رواية بدون سابق معرفه الفصل السادس عشر 16 - بقلم دانيا

رواية بدون سابق معرفه

الفصل السادس عشر16

بقلم دانيا

فتح الشبكه وقال ياالله ريان مالها م منشطه كنت عاوز اسألها من المكان الهم فيهو وين بالضبط ... بس م مشكله قربت اصل المسافه دي احتمال تفتح الشبكه او اشوف لي اي زول اتصل من تلفونو .

بهناك امي كانت قاعدة في المطبخ مع روان فجأة ختت يدها على صدرها وقالت ل روان قلبي م مطمئن الليله والله ... كدي شوي عزام دا ناديهو لي خلي يديني ريان اتكلم معاها ،، قالت ليها حاضر وطلعت مشت الصالون لقت عزام مافي ابوي قاعد براهو بسبح ... قالت ليهو ابوي عزام مشى وين امي عاوزاهو ، قال ليها طلع جاهو صاحبو وطلع معاهو .. اثناء ما بتتكلم مع ابوي سمعت صوت امي بتنادي مشت عليها ،، قالت ليها بسم الله امي مالك ؟ وبقت تنادي ياابوي "ابوي" امي تعبت .

اثناء ما نحن واقفين على حافة الجبل في واحد من الناس ديك كان قريب مننا شديد ورافع مسدسو علينا ... بقيت اعاين ليهو واعاين للوادي تحت وقبل ما الحق استوعب حاجه سماهر فكت يدي ودنقرت شالت عود من الأرض ومشت بيهو على إتجاه الزول ... قلت ليها لا يابت وقبل اتم كلامي رفعت العود عاوزة تضرب الراجل في يدو ،، سمعت صوت ضرب لمن قلبي رجف وفجأة سماهر وقعت قدامي عاينت ليها من الصدمه لمن حسيت الرؤيه بقت طشاش والراجل كان قدامي لسه ماسك المسدس وهو زاتو مخلوع ومنطط عيونو ... ماهم المفروض يقبضونا عايشين .

عاينت ل سماهر من غير ما احس رفعت العود الجنبها وضربت الراجل في يدو ... المسدس وقع شلتو ومن غير تفكير وجهتو عليهو وبقيت اضرب وكلي غضب ،، طلعت منو اربعه رصاصات وكلهم جات في بطن الراجل الحيوان دا وفجأة وقع على الأرض ... نزلت تحت قعدت جنب سماهر ودموعي شلال شلال ، هي كانت لسه واعيه بقت تقولي لي بصوت متعب اهربي انتي انا خليني .. قلت ليها مجنونه انتي .

اثناء ما بتكلم معاها جات شرطة المنطقه وحاوطت المكان ... مسكوا باقي الجماعه وباقي منهم هربوا ،، الشرطه جات لقت الزول واقع جنبنا وبهنا سماهر واقعه متصاوبه في بطنها يلا بتتكلم بتعب ... وانا كنت قاعده جنبها وبتكلم معاها وببكي ونسيت إنو المسدس لسه في يدي ،، جوا اتكلموا مع بعض وفي واحد اتصل بالإسعاف والتاني جاء مسكني من يدي ، بيدو الكانت ملبسها جونتي .. شال مني المسدس وختاهو في كيس واشر لزميلو المعاهو بيدو طوالي جاء مسكني من يدي وقفت على حيلي ومن غير اي مقدمات كلبش يديني انا ياداب انتبهت بقيت بحاول ابعد عنو وافك يديني قلت ليهو انا م عملت حاجه دي صحبتي خليني امشي معاها المستشفى اطمئن عليها انا ما مجرمه ... هو ولا كأنو سامعني سحبني من يديني واتحرك وانا كنت ماشه وراهو وببكي وبعاين ل سماهر الخلاص اغمى عليها من الوجع .

قلت ليهو عليك الله خليني ماشي بي وين قلت ليك دي صحبتي لازم اسعفها للمستشفى انا م عملت شيء خليني ارجع ليها لو ماتت م بسامحكم .... وهو ارتو كان بسمع ، هو بسمع بس شكله م بفهم عربي .. بعاين لي بس وانا بقيت اعاين ورا لسه لمكان سماهر واقعه والضلام سد المكان بقيت م شايفاها ،، بعدها وصلنا مكان عربية الشرطه ركبوني ودورو قبل يبعدوا شفت الإسعاف جايه عقبتنا مشت لمكان الحادث قلت الحمد لله ،، اتحملي يا صديقتي وبقيت ابكي قلت وينك يا عم جوزيف معقولة م يكون سمع بالحصل إن شاء الله محمد يصل مكان عم جوزيف ويتلاقوا .

ابوي وروان ودو امي المستشفى واتصل ابوي ل عزام عشان يجيهم في المستشفى ... قال ليهو مسافة الطريق خمس دقايق وبكون معاكم ،، منتظرين نتيجة الفحص تطلع عزام جاء امي من شافتو قالت ليهو تعال يا ولدي اتصل لأختك ريان خليني اطمئن عليها انا قلبي مقبوض م عارفه مالي اكيد بتي ريان م كويسة .. اتصل سريع ياولدي قال ليها حاضر ياامي ثواني بس فتح الشبكه رسل رساله مشت لكن لقى اخر ظهور قبل سته ساعات حس بالقلق لكن عاين لأمي الكانت قاعده على اعصابها ... وقال ليها ياامي م تشغلي بالك هسي انا كنت بتكلم معاها سبحان الله قلت ليها بديكي تتكلمي معاها لمن اصل قالت لي كويس ،، بس هسي لمن فتحت الشبكه لقيت منها رساله قالت لي مشغولة شوية برجع ليكم .. امي للحظه اتطمئنت قالت ل عزام عليك الله ، انت م بتكذب علي صاح ؟ داير يرد ليها الدكتور ناداهم قال نتيجة الفحص طلعت مشوا عليهو قال ليهم ح نركب ليها دربات حالياً هنا وتمشي تأخد باقي الجرع في البيت.

عزام شال الروشته وطلع وروان ساقت امي دخلتها العنبر ... ابوي طوالي جاء طالع وراء عزام قال ليهو يا ولدي كل الأمور تمام؟ اتلفت عليهو بدهشه وقال ليهو بالنسبه لشنو ياابوي ؟ قال ليهو انا لاحظت ليك اتوترت لمن فتحت التلفون بس قلت كلامك عشان م تتعب امك وتمرض زيادة .... في شنو ياولدي ؟ قال ليهو صراحه ياابوي ريان م منشطه بس م تشيل هم محمد الزمن دا وصل ح اتكلم معاهو واشوفو اتلاقى بيهم ول لسه ... ابوي قال ليهو طيب انت اتكلم مع محمد وهات الروشته انا بجيب الدواء من الصيدليه.

بهناك محمد بعد تفتيش واسئله كتيره حتى عرف محل الكافي جاء سأل الموظفين .... قالوا ليهو ريان طلعت بدري قال ليهم بتعرفو ساكنه وين قالوا ليهو لا انتظر العم جوزيف هو بعرف ... قعد وطلب قهوه قال اشرب قهوه مسافه العم يجي ،، بقى ماسك تلفونو وبطبز قال غريبه البت دي مالها م عاوزة تنشط عشان انا جاي ولشنو ،، القهوه جات شرب وقعد للساعه 10 م لسه العم م جاء تاني سأل منو قالوا م بعرفوا مشى وين .. جاء جرسون ماري بجنبو قام قال ليهو عن إذنك اتصل لي للعم جوزيف ،، الجرسون اتصل واداهو التلفون ومشى الخط فاتح بس مافي رد .

العربيه وصلت المركز دخلوني السجن وانا لسه اترجى فيهم عشان يفكوني امشي المستشفى ل سماهر ووشي كله دموع ... قالوا منتظرين مترجم يجي عشان التحقيقات .. دخلوني جوا وقفلو علي براي ومشوا خلوني بقيت ابكي بحرقه ،، وبقول يا حليلك يا سماهر يارب كون معاها يارب ... وينك يامحمد معقولة لسه م وصلت ، لو وصل كان عرف بالحاصل وجاء السجن ... سمعت صوت عالي برا بعد شوية جاني شرطي ووراهو كان عم "جوزيف" عاينت ليهو قلت ليهو عم "جوزيف" وبقيت ابكي قلت ليهو اشرح ليهم إني م عملت حاجه عصابة جون هم السبب

الفصل السابع عشر من هنا