رواية بائعة الخضروات الفصل الثاني عشر 12 - بقلم زهراء العراقيه

يوما ما ستدرك  أن أقسى
مامررت بهه كان خيرا عظيما
انقذك  ليجعلك  اقوه 💪💕
مما كنت عليهه  مسبقا
فلا تيأس .....

وكع كريم على الارض من هول المنظر جان اهون عليه يموت ذبح بموس ولا هاي الشوفه
ماكو اي تفكير براسه ولا يحس ب الي يدور حوله مثل الي بغيبوبه او الي يريد يشرد بعقله الباطن لغير عالم .... 
حطت علياء راسه على حظنه واصحي بيه بكفوفه بخفه على خده .
علياء:- كريم بعد عمري اشبيك اصحى يروحي كوم اعلى طولك .. كوم ..
نزلت ايناس من فوك وكالت
:- شاف نصير طالع عريان من غرفتج .
علياء :- شنو ولج شنوووو عزه عزه
ولطمت على اخدوده فتح اعيونه كريم لكه نفسه بحظنه وجسمه الابيض نصه طالع وهي تطلم   
كوة كوم روحه ووخره عنه ومشى
كوة مشى يطوطح مثل السكران راح لبيته بدون ما يحس على خطاوية وصل .. 
وعلياء تطلم وتبجي  ماتعرف شنو السالفه ولا مستعوبه .. شنو نصير اشجابه اله وكريم هم اشجابه وايناس هم شطلعه من السطح ماتعرف غير كريم راح ومراح يرد ليه .....
..........
ام صبا :- واذا اشوفج معتبه باب بيتهم احش رجليج ولج
صبا:- اي يوم غير افهم ليش ؟
:- ليش ااااه ليش
وعضت اصبعه وكالت
:- ولج شفت نصير المطيرجي طالع من بيته وشلكه استغفر الله استغفر الله هاي الجاره اذا رحتي اله اكسرج واخلي ابوج يربيج فاهمة ..
ابتسمت صبا صاحبة النفس المريضه وعرفت خطته نجحت على اتم وجه بس اهم شي كريم ما يتهور ...

بعد مرور يومين ..

بهاي الفترة ماطلعت علياء من بيته وحابسه نفسه بالبيت .. 
طلعت ايناس تقابل حبيبه على موعدهم ولبست وكشخت كالعادة ... 
شافته بكازينوا بعيد عن منطقته ..
ايناس :- هلووو اشلونك حبي
رفع راسه خطيبه وباوع عليه باستصغار وكال
:'ها واخيرا شرفتي ليش اتأخرتي لا يكون اختج ام الخضره منعتج!!!!!!!!
كعدت ايناس على الكرسي الي اكباله مسطوله من كلامه ..!!!
.. ....
طلعت علياء من بيته العصر ودكت باب كريم وهي ترجف مواجهته كلش صعبه وماتعرف شنو اتكول اله لان متعرف شنو شاف ...
انفتح الباب بعد الحاح منه بالدك
كريم  بوجه شاحب اصفر وتحت اعيون هالات سود كأنه ما نايم بهاي اليومين .. 
علياء:- كريم ..  وكامت تبجي
دخل هو وعافه بالباب واكفه . دخلت وراه ..
:- الله عليك كريم صدكني انه مظلومه وهذا يتبلى اعليه
كعد كريم على الدرج وطلع جكارة جانت محشوة بتتن لفه  وكعد يدخن
وهي تحجي وتبرر وتبجي
:- اصلا ايناس جانت فوك اي والله انه مو وحدي وماشف...
قبل لا تكمل كام كريم بسرعه حط ايده على رقبته الرقيقه ولزكه بالحايط وحست علياء نفسه دا ترفع لفوك ونفسه يضيق واختنكت
:- جذااااااابه جذاااابه حقيرة
نزله وعافه
وهي اجر انفاسه واتكح اجت اتموت بيده
:-جذااابة وكلبه بس اني الديوث اشلون وحده ترباية شارع تخدعني هااا 
هو يحجي ويشمر بديه وهي اتكح وتبجي ...
:- مثلتي عليه البراءة  والعفة واستشرفتي براسي واني المطي صدكت .. 
ضل يذب اقسى الكلام  عليه وهي ساكته وتبجي بدون صوت ...
بدت ترجع لورة وهو يحجي وعصبي واشويه اشويه التافت وطلعت من بيته .....

... اختصار الاحداث بدت صبا تتود اكثر على بيت ابو شمس ومرة من المرات طلبت من ام شمس تاخذه تنظف وياه بيت كريم لان كالت اله كريم معتزل بعد ما عاف ام الخضره والبيت مالته مايندخل اريد انضفه وماعندي وقت فصبا  عود راعيه واجب كالت اله اروح وياج    ... وانتهزت الفرصه من دخلت ام شمس انتضف الحمام وصعدت لفوك جان كريم كاعد اهناك من دخهلن ينضفن صعد فوك    ..... وضلت اجر ناعم وياه وهو باله مو يمه يباوع لحايط بيت علياء ...
وهاي تواسي بيه على انه ما تستاهله ومو خوش وهي ياما نصحته بس نصير يهدد بيه وماكدرت اتعوفه من انخطبت .... فجاءة كريم من كالت صبا :- عوفه الف وحده تتمناك وهي راح تتندم على اتراب رجلك.وهي الخسرانه اذا اخذت وحده بت ناس راح اتموت علياء من غيرته ...  وحطت باله هاي الفكره وخلته من غير ما يحس يريد يحرك كلب علياء حتى بعد ما طلكه
ورجعت علاقته ويه اخوته وطلب منهم يخطبون اله صبا .. زين ليش؟؟ صبا مرت اخوه سالته لان صبا موحلوة .
. كريم كال عده اخلاق وطيبه اصوني وهو جذب يدري بيه مو راحه بس يريد يكسر كلب علياء بصديقته فجاءة من غير مقدمات سمعت علياء باجر عرس كريم من صديقته الي ابد.ما سالت عنه بشدته ..  وطبعا محد يعرف سبب انفصال علياء وكريم الحقيقي غير همه الخمسة ....
....
رجوع الى الحاضر
كامت علياء من سمعت صوت الهلاهل بالشارع وعرفت الزفه طلعت ركضت للباب فتحته اشويه واااااه من شااافت كريم وبيده صبا مو هي ويريد يكعده بالسيارة ... بوده اتروح تركض اله واتكول عوفي هذا الي وهاي بدلتي وسيارتي وهذا رجلي والمفروض اليوم زفتي انه ..
زينب:- ادخلي ادخلي دخلته  تنعه اهنا اجت ايناس تضحك
:- هاااا بشنو حاسه
زينب:- ليش اضحكين واختج بيا حال
:- اختي هههههه اوف اشكد اتمنى هي مو اختي
علياء تبجي وماحسه بشي غير روحه بهتت
ايناس:- ها جربتي من نفس الكاس شفتي حبيبج كدامج ينزف
:-احجي شفتي اني قبل اشهر هم شربت من نفسه من هذا الغبي عافني بس لان اختي سمعته ما شرفهم ياخذون من خوات ام المخضر شفتييي
علياء عافته ودخلت لجوه وركضت للسطح كعدت ابصف الستارة الي تفصل بينه وبين كريم وتبجي من تذكر ايامه الراحت وياه ...  

ثاني يوم الصبح كاعده علياء بالحديقه وسمعت صوت سيارة ونزلت منه ناس عرفت هاي صبا وكريم وسمعت صوت هلاهل استقبلوهم بيه ...
رادت تتهور وتطلع قربت تفتح الباب صارت بوجه زينب
زينب:'- عرفتج راح تتهورين وترحين حتى طلعت حافيه شووفي وصدك جايه برجليه كله تراب زينب حتى تمنع علياء من اذل نفسه اكثر لانه مو بوعيه ومثل الطير الجريح ....
دخلته للهول وعلياء اتناشغ مثل الطفل
علياء:- خلني اروح زينب خلني ادليه على الغراض
:- يا غراض ولج كافي الي باعج بيعي
:- لا لا ...وتناشغ ....مسحت خشمه بقفى ايده وكالت :- لا لا هذا البيت انه انه جهزته على ايدي صبا ما تعرف شي بيه
:- كافي علياء اش كطعتي كلبي والله ما يستاهلج
:- لا زين بس اروح ادليه بالماعين
:- كافي يروحي وحظنته
:- انه جبت سلات للخضره وحطيتهن وره الكاونتر خاف ماشافتهن خل ادليه بيهن
حظنته حيل وضلت تربت على ضهره وكعدن بالهول يبجن اثنينهن ......
..................
بعد مرور اسبوع على زواج صبا و كريم ..
صعدن الخوات ينامن فوك. ...
حظنت علياء اخوهه ودا اتنيمه وسمعت صوت ضحك قوي من بيت جارته صبا
:- هههههههههههه كافي كريم عوفني اههه ما تشبع وههههههههه
:- لا لا اغار اني لا لا هههههههههههههه
يمه افديك واني هم اموت علييييييك
عافت اخوه النايم علياء ونزلت تركض اجت تعثر وتوكع بالدرج ...
وصبا لا زمه المخده وتحجي وياه اصلا كريم جان طالع ويه جماعته ما يطيق يكعد بالبيت واذكرت خيبه امله من زوجه ما يباوع بوجه وماتقرب اله غير بيوم دخلتهم حتى يثبت رجولته وكل ماتتقرب منه ينفره!!!!!

انطرحت ايناس بفراشه واتفكر بعد ايام خطبته من نديم  الظابط الحزبي السمين الي ما اطيقه بس على مود افلوسه طبعا هي اتعينت معاونة طبيب باحد المستوصفات الحكومية واتعرفت عليه من خلال عمله بعد ما جانت تحب واحد وسيم ومن عمره الله بدله اله بواحد اكبر منه ب16 عام ومطلق وابد مابيه اي صفه من الي تريده معدا انو زنكيل......
تراتيل حواء زوزاية
.... 
جانو بيت ام شمس مسوين عزومه لكريم ومرته واهله ..
بغرفة النسوان..
ام صبا :- اي الحمدلله صباوي مرتاحه ويه كريم وردة
ام شمس:- اي والله مثله ماكو كريم .
:- اي صحيح بس لو يشيل منا ارتاح
:- يا ليش ؟؟،
:'- احسن يختي
عباله ام شمس لان خطيبته السابقه جارته حايط على حايط
ام شمس:- ام صباوي لا تخافين ذيج عافه واشتره بتكم بعد ..
:- لا يااا اني ما خايفه عليه هو ماشاء الله ماينخاف  عليه بس
:- بس شنو لعد
:- استغفر الله استغفر الله
:- ماريد اجيب بعراض الناس بس اخاف على سمعتنا منه هاي كل يوم طالع واحد من بيته شكل هي خواته ماكو واحد يظبهن
لطمت على صدره ام شمس :-لا خيه كولي غيره
:- والله يختي شفته بعيوني ذني الي راح ياكلهن الدود .... وسردت اله الي شافته وتعرفون النسوان يحطن بهارات وملح على القصه ......
وام شمس كالت لسلفته وسلفته كالت للثانيه والثانيه كالت لجارته وطشت سمعة علياء وسيرته بالحي.......
يتبع