رواية بعد فوات الأوان الفصل السادس 6 - بقلم آنين الليل

بعد فوات الاوان
بقلمي آنيين الليل
لاتنسوون التصويت والتفاعل بين الفقرات

///❤️🌷❤️///

مروه
كلنه استغربنه من كلام عمتي
امين باوع الابوي وساله // صدك الكلام الي تگوله عمتي
عمتي بعصبيه // شني اچذب عليك كله براسكم( وظلت اتعد اباصابعها ) اخواتك والفلوس والضيم وحچي الناس
كله مريود منكم ما شاء الله جمال طلع ماخذله مره وابوكم يدري وعده ولد ومن حچى ويه ملاك گلتله
(عمتي تعيب على ملاك )
: انا ما عليه رجلي رجال غريب لا تدخلوني ابمشاكلكم

ومرته ما قصرت ويانه السانها اطول من النعال // جايين على فلوس اليتيم ما انطي ولا فلس المعرض الي والابني
وشتريدون تسوون سوو انا ماعليه بكل شي اخذ حق ابني بالقانون (عمتي باوعت الابوي )
: عليك الله طالب هاي منين جابها جمال من يا زباله
امي // امل تحچون صدك
امل // اي وروح ابوج نحچي صدك جمال متزوج وعنده ولد واخوي هو الخاطبها اله وهي تعرفه اصلا بالبدايه
لاگته تبچي وهو ما قصر شايل ابن جمال ويصرخ

امي تباوع الابوي وهيه فاتحه عيونها  وهوه يخزر بعمتي امل ويتوعد امي بنظراته يعني اسكتي هالمره انا الي
قررت احچي
اجيت يم ابوي وگتله =بويه يعني تدري بابن اخوك متزوج وانطيتني اله ليش شنو ذنبي بس اريد اسالك
ليش تكرهنا
ابووي بعصبيه // بس ولا كلمه امشي منا

جاوبته وانا اهز براسي = لا هالمره ما راح اسكت انا اكلك ليش تكرهنا لان عشگ رباب اخذك من نفسك من جهالك
وزوجتك صرت تشوفنا اعدائك ومن اخذتها صارت بس هي دنيتك هي وابنها وبتها ومن ماتت عبالك امي
موتتها لان هي سممت عقلك بس حتى تبقى مسيطره عليك هي وابنها وبتها
= بويه ولا يوم حاچيت نفسك وفكرت وگلت ليش اكره ولدي وبناتي ليش اكره مرتي همه ما عليهم بالصارلك

= مو امي السبب ولا انا ولا اخوتي الصار الك والسبب بي هي رباب رباب حبيبتك الي چانت تضحك عليك
واخذت اخوك وگلتلك
عبالهم جايين يخطبونها الك او وافقت وتفاجئت من انطت الموافقه اتفاجئت جايين يخطبوها الچاسب ومن مات
چاسب اتزوجتها وهي تسمم بافكارك علينه وهاي هاي النتيجه جمال مات بس قبل لايموت حطمنا وخسرك
كل شي تملكه خسرك فلوسك الي تستخسر بيهن تجيبلنه لو دشداشه وخسرك بناتك الي راحن يروحن ذليلات
الله يعلم شراح يصير بينه هو مات وابنه ومرته راح يتمتعون بفلوسه واحنه نبقى ضحيتك وضحيته

امين //الحقير الجبان بس الي معجبني انت يابه انت تروح وتخطبله وتزوجه وهو كاسر بخت بتك ويوميه ايأجل
زواجه منها بحجة اريد اشتري بيت اريد ابني اريد الم نفسي
امل //كافي عمه لاتلومون ابوكم جمال مصاحبها وغالط وياها ومهددته وابوك راح خطبها اله وزوجها
امين //هاا واختي بيت وقف (هز راسه باسف وهو يباوع الابوي وسأله ) بويه وين جمال هسه ؟
ابوي باوعله وجاوبه //شنو ما تعرف وين جمال
امين //اخذني على گد عقلي وين جمال
ابوي جر نفس //جمال مات

امين هز راسه // واندفن يعني جمال من طلع ذاك اليوم ما مخلي الموت اباله وهسه جمال هو وربه وعمله زين بويه ما فكرت
انت تموت بأي لحظه ما فكرت الله يحاسبك بالسويته بينه انا رجال اتحمل بس اخواتي الي ما خليتهن يندلن طريقهن
شلون راح تواجه رب العالمين شتگله
ابوي //والله خوش ناصبيلي محكمه وتحاكمون بيه بكيفي بناتي اشمرهن للچلاب السود
امين //وشمرتهن رووح واكعد بالديوان وطلع جگارتك ورثها وسولف الربعك گلهم ابن اخوي سوى الفاينه
واطيت بناتي فصل شوف خلي اگلك لا تشوفني ساكت اگدر هسه اروح وادلي على ابنه وع المعرض والي
يصير يصير

امل لزمته // استهدى بالرحمن ابنه طفل ومن تنكسر العطوه يكتلون واحد منكم وانوب من يكبر ابنه وين يلگونه
امين هز راسه // اي عمه انا اريد اروح يكتلوني حتى ابوي يسوي فاتحه ويبچي بيها مو عليه لا  على جمال السبع النچر
رحت يم امين وگتله =مو تگولون شمرني للچلاب السود اخذهم وهم احسن من جمال الحقيرالي ما عنده غيره
امين //انتي شتحچين
انا بضحك =والله احسن من عنده نذل وحقير يوميه اشتمه وانعل امه وابو
ابوي //انچبي حقيره

امين بعصبيه وهو متقرب على ابوي // لا ما تنچب تحچي بزودها اصلا منو راح يبقى يمك انت التقبل البناتك ينذلن
على مود واحد جايف ما نبقى وياك روح الملاك لو الهاي الخطبتها الابن اخوك بس قبل كل شي تنطي الفصل
ابوي باوع النه وهو متعجب  //صدگوني انا من رحت الملاك ومرته گلت اذا يطوني لو نص مبلغ الفصل انا
بالفلوس العدي اروح واطيح ع الجماعه وانطيهم فلوس ابدال النسوان لكن ......
امين //لكن محد رضى مو
ابوي هز راسه باوع وگال //اول اودي فلوس الفصل وانوب اودي جماعه يطيحون النسوان وياخذون ابدالهن فلوس
امل //ومنين تجيب طالب

ابوي //اعرض البيت للبيع
عمي جمعه گله //شنو من كل وعقلك تبيع البيت
ابوي //ايي ابيع البيت وافك بناتي
الكل اتفاجأ من كلام ابوي الي گال //عبالكم اكرهكم انا صدك عصبي بس ما اكرهكم وصدك فضلت ملاك وجمال
بس چنت اگول ذوله لا ام ولا اب  ايتام ويتحسسون من كل شي وانتم انا وامكم موجودين من اقسي واضرب واغلط
ترحون الامكم بس ذوله وين يرحون من احد يسمعهم كلمه لو يكسر خاطرهم
وره چاسب عشت وحيد چنت اريد ولد وعزوه وشفت جمال كبر اگبال عيني واعتبرته ابني مو ابن اخوي بس والله
لو ادري بي يتحارش ابعرضي باديه چان موته

اتقرب من امين وگال // انا يابابا يمكن چنت قاسي عليكم
امي جاوبته //بس ما توصل بيك هو خاطب بتك وناهي كل واحد يجي يخطبها وانت تروح ويا وتزوجه
جمعه //ام امين طالب سووا هالشكل اتلافه الموضوع
امل //ايي لازم يسوي هيج لان المفلوك هواي مكسراته لو ما مزوجه چا هم صاير اكثر من هذا السوو الناس

جمعه //طالب لا تستعجل وتبيع البيت اول شي خلي نوديلهم فلوس الفصل وابو عادل ياخذله ناس ويطيح على
شيخهم ومن يرضون بالفصل دون البنات ذاك الوكت بيع البيت
امين //ايي والله عمي وعلوا يخلونه نرجع البيتنا وانا ارجع الشغلي
جمعه //لا لا هسه اگعدوا واسكتوا مو مال شغل وطلعه ورجعه وانا باچر انا وابوك اروح اشوف گرايبنا منو
يساعد بشيلة الفصل

وثاني يوم راح عمي جمعه وعمتي امل وابوي طلع وياهم وصار ابوي يطلع الصبح ويرجع بالليل فايت
وكت واحنه نشوف الكسره والخذلان بعيونه  عرفنا هذا الحزن لان عرف بجمال شگد چان حقير وشگد هو جبان
ما صرنا نكعد يمه ولا هوه يعيط لو يتامر

وره اسبوع اجه ابو عادل وعمي جمعه واجه اخو جبار وهواي ناس وعمتي امل هم اجت وصادق اخذ الچاي
وراح يصب
عمتي امل گالت // جمعه وطالب حفت رجليهم يمشون ع العشيره ومحد قبل يشيل وياهم
امي //ايي خيه الناس تگلج شغلة فساد ماليش نشيل وياهم
امل //صدك والاثر اكثر من دروا بجمال ماخذله وحده  يسولفلي جمعه يگولون اكو ناس گالت الطالب المفروض انت
تخسر النه اتوقفت اشغالنه وطلعنه من بيوتنا ما نخسر وياك ولا فلس
امي //صدك حقها العالم

امل //انا اگلج جمعه شال خمس ملايين كل العدنا وجبار مليونيين وبيت ابو نصيف مليون والناس الباقيين گدروا
يلمون منهم خمس ملايين
امي هزت ايدها وگالت //شنو خيه شيشيلن وشيسوون وملاك ما رجعتي عليها
امل بونه // رحت مره ثانيه الملاك وگالت عمه فكينه رجلي ما يقبل طلعيني منها ومن گتلها بيعي البيت المن
ورث ابوج وساعدي عمج الي رباكم ودللكم گالت
...(عمتي اتحسرت ) امي سالتها //شگالت امل شبيج اتحسرتي
امل //فتحتلي باب الصاله وگالت اطلعي بره مو اخوي مات ما الي اي شغل بيكم ولا اعرف اي احد بيكم
ودتچ سهام وبناتها يردني ابيع البيت

سماح  //چا شگد طايح حظها وچلبه
امي //وينه طالب خلي يجي ويشوف بت اخو شسوت
امل // اي يدري وهالساكت
امي //تدرين مره كسر خشمي على مودها گتلها اغسلي المواعين الي اكلتي بيهن هي ما ردت عليه رديت گتلها
عمه ليش ما تحچيين وياي شنو انطرشتي وهي راحت تركض الطالب وتبچي وتكله مرتك تغلط عليه وهو اجه
ضربني بوكسي بخشمي كسره اليه وتلث تشهر اراجع عد الاطباء وغيرها وغيرها هسه خوش حصلنه فلوسنا
وبناتنا ومتجهولين من بيتنا والناس تدعي علينه

امل //اذكري الله خيه الصار صار
امي تباوع للسما //لا آله الا الله
راحوا الزلم وبقت عمتي وزوجها ورحنا  گعدنا بالطارمه وعمتي سالت ابوي //هاا طالب شصار
ابوي //ما صار شي الاجاويد لمولنه 13مليون والباقي لازم من عدي
امي //ومنيلك
ابوي //تدبر (باوع الجمعه وگله ) باچر نطلع نودي الفلوس ونشوف ابو عادل شراح يسوي
امل //على مود البنات
ابوي //ايي هو هذا الي راح يصير
امي //الله كريم

بهاي الاثناء سمعنا هورن سياره طلع امين شافه جهاد احنه دخلنه للغرفه وهو گعد وياهم بالطارمه سوينه چاي
واجه علاوي جايب علاليك مسواك عرفناها من جهاد  وهاي كل ما يجي يجيب ويا گعد نص ساعه وبعدين
راح ما قبل يبات رغم لزموا بي
من راح جهاد احنه درنا للطارمه نريد نعرف جهاد ليش اجه وراح بنفس الوكت
امين باوع النه وگال// يمه تعرفين جهاد ليش اجه
امي // اي يمه جايب مسواك ويسال علينه خطيه من صارت المصيبه الهسه ما عافك خوش ولد الله يستر علي
امين هز راسه //لا يمه مو بس هيج
امي //ها چا شكو

امين //يمه جهاد جاب خمس ملايين وانطاهن الابوي مساعده للفصل
الكل اتعجب عمتي امل //يعني الولد الغريب يتذكر الصداقه والعشره وجاب فلوس وملاك نست التربيه
والتعب والدلال وطردتني
جمعه //اي امل لان اصيل وابن حلال

ونمنا واحنه كلنه امل ان يقبلون ياخذون فلوس ابدال النسوان  الصبح اتريگوا وراحوا وامين هم طلع وراهم امي
سالته گلها // ذاك اليوم من طلعت وخابرت الحجي هو گلي تروح على واحد اهنا يعرفه ومسولفله على حالتنا
والرجال گايله خلي يجي يشتغل واريد اروح اشوف الشغل
امي //يمه امين اخاف عليك خاف ذوله الناس يراقبونكم مودين عليكم ناس تنطيهم اخباركم ،
امين //لا تخافين الكاتبه الله يصير
امي //دير بالك يمه الله وياك

وراح امين اتأخر وامي گلبها مثل النار طلعت انا وعلاوي ع الشارع العام حصلنه تغطيه واتصلنه بي جاوبنا
ماكو شي بالشغل
طمنه امي والعصر اجه امين وهو يگول// الرجال عنده محل مفروشات وعنده عمال يعني مامحتاج عامل بس
الخاطر الحجي گلي تعال واشتغل
امي //يمه هسه خلي نتاني بلكي يدخلهم رحمن ويكولون ارجعوا لبيوتكم
امين //اروح اشتغل على ما الله يحلها

بليلتها ما اجه ابوي ومن رجع امين گال //هو مخابر ابوي وگايله لا تقلقون عدي شغل
ثاني يوم من الفجر راح  امين يشتغل بس هالمره مو بمحل لا يطلع ويه العمال ينزل ويصعد بضاعه
وابوي ما اجه ما اجانه اله وره خمس تيام اجه هو وعمه امل وزوجها وره المغرب چنا نصلي وهمه بس وصلوا
اتوضوا وصلوا بعدها حضرنا الحمام الابوي ورحنا انا وسماح نحضر العشا وره ما اجه امين من الشغل
صبينا واتعشوا واحنا هم اتعشينه وسماح اخذت الچاي وصبت واحنه مترقبين نعرف الصار لان امي سالت
عمتي امل الي گالت //ما ادري حالي من حالچن طالب وجمعه اجو وبوجهم الكم

امي // يعني ما سالتيهم
: والله سالتهم لكن همه ولا جاوبوني
امي بين عليها الارتباك وباوعت الامين الي سأل وگال //ها بويه بشرو ان شالله انحلت المشكله
عمي جمعه حاول يغير الموضوع سأل امين // شنو اشتغلت على عرف الحجي
امين هز راسه //ايي لكن استادي الجديد شغلني احمل وانزل
جمعه // خير ان شاالله بس هذا تعب عليك
امين //ايي عمي  شسوي يراد مصرف اشو ساكتين غير هم نفتهم

جمعه جر حسره وباوع الابوي وگال //ما قبلو
امي سألت //بشنو ما قبلو
ابوي //هاي صار النه اسبوع نتوسل ما قبلوو لا يطيحون فلس من الفصل ولا ياخذون فلوس ابدال البنات
امين گال //شنو شيخنا شنو شغله
جمعه //الرجال ويانه ما قصر يركض منا ويروح منا اخذ ساده وشيوخ بس همه مصرين والسوو شي ما
يخطر ابال احد

امل //شلون شسسوو
ابوي //من رحنا ذاك اليوم ومرينه على ابو عادل وحچينه ويا الرجال ما قصر اخذنا وراح على سيد ورجال شيخ
والسيد اخذ نص الفلوس گال نوديهن الهم گبل موعدهن ونسولف وياهم وراح السيد الشيخهم ومناك راح الاخو
البنيه الي گله انطيني مجال اتشاور ويه اهلي وعمامي وثاني يوم على اساس يرجعلنه الخبر ما رجعوا يوم ثالث
ابو عادل خابر السيد يستفهم منه والسيد گله ما رجعولي خبر هسه اخابرهم
وره تقريبا ساعه السيد رجع خابر ابو عادل وكله

: اهل البنيه وبيت عمها شالوا الغير محافظه
كلنه استغربنا عمتي //ليش عوود
جمعه // مبينه هاي رساله اذا ما تنطون الفصل احنه كتاله وما علينه اي ديه لا بعشاير ولا بقانون
امي //الله اكبر عليهم حسبي الله ونعم الوكيل
جمعه // لا كولي الله اكبر على السواهه عمي الناس حقها شنو لحمنا غالي ولحمها رخيص

امي //وهسه شلون
ابوي //رجعنا انا وابو عادل وجمعه ورحنا على شيخهم والرجال اتفهم الوضع وراح ويانه للحله
امل // شالوا للحله ؟
هز راسه ابوي //ايي شالوا للحله وهناك انا وجمعه بقينه بالفندق  وابو عادل والسيد وشيخهم راح وهمه ما قبلوا
حتى ياخذون الفصل
امين // ليش

ابوي //اخوها گال ما دام وديتوا فلوس الفصل وبعد منهن رجعوهن يكملوهن ومن يكملن الناس ترجع لبيوتها
بس احنه بيت طالب  نبقى سنه بعدين نرجع
والفصليه تتحضر يمته ما نريد نجي ناخذها والثانيه وراها يجوز بشهر بسنه
امل // شنو محد گدر ايأثر عليهم

جمعه هز راسه وگال //لو تسمعون ابو عادل شنو سمع من اخوها الي گال
والله لا بنيتي اخذ فلوس ولا بنيتي اخذ نسوان النيه العدي بالبدايه احرك البيت وبعدها اخطفلي وحده واذلهم بيها
وتالي اكتل زلم اثنين وارجع البت لكن تصرف امين ورجولته كسرت عيني وخلتني اقبل بالفصل على هالاساس
لا كل ساع يجوني ويجيبولي ناس گعدنا واتفاهمنا وانشدت رايه بعد لا يحچون زايد تره ما يصير خير

نزل هذا الخبر علينه كلنه مثل الصاعقه بس انا اكثر شي لان چان عندي امل ان يفكوني لكن من الكلام الي
سمعته بعد ما بقى عندي اي امل لازم اقبل بالشي الصار مو الخاطر احد بس الخاطر اخوي الي ضحى
بنفسه على مودنا
ولازم نقبل بالامر الواقع الي يحتم عليه اكون فصلية شرف على مود واحد ما يملك ذره من الشرف
وراحت عمتي وهي الدمعه ما نشفت من عينها حالها من حالنه وابوي ابد ما گعد بالبيت يحاول يجمع الفلوس البقن

واتقبلنه الامر خصوصا وابو عادل وابوي شگد حاولو اياثرون على شيخهم لكن بدون فائده
امين  صار يشتغل وعمتي راحت جابت نقل الصادق وزينب وعلي بعد ان استحصلت موافقه من التربيه لان غياباتهم
هواي واتساهلوا وياهم  من عرفوا بقضيتنا
وعمتي امل وجهاد صديق امين راحو وجابو ملابسنا والثلاجه والمجمده والمكيفات وصار ابوي يطلع يبيع
ويشتري بالحلال
واحنه بقينه بعيدين عنه لان نحس بي هو ظلمنه على الرغم شويه اتغير لكن بوكت الي يضوج يصيرما
يشوف گدامه

چنا كلنه مقهورين وامي تقريبا ابتعدت عن ابوي صارت دووم گاعده وتبچي ومن تشوفنا تسكت
صرت انا وسماح نطلع بره واخذنا قطعه زغيره وقررنا نزرعها خضره امي جابت بذور وزرعنا بيها
ريحان وكرفس وفجل بعدها زرعنا ورد وامين جاب فلاح زرع نخلات وسوينه قفص ربينه بي دجاج وبط
لان ما صرنا انخيط ولان احنه بالمنطقه ابحدنا يعني ما يمنا جوارين ورغم الغربه لكن ارتاحينه لان لا جمال
ولا اخته وحتى ابوي ما صار ايدقق على كل شي

امين دز على جهاد وعرض علي يشتغلون سووا ولان جهاد شجع امين يشوفولهم محل وفعلا امين لاگي محل
وماجره وجهاد جاب فلوسه وافتتحوا بي محل مفروشات وبعد شهرين صار عدهم راي يفتتحون ورشة نجاره
ومن عرف ابوي شجعهم لان امين گله هواي ناس يشتغلون بغير قضاء وبغير محافظه
وصار امين يشتغل وصادق وزينب وعلي انتقلوا للمدارس الي يمنا

اشوف امين متوهس بالشغل وصادق وزينب وعلي يدرسون رغم ابوي صار يلح على صادق ان يشتغل
ويه امين لكن امين ما وافق وگال خلي صادق ينتبه لدراسته ام باقر اجتنه مرتين وبهاي الجيات ما جابت طاري
المعن وعيونها تگول هو صرف نظر بالارتباط بيه

انا وسماح چنا بالضبط مثل المحكوم بالاعدام وينتظر تنفيذ الحكم وهو ما يعرف يمته ينفذون
بعد ست تشهر عرفت انو امين داز ناس على اهل البنيه بلكي يقبلون ياخذون فصل ابدالنا لكن امين بيومها اجه
ضايج ومقهور وما حچى ومن لحينه زايد فگال
انو اخو البنيه دزالي خبر وهو يگول //انا احترمتك لان شفتك رجال بس ما عبالي بناتكم سلعه تدفعون ابدالهن
فلوس خلوهن بغلاتهن يوگفن بحر الدم
ومن يومها عرفت انا صرت فصليه من لحظة الي اجه بيها خبر جريمة جمال

الكل ذعن للامر الواقع وصارت امي وعمتي دووم ايگعدن وياي ويوصني انو الفصليه لازم تتحمل كل شي
راح تسمعين اشكال الكلام  والغلط والمسبه ولازم تسكتين وتتحملين ولازم تكسبين رجلج.
عرفت انو الفصليه عباره عن وحده اشبه ما تكون جاريه انباعت بسوق الرقيق لكن بشكل مختلف انو هاذي الجاريه
راح تكون الرجل واحد شرعا ولكن تكون خدامه الاصغر واحد موجود بالعائله

من مات جمال ارتاحينه رغم كل شي مر بينا لان جمال چان عكس اسمه انسان قبيح بافعاله قبيح الى ابعد الحدود
چنت اگضي  الليل بچي ودعاء انو الله يخلصنا من هذا الكابوس المرعب مثل ما خلصنه من جمال وشره
لكن دون فائده بعدها عرفت من عمتي امل انو معن اتزوج والي خبرتها ام باقر بعد ما مرت عمتي على بيتنا
حتى تجيبلنه اغراض
بوكتها انا انقهرت وصرت ابچي ابحدي لان چنت اتمنى اكون من نصيب معن لكن مثل ما كتبت الدنيا نصيب

شغل امين ما شاء الله كلش زين والسبب لان امين ابن سوك يعني مو جديد ع الشغله فهو بدا بمشروع فراشات
وبنفس الشهر اجر محل وسووا ورشة نجاره وبدا يشتغل بالبوفيات لان اغلب الناس ما چانوا يمتلكون قوه
شرائيه تخليهم يفصلون غرف نوم فاكثر شي اذا اشتروا فراشات يسالون على بوفيه ينضدون عليها فراشاتهم

وصار امين يشتغل ويا عمال اثنين وجهاد يمر علي كل اسبوع ويجي ويا يتغدون خصوصا وجهاد من يجي جايب
ويا فواكه وخضروات ودجاج ولحم وسمج وهواي اشياء  ودووم امي تگله انريد نفرح بيك كبرت يمه ولازم تتزوج
وهو يرد عليها // ان شاءالله

بقينا ابيت الحجي عشر تشهر وكل شهر امين يدز بايد جهاد مبلغ اجار للبيت وكل مره جهاد ايگله الحجي زعل عليك
ويگول ما بيناتنا لكن امين چان يوصي جهاد ويگله عن الحلال والحرام وهو سووا علينه فضل
وصار امين ايفكر يستقر بهاي المنطقه ورغم انو احنه نحب منطقتنا ونتذكر الموقف الي سوو الجوارين ويانه
لكن نتمنى ما نرجع خصوصا انا لان ذاك البيت يذكرني بنذالة وحقارة جمال

وره عشر تشهر اجه ابو عادل وگال انو الناس يردون البنيه خلال هاي الشهرين بعد انا ايست وصرت
ابچي انا وامي لكن مجرد ما نشوف امين او صادق نسكت لان ما نريدهم يتهورون ولان انا اشوف امي من تحچي
وياي دووم تگلي
: الي راح تسوينه مو الخاطر ابوچ ولا الخاطر ذاك النذل لا الي راح تسوينه الخاطر امين الي حفظ كرامتج
وخلى جمال الحد الموت مكسوره عينه

اتقبلت الوضع واجت عمتي امل وهي تگول // اخو البنيه ولد شاب ورزن ويخاف الله
امي سالتها //شلون يخاف الله منين عرفتي
امل // جمعه يگول خوش انسان وما قبل يكتل امين ابدال جمال ومثقف وموظف
امي تهز يايدها //وشنو الفايده راح ياخذون اثنين بنات
امل //ايي اول وتالي البنات يتزوجن ومو كل وحده اتزوجت اخذت التريده ياما شابات اخذن شياب وياما بنات
چانن يحبن واخذن الي يحبنه وانصدمن لو يطلع يشرب لو يدور سوالف مكسره لو ياخذ ذهبها لو لو

انا چنت  اسمع وانا خايفه واسأل نفسي ياتره شنو الي راح اشوفه وامر بي
ويوم عن يوم يتقرب الموعد امين انطى الامي فلوس وگلها تشتريلي ملابس وذهب لان ابوي شويه شويه صار
يرجع نفس عادته لكن مع بعض التعديل  چان يتحاشى الكلام ويه امين وما يزمخ على امي مثل قبل
بس چان اكثر اعتماده على امين ومن امي وعمتي طالبنه بفلوس حتى يشترلي ذهب هو گالهم
: منين انطيكم من الفصل الكسر ظهري
وبيومها امي ردت //الفصل فصلته عن ابن اخوك مو عن ولدي

وابوي صار يعيط ويغلط على امي وحتى راد يضربها لو ما انا وصادق صرنا بيناتهم
ومن اجه امين بالليل وصادق گله اكتفى انو باوع الابوي وباوعلي وهز راسه بعدها بخمس تيام اجانه جهاد وطلعو
هو وامين للورشه ورجع بالليل وهو جايبلي گلاده ومحبس وتراجي وسوارات تلاثه

وانطى الامي فلوس تشتريلي ملابس وعطور ومكياج انا ما وافقت اروح امي اخذت سماح وياها
وصار الموعد الي لازم اروح بي فصليه بعد اسبوع واجه ابو عادل وابوي انطا الوكاله وتروح امي وعمتي
وياي وامين ما قبل اله يروح وكال هناك انزل باي فندق لان ابو عادل گال
الناس مقهوره ومن يشوفون اي واحد بيكم يتذكرون الي صار واحنه نريد نبرد الموقف
امين رد عمي راح اروح وياكم وانزل بفندق محد يدري بيه بس اطمن على اختي ،

ثاني يوم  دزو خبر انو يردوني اطلع من نفس بيتنا القديم  الي هدوا بي علينه وبس ابو عادل يكون موجود
اخواني جن جنونهم وصاروا يصيحون وليش اله هسه وبهالوكت خصوصا وانو اهلي تقريبا استقروا بهاي
المنطقه وصاروا يفكرون ايبيعون البيت ليش يردونه شنو السبب  ابو عادل صار يحچي وياهم بهدوء وهمه سكتو
واجه ابوي فهم امي انو نروح باچر ونظف البيت

ورجعنا للبيت الي صار سنه مفارگينه رجعناله وشفنا شلون مترب غسلنا ورتبنا وكملنا واجت ام باقر وصارت تبچي
هي وامي وتگول //يا ظليمتج يا خاله وين چانت الچ
وگعدت وهي تگول //الله لا يرحمك ياجمال كسرت قسمة البنيه چان هسه متزوجه معن ومرتاحه
امي ردت عليها //كله قسمه وحظ وانا وبناتي ما عدنا حظ ومعن الله يسعده ويوفقه
ام باقر //الله كريم ان شالله تبرد الگلوب وتهدا النفوس بناتج دره ما يتفوتن وبس البخيت ياخذهن

امي //هاي انتي تگولينها لان تعرفينهن بس ذيج الناس طلابة ثار يردون ياخذونها حتى يشفوون غليلهم
ام باقر //لا خيه لاتكولين هيج بلكي يطلعون يخافون الله
امي //ما شفتي شرطو اله من بيت ابوها ومحد موجود لا ابو ولا اخو
: ادري يگول ابو باقر يردون يبينون للناس اخذنا فصليه
صارت امي تبچي وهي تگول //حسبي الله عليك ياجمال
ام باقر //بس يسولف ابو باقر يكول اخو البت خوش ولد وشاب بس هو مهضوم من السوا جمال سهام انا ادري
بمروه شگد فاهمه وسباعيه لا تخافين عليها وبس تبچيين والقسمه مثل الرگيه ما تعرفينها يجوز تطلع حلوه ويجوز
تطلع باهته

امي تباوع للسما //الله كريم الله كريم
بعدها سلمنه على ام باقر وعمتي امل گالت اتفقت ويه ام الصالون واجرت بدله ورجعنا للبيت الي لمانه من
صارت المشكله
انا خايفه واشكال تجيني ابالي اشياء شلون راح اتصرف وشنو راح يصير بيه بيومها وانا اودع اخواتي واخواني
حسيت بعد ما اشوفهم صارن دموعي يجرن ومن وصلت يم ابوي انا حتى ما باوعت بوجهه ولا سلمت علي
لان هو السبب بالي احنه وصلناله اشوف الندم بوجهه لكن هذا الندم اجه متاخرما گدرت هالمره اسكت صار لازم
احجي ويا واطلع كل الي بكلبي اتقربت منه وگتله

= رووح الجمال باركله كله كسربختي وهو عدل وكسر بختي وهو ميت وبرضاتك انت ابوي الي لازم تكون لي سند
وظهر اتباهى بيك كدام الناس وارفع راسي بس لا انت مو اب انت عدو تدري راح اروح وانا مقهوره على امي واخواني
بس ما مقهوره عليك كل الي اسوي والي راح يصير بيه الخاطر امين وصادق مو الخاطرك وانت ما اگول شي
بس الله لا يسامحك

عمي جمعه وعمه امل اجو اخذوني انا وامي قبل يوم والصبح اخذوني للصالون بعد ان شيخهم گال العمي جمعه
راح ياخذوني للحله والزواج عگب باچر يعني مو اله تلبس بدله عرس من سمعت حسيت بنفسي رخيصه الى
ابعد الحدود وعباره عن سلعه مشترينها وعايفينها واجه الوكت الي ياخذوها بي
بيومها اصرت عمتي تاخذني للصالون وسوتلي تسريحه ومكياج بس مو صارخ ولبست كوستم بيجي ورجعت للبيت
اجه عمي جمعه اخذني وگال //انو امين مخابر حجي عبد وراح يجي هو وجهاد حتى الحجي يطلعني لان يخاف على
عمي جمعه
عمتي امل سالته //وينهم هسه همه
بالديوان وياهم ابو باقر

امل //والله حجي عبد  وهذا الولد جهاد ولا يتجازون على الشي السوو ويانه
جمعه //اي بس كون يغزر باخوج
سكتنا وما جاوبنه وصلنه للبيت جهاد فتح الباب للسياره حتى تدخل وبيومها اجت ام باقر واشوف الدموع ماليه
عيونها ومن شافتني صارت تسمي وتصلي على محمد اما انا فبعيني عتب ما اعرف بس شفتها اتذكرت معن الي
تزوج بدون ما يسأل

واجه وكت الزفه صرنا نسمع هورنات ملت المنطقه ولبستني امي عبايه فوك البرنص واجه حجي عبد وگال الامي
ياالله خويه خلي ناخذ البنيه
ما حچت امي ولزمتني هي وعمتي طبعا ولا اي مره اجت بالزفه ودخلت للبيت طلعت من الباب والحجي ركب بالصدر وانا
وامي وعمتي ركبنا وره ما يتوصف شعوري بذيج اللحظه ولا اعرف شنو الي راح يصير وارجع واگول
=هذا هو شيصير خلي يصير المهم ما اخذت جمال النذل

//////////////////////////////////يتبع