رواية بائعة الخضروات الفصل الرابع 4 - بقلم زهراء العراقيه

خلصت عليا خبز ودخلت لجوة جانت اخته سهام يمه صديقته كاعدات بالاستقبال ...

علياء: - اني  دوم اعوف خواتي من يجن صدايقهن ما اضايقهن وهم حتى لا احتك بيهن لاني مثل ماتكول ايناس سوقيه وافشلهن بس اذكرت شغله الشخاطه من وجيت التنور حطيته بقوري فرفوري عدنا بالمعرض الي بالاستقبال لان قريب عليه خفت وحيد يشخط بيه ويحرك كذلته كالعاده .. فدخلت للاستقبال بس شو سهام وصديقته ارتبكن وصديقة سهام ضمت ورقه بس شافتني
انه سويت نفسي ما انتبهت ورحت اخذت الشخاطه وطلعت سلكت بتيته للعشا اوفر شي هي لان المسواك غالي عاد ما اكلفني دهن
طلعت للحديقه وجبت تمن بايت ووكلت الدجاجات اتعرفون بالتسعينات جنه كلشي نسوي بالبيت يعني الدجاجه من اربيه واتبيض واتفرخ اوفر الي من ناحيه اكل الدجاج والبيض . جان وحيد يضحك ينتظر الدجاجات الي يبيضن اول ما توكع وحده يشيله ويجيني يركض والديج يضل يركض وراه لا وبعد كل دجاجه وفرخ وديج عدنا اله اسم ....
وكلت الدجاجات وشفت سهام طلعت توصل صديقته للباب بس ما يدرن بيه بالحديقه فمن شافني
صديقته حطت ورقه وره ضهره ومشت انه مشيت وراهه قبل لا توصل للباب وجريت الورقه من ايده وركضت لجوة وسهام ركضت ورايه .... ضلت اتصيح وهي وكحه واحديثه انه متعوبه مابيه للمناشد اخذت الرساله ودخلت لجوة لبست عباتي وطلعت للمخضر كلت اهناك اشوف شنهو بيه ويه اصياحات هاي ماكدر اقراههه .... وطلعت ........ بس  التهيت بالبيع ونسيته بجيبي ..
رجعت للبيت وسهام ما تحجي وياي وتشرد مني وانه اصلا نسيت سالفه الرساله مالته .. بس قلقت حيل على هاي ايناس اليوم اخر امتحان عده بس شو ضلت للمغرب بالدوام يارب سترك ..  لبست عباتي من خوفي وكعدت باب الحوش وكلساع اتمشى لراس الفرع بلكت اشوفه ويطمن كلبي طبعا انه نسيت اكول الكم كلام الناس هو والمداسي حشه القارئ لاني ماعندي رجال ولازم انعيش ومتطلبات الحياة اهواي وانه راعية ايتام يعني ماكدر اصرف مثل المسعدات وانصي صوتي ووجهي محد يشوفه لا لازم اصير ازلمه لخواتي حتى الناس ما تطمع بيهن وهنه هم حتى يهابني وما يمشن اعوج واكدر اربيهن انه شفت هذا جارنا الطويل المملوح يمشي ويه واحد من عمره يطلع هيج فوك ال 30 بنص الفرع وانه كاعده بعتبه الباب
اول ما لمحني ابصم بالعشره باوعلي ووجه ضحك بس ابسرعه دار وجه لصديقه مدري اخوه . بس صديقه مدري قريبه مو مثله لا شايفته قبل بس وين مااعرف؟؟ جان امبين اعليه ابن عز من لبسه مو مثل كريم جان لابس سروال ابيض هذا الخياط ابو الجيوب اكيد كولكم اذكروه وقميص امقلم بس ذاك لابس بنطرون اسود وقميص امخطط اسود حلو

يحيى :- اكره النسوان من يكعدن باب البيوت
يلا جيب غراضك وخل انروح
كريم :- باوع لعلياء واتمنى لو تدخل
بس هي حاطه ايده على خده وضاربه دالغه 
ضل يحيى يم الباب وكريم دخل جاب ملابسه وطلع ويه يحيى ...
اهنا وكفت سيارة بس ام  دبليو Bmw

يم الباب ضلت صافنه علياء وكامت  نزلت من أيناس جانت سافره طبعا اخته دوم تتعارك وياهه ومايفيد لان مو اكبر منه بهواي  ما تحترمه وحاطه كومه مكياج وجانت طالعه على سنكه عشره ولا يكلك هاي اخته  باوعت لعلياء بطرف عينه ودخلت للبيت والسيارة راحت ...
كريم استغرب من اخته الله اليستر على اعراض العالم ذني شنو ماعدهن رجال يحكمهن وحده كاعده بالباب والثانيه شكله مو راحه نازله من سيارة حديثه .....
..........
كريم:-اكلك نسيت الحذاء خل ادخل اجيبه ورجع دخل جابه بس من رجع للحديقه سمع صوت اعياط واصياح مال نسوان بحديقه بيت علياء ...
ايناس بصياح :- يا ك...... يا ساق....... ولج اضربيني
اهنا علياء اتريد ادخله لجوة بس هاي اتحب اتنرفز علياء فوكفت بوسط الحديقه اتعيط حتى تفضحه
علياء: - ادخلي جوة ولج كافي ادخلي

ايناس :- ماعليج بيه واتعيط وتغلط
علياء صفكته كف وكالت:- اعوفج على حل شعرج لعد؟؟؟ نازله من سيارة واحد.غريب
ادخلي جوة نتحاسب
:- ولج اضربيني يا ساق.... انت ما ضال واحد بالسوك ما ماشي وياج اني اشرف منج يا ك...
كريم طلع لبره ووده اليوم يعزل من هذا البيت
اخذ صديقه وراح .....
........
ضلن سهام وايناس ما يتحاجن ويه علياء .. 
الي كلبه انكسر من كلام اخته اذا هي هيج اتكول عليه لعد ماتلوم الغرب
هي ضحت بنفسه وصارت بت سوك على مودهن وهنه يعيرنه بشغله .....
ثاني يوم  المغربيه الا اذكرت علياء سالفه  الرساله من رادت اتبدل . طلعته من ثوبه وصعدت لفوك تقره . اهنا كريم كالعاده دوم فوك يسوي هوايته وهي تصنيع اعمال يدويه من الخشب جان يسوي تخته خشبيه .. من كعدت علياء ورة الحايط ...
فتحت الرسالة
:::- مرحبا حبيبي اني أحبك ...
ياااا وشهكت علياء بصوت وكالت اصخام الصخمج ياررب .. :- احبك احبك احبك اكثر من ما تتصور عاااااا
كريم وقف عن برد الخشب من سمع من ورة الحايط همس يوصله رغم علياء تقره بصوت عالي  بس عرفه صوته ..  ضل ساكت وهي تقره :- احبك اكثر من عدد قطرااات المطر في اليوم المرعد عااااا واحبك يا حبيبي اكثر من عدد انفاسي فأنت قريب الي اكثر من حبل الوريد من كص الله وريدج وخلصاني منج ولج هاي شنهو الطراكيع ياربي كلي شسوي ضعفت علياء وكعدت تنحب بصوت وتطلم
احا ياربي مليت ماتاخذ امانتك واتخلصني من الهم وحده ترجع متأخر ويه رجال غرب واتعير بيه من انصحه والثانيه ادزدز مراسيل ووحده الله اليعلم اشراح اسوي انه مليت شصير ياربي تعبت من الشغل ومن البيت ومن المسؤولية  ياربي ..تبجي وتلطم بحركه .. وكريم جان يسمع مناجاته وشكوته لربه .....