رواية بعد فوات الأوان الفصل السادس عشر 16 - بقلم آنين الليل

يوسف
بالدائره رحت واشتغل بدون خلگ ومن خلص الدوام طلعت رحت على مطعم اخذت غدا و احجي ويه نفسي
يوسف راح يصير عدك طفل
وانا اسوق اتحسرت وباوعت ليفوك :: سبحانك ياربي چنت اتمنى الطفل يصير من سحر ومن اتزوجت ضحى ما
اهتمييت يمته يصير عندي طفل منها وهي  سوت المستحيل بس حتى تحمل واخر شي باليوم الي تبلغني بي انو
الطبيبه تگلها بيه الصوج وانا الي احتمال عندي ضعف وما يصير عندي اطفال اتفاجأ بمروه حامل
شلون معادله صعبه هاي
اوووف

دخلت للمستشفى ودگيت الباب وسمعت صوت ام بشير // ايي اجيت
دخلت وصارت عيني على مروه الي لگيتها نايمه سلمت على ام بشير وانطيتها العلاكه وهي تكلي
- المن خاله اشو يجيبونه ونرجعه
اشرت براسي //هي شلونها

هزت ايدها //شلونها خاله ما الها لون هسه توها طلعت الطبيبه وياها اثنيين وبس يرطنون وكل شويه وگلولي
حجيه بتج شگد  صارلها ما ماكله
وانا ارد عليهم //لاخاله تاكل بس ما يثبت بمعدتها وهسه سوولها تحاليل وتوهم گبل لاتجي بدقايق شالوا من
عدها المغذي وضربوها ابره ونامت كالوا هاي الابره تهديها
سالتها ::وهسه الطبيبه موجوده
حركت راسها //لا خاله خلص دوامهم هسه تلكاها راحت البيتها والعصر تروح للعياده

:: وهي ابد ما اكلت
- -ابد خطيه حتى الماي من تشربه تذبه ما يركد شي ابطنها
باوعت الام بشير ::تعبناج ويانه
- - لا خاله كل تعب ماكو بس هي خطيه البارحه اترادت كلش خفت عليها واليوم سالت الطبيب
الصبح گلي هذا كله بسبب فقر الدم
::جبتلها معلاك حاولي تخلينها تاكله وعصير وهاي فواكه
- - اي ان شالله بلكي تگعد بعد شويه وتاكل

طلعت قلم واخذت قصاصه من جيبي وكتبت رقمي وگتلها // هاچ ام بشير هذا رقمي خابريني اذا صار شي
هي باستغراب // خاله منين اخابرك ؟!
:: من اي احد انطي الرقم وخلي يتصل
اخذته وخلته بجيبها // ان شالله خاله تدلل
:: انا خليت جنسيتها يم الحسابات
- خوش

::زين اروح انا واذا صارلي مجال بالليل ارجع
- - لا خاله باجر ان شالله تعال بس على وكت حتى تشوف الطبيبه
هزيت راسي وطلعت وام بشير طلعت وياي النهاية الاستعلامات باوعت الها ومديت ايدي على جيبي
ام بشير كالت // شتسوي خاله
:: ام بشير انتي يمكن اكل المستشفى ما اياتيج وتشربين چاي
  هزت راسها وردت بعتب // ايي وتريد تنطيني فلوس شنو انا افه مو امس انطيتني رووح خاله

ابتسمت بوجهها وحبيت راسها ورحت ركبت سيارتي واتخايل صورتها گدامي يوم الي جابوها الي چانت شابه
ومترفه واديها ناعمات وبيض وهسه اشوفها ضعيفه والادين سود ومن داخل مشگگات من كثر الشغل جريت نفس
وصلت يم صيدليه وگفت ونزلت چانو قبلي اثنين صرت على صفحه خليتهم يطلعون وسلمت ع الصيدلانيه لان
اسمع الولد يكللها دكتوره هي ردت عليه السلام وگالت //اتفضل

انطيتها الورقه باوعتلها وطلعت العلاج كالت //ليش ما اخذتها من الصيدليه الي يم الطبيبه شعجب
جاوبتها ::دكتوره انا متعمد ما صرفتها
-ليش ؟
::لان هاي الراشيته الاختي ما يصير عدها جهال وهاي تراجع للطبيبه وتكتب الها بهذا العلاج وهي كلش محبطه
لا ترجع وتكللها ماكو امل بالحمل وخطيه خصوصا وهي بينها وبين زوجها مشاكل بسبب الاطفال
هزت راسها //تمام

::دكتوره اريد اسالج هذا العلاج اكو امل يصير حمل
ابتسمت بوجهي وعدلت حجابها // شوف المفروض الطبيبه تگلك لكن هذا العلاج ينطو للي عدها البويضه زغيره
كلش فهذا منشط ينشط البويضه وبلكي بمرور الوقت والاستمرار تكبر وان شالله يصير حمل
::يعني ماكو امل تحمل
-  لا مو ماكو امل بس انگول ان شالله اذا تستمر علي راح يجيب نتيجه هو غالي بس بالاستمرار اكيد يجيب نتيجه
:: دكتوره ما خلينه اشعه ملونه سونارات تحاليل خطيه كلش تعبت

- صحيح كلامك الله يسهل الها وتحمل
::ان شالله

اتشكرتها وطلعت ركبت بسيارتي وانا الملم بحلگي واعض بشفتي من جوه باوعت شفت دكتور مختص نزلت
واخذت رقم ودخلت علي سولفت اله وراويته علاجها اخذ العلاج وصار ايباوعله وكلي
::هذا العلاج ينطو للمره الي بويضتها جدا جدا ضعيفه ومن المستحييل ان تتلقح فننطيها هاي المنشطات وتبدي
تاخذهن وتبقى فتره ويراد الها صبر
::زين دكتور اريد اسوي تحليل يجوز انا هم عندي ضعف

الدكتور رفع راسه // بكيفك
وكتبلي على تحليل ورحت وره فتره طلع ورجعت اخذته للطبيب الي باوعلي وابتسم وهو يكول
- والله يا استاذ انت هسه لو تاخذ تلث نسوان بنفس الوقت هم يحملن منك نسبتك كلش زينه وما عندك اي ضعف
وما تشكي من اي شي
اتشكرت من الطبيب الي گلي // لا تفقد الامل ان شاء الله زوجتك تحمل بس يراد الها صبر وطولة بال

طلعت ركبت بالسياره وما ردت اروح واشوف ضحى لان حسيت بيها جاي تشكك برجولتي
طلعت التلفون وخابرت امي بس ردت جاوبتها بدون مقدمات :: راح ابات بالحقل لان عندي شغل

ما خليت امي تحچي سديته وطلعت للحقل ورحت للغرفه اجه يمي بشير وهو يسالني عن امه طمنته وهو راح
وانا اتوضيت وصليت ومجرد ما كملت اجه جايبلي صينية عشا وقوري چاي
باوعتله ::شلقصه حتى ما اشتهي
بشير بابتسامته المعهوده //لا تشتهي مبين عليك التعب اگعد اكل والله كريم

اكلت وبشير صب الچاي وصار هو يشرب انا سألته ::بشير انت هم عندك اخوان
بشير باوعلي هزيت راسي ::اتذكر مره اجيت وانت گلت اخوي الزغير بايت يمنا
- ايي صحيح احنه اربع اخوان واخت وحده
::ها يعني عندك تلث اخوان
- ايي انا الثالث
:: والله عبالي الچبير

هو هز راسه //الناس بهاي المنطقه عبالهم انا الچبير بس عبد الرزاق اخوي الچبير ورا مؤيد وبعدين انا وانوب
سجاد وحوراءذوله توأم والي چان بايت اهنا هذا سجاد
حكيت لحيتي ::وين اخوانك اشو ما اشوفهم يجونك او حتى انت تروح الهم
بشير //لا انا امر عليهم وهمه دووم مشغولين
:: ليش همه شيشتغلون

بشير //احنه اصلنه من الديوانيه الوالد الله يرحمه هاي شغلته حراسه وبيع ومشترى اخواني رزاق ومؤيد موظفين
بشركة حفر وانا مو هلگد بالدراسه اخذت شغلة ابوي
::هاا يعني اخوانك ساكنين بالديوانيه
بشير //ايي ابوي بنالنه بيت طابقين ومن اتزوجوا اخواني كل واحد اخذله طابق وانا وامي وسجاد وحوراء بقينا
بالحقل ويه ابونه
::بهذا الحقل

- لا قبل هذا حقلين بس هذا صار النه بي اكثر من عشر سنين سجاد يدرس هندسة حاسبات ابغداد كاعد قسم داخلي
وحوراء اتزوجت
::وامك وياك
-ايي امي وياي لان تحس زوجات اخواني ما يردن احد وياهن
::وزوجتك

هو باوعلي انا استردفت ::اقصد زوجتك قابله تعيش وياك اهنا
بشير ابتسم //ام بهاء ماكو منها عشگتني واصرت تاخذني
::هههههه تحجي صدك
- وداعتك ابوها تاجر واخوانها واحد مدرس والثاني مقاول وبعرس اخوها ابوها اشترى عجل چبير واخذته
الهم قبل يوم وعود اخوها لزمه هذا العجل عت الرباط وانهد وصرت اركض ورا وطحت وانفصخت رجلي
ودخلوني للبيت

وابوها كال //صيحو نهوده تعرف للفصخ
واجت نهوده وشفتها متت بگاعي وهي تگلي بس شفتك گلت خلص هذا فارس احلامي وانا بس سوتلي الفصخ
ماعت روحي
::ههههههههه
- وداعتك ماعت روحي منا هي ناعمه ومترفه بگلبي گلت هاي تسويلي رجلي هاي من تلزم رجلي ايدها تنفصخ من
گد الترافه والنعومه اشو هاي گالت لاخوانها الزموا وطگت رجلي انا من الالم ماعت روحي

  ضحكت :: وتالي
- تالي صرت زين واتعذروا مني اخوانها لان فلتوا العجل وانا ابدي اكوم ابوسهم لان من وراهم طحت
وانفصخت رجلي وصرت لا انام ولا اكل ولا اشرب لمن ما گلت الابوي يخطبها الي
::ايي وشكال
- تخبل وكلي من كل وعقلك ينطونها انا گتله اذا ما اخذها اموت
عاد ابوي گلي انا اروح اخطبها بس بشرط كون هي توافق ما اريد اتفاشل ويه الناس

وصرت اراقبها من تطلع للمدرسه واتعمد اخليها تشوفني
::ايي
تالي ما صبرت وگفتها بالدرب وبدون مقدمات ولا سلام گتلها تقبلين تتزوجيني
انا ادخن واضحك ::وشنو ردها
ردت عليه بخجل //شنو هالحچي هذا مو عيب عليك
- لا مو عيب عليه جاي اريد اخطبج واخذج على سنة الله ورسوله
- هاا هيج وانت من يمته تريد تخطبني
-من يوم الي انفصخت رجلي

هي لمعت عيونها وضحكت وگالت //وانا بس شفتك شلون تركض تريد تلزم العجل ومن طحت وجابوني اسوي
رجلك بس شفتك گلت خلص هذا فارس احلامي
وخطبتها واهلها بالبدايه ما قبلوا تالي هي وكفت الهم وگالت انا قابله بي وقنعت اهلها واتزوجنا وصار عدنا بهاء ولقاء
:: الله يخليهم وعايشه وياك اهنا
- ايي عايشه وياي وما تفارگني احبها وتحبني ولا يوم زعلتها ولا يوم زعلتني وانا ما مخليها تحتاج شي اصلا
اذا راحت الاهلها يومين وتخابرني تكلي تعال رجعني

::الله يديمك الها
-ويخليك ياالله انا اروح لان اتاخرت واخاف تبيتني بره
::ههههه لا ام بهاء بت اصل ما تسويها
-تصبح على خير اي شي تحتاج انا يمك
::لا مشكور احتاج سلامتك
- الله يسلمك باجر لا تطلع اذا ما تتريك
سالته ::صدك بشير منو يحلب الابقار

- الفلاح الي ابيت ابو عيسى هو يجي يوميه ويحلبهن ومصلح يجي يسرح
::ابو عيسى يقبل
   هز راسه //. اي ما يكول شي على ما تشوفلك واحد
وراح بشير وانا بقيت بالغرفه صدك بارده وموحشه بقيت ادخن وانا اباوع الها كانما اول مره اشوفها او اكعد بيها صرت احچي ::شلون تگدرين تنامين ابحدج
::صدك الله يساعدها

وغفيت والصبح گعدت وبشير جابلي ريوك اتريگت وبدلت وطلعت رحت للدائره الظهر اخذت زمنيه
طلعت بوجهي للمستشفى
اخذت غدا ورحت وهناك شفت الطبيبه يمها سلمت وبقيت واگف الى ان خلصت الطبيبه رحت وراها

::ها دكتوره شلونه وضعها
  بدون ما تباوعلي // وضع منو
::مروه
    رفعت حواجبها  //.  عبالي تساله على غير احد لان ما تكول مرتي او زوجتي ولا حتى سميتها

بقيت ساكت ما اعرف احس الطبيبه تدري بمروه فصليه هي باوعتلي وكالت
-شوف زوجتك ان شالله زينه بس هذا الشي ما يمنع انو بعدها متهدده بالاسقاط نتيجة فقر الدم
::والحل دكتوره
-تبقى يومين اهنا وراها تطلع للبيت تنام على ظهرها شغل بالحقل ماكو تشيل شي ثگيل جلكان ماي ما اعرف
شنو ماكو وتعتني باكلها وره عشر تيام تجيبها وتجي  اسويلها سونار مفهوم
::ان شالله

وراحت الطبيبه وانا سلمت على ام بشير وسالتها:: شلونها
-اليوم احسن شويه شربت حليب واستقر بمعدتها
هزيت راسي ::جبت الكم غدا وبشير يسلم عليج
- الله يسلمك هسه اغديها
::هي دووم هيج نايمه

  هزت راسها // اي خاله تگعد شويه وتنام
::زين انا اروح ما محتاجه شي
-لا خاله سلامتك بس ......
::ليش سكتي شنو خاله گولي
اتقربت مني وكالت //يا خاله هاي البنيه ما الها بس الله وانت رووح يمها واحچي وياها واتشافالها

صفنت بوجه ام بشير الي هزت راسها وطلعت اتقربت منها باوعت بوجهها واتذكرت ذاك الحقير طلعت
حتى بدون ما اسلم على ام بشير رجعت للبيت اتلگتني امي
-الله يساعدك
::هلا يوم الله يساعدج
شفت ضحى كالبه وجهها انا ماحاچيتها گلت ::صبو غدا بين ما اغسل

الظاهر همه متغدين لان صبت بس الي اكلت ورحت اتمددت وانا متعجب من نفسي
  من ابقى ابحدي بس اريد اروح للمستشفى حتى اشوفها ومجرد ما اوصل واباوع الها اكرهها

ثاني يوم رحت للدوام ورجعت للبيت وانا ما احچي ويه ضحى
وره يومين طلعت من المستشفى وحسب اوامر الطبيبه تبقى اسبوعين نايمه على ظهرها واكل زين وكتبتلي
علاج لازم تاخذه بوكته هي ركبت بالسياره وره وام بشير يمي بالصدر صرت اسوق واحنه ساكتين وانا ما باوعت
بوجهها وگفت يم محل يبيع فواكه وخضروات اخذت واشتريت عصاير وبعدين وگفت يم مطعم اخذت غدا الها
والبيت بشير وصلنه للحقل وهناك نزلت وهي راحت كبل اتمددت

انا رحت وصلت ام بشير البيتهم وانطيتهم المسواك كله وفهمتها توديلها غدا وتوكلها فواكه وانطيتها
فلوس يشترون مسواك
ام بشير كالت //خلي فلوسك بجيبك انا بالاساس ما صرفت الفلوس الي انطيتهن الي

ورجعت بدون حتى ما اشوفها وصرت اجي للحقل كل يومين تلاثه وما امرعلى مروه بس اسأل ام بشير
على صحتها وعلى اكلها وشلون صارت

وره اسبوعين حجزت الها عد الطبيبه ورحنه بس انا وهي طول الطريق واحنه ساكتين دخلت ع الطبيبه الي
دزتهاع السونار وراها الطبيبه طمنتنا انو الطفل وضعه زين ومروه مستقره حالتها لان دمها رجع المعدله
الطبيعي وكتبت علاج جديد عباره عن مقويات او وصتنا بضروره الراحه

رجعنا للحقل واحنه ساكتين لو كلمه ما حچينه وصلنه وهي دخلت للغرفه وانا رحت اشوف بشير لان بيومها
عنده بيعه ظليت اسولف ويا وبعدها رحت اشوفها دخلت وانا شفتها واگفه تعدل بالفراش وهي نازعه الشال اول
مره انتبه الشعرها مسترسل على متونها چان سرح ولونه حني وبي لمعه

هي باوعتلي ودنگت اجيت اريد اكلها انا مشتاق الج لكن مجرد ما وصلت يمها تراوتلي ازهار گتلها
:: انتي صرتي زينه منا وغاد بس تطلعين تاخذين الابقار وتظل عينج عليهن
ما انتظرت اسمع ردها ركبت سيارتي وطلعت وانا الوم بنفسي

:: ليش هالشكل حچيت انا اجيت اكلها مشتاقلج اريد اسولف وياها واسمع صوتها ليش هيج جاي اعاقبها

وقررت ما اروح للحقل لان جاي اتعذب واذيها وانا افكاري مزيج من انتظار ويمكن فرحه ويمكن حزن ما اعرف
   بشير صار هو يجيني ونتحاسب
 
  قررت ابلغهم بحمل مروه لان ضحى داىما اتسمعني نفس الديباجه
- الطبيبه كالت وضعج كلش زين وانتي ما تشكين من شي ورجلج لازم يحلل

ولان سالم قرر يتزوج سماح وهذا الشي رفضته امي وضحى الي اجن وطلبن مني اقنع سالم يتزوج
وبعدين ياخذ الفصليه لكن انا ما وافقت وجاوبتهن انو سالم مو زغير وانا افرض علي شيسوي
ضحى فقدت اعصابها وصارت تحچي بعصبيه خصوصا وانا صار اكثر من شهر ما طاخ الساني بلسانها
رغم اجت واعتذرت ضحى ردت

- طبعا ما توافق لان فصلية سالم تصير اخت فصليتك ولان نسيت دم اختك
اتقربت منها وجريت نفس وكتلها ::انتي شتردين
هي جاوبتني //اريدك تطلك الفصليه وترجعها الاهلها
رفعت حواجبي وحاچيتها باستهزاء ::هاا اطلگها
امي ردت // ايي مو كسرت عين اهلها واخذتها وذليتها خلص مثل ما تكول مرتك طلگها وسالم يرفضها
ويفصلونه بمكانها فلوس

:: والله زين انتن تخططن وتقررن واحنه علينه انفذ
ضحى جاوبتني //وانت ليش متمسك بيها شنو هي وانت تتمسك بيها
باوعتلها وخزرتها هي بقت تحچي بعصبيه // انت المثلك بنفس اليوم من كسرتها ترجعها الاهلها لان بالاساس
هي معيوبه الله العليم شچانت تسوي هي وجمال وحتى هسه شنو انت خال عليها ناظور من تطلع تسرح

انا احس وجهي اشتعل نار ::شقصدج ولج
  ضحى علت صوتها // قصدي واضح تره الگاعد ابيت عمه وخاطب بتهم ومخليها سنتين اكيد شبعان بيها
ليگدام وهل ما اخذها
اتقربت منها وانا اصك اسناني ::انچبي ولج والزمي السانج

ضحى زادت //وليش الزمه انا ما مچذبه الله اعلم شچانت تسوي ويه جمال وانت ما تقبل اتطلگها
امي هزت راسها // كلام مرتك صحيح رجعها الاهلها وسالم ياخذ فلوس بمكان اختها وانت يمه انتبه النفسك
ضحى //ايي خاله گليله خلي يروح يعالج بلكي يصير عدنا ولد بنيه مو ملتهيلي شگالت الفصليه وشحچت الفصليه

جريت نفس وجاوبتها ::بس انا متاكد من نفسي ما بيه شي
- ليش ما بيك شي هاي انا تحاليلي تكول زينه وما عندي اي عارض وانت على بو متاكد ...
خزرتها وامي قاطعت ضحى // يمه اذا ما بيك شي ما حملت الفصليه
ضحى // شنو تحمل منين ابنج هو البي ضعف

انا ما حچيت طلعت واسمع امي ترزل بضحى وتگللها //شبيج متخبله
ضحى ردت بدون اهتمام //هذا هو خلي يعرف انا گوه متحمله هم من حقي يصيرلي طفل الي اتزوجن وياي
سجلن جهالهن بالمدرسه
امي // حقج خاله بس مو هالشكل تحچيين ويا

دخلت وبيدي علاكة الدوا والتحليل شمرتهن بوجهها واتقربت يمها لزمتها من شعرها
::  اتفضلي خاتون هذا التحليل ودي الطبيبتج وانا اروح وياج واسمعها شلون تكلج ما بيج شي وهي
تكتبلج منشطات لان انتي عندج ضعف واصل للصفر واعرف وسكتت گلت خطيه خلي اصبر عليها
لكن توصل بيج تشككين برجولتي وتگولين منين تحمل لا هاي جبيره

لزمتها وضربتها بالحايط وصرت اضربها بوكسات وانا اگلها
::چان استحيتي من چذبتج ياحقيره عاد اسكتي لا تمتحنين صبري خليني بالعها وساكت
( باوعت الامي الي صارت ابيناتنا وهي تگلي ) استهدى بالرحمن يوسف على كيفك
جاوبتها ::راح اطلع ساعه وارجع اذا اجيت ولكيتها احرك البيت بلي بي

امي //ما طول الحچي صار هالشكل انا اطلع وياها
::اطلعي وين ما تردين روحي وياها
امي // يوسف عيب هذا التسوي
:: يمه كلت ما تبقى لا تخليني ارتكب جريمه
امي ردت بعصبيه //اسمعني يوسف ضحى ما تطلع من البيت اذا اكو واحد يطلع فهو انت

هزيت راسي وطلعت ورحت امشي وصلت الباب الصاله درت عليهن وهنه واگفات
:: الفصليه حامل من اول ليله

////////////. ..../////////....//////

مروه
من شفت امي واخوي وعمتي رجعتلي نص عافيتي وانا احضن بيهم وما مصدگه امي يمي وامين نور
عيوني وعمتي حبيبتي بقو ساعتين وراحو وانا اتصنع القوه گدام امي واخوي واهم شي جابولي جهاز
اقلها اعرف اخبارهم واطمن عليهم وامين يوصي بيه اضمه زين وانا الي اتصل

وصار يوسف يجي للمستشفى وادري بي يسال ام بشير عني وسمعته كتب رقمه وگللها اذا يصير شي او تتعارض
خابريني من طلع انا اخذت رقمه وسيفته بالنقال
وطلعت من المستشفى والطبيبه گالت انام على ظهري اسبوعين هو وصلني وانا بقيت متمدده

وصرت شويه اخلي ام بشير تجيبلي شغلات اوصيها عليهن يعني ملابس داخليه وعطورات وكريمات الاديه او وجهي
الي صار احسن من قبل وحتى وصيتها على قماش گلت اخيطه ملابس للطفل وملاحف بايدي ومن يسالها يوسف
تكله هي جابتهن اليه

واجت عليه مرت بشير انا شفتها بيوم الوگعت وما حچيت وياها بس هسه لا اتعرفت عليها شفتها حبابه
ودمها خفيف خصوصا وهي تسولفلي على حبها البشير وشلون اتعرفت علي
صارت تحجي وان اباوع الها ومن رادت تروح گتلها = تره انا اعرف اگص شعر واحف وامكيج اذا يعجبج شي انا
بالخدمه
هي ردت عليه //زين لعد منا وهيج ما راح اعوفج يوميه يمج

وفعلا صارت تجي وانا اسرح شعرها وامكيجها رغم هذا الشي ما توافق علي ام بشير لان تخاف عليه وانا
اطمنها انو اموري زينه ولا تخافين وحتى انا قررت اهتم بنفسي النفسي ولازم اتعايش ويه واقعي بس ما اهمل
روحي لان بعد الروح محد يفيد

اما يوسف ما يجي للغرفه لكن اسمع صوته يسولف ويه بشير ويجيبلي مسواك ينطي لام بشير وهو ما يمر بيه
بس حتى ما يسالني عن صحتي وانا هذا الشي صار عادي عندي لان مثل ما گلت انا معتبره نفسي يتيمه وارمله
بالليل من اتاكد ما كو احد بره او حوالين البيت اسركي الباب عليه واخابر اكثر شي اخابر عمتي لان اهلي
صعبه احصلهم بسبب ضعف التغطيه واسال عمتي على امي وتگلي
-امج من يوم الي شافتج ما بطلت بچي حتى عيونها راحن يعمن والسكر كل ساع وارتفع عدها

چنت اخابر امين العصر من اتاكد يوسف ما يجي واساله عن اخواني وانا كل بالي يم سماح الي اذا اسولف
الامين عن عذابي اكيد راح يسوي مشكله ومستحيل ينطي سماح وبالتالي يوسف واهله ما راح يسكتون
وطلبت من عمتي امل تجيب امي وسماح وزينب يمها حتى اخابرهن واسولف وياهن

وفعلا خابرتني عمتي وحچيت ويه امي وسمعت صوت سماح الي صارت تبچي بصوت عالي
وهي تشهك بالبچي
مجرد ما سمعت صوتي لو زينب الي اختنكت بعبرتها ردت افهم سماح على حالتي بس كلت امي
تسمع ويصير بيها شي

لذلك من رجعوا للبيت انا سولفت العمتي امل كل شي بعد ان اخذت من عدها وعد انو الي تسمعه
مني ما يطلع بس ردت منها تحچي ويه ابوي وامين يحاولون ايفكون سماح

وره ايام خابرت عمتي ومن سالتها ردت علي
- - ابوج دز ناس على يوسف وسالم ويوسف گال بكيف سالم لان الفصل اله وسالم ما قبل وگال مثل ما
اخذ يوسف انا هم اخذها لان المره اتوكفت الي

من اكمل المخابره اغلق النقال واشحنه وبعدها الفه بعلاگه نايلون واطلع اضمه جوه الحطب الي يم التنور لان
ما عندي بالغرفه مكان اضمه بي

صرت اطلع بالابقار وانا بس اراقبهن وهذا الشي زين اليه لان اشتم هوا نقي وشمس ومن تعلى اگعد جوه الشجره
چنت اتعب بس من الگعده لان بره ماكو مكان اتمدد بي
وبيوم اجيت راجعه بالابقار وشفت سيارة يوسف ولگيته گاعد بالغرفه چان مبين علي الزعل والعصبيه

  بقيت واگفه وكتله = الله يساعدك
هو اول مره يرد عليه :: هلا

وطلع بره راح يم ام بشير شفته جايب مسواك فتت غسلت بسرعه واخذت العلاگه شفته جايب كباب وفواكه وصمون
رجع صلى وانا خليتله العشا ورحت اصلي هو اكل وراح غسل وگلي
::انتي اتعشي وانا راح اشرب چاي يم بشير

اتعشيت وشلت المواعين واخذت علاجي واتمددت على فراشي غفيت گعدت الصبح لكيته نايم بعيد عني
طلعت دفيتله ماي يغسل بي وانا توضيت وصليت وخدرت چاي شافتني ام بشير واجت يمي وهي تبتسم
- صباح الخير
ابتسمت // صباح النور
-شجاي تسوين
= خاله ريوك
- زين انا راح اكمل حلب الهوايش واطلعهن وانتي الحگيني
= اي خاله ان شالله بس يروح يوسف

وراحت ام بشير وانا كملت الريوك وما اتجرأ اندهه اخاف منه وبنفس الوكت يجوز يتاخر على شغله دخلت
للغرفه وسديت الباب حييل هو فز باوع للساعه وراح غسل وصلى وبعدها خليتله ريوك وصار يتريك وبدل
وطلع بدون ما يحچي وياي

وره يومين شفته اجه هو وسالم ابن عمه چنت جايه من السروح واشوف سالم يسولف على بشير وبعدين تصافحو
وراحو بالليل اجت ام بشير وهي تگلي
- سالم اجه اشترا عجل
باوعتلها هي ردت //لان عرسه بعد اسبوع

عرفت انو سالم راح يتزوج سماح وصرت خايفه على اختي وانا يتراوالي انو سالم راح يسوي نفس ما سووا يوسف
صرت ابچي وانا ما اعرف شسوي
خابرت عمتي امل الي اكدت كلام ام بشير وصرت ابچي وهي تصبرني وتگلي انا سولفت السماح كل شي وفهمتها
انو لازم تتوقع كل شي من سالم وخصوصا وهو چان خاطب بت عمه اكثر من سنتين

وسالت عمتي =عمه وسماح شنو گالت
امل //سماح كله عدها عادي تطلع تشتري ملابس وعطورات ومكياج ولو تشوفين البدله الاجرتها
=عمه تحچيين صدك
وداعتج وگلتلي خلي مروه ترتاح ما عليها انا گدها وگدود وكل شي يهون الخاطر امين

//////////////|||////////////////////

يوسف
بعد ان فاجأت امي الي طردتني من البيت الخاطر ضحى انا رحت للحقل وصلت ودخلت للغرفه وانا ضايج
اجت هي قريب المغرب شافتني واتفاجأت سلمت عليه جملتها المعتاده وانا رديت عليها
اباوع راحت غسلت واخذت الفواكه غسلتهن ومجرد ما صليت هي خلت العشا وراحت اتوضت وصلت

وبالليل رحت يم بشير ومن رجعت شفتها محضره فراشي اول مره اباوع حييل الوجهها وهي نايمه شفتها
صايره حلوه احلى من قبل رغم التعب ما اعرف يجوز من الحمل شفت شعرها رافعته ع المخده

اتمنيت احضنها لكن ما اعرف شنو الي صار اخذت فراشي ورحت على صفحه صرت ادخن واباوع الها وهي
نايمه واحچي ويه نفسي ::يعني معقوله سنتين وانتي مخطوبه وكل شي ما صار بيناتكم

بقيت اباوع الها وافكر الى ان غلبني النوم وگعدت على صوت طبگت الباب صليت واتريگت وبدلت
وطلعت رحت للدائره تقريبا الساعه بالتسعه الصبح اتصلت عليه امي بالبدايه ما جاوبتها لكن صارت
تلح ويمي الموظفين يباعولي اخذت التلفون وطلعت ورديت عليها

::الو
امي بعتب //شدعوه الف مره صرت متصله عليك
::ماچان يمي
- ماچان يمك لو ما يعجبك ترد عليه
::يمه عندي شغل
- على كيفك عيني من تحل من دوامك تعال للبيت
::لا ما اجي عفته البيت الچ والبت اختج

امي // - يوسف مرتك طلعت من امس راحت البيت اخوها
::هاا شعجب خليتيها تروح موطردتيني على مودها
- ما ردت المشكله تكبر بينك وبين بت عمك
::بت اختج غلطت وغلطت غلط چبير
- بت اختي ما سوت شي تحبك وتغار عليك وكل مره بمكانها تسوي اكثر
:: ههه يمه تغشمين نفسج ضحى مو بس چذبت ضحى شككت برجولتي

امي بنتر //كافي يوسف وعيب من سالم بعد اسبوع عرسه واخته زعلانه عده انا گتلها من ايسالج سالم گولي
يوسف وداني ارتب البيت
:: لا ليش تچذب خلي تحجي الصدك لان انا بعد ما ارجعها الضحى
امي بعصبيه //كافي كافي شنو ما ترجعها عيب هذا الكلام كمل شغلك ومن تحل تعال للبيت خاف العصر نروح
ونشوف سالم يجوز يحتاج شي
::ايي ان شالله

امي // - يوسف شفتهمت تجي للبيت مو عوزنا الناس تحچي علينه عايف مرته وراكض وره الفصليه
::ضحى تبقى يم اخوها تتادب وهذا اخر كلام والفصليه ما الها غرض
- زين يوسف مثل ما تريد سوي

وسدته امي بوجهي كملت دوام ورجعت للبيت سلمت على امي الي لكيتها كاعده بالصاله صعدت غسلت وبدلت
ونزلت امي گالت البسام // گوم جيب الغدا
راح بسام للمطبخ جاب وخال صحن چبير بي تمن والثاني بي دجاجه عرفت جايبين الغدا من المطعم سالت بسام
:: شنو غدانا من المطعم

امي // ايي من المطعم ما بيه ادخل للمطبخ واسويلكم غدا
:: هذا هو نعمه
اتغدينا واحنه ساكتين من كملنه امي گالت البسام // شيل الصينيه وسويلي جاي
بسام //يمه وراي دراسه مو بس اتامرين عليه
- هسه شطلبت منك سويلي جاي وروح ادرس

وراح بسام للمطبخ وانا رحت غسلت ودخنت جكاره وبسام جاب الچاي وراح للغرفه مالته امي دنت القوري
وصبتلي كوب وهي استكان وكالت // ليش ما گلت ع الفصليه حامل
:: ما عرفت اله امس
-وشلون عرفت

:...دايخه وماخذتها ام بشير للطبيبه ومسويه تحليل وطالعه حامل
- مو تكول من اول ليله شنو التحليل يطلع عمر الطفل
:: لا الطبيبه طلبت سونار ورايحه مسويه وطلعت حامل بالرابع
هاا خوش بس مو تلتهي وياها عوفها وخليها تولي عود من يصير الطفل ذاك الوكت نشوف شنسوي

////////.....///////.....///////.....////////....//////يتبع