رواية بعد فوات الأوان الفصل التاسع وثلاثون 39 - بقلم آنين الليل

مروه
وصلنه الاربيل وانا اعرف انو محد راح يعذرني اذا عرفو لكن اصراري اني ابتعد عن الواقع الي عشته
من انا زغيره واشلون ابوي يتصرف ويه امي الى ان اتوفت بحسرتها

وهو فرض علينه جمال وملاك من احنه وزغار بعد ان اتزوج امهم ومن اتوفت صرنا خدم الهم ابيتنا

وبعدها كنلها بزواجه من مرت جمال واخذ كل الي ايملكه  وضحك على ناس بحجة الشراكه واخذ فلوسهم
وراح وياها

زين اذا انت ما تحب امي ليش بقيتها وياك وليش اساسا ما طلگتها وخليتها تشوف حياتها ليش حطمتها وحطمتنا

لو انا والي صار بيه من وره انسان حقير او وحده رخيصه ردت افقد حياتي وافقد ابني وحتى من عرف يوسف
صار اهم شي عنده ان ما تفضحه زوجته وصار يريد بس رضاها ومستعد كل شي تطلبه اينفذه الها
  ويطلب من عدها تنطي وقت بس حتى افطم ابني وياخذه وكانما محمد ابنه وانا مجرد مرضعه اله

يوسف عمره ما سجل وياي موقف رجولي والكل يتساءل اذا انا فعلا املك دليل على يوسف وعلى اخته
وعلاقتها ويه جمال ليش سكتت ليش ما فضحته وارجع واگول الي اسبابي الي راح تعرفوها

وصلنه الاربيل ومن اتوقفت السياره ونزلت اتنفست بقوه لان وصلنه بسلام چانت الساعه بحدود
العشره ونص بالليل
وانا اشوف بعيون جهاد لوم وعتب وكلام ما عرفت افسره

احس بنظراته قهر وكسرة خاطر وصرت الوم بنفسي واكول ليش دخلته بالموضوع لو ملتجئه السجاد
لكن خوفي على بشير وامه اضافه الى اني مو هلكد اثق بسجاد لان ما اعرفه مثل ما اعرف جهاد

جهاد الطريق كله وهو بس يدخن حتى من نزل للاستراحه مشى ودار عليه فتحت الجامه مالت السياره كلي
اخذي حمودي للحمام غيريله وغسلي وجهه وارجعي انطيني ايا وانتي هم غسلي وجهج
نزلت واخذت حمودي غسلتله وانا هم غسلت ورجعت بالسياره واشوفه واكف ويشرب جاي بره يعني
حتى ما اكل شي

اجه كلي //ما تنزلين بالمطعم تاكلين
هزيت راسي = لا ما اشتهي
راح ورجع جايب علاكه بيها نساتل وعصاىر ولفات ركبنا واحنه ساكتين جهاد مرات يحچي ويه ايوب الي اشوفه
يتصل ويحچي بلهجه كرديه  وصلنه الاربيل وكفت السياره بصف بيت نزل ايوب وبعدها كال
تعالو انزلو 

مشى ايوب قبلنه وجهاد باوعلي وشال محمد وصار يمشي وانا بمحاذاته ساكته تلكانه ولد كردي واخذنه البيت او شقه
طابق ارضي وچانت اكو مره كبيره بالعمر هي فتحت الباب سلم عليها ايوب وجهاد كال السلام عليكم
هي ردت وانا هم گلت السلام عليكم
گعدنا بصاله زغيره ايوب حجى ويه جهاد

— يمته تريدنه نباشر
جهاد جاوبه // حتى لو هسه احسن نكسب وكت
- - تمام
هو اخذ جهاد وحچى ويا و جهاد رجع  وكال // خلي اصورج

انا كعدت وعدلت شالي وهو صورني وبعدها صور محمد المره ما اعرف شنو حچت ويه ايوب
لكن عرفت انو هو
طلب منها چاي فاتصور هي كلتله على عشا بعد ان شربنه الچاي ايوب كال الجهاد وهو يباوعلي // انت فهمتها
جهاد اتنفس ورد علي //  افضل انت تفهمها

ايوب باوع الجهاد // يعني اذا ما وافقت هذا تعبنا يروح ابلاش
جهاد ابتسم وكله //  كله بسعره ابو صبر لا تهتم
ايوب ضحك // ههههه ما دام هالشكل مو مشكله (باوعلي وكلي ) شوفي مدام  انا مفتهم وضعج وطبعا هذا الشي
راجع الج سواء صح او خطأ واهنا لازم نطلع الابنج مستمسكات فا اما نخليج ارمله ونخلي الوصايه الج وهذا احسن
وافضل بس يكلف او انو تعقدين انتي وجهاد عقد صوري ونسوي جنسيه الابنج او مثلا جهاد يسافروالولد يصير ابنه
وهم نسوي جنسيه الابنج بس باسم جهاد واكيد كل هذا الشي يكلف فانتي اختاري

باوعت الجهاد گتله وانا ابلع ريكي ومتعجبه من الي اسمعه =  شلون اعقد وانا متزوجه ما يجوز هذا الشي حرام
ايوب باوعلي باستغراب ما يخلو من الاستهزاء انا رديت علي = هو احنه شبه المنفصليين لكن هذا الشي ما يمنع
انو ما اوافق
جهاد باوعلي يعني اسكتي وكلي // گومي رايدج

هو مشى شويه چانت اكوغرفه بصف الصاله فتح الباب وانا رحت ورا هو خلا الباب مفتوح وبقى واكف بحيث ايوب
يشوفنه گلي //  مروه مو گلت لا تحجيين انا احچي
= لان سالني
- - هسه انتي سمعتي
= جهاد انا مال ارجع مستحييل بس هم حجة الوصايه اكيد تكلف

جر نفس // ما عليج تدبر
رجع وكله //هذا هو استاذ حجة وصايه
تمام انطيني جنسيتها وبيان الولد لو تريد بغير جنسيه تره اسهل وموجوده
باوعلي جهاد // ها شتكولين
رفعت امتوني وجاوبته // بكيفك
ايوب كال //. اسمعيني ام محمد هذا كل  الي نسوي بس مجرد تطلعين منا توصلين التركيا بعد ماكو اي شي يوقفج

جهاد جاوب //  تمام بغير جنسيه
وگف ايوب وگال  // راح انبلش مو تگولين بطلت لان بهاي الظروف الفيزه بسرعه تطلع
جهاد // يعني يمته
- - اليوم جاي يشتغلون ليل ونهار وانا عندي واحد يطلعها بخلال ساعه

باوعلي جهاد وبعيونه تساؤل وانا هزيت راسي بالموافقه
ايوب باوعلي وكال // ياالله جهاد نمشي وانتي تبقيين اهنا نكمل ونرجع الج
جاوبته وانا اهز براسي = لا ما ابقى انا اروح ويه جهاد رجلي على رجله
جهاد مدنك وشابك اصابع ايده وحده بالثانيه جر نفس وكال // ابقي اهنا مانتاخر حاولي تنامين

هزيت راسي هو راح وايوب ما اعرف شنو حچى ويه المره طلعوا وهي ابتسمت بوجهي واشرت
على باب وصارت تحجي كلام ما مفهوم انا رحت للغرفه فتحتها وباوعت قبل ما ادخل الها بعدها دخلت
وقفلت الباب خليت حمودي ع الجربايه وانا گعدت بالكاع مددت رجليه شفت بيها حمام بسرعه دخلت سبحت
ورجعت ملابسي عليه خليت المنشف
واجيت يم حمودي ما دريت بنفسي اله على ضربات خفيفه ع الباب باوعت شفت الساعه بثنتين وربع  فتحت
الباب لگييت جهاد گلي // نايمه

انا جاوبته والنعاس بعيوني = اي ما ادري شلون غفيت
هز راسه وكلي // عدلي حجابچ وتعالي
انتبهت النفسي لافه الخاولي على شعري رجعت  شلت شعري وعدلت حجابي ولبست عباتي واجيت شفت ايوب كلت
= صباح الخير
رد عليه وگال // صباح النور
ايوب باوع الجهاد وساله // يمته اتفضل نطلع
—-اذا هسه بعد احسن

- - ماشي ياالله انا انتظركم بره وهاي الاوراق خليها يمك
گام ايوب  وجهاد اخذ جنطه زغيره وانا بقيت اباوع الجهاد سالته =  شنو قصده يكول انتظركم
جهاد بدون ما يباوعلي // احنه
=احنه منو ؟ يعني انت همه
جهاد رفع راسه وگال  // شنو ترديني اعوفج بنص الطريق

هزيت راسي وكتله=  ايي لهنا وترجع
- - متوهمه انا اروح وياج اوصلج التركيا واركبج البحر وارجع
= بس انت ما ملزم بيه
هز راسه // لا ملزم ونص انتي طلبتي مساعدتي وعيب ع الرجال اذا انطى كلمه يتراجع بيها

= انت ما اتراجعت عرضت نفسك الكل شي بس لهنا وكافي ارجع وانا اكمل طريقي
نفخ دخان الجكاره // لو بطياره ممكن ارجع لكن احنه راح نروح بسياره افتهمتي طريق كله منحدرات
وابحدج (هز راسه ) لا تفكرين اقبل اخليج اله اوصلج بايدي
= وشنو تگل الامين
- - خابرته وگتله عندي شغل واتاخر
= يمته
- - من طلعنه انا وايوب

شال علاكه وكلي //هاج هاي ملابس البسيهن وهاي الحمودي وهذني شكم فطعه بالجنطه همه ويالله استعجلي

رحت للغرفه بسرعه لبست وغيرت الحمودي حفاظته ولبسته الملابس الجدد الي جابهن جهاد وطلعنه عفت كل ملابسي
القديمه بسله يم الحمام واخذت بس الحلويات والنساتل الي جابهن جهاد سلمت على المره وطلعت شفت ايوب راكب
بسياره مو نفس الي اجينه بيها وجهاد واكف وفتح الي باب السياره وركبت وهو ركب بصفي ومخلي جنطة الملابس
بيناتنا بالطريق انطاني الجنطه الزغيره وكلي

—— هاج هاي الجنطه بيها الجواز والجنسيه وحجة الوصايه واحفظي اسمج الثلاثي وتاريخ ميلادج واسم امج الثلاثي
واسم ابنج مفهوم
دار ايوب وكال //تره اي غلط راح تدخلين بسين وجيم وتصير شغله مو تمام

شفت الجنسيه باسم لينا ...وجنسية محمد باسم سيف ...وبقيت احفظ الاسماء  والمواليد على گلبي
واكثر من مره جهاد اخذ الجواز والهويه وسالني وصارت السياره تمشي الى ان دار ايوب على جهاد وكله
- - بعد عشر دقايق ونوصل الاخر سيطره تابعه الاقليم كردستان
جهاد اتنفس وكله //. ابو صبر خلي السايق يوكفلي شويه

ايوب حچى ويه السايق وگف نزل جهاد ودار الجانبي  وكلي//  انزلي
نزلت الدنيا ظلمه جهاد گلي
- - مروه شوفي ذاك الضوه ( واشر بايده وگال ) باعي  ذيچ تركيا يعني بالميت ساعتين تلاثه احنه واصلين والي
يفصلج عن الرجعه عشر دقايق اخر مره راح اسالج مروه اريدچ توثقيين بكلامي ولا تخافيين الي وصل وياج
لهنا مستعد يفديج بعمره بروحه اذا ترجعين او وعد مني محد يلمس منج شعرايه اله انا جوه الگاع

صدگوني كلامه هزني صرت ارعش عبالك سعفه وهو يكلي بصوت مكسور عبالك يريد يبچي // فكري يابت الحلال
غمضت عيوني وگتله = بعد  ماكو اي مجال ارجع  خلاص راح استمر ولو اعرف اهنا هسه تكتلني لو ارجع
اگلك اكتلني
هز راسه واتحسر // لا عليمن ياالله اركبي  بالسياره

وركبنا بالسياره وقبل ما نوصل السيطره دار ايوب وگال // ها لينا كله تمام
هزيت راسي جهاد كال//  اذا يسالونج ليش جايه گليلهم هجره مو ابو صبر
- - اي وان شالله ما يسالوها حفظتي الاسم والمواليد
= اي

- - تمام نتوكل على الله
جهاد // والنعم باالله
انا صرت ادعي بگلبي وانا لازمه محمد عبالك راح ياخذونه مني // يارب انا طلعت بس حتى احافظ على ابني مثل
ما ضحيت قبل حتى احافظ على اخوي آلهي بجاه نبيك محمد
بجاه كلمن عنده جاه عندك يارب سهلها ياآلهي ولا تفضحنا يارب الخاطر هالطفل

وصرت اقرا ايات وادعي وصلنه يم السيطره وجان ازدحام مو طبيعي ايوب كال // اكثرهم جايين ايهاجرون
جهاد كلي // حفظتي اسمج اكيد
= ايي حفظته
ايوب // عادي اتصرفو وارفعوا رووسكم لا تدنكوون
وصلنه واخذوا الجوازات وانا اباوع كدامي صار يباوع بالجواز هو سالني بلهجه عربيه مفهومه
- انتي لينا

هزيت راسي كتله = ايي انا
- - هادا ابنج
= اي ابني سيف
- - وين زوجج
-= متوفي وهاي حجة الوصايه
صار ايباوع بيها بعدها رجعها وفتحو الطريق

وكلنه جرينه نفس من مشت حسيت بشي داخلي يمكن امان يمكن حريه ما اعرف باوعت الجهاد گتله
= اريد ادز رساله اليوسف
- - مسج قصدج
= لا واتساب
ايوب سمعني كال // لا اهنا ماكو شبكه خلي نوصل وبعدين راسلي

سالته = يعني يصير ارسل من نفس الشريحه
- - اي لان شبكه مو اتصال ع الشريحه صدك جهاد لازم تخليلها شريحه
  جهاد يباوعلي وهز راسه
وصلنه التركياالصبح  وهناك صار لازم ايوب يقبض اتعابه وجهاد يتركني وانا ابدي معترك جديد
بس هالمره مو ابحدي لا وياي ابني

وصلنه المنطقه قريبه ع البحر وانا اشوف ازدحام الناس ايوب گال // هاي كلها تريد اتهاجر
جهاد ما عقب ساكت اخذني الفندق واجرلي غرفه وطلب من ايوب ان يعرفه على ناس ثقه ممكن
ايوصلوني بامان وكالعاده هاي يراد الها فلوس وجهاد هو الي يدفع وفعلا ايوب جابله ناس واتفاهم وياهم
انو يوصلوني المنطقه امينه ودفع الهم نص الاتعاب والنص الثاني بعد ان اوصل واخابره اني انا بخير

وبقى جهاد وياي تسع تيام كاعد بنفس الفندق وقليل يلتقي وياي ولا يسولف الى ان اجه اليوم الي اسافر بي واهنا
جهاد گلي شي خلاني ابچي وما اصدك الي اسمعه ويمكن اتندمت لان هاجرت لكن ما بقى الي سبيل للرجوع

/////////////////////////////////

يوسف
بعد ان شفت تهديد ضحى واكتشفت خيانة ازهار ويه جمال وحتى خيانة امي الي بقت كل هاي الفتره ضامه عليه
واكتشفت خطتهن الدنيئه بان اخذ ابني واسجله باسم ضحى عرفت ليش امي ما قبلت اطلع الابني هويه چان عذرها
انو لازم اصدق زواجنه انا ومروه بالمحكمه وهي دائما تردد وتگول هي قحط فصليه

لكن بالحقيقه امي وضحى مخططات ان اسجل محمد باسم ضحى واطلك مروه وبدن لعبتهن القذره
بان التجأن الساحر وخلني اكره مروه واقسى عليها وحتى خلني اتخلى عن انسانيتي بان منعتها من ان
تروح تشوف امها عرفت شگد انا ظلمت مروه لكن بنفس الوقت امي چانت تحچي وتگلي

- - اذا ضحى كشفت علافة اختك ويه جمال راح تبقى طوول عمرك الناس تحتقرك ومحد يحترمك
اتذكر رديت عليها ::ليش يمه انتي احترمتيني وانا ابنچ لو ضحى احترمتي وانا زوجها وابن عمها
اشو انا بايدچن مثل اللعبه وانتي حجتچ ضحى عدها فلوس واملاك هسه انا لو انتي شربحنا من فلوسها واملاكها

امي // يمه يوسف ضحى يتيمه وحقها من تسوي هالشكل تدري بيك ما تحبها وانوب ما يصير عدها جهال
:: وهاي لعبه ثانيه منچ تدرين بيها ما تخلف وانتي رايحه وراده للطبيب وسحب فلوس وبعدين طلعتي ترحين
وياها  تسويلي سحر

امي هزت راسها // اي اسويلك ولا مروه تاخذك وضحى تفضحك يمه يوسف صدگ مو عبالك انا فرحانه
وانا اشوف ضحى كل شويه اتهددني بنظراتها تفضح ذيج المقبوره الله لايردها لا صدگني يايمه كل الي
سويته الخاطرك والخاطر بسام الله عليك من ننفضح  منو يقبل يزوج بته الاخوك لو منو راح يحترمك ويقدرك

جاوبتها باستهزاء :: عاد شفتي احسن شي تسكتين ضحى بأن اطلگ مروه واخذ الولد
امي // اي طلگها ورجعها الاهلها بعدهي زغيره والله يعوضها بالاحسن منك افهمني يوسف كل شي الناس تنسا
وتبقى وكت تحجي بي وتالي ما يبقاله اثر اله سالفة الشرف الناس اتدقق بيها صدگني اذا صارت عد مروه بنيه وكبرت
وضحى فضحت الاول والتالي محد راح يخطبها لان يكولون العرگ دساس عمتها هيچ وهيج
وحتى ابنك محد ينطي مره يمه كل الي سويته على مودك من تنعرف سالفة ازهار صدكني الكل يصير ضدك
ويحقونك سالم وعمامك والعشيره واهل جمال

لملمت حلكي وانا اباوع الامي واهز راسي ندم وكلت ::  فكرتي بكل شي بس ما فكرتي بانتقام رب العالمين
- - لا فكرت وادري انا مذنبه بس شسوي الله يغفر بس الناس ما تغفر
:: والفلوس الي اخذناهن حرام مو النه
- - لا النه روح اسأل حتى لو هي راكبه ويا هم يفصلنه لان مسبب ودايس بيتنا هاي اعراف عشائريه وما طوول
الله سترنا ليش نفضح روحنه فكر يمه راح تشوف كل كلامي صحيح

وفكرت وقررت اني اسايس ضحى لان يجوز عدها صور او محادثات لمن ما احذف كل شي بعدها اطلگها
واعوفها تعيش ويه امي وانا ومروه نعيش ابحدنا وصرت اداري ضحى وابين الها حبي وهيامي بيها وزعلي
عليها اذا حاولت ان تبتزني وبيوم جنت بالحقل وهي خابرتني رحت لگيتها عصبيه سالتها ::  شبيج
ردت عليه :: اريد اعرف يمته تجيبلي محمد
:: باقرب فرصه انتي شبيج

باوعتلي بعصبيه // ما عندي ثقه بيك
رفعت ايدي وكتلها :: لا تحچيين عن الثقه اذا چان اكو واحد ما عنده ثقه فهو انا
هي باستغراب // انت ؟
هزيت راسي :: اي انا انا ما صار عندي ثقه بيچ انتي بت عمي وزوجتي والمفروض تكونين وياي مو ضدي
جاي اتهدديني وتبتزيني وهسه جايه  تكليلي ما عندي ثقه بيك

هي اتقربت مني وجرت حسره وكالت // لاتزعل مني يوسف انا انسانه محرومه والظروف كلها ضدي
باوعت الها وانا عاكف حواجبي هي هزت راسها وكالت
- - اي ليش مستغرب انا اعرف انت ما تحبني ورغم هذا اتزوجتني لان استحيت من ابوي واعرف انت الهسه
تحب سحر وما كدرت انسيك اياها
وتالي ما كنلت وياي وما راح يصير عندي اطفال اله بمعجزه وتيتمت وانا زغيره وهواي امور

——- شنو عبالك انا فرحانه من هيج اسوي ويه زوجي وحبيبي وروحي من الدنيا لا متوهم انا اموت الف موته
واعرف ما تحبني لكن شسوي مو بيدي يكفي انت باقي يمي ويكفي انا احبك
  انا يايوسف اريد اكون اسره واريد يصير عندي طفل انيمه بحظني واسبحه وابدله واشيله وادرسه
واروح اسأل علي بالمدرسه
لاتلومني انا حقي كل شي اسوي الحرمان كل شي ايولد وانا انحرمت من ابسط شي

صارت تبچي بحرگه اتقربت عليها ولزمتها من چتفها ::هذا الشي لابيدج ولا بايدي بيد رب العالمين
هزت راسها // صحيح بس ليش تحكم على ابنك يعيش طوول عمره بحقل ويه ام منبوذه محد يريدها خو يجي
واسجله باسمنا ويعيش احسن عيشه وكل الي املكه اله وهي اتطلگها وتروح الاهلها واحسن واحد ياخذها خصوصا
وهي بعين الناس مظلومه لان فصليه وجابت ولد يعني اول وتالي تتزوج ويصير عدها اطفال

رفعت حواجبي :: ها وتتصورين من نسجل محمد باسمنا ونربي راح يطلع خوش ولد صدكي ضحى الله سبحانه
راح يعاقبنه يجوز يطلع عاق وما يفيدنا ليش ناخذه ونحرگ كلب امه  لو تردين من باجر نسافر ونسوي طفل انابيب
تكولين ما ينجح ما لازم يولي نروح للملجأ ونتبنى  طفل تدرين الله شكد راح يرحمنه
ضحى //شنو من ناخذ حمودي قابل راح نموته راح يعيش ويه ابو الحقيقي احسن عيشه

:: ضحى  انتي تردين نغتصب حق ام وهي بالاساس مضلومه
هزت راسها وجاوبت بعصبيه /. لا مو مضلومه ابن عمها اتجاسر على عرضك حتى لو ازهار مصادقته
بس هو هم يبقى غلطان
:: حتى لو غلطان ما چان لازم ناخذ فصليات
هزت راسها // وهذا هو صار امر واقع

:: اي امر واقع وانتي اتهدديني اذا ما اجيبلج ابني اسجلينه باسمج  راح تفضحيني
هي حضنتني وكالت // انا لان احبك هالشكل سويت بعدين تتصور انا اهددك لو افضحك بس ما لكيت اله
هاي الطريقه حتى تطلك مروه واخذ الولد
:: يعني تردين تفهميني انتي ما موديه المحادثات الاي احد محد يدري بيهن
مروه باوعتلي // بيش تريدني احلف الك بس خالتي تعرف وصدكني راح احذفهن من جهازي والايبااد بس
تطلك مروه ويجيني حمودي

:: هاا ها يعني موجودات على جهاز ثاني
هزت راسها // اي ليش الجذب خالتهن على الايبااد وهذا بي رقم سري بيوم الي يصير حمودي عندي ويتسجل
باسمي انا انطيك الرمز وتحذف كل شي
هزيت راسي وگتلها ::  هذا هو بس انطيني مجال اسايسها حتى اگدر اخذه
جاوبتني // لا بالعكس لازم ما تغير تصرفك وياها حتى تمزع روحها وهي تطلب تطلك

وكتها كرهت ضحى وكرهت امي وحسيت شكد انا ازغير وضعيف وقررت اسايس ضحى حتى تحذف كل شي
وبعدها اطلگها وابقى اعيش ويه مروه وابني لكن الي صار گعدت الصبح لگيت ضحى محضرتلي الحمام وسبحت
وانا حاقد عليها اتمنى اموتها رحت للدوام ومثل كل يوم مراجعات وصادره او وارده  وانا اشوف هاي الموظفه
منال بكامل اناقتها وصوتها الهادئ وحتى تعاملها ويه المراجعين والموظفين بمنتهى الاحترام دائما اتذكرني بهدوء
سحر ومروه

بنفس الوقت اشوفها دائما وهي تباوعلي ومهتمه بيه وهاي مو اول مره حتى من اخذ اجازه الگاها مكمله شغلي
ودائما تعرض عليه المساعده اذا چان عندي شغل وتحاول تتاخر من تطلع تنتظرني حتى نطلع سووا ناهيك
عن الچاي والحلويات والفطائر ومناف لفت نظري لاهتمامها بيه لكن انا ما فارغ الهيچ شغلات
اشوف نظراتها الي كانما تريد اتكلي شي قبل ما ينتهي الدوام كملنه وجاي انجمع بالاوراق  اجت يمي وگالت

- - استاذ يوسف يمكن باجر ما اداوم
:: ليش
- - عندي شغله
:: سلامات ست منال
- - الوالده تعبانه شويه
:: سلامتها اكتبي اجازه وتدللين
- - شكرا استاذ

:: محتاجه شي انا بالخدمه
- - تسلم ربي يخليك
::ما تشوف شر الوالده وامانه شنو تحتاجين تتصلين بيه
هي ابتسمت وگالت // نحتاجك بس بالخير

اجاني مناف وهو يكلي// شعجب منك من الشيطان
:: هاي شكو
- - يعني اشوفك تحچي ويه منال وتتمنى للحجيه الشفاء العاجل
:: شقصدك اعرف بيك قصدك رون سايد
- - هههههه بس هالمره قصدي شريف

:: شلون باالله
- - البنيه معجبه بيك يعني انت ما جاي تحس
باوعتله وگلت :: هي ما قاصره وبت ناس وحلوه وانيقه وانت دووم تكول اهلها ناس معروفين
مناف // يا معروفين دگول طاگيين
:: اي شتريد توصل
- - ليش ما تحاول تتقرب منها
:: صاير مردد عليه هذا الكلام الف مره وانا ما قابل

- - وليش باالله
:: الي اسبابي
- - وهي هم تعرف انو انت متزوج ومبينه راضيه
:: مناف كلي الصدك هي گايلتلك شي
- - لا وداعتك بس مبينه من نظراتها واهتمامها يعني حتى المطي يفهم

باوعتله وهزيت ايدي اتصلت ضحى وانا اباوع المناف جاوبتها
:: الو.
ردت عليه بدلال ما يلوگ الها// هلو حبيبي تجي ع الغدا
:: ايي جاي
- - عبالي تروح
:: وين
- - يعني ما تدري وين
:: اي عادي هسه اروح تره وانا من اروح ما الزم نفسي وانتي بكيفج

- - لا لاتروح خليها للخميس نروح سووا ياالله حبي منتظرتك
:: جاي بس يخلص الدوام رايده اجيب شي وياي
- - لا سلامتك

سديته التلفون وانا انفخ على هالعقل العدها لو خاله بسطال براسها احسن من عقلها
اشوف منال تراقب بيه وهي تسمع كلامي ويه ضحى حسيت بيها ضاجت
وكفت اريد اطلع اجتني  اشعارات هواي ع الواتساب طلعت النقال  حتى اشوفهن وانا اكول
:: هذا يابطران جاي يدزلي كل هاي الرسايل
مناف يگلي // اكيد معجب خرزتك ماشيه

هزيت ايدي مستهزأ بكلامه وفتحتهن لكن المفاجأه من الي شفته وقريته خلاني ما اكدر اتحرك يمكن بلحظتها
انشليت او انجلطت صرت اتنفس قوي اتهاويت ع الكرسي شافني مناف واجه يمي بسرعه  وهو يسألني
- - شبيك يوسف شكو
صرت اهز راسي واتنفس قوي اجت يمي منال وكالت//  شكو استاذ شصاير
مناف // يوسف شنو هذا الي اجاك بالواتساب فهمني

انتبهت على نفسي رديت بصعوبه :: صديقي اعز اصدقائي مسوي حادث ومتوفي
مناف // اهنا منو هذا اعرفه
هزيت راسي :: لا بالبصره
منال جابت بطل ماي وهي تكلي // اشرب استاذ الله يرحمه شبيدك علي

اخذت البطل وصرت ارجف وانا احاول اشرب الماي لكن ما كدرت طلعت من الدائره كوه امشي بخطى
ثقيله لحكنيمناف وهو ايكلي // يوسف جاي وياك اوصلك
جاوبته :: لا ما كو داعي راح اطلع منا للبصره
- - تسوق بهاي حالتك
باوعتله وعيوني مليانه دموع  وانا اردد :: ياريتني اموت ياريت

فتحت باب السياره وركبت بيها وانا عيوني مغوشات من الدموع سقت السياره وطلعت على طريق الحقل وانا مذهول
ركنت السياره ع الطريق العام وطلعت النقال وصرت اقرا

= يوسف من تقرا رسالتي ما راح تلكاني موجوده بسجنك لان حررت نفسي وانا هسه موجوده قريب من المانيا
شردت منك ومن جبروتك وظلمك شردت من اعصابك واخلاقك ومن تفاهتك وعدم رجولتك
شوف قبل ما تغلط وتحجي حبيت اكلك انا عرفت كل شي وانطيتك فرصه لكن انت ...
خليها انت تجاوب عن نفسك بس بالاول خلي اكلك انا شعرفت

= عرفت انو ازهار جانت مصاحبه ابن عمي جمال ضحى تكول مصاحبته وامك همه لكن انا اكلك ازهار وجمال
جانو عشاق وصاير بيناتهم شغلات اكثر من الي تعرفه ضحى وامك واتصور انت رجال وتعرف شنو معناتها بنيه
تطلع ويه ولد للشقه مالته ومو اول مره وهي مخطوبه والصور والمحادثات تثبت هذا الشي

= هسه تكلي چذابه ماكو هيچ فلم انتي انهزمتي وجاي تغطيين على فضيحتچ
وانا اكلك شوف هذا المقطع وبعدين احچي
شغلت المقطع وشفت كلامي ويه امي من يوم الي ضحى هددتني كله مسجلته ودزتلي محادثات ازهار
ويه جمال وصورها
بعدها كاتبه

= شوف يوسف هسه انت تكول ليش ما رحت الاهلي وفضحت كل شي
وانا راح اجاوبك
= انا كل الي سويته ابداية ما اخذتني فصليه كل الي سويته بس حتى احمي اخواني لان انت اختك شريفه عفيفه
وابن عمي نذل وخطفها وسوت حادثه لان ما قبلت على نفسها الفضيحه فلزمت الاستيرن وكلبت السياره وانطت
نفسها فداء الشرفها وشرف اهلها
والناس مصدكه ما يدرون هي رايحه او جايه من الشقه وما اسولف شنو ممكن تطلع مسويه وشنو منطيته برضاتها

وانت ما قصرت اخذتني وظلمتني وقسيت وياي وحرمتني من ابسط حقوقي وحتى ردت اتموتني وانا حامل
بابنك وعلى اثرها انا جبته بالشهر الثامن ويمكن الله سبحانه اله بيها اراده انو خلا عايش بس حتى ينقذني من الي انا بي

وبقيت بحقدك وجبروتك وظلمك واتوفت امي وحرمتني اروح اشوفها وهي تنازع رغم هي اتوسلت بيك وكل هذا
ممكن اسامحك بي لكن انومرتك الحقيره والي هي شريكة اختك بالخيانه تريد تاخذ ابني وتسجله باسمها وانت موافق على
كلامها بس حتى ما تفضحك هذا الشي خلاني اراجع نفسي بدل المره الف وجان قراري اهاجر واترك كل شي وراي

= دير بالك جاي اعرف شتكول ويه نفسك ليش ما كلت الاهلي وراويتهم كل شي وهسه هم راح اوضح الك السبب
تدري يا استاذ يوسف ليش ما رحت وطلعت كل الي بحوزتي من فضايح الاهلي السبب هو ابني

= لان اعرف من يعرفون اهلي ما راح يسكتون وراح تنفضح وبالتالي راح تطالب بابنك وانا اطالب بي ومحاكم وطلايب
انا فكرت بابني من يكبر اكيد سواء عندك او عندي لازم بيوم يتعير بعمته الخاينه وابو الضعيف الشخصيه الي كلمه
تجيبه وكلمه تودي ما اريد ابني يعرف انو عنده عمه بهالرخص واب ما يكدر يتصرف وبيبيه ما تخاف الله

  = لذلك من يكبر راح يسالني عليك واكله انو انا وانت ما توافقنا وانفصلنه بكل هدوء
شوف هذا الكلام انا صورته حتى اذا تحچي لو كلمه زايده ناقصه راح مو بس افضحك يم اهلي واهلك
لا صدگني صور اختك ومحادثاتك والمقطع الي انت والست الوالده تسولف الها على بطولات اختك المصون الشريفه
صدگني على مواقع التواصل

= المطلوب منك بعد اسبوعين تدز خبر انو انت وانا هاجرنا وهناك انت ما گدرت تعيش وانا ما قبلت ارجع
ابنك راح يبقى باسمك وانت راح تبقى اب لاباس بي والخيار الك

= انت ظلمتني وقهرتني وانا ما راح اسوي اي شي سوى اني اربي ابني تربيه صالحه بعيده عن امك المسيطره
وضحى الجاهله وانت الضعيف
تدري يوسف لو انت مصارحني يمكن سامحتك لكن انت قبلت على نفسك الانانيه وانو انت تعيش بالباطل
بس حتى ما تنفضح ونسيت انو الله بالمرصاد

تحياتي الك وانا ما راح اكطع عنك انا وابني لو نعيش سووا لو نموت سووا

////////////////////////////يتبع