رواية بائعة الخضروات الفصل الرابع عشر 14 - بقلم زهراء العراقيه

يحيى :- هاا!!
انور :- انت تشاقى موووو
:- لا
باوع ليحيى وكال
:- اذا تريد رضاية دنيا واخره اتزوجه واذا لا . لا انت ابني ولا اعرفك اتبرى منك
وكام الاب وعافهم كلهم الحيره والصدمة اكلهتم ...
كل توقع يحيى ابو يريد يزوجه لانور لان يعرف ابنه نفسه بيه اشلون يريد يزوجه اله !!!
كال يحيى بوسط الضجيج والهمسات
يحيى:- يمة شوفي صرفه ويه ابويه وهدي الي يريده مستحيل اسوي اخذ وحده خطيبه صديقي واخويه نفسه بيه
امه عضت شفته اله بمعنى اش لان مرت انور خطيه كاعده
ابسرعه راحت من يمهم ام ايلاف وهي تبجي
لان رجله كوم الدنيا وما كعده من عرف بمخطط ابوه
وره اشويه الاب طلع وكال تعالو لولده
راحو وياه لغرفته كعد وحطهم اكباله وكال .
:- شوف يابة اني هاي البنيه امانه بركبتي تدري ابوهه البارحه اجه عاتبني بالحلم .سكت اشويه وكال بحرگه لانور:- ولك انت دمرته للبنيه حتى بالسوك يحجون بعرضه كطعت رزقه وابو البيت مايريده بعد تأجر بيته والمنطقه كله اظن عده علاقه وياك
:- اي زوجنياهة بويه مو تطيه لاخويه الصغير
:- اذا ازوجه الك مو بس سمعته تروح لا وسمعتنا احنا بعد ..
:- شوف الجيران ناس اتكول انت الي اصيح باب بيته وناس اتكول مو هو يعني محد متاكد اذا ازوجه الك نثبت الهم كلامهم صح وبينكم شي .. بس اذا اخذه اخوك محد يكدر يفتح حلكه والاهم من هذا كله مرتك . مرتك بت اخويه وامانه يمي ما اكسره بزوجه ثانيه واذا فكرت انت بهذا الشي مرة ثانيه هم لا ابني ولا اعرفك
وانت يحيى... تاخذه وتنسى بت هذا المجرم السياسي مصاص الدماء ....
واخذ اشماغه واعكاله وطلع ابوهم .. ضلو الاخوة واحد يباوع للثاني وموقفهم صعب حيييل.......
بعد اسبوع
علياء :- اني رايحه ادور على شغله بهاي المنطقه
سهام:-ليش
علياء:- جا انضل عالة على الرجال
سهام:- والله احسن من ما اطلعين واتفضحينه
عهود:- والله حتى مدارسنا عفناهه من وراج مانكدر نرفع راسنه
علياء:- انتن شنو ولجن ماتعرفني مو اختجن انه مو كدامجن خطبني انور ورفضته واتعرفن كلش زين مالي دخل
سهام:- مو انور اصلا قبل سالفته . سالفتج وينه نصير مشتهره
:- رايحه انه .. وعافتهن وطلعت ..
راحت لسوك المنطقه ادور على مكان فارغ تبسط بيه ..هي هاي الشغله الوحيده الي تكدر اله اتبيع مخضر ...

رجعت لكت بالبيت ابو انور وزوجته وبته ... بيومه طلبو ايد خواته سهام وعهود وحده لابن بتهم والثانيه لابن صديقه وافقت علياء اتريد.يخف الحمل من راحوا
سهام:- اني ما اخذ هذا لو اموت
علياء:- اكلي تبن ولج وين لاكيه واحد مثل حفيد ابو انور جمال واخلاق
:- والله اني غير فلاح ما اخذ فاهمه ..
احتارت علياء اشلون تقنع هاي الغبية بالولد بس ماكو فايده طبعا بعد ايام جابن فرشهن واثاثهن البسيط من بيتهن وعقدت نجلاء وياسر ابن بنت ابو انور ....
وبعد شهر تم عقد عهود من ابن صديق ابو انور شافه وعجبته بهاي الفتره سمعن بايناس مسافره ويه رجله ... وبعد فتره ابو انور اتفق ويه ابو ياسر وابو عريس عهود يزوجهم بنفس اليوم وتم الزواج وحست علياء اشويه الحمل خف عليه من ازوجن ثلاثه منهن. هي صارت تشتغل بالسوك بالمطنقه الجديده وطلبت من عمه ابو انور يقبل ياخذ اجار منه ... عمه جان يشوف بيه ابوهه من عزه نفسه وكرامته رغم فقره اتمنى لو ابنه يوافق وياخذه والله احسن اله من الي يريده .....
.........
راح الحجي العصريه وصل لبيت علياء جانت كاعده واطرز لاخته نجلاء على وجوه المخدات
دخلته من سمعت بيه هو فتحت الباب ودخل .. كعد يمه بالحديقه مادخل لجوة
ابو انور :- بنتي اكعدي ما جيت اضايف اني
:- ها عمي انت موش ضيف انت صاحب البيت ومثل ابوي واني اخدمك بعيوني ومنونه ...
الحجي :- هو طلب بتي وما اريد اترديني
:- يا عني اطلب اعيوني انت
:- اريدج على سنة الله ورسوله !!

علياء انخطف لونه :- شنهووو عمي !
:- اشبيج ههههههههه مو الي انه الشايب الكهل
:- لا حشاك
:- هههههه لابني يحيى
:-هاااا
وجه ازداد صفار وتوتر من عرفت المن يخطبه ..
:- فكري بتي زين بس اذا تردين رضاي وافقي الله يرضى عليج ..
راح ابو يحيى لبيته جان طالب يحيى يجي للبيت ..
طبعا انور ما طالع من بيت اهله حتى مرته تخدم امه وابوه ...
اجه جان قلق لا يرجع ابوه يفتح موضوع الزواج ..
كعد بوسط عائلته الحجي
:- جمعتكم اليوم حتى اخيركم ..
ام انور:- خير حجينا بيمن اتخيرنا
الحجي:- انه قررت ازوج !!
ام انور:- عزة شنووو تحجي انت
:- ليش متعجبين بعدني بحيلي اريد اشيل حمل بت صديقي وماخليه للناس تنهش بيه استره وبعد مماتي تاخذله كشه من الورث اتعيش بيه عمره كله معززة مكرمه
انور:-حجي ليش هيج خو ان..
قبل لا يكمل انور سكته ابوه
:- لو ازوج على امكم لو هذا واشر على يحيى ياخذه انتم بكيفكم بعد . وكالعاده هم كام وشال الراديو مالته والف نفسه بطانيته وكام بكل استفزاز الشويب قبل لا يطلع كال
:- تره انه خطبته الك
يحيى:-!!!!!!!
:- اي اي لا تتعجب جا ما معقول ازوج على امك اكيد انت ما يرضيك وضحك وراح ...
............
♡♡♡♡♡♡♡♡♡♡♡♡♡♡♡♡
وضل يحيى ايام يحاول يقنع الوالد....
:- بويه بس اسمعني اني اشلون ازوج وحده جانت مزوجه صديقي انت هم قدر موقفي اني هم ماريد اخسر اعز صديق
الاب جان كاعد على سجادة الصلاة وكأنه ما يسمع ابنه اتعمد يكول بصوت مسموع
:- سبحان الله وبحمد سبحان الله العظيم .
وسوة نفسه يسبح وما يسمعه
:-اوف يا بوية اوف
وعاف ابوه وطلع من غرفته شاف انور كاعد بالهول ويلعب مع ابنه الصغير
كعده يمه
:- الله يخليك انور كلي شسوي ويه ابوك
انور سكت ونزل ابنه بالارض وراحت من وجه الابتسامه الي جان راسمه لأبنه
يحيى: -دكلي انت لو بمكاني شنو اسوي الله عليك اني بحيره خوفي من اخسر ابويه لو اخسرك.واخسر صديقي المعادله صعبة حيييل
انور:- ازوجه
يحيى:- شنو ؟؟ هاي انت اتكول هيج
انور:- اني هاي البنيه ردته بالحلال بس مدام تخسرني عائلتي حد الله بيني وبينه
ازوجه انت واستر عليه وارضي ابوك هاي اذا هي اصلا وافقت عليك
يحيى: - اذا ؟؟؟
:- اي انت ماتعرفه هاي البنيه غير عن الي شفتهن ما اعتقد توافق على واحد اخوه قبله خطبه وصديق زوجه السابق !
كلام انور جدد الامل عند يحيى اذا رفضته يكون سوة الي عليه ورضى ابوه ....

... راح لابوه وكال اله موافق اخطبه ابو ضحك وكال اني خطبته ومنتظر منه جواب ..
...
بالمطبخ ...
مهجة :- اكلج سهام تتوقعين علياء تقبل
:- اكيد لا اختج العوبة واعرفه
يلا روحي ودي الجاي لام هادي و ام انور
:- ليش مو انت اضيفيهن اني اخاف ابدي الجاي
:- ليش بزر الي بكدج ازوجن
ضحكت مهجة وكالت:- لعد الي بكدج شنو صارن حبوبات هههههههاي
:- انجبي وروحي ..
ام هادي:- اي يايمه احنه كلنا الج سبب جيتنا وانت سابقا عندج علم شنو كلتي يبعد الروح
سكتت علياء وعدلت بشيلته
ام انور كاعده ولازمه كلبه تدعي من الله ترفض
دخلت سهام وبيده الجاي قدمته
ام هادي :- مانشرب غير مانعرف شنو الجواب قبول رفض
علياء:- والله يا خاله ماعرف شكلج
!!!!!!!!!!!!
ام انور: - كولي يخاله لا تترددين احنه شنو ما جان جوابج مراح نزعل هذا حقج ..
ام هادي :- الله لا يجيب الزعل
علياء:- امين واني وين الكه مثل ابنكم ودنكت خجلت
ام انور نزلت استكان الجاي وايده رجفت من سمعت رد علياء
ام هادي:- هاا يعني انكول مبروك

علياء:- دنكت اكثر بمعنى اي موافقه .
وهلهلت ام هادي وسهام ضلت على وكفته مصدومه ما متوقعه اخته توافق ...

..... دخلت ام انور للبيت شافت اولاده كاعدين بالهول وكانهم ينتظرون جوابه
طلع الشويب من غرفته من سمع صوته
وكال :- ها بشري
:- باوعت ليحيى بحسره
وكالت :- بشنو ابشرك هي الي يتقدم اله مثل يحيى تكدر اترفضه
ابو انور :- يالله ... وراح لابنه
:- مبروك اوليدي واخيرا راح اشوفك عريس
يحيى حس نفسه بووورطه عويصه وماله حل ياربي اشلون بيه امنين طلعت اله هاي علياء اكيد اذا عرفت سهير بالسالفه تعوفه زين هسه اشلون بهاي الحاله يخسر ابوه لو سهير .....!!!
.......
بعد ايام ..
......
نجلاء اجت لبيت اخته اتبشره بحمله وحيل فرحت اله علياء صارلهن ثلاث اشهر من مزوجات نجلاء وعهود
ونجلاء حيل حبه زوجه ياسر لانه طيبه وخلوقه
...

نجلاء:- اي يعني انت راح اصيرين مرت خال رجلي
:- انشالله
:-الله يتمم الج على خير ويعوضج بيه يارب
:- بس عندي سؤال بس مو ازعلين مني
علياء:- لا يكلبي ليش ازعل اتريدين اتعرفين ليش وافقت على صديق كريم
:- انه اكلج كلبي هذا الطايح حظه عانى اهواي واذا امشي وراه يطيح حظي حكمت عقلي وكلت انه منهو يرضى بيه بعد الي انكال عني هااا وهذا هم شاب عازب وهم مال وجمال ليش ارفضه واضيع الفرصه عليه انه تعبت من كعدت السوك ياعيني واريد اربي وحيد واحتاج لرجال
نجلاء:- بس راح اتعانين وانت..
:- لا اكملين كريم باعني و انه تعبت تره الحياة من غير رجال جحيم ...
شرط على اهله لا عرس ولا زفه ياخذه بالبسكوت ....
اهله اعترضوا وخاصه امه هي شعده غيرهم بس هالثنين وسكيتي بس ابوه وافق خاف لا يرجع ابنه يعاند ...... الاب كان واثق بعد الزواج راح يرتاح ابنه وياهه ......
جانت علياء تلم بملابسه وبهدوءتذكر اشلون عقد عليه يحيى واقترن اسمه بي وهو ابد ماحجى وياهه ولا قابله اصلا العقد صار بمكتب الشيخ اخذهه ابو انور واخذ شهود وراحت وياهه ام هادي امه ماقبلت اتروح .. وهسه راح اتروح لبيته على الساكت مثل الي امسوي عمله طبعا اهل المنطقه محد يدري ولا كال لاي صديق حتى لا توصل لكريم ..

سهام:- اف شنو عرس لو جنازة ليش هيج عود ردنا نفرح ونركص
مهجة :- هاي اختنا الجبيره وهيج راح تتزوج لا عرس لا بدله
علياء:- مسحت ادموع مهجة وكالت بعطف:- ياروحي الفرحه مو بس بالركص والبدله الفرحه هي الستر والسعاده الي راح اشوفه على وجه هذا الزواج انشالله
سهام:- زين ليش احنه انروح وياج ليش ما نضل اهنا هذا اول يوم الكم
:- لا لا انه ما اكدر اعوفكم يلا خلصن لم غراضجن خل نروح .

اجه وحيد يركض ويكول عمو يحيى برة يريدج

لبست عبايته وطلعت كعدت ابصفه بالسياره وبحظنه اخوهه وخواته كعدن بالخلف واخذهم يحيى لبيته من غير ما ينطق اي كلمه .......
علياء مدنكه وخجلانه ياربي انه شسويت هذا لهسه استحي منه واعتبره صديق كريم وما جاي استقبله كزوج اشلون بيه واليوم لازم انكشف اعليه ....