رواية بعد فوات الأوان الفصل الثالث وثلاثون 33 - بقلم آنين الليل

مرحبا
اعتذر عن التاخير بس والله فلاونزا موتتني صرت اكتب سطرين تلاثه واترك لان راسي وعيوني ما اشوف بيهن
وعفيه لحد تكتبلي البارت قصير تره كلماته 3700 كلمه
اتمنالكم قراءه ممتعه وادعولي بالشفاء العاجل
تحياتي
# آنيين الليل #
/////////////////////////////////

مروه
ام يوسف باوعت الابنها وحچت بكل برود // اتهدد تكتل نفسك ليش خو انطي الولد البت عمك تربي والفصليه وديها الاهلها
يوسف :: يافصليه هاي
- مروه فصليتك
رفع حواجبه  :: وجاي ترجعين وتكولين فصليه
ام يوسف تهز بايدها //ها يوسف شو چنها شاله حالك

خزر امه وجاوبهت ::  والله محد شل حالي غيرج انتي وبت اختچ
ام يوسف بعصبيه // ما سوينه شي اول وتالي الفصليه تروح الاهلها واحنه ناخذ الولد
جاوبها باستهزاء :: هههههاي تروح الاهلها
- - اي تروح الاهلها فصلت وخلص

:: والله خوش بكيفچ اتزوج واطلك اسمعيني انا مستحيل اخليها تروح الاهلها
- - وليش باالله
::لان كلش تدرين ليش وحتى بت اختج تعرف
- لا والله ما ادري
::زين انا اگلج ليش لان ابساطه انا احب مرتي لا شنو احبها گولي اموت عليها

هي ما بين عليها اتفاجئت بكلام يوسف مثل ما انا اتفاجئت يوسف كمل كلامه
::انتي تدرين ليش من اول ما اخذتها وانا اريدها لكن تصرفاتج وخوفي عليج هنه الي خلني اجرم بالبنيه
بس عمي عفيه عليچ خوش اتمثليين هم تدرين يمه انا الهسه ما كاتل ضحى موت تدرين ليش انا اگلچ لان ما اريد
انسجن واعوف مروه وحمودي الي همه بالنسبه الي الهوى الي اتنفسه وبسببهم سكتت عن هواي امور

- - يعني شنو يوسف
يوسف :: يعني مثل ما گتلج ديري بالچ تحچين لو كلمه ويه بت اختج لان راح اتعمين عليها وصدگيني اطلگها مثل النعال
وخلي تفضحني يم سالم عود  افصله وانا الممنون
ام يوسف اتهز بايدها // كل هذا على مودها
هز راسه :: اي واكثر مستعد كل شي اسوي بس حتى اتسامحني
ام يوسف //بس نسيت شي

:: شنو ؟
ام يوسف // من تحچي ضحى ايسمعون اهل مروه ويجون ياخذونها غصبن عليك
:: مي خالف ياخذونها وارجعها
ام يوسف // ااا شنو منو يرجعها الك
:: اگلب الدنيا وارجعها هاي مرتي ما بايگها اروح وامشي عليهم واگللهم مرتي احبها واخليلها بيت واكيد راح ترجع
على مود ابنها لان مروه مو مثلچ يمه مروه كلشي اتحملت الخاطر ابنها
امه باستهزاء // اليسمعك يكول بس هيه وبس مو حالها حال الحيوان

يوسف :: صحيح كلامچ بس هذا الشي كله منين من جوه راسچن كله منچ انتي خليتيني اشك بهدومي مو ليل
ونهار تحچيين وتگولين جمال النذل كتل بتي خطفها جمال الدني نفس باگ اختك ما كفا يلعب على بت
عمه سنيين
:: مو انتي نفسج تگليلي يمه ظلمتك اخذتلك وحده چانت مخطوبه الجمال الله اليدري شبينهم ما بينهم
خليتيني اكرهها وانا احبها اعذبها وانا اريدها صرت من وره كلامچ ما اشوفها اله وحده رخيصه
(رفع اصبعه وكلها ) والله لو ما امي والناس تگول اتخبل وكتل امه والله موتج خلال

ام يوسف بانكسار // خلف الله عليك يجيني اكثر
يوسف بعصبيه :: هسه مثل ما فهمتچ من تشوفينها الهاي بت اختچ الچلبه انتي ما تدرين بكل شي وانا راح اسكت
بمزاجي مو خوف على نفسي لا بس خوف افقد مرتي وابني وعليمن على مود وحده ما تستاهل
ام يوسف بتوسل // وليش كل هذا العذاب يمه جيب  ابنك وخلي البنيه تروح الاهلها
يوسف :: هسه الفصليه صارت ابنيه (هز راسه ) عمت عيني اي والله عمت عيني اذا اخذ ابني وانطي الضحى
لو اخليچن اتفرحن انتي وياها
ام يوسف بعصبيه //ولك لاتنسى انا امك

جاوبها :: امي الي ما بيوم بستي ابني لو خليتي بحضنج لو گلتي جيبه خلي اشوفه هسه ترديني انطي البت اختچ مو
هو سلعه مشتريها المروه وعجبتج انتي وضحى وتردنها  هسه عرفت ساكتات مو ال الله تردن تاخذن الولد من امه
وانتي وست ضحى تعيشن مرتاحات وفرحانات ومروه ما الها بس الضيم والقهر لان فصليه دون ابن عمها
الچانت اختي مصادقته وتروح ويا للشقه صدگي يمه انتي وضحى  اله اخلي عيشتچن سوده
امه باستهزاء // وشراح تحصل وداعتك بس الفضيحه ومنو فضحك انت فضحت نفسك ومو عبالك
الفضيحه بس عليك لا على بسام وعلى ابنك من يكبر

::هاا والله زين حاسبه الكل شي حساب
- - ايي حاسبه مو رعنه مثلك بتي ماتت الله لا يرجعها بس انت واخوك باقيين احسن تمشون والناس
اتأشر عليكم وتحچي
لو احسن تمشون وانتم راسكم مرفوع شنو بتي سوت الزينه لا وداعتك ولو موجوده بايدي اخنگها
بس هذا الشي الي اسوي گدام العالم حتى محد يتجرأ ويحچي عليكم
:: بس انتي چنتي اتعرفين ابتچ عدها علاقه

- - بتي وكحه من يومها اتدللت زايد بس لا تصدگ قابله على تصرفاتها گلت تتزوج وتعقل ما ادري هالشكل
راح يصير
انت يمه فكر اباخوك وبروحك وبابنك تگدر تقنع ضحى وتسكت سكتها بس لا تخلي الشي الي انستر
يطلع وتنفضح
فكر يمه جمال وازهار ماتو والسر اندفن وياهم الله سترهم لاتجي ضحى وتفضحهم بخبالها

هز راسه وهو مقهور :: ايي الله سترهم بس انتي يمه طغيتي انتي وبت اختچ خليتيني اجرم بالبنيه وهي ما الها
بالصار لا ناقه ولاجمل شوفي شسويت بيها حتى امها ما خليتها تشوفها المره ماتت وهي تتوسلي بس اتشوفها
وانا ما قبلت ما تگليلي شلون راح اواجه ربي وانا ظالم الانسانه بريئه تتصورين تغفرلي والله لو انا بمكانها
فلا اغفر بالعكس ادعي ليل ونهار شنو عبالچ حوبتها تخطينا لا وراح اتشوفين

خنگته العبره وبچى ::  الله ما راح يغفرلي ظلمت بت الناس جرمت بيها
   امه اتقربت تريد اتحضنه هو رفع راسه وبعدها بايده ام يوسف هم بچت
- - يوسف شتسوي الك حق انا غلطت ادري بنفسي بس والله حتى ما تنفضح

سكتو اثنينهم ويوسف ايعض باصبعه من القهر وانا بعد الي سمعته وگف عقلي لكن اتمالكت نفسي
معقوله الي سمعته معقوله ام يوسف وضحى هلكد هنه شريرات
غلقت النقال وخليته بجيبي ورحت للحقل بديت اعلف العجول لكن فكري مو وياي اجت وراي ام بشير وهي
لازمه محمد وسالتني //خاله مروه شكو شصاير
باوعت الها وگلت = بعدين خاله خلي يرحون
- - زين انا راح اخذ حمودي واروح يم عمتج

ابتسمت  على كلمة عمتي وهزيت راسي وگتلها  = ديري بالج على حمودي
- - بعيوني
= سالمه عيونج ومن اكمل جيبي حمودي خليني اغسله وابدله
ام بشير // ليش اجيبه خلي يمنه وام بهاء اتعشي
= لا خاله فد شويه وجيبي وراي
- - زين وانتي لاتسوين عشا افتهمتي

هزيت راسي = اي وهسه روحي اخذي ام يوسف وياچ او وديلي بهاء خلي يوگف اهنا
- - ليش شتردين منه
= يبقى واكف من اكمل يجي ايگلج حتى تجيبيلي حمودي بس شويه اتاخري
- - ما تردين تگليلي شصاير
باوعتلها = انا متعوده اضم عليج
ام بشير هزت راسها // لا ابد

هزيت راسي = خلص اول وتالي راح اگلج
- -  زين خاله بكيفچ  بس ديري بالچ من هاي الحيه تره متزوهره تريد بس اتذب سمها
= ادري خاله ادري وياريت اتبيتينها يمچ
- - طبعا ابيتها يمي انتي ما عليچ لا يظل بالچ

وراحت وانا بقيت افكر شنو راح اسوي گدام هذني الي مصادقات الشيطان لا يمكن الشيطان يصير على صفحه
من كيدهن ومكرهن سولفت ويه نفسي
= انا اهم شي عندي ابني لازم أأمن علي ولازم ما اخلي يعيش عد ضحى لازم امنع هذا الشي بكل وجه يكون
حتى لو يكلفني حياتي

ظليت اتذكر كل كلمه انگالت وكل حادثه مرت بيه وصرت احچي = مروه هاي فرصتج تتخلصين من يوسف للابد
تتخلصين من هاي العيشه وهاي الذله (هزيت راسي ) اي اي لازم اخلص خصوصا وانا عندي دليل ضده
= يعني اواجهه واطلب الطلاق واخذ ابني
= وبعدين مروه
= اربي ابني بعيد عن يوسف واهله

= وشتتصورين يوسف راح يسكت لا ابد ولا يسكت ما سمعتي ايكل الامه احبها ومستحييل اتركها ما سمعتي
شلون ايگول حمودي هو النفس الي اتنفسه تره يوسف ضحيه مثل ما انتي ضحيه بس مو معناتها اسامحه
لو ابقى ويا مستحييل

= يوسف انا اكرهه وما اطيقه مو لان سحگ على كرامتي وهاني لا اكرهه لان حرم امي من شوفتي وماتت بحسرتها
ومن رابع المستحيلات لو افكر ولو فكره اسامحه حتى لو اتغير ما راح اسامحه
= اتذكري مروه شكم مره بمره حچى او وعد وتالي رجع بكلامه  يوسف ما اله كلمه شخصيته ضعيفه بس عليه
يطغى ويستقوه فلا تفكرين انو هو راح يتغير لا يومين ويرجع اتعس وياخذ ابنج ابد لا تاخذج عاطفه ديري بالج
هاي فرصتج

= واذا فكرت اسامح وانسى فاول مره لازم اغفر الابوي والجمال وهذوله مستحيل لو حتى بالحلم اغفر الهم

= انا هسه بايدي دليل ايدين ازهار ويوسف دليل يفضحهم ويخليهم طوول عمرهم منزلين راسهم وما رافعينه
بس اول شي لازم احصل على نقال جمال واليوم لازم احصل علي والا كل هذا ما اله معنى يعني اذا واجهتهم اكيد
راح ايفبركونها ويخلون كل شي براسي ومليون بالميه راح ياخذون محمد مني وهذا يوسف الي هسه جاي اشوفه
متندم ومقهور ويگول احبها مجرد ما اواجهه راح يصير بصف امه وينگلب عليه شيطان رجيم

= اهدي مروه اهدي وخلي اتصرف بحكمه
= ولازم احصل على نقال جمال بس شلون ؟
= شغلي عقلچ مروه

بقيت امشي متوتره داخل الحقل واباوع للعجول اتقربت يمهن وسالتهن
  = انتن ما عدچن فكره اتساعدني احصل على نقال جمال
هزيت ايدي وضحكت على نفسي گعدت على كومة قش وصرت افكر وانا احرك رجلي اجت ابالي فكره وقررت
اسويها طلعت النقال وفتحت البلوتوث وبعدين غلقته وطلعت شفت بهاء واگف سالني // هاا خاله كملتي

= اي حبيبي روح گل البيبي بس ها شاورها
- - اعرف خاله
= عفيه بالسبع

رحت امشي على ما وصلت للغرفه وانا الف فكره وفكره شفت يوسف متمدد وهو لازم النقال يباوعله عرفته نقال جمال
هو ما انتبه الي رحت ضميت النقال جوه الحطب الي بالحوش والي انا مخليته حتى اضم بي النقال اكثر من مره سالني
يوسف گتله ايجوز احتاجه فد يوم ما عندي غاز او الطباخ يخرب

دخلت للغرفه وانا جاي اطلع الي ملابس اريد ادخل للحمام لمن ما اندك الباب واجت ام بشير جابت محمد
وگالت بصوت ايسمعه يوسف // خاله گلي الابو محمد يجي يتعشى يمنه
جاوبتها = ان شالله
اخذت حمودي وغسلتله وجهه واديناته وجبته للغرفه جريت نفس ونطقت اسمه بهدوء

= يوسف
من سمعني عبالك نايم وفز حتى ما جاوبني ما انطيته مجال يرد عليه گتله
= الزم محمد اروح اسبح واجيبله العشا مو تخلي يطلع وراي ويتلف نفسه

ما انتظرت منه رد انطيته محمد واتعمدت خليت ايدي اتطخ ايده اخذت دشداشه ربع ردن ودلعه واخذت وياي العطر
ورحت للحمام سبحت ورشيت العطر على جسمي وهو مبلل بعدها لبست ولفيت شعري بالخاولي
وطلعت سويت حليب وخليت فوگه خبز وجبته الحمودي ودخلت للغرفه هو چان شايله انا اختلست النظر شفت
النقال يمه وصلت وگعت الصينيه من ايدي وانا اصيح

اااخ اااخ وگعت بحضنه
هو اتفاجأ ويگلي :: اشبيچ مروه
انا بتوجع = رجلي يوسف رجلي التوت ااخ يمكن انكسرت
:: لا ما بيچ شي اشو خلي اشوفها
حاولت اتقرب منه = اتاذيني حييل اااه
:: على كيفچ خلي اشوفها

مديتها وصار يحرك الكف وانا ابچي واگول = اتاذيني انكسرت مو
:: لا لا بالله گومي
انا صرت ابچي = ما اگدر اتحرك
:: مي خالف حاولي
وگفني وعلى اساس امشي انا وگعت نفسي علي بحيث هو وگع وانا فوگه

ظل صافن عليه وشعري المبلل يلامس وجهه هو گلي بارتباك ::هاي صدگ انتي متاذايه لازم اخذج للطبيب
هزيت راسي =لا لا تاخذني بس صيحلي ام بشير خلي اتعشي حمودي وتلم الصينيه
هو خابر بشير وگله خلي امك تجي لان مروه التوت رجلها
لزم حمودي  واجت ام بشير وهي تكلي //شبيج خاله

انا اتلوى من الوجع جاوبتها = خاله الحگيني يمكن انكسرت
يوسف :: ام بشير اخذي حمودي وانا اخذها للطبيب
- - اي بس خلي الم الصينيه وامسح الحليب
بقيت متوجعه وهووشال حمودي واجت ام بشير لمت الكزاز ومسحت الحليب انا گتلها

= خاله جيبيلي ملابس وساعديني البس
- - اي صار
هو شال حمودي وسد الباب وانا راسا وكفت ام بشير اتعجبت گتلها ما بيه شي حاولي اتاخرين حمودي يمج يعني
اتعبينه حتى من تجيبينه راسا ينام
- - هذا هو ما عليج
= فدوه العينج

لبست دشداشه فوك الدشداشه القصيره ولفيت شال ع السريع وام بشير گلتله// هاي ما تكدر تمشي بس لامكسوره
خلي اودي حمودي واجي اروح وياكم
:: لا ام بشير انا اخذها وانتي اخذي حمودي يمج
هو اتقرب عليه وكلي:: ياالله خلي ايدچ على متني
خليت ايدي وصرت اگمز هو رد عليه :: شنو ما تگدرين تسحگيين عليها
انا  بألم = لا ما اگدر

راح قرب السياره وشالني واخذني للمستشفى وانا اتعمد ابچي اخذولي اشعه الطبيب گال // ما بيها شي شويه رضوض
جاوبته = بس ما اگدر امشي عليها دكتور جاي اتموتني من الوجع
الطبيب // راح اكتبلچ مسكن
يوسف :: اي دكتور اذا ماكو بالمستشفى اشتري من الصيدليه البره

الدكتور هز راسه وكتبلي على ابره هسه اخذها ولفوا رجلي اباندج وركبت بالسياره ابمساعدته بعد ان فهمته انو رجلي
ثگلت من الباندج ونزل يم الصيدليه جابلي علاج ورجعنه دخلني للغرفه وگتله
= روح اتعشى وجيب حمودي
هز راسه :: لا ما اشتهي اكل
= لازم تاكل مو زين تبقى بدون اكل روح وجيبلي حمودي

اندك الباب واجت ام بشير جايبه عشا وسالتني على رجلي گتلها = بعدهي اتاذيني
ام بشير گالت // خاله مروه هذا عشاج
= ما اريد
- - مو زين تبقيين بدون عشا فوك التعب انوب رجلج الله يساعدج (باوعت اليوسف ) خاله ابو محمد وكلها خطيه
= وين حمودي ؟
- -  يم ام بهاء عشته وغسلتله
= جيبي خاله خلي انيمه

- - هسه انتي اتعشي وكملي وانا اجيبه الج وانت ابو محمد روح اتعشى بشير متانيك
جاوبها :: لا ام بشير ما اشتهي
- - ياا شنو ما تشتهي
:: وداعتج راح اكل اهنا
ام بشير بضحكه // زين دگول تريد اتواكلها ياالله انا اروح شويه واجيب حمودي
راحت ام بشير وهو قرب الصينيه وگلي :: ياالله اكلي حتى تاخذين علاجج.
جاوبته = رجلي يوسف رجلي ماذيتني

:: ما بيها شي مو سمعتي الطبيب يگول شويه رضوض
= بس حييل توجعني
:: هسه بس تاخذين العلاج تصير زينه وترتاحين بس اول مره اكلي
صار ايوكل بيه وهو هم ياكل اكلت قليل واجت ام بشير جابت محمد واخذت الصحون وراحت حمودي شبك عليه
وانا عبالك صار سنه ما شايفته يوسف ايباوعلي انا گتله

= رووح يم بشير عيب
:: لا راح ابقى اهنا
= مو انا نعسانه واريد انيم حمودي وانام
:: وانا هم كلش تعبان
تزعت الدشداشه الي رحت بيها للطبيب وبقيت بالدشداشه النص وهو جابلي الدوا وانطاني الماي انا گتله
=طلعلي ماي من الثلاجه هذا حار
من دار وجهه انا خليت الحبايه جوه فراشي جابلي الماي وشربت واتمددت وخليت حمودي بحضني وصار يرضع
بعدها نام وانا بقيت متمدده ويوسف اجه واتمدد يمي وحضني

اهنا انا صار لازم ابادله الشي الي يريده وفعلا صار وانا كارهه نفسي ومتقززه من عنده لكن مضطره اسوي هذا
الشي بعدها انا ضميت وجهي بصدره وانا گاعده اريده بس اينام وايده تلعب بشعري اريده ينام وره ساعه حسيت بايده
ثگلت لان  بطلت تلعب بشعري عرفته نام بقيت فتره وانا احسب ارقام بيني وبين نفسي واتسحبت منه وبقيت متمدده

الى ان اطمنت كلش اخذت نقال جمال وطلعت على كييف وانا ادعي ربي ان ما يحس عليه يوسف ومحد يتصل
بي رحت اخذت نقالي من جوه الحطب ورحت للحمام سرگيته لان هذا اامن مكان وانا ارجف من الخوف بسرعه
رحت ع الاستديو وطلعت الصور وبقيت ادور بالواتساب ع المحادثه فتحت اول اسم لگيت محادثاته ويه ازهار
اخذت الهن سكرين وحولتهن على جهازي عن طريق البلوتوث ومن اتاكدت كل شي وصل طلعت وانا ماخذه نقالي
ورحت للمطبخ خليته بسطل التمن حتى بدون ما الفه ونقال جمال حذفت الصور الي اخذتهن وطفيت البلوتوث رجعت
شفته نايم خليت النقال بمكانه وانا ما مصدگه الي سويته واحچي ويه روحي

= عفيه عليچ مروه دافعي عن نفسج وانقذيها
رجعت نمت وحسيت بي گعد وشافني نايمه اتقرب مني وهو يگلي
:: اشلون صارت رجلج
انا بنعاس == اممم شويه زينه اريد انام
:: انا راح اسبح واطلع
وانا مغمضه= اسويلك ريوك
:: لا ابقي نايمه خلي رجلج اتطيب مو تتحركين عليها

درت وجهي وحظنت حمودي هو اتقرب عليه وگلي :: راح اشتاقلج
ما جاوبته بس جريت نفس هو باسني وطلع رغم حسيت بي متغير لكن مستحييل اغفر اله من طلع بسيارته
فتره بقيت بفراشي بعدها گمت سبحت وانا كارهه نفسي واگول بخجل
= سامحيني يمه مو عبالج نسيتچ بس اذا ما مسويه هالشكل راح ياخذون ابني مني وما راح ابرد گلبي بيوسف وامه ومرته

لبست ورحت للمطبخ وطلعت النقال وانا اشوف كل صور ازهار وكلامها ويه جمال يمي
وصرت احچي واگول = يعني دليل اطلاق سراحي من هذا السجن بايدي ودليل اتهامك وفضيحتك يايوسف موجود يمي

ولازم اتحرك حتى اخلص من هذا الكابوس المرعب هانت يايوسف هانت
صار لازم افكر بسرعه واتحرك ولازم اخلي كل شي گدام عيوني

///////////////////////////////////

يوسف
من شفت محادثات ازهار وجمال وعرفت شلون اختي وامي وزوجتي مستغفلاتني بذيچ اللحظه
اتمنيت اصب بانزين عليهن و احرگهن لكن ردت اعرف ليش ضحى اتسدسد الامي رغم هي ام الراهي
علينه مو تعرف باختي الها علاقه ويه جمال يعني لو وحده بمكان ضحى جان شرتها ع الحبل وصارت
تحجي للقريب والبعيد

قررت اخذ امي واعرف منها كل شي وفعلا عرفت منها شلون هي وضحى يدرن بازهار وتصرفاتها
  ردت اعرف ليش  ضحى تسوي هالشكل وعلى اي اساس تتملق الامي

بعدين عرفت انها هي وامي مستزوجاتني  لان ضحى ما يصير عدها جهال وكل الي تگوله والعلاجات الي تاخذهن
كل هذا تمويه وضحك عليه وقررت انهي وجود ضحى بحياتي واعيش ويه مروه وابني

خليت ابالي انو  ضحى ابد مو هينه وممكن تكون حاچيه الاحد عن علاقة ازهار وجمال وبالتالي راح
انفضح گدام الناس
رحنا للحقل انا وامي والي چانت تدري بكل شي وياريتها ساكته لا چانت اتدمرني بسحر تسوي
هي وبت اختها حتى اكره مروه وما اشوف بس ضحى زوجه وحبيبه وكل شي ومن واجهت امي ما نكرت

عرفت انو امي اصرت ان اخذ الفصليه لان تعرف بضحى ما يصير عدها جهال وما رادتني اعرف بالموضوع
حتى ما اتزوج وحده ممكن تبعدني عن ضحى وما دام ازهار ماتت ومات سرها وياها وبس ضحى تعرف بعلاقتها
بجمال انا اتزوج مروه وتجيبلي الولد وبعدها اخذه منها واطلكها ومحمد اسجله باسم ضحى ومروه ترجع الاهلها

بقيت مذهول وابدي اصرخ وابچي واكتل نفسي وانا اشوف اقرب الناس الي وياي حقراء وانذال وما يستاهلون يبقون
عايشين

بيومها بالليل امي راحت ويه  ام بشير واجت مروه بثوبها الاسود وشالها الي رادته على وجهها
بوكتها بقيت اباوع التصاوير اختي. الي دازتهن الجمال واباوع المروه واقارن بين الانسانه البريئه وذلتها
والخاينه ورفعتها دخلت وانا اختلس النظر الها واخذت ملابس وراحت تغسل لبست دشداشه سوده جوه الركبه
وردانها ربع

ومن طلعت صرت اشم عبير جسمها من خلال العطر الي مخليته عبالك سابحه بي ومن انطتني محمد
وگالت خلي اسويله عشا ايدها طخت بايدي رجفت عبالك مراهق مقابل حبيبته

وجابت عشا حمودي والتوت رجلها وگعت بحضني اهنا انا ما اعرف شنو صار بيه
واخذتها للمستشفى وما گدرت تركب بالسياره شلتها ورگبتها وهي لازمه بيه ورجعنا وكل شي صار اليوم
نسيته بذيج اللحظه واتبادلت وياها الحب رغم تعبها بس ما گدرت الزم نفسي چنت مشتاق الها ومحتاجها بنفس
الوقت واول مره احس بيها وهي تبادلني نفس الحب وبيومها نمت نوم عميق لان يمكن حسيت بالامان وياها
الصبح گعدت شفتها نايمه بحضني وانا اباوع الوجهه واسأل نفسي

:: ياترى ممكن تكون سامحتني على الي سويته بيها (اتحسرت وهزيت راسي ) :: لا  ما اتصور لان الي سويته
بيها شي چبير ما ينغفر

نزلت بستهه  وهي غافيه انتبهت وهي مغمضه ما فتحت عيونها گالت = خلي اسويلك ريوك بس انا ما قبلت خليتها
بنومتها ورحت ركبت بالسياره وصلت يم بيت بشير دگيت هورن واطلعت امي هي وام بشير وبشير انا خزرتها

بشير اتقرب وگال  // صبحك الله بالخير  ابو محمد
:: صباح النور هلا بشير
ام بشير //اشلونك خاله وشلون صارت مروه
:: زينه شويه  احسن انتي ديري بالج عليها
- - تدلل يمه
:: مشكورين

تباوست امي وام بشير بعدها ركبت امي وره مو بصفي انا حتى ما گتلها تعالي اركبي يمي لان بصراحه مقهور منها
تمينه ساكتين وانا اسوق وادخن وقبل لا نوصل للبيت وگفت السياره على صفحه وباوعت الامي الي مبين عليها
الارتباك كتلها  :: راح نوصل ومن تشوفين بت اختج المصون وراح تسالج گليلها بتنا بالفاتحه ما قبلو نطلع تديرين
بالج كلمه زايده ناقصه سامعه بالمثل الي يكول عليه وعلى اعدائي صدگيني راح تجنيين على بت اختج وانتي الخسرانه

بقت ساكته رديت عليها :: هاا شگلتي
هزت راسها وسالتني // وانت ؟
:: انا شبيه
- - شراح تسوي
:: ما راح اسوي شي راح اساير بت اختج وبعدين يصير خير
- - شلون يمه

:: لا تعبين نفسج وتدوخين راسج انا اعرف اتصرف بس انتن كافني شرچن
امي باوعتلي وكالت //يوسف يمه انا السويته على مودك
هزيت راسي وجاوبتها باستهزاء:... ::ايي ادري صدگ على مودي والدليل رحتي انتي وياها سويتلي سحر
امي // يمه مو سحر محبه
لملمت حلكي وهزيت راسي :: محبه انت تضحكن عليه بحجة المحبه (جريت نفس ونفخت ) هسه ما علينه سوي الي
اگلج علي تره انا بعد ما عدي شي اخاف يروح مني  انتي الي راح تخسرين كل شي انتي وبت اختج
صدكي هاي الجلبه بت اختج اكتلها واخلص عمري بالسجن وكل العندي المروه وابنها فاذا ما تردين تخسريني
اريدج تسكتيين

وصلتها للبيت ونزلت وراحت وانا  رحت البيت سالم حتى اعرف شنو راح تتصرف امي ويه ضحى
وانا كل شويه اباوع للنقال لان ما عندي ثقه بان امي تسكت واكيد اذا امي حچت الضحى فاكيد
ذيج ما راح تسكت وراح تبدي اتهدد

بقيت متمدد ع القنفه الي بالصاله وصرت افكر شلون اتصرف ويه ضحى ولازم اخليها تثق بيه واني راح انطيها
محمد واسجله باسمها وانا هم لازم اتاكد انو هي ما حاچيه على ازهار گدام احد

الظهر اتوضييت وصليت وبعدها طلعت رحت اتغديت بالمطعم ورحت للبيت دخلت ما لگيت احد بالصاله صعدت
فوك ودخلت للغرفه شفت ضحى متمدده على صفحتها انا فتحت الكنتور واخذت ملابس وطلعت رحت للغرفه الثانيه
غرفتي انا ومروه بدلت واتمددت غفيت ما كعدت اله وره المغرب اتوضيت وصليت وبدلت ملابسي نزلت للصاله

شفت امي كاعده ويمها ضحى ما باوعت الهن مريت ما سلمت طلعت بالسياره ونزلت اتعشيت وبقيت گاعد بالمطعم
طلبت نارگيله وصرت ادخن
وهاي اول مره ادخن ناركيله وانا ما مستقر مقهور على نفسي وعلى مروه
رجعت  تقريبا الساعه 11 ودخلت للغرفه الثانيه بدلت واتمددت تقريبا الساعه بالثنتيين انا بعدني گاعد اجت ضحى
واتمددت بصفي وهي تگلي // زعلان مو

ما جاوبتها هي حضنتني وصارت تبچي اتذكرت حقارتها وشلون صار سنين وهي مستغفلتني ابدي الزمها واكسر ظهرها
بس لا انا هم لازم استغفلها وابين الها انا خايف منها وراح اسوي كل شي تريده وبعدين اندمها
درت عليها وحضنتها وگلت :: اشش لا تبچيين كافي
هي زادت بالبچي رديت عليها :: ليش تبچيين
جاوبتني // ابچي منك
:: هاا يعني تعرفين بنفسچ غلطانه

ضمت وجهه بصدري // ايي انا غلطانه بس الي سويته كله لان احبك والتفكير راح ايخبلني
نفخت وگوه امسد على شعرها :: اي تحبيني وتهدديني
هي باوعتلي // اعذرني يوسف انا الي سويته لان خفت منك
:: خفتي مني ليش
هي دنگت // يوسف من تدري راح اتذبني وتطلگني وبس انا الاخسر

::بشنو ادري ضحى انو اختي على علاقه بجمال وانتي وامي ضحكتن عليه لا شنو ضحكتن عليه ضحكتن
على عشيره شكبرها زلم وشيوخ ورادت الناس تتكاتل من وراچن
ضحى // سواء اختك عدها علاقه بجمال او لا اول وتالي اهل جمال محقوقيين لان جمال اتعدا على عرضك
:: چان عرفتيني حقيقة اختي بدل ما ظلمت نفسي وظلمنه بنات الناس ويانه بعدين شنو الي انا ما اعرفه
وتخافين اذا عرفته اطلگج اكو اكثر من هذا الشي

هي ارتبكت وگالت // لا ماكو بس انا وخالتي فكرنا اذا اتزوجت انت الفصليه وتحمل معناتها انت ما بيك شي
وانا اكيد علاجي ايطول گلنه بس تجيب ولد او بنيه ناخذه وتطلگها
عضيت شفتي وگلت :: والله عمي خوش فكره حتى ابليس ما يفكر مثلچ ومثل امي

هي اتحسرت وكالت :: يوسف سامحني انا اذا ما يصير عندي جهال اول وتالي راح تتزوج غيري واكيد بعد ما تصير
تسأل عني عاد هاي من تاخذها تاخذها وانت تكرهها وراح تاخذ الولد منها وتطلكها

هزيت راسي وحچيت ويه نفسي //شنو من اتزوج انتي وامي ويه سحورتچن تخلني استقر ويه مره
يابت الكلب الي يشوفچ يگول فقيره طلعتي داهيه
هي شافتني صافن گلتلي //يوسف بيش صافن بيش تفكر
::ها حبيبتي بكلامج اريد اكلچ انتي متوهمه انا عمري ما فكرت بالجهال ولا فكرت اتزوج عليچ مروه صارت
امر واقع ولو اعرف بازهار وسوايتها صدگي ما اطلب فصليات

- - هسه سامحتني
:: الي سويتي ياضحى شي چبير انتي اتهدديني المفروض انا هسه انزع جلدچ من عظمچ بس لان احبچ راح اسامحچ
هي باستني بخدي - - ومحمد
:: بس اتفطمه اجيبه واسجله باسمج اصبريلي هالشهرين
بليلتها نمت وياها وانا العن اللحظه الي عرفتها بيها ردت اخنگها وهي نايمه ردت احرگها بس تفكيري بمروه وابني خلاني
اسايرها

////////////////. /. //////يتبع