رواية بعد فوات الأوان الفصل الرابع وثلاثون 34 - بقلم آنين الليل

السلام عليكم
صار اربع تيام اكتب سطرين واترك لان كلش تعبانه من الفلاونزا حرام عليكم 🤒🤒
من البارحه الهسه كملت تصحيح الاملاء وراح انشرها لعيونكم 🥰🏃
اتمنى الكم معايشه ممتعه مع احداث القصه 💐💐💐
تحياتي# آنيين الليل #

//////////////////////////////

مروه
بعد الي سمعته وقريته زاد اصراري ان الگى النفسي حل خصوصا ويوسف تقريبا صار يوميه يجي
مرات وره الظهر ومرات ايبات وصار دووم يسمعني كلام حلو وانو ايحبني ويريد ايعوضني عن كل
شي مو زين سوا وياي

ودائما ايردد ::مروه سامحيني حتى الله يسامحني
مره اتشجعت وسالته = على شنو اسامحك
هو ما جاوبني حاول ان يغير الموضوع صدقا كل الكلام والحب والهدايا ابد ما شفعوله ولا احاول بيوم
او لحظه اغفرله لان بصراحه واگولها وما اخجل منها انا اكرهه

صرت يوميه اطلع الموبايل واباوع واسمع كل شي صار وانا بيه وما يزيد كرهي اليوسف وامه
يمكن لو وحده غيري چانت خبرت اخوها او ابوها وراوتهم التصوير لكن انا فكرت بالي راح يصير
صحيح اكره يوسف وما اطيق اشوفه لكن انا افكر بالمستقبل لازم ما اضيع الفرصه واستفاد منها
ع المدى الطويل

صرت اكول مجرد ما امين وصادق يسمعون التسجيل واراويهم الرسايل راح ايحقون يوسف وراح اتطلك
واتحرر من هذا السجن المقيت ويوسف راح ينفضح وراح يفصل ويجوز يخسر كل فلوسه بس ما راح
ايعوفني بحالي

واكيد راح  ايطالب بابنه وبما انو انا الي تاركته وراح نصير اعداء اكثر من قبل راح العشيره تحكم
انو لازم ارجع الولد
الاهله لان لايمكن تتحمل العشيره مسؤولية ولد غريب وبنفس الوكت يوسف ما راح ايعوف ابنه

سمعته من ايگل الامه اگلب الدنيا وارجعها اول مره اشوف الاصرار بعيونه هذا الشي خوفني وخلاني
افكر الف مره ومره
ولا انسى انا كل الي اسوي الخاطر ابني وابني وبس كل شي اتحملته من بداية ما اخذني فصليه
بالبدايه الخاطر امين لكن من صار محمد اتحملت كل شي ورضيت بالاهانه بالشغل الي ما اعرفله بالجوع
والقهر بكل شي مر بيه كله الخاطر ابني

صرت ما افكر خصوصا من اتوفت امي صار كل تفكيري اشلون انتقم من يوسف بابنه
وهاي مو انانيه مني لا بالعكس  انا فكرت بكل زغيره وجبيره وشفت انو لازم اتصرف الوحدي ما اريد ادخل
اي طرف ثاني بموضوعي والي اسبابي

اذا فضحت يوسف گدام اهلي اول شي راح اتطلك ويوسف ياخذ ابني  على اعتبار انا كارهته واي شي ايخصه راح
ياخذه خصوصا اذا عشيرتنا حقتهم

الشي الثاني سالم راح تخرب علاقته ويه سماح ومثل ما انا اتطلك هي يجوز هم تتطلك واذا تبقى ويه سالم ما راح ضحى
اتخليها بحالها لان اكيد يوسف راح ايطلگها الضحى راح تصير مشاكل الها اول ما الها تالي

وانا ما اريد يصير كل هذا لان امين وصادق شباب وتوهم جاي يبنون بمستقبلهم ليش احملهم شي ما الهم يد بي

وصار لازم اتحرك بسرعه لان يوسف جاي ايگلي انطيني وكت وراح اعوضج عن كل شي شفتي وياي مو زين
راح اسكنج ابيت ابحدچ وما اخليچ بحاجة شي

انا ما ارد على كلامه ولا احچي ويا بس قدر السؤال وهو ما يضغط عليه چنت من ارجع من الحقل اكمل تنظيف
الغرفه والمطبخ وبعدين اگعد ع التلفزيون وصرت اشوف الاخبار وداعش الي دخل للموصل والرمادي والشباب
الي راحو للجهاد في سبيل الارض والعرض

وعرفت انو صادق ترك دراسته واتطوع وهذا الشي خلاني اخاف علي وادعيله بصلاتي وچنت يوميه اتصل
بامين وزينب حتى اطمن واخذت رقمه وخابرته واسمع صوته
وانا ابجي وهو يكلي//لا تبچيين مروه والله لو تشوفينه وتشوفين بطولاتنه چان كلتي خلي امين وعلاوي
هم يتطوعون

انا گتله =دير بالك على تفسك
- - لا تخافيين ارجع واتزوج واجي اجيلج تحضرين عرسي غصبا على شارب يوسف

=ياريت
- - ايي ان شالله احب ابنيه وياي واتفقنا على الزواج بس هي طلبت بيت ابحدها
=ها صدك
- - اي صدك هي وحيدة اهلها ومدللى

= الله كريم بس المفروض تقدر ظروفك
- - صحيح هي ما تعرف تكعد ويه عايله لذلك انا فاتحت امين وكالي تدلل بس يكمل البيت الثاني انت اگعد بي
=الله يوفقكم ويسعدكم
- - وانتي مروه
ردت اگله بعد وكت تسأل جاوبته = انا شبيه

- - مروه اتركي كل شي وتعالي يمنا ابدي حياة جديده وكملي دراستج
=ان شالله المهم انت ترجع بالسلامه

كعدت ويه نفسي وصرت افكر بصوت عالي گلت =خلي انطي فرصه مو وعدني يتغير
هزيت ايدي = انطي فرصتيش وانسى عذابي الي عذبني ايا لو انسى الاهانه والقهر لو انسى حرماني
اشوف امي قبل لا تموت شريد انسى وشنو الفرصه الي انطيها اله

هزيت راسي = اي مروه انطي فرصه وين ترجعين تشوفين كل واحد ملتهي بنفسه وهذا حقهم لان ولي امرج
الي هو ابوج ما كلف نفسه لو يسأل عنج لو يدز خبر يابه بس خلوها تجي انشوفها
= كافي مروه قدري ظرفج  وخلي اخوانچ يلتهون بنفسهم ويبنون مستقبلهم وانتي فكري شنو الخطوه الي لازم
اتسوينها ولازم ما تتهورين تكونيين حاسبه الها الف حساب

چان يوم خميس  وچنت راجعه من الحقل رغم اكثر من مره يوسف گلي اگعدي ولا تطلعين لكن انا ما قبلت
ولان اعرفه بكلمه وحده يتبدل ويرجعني احش واعلف ويجوز ارجع اسرح فمن چان ايگلي ابقي بالبيت ما ارد علي
ومرات اگله = الهوى والشمس زينات الحمودي

المهم رجعت وسبحت حمودي وانا هم سبحت وخليت الغدا وصرنا ناكل بعدها غسلت
الصحون وغسلت الحمودي واتمددنا انا ويا هالايام صاير حرك ويتشاقى ومرات يتعب ويبقى بس يبچي
ومن شافته ام بشير كالت بسبب الاسنان لا تخافيين

چنت بين الغافيه وبين الصاحيه  لمن ما اندك باب الغرفه انا عرفته يوسف لان اتهيأ الي سمعت باب سياره انفتح
وانسد كمت وانا شايله محمد لان فز كلت = منو
يوسف :: انا افتحي الباب

فتحته استغربت يوسف جاي ويا ضحى الي صار يمكن سنتين او شويه اقل ما جايه لهنا هو باوعلي  وهي
دخلت بدون ما تسلم گالت // شنو نايميين
جاوبتها = اي والله تونه نريد انام وانتو اجيتو
باوعت للغرفه وتحچي باستهزاء وعصبيه //شهالتطور تلفزيون وثلاجه ومطبخ واثاث هاي من يمته

ردت اجاوبها بس يوسف گال :: انطيني ماي
طلعت جكايه نايلون من الثلاجه وخليتها كدامه وجبت گلاص هي باوعتلي بتحدي وكالت = روحي سويلي چاي
يوسف :: اي انطيني محمد وروحي سوي چاي
انا لا اراديا خفت گلت ايجوز ياخذونه ويرحون بدون محد يحس گرصته حيل هو بچى سالني

:: ليش يبچي اشو من اجي يضحك ويريدني بس اشيله ؟
= مو حمودي مريض
يوسف بخوف :: شبي
= يتقيأ وسهال وام بشير شافته وگالت عنده اسنان
ضحى // شنو ام شير طبيبه امشي يوسف خلي ناخذه للطبيب

باوعت الها بتحدي وجاوبتها  = لا جابتلي خاله ام بشير علاج اله وصار زين
يوسف :: شنو بكيفج تنطي علاج
هزيت واسي = اي اعرف علاج التسنيين ذيچ المره كتبه الي الطبيب وصيت وجابولي علي

اخذت حمودي الي بعده يبچي وطلعت رديت وراي الباب بس ما سديته على اساس اسوي چاي لكن انا بقيت
اتصتط الهم
يوسف يحچي ويه ضحى بتوسل :: شفتي بعده يرضع وما يعوف امه وانوب مريض لازم تصبرين
ضحى اتحسرت // ياالله شنملك غير الصبر هسه انا صبرت كل هاي الفتره باقي ع الشهرين

رحت للمطبخ وخليت القوري ع النار وانا اگلها. = انطيچ ابني عمت عينچ ولچ اكتلچ موت وما انطي ابني
واجه يوسف وراي سالني :: شبيچ مروه
ردت اصب الماي الحار على راسه بلكي شويه يصيرله چاره بقيت ساكته هو رد گال
:: انطيني حمودي وجيبي وراي الچاي

اخذ محمد وانا صبيت كوبين وجبتهن خليتهن كبالهم وشفت محمد بايد ضحى هو بس شافني صار يبچي اتقربت
منها وكلت = من رخصتچ انطيني ابني لان ما راح ايخليچ تشربين چايچ
ضحى بتحدي وكأنها تگلي اخذه وعيونچ تشوف // لا خلي يم ابو وانتي روحي كملي شغلج وسوي عشا

باوعت اليوسف ورحت للمطبخ واحچي ويه نفسي
= ياجبان عبالي اتغيرت وگلت انطيك فرصه بس انت الي جنيت على نفسك
طلعت وانا ما اشوف بعيوني شافتني ام بشير وسالتني شبيچ
سولفت الها شلون تتأمر عليه وجاي اتهين بيه وهو ساكت ام بشير گالت

- - راح اروح يمهم واعزمها ع العشا
جاوبتها = اكيد ما تقبل
- - ادري ما تقبل وحتى رجلچ هم ما يقبل  بس ابقى يمهم ما انطيهم مجال جايين اهنا شعدهم
ابتسمت رغم المراره =اي فدوه ام بشير وهسه انا بسرعه اخلص العلف واجي

راحت ام بشير وانا كملت علف الحيوان ورجعت دخلت لگيت حمودي بحضن ام بشير سلمت ورحت
للكنتور طلعت دشداشه
ضحى كالت //عووع ريحة الحيوان تلعب النفس وانتي داخله علينه شگد ما عندچ ذووق
خزرتها وخزرته بدون ما ارد هو سكت ام بشير جاوبتها
- - يا خاله لعبت نفسچ من ريحة الحيوان

ضحى هزت راسها // ايي لعبت نفسي من هاي الداخله علينه وكلها ريحه
ام بشير //شو ما جاي نشم ايجوز انتي حامل

هي فلت وجهها وبقت تباوع لام بشير ويوسف حاول ايلطف الجو باوعلي وكال وهو يبتسم
::شوفي هذا التذل (اياشر على حمودي ) بس شاف ام بشير ركض عليها ولا چني ابو
جاوبته وانا طالعه للحمام =اي متعود عليها
ام بشيرردت //حمودي خوش ولد او وفي وما يبيع صاحبه ابساع

يوسف :: لا باالله شلون
ام يوسف // هاذ هوه گدامك بس شافني انت ابو وعافك  وانا جي متعود عليه واشيله صار يبچي عليه
بعدين وجهت كلامها الضحى // ها خاله هسه عشاچ يمنه
ضحى //  لا شكرا ما نريد انتعبچ هسه يسوولنه عشا ولو اليوم يوسف جابلنه غدا دسم من المطعم بس مي خالف
من نجوع تسويلنه عشا ( وتاشر عليه )

ام بشير شالت حمودي وباوعتلي وگالت // زين يمه ام محمد انا راح اخذ حمودي وانتي غسلي وكملي شغلج

رحت للحمام وبس دخلت ما اتحملت الشي الي سمعته وسلبية يوسف اتجاهي صرت ابچي بحرگه رغم
الصار مو جديد عليه ومتوقعه اكثر لكن چنت اتمنى لو بكلمه يحفظ كرامتي سبحت ولبست دشداشه ولفيت
الخاولي واجيت للغرفه

نزلت الخاولي من شعري واشوف نظراتهم اثنينهم الي ضحى نظرات حقد وكره ويوسف نظرات رغبه
هي باوعتلي وانا امشط وگالت
- - حبيبي امشي خلي نطلع شويه نتمشى شنو جايه اهنا حتى ابقى بهذا السجن
هي وكفت وهو باوعلي وگام من وصلت يم الباب حاچتني بأمر // عود سويلنه عشا

وطلعت وهو بعيونه كلام انا باوعت الها باستهزاء طلع وراها مشطت وگعدت شويه بعدها طلعت
نص دجاجه سلكتها الهم
وانا كشرت بتيته حتى اگليها الي والحمودي انا اطبخ وفكري مو وياي صدگوني متعجبه من يوسف الي مره اشوفه
قوي وكلمته ما تصير اثنيين ومره اشوفه ضعيييف ويخاف من الكل اتيقنت انو انا لايمكن اعيش ويه واحد مثله
ولازم اتصرف باقرب وقت حتى لا اندم

صار المغرب اتوضيت وصليت وهمه اجو هو صلى وهي انتظرتني اكمل كملت وطلعت گليت البتيته
ورجعت طلعت فواكه من الثلاجه خليتهن بصحن وصبيت الهم تشريبة دجاج وخليت بصحن بتيته
وصحن الفواكه وشلت الصينيه وديتها يمهم لگيتها گاعده بحضنه وتلعب بشعره وهي مبتسمه خليت
الصينيه باوعتلي

- - شنو انتي ما تستحيين دخلتي بدون ما اتدكين الباب
ما جاوبتها رحت للمطبخ  اسمع يوسف يحچي وياها
:: مو چنچ زودتيها
هي بنتر//  لا ما زودتها ما شفت شلون دخلت علينه للغرفه ما گالت مره ورجال خلي ادك الباب

ردت ارجع واگلها هاي الغرفه مالتي وانتي ورجلچ الي اجيتو بيها لكن ما حبيت اكبر راسها واتلاسن وياها
اخذت جكاية  اللبن وگلاص خليته گدامهم ورجعت للمطبخ وانا ابدي ارتكب جريمه بيهم خليت القوري ع النار
واخذت خبزه وخليت بيها بتيته وطماطه وسويتها لفه وصرت اكل بيها  هو كمل عشا وراح يغسل وهي اجت ورا
هم غسلت ورجعو للغرفه اندك الباب عرفتها ام بشير رحت فتحت الها دخلت وهي تحجي بصوت عالي

- - ها خاله كملتي عشا خطارچ
= اي خاله اتفضلي
- - زاد فضلج
دخلت ام بشير وانا وياها ورحت شلت الصينيه وصبيت چاي جبته وقدمته واخذت حمودي ورحت للمطبخ اغسل
المواعين اجت وراي ام بشير وكالت //  هاي شبيها جنها ما شايفه
باوعت الها =منو ؟

- - هاي ضحيوه تتعاير وتتدلع عبالك البارحه ماخذتلها رجل
ابتسمت وگتلها=  خليها بكيفها
اتقربت مني وكالت // لو كل النسوان عدها صبر مثل ما انتي صابره يمكن الدنيا بخير
هزيت راسي وگلت = الله كريم
- - ياالله انا رايحه تردين مني شي
= لا سالمه
ام بشير باوعتلي وهي عاكفه حواجبها // اكلج شنو همه ذوله يرحون ايباتون
جاوبتها بابتسامه = والله ما ادري
اذا يباتون انتي وين تنامين
رفعت اجتافي يعني ما ادري

راحت ام بشير وانا كملت المواعين ومسحت الطباخ والكاونتر ودخلت للغرفه اخذ حمودي واطلعله ملابس
رحت للسله وطلعت بجامه وتيشيرت وحفاظه هو گاعد بحضن ابو واجيت اخذه ضحى كالت
- - افرشيلي انا ويوسف بالغرفه
باوعتله وانا الملم بحلگي ردت ضحى بنتر // وانتي شوفيلچ مكان تنامين بي
شفت سوسف خزرها وگال :: مو على اساس هسه نرجع
هي اتقربت منه اكثر وگالت بدلاعه //لا حبيبي اريد ابات الليله اهنا انا وياك عجبني المكان رومانسي

بدون ما ارد نزلت فراشين وخليتهن واحد بصف الثاني هي اجت يمي وصارت تتلمس بالفراش
- - خلي اشوف اخاف انتي نايمه عليهن
جاوبتها بتحدي وهدوء = لا هذا (واشرت على واحد ) هذا مخصص للخطار اما هذا فهو فراش ابو محمد من يجي
ويبات يمي افرشه اله
هي ردت بعصبيه // ياالله اخذي ابنچ وشوفيلچ مكان اتنامين بي

باوعت اليوسف الي خزرها اخذت فراشي وفراش حمودي ورحت فرشت بالمطبخ ورجعت اخذت محمد
وجكاية ماي من الثلاجه يوسف سالني
::وين راح اتناميين
= فرشت بالمطبخ
هو هز راسه وگلي :: لا روحي البيت ام بشير مو زين على محمد
ضحى // اي روحي وتعالي الصبح سويلنه ريوك
جاوبتها = لا انام بالمطبخ يجوز تحتاجين شي بالليل اسوي الچ

ما انتظرت ردها طلعت رحت للمطبخ وانا صايره بركان اتمنييت اكشف اوراقهم واطيح حضها
الهاي الكلبه لكن گلت  وانا اهز راسي بتوعد
= مو وكتها هسه خلي اصبر وبعدين ياويلها هي وهذا الي مسوي روحه رجال براسي

نيمت ابني وبقيت گاعده استرجع شريط حياتي واتذكرت لمن اجو بالشتا وتركني انام بره وهي وامه يستهزأن بيه
حچيت بصوت = ذيچ المره چان يوسف يجوز معذور بالسوا لان على اساس شرفه مدنس

اتمنيت ادك الباب واظل اعد واصف على ضحى مشيت شويه وكفت اتنفست
=  لا مروه لا ترحين وتتهورين خلي انتقامج مفاجئه الهم لاتنطيهم فرصه ابد

رجعت نمت وگعدت الفجر اتوضييت وصليت
وبعدها خدرت چاي بالبدايه ردت اتريك خبز وچاي لكن طلعت طحين وعجنت عجينه وبعدها سويتها خبزه
وگليتها بالدهن
سويت اثنيين وگعدت اتريگت وانا مستمتعه باكلي كملت وغسلت وبقيت منتظره يگعدون وللعلم كل الي اسوي
مو خوف ولا حب بس حتى ما يبقى عذر ممكن ان يشفع اليوسف انا راده باب المطبخ من سمعت باب الغرفه انفتح
بعدها انسد بعدها انفتح بقيت متمدده اجه يوسف فتح باب المطبخ وهو يگلي

:: مروه گاعده
جاوبته = اي هسه اسويلكم ريوك
گعدت صارت عيني بعينه رحت للغرفه شفتها ما موجوده عرفت بالحمام طلعت بيض من الثلاجه وكليته وحميت الخبز
وصبيت كوبين چاي ورحت لگيتها طالعه من الحمام والخاولي على شعرها من شافتني باوعتلي بنظرة انتصار
انا خليت الصينيه واريد اطلع هي سالتني // ليش ما خابزه خبز حار

جريت نفس ورديت عليها بابتسامه = من تجين مره ثانيه تدللين احلى خبز الحلگج الحلو
ردت // مو چنچ تستهزأين
ما جاوبتها طلعت سمعتها تگول //اشو هاي الادب سزز كبران راسها ويراد الها تكسير راس
يوسف جاوبها  :: انتي جايه اهنا تتونسين لو تتعاركين
ردت بعصبيه // وانت شدعوه انحمقت عليها

:: لچ بابا شنو انحمقت احنه جايين انشم هوا ونتعشى وعلى اساس نرجع بالليل اشو انتي قررتي انبات  والبنيه تخدم
بيچ وهي ساكته وهاي  جابتلج الريوك وانتي ما قابله
ضحى باستهزاء // يا صدگ اخاف انكسر خاطرك عليها
يوسف بعصبيه :: ضحى احترمي نفسچ ومن تحچيين وياي احچي باحترام وابد لا تنسيين نفسج وياالله اتريگي
وخلي نرجع

ضحى // انا اريد ابقى عود العصر نرجع
يوسف بنفس عصبيته :: زين انتي ابقي اهنا ابحدج يومين تلاثه انا عندي شغل
رحت للمطبخ گعدت حمودي وريگته بعدها اجت ضحى جابت الصينيه وصارت تصب چاي بالكوب وهي اتگلي
- - زين متطوره جايبلج كاونتر وطباخ
ما جاوبتها اتقربت مني وصارت تحچي //  انتي لابسه الوضع وما تردين عليه لاتخافيين كلها  ايام ...هههههه

باوعت الها مستغربه بس ما رديت عليها لان اعرف شنو قصدها ما اخفيكم حسيت بخوف من كلامها وهاي اشاره
منها انو لازم اتحرك بسرعه
هي اخذت كوب الچاي وراحت بقيت اغسل بالصحون سمعتهم طلعو وراحو ركبو السياره رجع يوسف عليه وهو يگلي
:: مروه لا تضوجيين من تصرفات ضحى
جاوبته بعدم مبالاة وبدون ما اباوعله =  لا ضحى ما سوت شي عادي

حبيت اخبث گتله = من تجي جيبلي ملابس الي والحمودي ها ولا تنسى عفيه مشتهيه رمان حامض
هو احس بي فرح من شافني ما زعلانه گلي :: صار تدللين وبعد
انا باوعتله بدلال = امم بعد بعد جيبلي ...
اجت ضحى وگالتله // شنو ما لگيت باكيت الجكاير الهسه وانا  ملطوعه بالسياره

هالمره جاوبتها بتحدي = اجه ايگلي شنو محتاجه اجيبلج من اجي باچر
باوعتلي بنص عين وهي تلم بحلگها // باچر ايجيبهن؟
هو رد عليها :: قصدها باچر اوصي بشير وهو يجيبهن الها
ضحى باستهزاء // حبابه مره ثانيه اتأكدي من كلامچ لان احنا العصر نروح للزياره

باوعتله باستزغار رغم هو خزرني لكن بقيت خاله عيني بعينه  عرفت هو مو صاحب قرار وما عنده كلمه لذلك
بعد يوسف ما اله حجه عليه لان هو ما عرف ايصوني ويحفظ كرامتي

صار لازم اتصرف بهدوء وحكمه بالليل قفلت باب الغرفه بعد ما اتعشيت انا وابني وطلعت النقال وفتحته واتصلت
بسماح لان ردت ادرس الموضوع من كل النواحي وما احاول اخلي ثغره ممكن يوسف يستفاد منها اتصلت وهي
ردت عليه // الو هلا مروه اشلونج حبيبتي ووشلون حمودي
= الحمد لله انتي شلونج وسالم وابنج
سماح // كلنه بخير ناقصنه بس انشوفچ
= واخواني شلونهم
- - زينيين واليوم خابرنه صادق گال جاي باجازه

= الحمد لله وامين شلونه
- - اموني زين ومرته حامل بس الطبيبه گالت لازم تربط وامين دايخ بيها خطيه من طبيبه الطبيبه
= الله يساعدهم وزينب شلونها
- - زينب منو ايشوفها سادس وجاي تقرا

= سموحه
- - ها مروه گولي
= اريد فد نوب اتطلك واجي يمكم طگ گلبي
سماح // سوده عليه خيه عمت عيني عليج
انا ما صبرت نزلت دموعي وصرت ابچي = اي سموحه اريد اجي بعد ما اتحمل

سماح // تحچيين صدك وتعوفيين ابنچ ؟
= شنو اعوف ابني لا اجي واجيب ابني واتطلك
سماح جرت نفس //مروه تتطلگين ومنو يقبل ابنج تجيبينه
= صادق كلي  ابنچ تاخذينه وغصبن ما عليهم
سماح // يجوزصادق قصده القانون وياچ لكن ...
= لكن شنو سماح

- - لكن العشيره والعرف تحتم عليچ تعوفين ابنچ وادري بيچ ما تگدرين اتعوفينه
= لا سماح لا يمكن اترك ابني انا ليش اتحملت كل هذا وعلى مود منو صدگيني الي حچيتي ما راح يصير
سماح // لا مروه راح يصير ويصير اكثر
=شلون يعني ؟
- - يعني من تتطلگيين راح ترجع العداوه ابيناتنا ويصير حچي ومهادد وحتى سالم ما راح يسكت

=خايفه سماح ؟
- - مروه انا مثلچ ما اكدر اعوف ابني لو لحظه ومن اجينه لهنا نريد نعيش براحه ونربي ابنه
=يعني شلون شترديني اسوي ؟
سماح // انا منچ اساير يوسف واحاول اخلي يصير مثل سالم واذا تحبين اكعدي ابيتنا انا وسالم
=ليش هالشكل تحچيين وياي ؟

سماح اتحسرت // لان هواي امور اتغيرت
انا باستهزاء = بهالشهر الي رجعتي بي اتغيرت الامور
- - اي مروه واكثر صدكيني  صادق يريد يخطب ابنيه ويا بالكليه ويريد بيت يعزل بي لان هي وحيدة اهلها وما تريد
تگعد ويه عايله وامين محتار بمرته وزينب بدراستها وكل هذا الشي يهون ويه الجاي ايسوي ابوج

انا باستغراب =ليش شسوى ؟
سماح // ابوچ ماخذ فلوس من ناس على اساس ايشاركهم بمعرض مال سيارات ماخذ الفلوس وطالع هو والمدام
التركيا والناس جاي ايطالبون امين ايسدد عن ابوچ
= كل هذا صاير اشو محد گلي
سماح // شنگلج ما نريد انزيد همچ هم
= وهسه شراح تسوون

- - سالم وامين وجهاد واخذوا وياهم شكم خيير وراحو على الناس وبعدهم ذولاك يردون افلوسهم وامين ايكللهم احنه
ما علينه بابونه هو تاركنا من زمان بس منو الي يفهم ايگولون هو ابوكم و انتم الي ترجعونه فلوسنه ...
سماح قطعت كلامها وسالتني // صدك مروه انتي شعجب تردين تتطلگين يعني اقصد تگدرين اتفارگين حمودي
رديت عليها = ههههه لا يمعوده يا طلاگ جاي اتشاقى وياچ

سماح عجبني هدوئها وردها // اي عفيه عليچ مروه لان انا سمعت امين وصادق ايسولفون ايكولون بس نخلص البيت
ونفتك من مشكلة ابونه نسوي حل المروه  وما راح نخليها هالشكل
=يعني شيسوون ؟
سماح // امين ايگول انجيبها تعيش اهنا ونخليها تكمل دراستها وشتريد يصير الها

جاوبتها = بس امين ما ذكر ابني ولا گال اجيبه يعيش ويه امه
سماح ///احم لا مو هيج بس اكيد من تجيين  راح ايطلكوج  ويخلون ابنچ عد ابو فتره وبعدها يجيبونه
الچ هذا رأي صادق
جريت نفس ونفخت = الله كريم المهم يلگون حل المصيبة ابوهم
- - اي والله مروه كلش مقهورين من السوا ابو ابوهم

= ياالله انا راح انام لان وراي شغل بوسيلي احمد
- - وانتي هم بوسيلي حمودي
= يوصل ان شالله (وقبل ما انهي المكالمه )
= صدك سموحه مو تحجيين يم امين وصادق انو انتي گلتيلي على سالفة ابوي والاحسن لا تكولين خابرتج
- - اي ما راح اكول اي شي  انتي خابري امين واستفسري منه

= اي بس مو اليوم لان تعبانه كلش واريد انام تصبحين على خير
- - وانتي من اهل الخير

سديته من سماح وانا بين المقهوره والمحبطه وعرفت انو كل واحد باخواني صارو حالهم حال كل الناس
كلمن ايفكر بنفسه وبمصلحته وانو انا وابني اخر تفكيرهم والهم كل الحق ابد ما اعتب عليهم بس انا لازم اتحرك
وبسرعه لان الوكت مو بصالحي وانا بالاساس ما اريد ادخل اخواني بمعمعتي لان ما اريد اعم على سماح
وحتى لو عرف سالم وسوا مشكله ويه يوسف شنو ضحى اذا رجعت يم سماح تخليها مرتاحه لو اخواني
من ايعرفون اكيد ما راح يقبلون ابني يبقى عندي ويجوز حتى يطلبون من سالم يطلك سماح

هزيت راسي =. خلص هالمره انا اتخذ القرار الي ايحدد مصيري والي يحفظ كرامتي ويخلي ابني وياي وبنفس
الوكت لازم انتقم من يوسف وضحى واخلي يوسف متندم طوول عمره
اتمددت بصف ابني وانا اگول
= اي يامروه لازم انتي تتخذين قرارج  ولازم تعتمدين على نفسج

لزمت ريمونت التلفزيون وصرت ابحث بالقنوات وكل شويه استوقف يم قناة اخباريه وتقريبا كل قنوات
العالم جاي تتكلم بنفس الاحداث المهمه  وهي بطولات العراقيين وثباتهم وتقديم ارواحهم فداء الهذا الوطن الجريح
ضد فلول الدواعش الارهابيين الي عاثو بارضنا وبمقدراتنا فساد

صرت ابچي وانا اشوف تضحيات ابناء الوطن من شيوخ وشباب وحتى اولاد زغار اشوفهم شلون مرابطين وما يهابون
الموت بس حتى يطهرون  هاي الارض من دنس داعش الارهابي
اباوع وادعي بالنصر الهذا الوطن الجريح والحزين

بقيت اسمع اخبار متفرقه   طفيت التلفزيون ونمت بعد تفكير ومن گعدت صرت افكر بيني وبين نفسي وادور الفكره براسي
والسؤال الي يطرح نفسه
= منو ممكن ايساعدني بهذا القرار الخطير والمصيري
وقراري هذا لو ينجيني واعيش براحه انا وابني لو ينكتب عليه ما اشوف ابني مدى الحياة

بصراحه فكرت استشير سجاد لكن ما الي ثقه بي او بالاحرى خفت على بشير وامه هاي المره الطيبه
الي ما شفت منها ومن ابنها وزوجته وحتى اطفالهم اله كل خير
اذن لازم افكر بانسان يكون شجاع وصاحب قرار وما يخاف ويساعدني بدون ان يسال
وتميت افكر وانا اتگلب من جانب الاخر صفنت ورحت ع التلفون وكتبت الجهاد ع الواتساب
= شلونك جهاد
////////////////////////يتبع
القصه بلشت بنهاية العد التنازلي اتمنى تصويتكم