رواية بدون سابق معرفه الفصل الرابع 4 - بقلم دانيا

رواية بدون سابق معرفه

الفصل الرابع4

بقلم دانيا

اثناء ما بنتكلم جاء محمد داخل قال صباح الخير ، ابوها يوافق على شنو؟ طوالي علياء وسماهر ضحكوا وقالوا ليهو جاها عريس وبقن يتوشوشن مع بعض ،، عاين لي عين حاره وطلع مشى قلت ليهم المزح التقيل دا مافي داعي ليهو قالن لي معليش سماهر قالت لي بعد دا نمشي صاح عشان نجهز امورنا....عاينت ليها معاينة حقارة قلت ليها قولي بسم الله يابت والله لمن تجتمي انتي وعمتي كوثر دي غير إنكن توقعن ريان دي في مصيبه م بتقدرن ل شيء وبقينا نضحك عمتي قالت لينا تمشو شنو لو م فطرتو مافي مشيه ،، سماهر قالت ليها هيي والله تاني يحرموني المرقه اصلاً اتأخرنا نحن المفروض نطلع من قبيل هسي الساعه قريب تسعه قلت ليها خلاص ورح نلم حاجاتتا مشينا لميناهن وطلعنا .

لينا محمد واقف برا من شافنا كشر وشو وقال لينا اركبو ح اوصلكم ،، عاينت ليهو كانت ملامح وشو م بتتفسر قلنا لعمتي يلا مشينا والموضوع دا انا م بفتحو مع ابوي ، كله عليكم انتوا قالت لي خلاص انا بجي بتكلم معاهم بعدين ركبنا في العربيه وسماهر طول الطريق صارعاني بالموضوع ،، محمد قال ليها قصدك شنو انتي؟ قالت ليهو اعتبر إنو جاتنا منحه انا وريان عشان نقرأ برا وبدأت تشرح ليهو في الكلام....وجه المرايا علي وعاين لي قال لي يعني م عريس صاح؟ طوالي هي ردت ليهو قالت ليهو لا عريس شنو كنا بنمزح معقولة من قبيل قالب خلقتك عشان كدا ،، عاينت ليهو ياداب حسيت وشو ابتسم ورجع طبيعي قال ليها كان كدا معليش .

الموضوع لو طلع حقيقي كويس م كعب مالو ول شنو ياريان ،، عاينت ليهو في المرايا لقيتو بعاين لي ، قلت ليهو انت كمان شايف كدا معناها خلاص يا سماهر اعتبرينا سافرنا من هسي امشي رتبي شنطتك وامورك....بقوا يضحكوا قالوا لي انتي كويسة يابت وين ريان البتتحمس لأقل شيء ؟ لمن هسي دا يعتبر حلم العمر ليه م متفائله ابتسمي شوية ، قلت في نفسي يمكن انا مكبره الموضوع ساي طوالي بقينا نتونس ونضحك طوال الطريق بعد ما وصلنا سماهر نزلت جنب بيتهم وانا بيتنا قدام شويه ، محمد قال لي تعالي اركبي قدام جيت قال لي انتي كويسة ؟ قلت ليهو كويسة ااي .

وصلنا بيتتا نزلنا هو مشى لناس ابوي في الصالون وانا مشيت سامعه صوت ناس امي في غرفتها مشيت ليهم لقيت امي راقده في السرير وروان قاعده جنبها ،، سلمت عليهم قلت ليهم امي مالها مالك ياامي نايمه للزمن دا انتي كويسة؟ قالت لي كويسة لكن وقعت في الحمام ورجلي واجعاني قلت ليها كيف وقعتي ومتين هسي حاسه نفسك كيف مشتي المستشفى ؟ روان قالت لي وقعت في الحمام البرا شكلها مريم دفقت الصابون في الحمام وامي م شافتو عشان كدا وقعت ،، قلت ليهم طول فترة ساره قاعده م حصل عملت كدا البت الجديده دي اصلاً قلبي م ارتاح ليها طلعوها سريع م عاوزنها اثناء ما انا بتكلم جات داخله وطبعاً كالعاده من غير اي حركه .

اتلفت عليها لمن اتخلعت لمن شفتها قلت ليها يابت في شيء إسمو باب بندقوا حتى بنخش الحاجه دي م اتعلمتيها طبعاً دا غير إني مستغربه إنتي كيف خطواتك من غير صوت ؟ سكتت ودنقرت راسها كانت شايله كوريه في يدها قالت جبت الشوربه للست ،، طوالي امي عاينت ليها وقالت ليها جيبيها ختيها في التربيزه شكراً يابتي....روان مسكتني من يدي قالت لي عيب يابت دي م غلطتها عادي بتحصل حاجه زي دي ،، عاوزة ارد ليها في زول دق باب الغرفه طلع دا محمد قال سلام عليكم عمتي كيفك جاء سلم لأمي وكفر ليها وقال ليها هسي كيف إن شاء الله احسن ؟ قالت ليهو كويسة امبارح الدكتور صرف لي مرهم بستخدم فيهو .

طلعت مشيت غرفتي جاتني روان بقيت احكي ليها عن الحصل ،، العصر كدا كنت نايمه سمعت صوت اقدام ماشه بطريقه كدا وقع النعال كان عالي قمت مخلوعه قعدت في نص السرير باب الغرفه دق قلت ادخل ،، جاتني مريم دي داخله عاينت لي بنظره حاده قالت لي بنادوكي للغداء وطلعت مشت ونفس صوت الخطوات....بقيت منططه عيوني قلت دي عشان علقت عليها خلاص بقت تطلع اصوات غريبه اصلاً البت دي كلها غريبه ،، مشيت اتغدينا في غرفة ماما اثناء ما قاعدين عمتي جات ومعاها بتها علياء بقينا نتونس وحكت لأمي عن الحاصل ناس امي برضو اتحمسو بس القرار الأخير لأبوي.

بعد الغداء مشت لأبوي بهناك وبقت تحكي ليهو ابوي قال مافي مشكله لكن اول شيء نتحرى عن الموضوع ،، بالليل اثناء ما انا نايمه في غرفتي بقيت اسمع نفس صوت خطوات مريم صحيت مخلوعه فجأة الصوت اختفى....قمت مشيت الحمام لمن جيت طالعه تاني سمعت نفس الصوت قلت البت دي مش مشت ؟ للحظه حسيت بخوف مسكت مكبس الباب عاوزة افتح الباب عشان اطلع حسيت بحاجه مسكتني من رجلي سحبتني لمن وقعت ، بقيت اعاين حوالي بخلعه لمحت مريم كانت واقفه وراي وفجأه اختفت ،، بقيت اصرخ جوا الحمام وم قادره اقوم ، جوني ابوي وروان جاريين قالوا لي بسم الله مالك يابت؟

رفعوني وصلوني السرير بقيت ابكي قلت ليهم دي مريم ياابوي انا م قلت ليكم البت دي م كويسة ،، ياابوي رمتني جوا الحمام يدي واجعاني شديد ولسه ببكي جاء عزام قال لي اها مالك يابت انتي غير الدرما م بتعرفي ل شيء؟ سافري ريحينا عليك الله امبارح نمنا مرتاحين ، ابوي قال ليهو اسكت ياولد ، روان قالت لي يابت قولي بسم الله مريم دي طلعت من المغرب انتي شكلك بتهضربي....قلت ليها والله شفتها بعيني دي ،، الصباح عمتي اتصلت لأبوي قالت ليهو اها بقيتو علي شنو ؟.

ابوي واهل سماهر وافقوا والمرا جهزت لينا كل الإجراءات وبعد اسبوع سافرنا ،، ودعنا اهلنا وطلعنا على طول اتصل لي محمد وطول الطريق كان بتكلم معاي لمن وصلنا المطار....بس من هنا حسيت نفسي كأنو منومه تنويم مغنطيسي دخلنا بوين وطلعنا بوين وركبنا الطياره متين والسفر كان كيف دا كله جزء ممسوح من زاكرتي تماماً وعيت على نفسنا طلعنا من مطار دوله م عرفتها دي يات دوله وكان في عربيه واقفه برا طلعنا فيها....وصلنا لبيت عباره عن عماره تعاين ليها تصقع لمن تفتر م تشوف نهايتها وين ،، لحد الباب هنا نحن كويسين بس.

فجأة م لقيت نفسي غير نايمه في غرفه كبيرة مزينه بطريقه غريبه قمت مخلوعه قلت انا كيف وصلت هنا؟ مش كنا في الباب؟