رواية بدون سابق معرفه الفصل الخامس 5 - بقلم دانيا

رواية بدون سابق معرفه

الفصل الخامس5

بقلم دانيا

فتحت عيوني عاينت فوق لقيت سقف قمت مخلوعه وبقيت اتلفت زي المجنونه انا الجابني هنا شنو مش كنا تحت في المدخل؟ نزلت من السرير مشيت على الباب مديت يدي عاوزة افتحو م فتح معاي للحظه حسيت الخوف اتملك كل حواسي وجسمي رجف قلت ليه الباب مقفول؟ مشيت على الشباك زحيت الستاره عاينت برا غير العمارات كل واحدة اطول من التانيه م شفت شيء ،، عاينت تحت شدة ماني فوق الناس الماشين في الشارع ديل بشوفهم قدر القطط.

مشيت على الباب بخطوات هاديه وقفت جنب الباب وبقيت ادق في الباب عشان يفتحوا لي واقدر استوعب الحاصل شنو ،، بعد شويه سمعت صوت خطوات جايه على الباب قلت الحمد لله واخيراً اقدر افهم الحاصل رجعت خطوتين من الباب للورا ، طوالي الباب فتح جاتني داخله مرأ في نفس طول وحجم المرأ السافرنا معاها بس مانفس الملامح....هي دخلت من دون سلام ولا كلام وانا بقيت واقفه جنب الباب بعاين ليها قلت في نفسي دي منو كمان ؟ تاني قلت يمكن دي اخت حاجه حواء ، قاطع تفكيري صوت الباب القفل فجأة وبشده رقم إنو المكان صاني وم فيهو هواء ساعة قفل لمن جسمي رجف من الخلعه.

مشيت عليها وقلت ليها عفواً انتي منو ووين سماهر؟ عاينت لي بنظره جامده نفس نظرة حاجه حواء للحظه اتسرب الخوف جواتي ،، قالت لي وبكل برود سماهر منو ؟ ول قصدك مناهل؟؟؟ قلت ليها بإستغراب مناهل منو ياخ انا قصدي صاحبتي سماهر الجات معاي طيب وين حاجه حواء هي يمكن بتعرف....المرأ قبلت مني وبقت تضحك بطريقه مستفزة قالت لي انا زاتي حاجه حواء دا لو كان إسم حواء حقيقي ،، نطتت عيوني كبار وبدهشه شديده قلت ليها قصدك شنو ؟

قالت لي بتفهمي بياتو طريقه انتي ؟ انا م اسمي حواء اسمي زينب عاينت ليها بعدم تصديق قلت ليها ووشك ؟ قالت لي وشي مالو لو عجبتك حاجه حواء هسي برجع ليكي حواء مافي مشكله ، قبل انطق بحرف قبلت مني وتاني اتلفتت علي رجعت زي ما قالت حاجه حواء....انا من الزهول قربت اقع من طولي حسيت رجليني م شايلني م قدرت اتكلم حسيت لساني اتربط ، في اللحظه دي جات علي ورمت جوازين سفر في وشي شلتهم عاينت ليهم ، نفس صورنا بس الإسوم مختلفه وزي ما قالت كاتبن مناهل بدال إسم سماهر ،، وفي محل إسمي كاتبين تبيان بدال ريان ، انا للحظه حسيت راسي بقى تقيل .

قلت ليها دا شنو والقصد منو شنو ؟ قالت لي م تستعجلي لاحقه تعرفي وطلعت وقفلت الباب ،، بقيت ادق في الباب واكرك ليها تجي تفتح بس بدون نفع ، حسيت الدنيا ضاقت بي بقيت افكر ياربي هي منو وعاوزة مننا شنو؟ طيب وين سماهر ياربي ودوها وين حسبي الله ونعم الوكيل....اول ما قلت كدا حسيت بحاجه من فوق خبطت راسي لمن بقيت اشوف طشاش ،، للحظه جسمي كله رجف وبقيت اصرخ فجأة الباب فتح وجاء داخل شاب اصفر نحيل وطويل ودقنو خفيف ولابس نظارة وقاطع نص ووراهو جات داخله المرأ الشيطانه دي.

عاينت ليهو وانا ماسكه راسي بخلعه وم مستوعبه الخبط راسي شنو ،، جاء داخل طلع النظاره وبقى يعاين لي من فوق لتحت وانا بقيت اعاين ليهو بإستغراب قلت دا منو كمان....وبحركه سريعه دار وشو على المرأ وقال " المره دي جبتي شغل نضيف ياامي " من سمعت كلام دا حسيت اطرافي بردت قلت ليهم انتوا منو وقصدك شنو انت ؟ جات وقفت قدامي وقالت لي قصدو ح تجيبي لينا دولارات كتيرات والإتنين بقوا يضحكوا ،، في لحظة غضب دفرتها بعدتها مني قلت ليها انتي متخلفه دولارات شنو وين الجامعه الجينا عشانها ؟ قالت لي جامعه شنو والله انتوا ناس مساكين .

عاينت ليها بغضب قلت ليها قصدك شنو يعني وين سماهر للمره الالف ؟ طلعت قروش من شنطتها ورمتهم في الجو قالت لي دا تمن سماهر تبعك العامله لينا بيها وجع راس دي ،، انا اصلاً م جبتكم للجامعه ولا بعرف لي جامعه هنا....جات دنقرت فيني قالت لي جبتكم تجاره ،، كلامها دا نزل في قلبي زي الصاعقه قلت ليها حسبي الله ونعم الوكيل فيكي يا خبيثه واول ما قلت ليها كدا حسيت بي كف قوي على وشي لمن اذني صنت ،، بقيت اتلفت وانا في حالة صدمة كبيرة وبتسأل الحاصل شنو عاينت على اليسار حسيت كأنو الحيطه قاعده تتحرك في شكل تموج رجعت خطوتين للورا قلت لا يمكن عيوني زغللو وقبل اصرف نظري عنها طلعت منها قدمين بقيت فاتحه خشمي وبعاين م مصدقه البحصل سرعان ما طلع منها زول اسود سواد الليل .

من الخوف وقعت في محلي لمن صحيت لقيت نفسي راقده في السرير والغرفه فاضيه اتزكرت الحصل قمت مخلوعه وبقيت بعاين للحيطه ،، قلبي عمل شح وجسمي كله رجف ظهرت لي من حيس لا احتسب قالت لي لسه م استوعبتي إنو امركم اتحسم انتي وصحبتك تاني م ليكم لقاء كل عمركم وجيت ابشرك كريس لوخيس جاي يسوقك بعد اسبوع جيت اوريكي عشان ارفع معنويات شويه ،، قلت ليها انتي مفتكرة نفسك ح تنفدي يعني اكيد اهلنا ح يوصلو ليكي وح تموتي ابشع موته يا غزره وانا ح اصلي وادعي الله عليكي ينتقم منك .

قالت لي تصلي ؟ وانتي عارفه القبله وين عشان تصلي ؟ قلت ليها الله موجود في كل الإتجاهات وطالما إني م عارفه إتجاه القبله ح اصلي على اي إتجاه واكيد ح تُقبل مني وح ادعي عليكي ليل نهار ،، قالت لي جربي صلي عشان مريم هناك تشوف شغلها مع اهلك....قلت ليها قصدك شنو ؟ من وين بتعرفي مريم ؟ ضحكت وقالت لي وانتوا مفتكرين مريم جاتكم عبث مريم دي يدي اليمين واكتر جني انا بعتمد عليه ،، بقيت اعاين ليها بخلعه قلت ليها جني؟ قالت لي ايوه جني .

بقيت اتزكر في تصرفات مريم الغريبه لمن كنت هناك قلت في نفسي عشان كدا من جات م قدرت ارتاح ليها ،، قلت ليها وانتي عاوزة مننا شنو وإذا كنتي انتي اصلاً صاحبة عمتي كوثر ليه تفكري تأزينا وعلاقتك شنو بالجن ؟ قالت لي عمتك عمتك الغبيه الهبله جيتها على اساس صاحبتها وهي صدقت لكن انا اول مره اشوفها في الحفله اما بالنسبه لعلاقتي بالجن دي حاجه م بتخصك وإذا فكرتي مجرد تفكير تصلي وتدعي علي بتعتبري اهلك امرهم إتحسم وم تخافي صحبتك ح اخليكي تشوفيها بس م هسي.

طلعت مني بقيت بفتش في تلفوني م لقيتو والغرفه كلها م فيها تلفون بقيت قاعده بين اربعه حيطان ومحتارة اعمل شنو انا بقيت ابكي بحرقه