رواية بنات للزمن الفصل العاشر 10 - بقلم سارة الشمري

الكاتبة : سارة الشمري✍🏻

مابينه انتفارك والعمر محسوب
اشما يفتر الميل اسنينه اتعدي
بعدك والشماته ارماح مسمومات
رمح وحشي اوحياتك ماخطن جبدي
اتحدى اليكول اعيوني بيهن ماي
دمع اجفاك بركت ناكته ابخدي
بطران اليكول ارتاح كون انساك
شريد انسه اوشبكتك ضاله ابزندي

مريم //

نزلت للديوانية الزغيرة من بعد ما گالتلي ريما ان راسم يريد يشوفني ..
دگيت الباب واجاني صوتة : تفضلي ..

دخلت وهو وگف ..
گعدت عالقنفة وهو حجة : شلونج مريم ..
هزيت راسي : الحمدالله ..

سكت شوية وبعدين حجة : ادري هالزواج صار غصباً عنج ومو بأرادتج .. بس اني عند كلمتي .. هالزواج ما راح يغير شي .. مجرد توقيع عالورق ..

سكتت وما حجيت شي ..
رجع حجة : اني راح اشوف شناقص بالبيت واكملة ومن بعدهة تگدرين تنتقلين بي ..

طبگت حواجبي : يا بيت .. ؟؟
راسم : بيت جدي الزغير .. الي جانو گاعدين بي عمي ضافر ومرتة رجاء الله يرحمهة .. ومثل ما تعرفين من تزوج هوة راح سكن بغير بيت .. وهذا البيت بقى فارغ .. واني گلت اعدلة واخليج تستقرين بي حتى تاخذين راحتج وهم تتجنبين نعمة ..

هزيت راسي انفي قرارة : اني ما اعوف بيت جدو .. وراحتي ما تكون الا هنا .. اذا تريد انت اكعد بالبيت ذاك .. واذا على نعمة ترة عادي تعودت عليهة وما صارت تأثر بية ..

سكت شوية وهو يتنهد : شلون يعني ؟ تبقين هنا ؟ زين العالم شتگول انتي ابيت ورجلج ابيت ..
رفعت عيوني الة : تعال انت اسكن هنا .. ترة ما تنحسب گعيدي لان هذا بيت جدك هم مو بس بيت جدي ..

باوعلي برفعة حاجب ..
رجعت حجيت : غير هالحجي ماعندي .. اني ماعوف بيت جدو ..

ردت اگوم وهوة حجة : عالعموم اني راح ارجع للسعودية .. ابقى اسبوعين او اكثر .. لازم اخلص اجرائاتي وانتقل لهنا .. وهالشي يطول شي فترة ..

هزيت راسي برسمية : تروح وترجع بالسلامة ..
راسم : الله يسلمج ..

طلعت من الديوانية وردت اروح لغرفتي بس صاحتني حبوبتي ..
دخلت للصالة لگيتهة گاعدة ويمهة زمن ..

استغربت من شافتني دخلت من جهة الديوانية : خير يمة وين جنتي ؟؟
مريم : حبوبة جنت يم راسم .. دز علية يريد يحجي وياي ..

ام حافظ : وشراد منج ؟؟
حجيتلهة على رادة راسم واني شجاوبتة ..
ام حافظ : والله يمة مادام انتي ما هاوية تعوفين بيت جدج ما بيهة شي يجي راسم يگعد هنا ..

وهم القاط الفوگ فارغ من بعد ما هادي وجبران گعدوا ابيت ابوهم ضلت غرفهم فارغة ..
عدلو القاط كلة واكعدو بي وحدكم ..

هزيت راسي بدون ما احجي شي وطلعت ..

صعدت فوگ صارت بوجهي جيلان ووياهة رضا  ..
ابتسمت من شافتني : مريم وين راح تروحين ..

مريم : مرايحة لمكان .. بس لبست حجابي لان جنت بالديوانية .. ليش رايدة شي گولي ؟؟

هزت راسهة : اييي .. اني ورضا اجتنة فكرة ..
رضا حجة بسرعة بحماس : نسوي كيكة بالبيت وناخذهة لجدو للمستشفى مادام صار زين ..

جيلان : بس عدنة مشكلة وحدة .. وهي ان ما نعرف نسوي كيك .. واني اذا جربت اطبخ اگلب المطبخ فوك جوة وبالتالي كلشي ما يطلع من ايدي ..

رضا : بس ماما تسوي كيك حيل وحيل طيب ..
جيلان باستة بخدة : فدوة للحيل وحيل اروح ..

ابتسمت : وتردون اسويلكم كيك مو ..
هزو روسهم ببرائة ..
مريم : يلة امشو كدامي للمطبخ ..

رضا رفع ايدة وصاح : فزززززززت ..
استغربت : بشنو فزت ..

رضا : خالة جلاتين (جيلان) گالت امك ما راح ترضى تسويلنة الكيكة لان تعبانة .. واني كلت ماما كل ما اگللهة اريد كيكة هي تسويلي ..

جيلان : وتراهنة .. اذا هو فاز نگعد نشوف كرتون تنانين فرسان قرية بيرك .. واذا اني فزت نشوف كرتون باربي ..

نزلت وهمة يمشون وراي ..
دخلت للمطبخ : ما عدكم شغلة ولا عملة تگعدون تتفرجون كرتون ..
جيلان : لعد شنسوي .. قابل وين نروح .. عالاقل اشغل بالي بيهن احسن من غير شي ..

هزيت راسي : فعلاً كلام منطقي ..
جيلان : وانصحج بهالشي .. المسلسلات كلة قصص حزينة وبجي واحنة گلوبنة خلصانة .. تابعي كرتون لان عالاقل كوميدي وهم تعرفين بي مو حقيقي وكلة رسم ..

طلعت المواد وهي وگفت يمي ..: شنو وشنو تستخدمين .. اريد اتعلم ..

جبت طاسة جبيرة وصرت احط المواد واحجي : اول شي البيض والبيكن باودر والفانيلا .. وتخلطيهن وبعدين تحطين كوبين طحين وكوبين شكر وكوب واحد حليب ونص كوب زيت .. تخلطيهن وبعدين تبدين تضيفين المي شوية شوية لحد ما يصير عندج قوامة ثكيل .. تحطينة بعدين بالقالب وتزينينة بالجوز او الزبيب لو مبروش ..

شلتهة وحطيتهة بالفرن وشغلتة : تحطينهة بالفرن على درجة حرارة ١٨٠ وتشغلين النار الجوة بس .. وورة ٣٠ دقيقة وبدون متفتحين الفرن تطفين الجوة وتشغلين الفوك وورة ١٠ دقايق تكون جاهزة ..

تباوعلي وهي ترمش : كلشي ما افتهمت ..
ابتسمت وهزيت راسي :ولا يهمج .. تتعلمين ..

دخل جبران وهو يشتم بالريحة : الريحة واصلة للباب .. شمسوين ؟؟ كيك ..
هزت راسهة جيلان : اييي مسوين كيك بس لا تحلم اخليك تتذوقة حتى .. هذا لجدو ..

جبران : جدي ما يصير ياكل هذا الاكل .. دسم .. وبي شكر .. ف خلوهة الي ..
ابتسمتلة : ولا يهمك .. اني اسويلك وحدة الك خصوصاً ..

جبران تقرب مني وباسني براسي : بعد روحي الاخيات .. مو هاي الي اول ما طبيت گبل كالت لا تحلم ..

جيلان : جوعي مال كيك .. باع اللواگة ..
دخل حارث وحجة : هسة شلون النة نصيب بالكيكة لو لا ..

انتبهت لجيلان گلبت وجهة من شافت حارث ..
دارت وجهة لرضا ومدت ايدهة الة : امشي خالة نروح نتفرج عالكرتون مالتك ..
اخذتة وطلعت من المطبخ كلة ..

التفتت لحارث : شبيهة من شافتك ضاجت .. خاف محاجيهة بشي ..

حارث عض التفاحة البيدة وحجة بنرفزة : شخبصتوني .. مساع ريما وهسة انتي .. هوة اني يمتة شفت البنية حتى اضوجهة .. هي من الله مطنگرة .. روحن اسألنهة هي مو اني ..

طلع من المطبخ وجبران التفت علية : هذا شبي ادور ..
رفعت اكتافي : علمي علمك ..

جيلان //

طلعت من المطبخ من بعد ما دخل حارث ..
مو بيدي اضوج من اشوفة ..
جا مو حقي ما شفت منة ولا موقف حلو ..

الدگة الناقصة مال التليفون ذاك اليوم ..
وهم تحرش بية من شافني بالكلية ..
وابسط شي كلام جدو عنة ويلقبة النسونجي واني ما حب هيج رجال واضوج منة ..
لهالسبب مجرد شوفتي الة تضوجني ..

گعدت يم رضا وهوة يتفرج بالابتوب ومشغلة الكارتون عالنت ..
التفتت لگيتة غافي عالقنفة ..

طفيت اللابتوب وشالتة بحضني ..
اخذتة لغرفة امة وحطيتة بفراشة ..

طلعت لگيت جبران برة ..
طلبت منة ياخذني اشوف جدو مادام دنيا العصر ..
هوة وافق رحت صحت ديلارا وريم وهنة فرحن ..  رحت بسرعة لبست شال وعباية وطلعنة وياه  ..

اخذنة للمستشفى ودخلونة علي ..
شصار بينة من شفنة حالتة ..
ريما وديلارا گامن يبجن .. اني هم صرت ابجي بس مو مثلهن .. طلعت ريما هم ام دميعة مثل ديلارا ..

جدو حضنة ويشم بينة بس الي گسر گلبي ان ما يكدر يحجي .. تعودت اسمع كلمة ورداتي منة ..

يمكن محد راح يفهم مشاعري بس ..
جدي هو الرجال الوحيد والسند الي عشنة علي طول حياتنة ..

لا ابو لا اخو لا عم لا خال .. هو الوحيد الي وگف ويانة وصرنة نشوف الدنيا بعيونة من يجينة ..
وهسة نشوفة بهالحالة .. حيل صعبة ..

رجعنة للبيت .. اني رحت لغرفة ريم الي گاعدين بيهة احنة وياهة حالياً ..
ذبيت عبايتي وشالي ..

نزلت عالدرج صار بوجهي حارث وهو يريد يصعد لغرفتة ..
شافني ورفع حاجبة ونزل الثاني : ليش ما لابسة شال .. ترة البيت ما فارغ على فكرة والولد يطبون ويطلعون ..

باوعتلة بدون اهتمام وببرود : اني اصلاً مو محجبة .. وانت تعرف هالشي لان شفتني من قبل اعتقد ..

باوعلي وهوة بعدة رافع تك حاجب : لعد ليش لبستي من اجيتي لهنا ؟؟

جيلان : اني لبست الحجاب من اجيت جان احتراماً لقدسية كربلا وادري ميصير نطلع بدون حجاب بشوارع كربلاء .. وحجابي بالبيت جنت لابستة لان اشوف البنات لابساتة وانحرج .. بس بالتالي كل شخص ويرجع لطبيعتة .. واني هاي طبيعتي .. صار معلوم ؟؟

عفتة مستغرب ونزلت للصالة ..

شافتني حبوبتي وصاحت علية : تعاي ولج جيلة ..
ابتسمت ورحتلهة : مو جيلة بيبي .. جيلان جيلان ..

هزت راسهة وما عاجبهة : والله اساميجن انتي واختج مدري شلونهة مگلبة .. ما تنحفظ .. جا شبيهن اسامينة يمة .. غير يخبلن ..

جيلان : ليش شبيهن اسامينة بيبي .. والله حلوات .. جيلان وديلارا اسماء كردية ..

عوجت حلگهة : هنة اسماء كردية لو اسماء رگاصات .. هسة بالله دولارا شني .. كفيلج الله اليسمعة ايگول اسم وحدة رگاصة مثل هاي المصرية التطلع بالتلفزيون ام العلج ..

ضحكت : بيبي لتحكمين عالشخص من اسمة .. وترة اسامينة معانيهة حلوة باللهجة الكردية ..

هزت ايدهة : ديلة يلة .. هسة نسيتيني عليمن صحتج .. ها روحي صيحي ريما خل تنزل تسويلي استكان جاي راسي منسطر .. ادور اجيتي انتي سطرتي بالزايد ..

رحت صحت لريم حتى تجي تسوي جاي لحبوبتي ..
شوية واجة رضوان گعد يم حبوبتي يسولف وياهة ..

الي انتبهتة ان رضوان وهادي اهدأ ثنين بالولد .. ومو دائماً يتواجدون بالبيت دائماً مشغولين ..

وراسم احسة عصبي يعني يخوف والي يشوفة يضطر يسكت ويحترمة .. ببساطة يفرض شخصيتة وهدوئة عالكل جبير وزغير ..

اما حارث وجبران اغنياء عن التعريف ..
ماشالله مبينة البرائة بيهم سبحان الله .. وجوهم تطرد النعمة .. رغم اشكالهم حلوة بس مبين عليهم نسونجية .. ما ارتاحيت لحارث خصوصاً ..

بقى نص ساعة رضوان وبعدين طلع ..
اني گمت للمطبخ صارت بوجهي ديلارا ..
وجهة احمر ومبينة ضايجة ..

طبگت حواجبي : شبيج وجهج احمر ..
ديلارا : رضوان جان هنا واني بدون حجاب ..
رفعت اكتافي : وشنو يعني .. قابل ميدرون احنة منلبس حجابات ..

ديلارا : مو هنا المشكلة .. المشكلة ان رزلني بطريقة غير مباشرة ..

هو دخل ومن شافني بدون حجاب طبگ حواجبة وحاجاني مبين معصب بس لازم روحة وگال ترة البيت بي شباب ولازم تلبسين حجاب ..

كتلة بس اني مو محجبة ..
گال واحنة بطبعنة نحب الحجاب وما نحب نشوف وحدة ابيتنة تفتر كدامنة بدون حجاب .. ومادام انتي هنا لازم تحبين طبعنة وتلتزمين بي ..

هزيتلة راسي انشالله ..
دار وجهة يريد يطلع بس گال وانشالله ما ضجتي بس جان لازم احجي هيج حتى تكون عندج فكرة وفرق بين كربلاء واربيل ..

لزمت ايدهة : عادي لتضوجين دلو .. اني هم قبل شوية حجة وياي هذا الي اسمة حارث على نفس الموضوع ..

ديلارا : اي جيلان بس والله استحيت من حجة وياي هيج .. تدرين بية ماعرف احجي مثلج .. وهم كلامة صح .. يمكن همة يستحرمون واحنة لا ..

حجيت بگلبي وين اكو نسونجي يستحرم ..
باوعتلهة : اووي عيني لتكبرين السالفة .. خلي شال على رگبتج ومن يجون البسي ومن يرحون ذبي .. وخلصت السالفة ..

عفتهة وطلعت .. گعدت بالصالة يم ريم ..
علاقتنة بريم حلوة .. وكلنا نعرف ان البنات اذا گعدن ساعة وحدة سوة يگلبنهة سوالف وضحك ..

شلون اذا جانن جم يوم وبنفس الغرفة نايمين وبليل نگعد نسولف وتعرفنة على بعض عن قرب اكثر رغم جدو جان يحجيلنة عنهة هواي ويحبهة كلش ..

حطيت ايدي على كتفهة من شفتهة صافنة : ريمي .. وين صافنة ..
حجت بدون تفكير : شيصير بية اذا فقدت جدو .. اني حتى ايام ماكدر على فراگة .. شسوي اذا فقدتة للأبد ..

جيلان : ششش اسم الله .. انشالله يگوم بالسلامة ويرجع مثل قبل واحسن ..

غورگت عيونهة : اني هم جنت اگول هيج .. بس من بعد ما شفتة اليوم وشفت حالتة .. خفت ..
جيلان اني حيل خايفة .. اخاف من الي جاي .. ماريد الوقت يمشي لان اعرف تاليتة شنو ..

حاولت اواسيهة بس اني اريد الي يواسيني ..
هيجت بگلبي الخوف والتوتر ..

قطع علية صفنتي صوت تليفوني ..
فتحتة شفت رسالة عالواتساب من رقم غريب ..

ما دخلت عالمحادثة بس اقرا من الاشعارات ..
مكتوب سلام .. ممكن تجاوبين ..
غلست ما رديت ..

رجعت اجت رسالة .. اني حارث ابن عمج ..
طبگت حواجبي بأنزعاج .. شهالجرأة ..
ما فتحت الرسالة هم ..

رجع دز .. ممكن تجاوبين على سؤالي ؟؟
اكلني الفضول .. دخلت عالمحادثة گتبتلة

خير ؟؟ وحطيت سمايل يباوع صفح 😒 ..

حارث : ليش تضوجين مني لهالدرجة ؟؟
قصدي يعني اني مسويلج شي ؟؟
ما اتوقع تكونين ضايجة وكارهتني من ورة موقف الجامعة لان موقف طبيعي وما جنت متقصدة ..

رديت : وانت ليش مهتم اذا جنت ضايجة منك او لا 🤨 .. بشنو زاعجك الموضوع وجاي تسأل ..

حارث : زاعجني لان كل الي يشوفج گالبة وجهج علية ايگلي شمسوي للبنية وهيج تضوج من تشوفك وعبالهم اني متعرضلج بحجاية او شي .. وهالموضوع بدة يزعجني لان كلشي ما مسويلج ..

ردت اگلة من موقف التليفون ولانك نسونجي بس هالشي يعتبر خصوصيتة واني مالي دخل بيهة ..

رديت : هيج من الله اضوج من اشوفك .. وجهك ما يساعد عالابتسامة .. وهذا جوابي .. بعد لا تدز لا يجيك بلوك لان هذا يعتبر تطفل لان اخذت رقمي بدون اذني ..

حارث : بس هذا ما يعتبر جواب .. ماكو واحد يضوج من شخص لهالسبب .. مو منطقي كلامج ..

كتبت : راح يجيك بلوك ..
وفعلاً ردت اسويلة بلوك بس دزلي رسالة : البلوك وسيلة الضعفاء ..

ابتسمت بيني وبين نفسي .. خوش لعد انت الردتهة ..

كتبتلة : اوك ..

حارث : شنو ال اوك .. مادام ما راح تسوين بلوك معناها جاوبي ..

وينج ليش ما تردين ..

شو تشوفين الرسالة وتغلسين ..

الووووو .. 

ترة ما حجيت شي اني .. مجرد سألتج سؤال وردت جوابة منج ..

يعني ما راح تجاوبين ؟؟

شدعوة هالگد راسج يابج ..

عمي لو مسويتلي بلوك هواي اشرف ..

هوة يدز واني مبتسمة .. كلت بگلبي ضل احجي وية روحك .. مو انت متريد البلوك ..

ليلى // بعد يومين ..

اليوم جمعة واحنة ننجمع ابيت جدو ..
گاعدات امي ومرت خالو ابو عجاج يسولفن وية حبوبتي ام  فاضل ..

واني والبنات ( ليلى .. شهد .. براء .. حنين .. اسماء ) كاعدين على جهة من الصالة ونسولف ..

شهد : لعد خالو رياض وين ؟؟ شنو طلع ..
اسماء : لا بغرفتة ..
حجيت بحماس : خل نروحلة بلكي يقبل يطلعنة ..

حنين باوعتلي صفح : عفية بنات ما تركد ببيوتهة .. شعندج سافة .. تدرين بحبوبتي ترضى نطلع بيوم الجمعة ..

براء : عود ردنة نگلة يطلعنة يشتريلنة لفات ووياهن سفن ..
حنين ارتخت : هاا .. اي هوة فوگ ..

ضحكت : ياختي انتي شكد تاكلين .. لو مرة بحياتي اريد اسمع منج كلمة ما اشتهي لو مو جوعانة ..

اسماء ضحكت : ومو هنا المشكلة .. المشكلة الاكل مدري وين يروح .. ولا يبين عليهة .. واني اذا اكل زيتوناية منا اسمن كيلوين منا .. والله حظ ..

حنين غمتهة : قل اعوذ برب الفلق .. تف تف تف من عينج وعين بت خالتج .. حسودات ..
باوعتلهة صفح : عليمن نحسدج يا بعدي .. هم ياريت حلوة .. كفشتج شكبرهة ..

حنين حركت شعرهة الكيرلي الي واصل لنص ضهرهة ..
باوعتلنة بغرور : موضة حبيبتي موضة .. شوفي هاي مريام فارس تدفع فلوس حتى يصير هيج .. بس اني من الله هوة موضة ..

شهد : والله انتي قافلة .. هسة اني شعري قصير وناعم بس يضوجني اذا اعوفة هيج ولازم ارفعة بقراصة .. وانتي شعرج كيرلي وثخين وواصل لنص ضهرج وتعوفينة مفتوح ..

براء دفعتهة من شعرهة : يختي لميهن لميهن اني من يمي راسي گام يوجعني .. حارة ..

حنين دفعت ايدهة عن شعرهة : عجييييييب .. شعليجن انتن والله عمي خوش .. اني احبة هيج ومرتاحة بي ..

تنهدت : والله الله يساعدة الياخذج .. لسانج شطولة واطباعج زفت ..
حنين : خلينة الاطباع الج عيني ام اخلاق .. والي يريد يتزوجني قابل اني دازة علي .. هوة بنفسة اجة وخطبني معناتهة يتحملني بكل اطباعي غصباً علي ..

سمعنة صوت خالي رياض وهو ينزل من فوگ : هذا يا مگرود اليتحملج ..
گمنة اني وشهد سلمنة علي ..

حبوبتي حجت وياه : وين رايح يمة ..
رياض : يمة رايح اجيب هويدة من بيتهة لان رجلهة مشغول ..
حبوبتي : بالسلامة يمة ..

طفرت حنين لزمت ايدة بترجي : فدوووة روضي خل اروح وياك ..
فتح عيونة على وسعهن : رووووضي ؟؟؟؟

كحت حنين بخوف من خزرتة : لا قصدي عمو رياض .. فدوة لا تخزرني والله اخاف ..
مرت شبه ابتسامة على شفايفة وكح حتى يضيعهة : احممم .. وخري خل اطلع ..

حجيت بترجي : فدوووة خالو خل نروح وياك والله ضايجين وهم نونس خالتي هويدة بالطريق ..

نتر بية : اي مو خالتج بالمريخ .. كلهة مسافة ربع ساعة وين الونسة بالسالفة .. وخرن ..

حنين وسوت نفسهة تريد تبجي وبرطمت : هاي شبيك عمو صاير ولا تهتم بينة وبس تصيح .. هو احنة شطلبنة منك .. قابل من نصعد وياك يطير نصــ ..

فتح عيونة هوة .. وهي انتبهت لحجايتهة قبل لا تحجيهة ..
كملت حجيهة وهي تتدارك الموضوع : احمم .. يطير نص البانزين يعني ..

باوعلهة برفعة حاجب : اهااا ..
باوعلنة بتفكير .. رجع حجة واشر على حنين : امشي شيلي كفشتج بالاول .. الجن خمس دقايق الي ما الگاهة بالسيارة اعوفهة وامشي ..

كمنة نتراكض وحدة تدعم بالثانية وهو يضحك علينة ..
هو طلع واحنة لبسنة عباياتنة وطلعنة لگيناه گاعد بالسيارة ..

حنين بقت اخر شي ..
اجت تركض ..: اوگفلي فدوة بس الم شعري ..
شمرت عبايتهة علية : الزمي ..

لفت شعرهة بسرعة بس هيهات ينلم كلة بالقراصة .. لازم اكو دعاديع طالعات منا ومنا لان ثخين وما متساوي وبي كسرة ..

خالي عاط بيهة : فضييييهة ..
كمزت هي : اي اي كملت والله ..
لبست عبايتهة وصعدت وطبگت الباب ..

حرك السيارة عمو ..
حنين تدفع بية حتى تسوي مجال لنفسهة : اييي وخري حصرتيني خل اكعد ..
كرصتهة : حنيييين .. لا تدفعين وين اروح قابل ..

كامت تهفي بحر : يمممة اختنگت .. شني هاي كلجن لازگات هنا والكرسي الگدام فارغ .. وخري خل اطفر ..

خالي رياض عاط بيهة : دجررربي اطفري خل اشوف ..وعلي اسحلج من گفشتج .. محد گالج تعاي ..

سد الجامات وطفى المكيف : موتي من الحر هسة ..
حنين : يماااا .. عمو تريد تموتنة .. ادور كلشي ما نشوف من الشوارع .. مضلل سيارتك لان ضابط وهالله هالله ..

رياض : بت الاوادم ما عاجبج شني .. صمي حلگج وخليني اعرف اسوق ..
طول الوقت احنة نضرب بحنين ونكرصهة حتى تسكت لان عمو رياض بسرعة يتعصب ..

حنين باوعتلة : والله لو مرتك جا گعدتهة ليگدام وشغلتلهة التكييف والاغاني ..
رياض : اي ومن اجيب مرتي عبالج اجيبج وياي .. اشمرج بالشارع ..

حنين : افاااا .. ما مرجية منك سيدنا .. بس فدوة افتح الجامات ترة صرنة ازبگتي هنا ووحدة فوگ الثانية .. دهر دهرجن منو الماكلة ثوم ..

براء عاطت بيهة : دهر دهرج انتي على هاللسان الشايلتة .. عفية ما تعرفين تسكتين دقيقة .. هو ياهو المتغدي بعد وياكل ثوم ..

شهد كملت : صارلنة ساعة نگرص نضرب بس نريدج تسكتين ماكو .. شنو من لسان شايلة ..

حنين ذبت العباية على كتفهة لان السيارة مضللة اصلاً وحارة : كافي كافي شكد تحجن ..

خالي عاط بيهة : انتي الكافي .. وج عفية لسان ما طب بحلگج .. من ساعة السودة الجبتج بيهة وياي ..

وگف اباب بيت خالة هويدة ..
خابرهة وهي طلعت ..
فتحت الباب وگعدت بالكرسي الگدام ..

باوعتلنة وابتسمت : اني عبالي بس حضرة الظابط يجي .. طلعت الكتيبة كلهة جاية وياه ..
ابتسمنة وسلمنة عليهة من بعيد ..

حنين مدت راسهة بين كرسي السايق والكرسي الثاني تريد تبوس خالتي هويدة : مية هلا بعمتي القالية ..

خالو لزمهة من شعرهة : وج والله ورمتي گلبي ..
حنين عاطت : اااااه يا عمو فدوة كلشي ولا شعري .. گطعتة فدوة عوفة ..

رياض : اريد افگهة بس ايييدي جلبت ما تطلع .. دهر دهرج ودهر كفشتج ..
خالتي ضحكت : اوكف شبيك عالبنية .. ما تشوف شعرهة مجلب بساعتك .. خل افكهة ..

خالتي تفك بشعر حنين عن ساعتة ..
حنين عوزهة شوية وتبجي : يبو اني المن اجيت .. طلعتوهة من خشمي .. اااخ شعري ..

رياض : همزين من حسيتي على دمج ..
فك شعرهة وحرك السيارة ..
حنين طنگرت واحنة نسولف وية خالة هويدة ..

دك تليفون خالو رياض ..
حجة بصوت : اششش صوتجن ..
سكتنة وهو فتح خط .. : الو .. مية هلا ..

وگف السيارة على جهة وملامحة تحولت للجدية وطبگ حواجبة : الى رحمة الله .. انشالله جاي جاي ..

سد التليفون واحنة نباوعلة بقلق خالتي حجت : شكو رياض .. منو هذا ..

حجة بصوت متضايق : عمج (ابو زوجج) حجي خضر هسة توفى ..

شهگت خالتي وضربت على صدرهة ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤
هلو حبايبي شلونكم .. مشتاقتلكم حيل ..
وبمناسبة عيد الحب .. احب اگوللكم احببببببكم كووومة ..
هاي الاحبكم للي ما عندهم احد يگولهة الهم .. اما الي مكبلين ف ما اعتقد ان ال احبك مالتي تفيدهم 😉 ..

ولا تنسون صوتو وعلقو وكلشي ينداس دوسو ..