رواية بعد فوات الأوان الفصل الأربعون 40 - بقلم آنين الليل

السلام عليكم
تعذروني جاي امر بظروف خلتني اتاخر بالكتابه والنشر
ارجو ان تتفهمون 😭😭
تحياتي الكم 🥰💙🥰
احبكم يا اغلى قراء واعز صحبه 😘😘
#آنيين الليل #
//////////////////

يوسف
من قريت الي كتبته مروه وعرفت هي تعرف اشياء اكثر من الي تعرفه ضحى احس اختنكت وانا
گاعد بالسياره عيوني غوشن وگلبي صار يوجعني ورجليه نملن صرت اخذ بالنفس لكن رغم اتنفس احس
الهوا انگطع عني صرت
احرك جسمي واضرب صفحة راسي وانا اكول

::يمكن حلم لو تچذب عليه لا مروه مستحييل تسوي هالشكل بعدين منيلها النقال
::شنو منيلها مو بعيده ام بشير اشترته الها
::هسه انا بالنقال لو بمصيبتي مروه انهزمت وهاجرت وانا ما اعرف بس يمته هاجرت وشلون شنو
ركبت بساط الريح

هزيت راسي :: لا يجوز تتشاقى
:: ولك يوسف شنو تتشاقى اتكلك انا بالمانيا
:: هههههه شنو المانيا وره البيت
:: بس انا قريت تهديدها

صرت اتصل بالرقم وكله خارج منطقة التغطيه سقت السياره ورحت وصلت للحقل دخلت للبيت
وفتحت الغرفه وانا اسمع صوت التلفزيون هدات شويه لان اتاكدت هي موجوده لكن من دخلت شفت
الغرفه ظلمه فتحت الكلوب لكيتها فارغه

طلعت ركبت السياره ورحت افتر بالحقل بلكي اشوفها ما شفتها رجعت للغرفه وانا اكول
:: معقوله مثل ما كالت انهزمت
اتصلت التلفون مغلق :: زين اسال منو ومن اسأل شگول
بقيت كاعد بالغرفه وانا ما اعرف شسوي صرت احجي ويه نفسي واكول
:: يابت الكلب ويامن انهزمتي او وطيتي راسي شبسرعه وصلتي

طلعت النقال وكتبت الها
:: شنو تمثيليه تلووين اذراعي بيها انهزمتي ويه واحد عاشگته براسي وتكولين سافرت ما اعرف هاجرت اسمعي
ولج انا بعد ما اريدج واصلا ما عليه بيچ الله اعلم وين رحتي او ويامن يا ......
انا ما عليه انتي واهلچ تتباصرون وخلي الي انهزمتي ويا ايفيدج
:: راح افضحج عد الناس كلها واگول مصاحبه براسي وانهزمت ويا اصلا انا ما عليه عارج على اهلج

شفتها ما وصلت الرساله انتظرت وانا كل شويه اباوع اريد اشوفها وصلت او لا
وهاي ضحى ما بطلت اتصال اضطريت اكتب الها لان ما يعجبني اسمع صوتها
::صار عندي شغل بالداىره وراح اتاخر لا تتصلين

بقيت اروح وارجع وعيني ع النقال اريد بس كون توصلها الرساله اندك الباب عرفته بشير شنو شكله اذا سالني
او اذا اجت امه زين معقوله امه ما تدري شكول احتاريت طلعت للحوش فتحت الباب شفته بشير سويت نفسي تعبان

هو گلي // السلام عليكم
جاوبته وانا اتثاوب :: اهلا ابو بهاء اتفضل
- - مشكور ابو محمد انت محتاج شي
:: لا تسلم شويه اريد انام يمكن فلاونزا
- - اخذك للطبيب
:: لا تسلم اخذت علاج وهسه انام ارتاح شويه

- - شعجب اهنا
:: اي مو الوالده والمره راحن للزياره
- - اذا تحتاج شي بس رمش عليه
:: تسلم اعرف نفسي بس انام ارتاح
- - ياالله ما تشوف شر

سديت الباب ورجعت للغرفه طفيت الكلوب وگعدت بالزاويه وانا اشوف بشير عادي ما مبين
علي يعرف شي صرت اراقب النقال يمكن الوكت الي مر بيه چان اطول وكت مر بحياتي اطول من
عمري كله يمكن ساعتين وانا كل شويه
اباوع الى ان اجاني اشعار صار گلبي يدگ وايدي ترجف قريت كتابتها

= وبعد شنو عندك احجي لان انا اعرفك انت انسان ناقص من جميع النواحي
= شوف خلي اكلك انا اذا عندي صاحب اخذه بمجرد ما اخلص العده لان رح غصبن ما
عليك تطلگني ها ولعلمك اخذه وانا رافعه راسي لان انا صاحبة الزود تدري ليش
راح افضحك وافضح اختك وامك وحتى مرتك
لكن انا كل الي ايهمني هو اربي ابني بعيد عن انسان اقل ما اكول عنه انو هو انسان ناقص

رديت عليها :: اله اعلمج منو الناقص يابت الكلب
= الك حق تعلمني بس بالبدايه علم نفسك شلون تداري فضيحتك باختك
:: اختي اشرف منج
= هههههههه متأكد زين خليهن عندك الصور باعلهن وشوف شرف اختك واعيد واكرراي كلمه
تحچيها عليه راح تدفع ثمنها غالي وغالي كلش انت واحد اقل ما اگول عنه مسوياتك ...
وراح تشوف  اهلي وعشيرتي ما راح ينامون الليل الا يجيبونك وانت ذليل

= ها وخلي اذكرك بشي سالم ابن عمك الي اختك جانت مخطوبه اله وبعد شهر او اقل تتزوج وهي رايحه ويه
عشيقها للشقه اكيد رايحه ويا حتى يعلمها كيف تحافظ على زوجها وكرامتها
= اسمع انا ما يشرفني انو يكون اب ابني واحد مثلك لذلك انت بكيفك انا هسه راح اركب البحر وانت شتريد تكول
كول انا عندي دليل براءتي الي يخليني طول عمري تاج على راسك ويخليك طول عمرك ذليل والناس تباوعلك
باستزغار
كتبت :: ليش انا شمسوي ما جنت اعرف بااختي
=. ومن عرفت شسويت اتسترت انت وامك وتريد تاخذ ابني مني ارجع شوف ملامك ويه امك ياترى اذا دزيته
الاهلي لو الابن عمك سالم شراح يصير
:: انجبي لا اتهددين

= اهدد ونص افهم انا لحد هاي اللحظه اباوع الك على انو انت ابو ابني الي ما اريد صورتك تهتز گدامه من يكبر
وارجع واگلك انت بكيفك
::جاي اتهدديني وتكليلي بكيفك
= الي اتحسبه احسبه انا اخذت سكرينات وحتى الهاي المحادثه وراح اامنهن يم ناس موجودين بهذا المكان ينطوهن
الامين اذا صار بيه شي وما وصلت بس لا تخاف امين اخلي يتصرف وياك بحسب كلامك
:: شلون يعني

= يعني اذا حچييت زايد ناقص واتهمتني فياويلك اخوتي يقتلونك خلاص ويفضحونك ويفضحون مرتك وامك الي چانن
ايك... الاختك المرحومه اما اذا اتطلكني بدون مشاكل وكلام ما صاير بعد هذاهو تبقى طليقي وابو ابني
:: مي خالف مروه انا اسف واعتذر بس ارجعي وشنو تردين انا حاضر بس ارجعي ورجعيلي ابني
= فات الاوان يوسف مع الاسف

بقيت ساكت ما عندي كلام اكوله = اريد اوصيك دير بالك على ام بشير هاي انسانه طيبه او وكفت وياي وساعدتني
عبالك مثل امي وحتى بشير وزوجته ناس طيبين ويخافون الله
= وانت هم دير بالك على نفسك والله يرزقك الذريه الصالحه
= الي اريده منك تطلكني غيابي عد السيد وتدز نسخه الامين وتفهمه انو انا اختاريت ابقى هناك وانت رجعت
وطلكتني وتدزلي نسخه حتى اكدر اسجل ابني باسمك واطلعله هويه

=يوسف انت ظلمتني وچان ممكن كل شي اسوي من سنحت الي الفرصه لكن انا ما اريد اكون ظالمه مثلك
مع السلامه

عرفت انو هي فعلا مهاجره وعرفت انو انا خسرت كل شي  گعدت وانا ضام وجهي بين اديه وبس اتنفس ومغمض
عيوني فات وكت رفعت راسي وانا ابچي واكول
::ولك يوسف شسويت هسه ارتاحييت من ضيعت كل شي ارتاحييت من ضيعت ابنك عزوتك لو من ضيعت
مروه الي ما تريد تفضحك حتى تحافظ على كرامة ابنها
::مروه الي لو ادور الدنيا كلها ما الگى بشرفها واخلاقها وصبرها

فعلا بذيچ اللحظه اتمنيت اموت لان انا هسه تايه وما اعرف شسوي
اخذت النقال وصرت اكتب الها
::مروه اسمعيني انا غلطت بحقچ وبحق ابني واريدج تسامحيني وترجعيين وشنو تطلبين والله اسوي
وانا الممنون راح اطلگ ضحى واكتب الحقل باسمج واشتريلج بيت وشنو تردين بس ارجعي

::ام محمد انا احبج وما اتصور اعيش وانتي بعيده عني وحتى لو ترديني اطلگج هم اطلك صار
بس ارجعي لا تحرميني اشوفچ واشوف ابني الله يخليج ادري بيج تعذبتي من عندي ومن اهلي لكن
هم ادري بيج انتي گلبچ چبير
مروه ارجعي وشنو تردين انا حاضر

::مروه انا هسه اكتب وانا ابجي اكتب وانا مكسور وذليل  مروه الخاطر ابنه ارجعي اتوسل الچ
هي قرتها وردت عليه
=مع الاسف يوسف ما اكدر ارجع مستحييل 
::مي خالف مروه ارجعي وانا اعوضج عن كل شي انا غلطان ارجوج فكري اتوسلج فكري راح انتظر ردج

ما جاوبتني حسيت بنفسي مكسور واعرف انا الي كسرت نفسي انا الي ظلمت واتكبرت وطغييت حتى من
عرفت انو اختي وامي وزوجتي هنه السبب ما حاولت اصلح الغلط لا خفت من الفضيحه بس ما ادري هسه انا
عشت بين نارين اذا سكتت انفضح واذا حچيت انفضح

وكفت على حيلي وصرت اتنفس شهيق وزفير طلعت من الغرفه وانا اباوع الها وكأنما ودعت بيها روحي قفلتها
وطلعت ركبت سيارتي صرت اسوق بدون وجهه معينه وشريط حياتي انا ومروه مر عليه كانما كتاب جاي اقرا
ردت اروح للبيت لكن ما حبيت تشوفني امي وضحى بهاي الحاله

فريت سيارتي ورحت كعدت بحديقه للعوائل والنقال بايدي صرت اگلب بي واقرا كلامها وشفت جايتني رساله
من مناف يسال بيها وين وصلت ورساله من منال الي سالتني عن صحتي ورادتني اطمنها عن احوالي
رجعت اقرا بكلام مروه الي بيني وبين نفسي شفت الها حق بكل الي سوته

صرت اباوع للناس الي تجي للحديقه اشوف الفرح بوجوههم رغم التعب اشوف اشلون اثنيين جايين ونظرات الحب
ابيناتهم لو هذوله الي مرو من يمي وجهالهم وياهم وهمه فرحانيين الفرحة هذوله الاطفال

باوعت وراي شفت عاىله جايين وياهم ترمز الماي وعلاكة الاكل وبعيونهم سعاده رغم بساطتهم

سالت نفسي :: هاي الناس كلها ما عدها مشاكل وهموم كلها خاليه ومرتاح بالها اكيد لا لكن هاي الناس
تحاول تطلع من همومها بهاي اللحظات الي تكضيها ويه عوائلهم

بقيت گاعد وبس ادخن وكل شويه ارجع اقرا كلام مروه
صار دنيا ليل ورحت ركبت سيارتي بالبدايه چنت مقرر اروح البيت سالم لكن بعدين درت السياره البيتنا
او بالاحرى البيت امي وضحى دخلت وشفت امي كاعده بالصاله وضحى كاعده لازمه النقال دخلت وسلمت
ضحى كالت //اتاخرت هواي
باوعتلها وانا رافع حواجبي ::مو كتبت الج انا بالدائره

امي // ليش شكو
:: ماكو شي بس عملية ابتزاز
امي //ياستار يمه ابتزاز
هزيت راسي ::اي حجيه ابتزاز هالايام صايره موده شغلة الابتزاز

صعدت الدرج ودخلت للغرفه اخذت ملابس ورحت للحمام دخلت جوه الدوش وصار يصب عليه وانا امتزجت
دموعي ويه الماي طلعت وشفت ضحى كاعده ع الجربايه باوعتلي وابتسمت وكالت
حبيبي نعيما
هزيت راسي وفرشت سجادة الصلاة وصرت اصلي ومن كملت اتذكرت محمد يجوز هسه هو بالبحر صارت
الافكار تحاوطني من كل جانب رفعت اديه وكلت ياربي احمي واحفظه الخاطر امه لان انا ما استاهل انت انطيتني نعمه
وانا برعانيتي ما حافظت عليها

بقيت ادعي ودموعي تنزل لا اراديا بعدها لميت السجاده وباوعت شفت ضحى ما موجوده رجعت كتبت المروه
::اريد اشوف صورة ابني
هي ما ردت عليه اتصلت عليها فديو لكن ما جاوبت
اتمددت وانا مقهور غطيت وجهي وما اريد احد يشوف دموعي اجتني ضحى
- يوسف انزل اتعشى
ما جاوبتها شالت الغطا عني وكالت //شنو نمت ما معقوله

جاوبتها ::اريد انام ممكن
- ما تتعشى
::لا ،ما اريد اتسمم
ردت عليه //اووي وانا شنو گتلك وانت هلكد عصبي وما تتحاچى شكو شصاير

ما جاوبتها گعدت اخذت الموبايل والسويج الي بي مفتاح غرفة مروه والجكاير والموبايل ورحت دخلت بيها
واسمعها تحجي
- - شنو شبيك ما تتحمل كلمه
اتصلت ابشير هو رد عليه
- هلا ابو محمد

حسيت الكلمه صابت كلبي وانا خلص فقدت محمد ردت اصرخ لكن لزمت نفسي جاوبته
::هلا بشير اگلك انا اخذت حمودي وامه وياي
- - ليش شصاير حتى امي تكول هاي يومين ما شايفتها
:: لا ما صاير شي بس شويه حمودي ما اله خلك واخذته للطبيب
- ما يشوف شر شخيره

:: الطبيب يكول عنده التهاب بالامعاء
- - خطيه
:: عاد انا گلت بعد ما يرجعون للحقل وراح اجرلهم بيت واخليهم يمي
- - والله زين تسوي
:: محتاج شي

- سلامتك انت اذا تحتاج اي شي بس رمش عليه
:: ان شالله ما تقصر

سديت التلفون وانفتح الباب وضحى عيونها يذبن شرار وهي تكلي وهي ترجف
- - شنو شنو تريد اتاجر بيت المرتك وابنها تحچي صدك
كعدت على حيلي سالتها :: انتي تتصنطين عليه
- - اي اتصنط انت تقشمرني وتضحك عليه وهسه تريد اتاجرلها بيت شنو عبالك اسكت الك
نسيت انا شنو اكدر اسوي

وكفت واتقربت منها ولزمتها من شعرها ونزلتها من الدرج وهي تصرخ وامي وبسام وگفوا وامي تكلي
- شبيك يوسف اسم الله يمه شجرالك
باوعت الها ودفعت ضحى ع القنفه وانا الهث واكول ::ما بيه شي ما بيه بس هاي بت الكلب جاي اتهدد بيه
بسام يحرك بايده // شنو اتهدد

باوعتله واگول :: لا انت مو بالموضوع لان انت ما عدك بت عم عدها فلوس وما يصير عدها جهال
وما ما خذ فصليه وجابت ولد وامك ومرتك يردوك تسجل الولد باسمهن
امي // شنو هالحجي يوسف استهدي بالرحمن
بسام باوع الامي وهو يكلها // يمه رحمه الاهلج خلي افتهم يوسف شكو

حچيت باستهزاء :: وداعتك ماكو شي بس امك ومرتي يردن شي وهسه صار غير شي وهاي
( اشرت على ضحى ) عبالها اخاف من تهديدها
امي اتقربت على ضحى وكالت الها بنتر // شكو شگلتيله وهيچ اتخبل
ضحى تبچي // خاله يقشمرني يكلي اي اجيبه على ما تفطمه وهو يريد اياجر الها بيت

بسام // الخاطر الله فهموني
باوعت الامي وكتلها :: احچي فهمي ابنج شنو سويتن انتي وبتچ وبت اختج وشنو صار وليش هاي اتهددني
امي // شبيك يمه استهدا بالرحمن
:: شبيه انتن خليتن شبيه هسه اكلچ البيه

اتقربت من ضحى ولزمتها من رگبتها وصرت اخنگ بيها بكل قوتي اريد انتزع روحها وانا صاك اسناني
ردت احرمها الهوى مثل ما حرمتني ابني ومروه
لزمني بسام وفكاها مني وهي باخر نفس سحبني بسام بره البيت وهو يكلي
  على كيفك يوسف مو هالشكل
  جاوبته وانا فحطان :: روح جيب سويج سيارتي

راح بسام غاب دقايق وجابلي المفاتيح والنقال وجكايري اخذتهن وبسام اجه يمي سالني
  وين تريد تروح
::الاي مكان بعيد منا

ما ناقشني اكتفى بان هز راسه انا شغلت السياره ورحت البيت سالم فتحت الباب ودخلت اتمددت ع القنفه
بقيت صافن على حالي والي صرت بي وكل هذا بسبب ضعفي ورعانيتي انا الي فرطت بابني وبزوجتي
لزمت النقال وعلى الواتس كتبت الها

:: كل هذا يطلع منج يامروه ما اعرف بيچ هلكد جسره وخليتي كل شي وراج اخذتي ابني واخذتي روحي
وتركتيني مروه اتوسلج ترجعين وبالضمان الي تردينه بس لا تحرميني ابني لان محمد ما اله ذنب

شفتها وصلت وبعدها بعشر دقايق قرتها وما ردت بقيت ادخن وما اعرف شسوي احس متربطات اديه ورجليه
اتصل بيه بسام كلي
-يوسف انت وين
::ليش
-گلي وين انا جايك
::بسام شتريد ما الي خلك
-حتى انا انت بالحقل
::لا ابيت سالم
-زين انا جايك

اجاني بسام ومن دخل كعد ع القنفه وسالني //شنو صاير يوسف
باوعتله ::ليش امك وضحى ما گالن الك
- گالن بس حجي كله ما مفهوم
::وانت جاي حتى افهمك
- انا راح اسوي گهوه تريد اسويلك وياي

هزيت راسي وانا ساكت راح بسام سووا الگهوه وجابها وجاب ماي وهو يكول
- عفيه عليك كل شي موجود اهنا كل ما تضوج من نسوانك تعال اهنا
بقيت مدنگ بسام انطاني الكوب وهو يگلي// صدك يوسف شصاير
جريت نفس ورشفت شويه من الكهوه:: ليش امك ما گالت الك
-والله كل شي ما فهمت منها هي ومرتك توهني

  دخنت جكاره &و ليش خايفات مثلا
- والله ما اعرف كل الي عرفته انو ضحى غيرانه لان راح اتاجر بيت المرتك الثانيه
باوعتله وهو كمل //انا كلت شكو بيها خلي يستقر واذا مو الخاطر مرته فالخاطر ابنه
من سمعت كلمة ابني بدون وعي نزلن دموعي شافني بسام اتقرب وكلي

- يوسف الله عليك كلي شصاير ما اريد اشوفك بهالموقف
:: ضحى تريدني اسجل محمد باسمها واطلك مروه
-وانت
::انا انا ضاع كل شي مني
صفن بسام وهو مستغرب وسالني //شقصدك

::من تعرف شراح تسوي قابل ترجع الراح
بسام بخوف // يوسف احجي شصاير مرتك محد يجبرك اتطلگها والولد ابنها بيا قانون  ضحى تفرض
هذا الشي
::قانون امك
- وشنو بكيفهن ،هاي مرتك ومحمد ابنك وبعدين ضحى منيلها الجرأه وهيچ تتطلب لو هذا شغل امك

بقيت ساكت واباوع للنقال بلكي مروه ترد سالته //لو انت بمكاني شتسوي
- بكل الحالتين سواء طلكت مروه او ما طلكتها ما اسجل الولد باسم ضحى
انا بلا شعور جاوبته وانا ابجي :: الولد هو وين الولد راح وبعد ما يرجع
بسام من المفاجاه وكف وسالني بعصبيه//  راح وين راح

::اخذته مروه وراح
- فهمني يوسف
سولفتله وهو صافن وراويته كل التصوير والمحادثات شافهن بعدم  اهتمام ورفع راسه سالته
::لو انت بمكاني شتسوي
هو جر نفس وكال // خليها يوسف خليها تاخذ ابنك وتروح
عكفت حواجبي :: انت شتكول

- - مروه يايوسف احسن مني ومنك اتصرفت بحكمه فكرت لبعيد رادت تربي ابنها بعيد عن جبروتك المصطنع
:: جبروتي المصطنع يعني انا بنظرك انسان ضعيف
بسام // انت اخوي واكبر مني وتعبت عليه بس الحقيقه انت اكثر من ضعيف لان انت بخوفك  من الفضيحه ضيعت ابنك
انت يايوسف انسان ضعيف (صار يهز بايده باستهزاء ) شنو فضيحه ومنو تفضحك ضحى الي مشتركه باللعبه ويه
امك واختك شبيك يوسف  الي لازم تخاف منها مروه مو ضحى

باوعتله هو هز راسه // اي مروه لان تحجي الاهلها ويحقونك بس هم فكرت هي ليش اتخذت قرار الهجره انا اگلك
لان مروه يايوسف انسانه نقيه وشريفه ما رادت تطلع اختك انسانه فاسده ولا حتى امك ومرتك وما رادت تطلعك
انسان ضعيف الماي يمشي من جواك وانت ما تدري مروه يايوسف ماحبت تبتزك مثل ما سوت ضحى وبكل
عين صلفه هي مشتركه باللعبه وهي الي تهدد وهيه الي لازم تلحك ازهار لان تعرف بسوالفها وساكته كل هذا الوقت
خلي مروه تروح لاتخاف على ابنك عدها بس اريد اعرف انت على شنو ناوي

:  باي شي
- - شلون راح تتصرف اتجاه ضحى
جريت نفس :: هذا الشي راجع الي
هز راسه انا كتله//  بسام احجي ويه مروه خليها ترجع
سالني // تحبها

صرت افرك اب اديه ولملم بحلكي بسام اخذ النقال ونقل رقمها الجهازه  واتصل هي ما جاوبت بعدها دز بصمات
- - شلونج مروه انا بسام عم حمودي هسه عرفت مروه انتي القرار الي اتخذتي شي راجع الج لان انتي مو زغيره
وحتى اخوي عمره ما كان الج زوج وسند انا عاذرج بالي سويتي وهم عاذر يوسف اذا هسه تشوفينه ما تعرفينه
اتمنى تفكرين وتعيدين حساباتج وترجعين وشنو تردين يصير الج وهاي انا هالمره اتكفل يوسف
اي شي تردي صار

- - اعرف انتي انظلمتي من يوسف ومن امي هواي بس انتي طيبه واتحملتي وگلبچ چبير اذا مو الخاطر يوسف
الخاطر محمد ارجعي خلي يتربى ابين امه وابو
ارجوج مروه اول مره اطلب منج شي يوسف يحبچ وما يريدچ تبتعدين عنه

- - ام محمد انا وياج مو ضدج وشنو تطلبين راح يتنفذ واعرف بيچ انتي انسانه قويه وباي مكان ما راح نخاف
عليچ ولا على محمد لان انتي گد المسؤوليه بس يوسف راح يتخبل عليج يوسف ايحبج وانتي تعرفين الظروف كلها ضده

بقى بسام يمي واحنه منتظرين مروه ترد اما امي فكل شويه تتصل ابسام الى ان جاوبها سالته
- وين اخوك
- يمه اخوي بالحقل راح وانا يم صاحبي يجوز ابات يجوز ارجع
بقينه منتظرين اجه اشعار بتلفون بسام وهي تكله

= اهلا بسام انا اشكرك الكل هذا الكلام الحلو بحقي وهاي اول مره اسمع كلام حقيقي مو مزيف
= بسام انت اخ عزيز وانا احبك واحترمك مثل ما احب اخوي امين واتمنى اخدمك بعيوني بس هالمره
اتمنى تعذرني  لان الي انكسر مستحييل  يتصلح
= بسام خلي يوسف يطلگني ويفهم اهلي انو انا ويا قررنا انهاجر وهو هناك طلب مني نرجع وانا
ما وافقت ولذلك هو طلگني
=اريدك تعذرني بس هالمره ما اگدر سافرت وانتهى كل شي

بسام باوعلي بعتب اما انا فاحس بنفسي كانما ايد انمدت على كلبي وقلعته
كتبت الها  بدون شعور :: مروه انا احبج احبج احبج
ردت عليه راسا = مع الاسف فات الآوان كلامك اجه متاخر

عرفت انو مروه بعد راحت وما ترجع وانو انا ضيعتها للابد
خليت بسام بالصاله وانا رحت للغرفه سديتها عليه باوعت النفسي بالمرايه شفت روحي فعلا ضعيف
ومخذول ومنكسر
اتمددت ودرت وجهي وانا اشهك من البجي واحجي ويه نفسي

::ها هسه تبجي لان ضكت طعم الظلم لان شفت الخذلان شيسوي ابجي يوسف ياما وياما مروه بچت
::ابجي يوسف وشوف طعم الحزن هيج مروه جانت تبجي من تغتصبها وتذلها
::وهيج جانت تبجي من جنت تضربها
::وهيج تبجي من چانت ضحى تتشفى بيها
::وهيج تبجي من اتوفت امها وما شافتها
::ابچي يوسف تستاهل الي يصير بيك واكثر

ما نمت ابد صرت اراسل بمروه واتوسلها ترجع وبعدين گلت الها انو تنتظرني انا راح اجي وراها لكن
هي بقت مصره ع الطلاگ عرفت هي كارهتني ومحتقرتني صليت الفجر ودعيت وانا روحي فارغه
الصبح متمدد على فراشي واجه بسام كلي

-صباح الخير
باوعتله هو كلي //يوسف تعال اتريك
رحت للمغسله غسلت وجهي واجيت اتريك سالته::  اليوم ما عندك كليه
- - لا عندي بس ما رحت
::وليش
- الصدك ما الي خلك اجيبلك چاي

::اي
اخذ بسام الصينيه وجابلي كوب جاي شربته وكتله
::اشطف الكوابه وتعال رايدك
هو راح للمطبخ ورجع عليه كلي ها يوسف
::امشي وياي
- وين
مشيت قبله وكتله ::امشي وبعدين تعرف

طلعنه بسيارتي وهو خله سيارته بالكراج بالطريق اتصلت اجاني الرد
- الو
::الو شيخنا بس كون موجود بالبيت
-عليكم السلام عاش من سمع صوتك
::السلام عليكم اعذرني
- عليكم السلام معذور
::موجود مو

- اي وحتى لو ما موجود اجي على مودك
::مشكور
- حياك الله
بسام يباوعلي ويسالني// وين رايحين
؛:على ولد صديق
- تروح بهاي ملابسك
::جاي اكلك ولد صديقي مو غريب بعدين شبيهن ملابسي تراك عادي

سكت بسام وصلنه البيت شيخ عون ودكيت الباب هو اتلگاني وعرفته على اخوي گعدنا
الشيخ كال //الله بالخير
ردينه علي بعدها سالني //اشلونك يوسف
هزيت راسي وگلت ::الحمد لله
ابنه جاب الچاي والماي قدمهن وراح انا قبل لا يسأل كتله:: شيخنا جاي اطلگ
الشيخ رد عليه //خير يوسف

هزيت راسي وكتله ::مثل ما سمعت اريد اطلك طلاگ خلعي لا رجعة في
- بس الطلاگ ما يصير بهالسرعه
::يصير شيخنا تفاديا للمشاكل يصير
- ليش يوسف ابغض الحلال عند الله
::لكن ابعض الاحيان يصير احسن الحلول
- ليش تريد اتطلك

::اطلك احسن بدل ما بعدين اندم
- من يمته عن زوجتك
:: اول امس
- اكو شروط لازم تكون نظيفه يعني ما عليها دورة النساء
::اي شيخنا نظيفه
- منين تعرف
::شيخنا اعرف وقت دورتها

- هي غير حامل مو
::اي
بسام باوعلي // انت تريد تطلك منو
جاوبته ::ضحى
-شنو ؟
هزيت راسي ::اي ضحى (باوعت ع الشيخ ) شيخنا انا طابت نفسي من زوجتي مستحييل اكدر اعيش
وياها واذا انجبر على العيشه احتمال چبير انو اقترف بيها جريمه فشنو الاحسن اطلگها لو اعذبها
شيخ عون جاوبني //لا شنو هالحچي يوسف الافضل تسريح باحسان
:: وانا راح اسرحها

الشيخ طلع بعد ان استاذنه وخمس دقايق واندك الباب واجه رجال سلم علينه وصار الطلاگ خلعي لا رجعه في
وبسام والرجال همه الشهود
من اخذت الورقه كأنما ربحت الجائزه لان اول مره اسوي شي بارادتي طول الطريق وانا وبسام ساكتين الى ان
وصلنه للبيت دخلت وشفت امي بغرفتها دخلت يمها وانا اگول واشر على الفوك

:: بسام اتصل عليها  خلي تنزل
بسام اتصل وگللها //ضحى ممكن تنزلين عندي شغله وياچ
امي ساكته ومبين على وجهها الخوف والترقب هي نزلت وشافت بسام واكف سالته
-ها  بسام خير شرايد
- مو انا الرايد يوسف بغرفة امي رايدج

- شيريد
- ما اعرف اسالي
- ما اروح
- مو وكت العناد شوفي شيريد وارجعي

دخلت للغرفه وبسام وراها بقت واكفه وانا كاعد ع الجربايه وامي بصفي باوعت الها وكفت وكلت
:: يمه هاي بت اختج رادتني اطلك مروه وتاخذ الولد اسجله باسمها
امي رادت تحجي انا رفعت ايدي وكلت
::خلي اكمل لحد يقاطعني
:: اي نرجع الحديثنا رادت اسجل الولد باسمها واطلك مروه وكله ابمباركتج لان خفتي على بت اختج
وعلى فلوسها فكلتي
ياالله نسجل الولد باسمها ومروه تتطلك لان قحط فصليه وانتي كلش زين تعرفين انو مروه مو فصليه
ما علينه المهم قررت اطلك مروه

درت وباوعت الهن شفت لمعه بعيونهن وفرحه ابتسمت وكلت
:: بس قبل ما اطلگ مروه (طلعت الورقه وانطيتها الامي ) هاج يمه هاي ورقة طلاك بت اختج اليتيمه الفقيره
اكعدي انتي وياها بالبيت وانسي عدج ولد اسمه يوسف
امي كالت //يوسف يمه عل...... قاطعتها

::اششش ولا كلمه كرهت صوتج وصوت هاي الحقيره الي ضيعت ابني وزوجتي ابقي بالبيت انتي وياها ارتاحن
وديرن بالچن تسوون شي هالمره طلگت بس المره الجايه راح اكتلها خلاص
باوعت الضحى ::  وانتي ياحبابه شعندج من تهديد نفذي وبسرعه

طلعت وانا اشوف استغراب امي اما ضحى فبقت ساكته وعيونها مليانه دموع رحت صعدت فووك وجمعت
ملابسي ودموعي تلقائيا يوگعن لكن حسيت بشوية راحه اخذت الجنطه وطلعت وصرت امشي بدون ان التفت
وراي وانا اسمع بجي امي وضحى

///////////////////////  يتبع