رواية بعد فوات الأوان الفصل الخامس عشر 15 - بقلم آنين الليل

مرحبا يا اغلى قراء ❤️💙❤️
بارت اليوم خاص بجهاد الي لازم نسلط علي الضوء وتعرفون انا احب انطي كل واحد حقه من القصه 🌷
اتمنى يعجبكم البارت 🤲
تحياتي وهم اتمنى ما تنسوون التصويت 😭😭
#آنيين الليل #
////////////❤️💙❤️///////////////
امين
طلعنا من المستشفى تقريبا الساعه ثنتين ونص بعد منتصف الليل او اكثر شويه ركبنا بالسياره چان جهاد منتظرنه
ركبنا وامي بقت تبچي وهي تدعي على جمال وعمتي امل تصبر بيها وتگللها

-خيه ام امين شبيدنا هم طالب الله يساعده باع الاكو والماكو وچان مستعد يبيع البيت بس حتى يعوفون البنات
ما قبلوا شنو قابل تضحين بولدج هاي قسمتها من الله
امي وهي تبچي //ياقسمه هاي هذا ظلم البشر
عمتي //مي خالف ام امين هواي بنات متعذبات بحياتهن وهنه لا فصليات ولا ابد هاي انتي شگد تعذبتي
من طالب حتى الصخر بچى عليچ

جهاد طاحت منه دمعه وهو يجر خشمه من گد ما كاتم دموعه انا اتعجبت وامي اتحسرت
اي والله اتعذبت وعذبت بزري وياي بس شفتيها شصاير بيها
- ام امين انتي غشيمه ما تعرفين الحمل والنساوه والعليهن كلهن البعد مو الله يساعدها
هزت راسها امي // اي الله يساعدها ويجبر كسرتها تحصل وليد بنيه شويه ينسيها
درت عليهن //هسه راح نروح نزور ونرجع
عمتي // ها راح تزورونا
- ايي بيها وبلاياها (باوعت الجهاد ) خلي نتبادل اسوق بمكانك انت تعبت
جهاد جاوبني بحزن // لا ما تعبت هسه نوصل

تقريبا الفجر وصلنه الكربلاء وهناك توضينا وصلينه وامي وعمتي راحن يزورن وانا وجهاد هم رحنا من جهة
الرجال واتفقنا نلتقي بنقطه محدده واجن بعد ان كملن زياره وانا اشوف امي عيونها حمر من البچي
حچيت وياها // يمه يعني اذا ما شفتي مروه تبچيين ومن وصلتي يمها وشفتيها هم بعدج تبچيين
عمتي //كافي سهام سلمي امرج ال الله

اخذناهن على مطعم واتريكنا وجهاد هو الي حاسب ابو المطعم بعدها قررنا نروح للنجف لكن عمتي كالت
- لا ابد ما بينه حييل خلي نرتاح وباچر نطلع للنجف ونرجع للبصره
وسوينا مثل ما طلبن اجرنه غرفتيين انا وجهاد وامي وعمتي وصحيح مجرد ما اتمددنا على فراشاتنا نمنا
العصر گعدت وانا راسي عبالك طبل باوعت شفت جهاد نايم على صفحته ندهته

- جهاد جهاد اگعد خلي نروح نتغدا ومناك نزور
هو جاوبني وهو منعس بدون ما يلتفت // رووح امين تعبان خليني انام
- شنو ما جوعان

  ما جاوبني خلا المخده على وجهه
ورحت دكيت الغرفه على امي وعمتي الي فتحن الباب والنعاس باين على وجههن واتعجبن من نفسهن
هلكد نامن
غسلن ونزلنه رحنه تغدينا وشربنا چاي و طلبن يزورن ورحت وياهن ومن كملت الزياره رجعت
لگيتهن كاعدات ما بين الحرمين الشريفين
بقينا نسولف انا وعمتي وامي ساكته لكن دموعها چانن ابلغ كلام ودعاء واستغاثه

طلعنه من الامام وردت اعشيهن لكن هنه ما قبلن اخذت عصائر وفواكه وكيك واخذت لفتين گص
وببسي الجهاد ورحنا للفندق
امي وعمتي راحن للغرفه وانا دخلت للغرفه لگيت جهاد بعده نايم ندهته واگله

- جهاد هاي شنو الهسه نايم اگعد جبتلك اكل
جاوبني وهو يتثاوب // ما اشتهي خليني تعبان
خليتهن ع الميز يمه ونمت گعدنا الفجر صلينه وطلعنه من الفندق للنجف واحنه ساكتين وصلنه خلينه السياره بگراج
ورحنا نزور واتفقنا نتلاكه بنقطه معينه

دخلنه زرنا وصلينه وطلعنه گعدنا بالصحن وانا اشوف جهاد حزين ومقهور. اتقربت منه حچيت ويا
-هاا يا صاحبي ما آن الاوان حتى تحچيلي
هو باوعلي انا كملت كلامي// جهاد شبيك ليش من رجعنه من الحله وانت ضايج ومقهور شنو السبب
لو دموعك واحنا نسولف امس

هو مدنك گلي // مو هم ياالله نطلع هسه منتظراتنه
هزيت راسي //ما عليك بيهن وين يرحن بس اريد افتهم منك
باوعلي وهو يتساءل //شتفتهم ؟
نفخت //جهاد لو ما اعرفك وانت مربيني على ايدك چان ظنيت بيك
- شتظن بيه امين احنه اخوان معقوله تشك باخلاقي وره هذا العمر

- الله وكيلك جهاد انا الي ادري بيك لكن خوفك واصرارك تجي وياي وحزنك شنو قضيتك ما اريد
احلفك لان احنه باشرف مكان يقصده الحايرين المحتاجيين الخايفيين
هو حچى والدمعه بعينه والعبره خانگته // والمخذولين والمظلومين
   ربتت على چتفه // اذا ما تريد تحچي بكيفك
دنك وهو عاض على شفته وساكت لمن ما رفع راسه وكال

-...- من يوم ما شفتك وانت بمكتب الحجي وكاعد على صفحه وتبچي وافتهمت منك انو ابن عمك
يتحارش باختك الي ما ضمت عليك والي رادتك تدافع عنها لان تحسك ظهر وسند
كبرتو  بعيني وساعدتكم وانا ابد ما طامع بشي لكن ......

-  ليش ساكت كمل لكن شنو
بلع ريگه // اتمنيت ان ارتبط بانسانه مثل اختك الي من هي زغيره والمفروض مراهقه واكثر البنات بذاك
العمر ينجرفن بوجود ولد شاب وحلو وعنده سياره وفلوس
بس اختك (هز راسه ونفخ ). اختك لا وهي طفله انسانه شريفه عرضت نفسها وعرضتك للموت بس حتى تدافع
عن شرفها وهاي شي نادر
مو لان ماكو شريفات لا بس لان بمثل ظروفها هواي مرات تنجبر على اشياء ما تريدها وتسويها غصب عنها
لذلك اتمنيت اتزوجها واكون وياها عائله لان اعرف من اطلع هي تحافظ على بيتي وتكون رجال من
انا ما اكون موجود

جاوبته وانا مستغرب //اوگف جهاد اتذكر من اجاني معن گرايب جيرانه بيت ابو باقر وحچى وياي وانا
سولفتلك انت شجعتني اقنعها تاخذه شلون چنت تتمنى تتزوجها وشلون تگلي خلي تاخذ معن
هز راسه واتحسر //ايي صحيح بيومها ردت افاتحك بالموضوع لكن جية معن خلاني اقارن بيني وبينه
وشفته انسب الها لذلك گتلك قنع ابوك يوافق لكن من عرفت انو جمال خطبها صدك جن جنوني وچنت افكر
اكتله وما اخلي ياخذها

سالته // وليش كل هذا
   رفع حواجبه // شنو ليش ؟
- جهاد ليش هيج تسوي انت يمكن شفت اختي لو مره او مرتين يعني معقوله من ورا...
قاطعني بنتر ورفع ايده يعني اسكت  //لا دير بالك تتصور غير تصور مو جهاد الي يدور عرض صديقه

  هزيت راسي // - اي فهمني جهاد الحد هسه وانا اشوفك اخوي الچبير ولازم تفهمني لا تخليني
احس بنفسي واحد (واتحسرت)
جهاد...اتقرب مني  //محشوم امين بس صدگني وحق امير المؤمنين ما عندي ويه اختك اي شي بس مجرد تمني
والاخر لحظه اتمنيت ما تروح فصليه وراحت

- زين جهاد وهذا الحزن وجيتك ويانه وخوفك ورجفتك
باوعلي وهو ظام شفايفه اتحسر // امين انت شتعرف عني
  - شعرف ؟
هز راسه // اي انت شتعرف عني اهلي اصلي فصلي

جاوبته //مره سالتك وما جاوبتني وبعد ما حبيت اسألك
- وبعشرتك وشغلك وياي شنو شفت
- والله شفت انسان طيب وخلوق بس تضم سر بگلبك
اتحسر // گول اسرار
- وما آن الاوان تسولف وتفضفض حتى شويه ترتاح
طلع جگاره وصار يدخن //  وتتصور من اسولف ارتاح
- يجوز اي ويجوز لا جرب وانته بكيفك

جر نفس قوي وسحب نفس قوي من الجگاره ونفخ الدخان // انا يا امين  وعيت ع الدنيا الاب شگد ما تتصور حنون
وام كل همها تلبس وتطلع وتتونس واخت زغيره اتعلقت بيها بحيث اشوفها كل حياتي
سالته //. عندك اخت
هز راسه  // ابوي موظف ومن يجي بوجهه يروح يشتغل ويه واحد بمكتبه وبالليل يجي محمل حلويات وفواكه
وكل هذا وانا اشوف امي ما راضيه رغم گاعدين بمشتمل ويه بيت جدي الي حتى ما يجون ويسالون علينه
لان من يجون هي تگلب وجهها ودووم اسمعها تحچي ويه ابوي

:انا بعد ما ابقى اتاجرلي بغير مكان
ومن يسألها ع السبب //اختك اجت وتحاچت وياي
: مرت اخوك تعيب عليه
: اختك الچبيره تگول شدعوه تصبغيين بوجهج بس تردين تصيرين حلوه

ابوي من يسمع يروح يعيط على اهله وعمي الزغير ما يقبل ويتعاركون وهي تلح لازم ننتقل منا ما اامن على ابني
اخاف علي يسوون بي شي لان يكرهوني

وفعلا ابوي أجر بيت وصار ما يلحك على العيشه منا الاجار ومنا متطلباتها الي ما تخلص وكان كل همه يرضيها

وقنعته تشتغل ومن سالها شنو تشتغلين گلتله بصالون حلاقه بالبدايه ما وافق بعدين قنعته وهم اقلها تطلع عنايتها
ابنفسها ابلاش ومن سالها // وابنج وبتج
جاوبته // انت ما عليك بس وافق والك الصافي

واشتغلت وانا تاخذني وياها اذا الصالون فاضي ادخل جوه واذا تجي وحده اطلع بره ومرات اشيل اختي وابقى بره
وراها بفتره شافت  شقه قريبه من الصالون واجرتها وانتقلنه بيها وانا ابقى بالشقه وسجلتني مدرسه الصبح اروح
ومن ارجع اكل اي شي وانام على ما تجي بالليل وابوي نفس الشي يجيبولي عشا وياهم

واتذكر رغم تعب ابوي ومعاناته بس يريد رضانا جان يحبنا ويتمنى يسوي كل شي علىمودنا وامي ابد دائما تتشكى
ومعبسه بوجهه وتحچي على اهله وابتعد ابوي عن بيت جدي او خلي نگول همه ابتعدو عنه

-شلون ؟
اتحسر جهاد //اتذكر اجه عمي وچان يوم جمعه انا وابوي بالبيت وهو يحچي ويه ابوي يگله
-ضب مرتك وخليها تگعد
ابوي //شقصدك ؟
عمي //قصدي واضح هذا انت تشتغل بالوظيفه ومن ترجع تشتغل النص الليل شكو هي عايفه بيتها وابنها
ابوي // مرتي ماجاي تلعب جاي  تشتغل وتساعدني

عمي هز ايده وحچى باستهزاء //تساعدك بشنو مرتك ملتهيه بنفسها شوف بيتك وصخ ابنك مبهذل تساعدك
بشنو عود اتجيبلها علاگه شغلها النفسها تصبغ وتميش وگاضيتها طلعات
ابوي رد بعصبيه // شقصدك
- مسلم اليوم جمعه  مو المفروض هي ابيتها تنظف تطبخ الكم تغسل الملابس تدرس ابنها
ابوي //هي ما مقصره
عمي //انت الى متى تبقى هالشكل ما تشوف وضعكم

ابوي // وضعنه احسن من هوايه ناس حصار وعايشين احسن من غيرنه
عمي باستهزاء // اي عايشين بس مرتك النهار كله بره
- مرتي جاي تساعدني اجار وغلا واني ابحدي ما الحك
عمي بنتر //مسلم كافي عاد لم مرتك كافي حس على نفسك

وراح عمي واحس بيومها ابوي ما گعد ولا ارتاح خلاني انا واختي وراح جاب امي الي صارت تعيط وتكله
- شبيك اتخبلت
وهو يكلها // نضال گليلي اخوي شنو شايف عليج ويكلي لم مرتك انتي وين ترحين يوميه كليلي لا هسه اموتج
هي سمعت وهي صارت تعيط وفتحت باب الشقه وهي تگول //اليوم لو انا لو اخوك اليوم اخلي الدم للركب

وطلعت وانا واختي نبچي راحت هدت على بيت جدي وصارت تعيط بالشارع وتغلط واجه ابوي وراها راد
يسكتها وهي زادت بعدها راحت الاهلها وگلتلهم وهمه اجو هادين على بيت جدي وصارت گعدة عشاير

ومن يومها بعد لا شفنا عم مربينه ولا عمه وهي زادت بعدم اهتمامها ويوميه صارت تتعارك ويه ابوي
وما نعرف شنو السبب
بعد فتره شفت ابوي صار يتاخر ويجيب فلوس هواي واشوف امي راضيه وفرحانه وتاخذ بالفلوس وتشتري ذهب
وملابس
وانا ارجع من المدرسه  للبيت اكل اي شي وانام على ما يجون بالليل واختي وياها لو مرات تخليها ابيت جيرانه
ومن اجي انا اخذها والعب وياها.

ابوي اشترا سياره وصاروا من يجون بالليل امي تلح  ياخذها ويونسها
بقى ابوي يشتغل تقريبا سنتين والفلوس عد امي واسمعه يگللها جمعي حتى نشتري قطعة ارض ونبنيها للجهال
لو نشتري بيت حتى لو زغير وهي تطمنه وتگله اي مثل ما تكول

عمري 11سنه من اجه ابوي وهو متوتر وعصبي صار يروح بالشقه منا ويرجع منا وانا وجنات كاعدين ندرس
وانا خايف  لان حاس اكو شي واجت امي بالليل وهي مبين عليها التعب وتلگاها ابوي من الباب ولزمها من شعرها
وهو يگلها ويغلط عليها //وين چنتي
امي صارت تعيط وابوي يضرب بيها ويسب وهي تعيط وتكول
ياناس الحگولي يريد يكتلني

والتمت الناس وطلعت راحت الاهلها وتركتنا انا واختي وابوي الي بليلتها لا هدأ ولانام
وثاني يوم دزت شرطي وعنده احضار مشتكيه وطالبه الطلاق من ابوي
  ابوي دز جيرانه على اهلها وگله يوصلللهم الرد // اطلكها بس اريد فلوسي الي ضميتهن عدها حتى اشتري بيت

امي  نكرت انو عدها اي فلوس وصار كلام ومهادد بين خوالي وبين ابوي وره اسبوع  طلع ابوي وما رجع
وعرفت انو الشرطه لزموا بتهمة تهريب واتذكر محد وگف الابوي ذاك الوكت ولا هي اجت سألت علينه بالعكس
حصلت على الطلاق غيابي
بقيت بالشقه انا واختي امي مرت علينه وگالتلي
اخذ اختك وروح البيت جدك
جاوبتها // ماما خلي نروح وياج
هزت راسها //. لا رووح الاهلك ما اتحمل مسؤوليتك انت واختك

عافتنا وطلعت وانا اخذت اختي ورحت العمامي الي طردوني من الباب حتى ما دخلوني للبيت وگالو
ما نعرفك ولا نعرف ابوك
رجعت ابجي واجت جيرانه جابت النه اكل وزوجها كلي // روح الخوالك

ورحت الخوالي ونفس الشي ما استقبلوني  وحجتهم //  ما نتحمل مسووليتك
جاوبتهم وانا ابجي // اريد امي وين نروح
وخوالي گلولي // ما ندري بامك وين راحت وانا متاكد هي عدهم

رجعت للشقه وانا لازم ايد جنات واشهك من البچي ومحتار شلون اعيش انا واختي بيومها عدنا اكل بالثلاجه
طلعته واكلنه وجارتنا صارت تجي تحيب النه اكل
وجنه بس تبچي تريد ابوي وانا اسكت بيها چنت انيمها  وانا ابقى كاعد يتراوالي يجون حراميه ويكتلوني
وهواي تتهياالي امور اخاف منها ابقى گاعد واقرا ايات واصحى من النوم الگى نفسي نايم بالصاله بدون
لافراش ولا غطى

واجه ابو الاجار ولازم ندفع واحنه اي شي ما عدنا وبيومها جارنا هو دفع الاجار
وانا صافن وعيوني غرگانات دموع جيرانه گلي // بابا لازم تفكر تشتغل اقلها تجمع فلوس الاجار وتعيش انت واختك
وزوجته گالتله لو يرحون العمامهم
هو رد عليها //. مو راحو وطردوهم وحتى انا رحت العمامهم لكن ما قبلو يستقبلوهم
يعني شلون
ما گدامنا اله نوديهم الملجأ الايتام

من سمعت حضنت اختي واتقربت من جيرانه وگتله
- - لا عمي ما نروح نبقى اهنا وانا اشتغل ولازم اعيش انا واختي
جيرانه //. بس بابا ما ترهم بعدكم زغار والحياة صعبه
هزيت راسي //. انا راح اشتغل واعتبر نفسي يتيم وعندي اختي انا مسوول عنها

بطلت انا واختي من المدرسه و صرت اطلع ابيع علاليك وجنات اخذها وياي لان اخاف عليها وهي هم تبيع
وياي بعدين شفت واحد اياجرباليوميه عرباين دفع واجرت وحده وجنات وياي تبيع علاليك والي نحصله يادوب
يكفينه اكل وشرب وجمعت نص الاجار لكن صاحب الشقه يريد الاجار كامل اتوسلتله يصبر علينه
لكن هو ما قبلوصار يحچي

- - الابو مهربچي والام ما ادري وين مسربته جهالها وانا ما فاتحها تكيه
وهواي كلام والناس تهدي بي وصلت يمه وگتله وشفايفي يرجفن // انطيني مجال بس اسبوع اكملك فلوس الاجار
  رد عليه // اي اصبر اسبوع وعلوا تشوفلك انت واختك مكان ثاني

وراح ابو الاجار وانا الليل كله ما نمته وبس ابچي وما اعرف شي عن ابوي طلعت الصبح واخذت جنات وياي
وحصلت لي شيلتين بالعربانه وانا امشي شفت محل چبير مكتوب علي مستعدون لشراءالغرف والاثاث المستعمل
ورحت الصاحب المحل وجبته للشقه وشاف غرفة امي وابوي  وما قبل يشتريها لان شافني زغير بس انا
رحت وصحت الجيرانه الي اجه وسولفله قصتي واشتراها النجار بعد ان اتفاصل ويا جيرانه واخذت الفلوس
وبوكتها الرجال كلي // تعال بابا اشتغل عدي انا محتاج عامل
جيرانه //. اي والله ياريت خطيه حمله ثگيل وبعده طفل والك عد الله تساعده

وسديت الاجار واشتغلت عنده بالبيع والشرا يجيب الاغراض القديمه ويصلحها ويعرضها
اكثر شغله كهربائيات وغرف نوم وكاونترات  لكن چان وجود اختي اكبر مشكله لان اجيبها وياي
للمحل تكعد على صفحه اهنا الرجال كلي
- هاي يم بيتنا اكو غرفه ومطبخ وصحيات للايجار احسن الك من اجار الشقه وهم قريبه على شغلنه

من حليت من الشغل رحت ويه استادي وشفتها للغرفه واجرتها من مره ارمله وقاسمه بيتها وبعت
اكثر الغراض على المحل واخذت بس المهمات
وصرت اطلع للشغل واوصي عليها المره وذبيت روحي ع الشغل بحيث استادي اعتمد عليه رغم زغر سني لكن
كنت مطيع وما اتململ والرجال نصحني //لازم تروح وتشوف ابوك

وساعدني حتى اروح الابوي الي شفته متغير وندمان وكل همه يطلع ينتقم من امي ويرجع الفلوس الي اخذتهن منه
وعرفت انو هو. انحكم عشر سنين وصرت اروح وازوره بالسجن وچان ما يقبل اجيب جنات
وياي وصرت كل فتره اروح واشوفه وحتى انطي مصرف

مره رجعت واشوف جنات تبچي ومن شافتني سكتت سالتها // شبيج جنات
هي گلتلي //ما بيه شي بس مشتاقه البابا
ومن طلعت اجيب صمون للعشا المره گلتلي // خاله اختك اجت فايت وكت من المدرسه واجت تبچي
ورجعت وسالتها وانا عصبي //وين چنتي وليش تبچيين
ردت عليه بخوف وهي تشهك // رحت الامي وطردتني گالت روحي رجلي ما يقبل تجوني

شفتها مقهوره وهي تكلي // امي متزوجه وگاعده بقصر شكبره وهي حامل
انا حچيت عليها //شلون  هيج تسوين  وتتصرفين من بحدچ بعد لا تعيديها واذا اعرف بيج رايحه اموتج
جاوبتني وهي تشهك //لا جهاد بعد ما اروح  لو اعرف اموت ما اروح

انا من شفت هضمت اختي انقهرت عليها مثل قهرتك على مروه من لمن جمال اتحرش بها وهددها
وثاني يوم قررت اروح اشوف امي ردت اعاتبها ليش عافتنا وصلت دكيت الباب فتحلي زوجها من شافني صاح على
امي وحاچاها بنتر //. نضال نضال تعالي شوفي منو رايدج
اجت امي واتفاجات من شافتني هويباوعلي بتكبر وايأشر عليه
- هذا شيسوي جاي

امي ردت // شمدريني قابل انا موديه علي
زوجها // انا مو كلت هاي الشكولات ما اريدهم ابيتي
امي // على كيفك هسه اشوفه شيريد
  ما هانت عليه نفسي اتقربت منهم وانا صاير بركان // هذا البيت الي حضرتك گاعد بي نصه من فلوس ابوي
الي باگتهن مرتك انا ما جاي اشوفها لان هي ما تهمني بس جاي اكللها اذا انتي ما تحبين ابوي ليش خلفتينه ع
دفعني وگال // رووح بابا جاي حافظلك جملتين من مسلسل وجاي تكولهن النه

من دفعني امي ما سوت شي ولا دافعت عني طلعت وانا مقهور اباب بيتهم شفت طابوگه شلتها وكسرت جامة
سيارته ورحت للشغل ويوم بعد يوم صرنا ننسى عدنا ام او عمام  او خوال لكن ولا بيوم نسيت ابوي الي
صرت اروحله باوقات متباعده حسب طلبه

وبدت جنات تشب وصرت اخاف عليها مثل خوفك على مروه چنت اوصلها للمدرسه ومن تحل استاذن استاذي
واروح ارجعها للبيت وارجع بس اطمن انو دخلت وسرگت الباب ورغم الفقر والعوز الله شاهد عليه ما خليتها
محتاجه شي

سألته //وين اختك لا تكلي رجعت الامك ؟
باوعلي ودموعه نزلن بقوه انا اتفاجأت واتقربت منه ولزمته من چتفه // جهاد اختك وين ؟
عض على شفته ودنگ وبعدين باوعلي وهو يبلع زيگه
- ... - بيوم رحت للمدرسه حتى نرجع سووا انتظرتها ما شفتها ماكو خفت وين ممكن تكون من درت اريد اشوفها وين
شفتها جايه من الباب الثاني سالتها
شعجب ما طلعتي من هذا الباب
هيه جاوبتني //  عادي طلعت من الباب الثاني

ورجعنه للبيت  وجانت الدنيا تمطر واتاكدت منها سركت الباب وانا رحت للمحل هي متغديه ونايمه ومن گعدت 
العصر راحت تغسل والكهرباء جايه قويه
والگيزر محترك هي راحت تغسل و...
صار يشهك ويگول //رجعت المغرب وانا جايب وياي صمون وفلافل وجبن ودكيت الباب مرتين وگلت انا جهاد
وهذا الشي متفقين علي
ادك الباب مرتين وبعدين اكلها انا جهاد ودكيت الباب وهي ما كالت منو فكرت قافلته طلعت المفتاح لكن ما فتح يعني
مسركه من الداخل صرت ادك ادك ماكو طلعت خاله خيريه گالت

خاف نايمه خاله
جاوبتها //ادري ما صار نوم كسرت الباب
-خاله اطفر السياج
خليت العلاگه يمها وصعدت السياج وطفرت ورحت للممر فتحت الگلوب وانا اگول

- - جنات انتي وين دخلت للغرفه ما كو طلعت واشوفها واگفه وهي لازمه بالمغسله ومتبلله من المطر اتقربت منها
وهي عبالك مغناطيس يجذبني الها عرفت اختي منتوله ركضت للباب وصرخت بكل قوتي

- - الحگولي ياناس الحگولي  اختي منتوله ودخلت الناس وشافوا اختي منتوله والكهرباء ساحبتها بحيث ما فكوا ايدها
الا كسرو خشبه وهمه يضربون بيها وهي تنتل اي احد يتقرب منها لان جسمها متشبع بالكهرباء
وبيومها صرت مثل المجنون وانا بالمستشفى اصرخ على اختي واخذتها ودفنتها والجوارين سووا فاتحه
وانا اصرخ على اختي اختي الي انظلمت وما شافت لا حنان الام ولا عطف الاب

ثالث يوم رحت على ميزها وطلعت ملابسها وانا اشم بيهن وطلعت كتبها جانت بالاول متوسط وشفت جوه
الكتب دفتر كاتبه علي دفتر مذكرات

وفتحته وصرت اقرا وهي كل كتاباتها تعاتب امي وتكتب الابوي رسايل اشتياق من قريت الي كاتبته حقدت
على امي وهي راسمه محكمه وهي بيها القاضي وحاكمه على امي بالاعدام
وبعدين راسمه صوره حبل مشنقه وخاله رگبة امي وانا اضب الحبل وهي بيدها المنصه
عرفت هي بنفس اليوم ما رايحه للدوام رايحه البيت امي ومتوسله بيها ان تبقى عدها وهي اتگللها
يمه والله مشتاقه الج وانا احبج والله اخاف ابقى بالبيت ابحدي
زين خليني اجي وره الدوام وارجع العصر اقلها ما احس بالوحاشه

وانا اقرا وابچي عرفت امي طاردتها وهي قبل ما ينتهي الدوام راجعه واكفه اباب المدرسه حتى ما احس عليها
وره اسبوع صار  وكت المواجهه وهالمره رحت وانا مكسور خاطري
تلگاني ابوي واول ما شافني گلي شبيك جهاد وين جنات
حاولت اضم عنه لكن ابوي گلي//  جهاد وين اختك وين جنات هاي اكثر من عشرين يوم  وانا ما اعرف شنو
متراويلي عليكم گلبي يوجعني بابا وين جنات
باوعتله ودنكت وبجيت وانا اكله

-...- بابا جنات ماتت رجعت من امي مكسورة خاطر وماتت انتلت بالكهرباء لان ما يمها ام الي تگلها ديري بالج
ولا اب الي يراعيها ويجيبلها ويدللها يمها بس انا الي اغبش الصبح وارجع بالليل حتى ما اخليها محتاجه شي

ابوي صفن وصرخ وشك دشداشته وضرب راسه بالحايط وانا صرت ابچي وطلعت بدون ما اسكته ولا حتى اواسي
خليته يصرخ ويگول
ياناس ياعالم بنيتي الحلوه ماتت وانا السبب جنتي ماتت وما شفتها

وره المواجهه بخمس تيام بالليل اجو عليه الشرطه واجه استادي وسالهم شيردون مني
همه طلبو اروح وياهم ورحت واجه ويه استادي وجيرانه الثاني وهناك بلغني الضابط  انو ابوي حاول
يهرب ولحگو وما يعرفون منين جاب المسدس واترامه وياهم وكتلوومات ابوي ورحت استلمته
ويه اغراضه وبوكتها ضابط السجن انطاني رساله هو مأمنها قبل يوم عد صديقه وگايله من اموت يحاول
ايوصلها الي وقبل لا اغسل ابوي قريت الرساله وهو كاتبلي

كل الي سويته الخاطر امك لان احبها وحتى اامن الكم امستقبل وهي الي خلتني اشتغل بالتهريب  بحجة نلم نفسنا
وبالوكت الي  اشتغل بي هي چانت مصاحبه الرجال الي اشتغل ويا واخذت فلوسي بعد ان طلبت الطلاك واتزوجته
كل الي صار من جوه راس امك امك الي عمري ما حبيت وحده بگد ما حبيتها والي بيوم من الايام چنت مستعد
افديها بحياتي لكن ما كفاها خلتني اقاطع اهلي وبعدين  اخذت فلوسي وتزوجت صاحبي انا طالع من السجن اريد
اروح اخذ ثاري وثارك وثار جنات اروح اكتلها واسلم نفسي حتى يعدموني لان انا ما الي عين اباوع بيها الك
انت ابني الي عذبتك وشلت ضيم اختك
سامحني بابا جهاد سامحني وياريت جنات موجوده چان بست ايدها ورجلها بس حتى اتسامحني لان انا الي قتلتها
وضيعتك بانانيتي كان كل همي ارضي امكم امكم الي ما فكرت ولا لحظه بيكم الي كان كل همها نفسها وطلعتها
وانو تلبس ثوب مو ثوبها لبسته لكن على حسابكم انتو
صدگني يابابا كرهت الحياة ولازم اكتل امك واتخلص من تانيب الضمير وبعدين اسلم نفسي حتى يعدموني

غمض جهاد ورفع راسه ليفوك وهو يتنفس بعدها گال
- اتصور امين ولد ما صاير عمره سطعش سنه اتوفت اخته الي هي باعتبار بته الي رباها والي هي روحه
من الدنيا وراها
بعشرتيام او اكثر يتوفى ابوي
اخذته ودفنته بصف اختي وبقيت گاعد يمهم وانا افكر بالانتقام من امي وزوجها

ورحت ازور بعد ان ودعتهم ودخلت الهذا المكان  الي احنا كاعدين بي وصرت ابچي وانا لازم الشباك واگول
- - ربي انت گلت بكتابك الكريم وبالوالدين احسانا انا امي وابوي  ضيعوني وضيعوا اختي وابوي خلص انتهى
بس بقت وصمة العار الي طول عمري راح اخجل منها امي
ربي ارحمني وساعدني لان انا بقيت وحيد ما اعرف التجئ بس الك يارب العالمين

ورحت صليت ولزمت القرآن وصرت اقرا وانا ابچي رجعت للبيت ويمكن بذيج اللحظه كبرت عشرين سنه
الناس اجوني يتخلفون الي لان ما سويت فاتحه واذا اسوي منو الي راح يجي بقيت بالبيت تلث تيام ما طلعت
رابع يوم طلعت الصبح وصلت يم بيت امي وصرت اراقب الى ان اتاكدت انو زوجها طلع
  دگت  جرس الباب وهي طلعت شافتني رادت تحچي بس انا اشرت باصبعي يعني اسكتي دخلت للبيت
  وانا اباوع الها بكل برود حاجيتها

-...-بيوم الي اجتج جنات اخر مره انتلت وماتت لان ابحدها بالبيت ولان امها ما حوتها طردتها خافت تسلب راحتها
وابوي تتذكرينه مو ابوي قبل تلث تيام دفنته
-...-ابوي الي باع اهله وترك كل شي على مودج وانتي اخذتي كل شي ثمين اخذتي الفلوس والذهب والمكياج رالملابس
وعفتينه انا واختي لان رخيصين ما  نسوه عندج شي
-وهسه ياست امينه اجه وكت الحساب
( درت عليها شفتها ترجف وعيونه نليانه دموع ) ضحكت وحكيت راسي وانا اگللها
-...- تؤ تؤ تؤ لا تبچيين لاتخرب كحلتج وخدودج يجوز ايحرگنج

اتقربت يمها وطعنتها بسجينه وانا ما اشوف كل الي سمعته صرختها طاحت بالگاع وانا طلعت  امشي بكل هدوء
وما كو اي شي يهمني وما صرت اخاف من اي شي
بيومها ما رجعت للبيت ولارحت للورشه ولا الاي مكان صرت امشي وبعدين رحت الگراج النهضه ركبت بسياره
للبصره وانا متوقع باي لحظه يلزموني. بسيطره لكن الي صار حتى محد طلب هويتي

وصلت المغرب للبصره وبقيت  بالكراج  وبالليل نمت والصبح طلعت امشي وانا ما اعرف وين رايح
صرت امشي وشفت مكتوب على كارتونه مطلوب عامل
واشتغلت عد الحجي وبيومها سالني //انت منين
ورديت علي بعد ان نزلن دموعي //انا يتيم ابوي امس اتوفه وماعندي احد التجئ اله
وسالني على امي جاوبته //اتوفت من اول ما جابتني وابوي مقطوع من شجره ما عندي عمام ولا اعرفلي خوال
وقبل يشغلني وبيومي استلمت الشغل وسالني وين راح انام
جاوبته ما ادري اشوفلي فندق
الحجي كال// لا تبقى تنام بالمحل

انا فرحت وهو طلع ودار عليه وكلي // انا أمنت بيك وسلمتك المحل وانت بكيفك تريد تصون الامانه تريد تخون
انا رحت يمه  وحاچيته //انا اكره الخيانه
تلقائيا نزلت دموعي الحجي بوكتها خجل لان عباله هو هان كرامتي بس انا بچيت لان اتذكر خيانة امي النه
وبقيت اشتغل وما اطلع بس الحجي يشوفني اذا يجي واحد لابس عسكري احاول اداري نفسي
وفد يوم بالليل اجه الحجي وسالني على قصتي وانا حچيتله كل هذا الي سولفته الك

وره شهرين الحجي سافر البغداد ومن رجع كلي //امك ما ماتت لكن شالوا وحده من كلياتها  ومن سالينها گايله
حرامي اجه راد يبوكني ومن قاومته ضربني سچين

ما اكلك بيومها فرحت او حزنت لكن صار اي شي هناك ما يهمني مره وحده رحت ويه الحجي جبت ملابسي ودفتر
ذكريات جنات  وبقيت محد يعرف بقصتي بس الحجي وهسه انت

باوعلي جهاد وگلي // امين انا مو خوان انا انعجبت باختك وبصبر امك اتمنيت ارتبط بانسانه مثل اختك تحفظ
غيبتي وكرامتي ومن يصير عدي اطفال تربيهم وهي تعرف هذا واجبها مو تجيبهم وتشمرهم
انا دنگت وخجلت من نفسي شلون ورا هذا العمر انا اشك بجهاد گتله //ليش ما خطبت اختي مني
جهاد باوعلي // يوميه اريد افاتحك بالموضوع لكن ارجع واگول منو ينطي اخته الواحد امه عافته واتزوجت
وابو مات بالسجن

جاوبته //والله ياجهاد لو بيوم من الايام خاطب اختي لو محاجيني عليها لو ما يصير جمال وابوي لو الدنيا كلها توكف
بوجهي چان انطيتك اختي تدري ليش
هو باوعلي بدون ما يسال
— لان الولد الي حافظ على اخته والي شال نفسه وصارت الناس تحسبله الف حساب ما يهمني منو ابو او شنو
امه او ليش عمامه ما يردونه ابوك ما غلط حب امك او وثق بيها ودووم نكول مو كل اصابيعنا سووا انت
ياجهاد اخوي وراح تبقى اخوي الچبير الي تمون على رگبتي سامحني اذا بلحظه شكيت بيك

ورجعنا وكل واحد بينه عنده هموم وقهر وبنفس الوقت حياة لازم تنعاش مهما كانت مره لان وجودنا بيها مو بارادتنا

//////||||||/////////|||||///////|||||/////يتبع
اتمنى يكون عجبكم البارت