رواية بعد فوات الأوان الفصل الثالث وأربعون 43 - بقلم آنين الليل

مرحبا
طبعا لساني يعجز وما تتصورون شگد انا فرحانه وممتنه الكم نسيت حتى آلامي وصارت عيوني تدمع
مو من الوجع الي تسببه الي الكسور والرضوض لا لكن بسبب حبكم الي وهذا شي كبير واعتز بي 😘❤️😘

دعائي الكم بأن ربي يحفظكم ويحفظ احباءكم وعوائلكم ويدفع عنكم كل شر 🤲
ويارب يارب يارب كل صاحب حاجه ياربي اتحقققها 🤲
مممنونه منكم وشكرا لدعائكم 😍😍
تحياتي 🤝🤝
#آنيين الليل #
///////////////////////////

يوسف
من سمعت كلمة امي بان ضحى حامل استهزأت لان اعرف هاي لعبه من لعباتها هي وضحى بقيت
واگف بالباب هي عتت ايدي بعصبيه ودخلت وكالت

—— شو لگيتك اهنا عبالي اشتريت بيت لو اجرت
جاوبتها :: اشتريت بيت وبعد يومين انقل بي
باوعتلي وحركت ايدها //ها ومنيلك
رديت عليها بنتر :: شنو انتي جاي تحاسبيني
- - لا ما احاسبك بس مثل ما ذيچ مرتك وام ابنك ضحى هم حامل وراح يصير عدها جاهل

::هههه لعبه جديده
هزت راسها // لا مو لعبه واسال هذا اخوك بايده اخذها للطبيبه لان ندري بيك ما تصدگ
باوعت البسام الي هزلي راسه امي گالت //  تعال اخذها بايدك الاي طبيبه حتى تت...
قاطعتها بايدي رغم الخبر هزني من داخل جاوبتها:: اسمعي حجيه ضحى لو تجيبلي عشر ولد توم ما اقبلها مره اليه
امي تحرك بايدها //وليش شسوت ؟

  هزيت راسي باستهزاء :: ما سوت شي اكرهها ما احبها ما اطيقها
- - يوس...
::كافي ما اريد اشوف اي احد لا انتي ولا هي اصلا من تجيبولي اسمها تلعب نفسي افتهمتي
- - خوش سحر مسويتلك مروه

اتقربت يمها وخليت عيني بعينها وحاچيتها بابتسامه  ::انتي تحچيين عن السحر اخر وحده انتي وبت اختچ
تفكن حلكجن
(باوعت السام وحچيت بعصبيه ) وهسه بسام اخذ امك وروح وانسي عدچ ولد اسمه يوسف
بسام گلي // هذا شلون حچي على كيفك

::انت ما تعرف شي (باوعت الها ) هسه انا عرفت بت اختچ حامل انتي شتردين
امي // خلف الله عليك تكلي شتردين عبالك جاي اجدي منك ما اريد شي بس اريدك ترد بت عمك
وترضيني وترضي ابوك بگبره
ضحكت بمراره وباوعت الها :: ههههه ارضيج وارضي ابوي ليش انتو شنو سويتو الي بي خير حتى
ترديني ارضيج
:: من لمن عوفتوني سحر رحتي انتي وبتچ المقبوره وهددتن البنيه وابوي وعمي واگفيلچ بالشارع
انتم حرام تكونون اهلي اصلا انتم عصابه وكل هذا ليش لان حضرت بت اختج تريدني ولان عدها شكم فلس
لان ابوي انطا فلوسه العمي  اسمعيني من الاخر خلي انطيج اياها ابساطه

خليت عيني بعينها واحچي بحديه :: بت اختج يعجبها  تروح الاخوها خلي تروح محد يلزمها تريد تبقى يمج مصرفها
ونفقتها ونفقة الطفل اذا صدك حامل تجيها وبعد ما الها يمي شي (رفعت اصبعي باتجاه وجهه وگلت )
:: وانتي مشكوله ذمتچ اذا تسويلي شي وترجعيني الها ولا تتصورين انتي لو هي بيوم من الايام راح اسامحكم
- - بس انا امك

درت وجهي ::اعتبريني متت اعتبري چان عندچ ولد اسمه يوسف ومات لان لا تصدگيين ارجع لو انسى
السويتي بيه
شفت الخذلان بوجه امي ودارت تريد تطلع گتلها ::انا بعت الحقل وراح ارجع الفصل للناس
هي اتفاجأت هزيت راسي :: ايي لان بتنا طلعت مو مخطوفه بتنا رايحه بارادتها وانتي وبت اختج تعرفن بهذا الشي
يعني انتن گوا...  وفهمج كافي
هي باوعتلي عود لاتحجي كدام بسام ابتسمت بشماته ::لا تخافيين ابنج هذا چان شاك لان يشوف تصرفات بتج العوجه

اتقربت مني وصارت تستعطفني //  يمه يوسف الراح راح لاتفتح على روحك بيبان ما تنسد
::انتي بس اطلعي منها وما عليچ
امي برطمت وحچت بعبره // هيچ صار اسمي انتي نعم الله عليك
ما جاوبتها هي طلعت والدمعه بطرف عينها صحت على بسام
::انا راح اعوف هذا البيت بس حتى لحد يجيني

بسام بزعل // محد راح يجيك يوسف
امي طلعت وانا لزمت بسام من چتفه هو دارلي //ها يوسف
::بسام انت قابل بالي صار بيه لو انت بمكاني شتسوي
هز راسه //ما قابل صدكني ولو بمكانك اهاجر مثل علاء بس المفروض ما تحاچيها گدامي هالشكل
::شسوي انا انتهييت تصور ابني ومرتي يرحون وطليقتي تطلع حامل

- - مروه هم طليقتك
::   مو بارادتي غصبا عليه وكله من جوه راس امك  وعندي امل ترجع بسام دير بالك تجيب طاري
كدام امك وبت اختها انو مروه ماموجوده
- - لا توصي حريص بس صدكني لو تشوف ضحى تكسر الخاطر وها تره هي صدك حامل مو عبالك فلم
اتنفست وجاوبته ::والله يابسام انا الي اكسر الخاطر روح وصلها الامك رووح

- - رايح فيمان الله
بقيت بالبيت وانا اضرب كف بكف واگول :: لو صبر القاتل ع المقتول كان المقتول مات بوقته استغفر الله
ضحى شگد صار وهي تريد بس طفل واجه الطفل بعد ان اتطلكت ارادتك ياربي

ظليت صافن ما اعرف شنو اسوي خصوصا وبسام اكدلي انو ضحى حامل لكن انا لا يمكن ارجعها لو بالحلم

بهاي الايام انا حالي حال ما انام ولا اكل اله شي قليل كله جكاير وچاي وتفكير وصفنات حتى بالشغل انتبهوا عليه
صرت ادور على بيت اجار اكعد بي دلاني موظف على بيت رحت شفته وما اتفقت علي رجعت اتغديت بالمطعم
ورحت البيت سالم غيرت ملابسي واجيت اتمدد وصلتني رساله ع الواتس شفتها من منال كاتبتلي

- - استاذ يوسف ممكن باچر انا ما اگدر اداوم
سالتها ::سلامات
- - ماكو شي بس اريد اخذ امي للطبيب موعدها
:: سلامات شخيرها
تعبانه شويه
::سلامتها ما تشوف شر محتاجه مساعده
- شكرا استاذ ما تقصر بس اجازه باچر
::تتدللين

گعدت صفنت على منال وانا اتذكر نظراتها اليه وشلون تفرح من احچي وياها وما تنطي وجه الاي
موظف او مراجع
حدها وياهم على گد الشغل كانت ثگيله وبنفس الوقت مرحه اخذت نفس قوي وصرت احچي
::ها يوسف صرت اتفكر بمنال
::مجرد  تفكير
ابتسمت وهزيت ايدي ::خايب يا تفكير انت طلگت اثنين وحده عدها ولد والثانيه حامل
::هههههه الحد هسه ما اصدك ضحى حامل

اندك الباب عرفت هذا بسام فتحته شفت سالم اتفاجأت وبصراحه اصعب موقف اتخليت بي هو
اشوف سالم جايني وانا مطلك اخته
بقيت واگف اباوع اله هو گلي // اذا ما تستقبلني اروح وارجع غير وكت
انا انتبهت على نفسي جاوبته ::لا صدك چذب بيتك اتفضل
دخل وهو يباوع للبيت يمكن عباله كاعد وما انظفه هو گعد ع القنفه وانا گتله ::الله بالخير

- - الله بالخير
باوعلي وگلي //اشلونك يوسف
هزيت راسي ::الحمد لله زين انت شلونك
هو طلع جكاره قدمها الي واخذ وحده صار يدخن وگلي بعد ان نفخ الدخان //انا يوسف مو زين وهل جايلك
ما جاوبته هو كلي //يوسف انا جاي افتهم منك
رفعت راسي ::شتفتهم ؟
- - ليش طلگت ضحى
:: منو گلك

- - خابرتني ضحى وخالتي
   سحبت نفس// وما سالتهن عن السبب
- - لا
::ليش ؟
نفخ الدخان وحك ايده  // اريد اعرفه منك
هزيت راسي ::لا لان تدري بيهن يزيدن وينقصن ويذبن ع النار نفط
- - وهسه انت فهمني

:: بعد هذا هو  خبزتنا خلصت وصار لازم كلمن يشوف طريقه
استعدل بگعدته // بس لازم اعرف ليش
::واذا عرفت شتسوي ؟
هز راسه // كل شي يخطر ابالك اسوي اذا ضحى غلطانه وحقك ما اخليك تشوفها بس اذا الغلط منك
فاانا اعرف اخذ حقها منك

:: وشتدري بيه انا ممكن اظلم ضحى
- - سولفلي يوسف انا خويك وابن عمك وحزام ظهرك
هزيت راسي وانا عاض على شفتي حييل //ادري سالم وهو هذا الشي الي خلاني بس اطلگها الضحى ما اجرم بيها
- - يوسف ادري بيك انت ابد ما تريد ضحى وقبلت بيها لان خجلت من ابوي
::وانا ما قصرت وياها
- - انا اشهد انت داريتها وشلت همك بگلبك بس كل هذا ما ينطيك الحق تطلگها بدون سبب

::ليش ما سالتها ؟
- - هي بس تبجي ما تقبل تجاوب اريدك انت تسولفلي
::اختك وامي هنه السبب بان مروه تاخذ محمد وتنهزم
- - شنو تنهزم
:: اي مروه اخذت محمد وانهزمت مني بسبب اختك
- - فهمني يوسف
::شفهمك هذا الي صار شفهمك

- - يوسف احنه اصدقاء واخوان او ولد عم وانا جاي حتى افتهم واذا ضحى هي الغلطانه صدگ ما افوتها الها
::سالم خلي ضحى يم امي وانت عيش حياتك ويه مرتك وجهالك
- - لا يوسف لو تكلي شسوت ضحى لو ما احچي وياك العمر كله
:: شتريد تفتهم
- - كل شي اريد اعرف منك مرتك وين وضحى شسوت وليش هيچ اتصرفت

اهنا صار لازم اسولف السالم بعض من الحقيقه لان ما اريد افضح نفسي سولفتله شلون ضحى وامي
سوولي عمل حتى اكره مروه وشلون چنت اكفر بمروه وبعدها ضحى طلبت مني ان تاخذ محمد وتسجله
باسمها وانا اخذت مروه
على اساس اهاجر لكن ما گدرت اضطريت ارجع ومروه استغلت الموقف وبقت هناك هي ومحمد وانا طلكت
مروه وطلگت ضحى لان اثنينهن غلطن بحقي

سالم هز راسه وگلي // ولو انا مامقتنع بكلامك واكيد اكو شي اكبر من هذا لكن انا راح اضحك على
نفسي واصدگكبس يوسف انت تدري بضحى حامل
هزيت راسي :: اي ادري
- - يعني تعرف راح تصير اب يعني ما فرحان بعد هاي السنين ضحى حملت

سكتت ما جاوبتهرهو رد // ورغم هذا الشي بعدك ما تريد اترجعها
:: سالم لا تزعل مني اختك لو تجيبلي عشر اولاد ما ارجعها انا تركت الها البيت هي وامي تعيش بي
ونفقتها هي والطفل انا ما راح اقصر انطي زايد مو ناقص

سالم هز ايده // اشبيك انت يا نفقه يابيت ضحى تروح وياي اخذها يمي
اتقربت منه :: اسمع نصيحتي خليها يم امي هنه وحده ما تفارك الثانيه (لزمت چتفه وگلت  )
سالم لاتزعل عليه الي سوته اختك شي چبير ياريتها كاتلتني حارگتني ولا سوت الي سوته بيه
سالم بعصبيه // چا انا على شنو جاي غير اريد اعرف شسوت
:: تريد تعرف شسوت اختك اختك حطمتني وحرمتني اشوف ابني

سالم هز راسه // والله ما ادري شگلك ياخوي
اتحسرت :: مو بس هي سالم مو بس هي وياها امي وازهار وحتى انا احنه كلنه صرنا السبب بان انحرم من ابني
غورگت عيوني ما صبرت نزلن دموعي باوعلي سالم وحضني وگال
- - افه عليك يوسف وداعتك لو موت ضحى يرجعلك ابنك ومرتك اموتها ولاتنزل دمعه من عيونك

من سمعت كلامه صرت انحب بصوت عالي لان خجلان منه ومن الي سوته ازهار جاوبته
:: الي انكسر عمرهما يتصلح يابن عمي ارجوك تعذرني
سالم ربت على ظهري //انت الي تعذرني يمكن ضحى لو مربيتها امي ما صارت هالشكل وانت هم
اعذرها هي اتيتمت من هي طفله واخذت واحد ما يحبها وما حملت وقطعت الامل هم الظروف كلها
صارت عكسها وشوف ارادة ربك تطلگها وتطلع حامل الله يهدي النفوس راح اخليها يم خالتي
مو على مود سماح لا بس ياسبحان الله تبرد الگلوب وتهدا النفوس 

طلع سالم انا كتله :: ابو احمد انت اخوي وما اريد اخسرك خليها يم امي ويحلها الحلال
باوعلي // والله لو ما حامل چان تترحمون عليها
سكتت ما جاوبته هو گلي // يوسف انطيني رقم ام محمد وانا احچي وياها واقنعها ترجع
هزيت راسي وجاوبته ::انا اعرف مروه مستحييل ترجع

- - انت انطيني الرقم وانا اكلها لو تدورين الدنيا كلها ما تلگيين واحد يحبچ بگد يوسف
باوعت اله هو هز راسه وگلي // شنو تريد تقنعني انت قهرك وضوجتك وتعبك بس على ابنك لا والله انت يايوسف
تحب مروه انت تحبها من اول يوم شفتها بي لكن شنسوي خالتي چانت متحكمه وهم حقها بتها شابه وراحت من ايدها
من جوه راس واحد ساقط زايعته الدنيا واي واحد بمكانها يسوي اكثر

من گلي هالشكل ردت اصرخ واگله ::كل هذا الشي الي صار من جوه راس ازهار وحتى انت ضحكت
عليك لكن سكتت بقيت ساكت وسالم گلي //يوسف هلگد تحبها
باوعتله وجريت نفس قوي ::ليش انت ما تحب مرتك
- - والله كلامك صحيح (اتحسر وكأنما يريد ايگول بس ضحى ما الها حظ بالحب )

اتقربت يمه وگتله:: سالم انا خلال هل شكم يووم اشوفلي بي...
قاطعني //من يمته احنه ابيناتنا هاي الرسميات هذا مو بيتي بيتك بعدين احنه من يمته تهزنه هيچ اشياء
وتأثر علينه  افرض لاسامح الله زوجتك وابنك ماتو شنو تنتهي الدنيا الحياة ما توگف على واحد
يوسف صير قوي

جريت نفس وسالته :: وين راح تروح
- - امرن على خالتي واشوف ضحى وارجع للبصره
:: ما يحتاج اوصيك ما تجيب طاري مروه وسفرها
- - اطمن من جانبي ما راح احچي شي

طلع سالم وانا من الهضمه گعدت بالگاع وخليت اديه على جانب وجهي وصرت اهز براسي واعاتب نفسي

::شوف ضعفي وين وصلني خسرت كل شي حبيبتي وابني وهسه راح اخسر اعز انسان على گلبي اخوي
وابن عمي عضيدي اووف ازهار الله لا يرحمج وانتي يمه الله لايسامحج لا انتي ولا بت اختج

جريت نفس ::  بس مثل ماگال سالم الحياة ما توگف على واحد انا من احترمت امي وابوي ودرت
بالي على اختي هذا الشي ردت بي رضا ربي وهم يخليني عزيز وغالي عد اهلي لكن امي واختي
وحتى ضحى ترجمن هذا الشي ضعف مني
حچيت بصوت عالي ::من اليوم راح اصير يوسف ثاني

دخلت للحمام سبحت وغيرت ملابسي ونمت الصبح رحت للدوام وصرت عادي اسولف واضحك لكن
بين الفتره والفتره اباوع للتلفون يجوز يجيني مسج من مروه او رساله او حتى اتصال
بقيت تقريبا عشر تيام  من صار عدي مجال بالدائره  خابرت شيخ عون وگتله اريد امر عليك للبيت
هو رحب بيه

الساعه تلاثه العصر مريت علي وگتله ::شيخنا اريد ارجع مرتي بس انا طلگتها طلاگ خلعي لارجعه في
هو سالني //ليش تريد اترجعها
::لان حامل
جاوبني // وليش هالتسرع المفروض تتأكد (هز راسه ) يصير ما دامها حامل وبالعده

ورجعتها بعد ان خبرت بسام يسألها اذا موافقه ترجع هو راح بلغهن وامي خابرتني من بسام وهي فرحانه وتگلي
- - عفيه باابني چنت ادري بيك ما ينطيك گلبك تزعلني

انا ما جاوبتها اصلا ما رحت ولا حتى شفت امي او ضحى الي من رجعتها صارت تدزلي صور
رومانسيه واغاني وخواطر واشعار لكن انا ابد ما اجاوبها بالعكس اباوع واستهزأ

ثمن تيام امي خابرتني من بسام وهي عصبيه وتحچي وتگول//  المن رجعتها اذا ما تجي ولا نشوفك
رديت عليها ابرود ::انطيني ضحى
الي راسا اخذت التلفون ومجرد ما كالت //الو ش...
اناقاطعتها وگلت :: افتحي الحاكيه واسمعيني انا رجعتج حتى مو الخاطر الي ابطنج رجعتج بس حتى
ما اخسر سالم يعجبج تبقيين هالشكل اهلا وسهلا ما يعجبج تخابرين اخوج وهو يخابرني اطلگج وهالمره
ما اشتري خاطر احد ترحيين ويا وحتى الي ابطنج هم اتنازل عنه

سديته ورغم امي اتصلت اكثر من مره لكن انا ما رديت وصرت اروح وارجع للدوام عادي
اگضي اليوم اطلع اروح للمطعم للكوفي افتر بالسياره وارجع للبيت وانتو تعرفون شنو بالليل ابقى ويه رسايل مروه
وصورها هيه ومحمد مرات اراسلها ومرات اقطع لان اساسا هيه ما ترد عليه

مره انا گاعد ويه مناف وسالته على بيت للايجار مناف كلي// ادورلك
جاوبته ::اي والله وياريت باسرع وقت حتى لو زغير
- - شنو انت مو عندك بيت
::اي عندي بس هذا البيت رايده
مناف يبتسم وغمز بعينه //المن لاتكلي تريد تتزوج (باوع المنال الي دنگت )

انا ما جاوبته اكتفييت اباوع الملف يمي طلع مناف وبعدها بدقايق اتقربت يمي منال وكعدت على
الكرسي مقابيلي وسالتني //استاذ انت المن رايد البيت
انا رفعت راسي وجاوبتها :: الي رايده
- - يعني تسكن بي
هزيت راسي ::ايي اسكن بي
- - منو وياك ؟

باوعت الها وانا رافع حواجبي هي بلعت ريگها سالتني //اقصد الي اعرفه انت عندك بيت
حمحمت ::منال العفو ست منال يمج بيت
هزت راسها //اي يمنا مشتمل مال زوج اختي قطعته چبيره بنى بيته وهذا مشتمل يريد اياجره بس اخاف
زغير عليكم
سالتها ::مي خالف نروح نشوفه اليوم بعد الدوام ؟

هزت راسها // اي شكو بيها بس خلي اخابره حتى ينتظرنه
::تمام شكرا
- - العفو ما سوينه شي

وخابرت زوج اختها وابتسمت يعني منتظرنه بعد ما انتهى الدوام طلعنه انا وهي نتمشى سوا وصلنه للسياره
انا صرت متردد افتح اي باب الها هي بادرت وفتحت الباب الامامي وكعدت بالصدر وركبت وسقت السياره
تمينه ساكتين بعدها سالتها :: وين البيت يم بيت اهلج
- - اي بالفرع الثاني
::تمام خابرتي اختج
- - اي خابرتها ومنتظرينه هي وزوجها

باوعت الها ::ست منال انتي شكم اخت عندج
- - امم احنه اربع بنات واثنين اخوان
::الله يخليكم
- ويخليك
:: وانتي شنو تسلسلج ههههه

باوعتلي وابتسمت // دووم الضحكه ان شالله
::تسلمين
- - انا الثالثه عندي اخوي واختي اكير مني وانا الثالثه
:: اختج الي رايحيين البيتهم اناجر المشتمل
هزت راسها // لا هاي ازغر مني
:: متزوجه

- اي ولد چان وياها بالكليه وخطبها وصارت القسمه
::الله يوفقهم تدرين حتى انا تسلسلي الثالث
- - واكيد دووم مظلوم مثلي
::اي والله صدك دومي حقي ماكول
هي ردت بخجل // لا لا مو هذا قصدي
:: عادي حتى لو قصدج عادي

حكت خدها وگالت // اختي اتزوجت قبل سنتين وابوزوجها العام اتوفى وترك الهم ورث هو طلعله
قطعه وفلوس بنا البيت والمشتمل
::شنو يشتغل
- - منتصر يشتغل منتسب اتطوع تعرف ماكو وظايف
::وين يداوم 
- يداوم يمنا يطلع من الصبح وساعات خفاره
::الله يوفقه

تمينه ساكتين الى ان وصلنه البيت اختها ونزلت وانا بقيت بالسياره دكت الباب طلع ولد شاب واجه سلم عليه
وهو يكلي // اتفضل استاذ بيتك اهلا وسهلا

نزلت من السياره وصافحته وبعدها عزم عليه اله ادخل للبيت ويضيفني شي رغم عدم قبولي لكن هو اصر
وفعلا دخلت للاستقبال والرجل رحب بيه وگال // انو هو بعده ما متغدي
اعتذرت منه وگتله :: مستعجل عندي شغل واكتفي بماي وعصير رحم الله والديك
- -  والديك الجنه بس وكت غدا
:: ممنون منك وه اها شربته للعصير وبلا زحمه اذا ممكن اشوف البيت
—. اي تدلل استاذ اتفضل

هو وگف وسوالي طريق اطلع كدامه وبعدها وصلنه للمشتمل ومن دخلت اجت منال وياها اختها الي رحبت
بيه شفته المشتمل جديد بي غرفه وصاله ومطبخ وصحيات انا عجبني وبدون ان اسأل عن اجاره شگد
كتله ::هذا هو انا اجرته منك
منتصر //حتى ما سالتني بيش اريده
::ما نختلف المهم ان شالله باچر احول بي

- - ههههه مبين مستعجل مي خالف راح اخلي ام علي ومنال ينظفونه
:: لا ما اريد ازاحمكم انا اجي وانظفه
ام علي //هذا شلون حچي كل زحمه ماكو انت ما مقصر ويه منال وهي تشكر بيك دووم
منتصر //وانا لو ما منال وشكد شكرت باخلاقك ما ااجره اله على عايله يعني رجال هو وزوجته لان تعرف اهنا
عوائل وما يقبلون لكن انا راح اكول ما اجرته انت اخوي وكعدت بي

::تسلم الله يحفظك وان شاالله انا اخوك
منتصر // على راسي اتشرف بيك وعلى گولة ام علي الخاطر منال لان انت ما مقصر وياها
باوعت المنال الي دنگت :: ما سويت غير الواجب وست منال انسانه تستاهل كل الاحترام
ردت عليه بخجل //تسلم استاذ
ام علي // باجر ان شالله تجي تلگا يخبل

::هو ما قاصره شي بس شويه بي تراب وانا انظفه
منتصر //لا انت جيب اثاثك وما عليك
:: مشكورين ياالله انا استاذن واشكركم جزيل الشكر
منتصر // العفو هلا بيك شرفتنا

طلعت من بيت منتصر وباوعت المنال ابتسمت وردت //. انت رووح راح ابقى اتغدا اهنا وبعدها اتمشى على بيتنا
رحت اتغديت بالمطعم وبعدها شفت  محل كهربائيات اشتريت ثلاجه وتلفزيون واشتريت طباخ وانطيتهم العنوان
يجيبوهن باجر العصر ورحت اشتريت كنتور بابين وچربايه واخذت فراشات وشكم غرض للمطبخ
بعدها رجعت البيت سالم

صليت واتمددت وصرت اگلب بالنقال بلكي مروه دازتلي رساله احس نار بگلبي ما تنطفي لكن اي
شي ماكو اتحسرت وكتبت المنال
::مرحبا
هي راسا ردت
- مراحب
::ممكن بكرى تجيبين المفاتيح وياج لان اشتريت شكم غرض للبيت
سالتني //يمته تاخذهن للبيت
::وره الدوام

- - او كي باچر اعتبرني مجازه انظفلك البيت وارتبه
::لا ما اريد اتعبج انا ارتبه
- - تمام انت رتبه بس لازم انظفه اتفقنا انا باجر مجازه لو تريدني اداوم
حسيت بجملتها الاخيره بيها مغزى رديت عليها :: بكيفج
- - خلص باجر مجازه 😌😌
ابتسمت ::اي مجازه بس باچر
- - شكرا ياالله تصبح على خير

نمت وگعدت الصبح شفت التلفون على امل رساله من مروه او صوره او اي شي لكن كل هذا ماكو طلعت للدوام وانا
ما الي خلك روحي من انتهى الدوام رحت للبيت وقبل ما اوصل اتصلت عليه منال لان حافظه موعد طلعتنا
وسالتني يمته اجي انا جاوبتها ::هسه انا بالطريق

وصلت واتلگاني منتصر وهالمره اصر عليه انو اتغدا ويا على گولته يصير بيناتنا خبز وملح اكلت شويه
وجابولنه جاي وخابرني ابو الكهربائيات وصفتله البيت ومنتصر وزوجته ومنال راحو وياي للمشتمل
نزلنه الاغراض ومنتصر كال راح يخابر على ولد كهربائي يجي يشدلي السبلت

وبعدها نزلت غراض المطبخ الي خليتهن بالسياره بقيت انا ومنتصر بالمشتمل وصار دنيا مغرب وراح النجار
والكهربائي ومنتصر كلي لازم اروح ويا للبيت اصلي واتعشى انا ما قبلت لكن هو اصر عليه ورحت ويا ومن
جابو العشا كال
- - اليوم العشا جابته منال
باوعت الها وكلت :: شكرا ليش كلفتي نفسج
هي ردت // بالعافيه استاذ

اكلت قليل ورحت للمشتمل لان حسيت بتعب بليلتها بقيت سهران ما كدرت انام مستاحش لان منطقه غريبه وناس ما
اعرفهم وبيت زغير وموحش وانا اتذكر شگد چنت حقير ويه مروه من حملتها ذنب هي ما مسويته
لمن ما اخذتها الحقل باطراف المنطقه بعيد ما يمها احد اعوفها بالاسبوع والشهر واكثر صرت احجي واكول

:: شگد هي قويه رغم الوحشه والفراغ والاهانه والوحده لكن صبرت وشگد انا چنت ضعيف من ظلمتها
نمت قبل آذان الفجر وما گعدت اله على دگة الباب عبالي بعدني ابيت سالم فتحت عيوني شفت
روحي بالمشتمل گمتوگفت ورحت اجر بروحي فتحت الباب شفت منال وهي مبتسمه اول مره انتبه للغمازات
الي بخدها كالت وهي تنطيني صينيه //صباح الخير شنو ما ناوي اتداوم

جاوبتها بنعاس ::صباح النور اخذتني نومه
- - ياالله هذا ريوگك اتريك وبدل حتى تداوم
::ليش هالزحمه انا اسوي چاي واشرب
- - ههههه بس انت ناسي قنينة الغاز
حكيت شعري ::اي والله صحيح نسيت اشتري

- - لاتشتري بيت اختي عدهم قنينه زايده نجيبها الك ياالله اتريك ورانه دوام لا نتأخر
::شنو انتي اليوم ما تداومين
- - لا اداوم هسه اروح ابدل واطلع
::انتظري نروح سووا لو زحمه من ابو منتصر
- - عادي هو يعرف احنه نداوم بنفس الدائره بعدين هو طلع من غبشه للدوام
:: تمام انتظريني

اخذت الصينيه ورحت صليت قضا وبعدها اتريگت وشلت الصحون ع السنك ورحت بدلت وطلعت بمجرد ما
ركبت السياره هي طلعت واجت ركبت بصفي ورحنا للدائره قبل ما نوصل سالتها ::اذا تحب تنزل شويه بعيد
هي هزت راسها وگالت //لا انزل وياك شنو قابل انا بايگه

عجبتني  ثقتها بنفسها
تمينا بالدائره وبعدها رجعنا سووا بالليل دزتلي رساله انو هي رجعت البيت اهلها يعني لا تنتظرني باچر
وبقيت تقريبا اسبوع مره تجي وياي البيت اختها ومره تروح الاهلها واتصل بيه بسام لان جاي البيت سالم 
وفهمته انو انا طلعت من البيت ورحت اجرت هو حاول يعرف وين لكن انا ما انطيته العنوان

وره عشر تيام كعدت الصبح وفتحت الموبايل ولگيت مروه دازتلي رساله وياها صوره چانت مفاجأه خلتني ابچي
وانهضمت حييل چانت الرساله تگلي بيها
= اشلونك يوسف
انا هاي الايام حسيت بتعب وارهاق ما عرفت سببه لكن وانا امشي دخت بالشارع وگعت والتمو عليه الناس
وسعفوني بعد التحاليل طلعت حامل وهاي التحاليل وهاي التاريخ يوسف اتصور انت تعرف يمته صار هذا الطفل
الي ابطني فكرت اسقطه لكن ما يهون عليه رووح وما اله ذنب

شفت التحاليل والتاريخ وصورة السونار هي دازته الي بالليل يمكن نايم او ما انتبهت
كتبت الها ::مروه انتي انقى واشرف انسانه ياريت ترجعين او حتى انا اذا تحبين اسافر واجي يمج رجاءا
خلي هذا الطفل الي يجي للدنيا وهو بين امه وابو
::مروه اذا انا كنت مجرم فانتي لا تصيرين مثلي اترجاج انتي اتحملتي مني هواي وكله الخاطر محمد وانا جاي
اتوسلج ان ترجعين او انا اجييج الخاطر هذا الطفل لايولد يتيم وابو موجود
فكري مروه احلفج بكل عزيز فكري

وانتظرت الرد وبيومها داومت وانا مو يم الدوام حتى ما حچيت ويه منال ولا حتى انتبهت الها
چان كل همي برد مروه وانتهى اليوم وهي ما ردت يمكن الساعه تلاثه الفجر اجاني ردها وكتبت بدون مقدمات
=يوسف عيش حياتك وانساني خليني اربي اطفالي بعيد عن كل شي ايذكرني بيك وبظلمك
= انت طيب لكن مع الاسف كنت مر وظالم وياي وانا اولا واخيرا بشر ومن ارجع او اشوفك راح اتذكر كل المآسي
والعذاب ويمكن بلحظة غضب او ضعف ما اسكت لذلك خليني بعيده احسن الي والك
= انسى وابدي حياتك ويه زوجتك وانسى شي اسمه مروه

چان عندي قبل ما اقرا جوابها عندي امل بسيط لكن من قريت رسالتها عرفت بان انا ومروه مستحييل نلتقي
وانو انا خسرت اطفالي وخسرتها للابد وكل هذا الي صار بسبب امي وضحى وانا لا يمكن اسامحهن ولا حتى اسامح نفسي
صرت احچي :: انتي ياضحى هسه عدوتي الي لازم انتقم منج بس لا اريد اوصخ ايدي ولا حلگي انا الج انا الج انتي وامي
::وحتى انا السبب مو بس هنه
::لا انا چان مضحوك عليه
::شنو انا من الحادثه ليجاي انا ما ارتاحييت ولا فرحت بس هسه آن الاوان ان اعيش حياتي وانسى كل شي مر بيه

:: يوسف تگدر تعيش وتنسى
::احاول اتعايش ويه نفسي لان خلص مروه ما راح ترجع
:: بس انت يايوسف ما تگدر تعيش وتنسى
:: ادري وما گدامي اله خيارين لو ابقى ياكلني الندم واموت لو احاول انسى واعيش وبكل الحالتين انا خسران
لان مروه راضيه على نفسها والي سوته وضحى حملت بعد ان فقدت الامل لذلك انا الخاسر الوحيد

الصبح صليت وبدلت وطلعت للدوام قبل لا ينتهي الدوام اتقربت من منال وگتلها
::اليوم عازمج ع الغدا اذا ما بيها احراج الج
هي باوعتلي بذهول وردت //خير اكو شي
::موضوع اريد اخذ رايج بي
- - ما اكدر اقبل عزومتك
::ليش ؟

— لان اخوي جاي هو وزوجته وجهاله يتغدون ابيتنا
::زين خليها باچر بس الموضوع مستعجل
هي رفعت حواجبها بتساؤل //شنو الموضوع
::بعدين افهمج
- - لازم مو مهم
هزيت راسي ::لا مهم ومهم جدا
- - اي گوله

::مو مال واحد اهنا يحچي بي مي خالف اوصلج وبالطريق نحجي
- - مي خالف
وطلعنه انا ومنال ركبت بالصدر وانا اسوق وادخن التفتت عليه وگالت
- - اي استاذ يوسف شنو الموضوع
::منال بدون لف ودوران تقبلين تتزوجيني
هي فتحت عيونها ع الآخر انا استردفت :: هسه لا تجاوبيني اخذي وقتج وردي عليه

بقت ساكته ما جاوبتني قبل ما توصل نزلت وانا رحت للبيت اتمددت ما اتغديت نمت وگعدت تقريبا الساعه بالسبعه
اتوضيت وصليت وطلعت بالسياره اتعشيت وجبت وياي شكم شغله ورجعت تقريبا الساعه بالتسعه ونص
غيرت ملابسي وغسلت واتمددت اجتني رساله ع الواتس فتحت الموبايل شفتها منال كاتبتلي

يوسف انت فاجأتني بطلبك لكن اكو اشياء اريد افهمها قبل ان اوافق
رديت عليها :: باچر نتغدا سووا
-موافقه
::على زواجنا
- - هههههه لا ع الغدا

نهيت المحادثه وانا احچي ويه نفسي :: آن الآوان انتبه النفسي من غير احد ما يملي عليه شنو لازم اسوي وشنو ما اسوي
بس معقوله منال تاخذ مكان مروه
هزيت راسي وگتبت المروه ::مستعد اموت على مودج بس وافقي نرجع سويه
لكن انا اعرف انو الماي اذا تبده مستحييل ينلم وهم مستحييل مروه توافق ترجعلي

////////////////////////////////يتبع