رواية بدون سابق معرفه الفصل الثاني عشر 12 - بقلم دانيا

رواية بدون سابق معرفه

الفصل الثاني عشر12

بقلم دانيا

قلت ليها الناس ديل يمكن م عاوزين يبغلوا لأنو عمهم غير قانوني عشان كدا عاوزين يقبضونا بطريقتهم هم وم تستبعدي يلقونا لأنو شكلهم نفوزهم واصل يابت ،، اثناء ما بنتكلم بتاع العربيه اتلفت علينا وقال "To where" نظام ماشين وين؟ قلت ليهو "Take us to the Pagon region" ماشين منطقة باجون ،، سماهر عاينت علي وقالت لي دي وين كمان ملاحظه إنك اتأقلمتي معاهم ، ابتسمت وقلت ليها " من عرف لغة قوم امن شرهم " ضحكت قالت لي صدقتي والله ... قلت ليها " باجون " دي منطقه جبليه عندهم هنا ومليئه بالطبيعه على الأقل نبعد من جو العاصمه دا شويه عشان م ننقبض لأنو هنا الناس كتار والخطر كبير علينا هسي مثلاً لو لقينا شرطه بالصدفه وطلبو مننا إثبات الشخصيه نجيبو ليهم من وين دي ح تكون كارثه حقيقيه ،، بتاع العربيه تاني اتلفت علينا وقال "The journey was expensive" غالي ثمن المشوار عاينت ليهو قلت ليهو "how much " كم قال "twenty euros " عشرين يورو بقيت اعاين ل سماهر فتحت الحقيبه طلعت القروش حسبتهم وطلعت منهم المبلع ادتو ليهو.

محمد خلاص النوم غلبو في الليل داك اتصل ل معاذ تاني قال ليهو ريان اتصلت لي بس اثناء ما بتكلم معاها فجأة جاتها سماهر بقو يتكلمو مع بعض وبعدين المكالمه فصلت وتاني ريان ظهر لي م منشطه حاولت اتصل م قدرت بس الحاجه الفهمتها من حديثهم إنو في واحد مصري معاكسهم ،، وكمان كانوا بتكلموا عن واحد إسمو جون وتاني م عرفت الحاصل شنو انا خايف عليهم ... قال ليهو يا زول اهدأ وقول لي الحصل شنو هم مش كويسين ؟ قال ليهو الحاجه البعرفها لحدي ما اتواصلت معاي دا كانوا كويسين بس تاني الله اعلم لأنو سمعت سماهر بتقول ليها لازم نجري من هنا بسرعه ،، قال ليهو احكي لي من الأول هم كانوا وين وهاربين من منو ؟ والمرأ ديك وين ؟ قال ليهو ياخ المرأ الله لا كسبها عافيه كانت عاوزة تبيعهم والعياذة باالله ،، قال ليهو لا حولة ولا قوة إلا بالله ، محمد بدأ يحكي ل معاذ الحاصل كله بعد شوية جاهو اتصال من عزام قال ل معاذ كدي دقيقه برجع ليك دا عزام دا ضارب لي اشوفو مالو فصل المكالمه ورجع ل عزام اول ما رد قال ليهو يا محمد ريان ريان لقيت رسائل من ريان محمد قال ليهو ااي انا زاتي قبل شويه كنت بتكلم معاها ،، لمن فكر يكلمو بالحاصل تاني قال لالا لو كلمتو ح يوري خالي ويشغل ليهو بالو ساي وهو اصلاً عيان وم بتحمل .

قال ليهو اطمئنوا الأمور بإذن الله عن قريب ح تكون تمام قال ليهو لكن ممكن تكلموا ام سماهر لكن عمها لا ،، دا كلام ريان قالت سماهر م مرتاحه ل عمها دا وجهزو لي الجوازات انا بكرا بطلع بدري الساعه خمسه جيبهم لي في المطار اشيلهم معاي ،، قال ليهو تمام إن شاء الله ، محمد من غير ما يحس قالها بطريقه عفويه ... الليله واخيراً الواحد يمكن حس بشعور الأمان شويه ، عزام قال ليهو محمد .. محمد قال ليهو نعم قال ليهو شكراً يا ابن العمه بالجد م قصرت م عارف نوافيك كيف ؟ محمد قال ليهو عيب يا ود خالك معقول كلامك دا تقولو لي انا ، محمد قال ليهو عارفك زول سند ربنا يجزيك كل خير اها م قلت لي تكاليف الرحله اكيد م يكون في سفر من هنا مباشر قال ليهو لا ح اطلع من هنا عبر مصر ومنها لقدام ومن قدام لقدام لمن اصل وبالنسبه للتكاليف تكاليف شنو يا ود الخال مجنون انت انا والله لو م عندي ابيع الوراي والقدامي عشانكم كم اولاد خال عندي انا .

بهناك بتاع العربيه وقف قال "We arrived " وصلنا قلت ليهو " ok" نزلنا كانت الساعه قريب اتنين مشينا مسافه كان في فندق صغير وبسيط قدامنا قلت ل سماهر ورح هناك انا حاسه نفسي ح اموت من التعب ... ماشين عليهو كان في متجر بتاع ملابس فاتح قصادو عاينت ليهو وعاينت على سماهر لقيتها برضو مركزة عليهو ، قبلت عاينت لي بقينا نضحك قلت ليها انتي يابت قروش جون دي لسه م انتهت قالت والله ياخ شكلها م انتهت لكن م فضل الكتير الحاجه الكويسة إنو قروشهم عندها قيمه م زي عندنا هناك مشينا على المتجر وعاد يا يمه لبس ساتر دا قاعد وين هنا بعد تعب اشترينا وطلعنا مشينا الفندق قلت لي موظف الإستقبال "We want one room" عاوزين غرفه واحده اداني مفتاح وسماهر دفعت الحسابات وطلعنا بالسلم لأنو كانو كلهم طابقين ،، وصلنا القرفه 105 سماهر اترمت في السرير كأنو ليها شهر م نامت قلت ليها انا م ح انوم ح اوصل واي فاي واتكلم مع محمد قالت لي للزمن دا م بكون صاحي يابت قلت ليها يمكن زمنا غير زمنهم .

وصلت الشبكه وفتحت الفيس لقيت محمد م منشط اخر مره نشط قبل قريب ساعه ،، قلت ليها م منشط قالت لي م قلت ليكي بكون نام ... قلت في نفسي الخط كان فاتح وسمع كلامنا وبعدا نام سبحان الله فكرتو آكل همنا ، طلعت منو وبقيت ابحث عن المنطقه دي قلت نشوف مكان بعيد شوية عن زحمة الناس نقعد فيهو لمن نشوف البحصل شنو ،، لقيت عروض كتيرة للبيوت والإجارات وكدا وآخر شيء لقيت واحد عارض بيت صغير كدا مصورو من الخارج في منطقه بعيده شوية من قلب العاصمه والزحمه ، دخلت ليهو خاص وصف لي وقلت بكره نمشوا نشوفوا وقفلت التلفون على كدا عاينت ل سماهر لقيتها راحت في سابع نومه ،، بقيت اعاين ليها قلت سبحان الله يا صديقتي شوفي الدنيا دي عملت فينا شنو بس انا مع اللخمه نسيت اسألك انتي كويسة وإن شاء الله الحقير جون م اذاكي سامحيني ... ونمت جنبها شالتني نومه صحيت على خبيط شديد في الباب قمنا مخلوعين سماهر قالت لي إن شاء الله م يكونوا وصلوا لينا ،، قلت ليها روقي إن شاء الله م يكونوا ديل هم ولسه الخبيط على الباب بعلى بزياده قبل اقوم من السرير عاينت للساعه لقيتها عامله 4 ص قلت استر يارب.

قمت من السرير بخطوات بطيئه مشيت على الباب سمعت صوت بس م كان واضح ،، عاينت برا قبل افتح لمحت زول واقف وفي وقفتو تحسو م طبيعي كدا مايل ويترنح قلت لا م ح افتح كان في تلفون ثابت رفعت السماعه واتصلت لخدمة الغرف وبعد كم ثانيه سمعت صوتهم برا ،، فتحت الباب لقيتهم ماسكين الزول شكله واحد من النزلا لكن كان سكران ساقو معاهم واعتذرو مننا ومشوا سماهر قالت لي والله البلد

الفصل الثالث عشر من هنا