رواية بائعة الخضروات الفصل الخامس 5 - بقلم زهراء العراقيه

علياء:- ااوف ياربي ارحمني أه ........
كريم رفع راسه اشويه ما كلفة عناء الستارة مو حيل عالية وهو طويل مد راسه عليه جانت كاعده ومنتأكة على الستارة بس هي دوم من تصعد فوك مشمره على راسه لان خلفهم بيت امطيرجي ...
كريم اثر بيه شكله ونزل راسه وراح ....
...
علياء:- مثل ما سمعتي حضرة جنابج ماكو طلعه لوحدج وهاي رفيجتج تنسيه فاهمه
سهام:- مالج حق تتدخلين فاهمه
علياء :- اهاا يعني هسه اني مالي كلمة عليكم مو
ايناس:- اي انت مالج اي كلمة علينا
علياء :-خوش لعد اني ماعليه بيكم من اليوم ورايح ضحكت علياء وراحت للمطبخ ....
.......
جانت كاعده ومبصطه بالمحل مالته
اجاهه جابر يركض ووكف يلهث
:-ها ولك ليش اتاخرت اليوم
:- خاله اه اه خاله
:- اشبيك ولك ليش حسك مخنوك
:-خاله عمي ابو انور يريدج
طفرت علياء شكو ولك عمي بيه شي كول
:- لا لا بس هو كال روح شيع اله اريده بكلمة راس
:-يا ولك شريد مني .. شوف اكعد اهنا بمكاني وبيع وانه حروح لبيت عمي ابو انور(صديق والده الي يساعده دوم وابنة انور الي يضايقه دوم ) ..
دكت الباب فتحت اله جنه ابو انور ..
عليا:- السلام عليكم . اشلونج ام أيلاف
ام ايلاف مرت انور:- وعليكم السلام هلا علياء الحمدلله انت اشلونج
:- نحمد الله على كلشي
ادخلي عيني اتفضلي عمتي وعمي دزو عليج
علياء:-خير انشالله
.......
ضلت علياء صافنه على ام انور وابو انور جانت اوجوهم ما تتفسر سترك ياربي بس لا وحده من خواتي فضحتني وامسويه مصيبه ..

ابو انور :- الله شاهد يا علياء انت بحسبت اولادي عادج
ام انور:- وانه هم 😏
كالته من وره خشمه
من زمان وام انور تبغضه ماتدري ليش

ابو انور:-بنتي انه اعرف انت مالج دخل وانه اعرض عليج مبلغ اتكعدين بيه مرتاحه بيتكم ويستر عليج انت وخواتج
علياء:- هاا مافهمت عمي شنهووو
ام انور بقساوة:- شيلي احبالج عن ابني
ابو انور:- صاح بمرته تسكت وكال:- بنتي لا اتزعلين منه
علياء:- انه مافهمت شي الله شاهد ما اعليه بأحد انه مرة بحالي .
:- جا منو الي غرت الولد هااااا وخلته يريد يعوف مرته هاي المسكينه الي كاعده بره ويأخذج.. اهنا جان رجله يسكت بيه بس هي مستمرة بقذف الكلام الجارح لعلياء الي غرغرت اعيونه وسكتت وفهمت انور كايل لهله يريده ومكلوب الجو عليه ..
ابو انور :- طلعي بره ام انور وكام يريد يتلافه الموقف ماريد يكسر بخاطر اليتيمه
بس ام انور ماطلعت وكالت:-اتحلمين تاخذين ابني وحده بت سوك وشوارع مثلج
رفعت راسه علياء وصارت عينه بعين ام انور بس جانت نازله ادموعه
ابو انور:- كتلج اطلعي يامره
:- وين اعوفك يمه هاي خرابه البيوت لا اتلف عليك
كامت علياءوطلعت وعافتهم بدون ماترد اي شي عليه وطلعت لبيته شافت صديقته زينب شايله بته الصغيره الي عمره 3 اشهر وهي حامل وكوة تمشي وبناته ملزمات بعباته
كريم رجع للبيت جان كاعد ماعنده شغل جان محمل مسواك وغراض لبيته وزينب تمشي هي وبناته
ثلاثتهم رادوا يعبرون الشارع كريم وعلياء و زينب وما كانت صدفه لا انتم اتعرفون العراقيين هيج وقت دائما وقت سعيهم وره رزقهم وعملهم زينب راجعه من المستوصف وكريم من السوك وعلياء جانت بيت ابو انور واساسا هي دوم طالعه ...
طفرت عليا من مكانه من شافت الطفله فلتت ايد امه الي تعبانه وراحت كدام السيارة بحركه سريعه فدت الطفله بروحه .. !!!!

وكعت علياء على الارض وعلى صدره الطفله اشويه راسه وضهرهه أتأذه من دفعت نفسه حيل

التمت الناس عليه واخذوا الطفله منه وكامت علياء بس راسه يوجعه حتى ابو السيارة رجع يشكره لو ماهي جان هو بمصيبة ....
علياء:- انه بخير اشمالجن ووخرت عن النسوان الي سانداته ...
زينب واكفه وحاظنه بناته واتباوع لعلياء صديقه دربه وطفولته ...
علياء اتقربت من زينب وكالت تعاي يخيي اوصلج للبيت وشالت الطفله ام سنتين وراحت هي وزينب . بس ماحجن شي وزينب اتباوع لطريقه وساكته وصلن لبيت زينب ..
:- رحم الله والديج على الي سويته
علياء:-افه عليج اكو اخت تشكر اخته ...
:- مااعتقد احنه خوات واخذت بته ودخلت لبيته .....
صاحت علياء:- لج ليش هييج هااا انه شسويت ..
حطت بناته بالارض ورجعت بس بيده الطفله ام ثلاث اشهر ..
:- كلشي سويتي كل الم اني اعاني انت السبب ولو بتي مسحوكه وميته ولا وحده مثلج مفضله عليه كالته وهي اصك على اسنونه .
ورجعت دخلت وسدت الباب بوجه علياء الي ساكته ليش ياربي هي شنو سوت اذا رجله عينه عليه هي شنو ذنبه واذا انور هم يريده هي شنو ذنبه شنو سوت ضلت واكفه باب بيت اعيال صديقته وادموعه انهار وصل كريم للفرع شافه واكفه كبال بيت ومدنكه راسه ..
اتقرب منه ومد ايده اله ...
رفعت راسه شافته ماد اله منديل لان جانت غركانه بدموعه
هو استعطف حاله حيل ...
وهي اخذت المنديل وضلت اتمسح
كريم:- خير اختي ليش تبجين اهنا روحي ادخلي خاف توكعين(قصده لان توهه واكعه)
ضلت اتمسح بوجه ورجعت اله منديل من غير ما تحجي ودخلت لبيته وعافته .....
ضل كريم واكف يتلمس ادموعه الي انطبعن بالمنديل .....
بعد ايام الا اشويه علياء نست كلام ام انور واتحلفت بخواته ..
........
.. ما طبخت علياء على الغده سوت كم بيضه اله وللبنات اجني سهام وايناس هليام صايرات سوة ضد اختهن
سهام كعدت رادت تاكل
علياء:- ايدج لا تنمد على زادي
سهام :- شنو
:- والله انه الي ما يمشي على شوري ماله شي عندي تعبي هذا وضلت ترفع بحاجبه بكيد
ايناس كامت وراحت للغرفه هي وسهام
علياء بصوت عالي :- وهاا الي يكعد ومسؤؤل عن نفسه بهذا البيت يدفع افلوس اجار المكان الي لامه 🙄 ...
وضلت لأيام علياء مشتغله حرب نفسيه على خواته ..
جانت كاعده علياء وتسف مكانس هي لجانب شغله بالمخضر تسوي مكانس واتحطهم يمه بالسوك اتبيعهم واخته نجلاء هم اتخيط واتحوك بس تصرف على نفسه ومخلصه علياء من مصاريفه ....
اجته ايناس حطت ايده على متن اخته وبود كالت:- علية حبي مو كافي خصام
علياء باوعت اله صفح ورجعت اتسف
ايناس :- ياروحي دكافي عاد والله لوعتي فؤادي
علياء:- شنهوو افادج قصدج 😏
ايناس:- باست اخته من خده وكالت:- ياعمري انت تدرين اشكد نحبج كافي خصام
سهام ضاجت اشو هاي ايناس دصالح علياء وهنه جانن متفقات ماعليه بيه .. ..
علياء:- والله انه هم على عيني من قسيت اعليجن بس شسوي انتن الا الواحد يشد اعليجن الا تمشن عدل
ايناس ابتسمت وراحت من اتصالحت ويه اخته ....
سهام راحت وره ايناس
سهام:- ها مو كلتي الساني مراح يخاطب السانه ..
ايناس دارت وجه على اخته وكالت:- هههه لا مو هسه بس قربت والله الا اندمه هاي السوقيه لازمتنا من ايدنا بس قريبا راح اتخلص منه
سهام:- اشلون لا يكون بالج اتحصلين تعين ابسرعه
ايناس:- هههههههههه لا طبعا حصلت رجل !!!!!

سهام: - صدك تحجين بس لا اسامه طخ والسنارة غمزت..

ايناس بضحكه كريهه :- هههههههه اي طخ ووكع وسلم ولج صار يموت عليه
:- عااا وخطيبته احلام؟
ايناس:- هههههه صارت في خبر كان
يطيق الموت ولا يطيق طاريه
سهام:- اشلون شنو سويتي
:- مممم ما اعتقد واحد يرضى يحب وحده شرفه ووسمعته بالطين وطبعا يحب الفقيره العفيفه اختج ايناس
سهام :- اها وانت يا شريفه شنو انطيتي
حتى خليتي يموت عليج
:- كلشي ما انطيته وداعتج خليته يتمناني بأحلامه قابل اني احلام الخوثه حتى طلعه ما طلعت ابد وياه
:- ها ولعد منو يوصلج كل يوم
:- هههههه هذا السواق يا غبيه
":-عاااا
:- ممممم لان حبيب القلب ما يقبل ارجع لوحدي
:- هاا واشنو جنتي اسوين ذاك اليوم للمغرب
:- ممممم رحت للمستشفى امه مريضه واتعرفين اختج ما تفوت واجب
:-اها وعجبتيه
:- هههههههه اكيد ملاك الرحمه والبنت الوديعه اللطيفه الفقيره عجبته ماهي جانت ما طايقه احلام لان تربايته مو مثلي 😊😊
سهام:- ونعم الجنه😏