رواية بعد فوات الأوان الفصل الثاني وثلاثون 32 - بقلم آنين الليل

مرحبا 😘😘
صدگوني من اكمل البارت ثانيه ما اتاخر راسا انشره 🏃🏻‍♀️🏃🏻‍♀️
احبكم ❤️❤️
/////////////////////////////
المثل يگول (رب صدفه خير من الف ميعاد )
مروه
من رجعت من بيت سالم لمن وصلوني وراحو للبصره وانا اعرف بعد ما راح اشوف اختي احساس لا اكثر
ويوسف ما اجه ولا انا سالت ام بشير لان ما اريد حتى اجيب اسمه
اما سجاد فتقريبا ابتعد لان صديته رغم اعرف بي من اطلع للحقل يبقى يراقبني

صرت ما مهتمه الاي شي بس الابني الي چنت اتمنى ان يعيش احسن عيشه او خلي نگول احسن من عيشتنا
الي عشناها انا واخواني ويه اب ما يخاف الله وام ما حاولت من اول سنه ويه زوجها ان تنهي كل شي
وتبدي حياة جديده

وكله بسبب المجتمع ونظرته الضيقه للمرأه المطلقه وما يتأول عليها من كلام وافعال منافيه للدين
والاخلاق والعرف
صرت اخابر سماح وزينب واخابر اخواني بالليل لكن مو دائما وانا اسال عنهم واسمع الفرحه
من خلال كلامهم

وهمه يسمعون صوتي او يشوفوني لان انا صرت اشترك نت شهري والرصيد امين ايدزه الي
واتواصل وياهم
ع الواتساب و الصراحه چنت دائما حذره واخاف من يوسف يشوف الجهاز لذلك صرت ابدل
مكانه كل فتره

وكل ما اخابر اخواني امين وصادق ايگلولي نفس الكلام
- - مروه ما نريد انجبرچ على شي بس انشوف من الاحسن ان ترجعين يمنا وتبدين حياة جديده
وصادق دائما ايكلي //مروه ارجعي وانا اتعهد الج كل فتره اجيب محمد اتشوفينه هذا اذا ما جبت الج
حكم محكمه ابحضانته

لكن انا مجرد هذا التفكير ايخليني انهي الاتصال او اغير الموضوع لان ما اريدهم يعرفون انو انا مقرره الانتقام
من يوسف ولو يبقى بعمري يوم انا راح انتقم منه
وعرفت انو امين ما شاء الله شغله ماشي ومشتري سياره وجاي يجمع يشتري قطعة ارض وهو سراني راح ايسجلها
باسمنا كلنه وانا ما قبلت لان هذا الخير الي همه بي تعبه بس هو گال

لا اريد اضمن نستقبل اخواني
حسيت انو امين هو ابونه مو اخونه وشفته من يحچي كأنما عمره خمسين سنه چنت فخوره باخوي
الي بنى نفسه بكده وتعبه واكيد ما ننسى فضل جهاد او وگفته ويه  امين واهلي
جهاد الي كل واحد من عدنا يعتبره اخ عزيز

اما ابوي فاالي عرفته هو ما يجي ولا يسأل على اي احد من اخواني او اخواتي وهو ملتهي بزوجته وصار
يصرف عليها وعلى ابنها

انا بالنسبه اليه ما صار عندي اي شي مهم بس التفكير شلون انتقم من يوسف يوسف الي حرم امي ان اتشوفني
يوسف الي گلبه صخر وما يخاف من الله دووم اسأل نفسي
= ليش انا هالشكل ليش ما عندي حظ من اول ما فتحت عيوني على الدنيا وانا اشوف
كره ابوي الامي رغم ما يگدر ايعوفها وهذا الكره وصل اليه وحتى من صرت ادرس وعندي هدف بحياتي
طلعلي جمال الحقير وخرب عليه دراستي ومن اتزوجت ورضيت بالامر الواقع واتمنيت اغير من يوسف لكن
مع الاسف يوسف طلع ظالم اكثر من ابوي وحتى اكثر من جمال

بچيت وانا اباوع الابني الي اشوف بي فرحتي وآمالي واگول
= چنت قابله بكل شي من ابوك ظلم وكره وهجران كله على مودك
= لكن ابوك مو بس ظلمني وزغرني وهاني لا ابوك حرگ گلب امي وحرگ گلبي لذلك حمودي لا تحقد عليه
لو شما اسوي بي
محمد يباوعلي ويضحك عبالك ايگلي //ليش انتي شسويتي حتى احقد اشو بس كلام

فعلا انا ليل ونهار اتحين اي فرصه حتى ابلش انتقامي لكن ما جاي اشوف وسيله حتى اتخلص من هذا العذاب
صرت افكر اقتل يوسف وتجي ابالي افكار انو اكتله بسم مال فار اوصي علي ام بشير وكل ما يجي اخليله مقدار
كلش قليل وبمرور الوقت يمشي السم بحسده ويموت لكن هم راح انكشف ويجوز ايشرحونه ويلكون آثار السم
ويحققون ويعرفون انا الي چنت انطي ويه الاكل
وبعدين شنو احصل اكيد انعدم وابني يبقى للعذاب

هزيت راسي بقوه وكانما الغي هاي الفكره نهائيا من قاموس انتقامي
مرات افكر احرگ الحقل بالي بي بس اعرف انو الي راح يتضرر هو بشير الانسان الطيب والخلوق
بعدين من احرگ الحقل شنو ذنب الحيوانات اخذ خطيتهم وعلى مود شنو على مود انسان ما يملك ذرة انسانيه

فكرت انهزم اي انهزم اخذ ابني واروح بعيد بس شنو يوسف راح يسكت اكيد لا وراح يتهمني باشياء هي بعيده عني
وراح اعم على سماح وعلاقتها ويه سالم لو اخواني شنو ذنبهم
بوكتها هزيت راسي وكلت = لا يمكن اسوي هيچ شي مستحييل
= ما بقى كدامي اله طريقين ما الهم ثالث

= اول الطرق وهذا استبعدته لان حرام هو انو انتحر لكن انا استبعدته وما فكرت بي انا خسرت دنياي ما اخسر اخرتي
والطريق الثاني هو الامر من كل شي وهو اتطلك واترك ابني
وصار هذا قراري انو اتطلك واعوف ابني لكن مو هسه اتطلك لا اتطلك من يصير عمر ابني ست سنوات حتى من
اسولفله كل شي راح يستوعب ومن يكبر راح يعذرني

جريت حسره ورفعت راسي باوعت للسما وگلت
= اله اذا صارت وياي معجزه وگدرت اخذ ابني واطلع من حياة يوسف باقل الخساير وهذا الشي ما يصير
اله انو يوسف الله ياخذ عمره ولو الاعمار بايد الله

صرت بصلاتي وبكل لحظه اتمر عليه ادعي رب العالمين ان ايخلصني من هذا السجن ومن هذا الظلم صرت
اتوسل وابچي وصارت عندي قناعه انو ربي ما راح يتركني وكل ما تضيق عليه اكيد ربي ايفرجها بوجهي
چنت اذا اگعد الفجر اصلي  وادعي ومرات اقرا قرآن وبعدين اگوم انظف الغرفه وافتح شباكها وانظف المطبخ
والحمامات والحوش وحتى مرات اطبخ واخذ محمد واروح للحقل

محمد صار يحاول المشي وحرك حاله حال اي طفل لذلك من اجتني ام بشير وصيتها على مرجوحه من هاي مالت
الاطفال الي تتعلك ومن اروح اخذها وياي وهناك اعلگها بجذع الشجره  واگعده بيها وهذا الشي خلا محمد اكثر هدوء
وصحته ما شاء الله زينه لان الهوا نقي وهم يتعرض للشمس الي تبني عظامه
ومن نرجع الظهر اسبحه واوكله وينام بعمق

وللامانه ام بشير ما عايفتني تجي يمي للحقل وتساعدني وشنو احتاج اوصيها تجيبه عن طريق بشير من ينزل للولايه
لو حتى هي من تروح للسوك ورغم تصرف سجاد الغير مسؤول لكن هذا الشي ما آثر بعلاقتي بأم بشير الي دائما
تردد هاي الجمله خاله انا مثل امج والله حبيتج مثل بتي حوراء

وابد ما انسى وگفاتها وياي من چانت تاخذني للطبيب لو من ولدت حمودي لو من اتوفت امي لذلك انا غضيت النظر
عن تصرف سجاد اتجاهي مو بس خوف من يوسف لا لكن حفاظا على كرامتي وعلى رزق الناس الي فاتحين
بيوتهم من هذا الشغل
بيوم اجتني ام بشير وشفتها ضايجه ومقهوره سالتها

=خير خاله شبيچ
باوعتلي وگالت //اليوم بشير راح اليوسف للشغل
هزيت راسي استفهم هي ردت //من هاي عمتج
جاوبتها باستغراب = ياعمه
ام بشير //ياعمه ام يوسف چا منو عبالج

تصدگون نسيت ام يوسف المفروض تصير عمتي ام رجلي = شبيها ام يوسف
ام بشير // يوميه تخابرني وتسالني يوسف اجه يوسف مر ومن اجه هم يروح يم مروه
استوقفني اسمي گتلها = الله عليج گالت مروه لو الفصليه
ام بشير //شكالت خلي تكول بس مال تتهمني انا اضم عليها وتهدد اتبطلنه من الشغل هاي ما نقبل بيها لان احنا
محد صاحب فضل علينه بس رب العالمين والعيشه الله يكفلها

شفت ام بشير مقهوره حييل اتقربت يمها وحضنتها وانا اگلها = لا تنقهرين خاله هاي يمكن ما شايفه وشافت احسبيها عليه
ام بشير تهز بايدها // احسبها عليج ليش انتي يا مسكينه شمسويه انتي ياالله تتكفيين شرهن
هدئت ام بشير وانا متعجبه من هاي العائله  الي عدها داء العظمه

ثاني يوم اجت ام بشير وهي تكول انو يوسف معتذر من بشير ومخابرها معتذر منها وگايللها احسبيها عليه
وتگلي مبين من كلامه مقهور من تصرف امه وگايللها الحقل هذا مو بس اله والامه لا الحقل هذا الكم او واعدها
بعد امه لا تخابر ولا تسال عنه وراح ايوگف كل واحد عد حده

من سمعت كلام ام بشير بيني وبين نفسي استهزأت لان اعرف يوسف ما عنده كلمه ومستحييل يلتزم بيها او يسوي
الشي الي يوعد بي لان  ياما سمعت من عنده كلام او وعود لكن كلها طلعت عباره عن كلام بدون افعال

ومشت حياتي على هذا المنوال اكعد الصبح واروح للحقل احش وارجع الظهر اغسل الابني ونتغدا ونرتاح شويه
والعصر اروح اعلف العجول ودووم ام بشير تجي وتساعدني

ذاك اليوم انا گعدت الفجر صليت وبعدها گعد حمودي رحت علي بفراشه خليته بحضني واتمددت يمه وانا ارضع بي
رجع نام وانا هم غفيت ما گعدت اله فايت وكت  يادوب غيرت ملابسه او وكلته شويه وقفلت الغرفه ورحت الظهر
حشيت ورجعنا غسلت الحمودي وصليت واتغديت بيومها گليت طماطه لان ما لحگت اطبخ بعدها گمت نظفت الغرفه
وفتحت الشباك هويتها وصادف طفت الكهرباء وانا تعبانه اريد انام شويه حتى العصر اروح اعلف العجول گمت
خليت الشباك مفتوح بس رديت البرده او نمنا انا وحمودي الي نام وتوني غافيه اندك  الباب فزيت كلت بنعاس

= منو
:: انا يوسف افتحي الباب
ضجت لان اجه وفتحت الباب اتفاجأت بامه جايه ويا دخل وهي هم باوعتلي بدون ما تسلم انا بادرتها بالسلام
= اشلونج حجيه
هي من وره خشمها //هلا
يوسف گلي ::افتحي الضوه
= الكهرباء طافيه

راح يم حمودي وباسه وهذا كعد هو شاله وظل ايبوس بي وخلا بحظنه باوعلي وگال
:: روحي سوي چاي
ام يوسف //المن الچاي هناك نشرب ياالله ودي ع المره خلي تجي حتى نلحك نرجع
اشوف يوسف متوتر ومو على بعضه جاوبها ::  اي هسه اخابر بشير واخليها تتحضر وتجي (باوعلي )
روحي سوي چاي

طلعت وانا اعرف اكو شي صار عندي فضول رجعت من المطبخ اتقربت ع الباب واسمع امه تحچي ويا
- - شنو جاي نتضيف يمته نروح يمته نرجع خابرلي المره بسرعه
يوسف جاوبها :على كيفج يمه ما راح نروح الاي مكان
ام يوسف مستغربه // ها اذا ما نروح المن جايبني اهنا
سمعت المفاجأه الي خربطت كل اموري وهو ايگلها :: يمه انا عرفت شلون ماتت ازهار

اهنا صار لازم اتحرك واتصرف بذكاء يمكن هاي فرصتي وعرفت يوسف طلعني بس حتى ما اسمع
كلامه ويه امه واكيد كلام خطير وانا لازم اسمع باوعت ورحت اخذت القنينه الثانيه خليتها يم الطباخ بس شنو
يمكن حركتي وانا شايله القنينه استغرقت ثواني باغتتهم ودخلت هو سالني

:: شكو
= لا بس القتينه طفت واحاول اركب الثانيه وما جاي تركب
هو خله جگارته بحلكه وگلي :: ياالله هسه جاي
مشيت كدامه للمطبخ قربت القنينه وانا ااشر عليها من شفته التهى فتحت الباب واوميت البهاء الي اجه يركض

- - ها خاله
= بهاء بسرعه خلي بيبي تجي بسرعه عفيه السبع
رجعت يمه هو يباوعلي وگلي ::  ركبتها وجربتها شفته فاتح النار انا اجيت طفيته من القنينه ورجعتها بدون ما يحس
وگتله = شوف هم طفت حاول وياها مره ثانيه
رحت للغرفه وانا اشوف حمودي بالكاع وام يوسف كاعده بس مو على بعضها طلعت ماي خليته يمها وهو رجع گلي

:: اشتغلت
= زين بس كون هم ما تطفى
:: لا انا جربتها بس ذيج القنينه مبين بعد بيها غاز
هزيت راسي = اي حتى انا اكول بس يمكن الصوج بالطباخ
ام يوسف //يجوز العيون مالته وصخات ومحد اينظفهن

باوعتله وانا مستهزئه من كلام امه
اندك الباب وانا رحت شفت ام بشير گتلها بصوت مسموع = هلا ام بشير اتفضلي جايه تاخذين حمودي
شاورتها=  ام بشير حاولي تطولين بالكعده وبعدين اخذي محمد وروحي البيتكم
ام بشير باستغراب //ليش شنو صاير
= ما اعرف اكيد اكو شي جبير وهالجايب امه
- - لا تخافيين

علت صوتها // منو يمج
= ابو محمد وعمتي ام يوسف
ام بشير // يا ام يوسف اهنا
= اي گاعده بالغرفه اتفضلي

ودخلت ام بشير وسلمت على يوسف وامه رحت خدرت الجاي وصبيته وجبته قدمته
ام بشير//اشلونج ام يوسف اي هيج كل فتره تعاي خلي انشوفج
ام يوسف مو على بعضها // شسوي بعد تدرين يوسف بالدوام  وبسام بالكليه
ام بشير // ما بيها شي خميس على جمعه تعاي اهنا اقلها تشميين هوا نقي
ام يوسف // اي والله انتي گلتيها

- - اليوم انتي يمنه ما ترحين
ام يوسف بتوتر // لا هسه نرجع
ام بشير // وين راجعه عشاج يمنه
خليتهن يحچن ورجعت للمطبخ وانا خايفه واتلفت بسرعه رحت طلعت التلفون وفتحته وخليته بجيبي رجعت وگتلها
= ام بشير ديري بالج على محمد انا اروح اعلف العجول
جاوبتني // بعيني ما علي شي وانتي خيه ام يوسف تجيين يمنا تتعشيين

هي باوعتلي وگالت //  لا خيه مناك مرت يوسف ابحدها ما اگدر اعوفها ان شالله ع الجايات 
ام بشير // غير ازعل ام يوسف شنو تجين وما تتعشيين وتباتين شعليها مرت يوسف مو بسام يمها انا رايحه
وما اقبل اي عذر
يوسف سالني ::ليش ام بشير تاخذ محمد وياها
جاوبته = مو ذاك اليوم راد ايسحكه عجل
هو فز وحچى بعصبيه :: شنو ايسحكه عجل
جاوبته بهدوء = اي تدري الجاهل بهالعمر هواي يتحرك ويرادله انتباه وانا اخذه اكعده على صفحه
وابلش علف اثاري هو مغافلني وجاي يمشي وراي ولو ما ستر رب العالمين چان سحكه

ام بشير // عاد هي من تروح اتعلف انا اجي اخذه
يوسف :: كثر الله خيرج خاله ما قصرتي
- - ياا شمسويه هذا حمودي ابنك وابن الغاليه
جاوبتها = الله يخليج
يوسف بعتب :: ها هي غاليه وانا
ام بشير بابتسامه //انت الخير والبركه
باوعت الام يوسف = من رخصتكم انا رايحه

ام بشير // وانا هم اروح بس ام يوسف اليوم اريدج يمي خلينه نشبع سوالف هو شباقي بالعمر
ما جاوبت طلعت وام بشير طلعت كالت //شكو
= انتي اخذي حمودي وبعدين افهمج
سالتني // وين رايحه منا
= خاله روحي هسه
- - رايحه وانتي ديري بالج

طلعت وره البيت ابسكته وقبل ما اوصل للشباك دنگت وصرت امشي وصلت وفتحت الكامرا وانا
ارجف وخايفه
اتقربت ع الشباك ومديت ايدي وانا اشوفهم صار يحچي وياها وانا اسجل الهم صوره وصوت

يوسف :: يمه عرفت شلون ماتت ازهار
جاوبته // شنو يوسف شبيك كلنه ندري شلون ماتت الله يرحمها
يوسف بعصبيه :: الله لا يرحمها الچلبه (خزر امه وگال ) :: يمه مو كافي تضحكين عليه انتي وبت اختج
كافي تره انا عرفت كل شي
ام يوسف بعصبيه // اكلك شو تباوعلي وتخوزر وعرفت وعرفت وجايبني تگلي ابو صاحبي اتوفى
وامشي للفاتحه وخلي انمر بام بشير وهسه جاي اتكلي عرفت شلون ماتت ازهار اي ليش انت عرفت
اليوم شلون ماتت انا اگلك تدري النذل خطفها مو اخذت فصل وفصليه

يوسف باوع الامه وهو اياشر بايده :: على كيفج هاي السوالف سولفيهن على الناس من ايسالونج شلون بتج
ماتت بس مو على يوسف لان كل شي انكشف وما بقى شي مستور
هي باوعتله بتوتر // انت شتگول
يوسف بعصبيه :... ما اكول شي بس عرفت انتي وبت اختج طابخاتها سووا وتدرن بازهار وساكتات وجاي
اتضحكن عليه

ام يوسف // شو ما تعرف تحچي شنو نضحك عليك
هز راسه :: ايي يمه اتضحكين عليه ومو اليوم من زمان من لمن ازهار بعدهي ما مقبوره
ردت علي بعتب // نعم الله عليك مقبوره
يوسف بنتر :: ولو بايدي اطلعها من گبرها واحركها
- - يوسف يمه شمتراويلك شنذب عليك

جاوبها بابتسامه بيها استهزاء :: اكيد ما انذب عليه من سحرج انتي وضحى
هي صار وجهه ينطي الوان//  شني شتكول ؟
:: يمه انا كل شي عرفت انتي تدرين ابتج مصاحبه جمال وتطلع ويا وسكتي
هزت راسها // لا لا مو صحيح الگالك اكبر چذاب
:: الگالتلي بت اختج ومو اليه گايله ومن زمان
- - شنو من زمان والمن گايله

:: اي من زمان بيوم الحادث مسولفه ويه ازهار على طلعتها ويه جمال تدرين مو يمه تدرين بتج
طالعه ويه جمال وانتي وضحى سديتنها وفبركتن قصه شكبرها وشعرضها
ام يوسف بهدوء جرت نفس // يمه اختك ما بينها وبين جمال شي هو حبها وچان يريد يخطبها
:: هههه يخطبها وهي مخطوبه وباقي على زواجها اقل الشهر

- - اي يجوز من راحت للدوام هو لحگها او...
قاطعها باستهزاء:: اي وخطفها وگعدها بصفه (زمخ عليها ) كافي كافي ما شبعتي من الچذب
ام يوسف صارت ترجف وتحچي // ولك تزمخ عليه وتگلي چذابه
:: ها يمه ما چذبتي
هزت راسها // لا ما چذبت جمال يدري بيها مخطوبه ويلاحگها

:: مو توچ تگولين ايريد يخطبها
- - اي بس هي مفهمته مخطوبه
:: هههههههه صدك ما تدرين ابتج لو مغشمه نفسج
ام يوسف // شدري بتي راحت وهسه انت جاي تحجي ما ادري شتخربط
:: اخربط مو بتج بليلة الحادث باقيه ويا للصبح لابسه بدلة نوم وفاتحه ويا كامرا والصبح ما داومت
رايحه ويا للشقه حتى يكملون حفلتهم
- - ولك ا...

خله اصبعه على حلگه :: لاتكولين ولك كل شي اتضح وكل شي عرفت وهذا (طلع جهاز نقال وخلا كدام امه)
- - شنو هاذ ؟
:: هذا نقال جمال ولو هسه تفتحينه تلكين رسايل بتج وصورها
هي بلا اهتمام // وهسه شتريد
:: ها يعني تعرفين ابتج وحده گ... وعايقه وانتي النهار كله اتمثلين عليه بتي العروس الي خطفها جمال الي طفى
شمعة شبابها ما تگليلي هالقابليه منيلج

باوعت ام يوسف وحچت بقهر // ردت استر عليك وعلى اخوك
يوسف باستغراب :: شنو تسترين عليه ؟
هزت راسها  // ايي بتي محد لزمها ويه جمال وماتت وهي بسيارته شنو اگول مصاحبها وطالعه ويا
وتصير انت عار لليسوه والما يسوه والناس اتحقك واولهم سالم لو اكول جمال خطفها وهوبالحالتين ينحق
انا من سويت هذا الشي الخاطرك حتى راسك يظل مرفوع ابين الناس
يوسف باستهزاء :: الخاطري مو

- - اي الخاطرك ياريت من صار الحادث بقت عدله معوقه وهو عدل جان غصبن ما علي يتزوجها بس ياابني
اثنينهم ماتوا شنو شكول ومو بس انا كلها الناس كالت
اتحسر يوسف وباوع الامه ::  هسه حقيناهم امنت باالله بس ليش قبلتي اخذ فصليه
- - خفت خاف احد من اهله يدري بعلاقتهم عاد كسرت عينهم بالفصليه
هز راسه :: لا يمه لا تقنعيني هذا السبب

اتقربت منه وهي تكله // يمه يوسف هسه الفات مات واحنه هم عفنا ولايتنا واهلنا واحبابنا شلنه واتاذينه
هو اتحسر :: والله حجيه محد اتاذه بينه بس مروه
سكتت وما جاوبت اجه يوسف يمها :: كليلي يمه ليش هيج سويتي وليش ضحى تريد محمد واله اسجله باسمها
انتي تدرين بضحى هددتني تفضحني اذا ما اطلك مروه واخذ ابنها اسجله باسمها اكيد تدرين لان سرچن سوى
شو ساكته ما تحچيين

(من سمعت بطلب ضحى اتخربطت كل اموري وصرت ارجف بس اتمالكت نفسي وبقيت اصور وانا گوه اتنفس
من الخوف على ابني )
ام يوسف // شحچي
:: اريد افتهم انتي امي لو لا ليش هيج سويتي بيه
- - شسويت يوسف
:: من اول ما شبيت وانا احب سحر ورحتي وخطبتيها وتالي تراهمتي انتي وابوي وعمي ورحتي وخربتيها

هي اتفاجأت هو باوعلها  وگلها :: ها يمه تذكرين سحر
هي بتوتر // مو انا ابوك راد بت اخو وهو گلي روحي فهمي البنيه احنه ما نريدها
:: وانتي ما قصرتي رحتي وكسرتي گلب ابنج بس حتى تاخذين بت اختج شوفي غصبن ما عليج اتفهميني كل شي
لو ماكو قسما باالله بهذا المسدس
(طلع المسدس وسحب اقسام ) هي قاطعته // ها يوسف تريد ترميني
:: لا بس كدامج اكتل ضحى واكتل روحي وهسه تشوفين

- - يمه استهدا بالرحمن لا تتخبل
يوسف :: فهميني يمه انتي تدرين بكل هاي المصايب وساكته ليش فهميني واذا ما تحچيين هسه اهنا اكتل
روحي وعودابقي  انتي وضحى العبن بيها (وخلا المسدس على كصته )
ام يوسف صارت تتوسل بي // فدوه اروحلك يمه اذكر الله
يوسف :: لا آله الا الله.   يمه لا تسكتين كل شي انفضح واذا انتي ما تحچيين بت اختج تفضح الاول والتالي

ام يوسف // لا انت شتحچي ضحى ما تسويها
يوسف :: اگلج هددتني هسه اريد اعرف ليش سويتي كل هذا حرمتيني من سحر وزوجتيني الفصليه ليش
- - تولي ضحيوه غير اطيح حظها ام حلك اتهددك
:: ها لازم لازمه عليها شي
يوسف يمه شنو هالحچي تدري بضحى تحبك وتحبني انا ربيتها او مب...

هو قاطعها :: كل هذا الحچي فلسين فهميني يمه لا صدگيني ارمي روحي
ام يوسف جرت نفس // يمه بيوم اجه عمك جاب ضحى چانت تعبانه ومريضه وانا اخذتها للطبيبه وطلبت
من عدهاتسوي  تحاليل وسونار سويناهن ومن شافتهن الطبيبه سالتني انتي امها انا جاوبتها اي دكتوره ليش
الطبيبه كالت حجيه هاي بتج رحمها تعبان
انا اتفاجأت شنو تعبان شبيها فهميني الطبيبه ردت عليه وكالت يعني رحم بتج رحم مره عمرها ستين سنه حتى
من تتزوج ما راح يصير عدها اطفال
سالتها وبالعلاج

الطبيبه  كالت يجوز بالعلاج يصير عدها بس علاجها اتطول ومو اكيد وحتى اذا تحمل الطفل ما يستقر راح اتطرحه
بيومها انا انقهرت يعني ضحى مسكينه منا يتيمه ومنا من تتزوج ما يصير عدها اطفال خط...
قاطعها يوسف :: عاد انتي گلتي اخذها الهذا الزوج (وياشر على نفسه )
هزت راسها // لا يمه مو هيج ضحى عد ابوها خير من الله انا فكرت گلت ليش باچر عگبه ياخذها غريب
ويجوز  ايقشمرها وياخذ حلالها عاد هي منا وبينا اخذها الك وحلالها ما يروح ويتطشر

يوسف باوع الامه بنص عين مستهزأ :: حلالها هو وين حلالها وانا شلي بي مو حتى علاجها انا انطي الها مو
حتى اتقشمرني انتي وياها وبحجة الطبيبه ترحن اتسولي سحر وتاخذن الفلوس مني من يمته انا سائل على
فلوسها لو حلالها
- - والله صدگ بس اول وتالي هو الك والابنك

:: ها ها هسه طخت انتي صدتي عصفورين بحجر غبيتي فضيحة بتج وخليتيني اخذ فصليه حتى تجيبلي طفل
وبعدين اوديها الاهلها خفتي اتزوج على بت اختج ويجوز الي اتزوجها احبها وما اطلگها او حتى السحر الي تسوينه
انتي وبت اختج  ما يفيد بيه مو وهم هي لازمه عليج لزمه مصايب بتج عفيه عليج يمه خوش لعبتنها انتي وبتج وبت
اختج وانا الحمار المايدري شنو جاي ايصير مو

هزت راسها // ما صار شي مروه فصليه وجابتلك ولد تاخذ الولد وتوديها الاهلها

من سمعت ردت اروح واگللهم انا كشفتكم ومحد ياخذ ابني مني لكن وكفت وگلت ويه روحي
= لا مروه اهدي واتصرفي بحكمه من ترحين هذوله عصابه كل شي يسوون ويجوز ايكتلوج ومحد يدري بيج
لا افتهمي وفكري بهدوء حتى تطلعين باقل الخساير على كيفج لا تضيعين حقچ اهدي مروه هاي فرصتج

يوسف جاوب امه :: والله
ام يوسف //شنو
يوسف ::الله يمه شگله من اوگف گباله
ام يوسف // چا شلون رايك تخلي ضحى تفضحك وتفضح اختك شنو من يسمع سالم راح يسكت لو
من يسمعون اهل جمال اول وتالي ايحقونك وغصبن عليك اتطلگ مروه بس الولد تاخذه وترجع فصلهم
اذا ما حقوك يمه ابو محمد احسن الها تروح يم اهلها وهناك تتزوج وتجيب بدل الولد خمسه وسته بس انت يمه

صار يضرب ليد بالثانيه :: انا انا مصيبتي چبيره
- - على كيفك يوسف لا تتهور تره مو اول واحد ياخذ فصليه وبس تجيب الولد ايردها الاهلها
:: بس مروه بالحقيقه  مو فصليه
- - لا گدام الناس فصلت دون ابن عمها وجابت ولد وهذا هو نفسك طابت منها رجعها الاهلها

:: نفسي طابت من بت اختج الكلبه
- - هسه انت عصبي دورها براسك وراح تشوف كلامي كله صحيح
هز ايده :: ياكلام  هذا (باوعلها كانما اتذكر شي ) صدك انتي من ترحين وياها بحجة الطبيب وانتن
رايحات اتسون سحر ما خفتي عليه اموت اتخبل
- - يا سحر وياهو المسويلك
:: مو گتلج كل شي عرفت هسه بقى على السحر احچي يمه تره انا محترك جدي

دنكت وهي تلم بحلكها يوسف :: ها شو سكتي اريد اعرف ليش هيج على مود شنو على مود فلوس ضحى
الخالتهن على كلبها وانتي تدرين بيه  اموت ولا اطلب منها فلس احمر كل هذا السويتي بس حتى اخذ بت اختج
المريضه وانتي تدرين بيه شگد ما احبها يعني اريد اعرف شستفاديتي وتالي بس حتى بتج ما تنفضح صرتي تتملقين
الضحى ليش يمه حطمتيني ليش بس حتى ضحى تتملق الج ما شاء الله بيناتكم تبادل منفعه

ام يوسف // ما حطمتك ابوك حطمكم من چان يشتغل موظف وهو شايل عمك وخالتك يصرف ويجيب وحتى عده
شكم فلس انطاهن العمك واشتغل بيهن والسياره صارت تريله واثنين وعشره والبيت بيتين وتلاثه وعمك ينگط اتنگط
بفلوس ابوك  حتى ما كله هاي سياره نص محل انت ساعدتني وگفت وياي لا سداهن فلس وره فلس وابوك يصرفهن
تريدني اخلي ضحى وسالم يتمتعون بفلوسنا وكل شي ما نحصل

يوسف :: هههه وشحصلنه هسه
ام يوسف هزت راسها وحچت بهدوء // اول وتالي بس يصير ابنك يم ضحى راح كل شي يصير الك واله
يوسف :: وانا ما اريد اي شي من ضحى لان بعد ما اريدها لو اكتلها لو اطلگها
- - وتخلص عمرك لو بالسجن لو ما ترفع راسك انت وبسام بين الناس فكر لا يصير گلبك رچيچ محد يدري بالصار
اخذ الولد واطي الضحى وهذا هو
:: هاا هيچ بهالسهوله

- - چا شتسوي
يوسف وگف :: راح انطي ضحى على مايها واگول الولد بعده يرضع عود من انفطمه يصير خير بس ثقي يايمه
لو تحچين حرف من هذا الكلام صدگيني وداعة ابني گدامج اكتل روحي وكل شي  املكه يصير الابني وامه
وانتي عود خلي فلوس ضحى وفضيحة بتج تفيدج

/////////////////////////يتبع