رواية بعد فوات الأوان الفصل الحادي وثلاثون 31 - بقلم آنين الليل

هذا البارت ناار 🔥🔥
استعدوا للقراءه
🏃🏻‍♀️🏃🏃🏃🏃🏃🏻‍♀️🏃🏻‍♀️🏃🏻‍♀️
////////////////
مروه
بعد ان قررسالم ينتقل للبصره سماح ما وافقت بالعكس صارت تبچي لان هي بين نارين ما تگدر
تتركني ابحدي وهاي فرصه ما لازم اتضيعها ان تبتعد عن ام يوسف واخت سالم وحقدهن عليها
وهناك تبقى تشوف اخواني وزينب

واكيد بمرور الوقت راح تنزال كل الحواجز والمشكله اكيد راح تنتهي
انا شجعت سماح وفهمتها هاي فرصة عمرها ولازم ما تفرط  بيها واذا ضيعتها راح تندم طوول حياتها
سماح انسانه شفافه ردت عليه //الندم مو بقاموسي اذا ما عجبني اتطلك
= لا سماح يجوز قبل اي ممكن تتطلگين لكن هسه بوجود ابنج صعبه

سماح وهي تمسح بدموعها // الاصعب اني افارگج مروه
جاوبتها بابتسامه حزينه = ليش انتي ما مفارگتني لو ما ولادتج وسفر سالم ما چان احلم اشوفج
روحي حبيبتي وعيشي حياتج وربي ابنج
- - وانتي مروه
= انا لاتخافيين عليه ادبر اموري

- -الى متى
= يصير الها حل اكيد
سماح رفعت ايدها بالدعاء //يارب مروه راح اشيل وانا كل بالي يمج
اتقربت عليها وحضنتها = لا تشغليين بالج انا اعرف اتصرف

سالم خابر يوسف حتى يجي يرجعني للحقل لكن يوسف اعتذر وگله عنده شغل انت وصلها واجت وياي
سماح وبالطريق نزل سالم اتسوك
وصلوني للبيت وانا وسماح ما بطلنه بواچي حتى محمد من شافني ابچي صار يبچي وياي
اتوادعنا انا واختي واعرف بعد ما راح اشوفها لكن راحتها وسعادتها اهم من انانيتي بحيث
سماح صارت تشهك
وتگول // ياربي رحمتك ياآلهي احنه شمسوين

انا هدئت سماح وفهمتها اكيد راح تتغير حياتي بس يرادلها صبر وهيه حاولت تعرف مني شنو سبب برودي وسكوتي
وجاوبتها لان ما عندي اي حل ثاني
لكن هيه متخوفه من تصرفاتي

اتوادعنا انا واختي واعرف هاي اخر مره اشوف بيها سماح
بقيت بالبيت وثاني يوم گعدت من الفجر اتريگت وريگت حمودي ونظفت الغرفه واخذت ابني ورحت
للگاع احش چنت حاسه انو هناك عيون تراقبني واعرف بي هذا سجاد لكن شيريد مني چنت ارجع وادخل
واسد الباب اسرگي اخاف يصير شي

عرفت انو بشير طلع من الفجر عنده شغل وطلعت احش ومحمد مگعدته بعربانته حسيت بي اجه
وراي باوعتله هو سلم عليه // اشلونج مروه
جاوبته وانا لازمه المنجل  = الي گلك اسمي ما گلك يسموني  ام محمد احترام الي
هو ابتسم //ردي السلام اول مره
= عليكم السلام شرايد
- - اجيت اشوف اذا انتي محتاجه شي

رديت بنتر = لا شكرا ما محتاجه
- - العفو بالخدمه
درت وجهي ورحت اكمل حش البرسيم درت شفته بعده  واگف مشيت مسافه وگتله
= سجاد
اتفاجأ وجاوبني // عيونه

= اتمنى بعد ما توگف  اهنا حفاظا على كرامتي لان الي يشوفك راح يتقول واتصور انت تعرف وضعي
هو ما جاوبني دنك على محمد وباسه وراح وانا بقيت احش وافكر واحچي ويه نفسي = هذا شيريد مني

رجعت وره الظهر غسلت الحمودي وانا هم سبحت وحميتلي غدا واكلت بالليل اجت عليه ام بشير
وجابتلي علاكه بيها حلويات وگعدت يمي نص ساعه  وعرفت من خلال كلامها انو بشير ماخذ زوجته
وجهاله ورايحين الاهلها يباتون وباقيه بس هي وسجاد

بعدها استاذنت وراحت لان تعبانه وتريد تنام انا قفلت الباب وسرگيته وفتحت العلاگه اخلي الحلويات
بالثلاجه فرغتهن وشفت ورقه فتحتها لگيتها من سجاد كاتبلي بيها

- - مروه اطلعي وره البيت لازم احچي وياچ واذا ما طلعتي صدگي الصبح تلگيني يمج بالحقل والي يصير يصير

من قريت الورقه ما اهتمييت ولاخفت وقررت اطلع اريد اشوف شيريد مني نيمت ابني ودخلت للمطبخ
اخذت سچين تحسبا لان انا بصراحه احس گلبي مات وانتهى طلعت بره ودرت وره الغرفه وهو اجه وگال

- - انا اسف واعتذر لكن ما گدرت اتحمل
جاوبته بنتر = ما اريد اسمع مثاليات وتملق گلي شتريد
جاوب // مروه احبج
من سمعت كلامه رديت بعصبيه = ياحقير انت شتگول ما تستحي ما تخاف من الله ما...

هو قاطعني //لا لا تفهميني غلط انا الي استحي وانا الي اخاف من الله مروه انا احبج مو اليوم من زمان من اول ما
امي سولفت عنج وعن ضيمج وصبرج وانا افكر بيج وباخلاقج وايثارج وخوفج على اخوانج واحترامج الزوجج الي
ما حاسبج زوجه وانما جاريه ومنطي النفسه العذر تحت مسمى الفصليه احبج وحبچ يوم عن يوم يكبر صدگيني اگدر
احصل الف شغل غير هالشغل بس لان انتي ما ترحين عن بالي ولان انا اريد اساعدج

رفعت ايدي = كافي لا تكمل وروح وبعد لا تفكر تشوفني راح اسكت احتراما للخبز والملح الي اكلنا انا وامك
ومرت اخوك ولان امك طيبه وتعبت وياي وعاملتني مثل بتها واخوك انسان شريف راح اسكت وما احچي بس
بعد ما اشوفك ولاتفكر بلحظه تشوفني

جاوبني وهو يحرك بايده //اوگفي افهمي شنو اريد وبعدين كل شي تردينه يجرالج
= ما اريد اسمع صوتك
درت وجهي هو گلي // مروه لاتخليني الزمج واجبرج تسمعيني
من سمعت كلمته رغم بايدي سچين درت  سالته = شتريد تكول

جر نفس وگال // انا اعرف بيچ متاذيه وحامله كل شي بالبدايه الخاطر اخوتج وهسه الخاطر ابنج مروه الي
اريده منج تتطلگين وانا اقسم الج بشرفي بس تكمل العده اخطبج واتزوجج واجيبج اهنا بهاي المحافظه حتى تكونين
قريبه على ابنج واذا ما قبل ادز ناس علي وراح اعيشج احسن عيشه وانسيج كل الضيم والقهر الي مريتي بي واعيشج
بسعاده  واذا ما تردين نبقى بالعراق انهاجر وهناك تدرسين وانا اشتغل بشهادتي

اتنفس قوي // هسه لا تجاوبيني اخذي وكتج ومن اتقررين انا راح احترم قرارج حتى لو كان موتي
اي انا اموت او ابقى جسد بلا رووح اذا رفضتي لكن راح احترم قرارج اما اذا وافقتي صدگيني اول
شي ما راح تندمين وثاني شي راح اكون اسعد انسان بالدنيا رجاءا اخر طلب لا تجاوبيين هسه اخذي وكتج

عضيت شفتي = شوف سجاد اجيت بس حتى ما اشوفك بالحقل بس هسه نهائيا ما اريد اشوفك وراح احاول انسى
كل الي بدر منك الخاطر امك
درت وجهي ورحت للبيت هو گلي // وهذا الشي ما يمنعج تفكرين وتوزنيين الامور

دخلت للغرفه وانا ارجف اتمددت وصرت افكر بكلامه واكول
= معقول هذا يحبني لو عباله انا سلعه رخيصه وممكن يحصل عليه
ايخسى اي والله ايخسى النذل الحقير

درت على صفحتي وانا افكر بكلامه = معقوله ولد مهندس مثله والحياة كدامه يحبني ويفكر اتطلك ويرتبط بيه
حضنت محمد وشميته حييل = وانا من كل وعقله اعوف محمد واصير انانيه اتطلك واتزوج هذا يااما مخبل
او عديم شرف وبالحالتين لازم اخليله حل

بليلتها ما نمت وانا افكر وانطي اعذار النفسي وحتى السجاد اي لا تتعجبون لان احنه بشر مو ملائكه
صرت مره اسب بسجاد ومره افكر بكلامه وبحياتي الي ما عرفت منها شي

الصبح طلعت للحقل وما شفت سجاد ومن رجعت شفته واكف وبس شافني دخل للبيت
وره اربع تيام اجت عليه ام بشير وهي تكلي //اليوم بشير راح حتى يجيب زوجته من اهلها وهناك راح ايبات
والصبح يجوون

وعرفت سجاد باقي يم امه الي گعدت يمي شويه وراحت وانا طلعت ولگيت سجاد گاعد وره الغرفه يعني منتظرني
بس شافني وگف
باوعتله وسالته = انت تحبني
- - اموت عليج
= ليش حبيتني ؟
- - لان احس بيج انتي شي نادر
= نادر يعني مستحييل الحصول عليه مو

هز راسه //اي فعلا انتي جوهره من الصعب احد يحصلج اله اليستاهلج
جريت نفس = شوف سجاد انا لا شي نادر ولا جوهره ولا اي شي انا انسانه عندي عواطف واحاسيس
وظروفي جبرتني اعيش هيج عيشه واحتمال تتغير عيشتي بس انا الي اغيرها
هو رد //وليش مو انا وياج
= لان صعبه

- - لا والله مو صعبه احبج وشنو تردين بس گولي
= شوف سجاد قبل ما اجاوبك شنو اريد احب اگلك شي يمكن لو اي احد يشوف تصرفك يكول هذا مو خوش انسان
واذا فرضا يوسف شافك راح ايكتلك ويكتلني بس انت انسان شريف لان ما اتجاوزت حدودك وياي
انت انسان ابالك شي وردت اتوصله الي يمكن انقهرت يمكن حنيت عليه ورافت بحالي

هو رد عليه // لا لا مروه انا الله يشهد غايتي وياج شريفه
=يجوز سجاد لكن التوقيت غلط ولازم تعرف انو الي نسوي هسه حرام وعيب لكن انا حبيت اوصلك ردي
انا اريد ابني يبقى رافع راسه بيه ولا فد يوم احد يوگفله ويعيره انو امك تركتك لان فصليه لان ملت من عيشتها
ورادت ترتاح على حسابك سجاد انا اشكرك واحب اگلك انت انسان طيب وتمتلك عاطفه  ولازم تعرف انو نت
شاب والحياة گدامك طويله الله يسعدك

راد يحجي انا كملت كلامي = وانا هم الحياة گدامي لكن الحياة الي انا اختاريتها
سجاد // بس انتي اختاريتي عذابج وهاي مو تضحيه
هزيت راسي = يجوز لكن انا ام مثل ما امي وام بشير امهات وغيرهن ملايين الله يخليك انسى كل كلمه وكل تفكير
بيه فكر بمستقبلك وبنفسك
اتحسر وسكت وبعدين گال //  تدرين يوم عن يوم احترمج اكثر صدگيني مروه انا حبيتج وحبيتج هوااي يمكن حب
مراهق او حب طفل او يمكن حب رجال اربعيني عايش ابحده لكن هسه احترمتج اكثر من ما احبج

اتنفس قوي وگلي // جنت اتمنى اساعدج وانتي حبيبتي
جاوبته = لا ساعدني وانا اختك
عض اصبعه وهز راسه // صعب لكن يمته ما تطلبيني تلگيني وابد ابد لا تترددين صدگيني رگبتي ترخصلج
= اشكرك سجاد انا اروح واتمنى هذا الشي ما يتكرر

اتنفس قوي // مروه رقمي بنقال امي اذا احتاجيتي اي شي لا تترددين اتطلبينه مني الله يسعدج ويخليلج ابنج
بس يامروه عندي طلب يمج
باوعتله هو گال // حاولي تغيرين حياتج بالفعل مو بالكلام
ما رديت علي لان دموعي سبقني درت وجهي ورحت وانا اگول بيني وبين نفسي
= يمكن لو ما جمال والي سووا هسه حياتي غير ويه ناس يجوز احسن وهم يجوز اسوا

ثاني يوم طلعت للحقل وانا مهمومه ومقهوره اما سجاد عرفت انو مجرد ما وصل بشير راح يم اخوانه
صرت افكر شلون ممكن اغير حياتي شلون وانا بهذا السجن وما كو گدامي اله خيار مر علقم امر من هاي العيشه
وهو لازم اتطلك واتخلى عن ابني ابني الي كل شي اتحملت الخاطره صرت ليل ونهار افكر لازم انهي علاقتي
ويه يوسف ولازم اطلع باقل الخسائر لان يوسف ظلمني لا يوسف حطمني وكتل بيه كل شي حلو

وبعد عشر تيام من كلامي ويه سجاد صار شي غير حياتي اكثر  من الف درجه ويمكن هالمره القدر راح يساعدني
لكن بشرط استغل الفرصه واترك عواطفي جانبا وافكر بنفسي وابني بس

//////////////////////////////////////
يوسف
لمن ضحى اجت وراي للغرفه وطلبت مني ان اطلك مروه واسجل محمد باسمها انا ما جاوبتها هي سالتني
- - يوسف سمعتني ؟
اتظاهرت باني منسجم ويه التلفزيون صارت گدامي وگالت //ليش ما ترد سمعتني
باوعت الها واهز براسي :: شكو ؟

ضحى // ها يعني ولا چنت وياي
درت على صفحتي وگتلها :: حبيبتي طفي الضوه تعبان اريد انام
جاوبتني // بس لازم تسم...
قاطعتها :: ضحى باچر وراي دوام طفي الضوه واسكتي

بيها طبع ضحى اذا شافتني عصبي تسكت وانا بوكتها لو بيدي اكسر راسها واطيح حضها الحقيره لكن
هالمره صدك اتفاجأت لان شفتها تحچي بثقه ومسيطره
درت وجهي عنها واعرف بيها هي ما نايمه  ولا حتى. انا بعدين غفينا وكل واحد بينا ايفكر بشي وخايف من شي
ثاني يوم عفتها نايمه چان يوم خميس  وگعدت بدلت وطلعت للدوام بيومها ضايج كلش وما الي خلك نفسي

تقريبا الساعه عشره خابرني بشير وراد يشوفني ومن عرف انا بالدوام كلي راح ايمر عليه اتفاجأت لان هاي
اول مره يجيني اهنا للدائره من وصل وگعد سالته
:: خيير ابو بهاء ليش جايني شنو صاير ؟
هو گلي // ماكو شي بس صادف عندي شغل ومريت
:: هلا بيك بس اكيد اكو سبب
بشير // هو اكو سبب عادي بس كلت اخلي عندك علم

حمحمت :: وانا اسمعك
مد ايده على جيبه وطلع فلوس انطاني اياهن //بالبدايه هاك هاي بيعه وحصلنه بيها خير من الله
:: الحمد لله ومشكور وما قصرت
- -تره هذا حصتك من الربح وراس المال اشتريت بي عجول زغار
:: وانت اخذت حقك
هز راسه // اي الحمد لله اخذته

:: وبعد
هو يفرك براحة ادينه ومبين خجلان // والله ابو محمد هو شي ما ينذكر بس انا گلت ابلغك الوالده ...وسكت
جاوبته :: امك ؟
رفع راسه وگال // لا والدتك
استغربت سالته :: شبيها ؟
- - ما بيها بس الخير الصراحه يوميه تتصل بامي وتسالها عنك

:: هاا
هز راسه // اي وداعتك تسالها اجه شگد بقى وهم راح للفصليه
:: من يمته هذا الحچي
بشير //. الصراحه من زمان بس هاي شهرين يوميه تتصل ومن خابرتني اجيك للبيت او.وصيتني
ما تريد احد يعرف انا اجي للحقل هم وصيت امي وزوجتي واجيت اگلك لان الحجيه جاي تضغط على
امي وتگلها لا تضميين عليه

اضطريت ابتسم بوجه بشير گتله :: انت تدري بالي صار بينا وانا حسبتك مثل اخوي ما ضميت عليك شي
بشير // اي اعرف
:: امي حقها مقهوره من الصار لذلك هي تكره ام محمد
بشير // هم ادري وامي اكدت الها انو انت ما صرت تجي مثل قبل وحتى لو تجي تبقى ساعه يمي وهي تروح
تجيبلك محمد اتشوفه بس حست انو امك ما مقتنعه لان اول امس الحجيه گالت الها اذا ادري تچذبين عليه راح ازعل
منج وامي ضاجت لان حست بكلامها تهديد فامي حچت وياها وكالت الها

- - شوفي ام يوسف احنا مو حراس على ابنچ ومرته احنه ناس جايين نشتغل
:: حقك وحق امك عليه وامسحها بوجهي انت اخوي وتعرف بيه وين اروح او وين اجي اكثر من بسام
بشير // وانت صاحب فضل عليه
:: لا اي فضل ما بيناتنا رجال تشتغل بتعبك وامي مره چبيره واريدك تمسح كلامها بوجهي

بشير ابتسم // ما صار شي ابو محمد بس حبيت اخلي عندك علم
:: آسف واعتذر ابو بهاء وحق خالتي ام بشير عليه
بشير وكف وسلم عليه وگال // ما بيناتنا ابو محمد ولا يهمك

  راح بشير وبقيت الدوام كله ما اعرف شسوي اتضحت الامور اليه اريد اعرف الوين يردن يوصلن
صرت اخاف فعلا ايجددن السحر وهالمره خوفي على مروه ومحمد مو على نفسي
الصراحه خجلت من نفسي ومن كل الناس الي تعرفني لان الي ماذيتني اقرب الناس الي امي وزوجتي الي لازم
تكون سندي
رجعت للبيت وانا غادي نار تحرك كل شي كدامها دخلت للبيت بدون ما ادخل سيارتي للگراج لكيت امي وضحى
كاعدات بالصلله دخلت سلمت :: السلام عليكم

امي ردت وضحى متنكه گعدت امي كالت الضحى // روحي صبي غدا
:: ما اشتهي
امي // وليش ما تشتهي
:: هيچ ماكل بالدوام
ضحى بنتر // تره صار اكثر من شهر ما تاكل اهنا
ما جاوبتها وباوعت الامي وسالتها :: يمه انتي مخابره ام بشير

امي باوعت الضحى وكالت // شني يوسف
:: يمه انتي مخابره ام بشير لو لا
- - ايي ذاك اليوم من اتعطلت ضحى وانا ظل بالنا وخابرتها سالت عنك
هزيت راسي ::ها ذاك اليوم وامس وقبله وقبل شهر وقبل شهرين وذاك الاسبوع او...
قاطعتني وهي تحرك ايدها // على كيفك شنو جاي حامي علينه

:: هاا على كيفي بس من تزغريني گدام الناس وتتمسئلين وراي عادي لازم اضحك وافرح
امي // وانت شنو شدعوه جاي مصبر عليه
:: شنو يمه انا طفل جاهل زعطوط گدامج الوين تردين توصلين تره ( وصرت اعيط ) تره ملييت ملييت
افتهمتي لو لا
امي // تكافي جاي مناك تريد بس اتعارك وهذا بشير هو وامه اطردهم وشوفلك واحد ثاني

:: ها اطردهم لان گلولي تره امك تسال عليك وتريد تعرف اجيت للحقل ورحت يم الفصليه وشفت ابنك
الخاطر ربج ما تعبتي بس العتب مو عليج العتب عليه انا شتگولين اكلج تم وصار
طلعت من باب الصاله درت عليهن حچيت بحده :: انا رايح وممنوع احد يتصل عليه
بسام طلع من غرفته // خير يوسف شكو
:: اسال امك وبت خالتك

طلعت وسديت الباب بكل قوتي ركبت سيارتي وانا ضايج ومقهور طلعت على الشارع العام وقررت اروح يم ماهر
لان احس بنفسي اذا ابقى ارتكب جريمه الطريق كله اسوق وانا مقهور ما اعرف بشنو افكر وبس ادخن الطريق
كله مانزلت باستراحه وحتى ماي ماشربت صارت عندي قناعه انو لازم اطلك مروه واخليها تاخذ ابنها وانا
اتزوج واكسر عين ضحى

بس مجرد ما فكرت بان اطلك مروه انقهرت ما اعرف على نفسي ما اعرف عليها

وصلت للبصره ورحت البيت زهره اختي ما حبيت ازاحم ماهر دكيت الباب وطلع ابنها وانا دخلت
واتلگوني كلهم سلمو عليه انا رحت غسلت واتوضيت وصليت وقاسم دز ابنه يجيب عشا انا ما قبلت لان
ما اشتهي   لكن قاسم اصر عليه اكلت شويه مجامله وجابت زهره الجاي بعدها طلبت منها احچي وياها ابحدنا
قاسم // ياالله بابا خلو خالكم يسولف ويه امكم
::  لا قاسم ابقو رايد زهره بكلمه خلي اروح للديوان
رحت وهيه اجت وراي // خيير خويه شكو شصاير

:: يعني تردين اتگليلي انتي ما تعرفين شي ؟
- - شاعرف يوسف
:: شعجب امج ما خابرتج لو بت خالتج ؟
هزت راسها //اي خابرني وافتهمت انت هاد على امي وما مقصر وياها
::  هههههه صرت هاد وما مقصر تدرين زهره انا غبي وما عندي شخصيه
- - ليش يوسف شصاير ياستار ؟

:: ما صار شي بس سمحت الامي تلعب بعواطفي ومن عرفت بيها هي السبب حتى ما اخذ سحر ما سويت شي
زهره // خويه هسه شذكرك بسحر
:: امي امي هي الذكرتني
- شلون ؟

هزيت راسي :: اي امي تدرين زهره لو صاير مثل علاء من ما قبلت تزوجه بت عمي ابو محمد وهو وگف الها
وكال اخذها وشيصير خلي يصير وشهرين وره زواجه وسافر هو ومرته چان هسه انحسبلي الف حساب
زهره // على كيفك يوسف استهدى بالرحمن
اتحسرت ونفخت :: والله مستهدي وتدرين بيه شيطلبن هي وبت اختها جاي اسوي عبالك زعطوط بس امج ما تحس بيه

زهره // لا يوسف امي انت روحها من الدنيا وضحى خطيه تدري بيها شگد تحبك
:: هههه ضحكتيني زهره الي يحب واحد ما يذله ويزغره
- - ما سوت شي امي سالت ام بشير عنك تدري بيها ما تريدك توصل يم الفصليه
باوععت الها :: حتى انتي ؟

- - انا شنو ؟
:: تگولين فصليه
هزت راسها // اي فصليه وعايشه بلگمتها الي سوا ابن عمها محد مسوي
جاوبتها :: وعاشت بلگمتها وجابتلي ولد وتگدر تجيب عشر اولاد وانا تاركها الخاطر امج وبت اختها بروح ابوي
زهره مو گدامج امي كالت اقبلو تاخذون نسوان من اهل جمال
زهره // اي كالت لان خافت تتهور انت وسالم وتكتلون ولد عمه

:: زين خافت علينه ما خافت من الله
باوعتلي // شنو هالحچي هذا يوسف
انتبهت على كلامي جاوبتها :: ما خافت من الله وهي تزغرني گدام الناس
زهره // انا اگلك امي غلطانه بس هي تخاف عليك نسيت اخت مروه مرت سالم شسوت بالعرس وشلون تهمت
امي ومرتك هنه ضارباتها صدگني يوسف امي تحبك وضحى انت روحها من الدنيا
جريت نفس :: وانا هم احب امي وضحى ما ابدلها بنسوان الدنيا

زهره ابتسمت // زين خويه خابر امي
هزيت راسي بالنفي ::لا زهره ما اخابرها وما ارجع للبيت
- - ياا صدك تحجي زعلان
:: ايي زعلان ياالله فيمان الله
- - ادري انت زعلان على امي مو عليه هسه انت وين رايح

:: اروح يم ماهر
- - يوسف خويه سمي بالرحمن وبات يمنا وباجر ارجع امي گلبها مثل النار
هزيت راسي :: ابد ولا ارجع ومروه راح اطلكها بس رجعه ما ارجع لو شيصير

طلعت سلمت على قاسم واولادهم وانا ااعرف زهره راح تخابر امي وبليلتها رحت للفندق ما حبيت ازاحم ماهر
الصبح گعدت واتريكت وخابرت ماهر الي زعل وظل يحچي وگلي تجي تجيب سيارتك تخليها بالمعمل ونروح للفاو
عازمك على سمج ع البحر
رحت  وعفت السياره بالمعمل وركبت ويه ماهر بسيارته الي گلي

- - ما دام اجيت يعني انت الحمد لله رجعت يوسف الاولاني
جريت نفس :: بس هذا الشي كلفني هواي
ماهر // يوسف خلي نروح ونتونس وداعتك كل شي اله حل بس احنه البشر دومنا مستعجلين
هزيت راسي :: اي والله صحيح

صرنا نسولف ونضحك الى ان وصلنه وهناك گعدنا يم البحر. وانا اشوف الناس الي تشتغل والي تحمل والي تصيد
واكيد كلها عدها مشاكل
وكلمن همه يختلف عن الثاني لكن عجلة الحياة مستمره اتقرب مني ماهر وهو. يگلي

- - كافي صفنات الى متى
اتحسرت وجاوبته :: والله ياماهر چنت عايش حياتي ومستقر وراضي لو ما الكلب الحقير الي ما اعرفه ولا يعرفني
گلب حياتي فوگ تحت
- - شوف يوسف الله انطانه نعمة النسيان حاول تنسى تره انت مو اول ولا آخر. واحد
:: اعرف بس كل ما احاول انسى اكو من يذكرني
ماهر // تقصد زوجتك بت عمك

:: لا والله مو بس هي امي امي ماهر امي ودموعها وحزنها وحرگتها على بتها
- - اي بس انت هم ما قصرت وسويت الي محد سووا وصار لازم تنتبه النفسك
جاوبته باستهزاء :: انتبه النفسي
ماهر // اي وتعيش حياتك انت مو وحد عن اخوك الچبير علاء الي عاف كل شي واخذ مرته وهاجر
لو بسام الي اصلا ما هامته المشكله وسالم الي ما شاء الله من خلال كلامك عايش حياته سعيد ومرتاح
بس انت شايل هموم الدنيا كلها فوك راسك وجاي تفتر بيهن

:: مو انت شفت بعينك الي صاير بيه
ماهر //اي صحيح بس لازم تحاول توضع حد الكل شي
هزيت راسي وبعدها رحنا انا وماهر نتمشى يم البحر وصرنا نسولف بغير قضايا لان المنظر هناك يجبر
الواحد ينسى همومه واحنا نشوف شگد ناس عايشه من هذا البحر وشگد ممكن مشاريع تصير وتشغل الاف
الشباب والعاطلين عن العمل
اتغدينا وشربنا جاي وماهر طلب ناركيله انا خابرت سالم

سالم // الو هلا يوسف
:: اشلونك ابن العم
- - بيها ابن العم معناتها زعلان
:: من ناحية زعلان فهوااي
- - لاتزعل وانت هم سووي مثلي
:: اي مو انا مثلك وحيد فريد مطشر

سالم ضحك،//  ههههه ها ما طولك اتحشش معناتها ما زعلان
:: لا والله بس ضايج
-شكو
:: ماكو شي ضايج
- - لو يمي چان گتلك تعال بس
:: لا ما اجي

- - وليش بالله ماتجي هذا لان اريد اعيش براحه
:: اي ولان عفت كل شي الخاطر مرتك
- - شوف يوسف انا مرتي احبها وما ردت اصير مثلك
:: ليش انا شبيه
- - ما بيك شي بس الخجل وشروة الخاطر خلاك تضحي بحب حياتك

::تقصد سحر
- - اي يوسف سحر الي خطبتها وخالتي خربت كل شي وانت سكتت
:: ليش لو انت بمكاني شتسوي
سالم // شسوي احرك الدنيا واخذ حبيبتي والچانو. السبب اضربهم عرض الحايط
:: ههههه
سالم // شنو ما مصدك

:: لا مصدك مو هالضربت كل شي عرض الحايط ورحت ورا سماح
سالم // اي لان هي صارت حب حياتي
::لا تسمعك امي وتگول غاسله حظك بالسحوره
- - گالت وما همني
:: اگلك سالم مفاتيح البيت وين
- ليش ؟
:: هيج اسأل

سالم // گلي ليش
:: ردت اروح اگعد بي شكم يوم
- - شصاير يوسف
:: ما صاير شي بس ما الي خلك واريد ابقى ابحدي واذا ازاحمك ما لازم
سالم // انت شتكول اتزاحمني المفاتيح عد جارنه ابو يزن انا فهمته ينطيهن الك من يشوفك
:: يعني اخذهن منه

- - شبيك يوسف شكم مره اگلك انا وكل شي املكه تحت امرك انت تبقى اخوي وعضيدي
:: الله يخليك مشكور 
- - تسلم ابو محمد
:: فيمان الله
- - الله وياك

رجعنا انا وماهر ورحنا للبيت وانا اتوسلت اروح للفندق بس ماهر كلي اروح وابات وياك لذلك رحت ويا
وثاني يوم رحنا للمعمل والعصر مرينا على السيد الي كلي ان شالله امورك بخير وبعد ما ينخاف عليك لكن
ابقى متحذر

وهم گال الشي الي جان بيك ممكن چان يموتك او يخليك مريض دائما وما يعرفولك تشخيص
وگلي اداوم على قراءة سوره البقره المباركه واكل العسل
ورجعنا انا وماهر بعدها قررت اروح ماهر گلي // بات والفجر اطلع راح توصل الدائرتك الصبح
وفعلا نمت وطلعت قبل  الفجر بعد ان سلمت على ماهر واتشكرت منه
وصلت للدائره توه بادي الدوام داومت عادي ورجعت البيت سالم طلبت المفتاح من جارهم والظاهر سالم مخابره
انطاني المفتاح وگلي // اي شي تحتاجه لا تتردد اتطلبه

دخلت البيت سالم وبوجهي سبحت ونمت على القنفه ما گعدت اله بالليل صليت وطلعت رحت اتعشيت وجبت وياي
فواكه ومريت بطريقي على محل ملابس اخذت منه تراكين وقميص وبنطلون ورجعت نمت والصبح داومت وانا
اشوف امي وهي تتصل تتصل وحتى بسام الي كل ما يتصل لو ارفض المكالمه لو اشغل الجهاز 

ومر اليوم عادي  اتغديت بالمطعم ورجعت البيت سالم وبالليل طلعت اتعشيت وهم رجعت للبيت
الثلاثاء انا بالدوام واجاني بسام سلم عليه وكعد انا چان عندي بعض الاوراق اراجعهن بسام سالني

شنو يوسف انت وين هالوكت
انا بدون ما اباوعله :: بهالدنيا
اي بس حتى ما ترد على التلفون
::ما الي خلك
يوسف تره امي مقهوره عل.........
قاطعته ::بسك رحمه الابوك كافي

- - شنو صار
:: ما صار شي بس انا مختنك وضايج وما الي خلك احد
- - عاد انت انهزمت
باوعتله بعيوني :: شنو انهزمت اعرف شلون تحچي
هو هز راسه وگال // اي انهزمت ما تريد تواجه احد لذلك دووم انت الي تخسر
:: هاا وبعد خلينه نسمعك استاذ

بسام // بعد يوسف قبل لا تواجه احد واجه نفسك يااخي احنا كلنه عايشين باسمك ومن تعبك محد
اله فضل عليك حتى الحقل تنطينه حقنا انا وامي وزهره وتضم حق علاء وانت تاخذ اقل من حقك
ومنو يحمد ومنو يگول جاي يتعب صدگني محد هذا اذا ما اتهمناك انت ماكل الاول والتالي
::تدري بيه انا ما اكل حق احد

بسام // اي ادري واعرف بيك شكد تعبت وما قصرت ويانه بس هسه انت جاي اتعاقبنا
:: لا بسام انا تعبت وجاي اعاقب نفسي تره مو امي الي خسرت ازهار ازهار چان ممكن تموت
وهي گاعده بالبيت
ولا ازهار الي ماتت لان الموت علينه حق انا يابسام انا الي خسرت خسرت انسانيتي تعبت وانا اشوف
نفسي زغير ولازم ارضي الكل بس ما ارضي نفسي

بسام // والي يشوفك ايحسدك يگول بيت او وظيفه وحقل ونسوان اثنيين صدك انت وين اشو حتى بالحقل ما موجود
:: شعجب امي سالت عليه بشير لو امه
- - لا ودتني ادور عليك ورحت للحقل لگيت بس ام محمد وبشيرمن سالته گلي ما اجه حتى مخابرك وما راد
علي بعدين خابرت سالم لان استحي اروح البيته عاد هو كلي انت خابرته

عرفت بسام ما يدري بسالم انتقل للبصره جاوبته :: وزهره ما وصلت الكم انو انا بالبصره
- - اي خابرتنا وگالت انت مار. عليها بس ما بايت يمها وامس امي ودتني للحقل اسال عنك
:: چان اجيت اهنا
- - تعرف عندي دوام واليوم انا غبت بالمحاضره الاولى

وگف بسام وگلي // يوسف ارجع للبيت
اشرت براسي وكتله ::لامو هسه
- - زين طمني وين تبات
:: ولد صديقي بالدائره عايش ابحده وانا ابات يمه

- - صدك چذب ارجع يوسف ارجع البيتك وما الك شغل بكل شي ولا تهتم الكل واحد
:: ارتاح وارجع اكيد ما راح اسوي مثل علاء
بسام باستهزاء // ياعلاء هذا اصلا ما اتذكره ومن اشوفه ما اعرفه وهو هم عايفنه خير شر
:: بس ابرد اله راس
- - مي خالف ابو محمد انت عمرك كله اخذته وانت تعبان وتتحمل كل شي

هزيت راسي :: ايي وخوش اتجازيت
- - والله حقك بس هذا قدرك
::الله كريم
- - هسه شكل الامي
:: گلها ما بي شي زين لاتخاف ويمته ما يعجبني اجي
- - براحتك فيمان الله
::الله وياك

بقيت اروح البيت سالم تقريبا عشر تيام وبسام يوميه يتصل وكلي امي ارتفع سكرها اعرف هاي تمثيليه منها
وقررت ارجع وما انطي الاي احد مجال وره الدوام دخلت للبيت ولگيت امي گاعده هي وضحى دخلت گلت
من وره خشمي :: السلام عليكم
وصعدت بدون ما اسمع الرد
بدلت واتمددت ع الجربايه اجت ضحى حاچتني ابرود // اصبلك غدا
انا بدون ما اباوع بوجهها :: لا متغدي

هي نزلت وانا دخنت الجگاره ونمت گعدت سبحت وصليت وراها بدلت واخذت السويج وطلعت حتى بدون ما
اسلم اتعشيت بره وخابرت بسام گلي هو بالكوفي رحت يمه سالته
::اذا بالنهار بالكليه وبالليل بالكوفي يمته تدرس
هو بضحك // من انام سبحان الله وانا غافي تجيني الماده بالحلم اقراها واروح حافظها ،

:: ههههه تره ما تضحك
- - ادري تعرف محاضرات نجمعهن وبيوم الامتحان نقراهن
هزيت ايدي دخنت نارگيله وشربت گهوه وطلعت شويه افتريت ورجعت للبيت ما شفت احد بالصاله
صعدت للغرفه لگيت ضحى متمدده من شافتني گعدت سالتني
- - احضرلك عشا
::  ما اريد

اخذت ملابسي ورحت سبحت وطلعت اتمددت هي اجت يمي وانا ما الي خلك لكن هي سالتني
- - فكرت بالموضوع
جاوبتها وانا متمدد على صفحتي  :: ياموضوع ؟
ضحى بنفس برودها // شنو نسيت ؟
اتنفست :: اي والله ذكريني
ضحى // اي اذكرك موضوع ابنك وطلاك مرتك

گعدت على حيلي وخزرتها لكن هي خلت عينها بعيني حاچيتها
:: من كل وعقلج انطيج الولد واسجله باسمج اسمعيني زين حتى من اطلكها اخليها تاخذ ابنها وياها وعود من
يصير عمره ست سنين افكر اجيبه عندي بس ما اسجله باسمج
هي جاوبتني بابتسامه // براحتك مثل ما تريد

اتعجبت من هدوئها عافتني بالغرفه وطفت الضوه ونزلت جوه وانا بقيت متمدد الى ان غفيت الصبح گعدت وهي
بقت نايمه بدلت ونزلت شفت امي گاعده گلت
::صباح الخير
امي ردت //صباح النور تعال اتريك
::لا ما اشتهي هسه اكلت عسل
- - بالعافيه اگلك يمه يوسف
::ها حجيه خير
- - كل الخير اليوم بيت ابو رافع جيرانه
:: اي شبيهم

- - ما بيهم شي بس عرس ابن اخوها لام رافع وعزمتني انا ومرتك
:: وين بيتهم
- - قريب نروح الهم بسياره
:: تندلينهم
- - ام رافع راح تدز ابنها وره الظهر ياخذنه انا ومرتك وام علي جوارينه وبناتها

:: زين روحي محتاجه شي
- - لا بس ضحى تريد تروح للصالون
::عادي خليها  تروح
مديت ايدي على جيبي :: هاچ يمه هاي فلوس الضحى يجوز يعجبها تشتري لبسه وانتي هم شوبشي العروس
- - عساك سالم
دنكت وبست راسها :: فيمان الله
- - الله وياك

ورحت للدوام وبيومها چان عدنا شغل فالتهييت اكمل بالمعاملات شربت چاي واكلت لفه وصليت الظهر
بالدائره لان ماكو مراجعيين ورجعت صرت ارتب بمكتبي تقريبا الساعه بالثنتيين اله ربع اجتني رساله
ع الواتساب انا اليوم كله مافتحت جهازي لان ملتهي  باوعت للتلفون شفت رسالة جايتني من ضحى وهي تگلي

- - حبيبي انت راح تطلك مروه وتسجل محمد باسمي احسن بدل الفضيحه وتنزل من عيون الناس انا ارح
اروح للحفله وانت فكر وشوف الفضايح وعندي منهن هواي
شفت محادثه مصوره چانت بينها وبين ازهار قريتها وگف عقلي وعرفت شگد انا چنت غبي وقليل التفكير

//////////////////////////يتبع
القصه شارفت على الانتهاء وانا ما جاي اشوف تصويت وتفاعل