رواية بعد فوات الأوان الفصل الحادي عشر 11 - بقلم آنين الليل

مروه
اللحظه الي اخذني بيها يوسف كرهت نفسي بيها خصوصا وهو حتى ما سمعني صوته
ولا حچه وياي لو كلمه
اخذني وانا اعرف جاي ياخذ ثار جمال مني بيني وبين نفسي گلت
= مي خالف اصبر اول وتالي يعرفني واكيد راح اكسبه

لكن من شفته طلع بدون حتى ما يباوع الوجهي وعافني وراح ما اعرف وين واجتني امي وعمتي وهنه
متعجبات من الي صار لكن بعدين صارن يحچن وهنه يوصن بيه ويگللي
: بيضي وجهنا دووم مثل ما هسه بيضتي وجهنا
انا لا اراديا طاحت دموعي عمتي حضنتني وكالت //لا ياروحي لا تبچيين انتي سباعيه
امي //الناس حقها الصار بيها مو شويه من وره ذاك النذل اريدج تتحملين مثل ما انا حملت طالب
امل //انتي سهام حملتي طالب وانتي تكدرين تعوفينه ومحد يمنعج بس مروه لازم تحمل كل شي الخاطر
اخوانها  امين وصادق

گمت سبحت لان بالغرفه اكو حمام وانا كل جسمي يوجعني لكن ما حچيت لان مصدومه من الصار وغصبن ما عليه
لازم ابين قوتي گدام امي حتى من تروح تروح مطمنه طلعت وانا لابسه دشداشه لونها اصفر وگعدنا ساكتات
وبقينا هالشكل وحسينا بالبيت صار هدوء وماكو حركه انتظرنا ما جابولنه عشا
امي گامت طلعت علاگه مسويتها سماح بيها گليجه واكلنه وهي تگول
:ما ودوا عشا يگلونه انتم ما مرغوب بيكم
امل //ايي توچ تگولين حقها العالم تره ولو احنا ابمكانهم سوينه اكثر السوا  اجميل مو شويه
من كون الله لا يرحمه

اشوف امي وعمتي يمثلن القوه كدامي وانا هم امثل القوه گدامهن ونمنا كلنه بالغرفه والصبح ما جابولنه ريوك
واجت بنيه بگد زينب اختي  وهي تكول بدون ما تسلم //ياالله حتى يوصلوجن للگراج
وگامن  وهنه يبوسن بيه وامي طلعت فلوس وكالت
هذني امين خلاهن الچ ضميهن ايفيدنج
وراحن وهنه يوصن بيه ويبوسني ويشمني لان يعرفن بعد ما راح نتشاوف ورجعن عليه وعمتي گالت
: احفظي رقم امج واخوج ورقمي  ويوميه رددي لا تنسينه كل شي يصير بالدنيا (وباوعت الامي )
اخذيلنه كليجات ناكلهن بالدرب لا يهبط السكر عدي

رغم الحزن ابتسمنا على كلام عمتي واخذن الموبايل وراحن وانا عيوني ما بطلت دموع 
بقيت گاعده ما اعرف شسوي جابولي ريوك خبز وجاي اكلت ورجعت نفس البنيه گالت
- - - يگول خالي يوسف خلي تخليلها دشداشتين وملابس داخليه وتلبس عباتها بسرعه وتجي

راحت وانا خليت بجنطه زغيره ملابس اليه وطلعت الفلوس وحسبتهن  چانن 250  اخذتهن ولفيتهن بقطعة ملابس
واخذت اوراقي الثبوتيه وطلعت ويا شفت البيت
صنطه وهو بدون ما يباوع راح گدامي وفتح الباب الي بالصدر وركبت وطلعنه هو ساكت وانا ساكته كله اباوع
ليگدام وبعدها نزل بشارع ترابي وصلنه الى ارض تشبه المزرعه بس ما بيها زرع بيها سياج حديد مشبج وبيها
اشجار دخلنه وشفت بيت عباره عن كرفان لكن يوسف مر دك هورن وهو ماشي الي ان وصلنه القطعه زغيره
مسيجه وفتحلي الباب وگلي :: ادخلي بالغرفه

دخلت بغرفه مبنيه بلوك اسود من غير لا لبخ ولا صبغ بس بلوك والگاع تراب بيها بساطين وميز
فوكهوفراش وشفت ترمز ماي وچوله ومواعين اباوع ومذهوله وخايفه لان عرفت يوسف شنو يريد
يسوي بيه يريد يخليني اهنا بهاي الصحراء جاي يعاقبني بشي ما سويته
طلع وانا بقيت كاعده واسمعه اجو ناس وبقى يسولف وياهم انا لازمه الجنطه واباوع ،لمن ما دخل گعد
على البساط وكلي ::هذا بيتج اهنا راح تبقيين وتشتغلين بالحقل هسه تگليلي ما اعرف وانا اگلج تتعلمين
هاي يمج ماي تشربينه والجوله تطبخين عليها وذيج الگونيه بيها مونه

وگف على حيله ::راح اروح ما اريد اي تواصل ويه ذولاك الناس حدج بس المره تفهمج شغلج
وتخلصينه وترجعين الصومعتح افتهمتي زايد ناقص ما ارحمج

طلع وسد الباب ورا
انا بقيت صافنه ما اعرف شتصرف ما اعرف اله شي واحد هذا الرجال كسرني وبعد انتهى وجودي بحياته
الان انا عباره عن فصليه ما الي اي حقوق
= ليش ما خلاني هناك اخدم باهله وبمرته ولا جابني اهنا بهذا المكان الموحش

اتمددت على البساط وصارت عيوني تدمع وانا استرجع ذكرياتي ويه ابوي وسيطرته وكرهه وظلمه وبخله
وتحقيره الامي والنه وجمال وحقارته ونذالته
ودرت على صفحتي وانا اشوف ضحكة امين وشقى  صادق وكلام سماح ولعب زينب الي عبالك بعدهي طفله
ويا علاوي اشوف فرحة امي وضحكتها الي دووم بيها دموع وحزن

حسيت بنفسي اختنگت. وحتى هوى ما اگدر اشتم اندك الباب گعدت على حيلي اندك  مره ثانيه وصوت
مره تگلي //خاله افتحي الباب انا ام بشير
عرفتها نفس المره  الي سولف وياها يوسف رحت عدلت شالي وفتحت الها الباب وهي تباوعلي والخجل مبين
على وجهه بايدها صينيه سلمت عليه //شلونج خاله
انا اخذت منها الصينيه وبابتسامه حزينه وصوت مبحوح  =هلا خاله
:تعاي ابوسنج

باستني ودخلت للغرفه وهي تگول //انا خالتج ام بشير
ابتسمت = هلا بيج
هي جاوبتني //خاله جبتلج غدا اتغدي واتهني
اشوف بوجهه حچي = شكرا خاله ليش كلفتي نفسج
هي گالت //لاعيوني ماكو اي كلفه اتغدي وانا شويه واجيج نسولف

چنت كلش جوعانه وريحة الاكل تشهي شفت خبزات فوك صحن شلت الخبز لگيت نص دجاجه وتمن ومرك
ولبن وخضره
نسيت الي انا بي من الجوع والخوف والتعب گعدت اكلت اول مره اكل بنهم ما اعرف ليش اكل وانا ما افكر بشي
كل همي اشبع كملت حمدت رب العالمين واتذكرت توصيات. امي وعمتي شلت الخبزات وخليتهن بجدريه زغيره
موجوده بالغرفه شلتهن لان خفت بعد ما احصل اكل بهذا المجهول الي انا بي

اندك  الباب ورحت فتحته شفت الحجيه ام بشير هي جايبه قوري وكوابه وشكر سلمت وانا رديت عليها كعدت
وگالت // صبيلنه چاي 
صبيت الچاي وصرنا نشرب واحنه ساكتات لمن من كملت گالت // خاله انتي مني
اتعجبت من كلامها ردت سالتني //اگول خاله انت شتعودين الهذا الزلمه الجابج
باوعتلها وانا فاتحه عيوني رديت عليها = ليش خاله انتو ما تعرفوني هوه ما گللكم انا شعودله
هزت راسها //گلنه خاله بس قضيتكم تخوف

باوعتلها = ليش تخوف
يمه مبين عليج توج ماخذه ومو مال شغل بالحقل
باوعتلها هي هزت راسها //اي خاله رجلج گال تشتغل بالحقل وتعلف العجول
دنگت ما جاوبت ولا استغربت من تصرفاته ام بشير سالتني //شنو قصتج خاله
جاوبتها بدون ما اباوع //فصليه
هي نزت من مكانها //شنو فصليه ،
= اي خاله فصليه

وسولفت الها على جمال والسوا وهي تسمع وساكته گالت
والله ياخاله اليسمع ويشوف يتعجب وهم لا تلومينه الصار بي مو شويه ناس گاعده بامان الله ويجي واحد حشاج
نذل ويسوي اسوايته زين منه ما ذبح اخوتج
= ادري خاله وانا متقبله كل شي
ام بشير //عفيه عليج تره وصدگيني بيوم بيومين بسنه بعشره يرد العقله وتصيرين بس انتي وبس عده
= الله كريم

ام بشير //يمه بنيتي انتي لامال هيج شغل وانا والله محتاره
باوعتلها وگلت  = خاله لاتحتارين الكاتبه ربج يصير
ام بشير //اليوم ارتاحي وباچر الصبح اطلعي وياي وشوفينه شلون نعلف الحلال
= خاله انتو من زمان تشتغلون عده
هزت راسها //لا خاله تونه عرفنا هاي تلث تشهر هو اشترى الحقل من الملاچ واحنه من زمان نشتغل اهنا
ويه ذاك الرجال ومن اشترا يوسف خلانه بي لان الرجال حمدله بينه
= والنعم منكم

باوعتلي ام بشير //وهو هم مالت الله خوش انسان يروح بدربه ويرجع بدربه
= والله ما اعرفه ياخاله ما شايفته ولا گاعده ويا امس تزوجني
ام بشير باستغراب //والله لو اسولفها على مخبل هم ما يصدگني بس شتسوين هذا الي يربيله حيه اول وتالي تلدغه
ياالله يمه انتي غسلي وارتاحي وباچر ان شاالله الصبح امرلج

سالتها = ابقى ابحدي ؟
ام بشير طمنتني //لاتخافين احنه يمج واهنا امان انا چان بقيت  يمج ابات بس خاف ما يقبل
هزيت راسي وام بشير حچت //يمه ابنيتي لازم تتعودين هو ماخذج كره مو محبه مبين من تصرفاته انا هسه
رايحه وانتي ما طول بعده وكت غسلي وارتاحي ونامي ومن تحتاجين شي اطلعي وصيحي عليه

دنگت وانا مهضومه على روحي من طلعت ام بشيرصرت اباوع للغرفه واشوف المواعين الجايبهن طلعت
بره المكان موحش يخوف  شفت باب فتحته شفته صحيات بانيهن بلوك والارضيه اسمنت وشفت بالطارمه
تانكي زغير بي حنفيه هذا تانكي ماي
رجعت للغرفه گعدت وانا اشوف بيها گلوب واحد وشباك فتحته يطل على گاع قفره باوعت شفت الغرفه اي شي
ما بيها يعني سجن خليت ايدي على خدي وما اعرف ليش دموعي ما نزلن هالمره

اتوضيت وصليت وانتظرت گلت اكيد يجي بالليل لكن ما اجه بقيت گاعده بالغرفه ويتراوالي اصوات او حركه
بالبدايه خفت تالي كلت هذا هو وين ما توصل خلي توصل عد طالب وجمال ميته واهنا ميته 

نمت وانا مخليه ابالي هذا يريد ينتقم مني بجريمة جمال وانا اتذكر سماح وهي تگلي
كل كلام امي وعمتي هيج ما تعرفين شنو اخلاق الناس الى ان تعاشريهم ،
ابتسمت وهزيت راسي على كلام سماح  ونمت  گعدت الصبح على صوت ام بشير وهي تستعجلني اطلع لبست
عباتي وطلعت باوعتلي وضحكت وگالت
صباح الخير
=صباح النور

:خاله تردين تشتغلين وانتي لابسه العبايه
باوعتلها وانا اتساءل بعيوني گالتلي // امشي وراي
رحت وراها وگفنا يم شي يشبه الكرفان لكن چبير باوعتلي وگالت عباتج لو تتوزرين بيها يعني تشدينه من الوسط
لو تذبينها وتبقيين بس بالدشداشه
انا جاوبتها =  لا ابقى بالدشداشه ما اعرف اتوزر
: بكيفج وهسه فوتي وياي

دخلت وراها وانا اشوف ابقار وعجول والگاع كلها تبن وهي تگلي هذا مكان العجول واهنا
(اتاشر على حديده طويله وعرضها ما يتجاوز النص متر ) اهنا تخلين العلف
امشي ادليج وين العلف
ورحنا ابكان تسمي مخزن وفتحته وگالت هذا العلف
انا هزيت راسي هي استردفت والماي تنگلينه الهن وتخلينه گدامهن
سألتها =بيش انگله
:بسطل اتريگتي
هزيت راسي=  لا خاله بعدني
:انا راح اجيبلج ريوك روحي هسه

ورحت وانا مذهوله من الي شفته
اجت ام بشير وهي جايبه چاي وزبد وخبز حار انا صبيت الچاي واكلت ويا خبزه سالتني
:شنو ما تاكلين الزبد
هزيت راسي بالنفي = لا خاله ما احبه
: اروح اسويلج بيضه
=لا خاله هذا هو نعمه
:شبيج خاله

انا اهنا ما صبرت بچيت وگلت  =خاله والله ما اعرف للعجول انا فصليه ليش يشغلني ويه العجول
هي ابتسمت وگالت //ما بايدچ شي تسوينه لازم تتحملين
انا هسه اروح اعلفهن واذا سالني اگله علفت وياي وانتي بعد ساعه تعاي اخذي السطل او اورديهن
باوعتلها مستفسره //ها خاله ما تعرفين يعني جيبي ماي وخلي العجول يوردن يشربن ماي
هزيت راسي وهي راحت وانا بقيت صافنه واحچي ويه نفسي

=  هو ليش هيج يسوي وياي من يجي لازم احچي ويا
=هو حتى ما فكر يجيبلي شي اكله شنو قابل ابقى على الناس والتنطي اليه
= ياالله اتحملي واكيد راح يجي ما يخليج اهنا بدون ما يمر

رحت للحقل واخذت السطل بالبدايه گلت هذا الشي بسيط بس بثالث سطل تعبت لان هاي الابقار
تشرب ماي هواي
وانا لازم كلها اشربها والريحه  تكتل  اتذكر ابوي من چان يبيع ويشتري يجيب ويا خروف نعجه
يربطه بالترك الوره
وثاني يوم او ثالث يوم ياخذه يبيعه وامي هي توكله وتنظف مكانه

كملت ورحت امشي شافتني ام بشير باوعتلها وانا فحطانه گتلها=  كملت شربتهم ماي
ضحكت وكالت / منو همه
= العجول غير يعني خاله شكو بيها لو صونده ونمدها وكلمن يمه سطل يشرب منه
اتحسرت ولزمتني من ايدي وكالت//  خاله رجلج يريدج تسرحين بالهوايش

باوعتلها وانا فاتحه عيوني ع الاخير هي هزت راسها وگالت //ايي خاله تاخذينهن الصبح وتردينهن العصر
= وين اخذهن مو شربتهن ماي
ام بشير اتحسرت //خاله افتهمي الهوايش النثايه هذني ابحد معزولات يطلعن يوميه من فجر الله وما يردن اله
بسلام الشمس
=وين ايطلعن ؟

: بالگاع غاد (واشرت وره الحقل ) رجلج اشترى گاع بيها عشب وزرعنا بيها جت تاخذين الهوايش يرتعن
وانتي تحشين للعجول جت
حصرتني البچيه=  بس انا ...
هي قاطعتني// ادري بيج ما تعرفين بس تتعلمين يابتي انتي طحتي ابير غميج وبس الله يگدر يطلعج منه

اجت وياي ام بشير وهي تگلي من تردين المغرب تسبحيين وتسويلج لگمه والصبح تاخذيلج خبزه والقاسمه الله
وتطلعين وتاخذين عصا ومنجل
جاوبتها وانا اشهك من البچي = ما اعرف خاله والله ما اعرف
: ادري بيج يابتي بس شسوي هذا رجلج ما بيدنا عليج شي

= انا من يجي احچي ويا
هزت راسها //اي يمه احچي وبلكت الله ويلين گلبه انا راح اجيبلج خبزات والقاسمه الله
= لا خاله هاي لگيت بعلاكه طماطه وبصل وهذا بطل زيت واگلي
: تعرفين بالچوله
= لا ما اعرف امي ما جابتها للبيت تگول اخاف عليچن  بس احاول
: طلعيها بره لاتخلينها بالحجره

دخلت للغرفه واخذت طماطه ورحت غسلتها وقطعتها وفتحت الچوله انا عمري ما طابخه على جوله خليتها بسد
الحايط وجبت باديه خليتها من گدام عن الهوى وخليت الطاوه والزيت بعده خليت البصل والطماطه اخلي وابتعد
واجت ام بشير جابتلي خبزات ولبن اتشكرتها وسالتها = خاله يعني يمته اطلع
باوعتلي وجرت حسره وكالت  //گبل طلعة الشمس انا امرن عليج

وبقت ام بشير گاعده يمي يجي ساعه وهي تسالني عن اهلي وشگد عدي اخوات وليش جمال سووا السوا وهم
سالتني على سماح ويمته ياخذوها وبلكي ابوي يگدر يفكها بفلوس
سالتها == خاله ما عندج نقال
هزت راسها //لا والله خاله بس عد بشير ورجلج گال ممنوع تطونها نقال خاف تطلبه منكم

سكتت ما جاوبتها وراحت ام بشير وخلتني ابحدي وانا بمتاهه ما اعرف شنو اسوي ولا شلون اتصرف
ثاني يوم الفجر گعدت صليت هسه تگولون ما تخافين اچذب اذا اگلكم ماخفت بس شسوي شنو الي راح يتغير
هذا الشي الي انا بي يوسف محضره ومسويه مجرد ما اتوفت اخته وكل همه ينتقم مني

وره الصلاة خدرت بالقوري چاي واكلت خبزه باقيه عدي  وراها غسلت ولبست جواريبي وعدلت
شالي واجت
ام بشير لگتني گاعده گالت //ياالله خاله شخذتي  وياج
انا باستغراب = شااخذت ولا شي ؟
جرت نفس //لا خاله اخذيلج خبزه طماطيه دبة ماي
حكيت خشمي = ما عدي دبه

: امشي خاله انا اجيبهن وراج بس خلي اكلج
=شنو خاله
لفي شالچ زين وخلي على وجهج
= شلون يعني
ام بشير //دني على وجهج حيل الشمس عاليه وتلفح وجهج

رحنا للغرف مالت الابقار وطلعتهن ام بشير هدتهن وهي تگلي انا حلبتهن من الفجر واشوف البقرات طلعن
وانتظرنها عبالك يعرفن تريد تاخذهن مشت وراهن وهي تطلع اصوات من حلگها وانا امشي وياها طلعنه من
الحقل ورحنا نمشي چان الهوى بارد ونقي ظليت اخذ شهيق وزفير وهي تباوعلي وتبتسم مشينه تقريبا ربع ساعه
وصلنه الگاع بيها عشب باوعتلي وكالت //اهنا راح ايرتعن وانتي راقبيهن
باوعت الها =يعني خاله ابقى ابحدي
هزت راسها //اي خاله ما عليج شي انا راح اجيبلج دبة ماي واجي حتى اعلمج شلون تحشين

هالمره سكتت لان هاي المره ما بيدها شي هي وابنها يشتغلون عمال عد هذا الظالم فما تگدر اتسوي
اي شي
بقيت گاعده وانا اباوع للابقار ياكلن اتمنيت عندي دفتر رسم وقلم صحيح رسمي مو هلكد بس اقلها
اگضي وكت والمنظر حلو طبيعي ما بي رتوش

وره اكثر من ساعه اجت ام بشير وهي جايبه وياهه دبة ماي زغيره وجايبه منجل وقطعة قماش چبيره
باوعتلها وهي تگلي // هاي الوصله من نحش نخلي الجت ابوسطها ونشدها ونشيلها
=بس انا ما اعرف
هي لزمت المنجل وصارت تحش وانا اباوع الها وانطتني المنجل وگلتلي //هاج جربي خلي اشوفج
وصرت احش وهي تگلي// ديري بالج لا تاخذين ايدج

بالبدايه گدرت احش لكن وره عشر دقايق حسيت بظهري يوجعني صرت اخذ استراحه  اگعد بالگاع وارجع احش
بدت الشمس تنزل وماكو في اگعد بسده احتاريت شفت شجره شويه بعيده رحت گعدت جواها واهنا لان محد يمي
صرت ابچي وابچي بصوت عالي

بوكتها طلعت ،كل القهر والضيم الي عشت بي من ابوي ومن جمال وسنين القحط الي عيشنا بيها ابوي والي سووا
بينه بس حتى يرضي رباب وهي عدله وهي ميته وهسه اجيت فصليه الواحد لاعده لا ذمه ولا ضمير عرفت نفسي
انو انا من يوم الي اتحارش بيه جمال وصديته حكمت على نفسي بالموت

مسحت دموعي وگلت = بس لازم افهم هذا الي گدام الله والناس هو زوجي لازم افهمه انا ماالي دخل بكل هذا
الي يصير وبالاساس ما الي دخل بجمال وافعاله وانو انا اجيت فصليه بس حتى احمي اخوتي

رجعت احش شويه وهم رجعت للفي اگعد وطلعت خبزه وطماطيه واكلت وانا اضحك على نفسي وگلت
= والله هذا الي يصير وياي يستحق يمثلونه مسلسل عروس تاكل خبزه وطماطيه ثالث يوم زواجها وتسرح بالبقر
وتطبخ على چوله
العصر اجت يمي ام بشير باوعتلي وعرفت بيه باچيه لملمت حلگها واتحسرت

:ياخاله لو الدموع تسوي شي چان شفتي كل هاي الناس تبچي ما اگلج لا تبچيين بس على كيفج ويه روحج
سكتت ما جاوبتها وهي گلتلي //عفيه خوش حاشه بس بعد لازم تحشين العصر حتى ما يذبل

رجعنا وهي تحرك العصا وشايله الحشيش مسويته نفس البقچه مال الملابس ومن وصلنه باوعتلي وگالت
:خاله روحي وزعي هذا الجت على العجول
ما اگدر اشيلها فسحيتها ورحت اوزع كل عجل اخلي گدامه وانا اگله = تدري عيشتك احسن من عيشتي اقلها
تاكل وتشرب وانت گاعد ومن يجي وكت ذبحك تروح برجليك

كملت وطلعت الام بشير الي لگيتها تحلب بالابقار باوعتلي وابتسمت وهزت راسها يعني روحي
رحت وانا من التعب ما احس برجليه دخلت للحمام سبحت ولبست دشداشه وغسلت ملابسي تدرون الي يعيش بالريف
لازم يتاقلم ولازم ما يترك شي ورا لان صدك ما عنده وكت

بقيت منتظره احد يجيبلي فد شي اكله لكن محد اجه بقيت متمدده على فراشي وسمعت سياره اجت عرفته يوسف
الي دخل وبيده علاگه باوعلي وانا بس شفته وگفت ما اعرف شسوي هو گلي
::امج ما معلمتج من تشوفين رجلج تتلگينه وتاخذين منه المسواك وتگليله الله يساعدك
اتقربت منه واخذت العلاگه وكتله = الله يساعدك

ما رد عليه واهنا اتذكرت ابوي لمن يجي وامي تتلگا وتگلى الله يساعدك وهو ما يرد عليها
گعد وطلع باكيت ودخن جگاره وهو يگول //خليلي عشا
رحت فتحت العلاليك شفته جايب نص دجاجه وصمون ومقبلات والعلاكه الثانيه جايب بيها باذنجان وبتيته وطماطه
شلتهن خليتهن بمعجنه موجوده ولان شتا ما يخربن

صبيتله العشا وخليته گباله وبقيت واكفه هو اكل بدون ما يصيحلي انا طلعت وخدرت چاي وانا ميته جوع من كمل
اجه يغسل گلي ::جيبيلي چاي وتعاي اتعشي
اخذتله چاي وشلت الصينيه وانا مستحيه وين ممكن اكل صرت على صفحه وصرت اكل وانا العبره خانگتني وهو
بس يخلص جگاره يدخن الثانيه ضميت باقي الصمون هو باوعلي وحاچاني

::باجر بشير يجيبلج تنور وتصيرين تعجنين وتخبزين تعرفين مو
هزيت راسي وكتله = اي
::وتنور الطين تگدرين حتى تطبخين بي
انا شهكت هو گلي بنتر ::شبيج
جاوبته =منو بقى يخبز بتنور الطين ،
::هواي ناس ومن ضمنهم انتي

جريت نفس وجاوبته = بس انا ما اعرف اخبز بتنور طين
::تتعلمين مو بيومج اتعلمتي تسرحين بالهوايش وتحشين وتوردين
باوعتله وهالمره خليت عيني بعينه = مو اتعلمت انجبرت
هو اتفاجأ ::عيدي شگلتي
رديت وانا ارجف = انجبرت اسرح واورد واحش
عوجلي رگبته :: منو الجبرج ؟

= انت
::ها وليش جبرتج
رفعت امتوني = ما ادري هذا السؤال جوابه عندك
جر نفس قوي :: وهسه انا راح اجاوبج

لزمني من شعري وصار يضرب بيه بالحايط وانا اصرخ وهو يگلي ::عادي اصرخي مو تردين الجواب
روحي اسالي الچلب المات ليش هيج انسوي وياج لو اسالي ابوج لو اخوانج الي رضوا ينطونه فصليات

صار يضرب بكل مكان بادينه وبرجلينه وبعدين سحني واخذني للفراش ونام وياي بدون رحمه وانا حتى النفس
گوه اتنفسه

بعدها ركب سيارته وراح ومن يومها قررت ابد ما اگول لا وشنو يريد اسوي لان ما عندي اي بديل بس الموت
وهذا الشي مو بيدي بليلتها نمت وانا اشهك وكل شي بجسمي يوجعني نمت وانا صرت اخاف من المستقبل
الصبح گعدت وخدرت چاي واكلت صمونه وچاي واخذت وياي صمونتين وطماطه وترست الدبه ماي ورحت
وانا منهد حيلي من الي صارلي البارحه سلمت على ام بشير الي باوعت الوجهي وما حچت چان بايدها حبل
ما سالتها عنه لان ما يهمني باوعتلي وگالت

:خاله روحي البسي عباتج واتوزري بيها
رديت عليها = ما اعرف خاله
هي گالت// جيبيلي حي الله وصله وانا اعلمج
رحت باوعت ورجعت وانا ارفع متوني يعني ماكو

هي عافتني وراحت وراها بدقايق طلعت وهي جايبتلي وصله مثل الحجاب انطتني ايا
: هاج خاله. شدي على خصرج
= خاله مي خالف اشده على ثوبي بلا العبايه يعني اتحزم بي
:: لا خاله رجلج گال تتوزر بعبايتها (باوعتلي وهي تبتسم ) يريد يسويج ريفيه
حچيت ويه نفسي =لا يريد يذلني

رحت امشي وراها ومن وصلت الابقار وياي هي راحت وانا بقيت گعدت وانا صافنه على هذا الي
فجاي يصير وياي
وصرت احش واخلي بقطعة القماش وبعدين شديته ومن رجعت المغرب لكيت ابنها جايب تنور طين
وعرفت يعني منا وهيج هم لازم اجمع حطب وما اهتميت عادي مو اتعلمت احش اتعلم اجمع حطب

وثاني يوم گعدت الصبح وانتظرت ام بشير الي طلعتلي الابقار وكالت اخذيهن ابحدج وانطتني حبل باوعت بدون
ما اسأل وهي جاوبتني //وره الظهر اجي واعلمج شلون تجمعين حطب
هزيت راسي ورحت واجت وره الظهر وصارت تعلمني شلون(  ازبر ) يعني اجمع الحطب

وهم اتعلمت وصرت اعرف برنامجي اليومي واعرف كل ما انجح باختبار يوسف يطلعلي شغله ثانيه
صدگوني من اگللكم صار متنفسي الوحيد من اطلع بره يم الابقار رغم الضحى تنزل الشمس وتلفح وجهي
وشكم مره انجرحت بالمنجل واتبززت اديه وانا الم حطب والتنور الي ما اعرف اشلون اخبز بي

وصار من يجي يوسف يجيب ويا مسواك ومرات يبات ومرات يرجع بالليل وهو بي وما يزيد بتعذيبي وذلتي
تعرفون ولا يوم سولف عليه اخليله الاكل ياكل ابحده وهو ساكت وياخذ حقه الشرعي مني ويروح
ابد ما سالني ولا فد يوم گعد وسولف وياي چان قبل ما يروح ينطيني اوامر تعجيزيه انا صرت ما اناقشه ولا
اگله ما اعرف التجئ الام بشير الي ساعدتني هواي وابد ما انسى فضلها عليه

صرت من ارجع اذا هو ما موجود اغسل وگوه اگدر الم اصابع ايدي الي صارن عباره عن خشبه چنت ارجع ميته
من الجوع والتعب اروح اغسل واعجن عجينه شويه واخلي زيت بالطاوه واخبزها بالدهن واسوي چاي اكلها
وبعد ما ادري بروحي من التعب انام ما اصحى اله الفجر وانا ما احس بجسمي من كثر التعب

صرت من اطلع للزرع واگعد دووم اصفن وابچي مو عبالكم ابچي على نفسي لا انا اتقبلت وضعي لكن ابچي
على سماح
الي اكيد جاي يفكرون ياخذوها وتتزوج خطيب البنيه الي اكيد ما يقل نذاله وخسه من يوسف والي هسه جاي يفكر
شلون ايعذبها ويذلها مثل ما جاي ايسوي وياي يوسف

/////////////////////////////يتبع

اذا موجوده كلمه ما تعرفون معناها اكتبوها وانا اوضحها الكم 😜😜
كتبت اكثر المصطلحات من لهجة اشخاص القصه
اتمنى عجبكم البارت واستمتعتوا بي
وياريت تصوتون 😌😌
تحياتي 🥰🥰
#آنين الليل #