رواية بائعة الخضروات الفصل السابع عشر 17 - بقلم زهراء العراقيه

فتح اعيونه صحى مستحيل يسوي وياه شي ويخون مرته وهم مستحيل كبريائه يسمح اله ينزل لهذا المستوى

:- كافي علياء ومسح شفته بقوة وخر لمساته بعنف
كافي كافي قرفتيني من نفسي بتصرفك هذا يا بت الناس اني لا اناسبج ولا انت مناسبة الي لا تلحين
ضلت صافنه اشلون منقرف منه ومن اثار شفاهه مسح بعنف عنه ..
عافته وركضت لغرفته قفلته وتبجي حيل .

كعدت سهام من نومه على صوت ركع الباب كامت شافت يحيى اخذ جاكيته وطلع ضايج . وسمعت صوت بكاء علياء
سهام:- افتحي علياء شكو ولج افتحي ..

علياء فتحت الباب وكالت :- ولج مايريدني هي كوة لحد تلومني بعد انه رخصت نفسي ثوله وضربت نفسه راشدي .
سهام:- الله ياخذه اكص ايدي اذا ما طلع عنده وحده
مهجه:- اشبيه علياء ليش تبجي .
:- على قله حظه .. وراحت سهام عافت علياء منهارة وتبجي و مهجه اتهدي بيه ....
.....
صعد بسيارته ... ردت فعلا ما كانت الا عناد ويه نفسه هو كان وده يضل وياهه لكن اكو شي بداخله رفض هاي العلاقه وكانه علياء تحدته ورادت تبين ضعفه كدامه وهو اثبت اله هي ما تعني شي اله بس هو حيل تأثر بيه ووده يرجع اله لكن هيهات مو هاي المراة المناسبة اله ......

بيومه ما رجع بات يم اهله ..
ثاني يوم يوم اجه من الدوام ... ....
كان وحيد يلعب دعبل بالهول
وسهام تلعب ويه مهجة جماد حيوان يقضن الوقت بغرفتهن ...
اما علياء .. وما ادراك ما علياء كاعدة وتذكر ايامه من جانت تشتغل صحيح كعده السوك تتعرض بيه لمضايقات اهواي بس جانت مرتاحه البال حلوة ذيج الايام من تكعد اتسولف ويه البكالات والبستنجيات لو اتسف مكانس والصبح تاخذهن اتبيعهن ودجاجاته حيل اشتاقت الهن رغم بساطة حياته لكنه اتمنت يرجع بيه زمن لذيج الايام . من دخل كريم حياته لحد الان هي تعاني ........
انفتحت الباب عباله وحيد
:- روح منا ولك لا تجي اكسر بالغراض
ما حجى شي يحيى واضل واكف يباوع اله وهي كاعد ومنتكأة على السرير ومغمضه اعيونه ورافعه راسه لفوك ...
سد الباب ودخل .. كعد يمه
حست عليه فتحت اعيونه ابسرعه دارت وجه عنه ...
يحيى:- اشلون صرتي؟
ما حجت ابسرعه دمعت من اذكرت ذيج اللحظه المهينه اله
يحيى:- اني اسف ...
ضل كاعد ويحجي وياهه وهي ساكته وادموعه على خده ...
:- علياء اذا تردين نطلق اني ماعندي مانع بس مو هسه ..
:- لا لا
كالته بأندفاع
:- كلشي ولا طلاك
:- انه ماريد اصير مطلكه واوعدك راح اسوي كلشي يريضك
صعبت الوضع عليه اكثر ..
:- اني الي اسفة اذا يرضيك بس لا تجيب طاري الطلاق انه شفت المر وانه بعدني مامزوجه.وبس فسخت خطوبتي الوادم اكلت وجهي مو انوب اطلك ...
سكت يحيى فعلا هي المتضرر الوحيد بعد الطلاق ما حسب هيج حسابات ياريته عصى ابوه واتبرى منه ولا هذا الموقف ..

:- ليش ساكت .. الله يخليك انه راح اسوي كل الي اكدر اعليه وانشالله اكدر اسعدك ...
طلع من الغرفه قبل لا يطلع شردت سهام جانت تسترق الكلام ..
اجت دخلت عليه بعد ما يحيى طلع
سهام:- عوبه ولج ليش هيج ذليتي نفسج كدامه
حطت ايده على جبينه ودنكت علياء
:-جا شسوي
:- شنو شنو شسوين ولج راح يركبج هيج عرف انت مااكدرين ابدونه
:- جا هو ما يعرف اذا طلكت اضيع
:- اي بس مو حلوة منج تترجيه بعدين واذا اطلكي وشنو يعني ولا اتتوسلين بواحد ما يريدج
:- اطلك؟؟ انت طفله بعدج ما فاهمه الدنيا صح
:- تهي بهي ولج شنو طفله وانت عوبه اتضلين يم واحد ما يريدج لزكه .
:- غير على مودكم ذليت نفسي ولج اذا اطلك وين انولي هااا واصير مطلكه محد يرحمني وهذا وحيد وين اربيه هم ارجع ابسط وانتن الف سالفه تطلع على اختجن المطلكه انه ما عونت واحد يشيل عني حملي هيج افرط بيه بسهوله وكعدت تبجي
سهام عافته وطلعت هم صدك كلامه اذا طلكت اشلون بيه هي اتريد من تعرس تطلع من هذا البيت الفخم هم ترجع للفقر احسن شي بعد ما اشجعه على الطلاق
.....
كره نفسه يحيى حيل لا سهير تستاهل الخيانه ولا علياء تستاهل الي يصير بيه زين والحل والحل كعد حط اديه
على راسه حسه راح ينفجر من التفكير ....

.....
بعد.ما خلص صلاة كعد وهم غرق بفكارهه ...
صحى من غيبوبته الفكريه على صوت الصينية الي انحطت كدامه .
جانت علياء لابسه كلبيه والاسورات  الي جابتهن اله حماته طبعا عمه ابو انور الي وصاهه . ..
ابتسمت اله وكانه ماكو شي صاير ..
: ثواني واجيب الخبز ...
ماكدر ياكل بتصرفاته يزداد شعوره بالذنب اتجاهه ..
طلع من البيت راح لكريم هو جان طالب منه يجي يسهرون سوة وراح سهر يمه ..

ومرت ايام وهو على الوضع شعوره بالذنب اتجاه علياء يزداد يوم بعد  يوم
مكانت مقصره وياه بشي متحملته بكل احواله دائما تستقبله بوجه بشوش ومهما بدر منه من تجاهل وعدم مبلاة بيه هي ابد ما تحسسه بتقصيره ..
رجع من الدوام.وبيده المسواك اتلكته علياء تركض اخذتهن من ايده
:-الله يساعدك يحيى .
باوعت للعلاليك وكالت:-الله يرزقك.اكثر ويخليك النا وابتسمت وراحت .
.. هو كعد.على الاريكه وجان عطشان حيل بعده توه اذكر عطشه وجان علياء تجي وبيده كاسه ماي وكلاص وتسقي عطشه ..
راد يدنك ينزع الحذاء الي طبعا دخل بيه ووسخ البيت وهي رغم توهه منظفه ما اذمرت ولا حجت دنكت سبقته ولزمت رجله نزعته الحذاء
يحيى:-اجاي اسوين وخره رجله ابسرعه .
علياء:-مابيه شي جا غير رجلي وجاي تعبان
طلعت روحه يحيى وانفجر بوجه
:- كم مرة كلت الج اني مو رجلج اني مو رجلج تعبت علياء وزدتي همي بيج اول مرة بعمري كله هيج احتار اني ماريدج يا بت الناس انت انفرضتي عليه والله انفرضتي ليش ما اصدكين بيه يحجي وينكثل بهدومه بزهق وهي صافنه عليه
طلع من البيت وعافه كالعاده تحترك بقساوة كلامه ...
بالليل راح لأنور عنده مكان امسويه مثل الغرزة دائما يحيى ينتقده وما راضي على الي يسوي بيه من شرب خمر واركيلة وسوالف وحش هو وجماعته
. سلم عليهم
جان كريم وانور كاعدين بوحدهم
يحيى: - لك انور نقلت العدوا لكريم خليته كل يوم والثاني راجع يطوطح لمرته
انور:- اني شعليه هو يريد يكيف وهههههههه
جانوا سكرانين طينه اثنينهم منتهين
يحيى كعد يمهم وكام يدخن من ضيمه بس هو ابد مايشرب ..
انور:- اويلي البارحه كمت اركص بنص البيت ههههههه همزين طلع بيت مرتي الي بالسر ههههه
يحيى :- لك مو كافي هاي زواجاتك الطايح حظه
:- شسوي الي اريده حظى بيه غيري
سكت يحيى
كريم:-ااااه اصعب شي اتعيش ويه شخص وانت ما طايقه بس مجبور .
انور:- غبي لانك غبي ههههههه
كريم :- ولك غبي شنو ههههههه بس تدري لو صاير مقرن وماخذه ولا هذا العذاب هههههه جانت حيل حلوة وحظنه دافي بت القندره تخبل
يحيى سكت مافهم عليمن الكلام
انور:- لك ليش عفته
:- لك اني اني احك اح اح كام يكح ويضحك كريم وكال:- شفته بحظن واحد ثاني عريانه اشلون اخذه  بعد
هههه علياء الكلبة خدعتني ومدري و و ومد ومدري وين شردت هي وعارهه .
يحيى وكعت من ايده الجكاره
انور:-لك اخ جويتني
يحيى صارت اعيونه فوك راسه

جانت علياء نايمه بسابع نومه لان تعبت من البكاء والدموع .. جانت الساعه ب 12 بنص الليل يعني دخل يحيى وروحه طافره
دخل للغرفه وفتح الضوة شافه نايمه
جره من ايده بقوة
كعدت علياء مخترعه شكووو يمة

ضربه كف خله خده احمر
:- ااخ وكامت تبجي
سحبه حيل من زنده وكومه
:- ليش عافج كريم هااا
ليش عافج احجي احجي قبل لا اكتلج  بيدي كوولي
علياء متكدر تحجي بس تبجي
:- لج احجي لا تخبليني
كعدو اخوته على صوت اصياح يحيى مهجه و وحيد.كعدوا يبجون من شافوا علياء شفته كله دم من قوة الكف ولازمه يحيى والا اشويه يخنكه ...
علياء سكتت اشويه اشجعت مسحت حلكه وصكت على اسنونه من كالت
:- كلشي ما سوويت جيبلي القران احلف الك كله جذب بجذب والكلام الي انت سامعه جذب والي كايله جذاب
هد ايده وكال:- شنو مصلحته كريم بجذب لا اتخبليني جان روحه بيج اتحدى اخوته وخطبج ليش عافج فجأءة هااا
علياء:- لان غبي دهر يمه وماعرفني انت هم الله يخليك لا تظلمني صارلي اهواي يمك شفت عني شي .
اهنا هي تحكي وتبجي
يحيى :- مادري مادري
عافه طلع . .. . ..
كعدت علياء بالارض اضاهر الله ما كاتب اله الراحه بالدنيا ومهما سوت حتى تستر وتعيش مثل بقيه البنات ما تنجح ...
الصبح طلع يحيى من غير ما احد يشوفه لعمله ..
علياء :- يلا ولجن خلصن ابسرعه لا اطلع غضبي بيكم
سهام:- يعني انت مصره هالمرة
:- اي ولا تنسن حطن بس الملابس الي مالتنا الي جبناهه من افلوسهم ما اريده وحتى جنطهم مااريده مفهوم شوفن اي علاكه وحطنهن وراحت هي حطت ملابسه ببقجه وعافت شكو شي اشترته بعد الزواج حتى الذهب وما اخذت من بيته اي فلس طلعت مثل مادخلت .. بس وين اتروح هالمرة اكيد مراح اتروح لبيوت خواته لان ماخذات منهم ....
اخذته رجليه لمنطقه مجانت اتريد ترجع اله .. دكت باب بيت ام هادي رحبت وهلت بيه ودخلته ...
سردت اله قصته وفهمته هي اتريد تطلك من رجله وطلبت منه اضل يمه يومين على ما يفرجه الله عليه
ام هادي رحبت بيه بس ضاجت عليه خطيه هاي البنيه ...
علياء:- والله خاله
الله يخليج مالي غيرج بهل دنيه
ام هادي:- يا صدك جذب انتن بناتي
صاح اله زوجه الشايب راحت ام هادي
وبصوت مسموع سمعت علياء
ابو هادي:- احنه شعلينا بيهن هااا عازين هم ما نعرف ليش يريد رجله يطلكه
ام هادي:-نصي صوتك يا رجال الله يخليك .
علياء دمعته طلعت هذا عود ابو هادي الي رابيه على ايده ويعرفه شنو ماشنو.
علياء:-كومن يلا بينا وطلعن من بيت ام هادي .
ما لكت غير بيت واحد اتروح دكت اللباب فتحت اله بت زينب الصغيره
........ بعد ما كعدت وسردت اله شنو الي صار
زينب:-ولج عوبه غير تجين الي من البدايه  .
علياء:- والله احتاريت وين اروح خوالي بس اروح الهم اعرفهم يرخصوني ويرجعوني اله
:- يا صدك جذب
:- اي بس عمتج ورجلج
زينب:- ههههههههه ولج اني الكل بالكل اني الي اصرف عليهم يعني الي اوكلهم وانت اتعرفين الفضل من بعد الله الج خليتي نجلاء اتعلمني خياطه وسديت بيه حاجتي وخلصت وبعدين لا تخافين رجلي بيت عمه بالديوانيه يروح اهناك يديح.ويعوفني بهمي ..
..........
رجع يحيى بالليل جان البيت هدوء عباله نايمين طبعا هو التفكير كتله ... بس هو غلطان وحيل ندم لان خله انفعاله يسيطر على افعاله المفروض يصرف بحكمه اكثر لان كريم سكران كام ولو مسويه شي مجان استر عليه .. كام راح لغرفته عباله نايمه ...
فتح الباب وفتح الضوه وشاف محد ماكو دورهم بالبيت ماكو والغريب فتح كناتيرهم ملابسهم بيه
وينه خرب وين راحت هاي وهي ماله احد صعد بسيارته وراح لبيت خالته مالكاهه وبعده راح لبيت ام هادي هم ماهي اتخبل بالزايد وووين راحت ؟؟ الليل كله يفتر بسيارته من غير واجهه محدده ..
الصبح راح للدوام اخذ أجازه وطلع يريد يدور عنه ... راح لبيت اخته عباله يم نجلاء هم ماكو خل نجلاء اتخابر عهود تساله هم ماكو طبعا اتصال عن طريق الهاتف الارضي ...
..............

علياء:- سهام يلا لا اتعبيني
:- اوف راح انطيج عنوانه بس مو تكولين اله اني انطيته الج
...اخذت من عهود عنوان ايناس وراحت علياء بلكت ايناس حاله حييل ميسور واموره عال العال اساعده وتكدر توكف على رجله مره ثانيه وصلت علياء لبيت ايناس بعد ما سألت طبعا ..
فتحت الباب الخارجي ودخلت للحديقه الي سياجه ناصي حيل ..
دكت الباب ... طلعت اله ابنيه يطلع عمره 13سنه
الخدامه:-نعم.عيني ؟
علياء:- هذا بيت السيد نديم ؟
:'- نعم
:' اها لعد روحي صيحي الي ايناس
:- شنو تردين انت ؟ مقابله مدام أيناس؟
:- اي اريد اشوفن اختي
:- اختج انتي
:- اللهم طولج ياروح اي اختي يلا ابسرعه
:- ما مبين على العموم شكول اله شسمج
:- علياء...
راحت الخدامه وعافته بالباب .
دفعت الباب علياء ودخلت ضلت تتمشى جان صاله كولش جبيره يطل من درج كبير مفروش بسجاده حمرة و موبيليا البيت فخمه حيل ..
سمعت صوت كعب ينزل من الدرج باوعت
...شااافت.......

يتبع