_بنات الغجرية _
( بقلم بسمة البياتي)
_البارت الواحد الاربعون _
اصال.. اليوم اربعينية بيبي الله يرحمها اني وجنة من الصبح رحنا البيت عمي الشيخ لان مسوين ثواب على روحها
صح وجودنا بهذا البيت غير مرحب بي بس شنسوي مجبورين نروح
جنة رادت تساعده البنات بالشغل عمة بيداء مقبلت كالت احنا جايبين طباخ وباقي الشغل البنات يسوونة انتي حامل كعدي معليج
اني اشتغلت شوية وجيت كعدت يمها صبو الغدا وكعدو يتغدون
همست الجنة ما اريد اكل نفسي متريد رايحة الغرفة بيبي اتمدد شوية
جنة.. ماشي روحي
... رحت الغرفة بيبي الي الحد هسه ريحتها بيها الله يرحمها صح ما عرفتها هواي بس حيل حبيتها
اكثر من عشر دقائق متمددة واباوع على السقف انفتحت بابا الغرفة باوعت الجهة الباب شفتة رضا كمزت من فراشي عزا بعينة هذا شجابة والله اذا شافونا وحدنا فضيحتي تصير على كل لسان تحركت بسرعة وصلت يم الباب اريد اطلع سبقي وقفل الباب
حجيت من بين اسناني انت اكيد تخبلت هاي اشدتسوي عوفني لاتسويلي مصيبة
.. ماكو طلعة قبل ماتسمعيني
... والنبي انت مو صاحي لك بابا شبيك البيت مكلوب من النسوان اذا شافونا شراح يكولون الخاطر ربك شرايد مني وشلون عرفت اني اهنا ليش الهدرجة سمعتي متهمك
... اكص لسانه اليحجي عليج لا والله موبس لسانة راسة هم اصال سمعني ماطول خمس دقايق واطلع
.... اوووف ياربي وافقت بس اريدة يطلع
... اصال اريد فرصة ثانية ارحميني وارحمي بحالي انه ضايع بلياج لا ليلي ليل ولا نهاري نهار اربعة وعشرين ساعة افكر بيج يابنت عمي احبج والحسين اموووت عليج
... عن ياحب دتحجي وشنو فرصة ثانية نسيت انت مزوج وزوجتك هي نفسها حبيبتك البعتني علمودها
وين راح حبك الها مو هاي مريمتك الجنت تعوفني واني عروس تطلع تحجي وياها نسيت شلون جنت تتغزل بيها وتتوسل حتى لاتزعل منك وتعوفك مو هي نفسها حلمك المستحيل
وتحقق و صارت حبييتك الك وبحضنك بعد ششتريد بس فهمني
... غبي وماقدرت النعمة الي الله منطينيها جنت ضايع وما اعرف شريد من رحتي مني عرفت قيمتج. وعرفت انه احبج انتي
مريم مثل ماكلتي شي صعب وردت احصلة ويوم الصارت الي فرحت بشهر العسل ومن خلص بعدها عرفت خسارتي جبيرة وحبج مسيطير على كل ذرة بيه
.... فات الاوان على هذا الكلام نجوم السما اقربلك مني
... حتى لو كتلج راح اطلك مريم
... داخلي فز شبيه ما ادري ليش فرحت ما ادري معقولة يطلكها على مودي
... هاا شو سكتي اصال انه ومريم دوم مشاكل لان تدري بيه حبيتج واريد ارجعج وهسه هي زعلانة عد اهلها
... واني شعليه بيك اطلكها تبقيها مشكلتك مو مشكلتي انت خسرتني وانتهى الموضوع
... هذا الكلام مايمشي عندي مستعد احارب الدنيا كلها الخاطرج واسوي المستحيل حتى ترجعيلي وعد ادللج واكعدج بيت وحدج بعيد عن امي بس انطيني فرصة
... خلصت الخمس دقايق وخر اريد اطلع
... هسه راح اعوفج اطلعين لان متاكد مصيرج تردين الحضني ونرجع ننجمع بغرفة وحدة راح اطلك مريم واطلبج من جديد وبهذاك الوكت اخذج من عيون الكل
... مجاوبتة طلعت واني وجهي صاير نار ركضت على الحمام غسلت وجهي
داخلي يركص من الفرح معقولة رضا راح يسوي كل هذا علمودي يعني رضا يحبني
فرحت وقررت انطي فرصة اذا صدوك طلكها واخذلي بيت وحدي ادري بنفسي بعدني احبه
طلعت من الحمام ظليت اتلفت خوما اكو احد. هم زين بعدهم ملتهين يتغدون محد شافنة رجعت يم جنة باوعت عليه بشك
جنة... شبيج شو لونج مخطوف ؟
... هاااا مابية من دخلت غرفة بيبي اذكرتها وانقهرت
... الله يرحمها هو منو الممقهور عليها
.... خلصنا الغدا اني وجنة رجعنا للبيت والباقي راحوا للنجف يبقون يوم وثاني يوم يرجعون
اني مكدرت اروح علمود جنة ماكدر اعوفها وحدها لان باهر وياهم
مرت ايام واني غركانة بافكاري واخطط للمستقبل
بدت عطلة نصف السنة والحد هسه ماكو شي ورضا بعد مشفتة
باهر كل خميس يجيب مسواك ونسوي ثواب على روح بيبي وجدو
واني صاير بنكلادشية طلعت العطلة من خشمي
خلصت العطلة رجعت داومت تفكيري مشوش رضا وينة ليش اختفى جنت انطي الف عذر اكيد مشغول لو صارتلة مشاكل بسبب الطلاق وينتظر يحلها ويجيني
اليوم المغرب باهر طالع بس اني وجنة بالبيت اندكت باب البرة
جنة راحت فتحتة سمعت صوت عالي بالحوش
قبل لا اكوم اشوف منو دخلت ام رضا واختة الشرار يطافر من عيونهن
جنة... فهميني شبيج وشكو جاية تصيحين اذا مناوية تحجين عدل رجعي منين مجيتي
ام رضا... مو انتي التعلميني الحجي بدال هذا كلامج كعدي ربي بنت اختج وشوفيها شسوي ماتسوي من وراج وموبعيد انتي تدرين بيها وتشجعيها
اصال... عجوز البين لاتخليني امددج اهنا واهلس عطوبج اني متربية احسن من تربيتج رجليج بالگبر ولسانج ينكط سم
بنتها هدت عليها امها لزمتها
امال... ترحين فدوة النعال امي صدك جنا مغشوشين بيج
.. عوفيها يمه هذن حياية يكدرن يفرن السالفة ويطلعنا احنا الغلطانات مثل ماسوتها هالعكربة قبل
جنة... بالكعبة اذا ماتحجين هسه اخابر باهر اخلي هو يجي يشوف صرفة وياج
... بنت اختج لهسه مجايزة من ابني وتريد تهجم بيتة احنا ماصدكنة خلصنا منها ومن شرها رجعت هم تحوم عليه سمعي لج اذا ادنيتي من ابني افضحج فضيحة كشرة مو طلكج ووليتي بعد شكو جايتة تردي يرجعج على جنازتي اذا اخليج تصيريلة مرة
جنة...هو منو الجاي يم ابنج احنا الماصدكنة خلصنا منه ولو يظل اخر رجال بالدنيا ما اخلي اصال ترجعلة
ابنج الكاتل روحة عليها وجم مرة سوالها مشاكل وكل الناس تدري بهالشي روحي حاسبي ابنج الشفية مو جاية علينا هدادة
.... ابني معمي من سحورتجن يريد يطلك مرتة ويرجعها والحسين تحلمين بهالشي راح اخلي حسرة بگلبج وموتي بقهرج مريم حامل ورضا من عرف رجعها وطاير بيها فرح
.... ساكتة ما اعرف شحجي من كالت حامل ورجعها لو بيدي اشيل النعال واضرب روحي بي على غبائي ليش ميصيرلي درس منه ما ادري شلون دوم يكدر يضحك عليه ويقشمرني هم ما ادري الله ياخذني
قويت نفسي وجاوبتها يرجعها ميرجعها هذا شي يخصة اني مواعدتة بشي ولا منطيتة امل عود شوكت ماسمعتني كلت اريده هذا الوقت احجي مو جاي تحجين من كيفج
ويلا امال اخذي امج وطلعي قبل لا اطلع اخبالي عليكم
راحن وهنا يدردمن جنة اجت يمي
جنة.. احجي بصراحة شنو الموضوع ترى صارلي فترة شاكة بيج واجذب نفسي واسكت
.. كمت ابجي حجيتلها على كلام رضا كتلها استاهل كل السوتة بيه امه اني حمارة شلون صدكتة ورجعت اتامل منه خير وسعادة هذا گلبي لارعن يستاهل ينضرب طلقة
... ما اكدر الومج واعاتبج الي صار صار
وبعد اذا فكرتي بي راح تشوفين مني شي ميعجبج لج بنتي هذا حرام يتسمى رجال معندة كلمة يوعد ويخلف اكثر من مرة ضحك عليج وصدكتي
وهسه هم قشمرج بكلامة وتالي زوجتة حامل ورجعها هيجي بشر ما اعرف شلون حبيتي
.. لان غبية وطايحة حظ ومعندي كرامة
... هههههه هم زين تعترفين اصال اريدج ادوسين على گلبج وتنسي مفهوم اياج بعد تفكرين بي
.... وداعتج هاهية رضا من هاللحظة مات بالنسبة الي ولو بعد يجي يبوس قندرتي ما أريده
وفعلا من هاليوم الحب البگلبي اله تحول حقد وكره صرت ما اطيق اسمع اسمة
كملت هاي السنة وجنة دخلت بشهرها
جنة...فترة الحمل كولش تعبت منا وفات عمتي وحزن باهر وانوب طلعتلي سالفة اصال انكسر ظهري عليها ما اعرف شلون اشيل القهر من گلبها حجيت الباهر على سواية ام رضا وشلون اجت تتعارك وتهدد وهو كال المنصف ورايحين الاخوهم الشيخ معاتبي ومن يومها بعد لا شفنا رضا ولا امه
قبل لا اخذ سونار واعرف جنس الجنين باليل نايمة بحضن باهر سالتة شنو تتمنى يصير عدنا بنية لو ولد
... والله يابعد بيتي شيجي من رب العالمين نعمة ماعندي فرق بين البنية والولد
... همست اتمنى ولد ما اريد بنية
رفع راسي بيده وباوعلي بستغراب
... مامتوقعها منج ادري بيج ماتفرقين
... اكيد ما افرق بس اخاف اصال اتضوج اذا اجت بنية وتحس اجت التأخذ مكانها ويمكن تفكر تروح البيت ابوها باهر صح طفلي قطعة مني بس والله ما افضلة عليها
... اصال مو صغيرة وتعرف بيج تحبيها ومتعلقة بيها اكيد مراح تفكر مثل ما انتي تفكرين ومتاكد اذا صارت بنية راح تتعلق بيها وتحبها مثل متحبج
... ورة كم يوم سويت سونار ومثل متوقعت بيه بنوتة من بلغت اصال جنت مركزة بملامحها وانتظر ردت فعلها مابين بوجها غير الفرح وبدت تجهز وياي الها
بيوم ولادتي شفت الموت بعيني من ساعة وحدة اطلك للساعة خمسة الفجر الحد مصارت عندي ولادة
جبت بنوتي ما اكول اول فرحتي لان اصال تبقى فرحتي الأولى من انطونياها رضعتها حسيت بسعادة متنوصف هاي ثمرة حبنا اني وباهر وماخذة ملامحي وملامحة ابوها بس اكثر شي من ابوها مو مني عيونها عسليات وبشرتها حنطية وشعر اسود
بيداء... لا ماخذة لون عيونج ولا بياضج وشكارج ليش هيج
.... لاتحجين عليها والله حلوة
... خايية انه ماكلت مو حلوة بس لو تشبهج بعد احلى
... باهر جان طاير بيها من اخذها الحضنة عيونة نترسن دموع من رجعنا للبيت جاب ثلاث ذبايح ذبح السلامتي والها
دخلت للبيت اجت اصال تركض حضنتني وتبجين
... متت خوف عليج منايمة للصبح بس ادعليج
.... مابية شي ياعمري واني هم كومة دعيتلج
... مسحت دموعي فدوة العمرج تعالي ارتاحي اخذتها للفراش وين بنتج كالوا جكمة
دخل باهر شايلها كال منو الجكمة ولج
كتلة بنتك غير اشو جيبها واني احكم اخذتها. الحضني فدوة العمرها صغيرة وناعمة ملامحها تخبل بوستها سألتهم شسميتوها
باهر... سميناها رقية
... عاشت الاسامي ست رقية وزدنا نفر جديد وشراح يخلصنا من الواق وويق
جنة.... الحمدلله اصال فرحانة برقية ودوم بحضنها
اما باهر لوبيدة ميفاركها مكابلها وكاعد اذا بجت يتخبل
طلع اربعينها وبدت تنشنش كلما تكبر يوم ابوها يتعلق بيها اكثر
كتلة ترى زودتها ومن صدوك كمت اغار منها بنتك صارت الكل بالكل وامها انركنت على الرف واذا بجت تخبصني خبيصة علمودها
. هههههه من كل عقلج تغارين بوية انتي الاصل انه اذا احبها ومتعلق بيها لانها منج لو يصير عندي عشر جهال مأياخذون معزتج
... اي اصبغ بعد اصبغ لان تدري بيه فطيرة وبسرعة اصدكك
...بروح أمي موبس احبج انه اتنفس هواج وكل يوم من اصبح بوجهج احمد الله الي خلاج بدربي وصرتي حلالي وام بيتي
... اوووف ولا اكدرلك بكلمة منك ادوخ وانسى دربي
... ظلي دايخة الحد ما اودي رقية الأصال واجي ادوخ وياج وننسى دربنا اثنينا
... هههه لا اشاقة وياك صحصحت ظل كاعد بمكانك
... عادي صحصي من ارجع ادوخج من جديد
... ظليت اضحك على سوالفة اخذ رقية الاصال واجاني ملهوف ضاع وضيعني ويا برومانسيتة وحنانة
اصال... بدة دوامي هاي السنة الأخيرة الي ذبيت جهدي على الدراسة وبوقت الفراغ حاطة رقوشة على گلبي وافتر بيها
اموت عليها من يجي باهر اني ويا معارك علمودها وجنونة تفر بيدها اتكول لا العم يكبر ولا بنت اخو
كم مرة من رجعت من الدوام لمحت رضا يم بابهم من يشوفني عينة تظل على سيارة الخط
واني اسوي روحي مشفتة
كاعدين نتغدا جنة كالت اخذي اجازة نروح البغداد
عاا صدوك والله شوكت
... قبل عرس دعاء ومناك هم نبارك الاميرة وناخذلها هدية
... بنات خالة وحدة جرت اللخ
... اي الله يسعدهن
... شلون قنعتي باهر مو جان ميقبل
... اوو اسكتي وخليها بالكوة قبل يكول اذا رحتي اكيد زوج اميرة يمهم ويشوفج
... خرب شلون تفكير وانتي وين راح تشوفي الخاطر الله ليش مينسى رجال طلبج وانتي موافقتي وهسه صار زوج صديقتج بعد شكو يفكر بالماضي
... اني ادري من يوم الزوجت وهو حارمني من روحة بغداد
... يلا المهم هسه وافق
... لاتفرحين هواي نبقى يوم واحد ونرجع ثاني يوم وهو ويانه
.. عادي هم نعمة المهم نروح
سافرنا البغداد وشفنا خالة والبنات اويلي اشكد مشتاقيلهم امبرة ازوجت خال زوج ثناء نفسه الي طلب جنة بالبداية اميرة رفضتة
اكثر من مرة اتقدم عليها يلا وافقت
الصالون باعوا وبفلوسة كامل فتح اسواق
ظلينا يمهم يوم كامل تونسنا وثاني يوم رجعنا
اليوم رقوشة مصخنة باهر وجنة العصر اخذوها للطبيب ظليت بالبيت وحدي كاعدة ادرس دك فوني رقم غريب
مجاوبتة رجع اتصل اكثر من مرة كلت خلي اجاوب واشوف منو فتحت الخط وخليتة على اذني
سمعت صوت اكثر بشر صرت اقرف. واضوج منه
رضا.. الووو انه رضا شلونج اصال
... عطت لك انت صدوك واحد متستحي منين جبت رقمي وشرايد مني ششنو ابتليت على عمري صرت بنت عمك
.... لاتصيحين اسمعيني اريد احجي وياج
... شششتحجي اكيد عندك كذبة جديدة وفلم جديد اول مرة اشوف رجال هلكد يحب الاهانات ولو انت شجابك على الزلم عار وفاشل وحقير
... بنت الكلب انعل ابوج لابو شرفج على منو تغلطين اذا ماجيت دست راسج بالقندرة فلا اتسمى رضا
... رجال واوصل يمي
سده بوجهي كمت ارجف عززا هذا بس لا صدوك راح يجي ركضت قفلت كل البوب واتصلت على بابا حجيتلة كال لاتخافين انه اتصرف
للمغرب اجوي جنة وباهر ومن شكلهم مبين عدهم علم بالصار ورة شوية بابا هم اجة والعرفتة لازم رضا مشبعة كتل.
منصف... اصال امشي وياي للبيت لشوكت تبقين وعايفة بيت ابوج
باهر... وين تروح قابل باقية بيت غريب توكل على الله خوية اصال ماتطلع منا واذا خايف عليها بنتك امانة بركبتي وحتى دوامها اوديها واجيبها بنفسي
جنة... فدوة ابو اصال عوفها والله ما اكدر بلياها حتى رقية متعلقة بيها
منصف.... شنو رايج تردين تبقين اهنا لوتجين وياي
... جيت كعدت بصفحة وحضنتة بابا حبيبي والله تعودت على العيشة اهنا اني مو يومية اجي اشوفك وانت هم تجيني فدوة عوفني براحتي
... ماشي بوية واي وكت يعجبج ترجعين البيت بيتج
بدلت خطي ورضا رجع اختفى وبعدها بفترة رايح معتذر من بابا وبايس ايده كايلة لاتزعل مني بعد ماعليه بيها
جنة.... قبل المغرب اتصل عليه باهر لان جان طالع كال فتحي باب الاستقبال راح اجي ووياي خطار
فتحت الباب وظليت بالمطبخ ويا اصال احظر ضيافة
اصال... وكفت يم شباك المطبخ فتحت شوية من البردا واباوع كلت الجنة اجوي جانوا زلم مكدرت انتبة على شكلهم اكيد اصدقاء باهر
ورة شوية اجانة باهر شكلة مگلوب كال الجنة البسي حجابج وتعالي وياي
انصدمت هاي اشديصير معقولة باهر ياخذ جنة المكان بي زلم غربة
جنة... شنو اشدتحجين وين مدخلني ومنو هذولة؟
... من تشوفيهم تعرفيهم وقبل لاتدخلين اريدج تعرفين انه وياج وبظهرج
... متت خوف عزا منو هذولة لبست حجابي اخذني من ايدي فتت جنت مستحيه منتبهت على الوجوه لان اصلا ما اعرفهم ولا شايفتهم
اشديصير ما ادري من بين الموجودين اكو رجال جببر شعرة ولحيتة بيضة لا اراديا صفنت عليه وهو عينة بعيني رغم الكبر ملامحة واضحة اي اعرفة شلون انساه هذا الرجال الي يتسمى ابوية
بهذا اليوم اجروحي الطابن كولهن رجعن انفتحن حالي مثل حال الجابو سجينة حادة وغرسوها بگلبة.....
يتبع
مساء العافية
الخاطركم مراح اوقفها بس الله عليكم لاتضغطون عليه بالنشر وقدرو ضروفي ♥️
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!