رواية بعد فوات الأوان الفصل الحادي وأربعون 41 - بقلم آنين الليل

مروه
من وصلت التركيا جهاد اجرلي غرفه بفندق رغم اكثر الناس الي تريد تهاجر چانو ينامون بره قسم
متلحفين ابطانيات وقسم تحت خيمه وقسم بالحدايق انا اجرلي غرفه وگلي
- ما تطلعين ولا تخطيين اي خطوه اله تنطيني خبر

اباوع اله واشوف حزن بوجهه واحاسب نفسي لان خليته بهيچ موقف اعرف يفكر شنو موقفه من يعرفون اخواني
من طلب مني ما اغادر الغرفه باوعتله بتساؤل وهو علل هذ الشي بالفوضى الي حاصله نتيجة تدفق الناس الي
تريد تهاجر

والحقيقه الي شفتها حقيقه صادمه وانا اشوف الالاف وهمه يتزاحمون للهروب من واقعهم وطلب للجوء
مرات احس بالخوف واراجع نفسي واكول =خلي ارجع للعراق واكيد جهاد ما راح يتخلى عني ويساعدني
بعدين اكول = شنو قابل ابتلى بيه مو كافي الي سووا على مودي

وارجع واتذكر ظلم ابوي وظلم يوسف وحتى ظلم جمال وازهار الي ما اعرفها
ودائما ما يروح هذا الخاطر من بالي = ياترى ليش جهاد يسوي كل هالشي
ويكون جوابي = اكيد كل رجال عنده نخوه ومروءه من وحده تطلب المساعده يسوي اكثر

چنت ما اطلع من الغرفه اله اخابره وابلغه ومن اطلع اعرف بي هو يمشي وراي ويراقبني وفعلا من التفت اشوفه
وراي وهو يبتسم بوجهي ويجي ياخذ ابني ويلعبه ويخلي على ركبته ويركض ومحمد يضحك ومتونس
لكن مره التفتت فجاه شفته حزين وشايل هم،ما تشيله الجبال

اخذني للناس الي اتفق وياهم يوصلوني الاحد الدول الاوربيه لان تقريبا اغلب الدول فاتحه حدودها
للاجئيين المشكله اكثر اللاجئيين يجون التركيا القربها من اوربا

وصار الاتفاق انو خلال هالاسبوع يتم السفر وانا اشوف شلون جهاد يحچي وياهم وكأنه  هو الي راح يسافر
وصرت اشوفه ياخذهم على صفحه ويحجي وياهم بس ما اعرف بشنو يحجون
واتعرفت على براق وزوجته تاره الي راح يسافرون على نفس المركب

براق عراقي وزوجته لبنانيه وهو جان عايش بلبنان لكن سوء الاحوال المعيشيه جبرته يرجع للعراق وهناك صارت
مشاكل ويه اهله فاضطر ان يهاجر هو وياها وسمعت جهاد وهو يوصيهم عليه ويحلفه انو يعتبرني مثل اخته

واجه يوم السفر بالليل اخذني جهاد للمطعم وهناك انطاني فلوس وكلي فرقيهن شفتهن هواي وهو ما اخذ مني ولا فلس
من يوم الي اجاني للكراج يعني كل مصاريف السفر من عنده وحتى من انطيته الذهب والفلوس الي ما يجن نقطه
ابحر من الخساير الي خسرها عليه هو رفض لكن انا اصريت انو ياخذهن والا انا اروح ابحدي واشوف غير هذوله الناس

اشوفه يضوج وينقهر لان هيچ احچي وصدكوني انا ما اتصرف هالشكل بس حتى اخلي ياخذ مني الفلوس واخذهن بالكوه
كل هاي الامور وانا افكر ليش سووا كل هالشي

مي خالف استنجدت بي وساعدني او وصلني لكن طلبه مني ان ابقى اهنا بتركيا لو من طلب مني ارجع للعراق وكال
ما اخلي احد يوصلج اله تروح هاي (وأشر على ركبته )

كل هاي الامور خلتني افكر بهذا الشخص الي ما اعرف شنو اوصفه
ومن وصلنه الى النقطه الي لازم نفترق بيها اخذني الفضول ان اساله وكنت متوقعه اجابته تكون
انو انا مثل اخته وابد ما ينسى فضل امين الي نقذه من الاشخاص الي رادوا يحركونه بمعرض حجي عبد لكن
من سالته
چان رده عليه بمثابة صاعقه وهو يگلي //احبچ

وصار يسترسل بالكلام كانما طفل يخاف يتعاقب وجاي ينطي اعذار

استغربت لكن احساسي بصدق كلامه وعرفت شكد اخلاقه عاليه وشريف وما حاول يستغلني باسم الحب
خصوصا ويعرف بيه متزوجه ومهزومه رجل بمكانه يستغل هذا الشي لكن هو حتى ما صارحني لان يعرف
هذا الشي ما يجوز وحرام

كلامه اجاني بعد ان عرف انو انا راح اتطلك ومستحييل ارجع اليوسف
لكن اجاني بعد فوات الاوان سمعته وانا متزوجه وام الطفل ومهزومه من واقع مرير ومسافره للمجهول

شفت دموعه وشهگته عليه وشفته شلون يبوس بمحمد ويشم بي ويحضنه وشلون ايوصي بيه
انا ما اتمالكت نفسي صرت ابجي مو لان هاجرت لا لان دائما الاشياء الي اتمناها تجي متاخره
باخر لحظه قبل ما اركب القارب گلي

ابقي اهنا مروه وانا اتكفل باقامتج ومصاريفج واذا عليه ما راح تشوفين وجهي

لكن انا هزيت راسي بالنفي وطلبت منه ينساني واتشكرته هوااي وهو حلفني بكل عزيز بس اوصل اطمنه
سمعت صوته وهو يركض ويأشر بايده ريگلي
ما فات الاوان انتظريني

هاي الكلمه چانت طوق النجاة والامل الي
وصورت مقطع  وانا راكبه المركب واخذت صور الي وال ابني ودزيتهن اليوسف اعرف ما يوصلن بوقتهن
لكن المهم دزيتهن حتى بعد يفقد الامل نهائيا ويعرف خطأه وانوو هو السبب بضياعي وضياع ابني لان ما احتواني
واذاني وسحك على كرامتي

بقيت افكر على عجل وانا اشوفه متسمر بمكانه وصرت افكر انزل وابقى اهنا او ارجع لكن كل الاشياء الموزينه
الي مريت بيها قبل كلها صارت گدامي واعرف اذا نزلت محد راح يرحمني ومحد يسامح جهاد رغم تعبه وحفاظه
عليه

اكيد راح ينحق من غير انو انطي اليوسف واهله مجال يتقولون ويئولون وكل هذا ما همني بكد ما همني الحفاظ على
ابني وعلى جهاد

وصلت للنج وصعدت خليت ابني بحضني اخذت زاويه بقيت واكفه وانا اباوع الجهاد وهو واكف وصورته تتلاشى
گدام عيوني لكن بداخلي باقيه ومستحييل تنحذف  ما انكر من سمعت كلامه الجهاد اتفاجآت وصرت اربط كل شي صار
قهره وتوسله ان ابقى حزنه وشلون عرض نفسه للخطر وشگد صرف عليه بدون ان يطالبني بشي

هاي خلتني طوول عمري اذا بقى عندي عمر طوول عمري راح ابقى مديونه اله ولازم اوفي ديني
صرت احجي ويه نفسي واكول
= ياريت ربع شهامتك عد يوسف ما جان عفت كل شي وانهزمت بابني ياريت

دموعي امتزجت ويه ماي البحر واللنج بدا يمشي بينا للمجهول وبدت الرحله اخذت مكان بالمركب انا وابني قريبين
من تاره وبراق واحنه لابسين سترة النجاة الي جابهن جهاد لان اثق بيهن اكثر من الي وزعوهن علينه
وانا اقرا آيات وادعيه وصرت اندب الله والنبي واهل البيت الي ينجيني وابني ويسهل سفرتنا

البحر يرهب واكبر واحد يخاف منه وما اعرف شنو منتظرني
فجأه وكف اللنج بوسط البحر بعد ان تلاكى باحد القوارب السريعه صار ابيناتهم كلام بعدها گالو انو
ما راح يوصلونه للمكان الي اتفقو بي ويانه
وصار لغط وكلام وعياط  واكثر المهاجرين رادو يسوون مشكله ويه صاحب اللنج
الي علل  هالشي بخفر السواحل لان اغلب الدول  صارت ترفض تدفق اللاجئين الاراضيها  فصار انو لازم
نروح لليونان ومناك السلطات تقرر وين وشلون يكون سفرنا

ما صار امامنا اله الموافقه لان اذا رجعنا الى تركيا فما راح يوافقون اله نرجع البلادنا
وصلنه لليونان باقل من نص ساعه وهناك دلانه على مكان  نسجل بي اسماءنا وهذا نروحله بسياره وفعلا بساعتين
وصلنه وشفنا الالاف مثل حالنه كتبوا اسماءنا وانطونه ورقه مختومه بيوم وتاريخ وتسمح النه البقاء باليونان مدة تلث تيام
وبعدها اذا لگونه يلقون القبض علينه ويرجعونه الى تركيا او الى سفارة بلادنا ومناك نرجع للعراق

چنت ويه براق وزوجته ويانه جماعه اغلبهم سوريين وعراقيين البعض منهم قرر يعبر الحدود البريه الى الدول
المجاوره والبعض قرر يعبر الحدود  عن طريق البحر لان الفرصه بالدول الي ع البحر اكثر واحسن
ولان وضعها الاقتصادي افضل

وهم لگينه سماسره ودلونه على ناس واخذونه برحله نحو المجهول وما اوصف الكم الخوف والقلق
وللامانه براق وتاره ابد ما تركوني وصادفتنه عاصفه الكل خاف انا بقيت حاضنه ابني وادعي واستغفر ربي
واطلب من الله المساعده مرينا باوقات عصيبه لكن الامل بالوصول هو الحافز النه

وصلنه للشاطئ وهناك استلمنا دليل او سمسار مقابل ان ندفع البعض رفض لكن انا وبراق وتاره وغيرنا دفعنه
وصرنا نمشي واتفاجانه بالليل چان اكو برد صرنا نشعل نار اكثر شي  فادتني ملابس جهاد والاكل الي خلا الي ولمحمد

بالنهار الجو ربيعي حلو كلش نكدر نمشي وانبهرنا بالمناظر والطبيعه الخلابه وبالليل كان البرد والخوف من المجهول
وصلنه بعد معاناة الى نقطه وشفت ناس وفوضى وشرطه عرفت انو اهنا لازم نسجل اسماءنا

ما انكر كانو بعض الاحيان  شديدين بسبب تدفق اللاجئين ولكن متسامحين خصوصا ويه العوائل الي عدهم اطفال
سجلو اسماءنا وانا انطيت اسمي الحقيقي واسم ابني وفكرت اللحظه ان اسجله باسم جهاد لكن بعدت هاي الفكره
عن بالي سجلته باسم يوسف ورحنا الى مكان بعدها حصلنا على سكن لان باعتبار احنا عائله

انا طلبت سكن مستقل وكانت اكو اجراءات صحيح اخذت وقت لكن كانت اجراءات حقيقيه بعيده
عن الروتين والتزييف
وصارو ينطونه معونات وهناك الكل منتبه النفسه محد يباوع الك بتكبر الكل يعمل ويكافح ويستغل كل دقيقه
بعمره حتى ينجز هناك النظام بكل شي هو السائد
النظام بحياتك وبالطريق وبعملك

كل هاي الفتره اخذت تقريبا اسبوعين وبعد ان استقريت صار لازم اخابر يوسف وجهاد
ارتأيت اخابر جهاد واطمنه واعرف منه الاخبار خصوصا وانا لحد هاي اللحظه اصرف من الفلوس الي خلاهن الي
مجرد ما رن التلفون جاوبني وكانه منتظرني وكال بعتب ما اعرف شلون عرف رقمي
- هسه ياالله اتصلتي وين چنتي

ما عرفت شنو اجاوبه بقيت ما تنسمع بس انفاسي كلي
- مروه شلونج گليلي بالي مشغول وروحي فارغه راح اتخبل
اخذت شهيق وزفير وگتله = الحمد لله انا زينه ومحمد بخير وبديت استقر
- - يعني ما گدرتي من وصلتي تخابريني وتطمنيني عليج

بقيت ساكته ومتحيره شجاوب هذا الانسان الي ما اعرف شوصفه معقوله بهذا وكتنا اكو هيج بشر
(يمكن موجود لكن اختياراتنا هي الخطأ )
جاوبته =انت اول شخص اتصل بي
حسيت بي فرح صار يسالني //وين ساكنه ومنو جيرانج
ابتسمت على سؤاله (هذا طبع العراقي غيرته حاضره )

جاوبته =لا يظل بالك اهنا كل دقيقه بحسابها راح اسجل ابني بحضانه قريبه وانا اسجل معهد لغات واحاول
ادور على شغل
احس بي انتفض من مكانه // لا تدورين على شغل انا احولج شگد ما تردين
جاوبته باستهزاء = جهاد تره انا بالخارج مو بالعراق
- - لا تفهميني غلط اريدچ ترتاحيين وتنسيين كل الي مريتي بي وتفكرين بهدوء وتتخذين قراراتج
=شنو قصدك

- اريدچ ( اتحسر ) اريدج تكملين دراسه
= اخواني شلونهم
- امين ضايج لان تلفونج مغلق
ما حبيت ادخل بالتفاصيل گتله = جهاد اتمنى تفهمني
- خير مروه
= كل الخير انت ما قصرت وياي وانا ابقى طوول عمري مديونه الك بحياتي وحياة ابني واريد اطلب منك طلب اخير

- - وانا حاضر شنو الطلب
جريت نفس =جهاد اريدك تشوف حياتك تتزوج وتبني اسره وتنسى كل حزنك وقهرك لان انا عمري ما چنت الك
ولا راح اكون ولان انت تستاهل الاحسن مني
هو ما عقب بهذا الموضوع بس گلي  //انطيني عنوانج ورقم البريد او شيسمونه وانا احولج

سد الخط وياي وعاتبت نفسي ليش هيج حچيت جهاد ما يستاهل الواحد اياذي
صار جوابي ما اريده يبني آمال من الصعب ان تتحقق
انا بعيده وجهاد عنده بيته وشغله ما معقوله يترك كل شي ورا ويلحگني مستحييل وهم انا مستحييل بعد ارجع
بعدها اتصلت بيوسف رد

الو
اشلونك ابو محمد
جاوب بعصبيه ::  وج مروه شسويتي بيه ...
ما خليته يكمل سالته = يمته تطلگني
جر نفس وكال :: مروه للمره الاخيره اعرف جنت حقير وياج وانا معترف بذنبي اذا تحبين اجي وراج واترك
كل شي واذا تردين ارجعي بالشروط الي انتي تخليها بس لا تحرميني منج ومن ابني

جريت نفس وجاوبته =لا ما ارجع ولا اريدك انت تجي وراي طلكني وصورلي نسخه وبس اشوف النسخه
راح احچي ويه اهلي وانت تخابرهم وتفهمهم كل الي اتفقنا علي
:: وابني مروه ليش تحرمينه من ابو
= ابنك انت اختاريت تاخذه مني وتحرمني اشوفه وانا انهزمت بي حتى يعيش بسلام شنو تتصور من تخلي
ابني عندي تتصور امك ومرتك راح يسكتن لا راح يهجمن بيت اختي وبيتي

جاوبني ::انا طلكت ضحى وتركت البيت
اتنفست = هذا قرارك وبكيفك هسه لازم تطلگ بس بالبدايه تنطي خبر الاهلي وانا احجي وياهم
:: بس حرام هذا الي تسوينه بيه
= انت جبرتني هيج اسوي وروح اسال وشوف الحرام عليمن عليه لو عليك واطمن انا مو مثلك حتى اهنا سجلت
ابنك باسمك وما راح اخلي اينكرك لان انا اخاف الله ولو ما اخاف الله چان فضحتك كدام الناس لكن ما ردت ابني
يعيش وانا من اباوعله اتذكر سوايت ابو وعمته

بقى يتوسلي ويحلفني لكن انا قطعت كل امل وكتله
= طلگني يوسف وشوف حياتك
::فكري مروه

= طلكني ابو محمد وصورلي الورقه وبعدها  احجي ويه اهلي حتى انا افهمهم واتذكر هو مو تهديد لكن احچي
ضميرك الي جبرني اسوي هالشكل
تصرفاتك وضعفك وانا ما اگدر اجاريك وما اگدر افضحك مو محبه بيك لا بس معزه بابني لان راح تصير كعده
وشيوخ وناس تتقول وتزيد وتكثر وبعدها يجبروني لازم انطيك ابني وحتى لو خلو عندي بيوم وبسنه راح يسمع
كل سلبياتك ويعرف تصرف اختك الدنئ وراح يكرهك وابد ما يسامحك انا اخذت ابني حتى اجنبك نظرته الك من يكبر
:: بس انتي حرمتيني منه من يكبر ما راح يعرفني

= اقلها راح اسولف اله على اب طيب ويحبه مو اب ظالم ما يخاف الله

::حقج مروه بكل الي گلتي بس شي واحد لازم تفهمينه انو انا احبج مو لان انتي ام ابني لا انا احبچ لان انتي مروه
واعرف ابني عندچ راح يعيش مرتاح وما راح تتخلين عنه مثل ما انا سويت صدگيني مروه احبچ وما راح احب
احد غيرچ
= فات الاوان يوسف شوف حياتك واستقر واتخلص من سلبيتك الحياة تستحق نعيشها وبايدنا نكون سعداء او تعساء
لان ما كو شي يبقى على حاله

هو جر نفس وگلي :: كلامج صحيح اليوم راح اطلگج وبعدها اتصل بامين وانتي وديري بالج على نفسج

عجيبه هاي الدنيا وعجيبه هاي الناس يعرفون باخطاءهم ويردون ايصححوها لكن بعد ان يكون كل شي انتهى
وصار ماكو معنى الوجودهم بحياة الاشخاص الي غلطو بحقهم
كان ممكن نغفر ونتعايش واحنه راضيين بكل شي وقانعيين لكن نريد احد يحسسنه بوجودنا وانسانيتنا

وصار لازم ابلغ امين وهنا رغم انو انا بعيده ملايين الاميال لكن بنفسي خوف وخجل من الي سويته ارتأيت اكتب اله
وادز صوري انا وابني واطلب من الكل ايسامحني

/////////////////////////////////////////////
امين
هاي الايام كلش عليه ضغط وبالي مشغول اتصل بمروه والجهاز مغلق ما اعرف شنو صاير وياها
ومنا زوجتي دائما توكع بسبب الحمل ومن طبيب الطبيب وتنام بالمستشفى
وطلايب ابوي الي ما تخلص والناس الي يطلبونه فلوس يوميه مغيرين رايهم وجهاد الي سافر واحس بي عنده شي
مو طبيعي وحتى من رجع اشوفه ضايج ومهموم
چنت بالمحل واجه عليه جهاد وسألني

- شبيك امين اشوفك ضايج
باوعتله // وانت  هم جهاد ما اعرف شصايرلك
اتنفس ورد عليه // ما بيه شي
- - اذا ما بيك شي انا هم ما بيه شي
باوعلي بتساؤل هزيت راسي وانا اكله //انت من اجيت وسالتني لان مبين عليه عندي هم وضايج وانت لان انا اعرفك
هم عندك هم وضايج
هز راسه // صحيح
- - اي وشبيك

اتنفس واشوف بعيونه كلام بعدها گال // شفت امي
استغربت // شنو ؟
هز راسه // اي مثل ما اكلك رحت شفتها
-شعجب ؟
- - ما اعرف رجليه اخذني البيتها وشفتها
- - وهي
- هي شبيها ؟
- - اقصد شنو رد فعلها

باوعلي وابتسم // تصدك لو اكلك
- - لاتكلي اخذتك بالاحضان وصارت تبجي
هز راسه // اي هو هذا الصار
- - لا باالله
- وداعتك
-يعني سامحتك ؟
هز راسه //  ايي وكاتبتلي بيت باسمي اقصد واهبته الي

- - حلو حست بغلطتها احسن من العدنا
باوعلي // شتقصد
جريت نفس // اقصد ابوي الي كل ما يكبر مشاكله تكبر ويا عبالك مراهق
جاوبني // الله يساعدك
- - هذا هو جهاد بعد ليش ضايج
- - چنت اتمنى الحب والعطف واهبته الي  والاختي ورائفه بحال ابوي

سالته // يعني ما سامحتها ؟
- - والله ما اعرف
جاوبته بحده // لا تعرف تبقى امك
باوعلي وسالني //  وانت امين شبيك
جريت نفس وكتله//  مشغول بالي
- شكو ياستار

- جاي اتصل بمروه هاي اكثر من اسبوعين وهي ماكو
- تحچي صدك
- - اي وداعتك اتصل وماكو
- - يعني شنو
- - يعني يااما زوجها لگى النقال او عطل

جهاد جر نفس /. اطمن امين لو زوجها لاگي النقال اكيد راح يسويها قضيه ويتصل بسالم بس اكيد عاطل ولازم
تاخذ الها نقال جديد بس المشكله شلون توصله
هزيت راسي // اي هي اهنا المشكله
- - لا تضوج امين لو صاير وياها شي اكيد زوجها يخبرنا او يخابر سالم ويفهمه

- - هم صحيح من يروح سالم البغداد اخلي سماح تروح ويا واشتريلها جهاز توصله الها
جهاد //اي مثل ما تكول

بعدها بايام چانت زوجتي توها طالعه من المستشفى وامها يمها تداريها لان زينب سادس وما اريد اي شي يشغلها
عن دراستها
سماح جانت تجي تغسل ملابسنا واذا تلحك تطبخ الغدا وترجع البيتها ما تتعطل وانا ما چنت الح عليها
فااكثر اكلنه اجيبه جاهز ما احب اتعب احد او احمله فوك طاقته

چنه كاعدين بالصاله وصادق طالع لمن ما اتصل سالم وسالني // انت وين
جاوبته// بالبيت
سالم // جايك
- هلا بيك ابو احمد بيتك

طلبت من علي يسوي چاي واجه سالم اشوفه مو على بعضه جاب علي الماي والچاي وسالم گلي
- - رايدك ابحدنا عدي شغله وياك
طلع علي وسد الباب ورا  باوعت  وگتله // اتفضل ابو احمد خير مو على بعضك
بقى ساكت سالته // شنو سالم متعارك انت وسماح
سالم مو طبيعي // لا ما اتعارك انا ويه سماح ما مسويتلي شي

هزيت راسي وابتسمت // زين الحمد  لله هسه فهمني شنو القضيه قلقتني
اتحسر سالم وصار يسوي بحلگه حركات تدل على القلق ويمكن الخوف انا باوعتله وحركت عيوني وايدي
يعني شصاير
سالم حك ذقنه وكلي // امين توه خابرني يوسف
من شفت قلق سالم وسمعت اسم يوسف ما اعرف ليش حسيت بالخوف سالته
- سالم وضح شكو شصاير ؟

سالم // ان شالله ما صاير الا الخير
- - اي شبي يوسف وانت ليش مرتبك
- - امين يوسف خابرني وگال چان مسافر هو ومروه
قاطعته باستغراب // مسافر وين
- - مسافرين التركيا ومناك ...
- - ليش سكتت كمل

- - امين اترجاك تهدا وتفتهم الكلام
انا وكفت وحچيت بنتر // اي كوول ياخي
سالم // على كيفك امين اكعد وافتهم القصه
گعدني سالم // ياالله كعدت فهمني
- - يوسف اخذ مروه ومحمد وسافرو التركيا ومناك على اساس يهاجرون

جاوبته // ايهاجرون وليش
رفع اجتافه // ما اعرف حتى انا اتفاجات مثلك
ايي
——- لكن يوسف بطل وقرر يرجع ومروه ما قبلت ترجع
- - شنو قصدك ؟

  —— يوسف يكول مروه بقت بتركيا وقررت تاخذ ابنها وتهاجر
نهضت من مكاني وانا ارجف او وجهي نار تطلع منه سالت سالم بعصبيه وهو وكف
- - مروه هسه وين
سالم جاوبني // امين افتهم ...
——- شفتهم اليوم احرك الدنيا على يوسف

- - امين على كيفك
- - شنو على كيفي غير اطلع بروحه الهذا النذل اريد اختي من عيونه الله يعلم شمسوي بيها ويكول مسافره عليمن
يضحك ابن الكلب
سالم // اهدا امين وافتهم
- اهدا تكولها بكل برود  (اهنا رن التلفون ) شفته رقم دولي ما لحكت اجاوب واشوف اجتني رسائل ع الواتس فتحتها
وشفت صور مروه هي وابنها وهي راكبه بالقارب وهي بالمدينه الي ساكنه بيها

رجعت اتصلت مره ثانيه جاوبتها
- - مروه شنو هذا الي سويتي هسه ترجعين
= امين انا هاجرت وبعد ما ارجع اريد اربي ابني
- - انعل ابو ابنج اسمعيني مروه الحگج واجيبچ لو تطيرين
= امين  انا ما سويت شي غلط بالبدايه يوسف گال نهاجر وهناك نستقر اشو وصلنه تركيا گال ما اكدر
اترك اهلي انا ما قبلت شفتها فرصه اتخلص منه ومن ظلمه 

—— اسمعيني مروه ... قاطعتني
=  امين انت اسمعني هاي الفرصه الي اجتني وانا استغليتها
    —— بشنو استغليتيها تهاجرين بدون ما نعرف
   = اي يوسف بالبدايه كال انهاجر ونبدي صفحه جديده ومناك اخو يدبرله سكن وشغل بس من وصلنه بدل رايه
   ومن كلي ترجعيين انا نا قبلت وكتله انت ترجع ابحدك حاول يجبرني ارجع ويا گتله اشتكي عليك
= امين انا مليت من سجن يوسف ومن عذابه  وما اريدكم تتصادمون ويا انتم كل واحد ملتهي بنفسه
وبمشاكله وهذا حقكم وانا اجتني فرصه اعيش ويه ابني بسلام وهذا حقي

جاوبتها بعصبيه //كل هذا الكلام ما اشتري بفلس ترجعين وغصبن ما عليج
جرت نفس واتحسرت = انت هم امين تكلي غصبن ما عليه ليش انا شنو سويته بارادتي وانا قابله بي كل شي
صار بيه غصبن عليه بطلت غصبن عليه وانخطبت الجمال غصبن عليه وانطيتوني فصليه غصبن عليه
وما شفت امي غصبن عليه وهسه تريدني ارجع غصبن عليه
  = اسفه خويه هاي اول مره راح ما اسمع كلامك واسوي شي انا رايدته مع السلامه

غلقت الخط وانا متفاجئ  واحجي ويه نفسي // معقوله هاي مروه هيچ تحچي وهيچ تتصرف
اتصلت بيوسف رد عليه
::الو
جاوبته بعصبيه // اسمع ولك اريد اختي من عيونك وابنك الك مسالة تگلي اختك راحت وما قبلت ترجع هاي
لا تسولفها عليه الك تلث تيام الكى اختي مزروعه كدامي اهنا لو صدگ ما راح تشوف خير

وسديته من يوسف وانا احس بريكي نشف سالم اتقرب وكلي
- - امين اختك شنو گالتلك
جاوبته بنفس العصبيه // اسمع سالم تفهم ابن عمك اختنا نريدها انطيناها فصليه وجابت ولد ياخذ الولد ويرجعها
سالم // على كيفك امين اختك راحت وابنها وياها وهسه هي حاجتك بعد يوسف ما ينحق
رفعت حواجبي // ها هيج تشوف ما ينحق بس انتو حقيتونا لان بتكم ويه ابن عمنا

ما خليته يرد // اسمع سالم هنه يومين راح اسكت وبعدها راح تشوفون شي ما محتسبين علي
سالم طلع بدون ما يرد عليه بقيت اروح وارجع بالديوان وانا اكول
——معقوله كل هذا الشي يطلع منج مروه ما فكرتي بينا شلون هيج تسووين ومنو يستاهل تسوين
كل هالشي على موده

بقيت متوتر وما اعرف شلون اتصرف اجه صادق لان حسيت اباب الصاله انفتح باوعتله هو اجه من شافني كلي
- خابرتك مروه ؟
انا استغربت ورفعت حواجبي هو كلي // هي خابرتني
- - ها وفهمتك هي وين
هز راسه // اي فهمتني
- - اشو اشوفك ولا مهتم
صادق // اختك مو زغيره وتعرف تتصرف

اتنفست قوي // والله انا جان اكثر خوفي منك كلت بس تسمع تركب سيارتك وتروح كبل على
يوسف اتكتله وترجع
صادق جاوبني // شبيك امين تره مر...
قاطعته // تسأل شبيه اختك هاجرت بدون ما نعرف ودوله اجنبيه هاجرت بعد ان تركت رجلها تعرف شنو
تعرف شراح يصير

صادق بعدم مبالاة // ما يصير شي واذا عنده كلمه يحچيها
- - اشوفك متاكد
هز راسه // اي اختك اكدتلي يوسف ما راح يفك حلكه بكلمه
جاوبته // صحيح اختي بس انا اما انت انت صادق من اول ما ردت تخطب اتبدلت وصرت ما تهتم
بس النفسك والدليل انت تكول اختك يعني هي ما تعنيلك شي وكل الي صار عندك عادي

- - امين خليها تشوف حياتها ولا تخاف عليها شنو ما تعرفها المروه
هزيت راسي // لا اعرفها واعرفها كلش زين وهم چنت اعرفك

خليت صادق بالديوان وانا طلعت رحت للغرفه الي بيها علي شفته نايم وانا اتمددت بالكاع وصرت افكر بمروه
وليش هالشكل سوت ويوسف ليش سكت المفروض هسه هو الي يكلب الدنيا
ما اگللكم ما غفيت لكن ثواني اغفه وافز وانا ما اعرف شلون راح اتصرف

الفجر صليت وطلعت وبنفس اللحظه تلاكيت ويه جهاد والظاهر هو هم ما نايم لان مبين علي التعب

///////////////////////////////////////يتبع