رواية بعد فوات الأوان الفصل الثاني وأربعون 42 - بقلم آنين الليل

السلام عليكم قرائي واحبابي الطيبين 😘😘😘
وكل عام وانتم بالف خير ويارب تحقيق جميع الاماني 💓💖💓
استميحكم عذرا بسبب غيابي عنكم ولكن اذا عرف السبب بطل العتب والعجب
بعد ان نشرت البارت السادس والاربعون بيومها اجاني اشعار من بعض صديقات الدراسه انو نقوم بتظاهره
حالنه حال باقي المحافظات احنه الي درسنا وتعبنا ورغم انا ضد هذا الشي ولان اعرف انو مستحييل تتحقق مطالبنه

لان الشغله مو شغلة شهاده ودراسه وتعب لا الشغله شغلة محسوبيات وانو الناس كلها تريد ان تحصل على حقوقها
حتى الي عنده سبع موظفين بالبيت يريد الثامن يتوظف المهم وافقت ان اروح واسجل اسمي وفعلا رحت ويه زميلاتي
واخذت وياي اللابتوب الي ما يفارگني وطلعنا وقفنا اباب المحافظه شباب وبنات وكلنه نريد حق من حقوقنا

وقفنا وقفة احتجاج وسجلنه اسماءنا و رجعنا وبطريق العوده احنه تلث بنات من نفس القضاء اجرنه سيارة
بالطريق صار حادث امامنا اظطر السايق ان يتلافى السياره لكن انگلبت بينه ما فتحنه عيونه اله احنه بالمستشفى
وايدي ورجلي مجبسات وراسي مضمدينه
فتحت عيوني وانا بالگوه اشوف وعرفت انو احنه انكلبنه وكلنه متكسرات والسايق ويانه مو اهنا المشكله

انا كل حسابي موجود ع اللابتوب يعني مو بالنقال واتفاجأت من جابو وهو عباره عن انقاض اتذكر چان بحضني لكن
مثل ما انا اتكسرت هو هم اتكسر وسحگت علي السيارات فااصبح عباره عن انقاض
وصار شگد احاول اتذكر الحساب وارجعه لكن بدون فائده

طلعت من المستشفى وانا ايدي ورجلي مجبسه ومن غير الالم مقهوره ع اللابتوب
قبل ايام اخوي الزغير يلعب بالايباد مالته واجه يمي لان انا ما اگدر اتحرك من الم رگبتي والي اثر
حتى على راسي ومسببلي دوار مو طبيعي المهم اتذكرت انو هذا الايباد انا انطيته اله من نجح وچنت استخدمه

اخذته منه وحاولت ارجع الحساب ما گدرت حملت الواتباد من جديد راسا اتحمل عندي لان انا حذفته
بدون تسجيل خروج للحساب  وما تعرفون مدى فرحتي من رجع حسابي وجميع القصص
بعدين رجعت حسابي

انا الان لازلت تعبانه كف رجلي مجبس ايدي فتحو عنها الجبس لكن الطبيب گال لا تعبيها اما الدوار وعدم التركيز
اهنا المشكله رغم سويت جميع الفحوصات الي اكدو الاطباء انو وضعي جيد لكن هذا الاحساس بسبب انزلاق الرقبه
وانو لولا ستر رب العالمين كان اكو شي اخر

ارجو المعذره من الجميع وان تتقبلو اسفي لان جعلتكم تنتظرون وايضا اشكر كل من سأل عني بالخاص ربي يحفظكم
ويبعد عنكم كل مكروه
اكيد نسيتو القصه بس مي خالف راجعوها وان شاء الله اكملها انتو بس ادعولي 🤲🤲
احبكم كثيير 💕🌹💕
آنيين الليل #
///////////////////////////

امين
طلعت بعد ما صليت الفجر طلعت صوب المحل وتلاگيت ويه جهاد الي مبين علي التعب وما نايم
هو شافني وكلي //ها اشو اليوم من الفجر
جاوبته بتعب // الناس تكول صباح الخير السلام عليكم

- - اعذرني بس ما صار هواي من رجعنا للبيت شعجب طالع من الفجر
- - ما جاييني نوم گلت اطلع على باب الله وانت
- - انا يوميه اجي للمحل من الصبح
- - اقصد ليش ما نايم

- - منو يكول
- - مبين من عيونك ومبين عليك التعب
طلع جگاره وصار يدخن گتله //شبيك جهاد بس تدخن عاد اتريك بالاول
ما جاوبني رحنا فتحنا المحلات هو اجه يمي سالني // خير امين شصاير
هزيت راسي //لا ما صاير شي

هو وگف وكلي // الظاهر ما تريدني اعرف براحتك من تحس نفسك تگدر تسولفلي انا موجود واسمعك

بعدها راح للمحل الثاني وصارو العمال يجوون وره تقريبا ساعه ونص جاب ريوك وصرنا ناكل وكل
واحد بينه بگلبه كلام ويريد يكوله لكن طبيعة جهاد كتوم وطبيعتي ما اكدر اضم علي
فكرت اسولف اله على الي سوته مروه لكن ارتأيت اسكت واشوف شنو راح يرد عليه يوسف

بهاي اليومين مرن اصعب ما يكون من توتر وتفكير بعدها اتصلت عليه مروه جاوبتها بعصبيه
اسمعي بدون نقاش ترحين الاقرب سفاره وترجعين لا ......
قاطعتني = امين بلا عصبيه وبلا توتر اسمعني انا رجعه ما راح ارجع ابني عندي وراح نعيش انا ويا بعيد
عن يوسف وظلمه وظلم اهله
- - انتي شتحچيين لازم ترجعين

= ليش ارجع انا هناك ما اشوفكم واهنا ما اشوفكم بس اهنا اقلها باي وكت اگدر احچي وياكم وما اخاف من
يوسف يلگى النقال عندي
- - هذا مو مبرر باچر يوسف يتقول ويحچي ويزيد وينقص
= لا امين صدگني ما يفك حلگه
جاوبتها باستغراب // ليش هلگد متاكده

= مو انا من هددته اشتكي علي وانا بصراحه ردت الفكه منه بعد هو شنو يحجي شيگول اخذتها اهناك
وعفتها ورجعت لو اخذتها هناك وهي ما قبلت ترجع وياي وهددتني تشتكي عليه وخفت ورجعت
امين اطمن صدكني يوسف ما راح يسوي شي راح يطلكني وتشوف

جاوبتها بعصبيه // مروه اشوفج متاكده شضامه عليه كولي
= ما ضامه شي بس هو بالبدايه گلي اريد اروح اهاجر وهناك اسويلي مشروع انا وعلاء اخوي وراح
اخذج انتي وابني انا بصراحه كيفت اقلها اخلص من الحقل والعجول والضيم وگلت بلكي تتبدل حياتي
اشو بس وصل هناك بدل رأيه وكال انا چنت غلطان من فكرت هيج ولازم نرجع عاد انا
استغلييت الفرصه وما قبلت ارجع وهددته اشتكي علي ومن شافني مصره خاف ورجع

- - اي بس شلون هاجرتي ومن. وياج
= مو دزيتلك الصور وياي ناس طيبين صدگني امين اول مره من تزوجت اول مره احس بالامان
- - لازم ترجعين مروه
= اي ارجع بس خلي ايطلگني ابقى فتره وارجع
- - مروه تعرفين هذا يوسف اذا يحچي الناس كلها تصير ويا ويرجعون يطالبوني بابنه ويجوز يطلبون
زينب ابمكانج ويجوز سماح ايطلگها سالم وانا لازم ابقى افصل منا ومنا

= صدگني امين تشوف هذا يوسف ما راح يفك حلكه وبيوم اليحجي انا راح ارجع بس اذا طلك وسكت
خليني امين خليني اشوف حياتي
جريت نفس قوي // بعدچ زغيره ما اقبل تعيشين ابحدج
= ما واثق بيه مو
- - لا واثق بس اكو حسابات

= هسه خلي يطلك والبي خير يقدمه رب العالمين لاتزعل عليه انت مو بس اخوي  انت اخوي وابوي وكل
شي الي لاتفكر بيوم اسوي شي يضرك او ايزغرك گدام الناس اريدك تدير بالك على نفسك وانت ما عايز
حمل وتشيل حملي

ما اعرف احس بمروه ضامه عليه شي وحتى يوسف معقوله الي ما خلى مروه تجي تشوف امها ولا تحضر فاتحتها
معقوله يسكت ويقبل يخلي ابنه وزوجته يهاجرون وهو ساكت اكيد اكو شي بالموضوع
بعدها بيوم اجتني رساله ع الواتس من يوسف كاتبلي بيها
::انا طلگت مروه وتركت الها ابنها لان اعرف بيها راح تربي احسن من عندي
واجتني صورة خط الطلاق

بقيت بهاي الدوامه ومحد بينه مفتهم شي سماح متوتره وتحاول تتصل بمروه تعرف منها الي صار
لكن مروه دووم رقمها مغلق

وسالم متعجب من ردة فعل يوسف وسكوته

وصادق يكول خليها بالخارج تاخذ فتره وبعدين نطلب منها ترجع
وجهاد يوميه يسالني شصاير وانا احاول ما اجاوبه
لكن بعد ان اتاكدت من طلاق يوسف المروه قررت استشير جهاد واسمع رايه بالموضوع

/////////////////// /////////////

جهاد
من ودعت مروه هناك ع البحر احس بنفسي تاهت واحس صرت امشي جسد بلا رووح وصرت
الوم نفسي ليش فرطت بيها ليش ما خليتها تبقى اهنا حتى لو اجبرها شلون انا ضيعت مروه من اديه
مره ثانيه مو چانت بحاجت مساعدتي ليش ما اعترفت الها بحبي بجنوني بعشقي

اتمنيت ان يكون الشي الي صار مجرد حلم لكن ياحلم انا بايدي انا قدمتها للمجهول او للموت
بقيت الوم بنفسي هعلى خيانتي الامين ونذالتي وانا اشوف بعيني روحي تنتزع مني ورايحه ما اعرف وين

ما صار گدامي اله انو ارجع للعراق انتظرت على ما وصلني خبر وعرفت انو البحاره وصلوهم لليونان
بسبب الظروف الي تمر بيها بعض البلاد وانهم راح ينطوهم تلث تيام حتى يغادرون الاراضي اليونانيه
صرت محتار شنو اسوي ما اگدر الحگها لان وين راح الكاها

فعلا بذاك الوقت انا مجرد ( شي ) اي ما لاكي وصف الحالي انا شي مبهم شي يتنفس وياكل ويشرب
بدون اي شعور ولا احساس مجرد رووح خاويه خاليه

بقيت الووم بنفسي واحچي // جهاد انت اكبر جبان واكبر خاين
جهاد انت ما تستحق تعيش
شراح تسوي اذا مروه ما وصلت

حركت ايدي لا اراديا //. لااا مروه ان شاالله توصل بالسلامه
نزلن دموعي واحجي ويه نفسي باستهزاء //. ليش تبچي وعليمن ؟
صرت ادعي المروه توصل بالسلامه

واضطريت ارجع للعراق وصدكوني خجلت اباوع بوجه امين وكل الي سويته المروه هو من خوفي عليها تتهور
وتروح ابحدها وهي ما تعرف شي ولا شلون تتصرف ويه المافيات الي شفتها

لكن هذا انا جبان وتركتها ابحدها صرت ما انام وافكربيها وحتى ما اكل ولا الي خلك الاي شي وبنفس الوقت
اشوف امين شلون باله مشغول على اخته وحسبه تجيبه وحسبه تودي وانا اتحاشى حتى ما اكعد ويا
اله ما ندر وما اسولف الكم بهاي الاسبوعين شنو صار بيه لان ما راح تتصورون وضعي

نووم ماكو
اكل قليل
بس اسحك جگاير والتفكير راح يقتلني

ما ارتاحيت اله لمن اتصلت عليه وسمعت صوتها
وبعدها عرفت منها انو اخوانها عرفوا بسفرها وانو يوسف طلگها
وانتظرت امين يجي ويسولفلي لكن هو ما اجه ولا حچالي الي صار وهو الي ما يضم عليه شي

انا خليته وما جبرته يحچي الى ان اجه هو من بحده وبذيج اللحظه اتمنيت اموت لان حسيت بخيانتي اله وانو انا
الي ساعدت اخته حتى تسافر وهاي بحد ذاتها خيانه للاخوه الي بيناتنا
اجه امين وانا اشوف بعيونه حيره وبحاجه للمساعده

كعد بالمكتب وصار يتصحف بالسجل ومره يلزم الريمونت ويدور بالتلفزيون اتقربت يمه وسالته //شبيك امين
اتنفس بحسره وغمض عيونه // محتار ياجهاد محتار وما اعرف شسوي
جاوبته وانا اعرف رده - خيير شصاير ؟
- - مروه ياجهاد

من سمعت اسمها رجفت رغم اعرف شيريد يگول وصار امين يحجي وانا اشوف القهر بعيونه
ونظرة الكره الاخته الي تركت كل شي وراها وراحت  الي استوقفتني عبارته الي يكول بيها
- -  اريد اعرف منين جابت كل هالجراه وسوت الي سوته
ورثت جگاره //صادق شيكول

باوعلي واتحسر //صادق ولا كانو هاي اخته بالعكس يكول خلي تبقى هناك وتحصل الجنسيه الها والابنها
وبعدين نكدرحتى احنه  نروح وراها او هي تصير تروح وترجع
عضيت شفتي // وزوجها ؟
باوعلي //تقصد طليقها ؟
جاوبته باستغراب //- - طليقها ؟

هز راسه //اي طلگها بس برغبتها هي طلبت الطلاك
- - زين شيگول ؟
امين لملم حلگه //هذا بحد ذاته مشكله واكيد اكو شي هو ضامه عليه
- شلون امين وضح
- - تتذكر من امي الله يرحمها چانت مريضه
هزيت راسي //اي

- - شگد توسلنه بي شگد حجينا ويا  حتى امي الله يرحمها اتوسلت بس تشوف مروه
هو ما قبل ولا حتى خلاها تجي للفاتحه هسه ليش ساكت ولا كأنو هي مرته وماخذه ابنه ورايحه
- - شفتهمت منه شگلك
امين اتنفس // گال رحنه انا وياها وبالبدايه كلنه نروح ونهاجر وانا اسوي مشروعي الخاص هناك لكن
بمساعدة علاء لكن من شفت الحقيقه اتفاجأت

باوعتله وانا عاكف حواجبي // - - اي حقيقه امين ؟
- - يكول الي شفته والي سمعته شگد مهاجرين ماتو غرگوا انفقدو ما اكدر اجازف واروح للمجهول وقررت ارجع
لكن هي ما قبلت وهددتني تشتكي عليه لذلك تركتها ورجعت
جاوبته باستهزاء لان عرفت هو خايف منها // وانت صدكته

امين // هو هذا الي مخبلني جهاد وما مخليني انام ليلي بشرفك يوسف الي حارمها تطلع الراس الشارع الي
ساجنها بحقل ابقار بكل سهوله يعوف اختي (هز راسه ) اكيد اكو سر اكيد اكو أن بالموضوع
- - شقصدك ؟
امين بقهر //ما اعرف ليش انا جاي احچيلك لان دايخ وما اعرف شلون اتصرف

- - شنو انا غريب وما تعرف ليش تحچيلي
- - اعذرني جهاد
- - مو وكت العتب وانت على كيفك ويه روحك اكيد انت تعرف اختك واخلاقها
هز راسه //اي اعرفها بس اريد اعرف سكوت يوسف ليش

باوعتله //خلي نروح ونستفهم منه
- - انت هيج تشوف جهاد
- - اي نخلي سالم يسويلنه موعد ويا ونروح انا وياك ونحجي ويا واذا صاير شي صدك كتله  على ايدي
هز راسه امين استردفت //  اتصل بسالم وخلي يجي ولا تكله جهاد يعرف وبعدها نروح انا وياك
باوعلي // ليش خو انا اخابره
- - لا امين سالم يسويلنه موعد نتفاهم ويا احسن

- - جاي اعذبك بمشاكلي
جاوبته // انت اخوي واي عذاب ماكو الي اريده منك تهدا وربك يحلها
- - الله كريم انت مو غريب انت اخونه الچبير ومروه اختك

هاي الكلمه قهرتني واحس گلبي ينزف دم راح امين وانا اشوف هذا الي صار كبره عشرين سنه انقهرت
وسديت الباب وصرت اغم بروحي واكول //معقول الي سويته معقول انا اخون امين واضره ياربي انا شسويت
خلي اروح اعترفله
واكله انا ساعدتها وانطي المسدس اخلي يفرغه براسي

هزيت راسي // لا من اگله احقها وهذا رجلها الحقير يصير يتقول شي صار وشي ما صار
- - ولك جهاد انت شلون طاوعت مروه وساعدتها ولك امين ما يستاهل الي يصير بي
- - ومروه هم ما تستاهل تعيش ويه واحد مثل يوسف شنو ذنبها دفعت ثمن غلطه هي ما الها يد بيها
ويه واحد ارعن  ما يعرف يتصرف
- - كل هاي اعذار ما تنطيك الحق بلي سويته

بقيت افكر شنو ممكن يصير من يعرفون وشلون نظرتهم اليه اتمنى احچي وافضفض لان انا شايل حمل ما تشيله الجبال
اباوع النفسي واحتقرها وامثلها بواحد كتل صاحبه واجه الاهله يدور وياهم ويبجي بدموع التماسيح
چنت اروح الحجي عبد واسولفله على همومي وعلى قهري لكن هسه ما اكدر لان اي واحد ما يقبل ولا يعذر بالي سويته
وهذا الشي لازم اضمه حتى على نفسي

صرنا انا وامين مثل الدميه الي على الريمونت تتحرك ما النه خلك الكل شي
اجاني امين للمحل وكال //حجيت ويه سالم وكتله اريد اشوفه
- - وشگالك
- - گلي راح اتصل بي واشوف رده

- - تمام اذا قبل يشوفك معناتها اختك رايحه بارادته واذا ماطل معناتها اكو ان بالموضوع وهم ما راح نسكت
اسمعني امين انا اروح وياك ولا تنطي علم السالم
امين // هاا لا اروح بس انا ان...
قاطعته // شنو ناسي انا اخوك الچبير ومثل ما مروه تهمك هي هم تهمني انا اروح الغايه بنفسي وشنو
ما يكون كلام يوسف انا ستر وغطا عليك
هز راسه //اعرف جهاد مو هذا قصدي بس كافي كل هذا العمر وانت حاملنه وحامل ضيمنا كافي
هم نفسك الها حق عليك ...
قاطعته //هسه عوف هذا الكلام ونروح ويصير خير

رغم اعرف سبب سفر مروه لكن ردت اشوف يوسف واسمع كلامه وهم خفت يزيد او ينقص بالكلام
العصر خابرت امين الي گلي سالم يكول عادي هو راح يجينه
جاوبته // لا امين فهم سالم احنه نروح ونشوفه بمكان عام وبحده
امين // ليش ؟

— احسن لا يجي لهنا  ويشوف سالم او اخته او اقاربه ويصير قال وقلت نفهم منه ابيناتنا
- - تمام
- - خلي انشوفه بمكان عام بمطعم بكوفي احسن
وصار هذا الاتفاق رحنا وقبل لا نوصل گتله الامين //عرفني على انو انا ابن خالك وانت جبتني وياك
حتى اكون شاهد على كلامه
امين // بس هو يجوز يعرفك
- - حتى لو عرفني انت گله ابن خالك

وصلنه للمطعم وشفنا يوسف منتظرنه انا اعرفه هو من شافنه وگف چان مبين علي التعب والخذلان
وصلنه هو مد ايده بعد ان گلنه //السلام عليكم
امين ما صافحه انا صافحته هو باوعلي وسأل امين ::منو الاخ
امين // هذا ابن خالي اجه وياي يكون شاهد على كلامك
هو صاح ع النادل كله ::جيب جاي

امين راد يرفض لكن انا لزمت ايده يعني اسكت جابو الجاي امين كله
- - شوف يوسف اريد اسمع منك وهسه محد يعرفنا وبيناتنا اختي ليش انهزمت منك
هو اتفاجأ بكلام امين ورجفن شفايفه كال بعصبيه ::شنو انهزمت انا اخذتها بايدي
امين جر نفس // اي سولفلي ليش رحتو وليش رجعت ابحدك

هو عض على شفته ونزل راسه وبعدها باوع النه وگال :: امين ردت ابدي حياة جديده تعبت من تصرفاتي
وانو اختك فصليه من سمعت بالهجره  قررت اصفي شغلي واخذ ابني ومرتي ونعيش بالخارج نبدي من جديد
ونربي ابنه  خصوصا وانا اخوي هناك مهاجر من سنين

بالبدايه جنت كلش مقتنع بفكرة الهجره لكن من وصلت اتفاجأت وانا اسمع قصص وانو ياما ناس غركت
وياما ناس انقتلت والعصابات والمافيات والتجار
وهواي امور راجعت نفسي وكلت ارجع للعراق وبمجرد ما حچيت وياها هي ما قبلت وكالت تفضل
تموت بالبحر ولا ترجع فصليه قنعتها انو انا اتغيرت وراح اغير حياتها لكن هي رفضت رفض قاطع
وهددتني انو تشتكي عليه وتسولف قصتها للشرطه واكيد هناك مو مثل اهنا لذلك حاولت وياها ما وافقت
وحتى من ردت اخذ ابني وهي تبقى هم ما قبلت

وثاني يوم الصبح اتفاجأت بيها وهي راكبه بقارب ويه عائله عراقيه اتعرفنه عليهم هناك
بعدها اضطريت ارجع لان عرفت مستحييل مروه ترجعلي
امين // ليش ما خابرتني
::ما انطتني فرصه على اساس نرجع للعراق لكن هي فاجأتني بتصرفها

امين باستهزاء // عاد انت طلگتها
يوسف :: انا ما طلگتها اختك هي الي طلبت مني هالشي ولو الامر راجع الي ما اطلگها لو شما يصير
امين // يعني انت ما عندك شي اتجاهها
::شلون يعني ؟

امين // يعني انا ما مقتنع بكلامك انت يوسف الي حرمتها من عدنه ما خليتها تشوف امها وهي على بساط الموت
ونترجى بيك بهالسهوله تتركها وترجع
هز راسه ::لا انا ما تركتها لكن هي هناك من شافتني غيرت رايي اتخذت قرارها
- - هاا
::اي بعدين صحيح انا قسيت عليها هواي بس هي زوجتي وام ابني وما بيها اي صوج ولا غلطت بحقي
ورغم طلگتها بس تبقى ام ابني وبعمري ما الكى مره مثلها بصبرها واخلاقها

جاوبته // واذا بيوم من الايام حچيت غير هالكلام
هز راسه :: ما احجي جاي اكلك ام ابني والله ما وفق بيناتنا وكلمن يشوف طريقه
امين // راح اصدگ كلامك بس يايوسف مو بيوم اسمع غير هالكلام الي كلته
:: امين اختك جوهره وانا ما عرفت احافظ عليها انا الندم كاتلني ضيعت انسانه صبوره وشريفه 
وضيعت ابني انا يوميه اموت الف موته لا تشوفني گدامك گاعد انا الندم كاتلني

امين وگف وانا وگفت ويا وگال اليوسف // المره الله خلقها مو بس حتى نستر عليها لا حتى هي هم تستر علينه لان
برجولتنه واخلاقنه نرفعها لذلك هي اكيد راح تحافظ على بيتها وزوجها انت محقوق الي لان ما حافظت على زوجتك
ما داريتها هي فصليه بس من انطيناها فصليه حتى تحقن دم وحتى تدفن كره وحقد لكن انت ما حافظت على الامانه
فرطت بيها انا لو منك اتحمل السجن والغربه والموت بس حتى اخلي مرتي تعرف انو انا مسؤول عنها وعن ابنها
ولا يمكن افرط بيها لكن انت مع الاسف ياريتك ذابحني ولا منطيك اختي

شفت بيوسف الضعف والقهر والخذلان وشكد مهموم وشكد ضعيف وعرفت انو مروه مهددته تفضح كل اسراره الي
تعرفهن وبيها اتاكدت انو مروه شگد شريفه وبت اصول لان ما قبلت تبتز يوسف وتفضحه وارتات تتحمل الغربه
والبعد حتى تربي ابنها وما تعرضه بيوم من الايام انو احد يمسه لو بكلمه

صرت اقارن بينها وبين امي الي عافتنا واحنه محتاجيها عافتنا
وتعرف ما عدنا احد الي ايساعدنا  ونعتمد علي بس حتى اتحقق رغباتها ونزواتها امي الي ضحت
بحب ابوي لو الي ضحت بابنيه مثل الورد وخلتها تروح وهي مهضومه وتتمنى حضن ام يدفيها
رجعنا ويوسف بقى بالمطعم والندم مبين علي

من طلعنا كلي //جهاد مقتنع بكلام يوسف
اتنفست وجاوبته // ما بي شي والرجال ما عده شي يكوله
امين // بس انا ما مقتنع بكلامه واكيد هو ضام شي
- - شضام لو عنده شي على اختك صدگني چان فضحها المثل يوسف ما يسكت على شي ايشوفه
بعدين ناسي اختك فصليته وام ابنه

امين //هو هذا الي محيرني يوسف حتى ما جاب سيره للفصل
لان هو انسان ...
—- شنو جهاد ليش سكتت
—— يوسف بنظر نفسه جبان لان ما كدر يحافظ على بيته وعلى زوجته
امين // وهسه جهاد
هسه شنو
شلون نتصرف
عادي اختك لا باكت ولا انهزمت اختك رادت اتغير من حياتها واجتها الفرصه وطلعت بااقل الخسائر

امين اتحسر // والله ما ادري بس لازم ترجع مروه لازم

وصلنه وهنا صار لازم اكون اناني وافكر بنفسي وبحياتي الي دفنتها بموت اختي وبعدها دفنتها بزواج
مروه من يوسف وهسه اجتني الفرصه وصار لازم افكر شلون ننجمع انا وياها
مجرد ما وصلنا انا وامين رحت للبيت وكتبت الها
(مروه ما راح  اسمح النفسي اضيعج من ايدي مره ثانيه انتظريني )

////////////////////////////////////

يوسف
الكم تتوقعون حالتي انا جرحي عميق وجاي ينزف وبايدي اذب ملح فوگ الجرح وما اصرخ
لان انا السبب
اي اعترف انا السبب اخذتني العزه بالاثم وظلمت بت الناس هنتها وضربتها وسحگت على كرامتها
خليتها بحاله اقل من حالة الحيوان الي بالحقل

اعترف كنت وياها وحش عنفتها بشي هي ما مسويته وانا اشوف دموع التماسيح الي امي تبچيهن
وكلامها الي بان جمال هتك شرفي وعرضي وانو ازهار هيه الضحيه والي لازم اخذ ثارها من الي قتلها
ولان جمال مات فلازم اخذ ثارها من مروه الي ما انطيتها عذر وانا اعرف بان هي انسانه شريفه چنت
من اخذ حقي كزوج منها اخذه وانا حاقد عليها لان هي چانت مخطوبه الجمال وجمال مات ولان هي بت عمه وخطيبته
اذن لازم اذلها الكم تتخيلون مقدار الحقاره والنذاله الي مارستها وياها

ولمن اجه ابني الي جان ممكن اكون السبب بان يموت بيومها من اجه محمد فرحت حالي حال اي رجل يفرح
من يشوف ابنه الي راح يشيل اسمه وبنفس الوقت  اعرف مستحييل ضحى راح تحمل فالمفروض اداري مروه
وابني واعيشهم حياة كريمه لكن انا بقيت نفس ما انا بالعكس زدت اكثر بحقارتي وظلمي

وفعلا چان لازم صفعه قويه تجيني حتى اگعد من سباتي واشوف مدى الخطأ الي وگعت نفسي بي
ومن اتكشفت الي الحقائق چان كل شي منتهي وچانت مروه مخططه بذكاء للانتقام مني

صرت تايه وما اعرف شلون اتصرف خصوصا وانا ادري بنفسي شكد احب مروه وما اريد ابعد عنها لكن هي
اذكى مني عرفت شلون تستغل الفرصه بعكسي تماما انا من عرفت كل شي ما حاولت اعالج الموقف واخلي ضحى
هي المذنبه وهي فعلا مذنبه وشريكه الازهار بفعلتها جنت خايف ضحى تفضحني وما خفت من الله وانا اظلم
زوجتي وابني لكن الله كان الي بالمرصاد حرمني من ابني ومن زوجتي الي حبيتها

قبلت  على نفسي بهذا العقاب لان انا ظلمت واتجبرت وانا ساكت على حق وعايش اباطل
ارتضييت ان اطلك مروه مو بس خفت من تهديدها لا وعرفت انا ما استاهل وحده مثلها بقت وياي صبرت
على اذيتي

    اعرف بيها شگد حاولت  تغيرني لكن انا ضيعتها ونسيت بلحظه انو الله بالمرصاد وياخذ حق المظلوم وهاي
انا من بعد ما ظلمت مروه وحرمتها ان تشوف امها وهي بالرمق الاخير الله حرمني ان اشوف ابني وانحرم منه
وانا بكامل صحتي وعافيتي

دائما من تصير وياي مشكله چنت انزوي ابحدي واخلي المقابل هو ينطيني حل لان انا انسان اقل ما يقال عنه انو سلبي
او ضعيف شخصيه او يمكن لان اريد اسرع الحلول
لكن بسفر مروه وطلبها الطلاق وتهديد ضحى الي اتخذت قراري وهالمره قراري اتخذته ابحدي من غير لا ملام
ولا كذب ولا اعذار بسرعه وبدون تفمير رحت على شيخ عوون وطلگتها الضحى وهو حاول ان يخلي طلاكها رجعي لكن
انا رفضت تذا الشي وحجيتله انو مستحييل تكون الي زوجه بعد اليوم

وهجرت امي وعاقبت نفسي بقيت ابحدي وصرت اتوسل المروه بعد ما هي چانت تتوسلني ما اضربها ولا اشغلها
بالحقل واشوف بعيونها توسل ان تروح تشوف اهلها مروه مو بس تركتني لا مروه ذبحتني وهي بايدها اكبر دليل
حتى تفضحني لكن ارتأت السكوت حتى تحافظ على كرامة ابنها
عكس ضحى الي چان عدها مجرد كلام ايدينها قبل ما يدين ازهار وبمجرد ما شافتني او حست بيه اتغيرت هددتني

اليوم انا وضعي اضعف من الضعيف وانا اشوف امين وبعيونه عتب واستزغار الي انو انا ما حافظت على الامانه
وخليتها تروح المكان بعيد اشوف بعيونه عدم التصديق بكلامي وحاس انو يعرف اكو وراي سر وكل هذا الي
صار كله من جوه راس امي وضحى الي ما راح اسامحهم لو شنو يصير

من راح امين والولد الي ويا والي احس انو هو اكثر من امين ما مصدك كلامي صرت اشوف نفسي انسان
مهزووم ولازم الملم الباقي مني  بقيت بالمطعم وانا شارد بالي
وما اعرف شنو الخطوه الثانيه الي لازم اسويها بقيت افتر بالسياره وانا حانق على روحي 
  وسالم ما بطل اتصال يريد يفتهم الي صار لكن انا ما جاوبته

ثاني يووم  رجعت الدوامي او يمكن اجدد اجازتي وداومت وانا كاره الدنيا وبالي مشتت واحس كل الموظفين
يعرفون انو زوجتي انهزمت مني بعد ان عرفت بفضيحة اختي

اختي الي اتمنى اروح وانبش گبرها واحرگها صرت اعاقب نفسي وما صرت اختلط ويه الموظفين
واجه كتاب بترفيعي والكل فرحلي اله انا ما فرحت اصلا استهزأت بنفسي لان الموظفين الي وياي يگلولي
تستاهل انت انسان مثالي
بيني وبين نفسي ضحكت على كلمة مثالي الي بصراحه ولا يمي لان انا انسان ضعيف واستقوى بس ع الضعيف

ثاني يووم جبت كيك وعصير بناءا على طلب زملائي وبيومها حاولت ان ابين نفسي انو انا فرحان بالترفيع
وبقيت كاعد ابيت سالم وتقريبا انطويت على نفسي حتى بسام اجاني مرتين بعدها طلبت منه ما يجي ولا يدلي
اي احد على مكاني وسالم من يتصل ما اجاوبه

وصرت ما ارد على اي تلفون وعلنت الحقل للبيع ويمكن اول واحد اجه بعته علي وشرطت
انو يبقى بشير بالحقل لان ماكو احسن ولا أأمن منه اتكاتبت وقبضت الفلوس ورحت للحقل اخذت الي بقى
من ملابس مروه ومحمد وهي تقريبا مخليه شكو شي انا مشتري يعني شگد تكرهني وحاقده عليه

اما الاثاث فدزيت على ام بشير وانطيته الها لان اعرف بمروه تحبها وام بشير ما بطلت سؤال عنها انا جاوبتها
:: خاله ان شاالله هي تتصل بيچ وتفهمج كل شي

ورجعت كلفت دلال عقارات ان يشوفلي بيت وفعلا الرجل وره تلث تيام اخذني ورحت  شفت بيت مو كلش چبير
اشتريته  وردت اسجله باسم مروه لكن لان مسافره سويت تنازل الها باسمها وصرت امشي بالمعامله حتى الاوراق
تروح للسفاره  واشتريت قطعة ارض سجلتها باسمي

بشير وره فتره اجه للبيت حتى نجرد الحسابات وبطريقه شايف بسام وگايله على بيعة الحقل وبسام جابه البيت سالم
واتحاسبنا وبشير انطاني الفلوس لان باع كل العجول الي بالحقل وبعدها سلم عليه والدمعه بعينه وطلب
ابري الذمه وانا وصيته يدير باله على امه لان طيبه وتستاهل كل الخير

من طلع بشير بسام سالني // شنو ناوي تسوي بالفلوس
باوعتله وكلت ::اشتريت بيت لمحمد وامه واشتريت قطعه سجلتها باسمي وراح ابنيها
بسام گلي //واحنه
جاوبته وانا رافع حواجبي ::انتو منو ؟
- - امي وانا وعلاء وزهره

جاوبته ابرود :: ليش هو ورث
حك شعره //مسألة حلال وحرام
هزيت راسي ::   كلش زين تعرفني وتدري بيه شگد حريص بشغلة الحلال والحرام بس الحقل من حق مروه
وحقي اصلا اذا مو طلع كله من حق مروه

بسام باستغراب // شلون يوسف شنو هالحچي هذا ؟
:: تسالني شلون بسام تسوي نفسك ما تعرف الچذبه الچبيره الي عيشتنا بيها امك هي وضحى والكل يدور
على مصلحته لازم تعرف الوحيد الي اتاذى انا ومروه ومحمد
:: مروه الي تحملت الظلم والقهر والضرب والاهانه ومحمد الي راح يعيش غريب بعيد عن ابو وبمجتمع الله يعلم
شلون راح يتربى بي

::وانا الي ظلمت وقسيت وكله مسجل عليه وزر عد رب العالمين شنو تريدني انطي الامك حصه
لملم حلكه ما جاوبني انا استردفت ::  انطيها حصه عن شنو عن الچذبه مالتها عن استهتار بتها وصياعتها
عن شنو انطيها (باوعتله وسألته )
::انت تدري ليش اشتريت قطعه ما اشتريت بيت

بسام هز راسه //لا ليش
::لان راح ارجع الفلوس الامين
بسام باستغراب //يا امين هذا ويا فلوس ؟
:: امين ابن عم جمال الي خطف اختك وانگلب هو وياها وصار السبب بموت البنيه الشريفه العفيفه (هزيت راس)
اي راح ارجع فلوس الفصل وهيچ نصير متعادلين هو غلط لان باعتبار داس بيتنا واستدرج بتنا الي
هي بالاساس مو شريفه فاحنا اخذنا فصل عن هذا الشي

::اما الخطف والاعتداء انا وانت ندري بيها لعبه ولعبه قذره من امك وضحى
بسام //بس يوسف انت مو ابحدك الي اتاذيت
جاوبته وانا ابتسم باستهزاء //لا تكلي انت لو امك لو علاء اتاذيتو لا بسام غلطان
(اشرت على نفسي ) انا وبس الي اتاذيت وانهنت وامك لعبت بيه هي وبت اختها وخسرت مرتي وابني
لزمته من ايده واتوسل اله :: بسام هاك اخذ كل شي املكه ورجعلي ابني خليني احضنه واشمه خليني
اشوف ضحكته

بسام سكت بعدين باوعلي // وسالم يوسف ؟
:: شبي سالم ؟
- - مو چان خاطب اختك مو قبل ما تموت عرسها باقي علي عشرين يوم
::سالم ما خسر اخذ سماح وعايش وياها ومرتاح وانا رجعتله فلوس المهر واول وتاالي راح اخبره
بكل شي واذا يريد فصل هم انطي 

دنگ بسام اجيت يمه والدمعه بعيني ::شفت اخوك شكد شايل هموم
هز راسه وگلي // الله يساعدك
:: انا راح اترك بيت ابوك الك والاخوك واختك انا ما اريد منه شي
بسام جاوبني // لا ليش ما تريد منه شي الحق حق
:: لو ترجع للحق حتى بيت ابوك الي واسأل امك

اتقرب مني وگلي // يوسف اذا تريده اخذه وانا اول واحد اتنازل عنه انت ما قصرت ولا ويه
اي واحد بينه انت قصرت ويه نفسك
اتحسرت وطبطبت على چتفه :: الله كريم

هو راح بعد ان اكدت علي ما اريد احد يعرف مكاني بيومها كتبت رساله المروه وصورت الها الاوراق
شفتها قرتها لكن ما ردت اله ثاني يوم وهي تكلي = انا ما اريد منك شي
جاوبتها ::هذا البيت حقج وحق ابنج واذا رجعتي اقلها عندج سكن الج والابنا

صرت ابچي واضرب على رجلي كأنما فقدت اعز شي بحياتي ابني وزوجتي وكل شويه اتهدد
اريد اروح اكتل ضحى واشرب من دمها لكن ايدي تمنعني وتگلي لا توصخني الزم ضحى

هاي اكثر من اسبوعيين انا ابيت سالم اتصلت امي عليه ما رديت بقت تتصل انا ما جاوبتها
بالليل اجتني رساله من بسام // يوسف افتحلي انا بالباب
فتحتله الباب شفت امي ورا خزرت بسام الي دنگ امي كالت

—شدعوه اتصل عليك وما ترد هيج صارت الام ما الها قيمه
ما جاوبتها وبقيت واگف بالباب يعني لا تدخلون هي اتقربت مني وكالت
- - جايه اكلك شي خاف بعدين تگول ليش محد خبرني تره ضحى حامل

//////////////////////////////////////يتبع