطبه والعقد بنفس اليوم واتفقنا نتزوج بالمشتمل على ما ابني قطعتي 
وباسبوع كل شي كملت وهي سوت حفله الاقاربها وصديقاتها وبيوم الزواج سافرنا البغداد بقينا عشر تيام ورجعنا

ما انكر منال چانت اكثر من خوش ابنيه وحاولت اتنسيني كل الي مريت بي چانت انسانه عمليه ونظرتها
للامور مو ضيقه وابد ما حاولت تتطرق الموضوع ضحى او مروه

ورجعنا وداومنا وبس بسام يعرف بزواجي وره تقريبا خمس تيام اتصل بيه سالم الي گلي هوبالحله
ورايد يشوفني

طبعا هو كل مره يتصل بيه انا اطلع اله حجه لكن هالمره انطيته عنوان البيت وهو اجاني واتفاجأ من شافني متزوج
لكن ما بين علي بالعكس باركلي وسلم على منال واتمنالنه التوفيق ومن طلع انا طلعت ويا هو گلي
- - يوسف انت من حقك تتزوج ومحد يمنعك لكن لا تنسى انت عندك زوجه وهسه هي حامل
:: لا ما ناسي وانا ما مقصر منها وتگدر تسألها
- - بدون ما اسألها اعرف انت ما مقصر بس هم حقها عليك لازم تعدل لو انا غلطان

::لا ما غلطان
- بس لا خالتي ولا ضحى يعرفن بخبر زواجك
::يعرفن ان شالله  واتصور مو عيب ولا حرام الي سويته
- لا يوسف مو عيب ولا حرام المهم اعدل ابيناتهن واالله يهنيك

هزيت راسي بالقبول سلم عليه وراح سالم وانا سديت الباب وصرت احچي ويه نفسي باستهزاء
:: تريدني اعدل انا اتزوجت منال مو لان احبها اتزوجتها لان اريد انتقم من اختك واحرگ گلبها واقهرها
مثل ما حرگت گلبي وقهرتني
اتصلت ابسام وسالته سالم رجع مر على امي واخته بسام گلي لا ما مر عرفت سالم ايريدني انا اروح على امي
واعلن خبر زواجي  وهو فعلا لازم الكل يعرف بس يرادلي شوية وكت واخلي النقاط ع الحروف

///////////////////////////////////

جهاد
بعد ما رجعت انا وأمين من يم يوسف عرفت شي مهم عرفت انو مروه كاسره عين يوسف بشي هي تعرفه
ورادت تخفي عن الكل بس المهم انها تنال حريتها ويطلگها
اشوف بعيون امين شك من ناحية قصة يوسف لكن هو اضطر يتقبلها ويصدگها

صار عندي يقين انو انا ما اگدر انسى مروه وصرت اعاتب بنفسي ليش ضيعتها من ايدي ليش ما رحت وياها
وبمجرد ما وصلت كتبت الها
انا مستحيل اتركج راح اجي انتظريني

هي ما ردت عليه رغم عرفت هي قرت الرساله
صرت ادز الها رسايل عباره عن كلمتين ارجوج ردي
تقريبا اسبوع وبنص الليل اتصلت عليه انا جاوبتها الو (كنت حذر واخاف عليها حتى وهي بعيده عني )

ردت عليه =اشلونك جهاد
جريت نفس //ليش ما تردين عليه
=جهاد رجاءا اسمعني
- شسمع فهميني انا لو بيدي اكتل روحي على الي سويته
=ليش
- - تساليني ليش مروه انا خنت الخبز والملح شردتج وخليت امين حسبه تاخذه وحسبه تجيبه

= حقك عليه انت مو خاين انت طيب ساعدت انسانه چان ممكن تموت
- - والله لو باقيه وگايلتلي على كل شي انا اساعدج لو اعرف انطي عمري
=جهاد انا ...
قاطعتها //مروه انا وامين رحنا اليوسف

حسيت بنفسها علا سالتني =رحتو اليوسف
- - اي وهو بيض صفحتج وگال بايده اخذج لكن انتي هناك هددتي اذا ما يخليج تهاجرين وياج تشتكين علي لذلك
هو اضطر يقبل
=وأمين من سمع شگال
- -أمين چذب على نفسه وصدگ الچذبه

سكتنا وبس انفاسنا نسمعها // مروه
هي ردت عليه = ها جهاد
- -قريتي الي كتبته
=جهاد انسى
- -ما اگدر انسى انا طالبج بالحلال ومستعد الكل شي
= ما افيدك

من سمعت هاي الكلمه اتنرفزت //لاتگولين هاي الكلمه ابد ولاتخليني احچي كلام يزعلج
= جهاد لايروح بالك لبعيد بس انا فعلا ما افيدك
-وليش
=انا حامل
اتفاجأت //ش شنو
= اي طلعت حامل هسه عرفت ليش ما افيدك

من سمعت كلامها حچيت بعصبيه //سدي التلفون المكالمه غاليه
هي غلقت الخط بسرعه انا الدنيا اسودت بعيني احچي وانا مهضووم // انوب حامل ياالله
غمضت عيوني ورفعت راسي وجريت نفس وانا اگول // ياالله ليش كل هذا الامتحان ياربي ساعدني
جاي اخسر نفسي ما بقى عندي طاقة تحمل

گعدت واديه على صفاح راسي واحس نار من وجهي تطلع وانا اگول //امتحانك صعب ربي امتحانك صعب
جاي اعد يوم يوم حتى تخلص العده واقنعها ترجع انوب تطلع حامل ارادتك ياربي ليش انا من دون البشر
هالشكل يصير وياي ما بقت عندي طاقه الهي ارأف بحال عبدك ياربي ساعدني

دموعي ينزلن وانا ارجف صرت اگول //وشنو واذا حامل شنو عبالك ترجع اليوسف جهاد واذا حامل
شنو يعني بعد ما تريدها

لا ارديا وگفت ورجعت اتصلت بيها وكانما تعرف انا راح ارجع واتصل هي ردت
= جهاد
جاوبتها  والعبره بصدري //واذا حامل انتظرج وانتظرج وانتظرج واخذج

هي سكتت ما جاوبت جريت نفس واحس تنفسي مو طبيعي كأنما جاي اركض حاچيتها //مروه ردي عليه لا تسكتين
هي عبالك تبچي = مو وكته جهاد وسكر الخط لان المكالمه راح تسحب كل رصيدك
حاچيتها بنتر // ما عليچ برصيدي جاوبيني بردي گلبي
= جهاد طريقنا مسدود

وسدت التلفون رجعت اتصلت بيها هي ماردت دزيت الها مسج
- - مروه انتظرج لو شيصير وراح اجي وراج قبلتي او لا والطريق المسدود راح ينفتح

من شفت المسج وصل رجعت دزيت الها مسج ثاني //ضروري تسوين ايمييل احتاج احچي وياچ واذا ما سويتي
ثقي راح اقر بكل شي سويته الچ  وخلي شيصير يصير
ردت عليه =جاي اتهددني جهاد
- - يومين وتدزيلي الايميل مالتج افتهمتي

يمكن الي سويته غلط لكن لحد يلومني الكل احسن مني حتى مروه اقلها چان عدها ام تحبها واخوان يموتون عليها
وعمه تفداها بعمرها وحتى عدها اب لكن انا انا كل شي ما عندي بقيت عايش على سراب وحلم وآن الاوان ان
اصحى واشوف نفسي ويه انسانه احبها
حسيت گلبي راح يطلع من صدري جريت نفس لكن حسيت اختنكت النفس ما اكدر ارجعه عرفت راح اموت
اتصلت على امين هو جاوبني //الو جهاد
بتعب رديت //امين تعالي تع...

ما گدرت اكمل كلامي فتحت عيوني بالمستشفى والدكتور يباوعلي ويگول //الحمد لله على سلامتك
رفعت راسي شفت امين وصادق وعلي واگفيين يمي والاجهزه بجسمي انا ما گدرت اباوع بوجههم غمضت
عيوني ونزلت دمعه امين مسحها وباسني وگلي // هاي شنو منك جهاد افه عليك تبچي
صادق // جهاد عود صدگ هذا انت الذيب هيج يهزمك شويه ضغط مرتفع

اتمنيت اصرخ واگللهم انا ما استاهل خوتكم انا خنتكم صادق گلي//  ياالله بعد ما نخليك لازم نزوجك اقلها المره تدير
بالها مو كلساع قالقنه ضغطي مرتفع گلبي يوجعني (باوع الامين وهو يغمزله ) ها اموني مو نزوجه ونخلص منه
علي رد // حتى لو تزوجونه ما تعوفونه اصلا هاي خطيه الي تاخذه لان انتو شنو يصير راسا خابرتو تعال
جهاد حلنه هاي تعال ما ادري شبي امين تعبان تعال شوف صادق طاردته المره

باوعت العلي وهزيت راسي وحچيت بتعب // مو صحيح علاوي هسه منو عليه لان اجو وياي بعد
ما اخابرهم اخابرك بس الك
علي // تدلل جهاد
صادق // هاا علووش هالايام صاير موتحچي  ههههه
امين // شبيك صادق بس تحشش (باوعلي ) جهاد تبقى لو تطلع
- - لا اطلع

امين //خاف بعدك تعبان
- - لا صرت زين
صادق // مو اگلك يدلل علينه وادلل علينه ادلل علينه يابعد روحي وكل هلي ادلل علينه

وطلعت وانا ابدي ارمي نفسي طلقه طلعت والدكتور وصاني ادير بالي على نفسي واجه امين وياي
وكال لازم ياخذني الاخصائي وانا اگله
شويه تعب بس هو اصر عليه وفعلا العصر اخذني وراح علي ويانه وصادق بقى بالمحل وشافني الطبيب الي طلب
مني سونار وايكو واشعه وتحاليل بعدها گلي عندي فقر دم وزيادة بدگات القلب نتيجة نقص الحديد ولازم اقلل من
التدخين ولو اگطعه احسن وشاف ضغطي گال انفعالي عندك لكن اذا تستمر وياك الاعراض معناها يصير دائمي

ورجعنا انا وامين وعلي بعد ان تعشينه بره وگعدنا ع الشط
امين بهاي الاثناء باوعلي وسالني // شبيك جهاد شنو صاير وياك وما تريدني اعرفه
هزيت راسي //ما صاير شي مثل ما گالك الطبيب ارهاق وتعب
- - على كيفك ويه نفسك مو انت دووم تكول كل كل شي اله حل
غمضت عيوني وصرت اجر نفس واحچي ويه نفسي// بس الي انا بي ما اله حل

امين سالني //جهاد وين صافن
- - ماكو شي امين تعبان
علي // مو بس التعب لازم تفكر جهاد الوحده مو زينه
باوعتله // شقصدك علاوي
- - مبين ما يراد الها اثنيين يحچوون بيها يعني عايش ابحدك الى متى
اتحسرت //ثقلت عليكم

امين رد بعصبيه //انت شتحچي شنو ثقلت علينه علاوي مو هذا قصده
علي //جهاد انا من عرفتك بعدني طفل وهسه انا شاب خلي اگلك الحياة لازم تنعاش بكل تفاصيلها خيرها وشرها
وانت لازم تشوف حياتك يجوز اليوم احنه يمك لكن مشاغل الحياة تجبر الواحد يلتهي بغير اشياء وغير احداث
امين //هههه وين صادق عنك چان گالك صاير موتحچي

علي //مو هي هاي الحقيقه عمي جهاد لازم تنتبه النفسك وتغير من هذا الروتين الي انت عايشه
ابتسمت وگتله // صدك علووش صاير موتحچي
امين // بعدين شنو هاي ثقلت علينه تره الي ينكر ابن حرام انا دووم احچيها والى ان اموت الخير
الي عندي انت سببه

جريت نفس // لا تعبك امين
- - بس انت الي اخذت بايدي وعلمتني وراس المال كله منك
- - لان انتو اهلي وعزوتي
اتقرب عليه وحضني //وانت اخونه الچبير وما نفرط بيك العمر كله

بلحظتها ردت ابچي واحس الندم راح يموتني رجعنا للبيت وهناك امين اصر لو اروح ويا للبيت لو يبقى هو يمي انا
ما قبلت هو باوع العلي وكله // ابقى بات يم جهاد (وباوعلي ) وانت مو تطلع للمحل
علي //صار بويه تدلل
ابتسم امين وگله // ما يدلل عليك ظالم
علي // بس هالمره انوب شوفولكم صرفه بجهاد انت ملتهي ويه مرتك وصادق ويه خطيبته وانا هم سنة التجي
اكيد بكلوريا وبعدها جامعه واكيد راح احب واخطب وانت عمي جهاد خو ما تبقى هيچ

باوعت الامين وگتله //  اگلك امين مو احترمنا اكثر من اللزوم اشو مان عليه
امين //هههه كلش وهو عباله فد شي اكلك جهاد ايدك الك
علي // تموون جهاد هو لو ما انت احنه شنعرف نسوي
امين//  اي بهاي ما چذبت  جهاد كل شي سوالنه بس النفسه كل شي ماكو

باوعلي وبعيونه عتب وانا دنكت راح امين واشوف الحزن بوجهه لكن يداري منا ابو ومنا اخته ويمكن
انا هم عبئ صرت شيريد يتحمل

دخلنه انا وعلي للبيت ورحت للغرفه گعدت ع الچربايه وعلي انطاني العلاج وجابلي تراك معلك
بالزاويه وگلي
- - جهاد انطيني بطانيه ومخده انا راح اروح للصاله انام
هزيت راسي // لا وين تروح لو اهنا تنام لو بالغرفه الزغيره
- - لا بالصاله لان انا اگعد ع التلفزيون
- - بعدك ع الافلام الاجنبيه ؟
ضحك //اي ما انام اذا ما اشوف فيلمين

- - افتح ذاك الباب (اشرت ع الكنتور ) وطلعلك فراش ويمك الثلاجه بيها كل شي
- - اهم شي الحب
- - اي حب ونساتل وببسي
ضحك وگال //هذا هو ابقى يمك اسبوع
- - هلا بيك
- - تسلم اذا تحتاج شي رمش عليه
- - مشكور ما تقصر
- - بالخدمه

راح علي نام وانا بقيت متمدد على الچربايه وروحي فارغه اتمنى ابچي لكن ما اگدر بقيت گاعد واتصفح بالفيس
الساعه قريب ع الثنتين اجاني مسج عرفته من مروه شفته ايميل نسخته ودخلت ع الصفحه وكتبت الها
- - انا جهاد
ردت عليه = هلا جهاد اشلونك
- - الحمد لله انتي شلونج
= ماشي حالي هذا الحساب مالتي انا سويته مثل ما طلبت مني
- - لا تزعلين عليه الي بيني مكفيني
=شبيك جهاد ؟

كتبته وانا احس نار تطلع من عيوني //راح اتخبل تعرفين شنو راح اتخبل اريد اجي بس ما اعرف شلون
= لا تجي جهاد گتلك طريقنا مسدود
- - هاي مال طريقنا مسدود سالفه تفيدج لاتگوليها ابد ومااريد اسمعها
= انت ليش هيچ وياي
- -شبيه ؟
=مو چنك تهدد

- - واذا هددت شنو راح يصيرلج اذا هددت  تره اضر نفسي وخلي اگلج اي انا جاي اهدد
=شلون يعني ؟
- - يعني تعرفين كلش زين
= لاتكمل استغفر ربك انا هسه حامل
- - گتلج راح انتظرج وما اتركج اله وانا ميت

بقت ساكته ما كتبت شي انا كتبت الها // سولفيلي عن حياتج هناك
= الي ايسمعك يكول صار سنين كلها شهرين وشكم يووم
اي سولفيلي عن هاي الشهرين  شلون عشتيهن شنو شفتي

هي صارت تكتب = الي شفته شي مختلف عن ما عشته صحيح بلاد قانون وحريه لكن الغربه
اووف الغربه تلعب دورها
وياما ناس رجعت وهي كل شي ما حصلت من هجرتها وياما ناس انجرفت ويه انجراف المجتمع
- - شلون يعني ؟

= هناك لازم الانسان يكون ذكي ويحسب كل شي خصوصا اذا كانت مره وياها طفل
- - بعد انتي اصريتي عفتي كل شي وراج
=صحيح وابد ما انسى فضلك للموت
- - كملي مروه
= كان امتحان صعب وانت تشوف مجتمع جديد وبكل خطوه تلمس اكو تغيير وهذا الي حصل مع
براق وتاره تتذكرهم
- - اي شبيهم
= ذوله بمجرد وصولهم نسو الكثير من عاداتنه واخلاقياتنا يعني بين قوسين انجرفو بالمجتمع الغربي
ويمكن همه بالاساس عدهم اغلاط والا ليش اهل براق عارضو زواجه منها لذلك انا ابتعدت عنهم لان
انا عندي هدف بحياتي انو اكمل دراستي واشتغل واعتمد على نفسي واهم من كل هذا الشي اني اربي ابني
جاوبتها وانا بي وما يزيد حبي واعجابي بيها //عفيه عليج بعدين شنو صار

= كتلك ابتعدت عنهم
- - فهميني حاولو يجرفوج وياهم
بقت ساكته رجعت سالتها //. ليش ساكته احجي
= اي بالحظه الي وصلو بيها شفتهم مو همه لذلك ابتعدت عنهم
—— شسويتي

= حصلت على سكن بمساعدة الحكومه وهناك موجوده عوائل عرب ومن ضمنهم عراقيين انا كنت حذره
ويوميه شريط حياتي گدام عيني لكن بنفس الوقت محتاجه اتعرف على ناس لان الغربه صعبه كانو جواريني
عائله عراقيه اتعرفت عليهم وهاي العائله متكونه من ام واب وبناتهم اثنين توأم هبه وهدى عمرهن ثمان سنين وعدهم
ولد اسمه عبد الله عمره خمس سنوات ورغم انو اطفالهم انولدو بهاي الدوله الا انهم كانو معلمينهم اصول الدين
والمحافظه على الصلاة وكانو جدا مثقفين

=وانا بطبيعتي احاول ان اكون شفافه في تعاملي ودووم اخلي حدود العلاقتي مع الناس رغم ام هدى كانت انسانه طيبه
الى ابعد الحدود اما زوجها فكان يمتلك اخلاق قله يمتلكوها

= هاي العائله ساعدوني هواي وكنت دائما الجأ الهم من اريد اسأل عن شي وساعدوني بان شافولي معهد لغات
قريب من سكني وانا بطبيعتي  بسرعه احفظ اي شي اسمعه ودووم عندي دفتر اكتب اسماء المناطق حتى ما اتيه
من العنوان واقترحت ام هدى ان اخلي محمد بحضانه وايدها زوجها حتى يتسنى الي ان الگى شغل هاي الايام
احس بدوخه واني اريد استرجع وبيوم كنت رايحه للمعهد وبالطريق دخت وسعفوني وهناك تحاليل وصوره
للسونار وطلعت حامل وقررت اخبر يوسف

- - وخبرتي ؟
= اي خبرته دزيتله التقرير وصورة السونار
- - وشنو چان رد فعله
= نفس الشي حاول ان اياثر عليه ريرجعني لكن انا ما وافقت
- - وهسه
= هسه اكو اجراءات لازم اسويها
- - من عرفتي بنفسج حامل بشنو حسيتي
=من طلعت حامل حسيت بالغربه وبچييت حييل واتمنيت ارجع للعراق لكن اعرف بيوسف يسوي المستحييل
بس حتى يرجعني لذلك قررت ان اتعايش ويه حياتي وظرفي
- - زين الطفل الي راح ينولد شلون
= اعرف الي راح ينولد راح يسهلي هواي امور لان راسا راح ايحصل ع الجنسيه وهذا الشي بصالحي

- - شلون ؟
= ابو هدى گال الدوله الي انتي بيها راح ايساعدوج بهواي امور
جريت نفس وسالتها // مروه وانا
هي ما جاوبتني عدت عليها السؤال //ليش ما تجاوبيني
كتبت الي =جهاد شجاوبك
- - اي شي گليلي انا شنو بالنسبه الچ

= جهاد لازم تعرف انا العده مالتي تنتهي بيوم ولادة الطفل  وبعدها
- - بعدها شنو مروه
= جهاد انت انسان قليل امثالك المشكله بيه انا
- - ليش انتي شبيچ ؟
= انا ياجهاد اول مره ابالي اربي ابني لكن انا هسه عندي ولد وحامل يعني تعرف المسؤوليه

- - انا وياچ راح اشيل عنچ هاي المسؤوليه
= ما اگدر جهاد
- - لا مروه مو عبالج انا ما اعرف بيش تفكرين مروه هي كلمه وما اتنازل عنها انا لحد اخر نفس ابقى ااحبچ
ما ردت عليه كتبت الها //ها مروه ليش صافنه
= جهاد شتريدني اكلك
- - اريدج تنطيني امل
=امل بشنو

- - انو انتي الي
= معقوله انت جهاد الي وثقت بيك هيج يطلع منك
اهنا يمكن لو يمي چان كفرت بيها كتبت الها //ولچ شمسوي انا اريد اموت ما انام الليل منا انتي وفراگج
والتفكير الي يجيبني ويوديني ومنا اخوتچ الي البارحه اتخبلو عليه وشالوني للمستشفى وما عافوني
مروه انا يوميه ابدي اكتل نفسي وانتي تلوميين عليه
كتبتلي = جهاد شبيك مريض
رديت عليها بنفس العصبيه //ما عليچ طبني طووب

= جهاد افهم والاخر مره راح اگولها احنه مو البعض مستحييل انا الي عفت اخواني واخواتي بعد ما اجتني الفرصه
ان ابقى يمهم واعيش معززه مكرمه ومحد ايگلي على عينج حاجب لكن كل هذا وعفتهم  الخاطر ابني لا تفكر بيوم
من الايام اسمح النفسي ارتبط باانسان ممكن ان  اياذي ابني لو بنسمه وكائنا من يكون
- - بس انا يامروه تعرفيني ما ااذي ابنج لان هو قطعه منج
= ولو كان ما اگدرما صار عندي ثقه باي احد انا اريد اكرس حياتي الابني والي ابطني ارجوك جهاد انساني
وعيش حياتك

- - هسه ما صار الج ثقه باحد حتى انا الي خابرتيني والي بوكتها چنت اكدر كل شي اسوي ابسط شي
اسولف الاخوتج واجاريج واخليهم ياخذوج ويطلكوج وانا اجي اخطبج واتزوجج لكن انا ما قبلت
استغلج تدرين لو مسوي الي براسي هسه انا عايش مرتاح اقلها اشوفج كدامي لكن ما هان عليه اقهرج
هسه جايه تگليلي ما الج ثقه بيه شكرا ما قصرتي

حضرتها وانا گوه اجر النفس واعاتب بنفسي واحچي
- - كافي ولك جهاد كافي انسى شي اسمه مروه
- - ما انساها ما اگدر
- - تگدر جهاد
- - ما اگدر
- - طبك الف طوب ابقى على ما تنفضح وتاليها اخوانها يكتلونك
رفعت راسي واديه وانا اگول //ربي ساعدني حبها مرض ومرض خطير  ما يقبل يفارگ روحي
صرت ادعي الله ودموعي امتزجن ويه كلامي بعدها طلعت موبايلي واتصلت

/////////////////////////////////////
مروه
كل الي شفته من يوسف وعذابه  والامور الي واجهتني اثناء هجرتي والتعب والغربه كوم
والي سمعته وانا بتركيا والي جاي اسمعه من جهاد كوم ثاني

من چنه بتركيا دائما يردد عليه ابقي اهنا لا تهاجرين شنو تردين انا اساعدج
وحتى چنت اشوفه شلون يراقبني واشوف الحزن بعيونه لمن راح واتفق ويه المهربين جهاد ما انكر الي سوا
على مودي وشلون عرض نفسه للخطر لو الصرف الي صرفه عليه والفلوس الي انطاهن الي شگد ساعدني بالغربه

لذلك انا ابقى طوول عمري مدينه اله لكن المفاجأه من اعترفلي قبل ما اهاجر بان كل الي سوا على مودي
وانو هو يحبني بصراحه من سمعت كلامه انصدمت وعرفت هو غايته شريفه وياي والدليل لمن ركبت القارب
للهجره هو اعترفلي بحبه وانو هو يحبني من انا زغيره واتمنى ينساني لكن ما گدر

من سمعت كلامه انذهلت ما اعرف شنو ارد علي بقيت صافنه فتره وانا اشوف شلون منتظر ردي
جريت نفس وجاوبته انو هذا الشي اجه متاخر وبتوقييت خطأ
وركبت القارب وانا حزينه ومقهوره ودموعي سقطن لا اراديا وانا احچي ويه نفسي واكول
= شوف القدر لو ما الي سوا جمال يمكن انا هسه حياتي غيير
وحضنت ابني وانا اشوف جهاد يركض واسمعه يگلي //انتظريني راح اجي

وصلت بعد ان ايست ان اوصل مرت عليه هواي امور
تعب
خوف
غربه
حتى جوع

لكن بعدها استقريت وبديت احاول اتاقلم واعيش واتذكرت جهاد. وصار لازم اخابره واطمنه عني لان هو صاحب
الفضل الاول والاخير بالي انا بي ولحد هاي اللحظه جاي اصرف بفلوسه
وفعلا خابرته وطمنته ورغم كلام العتب الي سمعته منه لكن حسيت بفرحته وهو يسمع صوتي
وصرت اغيب ايام وبعدين اكلمه ودووم يسمعني نفس الجمله انا ما راح اتركج انتظريني

صحيح جهاد صاحب موقف وياي واعرف بي ما يخاف ولا يهاب لكن مسالة انو يعوف كل شي ويلحگني هاي
ما وارده
لكن باخر محادثه ولمن ما عرف بيه حامل حسيت بي اتفاجأ وارتبك لكن بعدين اتقبل كل شي مني وانا قطعت
اي امل بيناتنا وحچيت كلام جرحه وهو انصدم من ردي لذلك حضرني وحتى رقمي حضره

ومن عرفت بنفسي حامل صار لازم اراجع قنصلية بلادي واظهر الهم خط طلاقي وحتى يكونون على علم بحملي
وكيفية تسجيل الطفل باسم ابو وفهموني بان الطفل مجرد ما ينولد راح ايحصل على الجنسيه وبالتالي راح انا هم
احصل على الجنسيه يبقى بس محمد وره خمس سنوات يتجنس 

صار لازم ادور على شغل رغم المساعدات الي نحصل عليها لكن لازم ادور على شغل حتى احاول
اجمع شكم فلس للطفل الي راح يجي
بيت ابو عبدالله دائما يسألون عني وانا خليت يمهم خبر بلكي يساعدوني الگى شغل

بالليل ما احب اطلع رغم اكثر من مره ام عبدالله وبناتها يعزموني نطلع لكن انا اتعذر بالتعب او محمد يريد ينام
ومن ابقى ابحدي افكر بجهاد وكلامه وبيوسف واستعطافه وباامين وزعله عليه
اما سماح فمره وحده حچيت وياها وشفت كلامها وياي بزعل وبرود

صرت اشوف الكل انانيين وانا منهم لان نفكر بس بنفسنا واحد بس الي ما فكر بنفسه الي هو جهاد
والي صار اكثر من تلث تشهر ما اعرف عنه شي من اخر محادثه ابيناتنا وهو حضرني من جميع البرامج لان انا
جرحته وعرفت هو نساني واكيد بدا حياته بعيد عني
ما چان عندي الجرأه اسأل امين عنه لان اعرف بسؤالي يجوز افتح علي ابواب مسدوده

اما يوسف فدائما يخابرني وانا ما ارد علي لذلك هو يدزلي مسجات يسالني عن محمد والي ابطني ومره خبرني
بان ضحى حامل ومره ثانيه خبرني بان هو ما غفر الها الي سوته لذلك قرر يعاقبها وعقابه الها بان رجعها لكن
هجرها وما صار يمر بيها ولا بامه وحتى يكمل عقابه اتزوج بنيه زميلته بالشغل

چنت اقرا بدون ما اعقب على كلامه الي نها وگال
—- صدگيني يامروه لو بس تگولين تعال وخلي نرجع صدگي اتخلى عن كل شي بس في سبيل اوصلچ
لكن ما باليد حيله ديري بالج على نفسج وعلى اطفالج وانا باريج الذمه

عرفت من خلال السونار جنس الطفل (بنيه ) بيومها فرحت وبنفس الوقت خفت وبچيت اتهياتلي هواي امور
انا اليوم بنهاية الشهر الثامن وجهاد صار اكثر من ست اشهر ما سامعه عنه اي شي چانت الساعه بالسبعه بالليل
لمن ما استدعوني  بالسفاره ورحت وانا بين الخوف والتساؤل لكن
الي شفته وسمعته خلاني اتفاجأ وانذهل بنفس الوقت

///////////////////////////////////يتبع