رواية بعد فوات الأوان الفصل الحادي والعشرون 21 - بقلم آنين الليل

سماح
من رحت المروه وشفت حالها بيني وبين نفسي خفت لكن اتصنعت القوه وبنفس الوقت عرفت
انو هذا مصيرنه
ان نبقى فصليات لو يرجع الثار واهنا محد راح لا يلوم يوسف ولا سالم بالي ممكن يسوونه

لذلك انا لازم اتحمل واحاول احتوي سالم لان شفته يمكن الين من يوسف او يمكن صارلي مجال اعرف اتصرف
اكثر من مروه الي راحت بوقت الجو متوتر واحنه نترقب المجهول الي ممكن باي لحظه نفقد واحد من اخوتنا

انا بغرفة مروه لمن ما سالم گلي
انا جاي حتى نرجع
رحت ع السريع غسلت وبدلت وخليت عطر واجه اخذني انا حاسه اكو شي وصل فتحتله الباب وحضنته
وانا اسمع دگات گلبه حضنته اكثر (اهنا مو حب لا ردت ابينله اشتياقي )
هو مسد على ظهري وگال
- - ياالله خلي نروح تعبان

عدلت شالي ولبست عباتي واخذت جنطة ملابسي وطلعت هو راح فتح الباب الوره ونزل علاگتين باوعتله
جاوبني //كعك وحلويات وشويه فواكه المروه
ابتسمت وخليتهن بالجدريه ورحنه للگاع شافتني وعرفت راح نروح هي اتقربت
سالم //السلام عليكم
=عليكم السلام الحمد لله ع السلامه
الله يسلمج

انا ابتسمت واتقربت يمها حضنتها // مراوي هاي مفاتيح باب الجنه انا قفلت الغرفه والباب البره انتي ديري بالج
على نفسج
=  راح ترحين هاا
هزيت راسي //اي والله سالم جاي من السفر وتعبان
= ديري بالج علي
- وانتي هم ديري بالج واكلي زين بلكي يقبل يجيبني ع السفره الثانيه
=اي ان شالله

سماح //تحبين احچيلج ويه سالم حتى يحاچي يوسف
شفتها يبس ريگها جاوبتني بخوف = لا لا ابد لا يحچي
- ليش
= يمعوده لا اعم عليج شنو ما اعرف طبعه وحتى انتي اسكتي وداري السالم
جريت نفس باوستها وهي هم بس ما صبرت شگد ما بينت نفسها قويه لكن شهگت بالبچي عبالك طفله
شاورتها // لا مروه اسكتي الله عليج وخابري عمتي وامين
= ايي ان شالله
مع السلامه
= الله وياكم

اتعجبت من مقدار الهدوء الي عد مروه والي ابد ما چان عدها قبل ما تتزوج بعدين عرفت هذا خوف مو هدوء
انا ما سجلت رقم مروه بالنقال لان اعرف سالم جاي يجربني ولا هي سجلت رقمي خليت بس رقمه خزنته بالشريحه
وقررت ما اخابر اهلي حتى لو ابقى بالبيت ابحدي لان ما اعرف يجوز يراقبني  هيج صرت افكر
من شفت حالة مروه

بالطريق راكبه بصفه وانا امسح دموعي باوعلي وگال //سالمين ليش البچي
سكتت ما جاوبته رد عليه //مو احچي وياج
جاوبته -ضجت
-من شنو
-من حال مروه انت قابل بهذا الشي
هو ما جاوب بعدين باوعلي وسالني //صدك ليش من سلمت على مروه ابتسمتي
انا رجعت ابتسمت

سالم رفع حاجبه // اشو هم ابتسمتي
- لا ما كو شي بس انت سالم وگلت السلام عليكم وهي ردت عليكم السلام اشلونك سالم
- ايي وشنو الي يضحك
- سالم سلام سالم
هز ايده ما  جاوبني انا فلت وجهي بقيت ساكته واباوع درت وجهي ع الجامه وصرت افكر

- - هذا شبي لازم افاجئه ليش احسه بارد اتجاهي لو هذا السكون الي يسبق العاصفه
وصلنه للبيت نزل فتح الباب ودخل السياره انا گتله //رايحه للحمام احس لعبت نفسي
دخلت وبسرعه اخذت المنشفه ودخلت جوه الدوش هو اجه دك الباب وگلي //بيچ شي
رديت //لا بس لعبت نفسي انا هيج من اركب بالسياره
- ياالله استعجلي اريد اسبح
- ايي  هسه دقايق

طلعت سديت الدوش وخليت المنشف على جسمي هو چان متمدد ع الچربايه من شافني فتح عيونه
اتقربت يمه وانا مستغبيه واحاول اطخ جسمي بي احضرلك ملابس
بلع ريگه وگلي //ايي
باوعتله وانا ابتسم //صار
حاولت اگوم هو لزمني وفتح المنشف وهو يكلي //وين
-مو احضرلك ملابس
- اي هسه تعالي

سحبني يمه وصار يبوسني ويشمني وهو يگلي شنو سابحه بعطر
انا بدلاعه //خليني اكوم احضر ملابسك تره اذا بقيت اهنا راح اغفى
سالم وهو يشم برگبتي //منو يخليج تغفين
- انت
-اي بالاول خلي اخذ رايج بشغله وبعدين اغفي
-وملابسك
ياملاابس
-مو تريد تسبح
- ايي ايي راح اسبح

ونام وياي وانا بادلته المشاعر وانا اگله// اشتاقيتلك
-وانا هم
- بس مو بكدي وهسه راح تشوف شنو اسوي
- شتسوين
- اعتبرك مجاز واعيشك احلى اياام
- اشلون يعني
- اشلون انت تقرر

سالم //تره جاي تتحارشين
هزيت راسي وكتله // ايي
سالم //تعاي خو انتي گلتي ايي
لكن الي حسيته بعد ان ياخذ حقه مني يصير عنده برود اتجاهي هو سبح وطلع راح ينزل العلاليك وگلي
راح اروح اجيب اكل واتسوك
جاوبته // زين  اخذ وياك المفتاح لان يجوز انا بالحمام او فوك ما اسمع الجرس

دخلت للحمام وطلعت جففت شعري ولبست بدي ربع ردن مخصر فوك الركبه ابيض مبين كل مفاتن جسمي
خليت مكياج بسيط وخليت بحلگي علج ونزلت للمطبخ هو ما بي شي جديد بس تراب لان تركته طلعت قطعة قماش
ومسحت الكاونترات ورحت على الصاله هم مسحت القنفات وعلكت التلفزيون رغم البيت والاثاث لكن اكو شي
ما مخليني مرتاحه يمكن ضيم مروه وعيشتها وخوفها من يوسف وحتى انا خوفي من المستقبل

رحت للمطبخ وبديت اشغل نفسي باي شي اريده من يجي يلگاني بالمطبخ حسيت بي اجه دخل عباله بالصاله من
ما شافني دخل للمطبخ انا اتعمدت ادور وجهي هو دارني علي وكلي وهو يخزر بيه // شنو هاي
انا مثلت انو خفت گتله وانا الهث // شنو شصاير
-انتي شلابسه
جريت نفس وكتله //يعني خرعتني وتگلي شلابسه
-جاوبيني
- عادي لابسه بدله قصيره

- وليش لابسه هيج
- شبيك نسيت انا ابيتي (هو خزرني بس انا بقيت احچي ) يعني ابحدي والبس اليعجبني
هز راسه //لا ما تلبسين الي يعجبج
- ها وليش
- ما يصير باالله اندك الباب احد اجه
جاوبته //وانت من كل وعقلك اطلع للطارمه بهذا لبسي وبعدين يندك الباب يتكسر ما افتحه ولا اگول منو
- وليش

- لان ابساطه ياحبيبي المفتاح عندك وشوف انا حتى ما طلعت للطارمه اجيب الماسحه وانظف الارضيه
هو گلي //روحي بدلي وبعد لاتلبسين هالشكل
جاوبته بحنق //صار

رحت صعدت فوگ بتثاقل وهو اعرف بي جاي يباوعلي ردت اشگك البدي وانزل امسح بي الارضيه گدامه بس
خفت يعرف بيه عنوديه ويغير معاملته وياي رحت لبست دشداشه عريضه بعدين طلعت تراك ماروني ولبسته
ونزلت هو گاعد يباوع ع التلفزيون وانا دخلت للمطبخ خليتله الاكل وجبته خليته ع الطبله گدامه ورحت جبتله ماي
هو باوع للاكل وگلي // شنو ما تاكلين
رديت بزعل //ما اشتهي بعدين اكل

رحت فتحت باب الصاله وجبت الماسحه وصرت امسح بالمطبخ سمعته گال//  الحمد لله
انا رحت اخذت الصينيه وصبيتله كوب چاي خليته بصينيه ويا گلاص ماي وجبته خليته گدامه
هو عدل كعدته وانا صرت اخوط بالكوب واباوع اله قدمته وگتله//  اتفضل
هو اخذه وشرب منه رشفه واخذ الباكيت طلع جكاره وانا قربتله القداحه شعلت الجكاره هو يباوعلي وعيونه
تلمع گلي //ليش ما اتغديتي

-ما اشتهي
- ما تشتهين لو لان گتلج غيري ملابسج
- لا انا غلطانه المفروض اسالك شنو البس ويمته اصعد للغرفه ويمته انزل
عرف بيه زعلانه جاوبني //هاا
اتحسرت //اي يجوز اتخطيت حدودي وياك ونسيت نفسي
- نسيتي نفسج

هزيت راسي //ايي نسيت وانو انا لازم ما اتنفس اله بارادتك لان انا قحط فصليه بس انت ناسي شي
هو استعدل وسالني //شنو ؟
- الفصليه بشر دم ولحم ومشاعر يعني تحبني وتبادلني المشاعر
سالم //وانا ما قصرت بشي
رفعت حواجبي //متاكد
سالم //ليش عندج شك

جريت نفس //لا مو هذا قصدي بس لهفتك عليه وبعدها البرود الي يطغي عليك يصير عندي شك
هو سالني باستغراب //برود شنو ؟
- ليش نسيت بيوم السافرت كل ساع اخابرك وانت تجاوبني بعدني ما وصلت لا تخابرين خلي انتبه وهسه قبل شويه
- شبيه
- شبيك تگلي مشتاق وعيونك تلمع وتريد تاكلني بنظراتك  وفجأه وخرت مني عبالك انا ...

خله راسه ع القنفه ومدد رجلينه بالگاع وجر نفس // يعني تردين تقنعيني انت تحبيني
جاوبته //اي احبك شنو احبك اموت عليك
- من يمته
-من اول ما شفتك
باوعلي صفح وگال بنظرات بيها شك //معقوله ؟
هزيت راسي //ايي ليش لا
نفخ //ما اصدك

باوعتله ولملمت حلگي وگلت //شوف اذا عندك شك ميه بالميه ما راح اقنعك لو منو يجي بس لو عندك
شك تسعه وتسعين بالميه راح اقنعك
صار يحرك رجله وباوعلي وهز راسه //.  تمام خلي نكول عندي شك تسعه وتسعين بالميه اقنعيني
باوعتله //زين راح اسالك هاي الناس الي متزوجين كلهم متزوجين عن حب

-لا اكيد
- يعني مو كلهم علاقه وما اعرف شنو
-لا مو كلهم ما اعرف شنو (گالها باستهزاء )
انا غلست سالته //انت قاري القرآن
استعدل وكلي //ليش شايفتني يهودي
- لامجرد سؤال
هز راسه //اي قاري

-قاري الآيه (وجعلنا بينهم مودة ورحمه) يعني القرآن الكريم من قبل الف واربعمية سنه منزل انو بين اي
زوجين تصيرموده ورحمه هذا الله الي يگول فاانا ياحبيبي مثل ما فتحت عيني على امي وابوي وانا مالكتهم
من وانا زغيره فتحت عيني عليك من انا چبيره وانت ملكتني
- يعني تحبيني
هزيت راسي //لا منو گال ؟
باوعلي - مو توچ انتي تگولين

اتقربت منه وگعدت بحظنه وخليت اديه على رگبته وگتله// تؤ انا مو احبك انا اموت عليك
ضحك وباسني بخدي //حياله
-لامو حياله حتى انت تحبني وتموت عليه
ضحك وجاوبني //ههههههه ما سامع واحد حب فصليته
عرفته يريد يستفزني //چنت فصليتك بس مجرد ما صرت باسمك انا زوجتك وادري بيك تحبني واذا ما تحبني
راح اجبرك تحبني

  هو اتحسر وعض شفته وگلي //انا المفروض چنت متزوج ازهار بت عمي لو ما عملة ابن عمج الخسيس
جاوبته ابرود //ماراح اغار ولا راح انقهر لان ابن عمي مو بس خسيس لا خسيس وحقير ونذل وما اتصور
اغار من انسانه ميته الله يرحمها  هي بت عمك وچانت خطيبتك اما انا فامر واقع صرت زوجتك وانت حبيبي
سالني //ما تخافيين اسوي بيج نفس ما مسوي يوسف باختج
جريت نفس وهزيت راسي بلا
- يعني شنو شايفتني ما اگدر اسوي لو اخاف لو شنو

جاوبته //لا والله تگدر كل شي تسوي بس انت (رفعت راسي وجريت نفس ) انت انسان طيب وتخاف الله وانا
ابنيه حبوبه وحليوه واحبك وشتريد اتسوي اقبل بس انت ما تسوي
هو ابتسم //ها يعني ما تخافين
هزيت راسي //لا ما اخاف
-ليش ؟

-لان انت بكل بساطه رجال  عندك غيره او اخلاق تغار على عرضك لذلك لو شنو تسوي بيه انا قابله
اتقربت منه اكثر وگتله// تدري من گلولي راح ترحين فصليه الواحد سايق تريله شنو تخيلتك
ضحك وگلي// شنو
گعدت ااشر بايدي واگول //هيج واحد سمين وكرشه گدامه وجثل وتخوف
ضحك //وليش هيج اتصورتيني

-مو اشوف بالافلام الاجنبيه سواق التريلات بس بعدين ......
- ليش سكتي
- بعدين سالت عمتي وهي وصفتك عاد انا صرت ارسملك صوره بخيالي خصوصا وعمتي حمدت باخلاقك
سالم جاوبني //تره يوسف خوش ولد بس اعذري الي صار شي كلش اذا واذانه وانتقص من رجولتنا

جاوبته //واحنه ما النه اي يد باذيته (اتقربت يمه خليت راسي بصدره وگلت ) سالم انا مرتك وما الي اي احد
بهالدنيا غيرك عفت اهلي يجوز مجبوره مخنوگه ومغصوبه واجيت يمك صرت انت دنيتي
هو مسد على شعري واتحسر عرفت على ازهار انا اهنا بچييت وهالمره صدك هو گلي //ليش البچي
- هسه عرفت شگد احبك

رفع وجهي وباوعلي بخبث وگلي //يجوز نص ونص وتدرين لازم اتاكد
سالته //هاا وشلون
-تعالي اگلج شلون

واخذني للغرفه الجوه وصار حرب الحب وبهيج گدرت احتوي سالم واشوف الشي الي
يضوجه ما احچي بي ولا اناقشه
صرت اعرف شنو يريد وسالته شنو يحب ياكل وشنو الاكله الي ما يحبها وعرفت بي من يصير عصبي
لازم ما اناقشه وهذا الشي شفته من يحچي ويه السواق واهم شي انو ما گتله اريد اتصل باهلي لان ادري هذا
الشي يضوجه وادري بعد مده هو راح يخليني اتصل بيهم

صرت البس الشي الي يعجبه واسوي كل شي مو مذله او خوف بس رضا بالنصيب ويمكن انا احسن من هواي بنات
متزوجات زواج عادي لكن متحاربات من عيالهن ومن ازواجهن
والشي الاكيد انا صرت ارتاح السالم وهو بدا يميلي اكثر يعني مو مجرد واجب زوج اتجاه زوجته لا چنت
اراقبه من البس من امشي وحتى من اشوفه ضايج ابقى للصبح ويا وانا اعرف شنو سبب ضوجته سالم جاي يحارب
عقله وگلبه

عقله الي يگله هذوله الناس السبب بقتل خطيبتك وبت عمك الي يجوز ابنهم هتك شرفها
وگلبه الي يگول هاي البنيه تحبني وجاي تسوي كل شي على مودي ما لازم اعاقبها بذنب ما مسويته
مره چان طالع اجيت يمه وهو يرش من قنينة عطر انا شميت العطر وگتله حلو خليلي
ورفعت ايدي هو صفن عليه وشفته ضاج هزيت راسي باستفهام يعني شكو
رد عليه //ماكو شي
-لا اكو سالم فهمني

جر نفس وحاچاني بعصبيه //لاتلحيين ماكو شي
- هاا عرفت
باوعلي وهو عاكف جواجبه //شعرفتي
جاوبته //هذا العطر چانت تحبه ازهار مو
ما جاوبني
انا گتله //اصلا ولا حلو ولا اريد منه

هو ابتسم ابتسامه باهته وگلي //تعالي اخليلج منه
جاوبته بعدم مبالاة //ما اريد اصلا رجالي وما حلو
-هاا مو چنتي معجبه بي
اتقربت علي وانا الملم بحلگي //لا معجبه بالي خلا

سالم صار دووم يمي ويطلع يجيب مسواك وانا ارتب البيت واسوي اكل ونبقى مرات نسولف
للصبح ومرات انام من وكت وره تقريبا اسبوع او اكثر اجا اتصال بالليل وهو يگله جاي جاي
طلع وسالته سالم شكو ما رد عليه
گلت اكيد صاير شي عبرت اكثر من نص ساعه اتصلت فصله ما رجعت اتصل لان گلت اكيد مشكله بالشغل لو ويه
واحد من العمال وره ربع ساعه اتصل بيه

الو ها سالم شكو
سالم جاوبني //ماكو شي لا يبقى بالج
-الله عليك انا كلش خايفه
-من شنو خايفه
- خايفه عليك شصاير ونزلت بسرعه
- ما صاير شي بس راح ابات بره
اسمع حركه وحچي// انت وين

هو جاوبني بضحك //يم مرتي الثانيه جاي يزفوني ما تسمعين الهوسه
- اي حتى اعدمك
هو جاوبني باستفهام //شنو شكلتي
غلست وسالته //سالم الله عليك شصاير
-ولج تعدمين منو
-شوف هاي خليها على الحساب بعدين نتفاهم بيها بس طمني بداعة اعزاز گلبك
- بت الاوادم اللوگيه
-اذا ما تكلي اخبصك بالاتصال وانت ما تغلق تلفونك ادري بيك تخاف عليه

-يوسف سوا حادث وهو بالمستشفى
نشغت //الله عليك شبي يوسف
—ما بي شي لا تخافيين اختج ما راح تترمل
- اسم الله على شبابه بيش طالبه
- ولج سماح منيلج هذا الحچي مال العجايز
-متعلمته من بيبيتي
-ياالله اقفلي البيبان زين
- اخاف بصراحه حيل اخاف راح ابقى گاعده

سالم اتافف //- انتي افتحي التلفزيون واگعدي ومن تنعسين نامي زين
- وانت خلي تلفونك يمك وكل ساعه اتصل عليه
- صار يابه
گتله //وراح
- شنو وراح
جاوبته بدلال //- راح اشتاقلك كوماياات
هو ضحك //لا تگولين هاي من بيبيتج
- لا من نور الويه مهند

ضحك وصار كل ساعه يرن ويطمن الى ان گتله راح انام وقفلت عليه الغرفه ثاني يوم الظهر اجه سالم لگاني بالصاله
وطمني على يوسف وراها بتلث تيام طلبت من سالم نروح نتحمد السلامه اليوسف لكن سالم ما قبل جاوبته
- تستعار مني تاخذني لان فصليه
هو رد بنتر //انچبي شنو هالكلام
هزيت راسي //ايي چا ليش ما تريدني اروح تره الفصليه انسانه مثلكم عدها اثنين رجلين مو تلاثه

هر رد باستهزاء//اي بس انتي عدچ عشر السانات
اتقربت يمه //هذا ابن عمك وزوج اختك وانا ما اريد يشيلون ابالهم عليه لو يكولون متشمته
سالم //خالتي ما تتحملج وانتي تعرفين
هزيت راسي //عادي على مودك كل شي اتحمل مو ضربني ثاني يوم العرس عادي

سالم //مو خاف تغثج
خليت اديني على رگبته والملم بحلكي //بالرجعه جيبلي قوطية ببسي وهي تروح المغثه
اتحمحم وصار نفسه نار وكلي //بس انا هسه اريد اشرب ببسي حتى ما انغث
ورحنا ...بعدها سبحت ولبست كوستم وعبايه اسلاميه سالم گلي البسي عباية راس
هزيت راسي ولبست العبايه ورحنا بالطريق سالم اخذ سيت عصير وجابلي علاگه بيها چكليت (من الغالي ) وعلبه
بيها بسكت وكلي
- خليهن ابيدج

وصلنه وشفنا الوجوه ما مرحبه بينا لكن رغم هذا انا جاملت يوسف وبعدها هو طلب من ضحى اخت سالم تسوي
چاي او تجيب عصير واهنا امه اويلي صارت بركان وراحت الغرفتها وهي ترجف وتسمعني كلام اما ضحى فبقت
واگفه ولا كانه تسمع
عاد بسام راح وجاب عصير انا اخذته وگلت احنه مو خطار هذا بيتنا
بسام //اكيد والله
- يوم عرسك واتعبلك
بسام // تسلمين الله يخليج

اباوع الضحى شلون واگفه وره يوسف تخزرني وعيونها كلها شر وتوعد وانا خليت عيني بعينها وابتسمت بعدين گتله
ياالله حبيبي خلي ابو ......(باوعت اليوسف ) صدك خويه يوسف انت ابو من
بسام //ان شاء الله ابو محمد
ابتسمت ورديت //ان شالله يجي محمد وعلي وحسين
بسام // شنو مدرسه هسه واحد وكافي
شفت ضحى راح تطك باوعت السالم// ياالله خلي ابو محمد يرتاح

يوسف ::لا وين رايحيين بعد وكت
- لا والله اطمنا عليك ان شالله اجر وعافيه
::تسلمين
سالم وگف وسال يوسف //اكلك شخبار السياره
::رحت شفتها جاي يشتغلون بيها
-اي شي تحتاجه خابرني
::ان شالله ما تقصر
سالم //فيمان الله

وكفت وكلت وانا مبتسمه //تصبحون على خير (اتقربت من ضحى ) حبيبتي سلمي على خاله من تگعد من النوم
هي ما حجت وصلنه الباب الصاله ضحى حچت  بنتر // سالم
هو باوع الها هي كالت // عود مر مو اله تتوقعلك الاجازه
خزرها وانا ابتسمت ولزمت ايده وطلعنا والطريق كله وهو بس يحرك جگاير حاولت اخلي يحچي گتله
- انزل جيبلي قوطية ببسي
هو باوعلي وگال //مو گلت ما نروح انتي اصريتي

- وهسه انت مو شربت القوطيه مقدما انا بعدني
سالم //اريد افهم انتي منين جايبه البرود
رديت //مو مسالة برود بس الواحد لازم يجامل
سالم //قصدج الواحد لازم يتشفى
-شلون
سالم //مو شفتج شلون من تكولين يوسف انت ابومن وتبتسمين بشماته على اختي

باوعتله //لا غلطان انت شفت الشي الي تريده بس ما عقبت على كلام خالتك وعلى تصرفات اختك انا انحسب
عليه سؤال بديهي ممكن اي احد يساله
ما رد عليه دخلنه للبيت وهو غادي نار وانا شمرت عباتي ع القنفه ورحت للمغسله شمرت على وجهي ماي
وبعدها رحت للثلاجه طلعت ماي وشربت سمعت صوته
- جيبي ماي

رحت اخذت جكاية ماي وكلاص وخليتها گدامه باوعلي بعتب// انا من احجي كلمه نفذيها گتلج لا ترحين انتي
اصريتي اله ترحين هسه احسن
- وشنو الي صار
سالم // ما شفتي خالتي شلون ردت ايدها ما قبلت تباوسينها لو من كال يوسف يضيفونج شسوت لو اختي الي
بقت واكفه ما قدرتج كل هذا وتگليلي شصار
هزيت راسي //اي ما صار شي مجرد سوء فهم
سالم بعصبيه //- سوء فهم شنو مو چنج مستهزئه بكلامي

هزيت راسي //لا ما مستهزئه ولا ناسيه انا مجرد فصليه ما الي كل حقوق ولازم اعيش بلگمتي هاي متعارف
عليها بس اتظل المروءه
سالم دخن جگاره //شقصدج
-قصدي ياما وياما بنات غلطن وانهتك شرفهن ومن راحن على ناس خيره عدهم مروءه وناموس لگن الي
يستر عليهن حتى لو هنه مو زينات انطوهن فرصه وهاي ما نقصت رجولته بالعكس كبر بعين نفسه وبعين الناس
باوعلي بغضب //قصدچ انا ما عندي مروءه
هزيت راسي //لا مو هذا قصدي

لزمني من چتفي //شنو قصدج فهميني
جاوبته وانا ابلع ريگي وگلبي يدك //هاي شبيك سالم انت ما معتبرني فصليه بس انا جاي احچي على غير ناس
سالم بنفس عصبيته//- مره ثانيه من تحچين اعرفي شلون لا اعلمج
برطمت وگتله //اسفه بعد ما اعيدها

صعدت بدلت ملابسي ولبست دشداشه طويله ونمت اجه بدل ونام ابصفي انا اعرف هو ما نايم وانا ابد ما نمت
للصبح گعدت سويتله ريوك ورحت اتريگت ابحدي
هو نزل شافني انا ما حچيت ويا بس جبتله الصينيه بالصاله هو من شاف بس كوب چاي حتى ما سالني ولا
گلي تعاي اتريگي هو كمل وطلع حتى بدون ما يحاچيني
انا رحت صعدت فووك اخذت ملابسه ونزلت اغسلهن وبعدين طلعت لحم سلگته وسويت باميه وتمن وصار الظهر
اجه جايب ويا خضره وخبز خلاهن ع الكاونتر راح اتوضا شفته فرش سجادة الصلاة وصلى وراها جبتله الغدا بدون
ما اساله صحن تمن وصحن مرك وخبزه وخضره ولبن وزلاطه

بعدها رحت اتوضييت وصعدت فوك صليت نزلت شفته ما موجود اخذت الصينيه ورحت للمطبخ صبيت
بماعون تمن وخليت فوگه مرگه واكلت بسرعه قبل لا يجي وغسلت ورحت اغسل المواعين بالمطبخ
حسيت انكمشت من وره وانحضنت وهو يگول //شسويتي بيه احبج وما اريدج تزعلين عليه
دارني علي وانا اباوعله اريد احچي هو ما خلاني گلي //البارحه كله ما نايم مشتاقلج

/////////////////|////////////////////

يوسف
بعد ما راحوا سالم وزوجته طلعت امي وبس شافت العصير باوعت الضحى الي جاوبتها
- خاله هذا بسام قدمه
غمت بسام وكالت //تقدمولها سم وزهر مر  الكلبه بت الكلب شتسوي جاييه بس العتب مو عليها على الطلي الگايدته
باوعت الضحى ورديت على امي :: وانتن ما قصرتن حتى ما خليتن كرامه لا الي ولا السالم

امي رفعت ايدها على گصتها كانما تباوع الواحد من بعيد //ليش يمه ردتنا نسلم عليها ونگللها كثر الله خير ابن
عمج ما قصر خطف بتنا ودمر سمعتنا
::هنه شعليهن مودايته قابل

ضحى واگفه وتخوصره //وشدعوه انت تدافع كلهن خلك فصليات تره اذا ساكته انا وخالتي ساكتين بمزاجنه
امي //ولج هاي اسميحه ولا مكسوره عينها ما شفتيها شلون داخله عبالك تعرف يوسف من زمان
ضحى //هو مووصوج سالم صوج يوسف المفروض مروه ياخذها سالم وهاي ياخذها بسام
خزرتها وگفت وانا صاير نار ::ولج انتي شو ما تعرفين تحچيين ادب سزز
ضحى بنتر //وشكلت انا شنو سبيت العنب

خزرتها ::لا والله ما گلتي بس كفرتي كافي شنو يمه زعاطيط احنه ناس وشيوخ وساده وعلام كعدو
وانحلت المشكله
امي // هي النار ما حارگتكم حاركتني انت وسالم عرستو واتونستو وفلوس الفصل سويت بي حقل مال عجول
بعد ليش تنقهر لو يحترك دمك
::يمه حقل العجول من باچر ابيعه وانطيج الفلوس
-والفصليه ؟

ما جاوبت باوعت الهن وصعدت للغرفه خليت باكيت الجگاير وصرت ادخن وحده وقبل ما تطفى ادخن الثانيه
رن تلفوني باوعت شفته ماهر هاي شگد صار ما مخابرني جاوبته
::الو
-الو يوسف الحمد لله على سلامتك
::هلا ماهر يعني لو ما مسوي حادث ما تخابرني
ماهر //ليش الچذب لا ما اخابرك
جاوبته بعتب ::مشكور يابه چان ما خابرت
ماهر // يوسف انا بس خالي كلي ما گدرت حتى اصبر للصبح گلت لازم اطمن عليك ان شالله ما بيك شي
::لا الحمد لله بس ايدي انكسرت

ماهر //يوسف خالي دزلي تصوير  السياره شنو صاير بيها انت طلعت بمعجزه الف الحمد لله على سلامتك
::الله يسلمك الله دفع ما هو اعظم
ماهر //ويجوز هاي رساله
::شنو رساله!
ماهر //ايي يوسف رساله لازم تراجع نفسك
::بس انا ما سويت شي يغضب رب العالمين
-متاكد يوسف
::شقصدك

  ماهر / / انا خابرتك اتحمد الك السلامه اما قصدي فهذا احتفظ بي النفسي
::الله يسلمك ما تقصر
-سلم على بسام والوالده
::عليكم السلام
ماهر //ان شالله من اجي البيت خالي امرلك
::هلا بيك البيت بيتك
في مان الله
::الله وياك

وسديته من ماهر وانا اگول ::شقصده ماهر من كلامه  شنو رساله يعني انذار
خابرت بسام //اكلك دزلي  تصوير السياره اول ما انكلبت بيها
- ها وليش
:: هيج اريد اشوفها وبس
بسام //ايي هسه بس لا تنقهر ما دام انت بخير تجيبها وتجيب الاخيك وحده هم
ابتسمت ::انت بس جيب معدل واحلى سياره الك

دز بسام الصوره وانا اشوفها اكبر واحد ما يطلع منها سلامات صرت احچي معقوله هاي رساله مثل ما گال ماهر
::ايي يمكن دعت عليه لان فرفحت جوه ايدي وهي كل شي ما حچت
گعدت على حيلي ورحت للغرفه الي عشت بيها ويه مروه ساعه وحده دخلتها وگعدت ع الچربايه وانا اگول
::الشك والكره والمشاكل كلها اتكومت عليج وفوگها الذل والاهانه وهسه حامل وانتي ساكته معقوله الله جاي ايعاقبني
لان ظلمتج

اباوع للغرفه واكول ::هي ما ودت جمال حتى يخطف ازهار اذا چانت اختي ضحيه الجمال فمروه ضحية الجمال
والاخوها والي
///////////////////////////////////////////////////////////////يتبع