رواية بائعة الخضروات الفصل الخامس والعشرون 25 - بقلم زهراء العراقيه

بعد مرور سنة.........
جانت علياء بمحلة اتبيع امخضر ....
اي امخضر المنطقه الي تسكن بيه ام جعفر (المرة المقعدة) من المناطق الراقيه الي تقل بيه الحركه وكل ناسه واصلين والسوق بعيد عليهم لكن ما يهتمون كلهم عدهم وسائل نقل ومن فتحت علياء مشروع الدكان
البيت كان ركن.والناس اتستسهل الامر وهي الله مخليه مرزوقه وصارت عليه رجل.. طلعت منه محل وطبعا الفلوس منها لانها ماخذه ذهبة وياهه وباعته .  وفتحت هذا المشروع دكان بقاله احسن ماتصرف الفلوس وتكعد على الحديده بهاي الفتره مافكرت ترجع لأهله وكالت بلكت ينسوني ... 
قضت هاي المده بين الشغل لكسب رمق العيش والعنايه بالمرة العاجزة و العباده .. الدنيا بعد ماتهمه ابد من تكعد تذكر ابنه اخوهه وحيد و خواتها تبجي بس ما تنهار لانه اتكوم تتوضأ وتشغل نفسها بالعباده ...
..............
بيوم جانت علياء دا اتعزل بالمحل شافت سيارة وكفت يمه وشمرت منه رجل ومشت ..
علياء:- يااا هاي شنووو..
طلعت  من الدكان .. وكفت يم الرجل وصاحت ..
طلع ابن جيرانهم  شاب من سمع صوته.
الشاب:- لك قيس انت عايش قيس تسمعني
علياء:-اتعرفه
:-هذا قيس ابن ام جعفر .....!!!!!!

علياء ركضت لجوة وعافت الرجل المدمى على الارض وركضت ابشر ام جعفر
:- يممممه يوووم ابنج عدل يوووم
ام جعفر كانت تدعي ومتحضره للصلاة كانت الدنيا مغرب .. ردات تطفر من الكرسي ....
الجيران دخلووه البيت حطوه بالهول وصديقه راح جاب اله مضمد داوه وطلعوووا ...

بعد ثلاث ايام ... الام وعلياء يعتنون بقيس كانت حالته يرثى لها وخاصه النفسية زفت كل ما تندك الباب يكعد مخترع يريد يشرد عباله استخبارات  .  دومه صافن وخايف ... و يتحلم بالكوابيس المرعبة...
علياء:- يمة هاج هذا العلاج والضماد غيري اله   حطتهم بحظن ام جعفر واخذته للغرفه الي بيه ابنه اداويه هي لان علياء ماتكدر ماتحله .....
.. الابن بدة يخف على العلاج  والمتابعه .. وسولف لامه بعد ما حققوا وياه وهو كلشي ماعنده ... بس يردوه يعترف على نفسه لاقه انواع العذاب بالحجز ..... واعترف على نفسه بعد التعذيب المبرح وصعقات الكهرباء ...  حولوه لسجن ابو اغريب اهناك هم شاف الويل .... والكتل . والدك ..... بس هو امحيرة امر قبل لا يطلع مسؤؤل السجن كله واسطتك قويه طلعت على رجليك وضحك بوجه .. مافهم ولا حاول يفهم شي منه من الفرحه همه قبل يوم اتعرضوا للجلد والضرب . وثاني يوم فجاءة طلعوو؟؟؟؟
..
..
..
طلعت من غرفة ابنه شافت علياء كاعده بغرفته الي الحجيه هم اتنام بيه وياهه .. 
الحجيه:- ها يمه اشوفج صافنه
:- اي يمة انه حايره وين اروحن
:- وين اتروحين؟
:- ابنج والحمدلله رجع الج سالم انه كعدتي اهنا  مو حلوة .
:- طلعت جكاره الحجيه
:- عبالج احنه نفرط بيج ..
:- والناس خاله شيكولون عني وعنج انت هم من مكعده وحده بيتج ... وعندج ابن ..
:- مالي ومال الناس أن مالوا وأن عدلوا 
ديني لنفسي ودين الناس للناس .
:- يعني شنهو قصدج مايهمج احد
:- هههههه اي وكملت جكارته الحجيه ......
باوعت لعلياء بعيون حزينه:- كله كم يوم ويروح قيس منا ....
:- شنهووو ليش
:- كافي عليه المر الي شافه والسنين الي ضاعت وهو بعيد عن اطفاله ومرته ...
:- اها
:- اسفره لعمه احسن
:' عمه؟؟
عنده عم اهناك اشو ما كلتي الي
:- هذا هم سالفته سالفه .
:- ليش هم ضد النظام .
:- لا بس يكرهه ويكره العراق كله عافه من عمره 20 سنة واتعود على الغربة من صارت هي وطنه ... وعافني بلهفتي عليه
:- ليش ما جبتي الي طاري
:- مااريد اتذكره لا اموت فد يوم من شوقي اله
:- يااا شنهو انت عاشكته؟
:- واشلون ما احبه هذا نبضي
:- يااا اتحبين حماج ييمه
:- واموت عليه
:- يا ههههه اتكولين من عمره 20 سنه سافر لا يكون خله بيج وعافج تزوجين اخوه ههههههه
:- هههههههههههه والله عندج اسوالف
لج هذا عبدالله بزر الكعده مال عمتي جابته وره سنه ماتت اني جنت جايبه جعفر و حامد وفريد و ومن جبت معين الله يرحمه هي جابت عبدالله اشلون حبلت ماندري اتعجبنا كلنا لان جانت اتريد تدخل ب 50 .. من اتوفت صرت اني امه وروحي بالدنيا كانوا اولادي يغارون من حبي اله .... بس عافني وراح من صار عمره 20 ... كمل دراسته اهناك وكون نفسه ..
علياء:- هااا
من صارت هاي السالفه اخذ قيس يمه بس قيس رجع ما اتحمل فركتي واخذووه
:- اي ادري بيه خطيه
:- واعتقد عبدالله اله ايد بالموضوع وهو الي طلعه الي ...
:- اشلون .بالله وهو بالخارج بعدين شنو هو ايده واصله
:- الا واصل هههههههههه
علياء :- على كلن الله يخلي الكم
...
اتوسل قيس بامه اتروح وياه لكنه ما قبلت اتعوف ارض وطنه الي اندفنت بيه اجساد اولاده ....... وسافر قيس لسوريا .. وضلت علياء ويه الحجيه ....
الحجيه جانت طبيبة بيطرية ... وادرس بجامعات ..(دكتورة جامعية ) اتقاعدت بعد ما ادت رسالته على اتم وجه واتخرجت على يده اجيال لكن في نهاية عمره اتعذبت بفراق اولاده وعزوته حتى مستحقاته التقاعديه ماتعرف عنه شي وهي مقعده انذلت حيل وهي بت العز والنسب والحسب ... لكن الله عوضه بنعمة اسمه علياء وكانه رسله اله ...  غيرت حياته .. صحيح هي لهجته واسوالفه اضحك  لكنه مؤنسته بوحدته وخلت لحياته لونه حبته حيييل وعشقته وعشقت صدقه ! وبرأته و بساطته لكنه مرات اتكعد اتفكر بيه اشلون اذا الله اخذ منيته وين اتروح هاي البنيه ؟؟؟؟ ..
.......
علياء:- يمه سويت الغدا اشويه واصب
:- اي عاشت اديج ....
:- صدك اتره اجت جارتنا ام مهتاب كالت عبدالله خابر عليهم .  ب 6 روحي هو راح يخابرج ...
:- اي خوش اروح
:- اكول ليش مجان يخابرج .
:- ماعرف جان يمكن زعلان.
:- ليش
:- لان اني السبب عباله قيس مات وبسببي يايمه عاقبني وما سأل عني
:- ياااا
:- اي هذا عبدالله هو اشكد طيب بس اعوذ بالله من قسوته ..
:- هاي عود انت  امه هيج يسوي بيج
:- يلا خل ناكل جعت ....
.. ضلو قيس وعبدالله امسوين ظغط نفسي على الحجيه حتى يسفروه الهم وعدت شهرين وهمه على هذا الوضع اتصالات وملحه .. قيس يسمعه اصوات اولاده حتى تحن واتروح الهم ...
طلبت منهم ياخذوهه اسبوع وترجع ما قبلوووا ظغطوا عليه الا تجي يمهم للدوم علياء خاافت حيل اذا لان قلب ام جعفر واسافر هي اشلوون بيه ..............احسن شي لازم اتروح للعمارة اشوف شنو وضعه اهناك بلكت انكشفت الحقيقه
ثاني يوم كالت لام جعفر اريد اروح ازور ..وراح اتأخر ابات بالكاظم. ضايجه وروحي مختنكه سمحت اله اتروح ... . راحت واتعنت لوووطنه ومسقط راسه العمارة.... 
بعد ما وصلت راحت للمنطقه الي ساكنه بيه نجلاء .....
صارله سنة و 8 اشهر على غيابه .......
وصلت العصر ب 5 لان هي مطلعت من الصبح  شافت يم بيت اعيال اخته هوووسه وسيارات وهلاهل ..  هي طبعا لبست نقاب اتريد بس اشوف الاوضاع وبلكت تكدر اشوف اخته نجلاء وتعرف  شنو صار بالظبط..
وكفت ويه الي واكفين يتفروجون
شافت احد الجارات واكفه تتفرج على الزفه

علياء:- الله يساعدج عيوني هاي بيت ام ياسر منو عرس عدهم
:- ابنهم حيدر
:- هاااا
:- اي والله ازوج اخت جنتهم وردة مال الله علياء جنتهم
علياء:- يا هي من جناتهم غير نجلاء قصدج اي وردة
:- اي همه ماعدهم غيره وهسه اخذو اختهه الصغير
علياء يااا بعد رووحي مهجة زوجوووج
علياء:- ها بس هي ماعده بس وحده اصغيره
:- لا يكولون  طالبه بالمتوسطه ورجله راح يخليه اتكمل لان خطيه يتيمه وهي كبرت وهمه عدهم ولد فاخذوه لأبنهم
علياء احمدك ياربي خليتني اجي بهذا اليوم واطمن على اختي .. 
الجارة طلعوا طلعووا
طلع العريس وبيده عروسته مغطيه بحرام وطرحه

علياء ادموعه تجري وهي اشوف اخته تنزف كدامه وماتكدر تحظنه ...
علياء:- وحييييد يروحي انت كبران
جان واكف ويه الولد الصغار
المرة :- خطيه العروس طلعت من بيت رجله للفندق ماعده اهل
علياء:- ها اي صدك ليش ...
كوة غيرت نبره صوته الباكيه
:- والله يكولون امهم وابوهم ماتو وربتهم اختهم الله يرحمه وبعد ما ماتت اخذوهم اهنا يعيشون يم اختهم الثانية
:- شنو اختهم ماتت
:- اي خطيه يكولون بعده شابه وماخذه خاله العريس بيتهم ابو انور ورة هذا البيت بالفرع الي ابصفنه ... ...
علياء حست بالجزع المرير هيج يا يحيى موتتني حتى تتخلص من العار ....  هيج موتوني بالحيا ... 
باوعت للزفه سيارة العريس مشت وبوراهه السيارات
هي عافت المرة ورادت تمشي حست الارض تلف بيه اتعرفون البوشيه(النقاب) يتكون من طرحتين مقنعه اعيونه تطلع منه وطرحه فوكه خفيفه  من الدوخه شالت الطرحه  الخفيفه وضلت بالمقنع اعيونه ضاهرهه منه فقط ..
صارت بوجه سيارة  رادت تندعم بس وكفت السيارة طلع راسه يحيى منه
:- ها حجيه خو ما تأذيتي ...  ضلت على وكفته من سمعت صوووته
ما اتحركت 
كريم كاعد ابصفه :- يلا يمعود. الهورنات اشتغلت ورانه جان الفرع ضيق وسيارات الزفه وراهم .  
يحيى:- يلا اختي ....
ماكو جواب وعلى صفنته وده اتروح تتعارك وياه وتعاتبه ليش موته ليش وتظم نفسه على صدره وتشكيله من قساوته هو والزمن عليه ...
يحيى نزل من السيارة ووكف وره الباب مالته
:- عيني سديتي علينا الطريق
دارت وجه عليه واعيونه مثل الرصاصات اتوجهت عليه وما نزلتهن
يحيى ضل صافن على اعيونه    ... اسرته بنظراته الحاده ......