رواية بعد فوات الأوان الفصل الخامس 5 - بقلم آنين الليل

مرحبا
هسه كملت البارت ونشرته
كهرباء ماكو
والدنيا حاره بشكل
نكول الف الحمد لله والشكر الله يكون بعون الناس المرضى والتعبانيين
الله يشيل عنهم ما يعانون
////////. ////////. //////. ///////
مروه
من انطوا الناس العطوه وصار ابوي يدخل ويطلع ويروح ويرجع ما نعرف بس هو يجي صاير عصبي نار
احنه چنا نتحاشا وحتى التلفزيون نخلي على افلام كارتون بحجة علاوي واحنه نروح للغرفه او نطلع بره نتكفى
الشر منه خصوصا وچنا دووم نسمعه وهو يعاتب بجمال ويگله

:ليش عمي كسرتني ليش انا الي حبيتك اكثر من ولدي وكل شي سويت على مودك هيچ يطلع منك هذا مجازاة
تربيتي الك كل الي يشوفني يسبني
ودووم نشوفه يطلع بره على مود التغطيه ويخابر وقبل يوم من الگعده اجه الشيخ ابو عادل وگعد ويه ابوي وصار
كلام احنه انا وسماح نتسحب نروح نگعد جوه الشباك حتى نسمع ابوي يحچي ويه الشيخ يگله

:ليش احنه مو من العشيره مو وياكم ندفع للفصل وللمناسبه ليش هسه شيخنا تخليتوا عنه
الشيخ يجاوبه //ما اتخلينه طالب هاي فسده ما ندري خاطفها ناهبها وبكل الاحوال تعتبر فسده وانوب اتسبب بموتها
تدري شنو يعني لو انت لا سمح الله بمكان اهلها شسويتوا انوب البنيه معقود عليها الابن عمها يعني
مخطوبه يعني بت بيت

ابوي //وهسه ابو عادل
ابو عادل //اذا وافقت الناس وما دخل بيها ابن حرام انت تشيل الفصل مال ابن اخوك كله احنه علينه نوگف وياك
ونحاول نبرد الشغله على مود الناس ترجع لبيوتها وانت شيترتب عليك تقبل ولو شيطلبون
ابوي صفك ايده //هاا هيج اتبريتوا مني
الشيخ //ما اتبرينه طالب مو مال واحد يتبرى بس هاي سنينه الفسده يشيلها راعيها وجمال ابو متوفي وما عده اخوان
فانت او ولدك بوجه المدفع
ايوي // يعني انهبت مو

الشيخ ابرود //ايي طالب انهبت والله يستر الناس گوه الاجاويد لازمتهم عگب باچر شتريد الناس وشتحچي
ما تفك حلگك يغلطوون يسلوون تسكت ويجوز يگولون انت ما تحضر
ابوي هز راسه والشيخ اتقرب منه وگال// طالب مع الاسف انت انطيت الجمال وجه شچم مصيبه
بمصيبه سديتها اله مو ذوله ولدك مو هذا ابنك من هو هلگده وهو يشتغل ماكو يوم سمعنه عنه شي
مو زين بس انت ما عرفت تربي ابن اخوك مع الاسف حضر نفسك ولملم فلوسك وعگب باچر
الگعده ابيت شيخهم

ابوي //منو يجي
راح اخذ ساده وشيوخ وانا اسويلهم الغدا ابيتنا وانت تعال بس انت وياك ولد عمك اثنينهم
امين //واحنه شيخنا
الشيخ //لا عمي ابد لا توصلون ولا تطلعون الناس دمها فاير وحقهم محد يلومهم ياالله (وگف ابو عادل )
انا امشي وانت طالب لا تگعد ومن ناحية الفصل انا ما اجبر احد  الي يريد يساعد بالفصل نعم الله علي وغير
هالشي ما اكدر اسوي

ابوي //طال عمرك ابو عادل ما قصرت
الشيخ //طالب انت واحد من عدنا بس دگة جمال دگه ناقصه وشحصل هو مقبور لا فاتحه لا ثواب وانتو متجهولين
والله يستر من الجاي خاف تطيح بقليل الذنوب

وبيومها ابوي راح ويه ابو عادل وما رجع اله ثاني يوم العصر واجت ويا عمتي امل وزوجها وچان مبين عليهم
التعب والقهر لان همه هم تركوا بيتهم صحيح راحوا البيت نسابتهم وهمه مرتاحيين واقلها بيتهم ما صاير بي
شي لكن عمتي مقهوره ومتغيره علينه وبنفس الوكت هم تبچي على جمال والي الحد هسه ما نعرف شنو علاقته
بالبنيه وليش سووا هيج وعمتي سالت امي

:اگلج ملاك ما اجت ما خابرت
امي هزت راسها //لا ابد ولا راوت وجهها ولا سمعت صوتها
عمتي // انا اتصلت بيها وهي ما ردت عبالك احنه اموتين جمال
امي //هي شعليها گاعده ابيتها ويه زوجها وجهالها طاحت براسنا
امل //ايي والله صدك

امي //حتى ما بالچذب رجلها خابر وگال تعالوا يمنا لو بس خلي البنات يجن يم بت عمهن
امل //وداعتج سهام لو يشوف بيها خير الاهلها چان خابر واجه وسجل موقف حاله حال الناس الغربه
امي //اي والله الجوارين ذبوا روحهم للموت على مودنا وبيت ابو باقر وابن اختهم ما قصروا لو جهاد الي
هاي الغراض كلها اشتراها
امل //سهام انتي اوولدج وبناتج طيبين والناس تحبكم

وبيومها بقت عمتي امل يمنا وانا اشوف شلون هي وامي مره يبچن ومره يسولفن واخواني يمنا
چان الكل متوتر وخايف واحنا ما نعرف شنو صار الى ان اجه ابوي وعمي جمعه وابوي ضايج عمتي سالت
زوجها //هاا بشروا شصار
جمعه //كل شي ما صار
امل // شلون يعني
: يعني رحنا ومحد اجه استقبلنا
الكل استغرب //ليش
جمعه //مبينه الناس طلابة ثار ما يردون يگعدون للفصل ما يردون فصل يردون يكتلون

عمتي امل //حقهم الله يساعدهم
امي // خيه ام محمد همه يردون ايكتلونمن غير وليداتي
امل //ايي صدك تطيح بقليل الذنوب وهسه جمعه شراح تسوون
جمعه // احنه رجعنا وبقى ابو عادل ويا ناس راح يرحون الشيخهم والساده والشيوخ الاخذناهم زعلو
لان باعتبار ما قدروهم
امل //والتالي شلون
جمعه //همه يسوون هذا الشي حتى شنو يطلبون انگللهم صار

امي // اويلااخ شلون بينه اتجهولنه وتالي اشلون
هز راسه وگال //الله كريم لازم يصير الها حل
وباتت عمتي امل وزوجها وثاني يوم اجه ابو عادل وكال بعد اسبوعين الگعده بس همه عدهم شرط
ابوي //شنو من شرط
الشيخ // شرطهم يردونك طالب انت وابنك امين

ابوي بتوتر //ليش ابو عادل هاي ما صايره شلون نحضر الگعده
الشيخ // خايف طالب
ابوي // شلون ما اخاف ابني هذا يكتلونه
ابو عادل //ويجوز الهم راي ثاني
:شنو الراي شيخنا
نفخ الشيخ وگال //والله ما ادري بس مو كوتره يكتلونه شيوخ وساده وناس راحت عاتبتهم
لان اجو وما قدروهم وانت بكيفك طالب
امين جاوب // هذا هو ابو عادل اروح شنو اخاف اروح انا واخوتي المن زلم ومشوربين چم دووب نگعد
مثل النسوان شنو نروح ونسويلها صورة حل وين توصل خل توصل

الشيخ باوع الابوي // عفيه عليك عمي والله الناس كلها تحمد بيك وباخلاقك واسمعني طالب هاي مو
الخاطرك ولا الخاطر ذاك الي انقبر لا والله الخاطر هذا الشباب السبع والشريف گبل ما يدخل للديوان ولدي
او ولد اخوي داخلين گدامه
امين اجه وگال //سمعتي مو مروه
انا بخوف = ايي سمعت
:ديري بالج تحچيين يم امي لو نص كلمه

غورگت عيوني = امين صدك تروح للفصل
هز راسه //اي همه طلبوا حضوري شلون ابقى ضام راسي اروح والي يصير يصير اهم شي لا
لازم امي ما تسمع
= خايفه امين
ابتسم بوجهي وگال //منين خايفه ما يشيل الراس اله الركبه
=بس طلبهم غريب
هز راسه =/ ناس حقها شتطلب وهم همه عدهم شيوخهم واكبارهم اكيد ما يخلونهم يتهورون

= بس السوا جمال يخلي اكبر واحد يتهور
امين // ايي جمال هو ساس المصايب والحلو بالموضوع ابوج ايدافعله الهسه المهم مثل ما وصيتج اتصرفي عادي
او وصي سماح
هزيت راسي = ايي ان شاالله

وراح ابو عادل وابوي  ما گعد بالبيت راح ويا ما اعرف المن وعمتي امل راحت وگالت بيوم الكعده اجي
اما انا فالتفكير والخوف على اخوي كاتلني كل ساع يتهيأ لي يجوز يكتلونه لو ياخذونه رهينه ويعذبونه لو لو
هواي تخيلات وصور تجي ابالي وانا بس ادعي واستغفر واهم شي ما يبين عليه شي گدام امي

بهاي الايام ايوي صار كلش عصبي ومبين علي الخوف هو حتى ما زين لحيته ودووم منكب بشماغه وبس يدخن
والي يحچي ويا لو كلمه يكفر بي
مره لزم سماح موتها من الكتل لان كلها سوي چاي وهي تحلف تگول ما سمعته كفر بيها من ضرب ومسبه وغلط
واجت امي تفكها دفعها ورفسها برجله وگلها
: من تشوفيني اعاقب بنيه لا تتدخلين

خوالي دائما يتصلون واكثر من مره دز خالي ابو عبدالله مصرف الامي بايد جهاد الي چان كل فتره يمر علينه
ويسأل عن احتياجاتنا عكس گرايبنا الي صاروا محد بحالنه والي ايباعولنه انو احنه السبب بتوقيف حالهم واشغالهم
قبل يوم من الگعده ابوي وعمي جمعه ما گعدوا وحتى امين راح وياهم امي استغربت بس صادق كلها

: امين يطلع لان الناس منطيين عطوه انتي لاتخافيين
واجت يمنه عمه امل الي مبين من عيونها تعرف بطلب اهل البنيه يردون اخوي يحضر
بيوم الفصل اجه عمي جمعه واجه ويا ابنه احمد وابوي كاعد وامين بدل وحتى صادق امي گالت
:وين رايحين
امين جاوبها //يمه نروح نحضر الفصل
امي بخوف //لا يمه شتسوون
امين //مي خالف لا تنسيين ابونه ابحده ما عنده اخوان

جمعه/ افه عليك وانا وجبار او ولد عمنا شنو مو بعينك
امين //لا عمي والنعم منكم بس اقصد اخو شقيق الابوي ولازم احنه نكون موجودين
امي //لا هاي شلك بيها حتى ابو محمد هم ابنه ويا غير تفهموني وبعدين من يمته اهل الطلابه يحضرون
امين //يمه الصدك الناس طالبين حضوري
امي نشغت ويبس ريگها وهي تگول وتهز بايدها //لا يمه وين تروح ذوله يردون ايكتلونك

امين //ايي خلي ايكتلوني اذا هذا الشي يرضيهم يمه الناس ما تت من الجوع عافت اشغالها جمال راح وخلا
المصايب علينه
صادق //وحتى انا هم اروح
امي صارت تبچي وهي تگول // يمه وين ترحون اموت اذا يصير بيكم شي
امين اتقرب منها وباس راسها وهو يگول // لاتخافيين ياوالده انتي بس ادعيلنه والكاتبه ربج يصير

صادق// بعدين انتي ما تقبلين يكولون على ولدج جبناء احنه نروح والي يصير يصير
ابوي حچى ويه صادق //انت وين رايح ابقى اهنا
صادق //لا ما ابقى اروح حالي من حال اخوي
عمه امل ردت باستهزاء //يستاهل جمال يستاهل الواحد يفديله بنفسه سوى الجويده طيب مثل امه

ابوي خزرها وكال// ياالله امشونه
دارو وجهم وراحوا امي گالت بصوت مكسور //طالب
هو باوع عليها اتقربت يمه وگالت //طالب ادري بيك من يوم الاخذتني تكرهني وما تريدني واهلي
ياما گلولي عوفي بس انا بقيت وكل شي اتحملت على مود ذوله (واشرت علينه ) طالب وليداتي مو يصير
عليهم شي (وبچت واتقرب ا منها امين وصادق وباسوها براسها )

ابوي سكت ما جاوب طلعوا وامي رشت وراهم ماي بارد وتالي گعدت وسوتها مناحه وعمه امل اتصبر بيها
وتگلها// خيه ابو عادل اخذ ولده وجبار اخذ ولده وحجي نصيف اخذ ولده او ولد اخو الناس كلها اخذت ولدها
حتى ما يتجرؤون يسوون بامين شي وحتى اوليداتي هم راحو يكولون اذا نيتهم غدر ننكتل وما ننطي امين

امي باوعت العمتي // امل ليش انا من دون البشر متعذبه ليش انا تعبانه شنو الي سويته بحياتي
عمتي امل //سهام گولي ياالله المهم الله يحفظ الولد ويسامح اخوي ادعيلهم الله يحفظهم
امي  //شنو يصير على اولادي برگبة طالب ولا تصدگين يا امل اسامحه لان انا اتجرعت المر الخاطيرهم
وهو وجمال وملاك دوله ابحدهم ملوك واحنه خدم عدهم
عمتي تبچي  //ادري بكل شي سهام وين انا عنج استهدي بالرحمن وما تشوفينهم اله اجو سالمين غانمين ادعيلهم

ظلينه نترقب والصمت سيد الموقف وفات المغرب وصلينه وامي لازمه السبحه وتستغفر وتندعي الله يرجعهم
بالسلامه وصارليل ومحد اجه واحنه ما اتصلنه لان عمه تكول ما يصير گاعدين ويه زلم ونتصل لمن ما اجه
علي وگال // اشوف ضوه سيارات من بعيد اجت

عرفنا همه الي اجو امي لبست عباتها او وگفت واحنا نباوع من الشباج على صفحه جرينه نفس واحنا شفنا اخواني
راجعيين بخير وسلامه لكن انشوفهم ضايجين امي اتلگتهم عبالك چانوا مسافرين صار سنين ورجعوا
صارت تبوس بيهم وتشمهم وشفت عمي جمعه وجبار وحجي نصيف واولادهم جايين وحضرنا الچاي بسرعه
ورحنا وره البيت نتصنت وابوي گال //انهبنا بالفصل منين اجيب الهم
ابو عادل //طالب غصبن ما عليك تقبل بالفصل لو ماكو الدم يصير للركب
ابوي // وانا منين اجيب
الشيخ // بيع المعرض وانطي فصل الناس والبنات تالي

من سمعنا كلمة البنات رجفنا انا وسماح وصرنا وحده تباوع للثانيه ونتساءل شنو البنات تالي ابو عادل گال
: بابا صادق صيحلي امك وعمتك
وراح صادق وصاح الامي الي اجت هي وعمتي امل وسلمن وگفن على صفحه ابو عادل گال
: خويه ام امين عفيه عليج صدك بت اجاويد خوش مربيه ولد اسباع ونچرين وما يخافون الموت تره ندري بيچ
التربيه الج مو الطالب لان نعرفه چان ملتهي بس بابن اخو حتى مره احنه گاعدين بديوان واحد من الزلم گله ابو امين
هو طفر من مكانه گال والله ابدي تسموني ابو جمال لان هذا يشبهني وتربية ايدي

حجي نصيف //اي والله اتذكرها حتى بوكتها كلنه اتعجبنا
الشيخ //خويه انتي صدك ما ينخاف عليج وسباعيه
امي بخجل //اشكرك خويه
:وهسه انتي اختنه واحنه فصلنه وان شالله انحلت على خير
امي //الحمد لله والشكر
الشيخ //المهم ام امين نريد الله يستر على الولد ويكافيكم الشر والناس اتاذت وهم تريد ترجع لبيوتها خصن بيت
جمعه وابو جاسم نصيف وبيت جبار تره ذوله هم بوجه المدفع حالهم من حالكم

امي // اي خويه ان شالله يرجعون
الشيخ // ام امين الفصل مو بس فلوس الفصل نسوان
امي باوعت باستفهام بدون ما تحچي
الشيخ // ايي البت عاقد عليها ابن عمها وجمال خاطفها وهواي امور صايره والناس دمها فاير وما يبرده اله النسوان
امي بخوف // شلون خويه
الشيخ // يسولفولج بعدين بس المره من تروح هناك ويصير عدها جهال ويصير الخال وابن اخته تنحل الامور
وجمال انتو اقرب الناس اله لذلك البنات اثنينهن فصل وحده الاخوها والثانيه الابن عمها

امي گالت وهي تبچي // ليش وبيا قانون وبيا شرع شني ذنب بناتي
الشيخ //والله ندري ما الهن ذنب بس حتى الناس الي طلعت من بيوتها واتجهولت هم ما الها ذنب انتي بت اصول
وكلمة الزلمه اذا انثنت صعبه وهم انخاف على الولد
امي خلت وطلعت وهي تحتسب على جمال وراها امل وبقو.  الزلم بالديوان وابوي كل تفكيره بفلوس الفصل

امي بالغرفه وهي تلطم على وجهها الي صار عبالك دم وعمتي امل اتصبر بيها وتگلها //اصطبري سهام خلي نفتهم
احنه اجينه يم امي ولزمنه اديها واحنه نبچي وهي تگول// ياربي شمسوين عدك ياآلهي

الساعه 11 ونص راحوا الزلم وعمي جمعه بقى هو وعمتي وابنهم
من طلعوا اجه صادق وگال //يمه انتي والبنات عمي جمعه وخالي يردوج
عمتي امل //گومي خيه خلي نشوف بلكي لگولهم حل 
لبست عباتي وسماح لبست الاسلاميه ولفت الشال ودخلنه وامي تباوع الامين الي منزل راسه بقهر وهي تحچي
ويا بعتب
:ليش ولك يمه ليش مو انت سندنا تروح على مود تفصل باخواتك
خالي باوع الامي وكال //اسكتي سهام السوا امين اكبر زلمه بالعشيره ما سوو ولوو ما امين چان ما كو فصل
ولا الناس رضوا بس امين صدك رجال
امي باوعت خالي گال //ايي لا تتعجبين ابنج كسر عين الناس واله العالم حقها مو بس تحرك بيوت وتكتل حگها
كل شي تسوي

ابوي //شنو كريم چنك متشمت
خالي بنتر //مو انا الي اتشمت باختي او ولد اختي وامين ارباتنا
ابوي //اه من يمته
خالي بعصبيه // من زمان طالب من زمان من يوم نجح من صف السادس وترمت علي يشتغل وانا اخذته
يم حجي عبد وانت ماچن عدك ولد ملتهي بجمال
جمعه //هسه عوفونه من هذا الحچي وخلونه نشوف شلون نتصرف

طالب //مو انتم رضيتوا بالفصل مو تگولون الفسده يشيلها راعيها انا انهبت لو ابيع العدي والما عدي ما اوفي لو
على البنات من باچر ازفهن بس الفصل الكسر ظهري شنو خاف اولادي مجمعين من شغلهم وراح يطوني

الكل اتعجب من كلام ابوي الي ما همنه احنه يهم بس بالفصل ومنين ايجيبه
امي ردت وگالت وهي ترجف //اسكت طالب لا تفك حلگك من يمته تدريلك بولد لو بابنيه ملتهي بجمال وملاك
الحد ما اتجهولنه والحجي انطانه هاي الخرابه ياالله امين وصادق نامو بغرفه ابحدهم تتذكر فلوس البنيان الجابوها
اخوتي بنيت بيها غرفه الجمال لان ما يگدر ينام اله ابحده لو ملاك الي من تجي تباوع النه بنص عين عبالك خدم
عدها لو هاي (واشرت عليه ) هاي الي موگف حالها صار سنين على بو بت عمه ويريدها وجاي ايدور بيت
وبس يلگى ياخذها هسه قرت عينك راح تروح فصليه لعيون ابن اخوك

ابوي //انچبي وحطي بحلگج انعال
خالي راد يحچي بس امي سبقته //ايي حاطه من زمان بس انت طالب شگد ما تخاف من الله تهم بفلوس الفصل
طلع فلوسك العلى گلبك صار عشر سنين ما محصلين منك بس كيلو اللحم كل اسبوع
الكل باوع الامي// ايي ليش متعجبين كله من امين اكلنه وشربنا وهدومنا انا وبناتي هو يجيب النه بالاسبوع كيلو
لحم وبعد كل شي ما نشوف منه بس من تجي ملاك ينگل علاليك خضره وفواكه ويطيها مصرف ياالله اجه
وكت الفلوس الضامهن طلعهن بس مو تنطيهن فصل لا روح فك بيهن البنات

ابوي ما رد بكلمه عمتي امل گالت //صدك جمعه شگد الفصل
مية مليون وثنين نسوان
الكل اتفاجأ من الفصل عمتي ردت //شلقصه شدعوه
عمي جمعه //شنو شدعوه گوه قبلوا بالبدايه گالوا انريد دم وبعدين نگعد للفصل
امل //فدوه جمعه هو وكت فصليه الناس اتطورت وحرموا هاي الشغلات
جمعه //اي صدك بس مو بقضية جمال
امل //شني الناس الاجاويد ما اتدخلت

جمعه //اتدخلوا بس السووا ابن اخوج محد يرضى بي خاطفله بت شابه ومخطوبه والله اعلم شمسوي بيها
كلنه اتفاجأنه بالكلام هو استردف // ايي ليش مستغربين جمال خاطفله بت مخطوبه الابن عمها وعاقد عليها
ونعم الله على الناس قبلت بالفصل اي واحد ابدالهم ما يقبل
خالي //ايي صحيح اصلا ولا ابالهم ياخذون فصل
امي //شلون يعني ما ياخذون فصل چا شيردون
خالي // بالبدايه نيتهم  يكتلون بدال البنيه الي انخطفت وبعدين يگعدون للخطف وغير امور لو ما امين الله يخلي
چان الله العالم شصاير

استغربنا وباوعنا العمي جمعه الي هز راسه// ايي ليش متعجبين اليوم السوا امين زلم شكبارنا ما سوينا گدام
الناس ومن صار حچي ومهادد گام امين وانطى السجين الاخو البنيه وگاله
:هاك خويه اذا دمي يحل المشكله والناس ترجع وما تتجهول هذا انا گدامك وقدم رگبته
عمتي باوعت الابوي وصارت تبچي وهي تگله // صدك طالب
جمعه // ايي صدك خجل الناس وبردهم بحيث اخو البنيه گعده وگال استغفر الله ولا تزر وازره وزر اخرى
لذلك من طلب شيخهم النسوان الكل سكت

امي وهي تبچي //بس شني ذنب بناتي ياخذونهن عليمن
امل //ذنبهن بنات عم جمال
امي باوعت الابوي وهي تگول من عسا احترك الچلب النذل ما متروسه عينه يدور حرام فات على بنات
الناس وخطفهن
اميين //يمه اسكتي
امي //لا بعد ما اسكت اشو طاحت براسي وراس بناتي عمر واحنه نخدم بجمال وملاك على ابو ايتام وخطيه
وشستفادينه هاي البنيه انكسر بختها لا هو اخذها ولا خلاها تشوف قسمتها انا بعد ما اسكت باچر اروح على شيخهم
واسولفله دولابي انا والبنيات وهسه راح ياخذونهن دون النذل

خالي // حقج خويه بس تره من ما ترضون الناس ما تجبركم خلي اگلج تطيح براس اولادج لان الناس يدرون
بطالب هو ولي امر جمال وهو ملفي وگاعد عده وخاطب بته
امي گعدت بالزاويه وصارت تبچي واحنه يمها نبچي اتقرب امين يمها گال
:يمه لا تبچيين لا انتي ولا البنات باچر ارفض الفصل وشيصير خلي يصير
خالي //لا امين انت شتگول لا تتهور دير بالك وانتن خالي تره اذا ما تقبلن الدم يصير للركب وتطيح بخوانچن

انا جاوبته بدون تفكير = هذا هو خالي (باوعت الامين ) انا افديك بروحي انت اخوي وحزام ظهري
امين جاوبني //والله يامروه لو رايحات على مود ازغر واحد بالعشيره ما استهضمت بس على مود
جمال السگط حسافه
ابوي رد //انچب ولك،خاف تشوفوني ساكت تره مو عجبه الزلم كل شي تسوي
امين باوعله باستهزاء //الزلم بويه مو جمال
ابوي //كلكم افديكم الجمال تمنيته عدل چا عرف شغله وياهم
امين باستهزاء //ويامن

ابوي //ويه ذوله اخوان البر......الي جايين مسووين روحهم بس همه وبس وهمه جبانيه وگرون
امين // ها يعني انت اذا باقي جمال عدل ما تهتم الهاي سالفته
ابوي وياشر باصبعه //وافديكم كلكم اله جمال سندي وحزام ظهري نشمي وسبع مو چي مات طلعت لسنتكم
امي گالت //والله جمال على دگته الناقصه لو ظال عدل ما اخلي يوصل للبيت لان ما عده غيره

ابوي هد على امي وهو ايگلها //اس ولا كلمه انا اعرف شلون اتصرف وياج
امي //الهلحدود جاي تتهدد عليه فوك ما جهولتنا من بيتنا وهسه رديت ع البنات كله على مود هذا الناقص السگط
ابوي اجه يريد يكمش امي وعمتي صارت بيناتهم وهي تگله //كافي طالب عيب منا اخوها او ولدها
ابوي بنتر //ولا اعترف باحد اگص السانها وهسه اطلگها ولا يرفلي جفن
خالي //شنو هالحچي عاد احترم وجودي

امي //علوا اتطلگني المن ابقى اذا بناتي يرحن او ولدي ياساعه يتكتلون وانت تدافع الجمال
ابوي //تغديله فدوه انتي اوولدج وهو بگبره
امين باوع الامي يعني اسكتي وطلع وره شويه رجع وبيده علاگه باوع الابوي وگله
: ابو امين تتذكر قبل چم سنه لمن توني مشتغل ويه الحجي واجاك وگالك جماعه رادوا يسلبوني
ابوي باوع الامين الي استرسل بكلامه// وبيومها اجاك بشهادة امي وعمتي والبنات بدون ملابس داخليه ولا ساعه
ولا نقال تتذكر مو هاك (وشمر العلاگه ) هاك هذني هدوم وساعة ونقال النشمي انا الي ضربته وطيحت حظه
ودميته تدري ليش لان يجيب صور طايح حظها للبيت واكثر من مره اتحرش باختي بتك هاي الي خاطبها صار
سنتين وما اخذها بس المهم كسر بختها وهسه راح تروح فصليه على موده هاك ابو امين شوف ابن اخوك السبع
اخو اخيته

(باوعلنه امين وحچى بنتر ) وانتن محد يجبرچن والله لو اعرف اموت انا وصادق وعلاوي ولا اخليجن ترحن
ذليلات غصبن عليچن
انا وسماح رحنا الامين حضنا وگلناله //احنه روحنه وعمرنا الك انت وصادق وعلاوي
رحنا للغرفه واجت  عمتي وامي واحنه نبچي عمتي  كالت
: كافي عمه ما باليد حيله الناس على گولة جمعه فاير دمهم ومتخبلين لا يكتلون امين لو صادق ومن فگر امچن
الي اتحملت كل شي الخاطيركم

صرنا نبچي بحرگه اكثر لكن من اجونه امين وصادق اضطرينه نسكت وصادق يباوع الامين ويگله
:هذا الكلام الي گلته الابوي صدك
:شنو اچذب عليكم
:وليش ما گتلي
:اگلك وانت بصف خامس ابتدائي شتريد تسوي (نفخ وگال ) الصار صار

امي هزت راسها وگالت //ايي الصار صار وهو الملعون لعبها صح گام يحچي براس ابوهن بطلهن من المدرسه
وانوب من شاف الناس صاروا يتخطبونهن گطع قسمتها اريدها بت عمي واريدها وحتى من حچيتي على سماح
ابوهن نز شلون اطي الزغيره گبل الچبيره
امل// والله اعلم لو ما الله ماخذه شضام الامين من ضمه
امي //الله لا يرحمه دهورنا

اجه خالي وعمي جمعه وياهم ابوي وخالي يگول |/ سهام انتي هم اعذري طالب الصار بي مو شويه
امي ساكته وتبچي وعمتي گالت //لحد يلووم سهام الله يساعدهم
خالي راد يغير الموضوع //وهسه طالب شراح تسوي
جمعه //اي لازم تتحرك بسرعه نودي فلوس الفصل ما سمعت شنو گالك ابو عادل
ابوي //اي الصبح اروح اشوف ملاك واحچي وياها
امل //ملاك شنو وتحچي وياها
ناسيه هي اخت جمال وهم ......

عمتي //شكو طالب غير اتفهمنا
ابوي //باچر اروح ويصير خير
امل// وانا اروح وياك
ابوي سكت وبليلتها محد نام خصوصا انا انا الي جمال حاربني من انا زغيره وحطم احلامي ولليوم جاي ادفع الثمن
الصبح الكل راح وابوي هم طلع وره الظهر اجه ابوي وعمتي امل وامي سالتهم
:ها شصار شگالت ملاك

امل بعصبيه // خايبه خيه يا ملاك يا صخاام كلها براسكم وداعتج جمال طلع متزوج وعده ولد واخوي يدري
وملاك هم تدري وهسه المره لازمه عده والمعرض صار الابنه ومرته وگالت لو هذا الفلس ما تتنازل
لو تتكتلون كلكم
امي اتدنت على ابوي الي چان مدنك وهي تگله
:شنو من بشر انت تدري بابن اخوك متزوج ومخلي بتك مثل البيت الوقف ليش شصاير شلازم عليك وساكت له
امل //ما لازم شي بس هذا سحر رباب وعشگها وبعد الحچي ما يفيد طالب مو بس راح يخسر بناته لا طالب
حتى الفلوس الخلص عمره يجمعهن راح يرحن منه لان هو الي راح يدفع الفصل

//////////////////////////////يتبع