رواية بنات للزمن الفصل الحادي عشر 11 - بقلم سارة الشمري

الكاتبة : سارة الشمري🖤

ذلتني المحبه ودم بجيت النوب
كرهت الدنيه كلهه شلون ذلتني
بجتني اعله حبك سهرتني الليل
وعينك هاي انت بغيض بجتني
ابد ما انسه جرحك وانه الك ممنون
... واطباعك تجارب كومه علمتني
بس اصبر علي لازم يجيلك يوم
وتضل تصرخ يناس النار جوتني

جيلان //

حاطة ايدية على اذني امنع الصوت العالي الي احسة راح يفجر راسي ..
العياط مالي البيت .. الناس التمت من كل جهة للبيت ..

عيني تنقلت بينهن ..
حبوبتي تلطم على راسهة وتولول ..
امي يمهة وتبجي وياهة وتحاول تهدي حركتهة ..

نعمة نفس الحالة هم تدك وتلطم ..
شذى مرت عمي محمد نفس الشي ..

النسوان ملتمة عليهن شي تعيط شي تنعى شي تلطم وتذب گولات مال موتة ..

كلة يمر گدامي واني ما مستوعبة ..
جدي توفى ..

كلمة عمي ضافر من دخل على ابوي وحجاهة بصوت عالي وهوة متلثم بشماغة ..
( البگى براسك يعاصم .. طاح عمود البيت )

ما فهمت بالاول من كلامة شي ..
بس دگت عندي اجراس الانذار من عاطت حبوبتي ووياهة امي كعدت تبجي بالگاع ..

رجعت اباوع عالنسوان واحس گلبي نار مشتعلة بي ..
هزيت راسي واني دموعي صارت مالية كل وجهي ..

لاول مرة يطلع صوتي ..
حطيت ايدي حلگي وايدي الثانية على گلبي : اااااااه .. يابة ..

لمحت من بعيد ديلارا كاعدة بالگاع ووجهة احمر وتبجي وتعيط ..
رحتلهة بسرعة لزمتهة وهي منهارة ..

جريتهة وگومتهة من الگاع ..
كوة كامت وهي تبجي بصوت : ااااه جييلان راح جدو .. ليش هيج يربي ..

مسحت دموعهة واني احاول اخليهة اقوى من هيج .. بس منين اجيب الي يقويني اني .. : ششش على كيفج باعي وجهج صار احمر ..

صعدتهة الدرج واني احاول اوخرهة عن اجواء العياط ..
اول غرفة گدامي جانت غرفة مريم ..
دخلتهة للغرفة وگعدتهة عالقنفة ..

التفتت و اشوف مريم كاعدة بالزاوية وترجف ..
حاضنة رضا وسادة اذانة عن الصوت ..
وجهة الابيض گلب احمر وعيونهة مركزة عالفراغ ..
سنونهة ترجف رغم الجو حار ..

رحتلهة بسرعة لزمتهة واحاول اصحيهة ..
حطيت ايدي على خدودهة : مريم .. مريم حاجيني ..

رضا عيونة مغورگة وخايف : شبيهة ماما ..
وخرتة عنهة ولزمتة : ما بيهة شي حبيبي .. لا تخاف ..

رجعت لزمتهة وهزيتهة : مريييم انتبهييي ..
كمزت وزادت رجفتهة وصارت تباوعلي ..
غورگت عيونهة ورفعت ايديهة تريد تحجي وايديهة يتراعشن ..

لزمت ايدهة : مريم هدي على كيفج ..
تتنفس بسرعة وعبالك واحد راكض وراهة ..

گمت حطيت ايدية على راسي واباوع لديلارا وارجع اباوع لمريم ..
ضربت على رجلية ودموعي تتطافر : ليش هيج جدو دخيلك ليش ..

رحت لديلارا لزمت وجهة : ديلارا باوعيلي فدوة .. ديري بالج على مريم .. بس اجيبلهة مي واجي .. ماشي ؟ سمعتيني مو ..

هزت راسهة ودموعهة بعدهة تنزل ..
كمت وطلعت من الغرفة ..
نزلت واشوف البيت انترس نسوان وماكو محط رجل ..

عبرت عالسريع ورحت للمطبخ ..
اخذت بطل مي وگوة گدرت امر واصعد عالدرج ..
وصلت لنهاية الدرج واشوف ديلارا طلعت من الغرفة تصيح وتبجي : جيييلللاان .. الحگي .. مريم مدري شبيهة ..

رحت اركض للغرفة ..
سمعت صوتهة تگح بالحمام ..
الباب مفتوح واني دخلت ..

لزمتهة من كتفهة : مريم ..
حاطة راسهة بالمغسلة وتگح وايدهة على بطنهة وعبالك تريد تستفرغ ..

فتحت المي وغسلتلهة وجهة .. : مريومة على كيفج فدوة .. اسحبي نفس بهدوء ..
باوعتلي وگعدت بالگاع منهارة وتبجي : وج مااات .. جدي مات .. يا نفس هذا الاخذة ..

گومتهة بالگوة وطلعتهة من الحمام ..
گعدتهة عالجرباية وامسح بدموعهة وهي تبجي وتشهك ..
شربتهة مي ..

شفت ديلارا لازمة رضا وتبجي بس تحاول تسكتة ..
فجأة انتبهت وحجيت : ريــم ؟؟؟ ريم وين ؟؟

باوعت لديلارا : ابقي يم مريم ديري بالج عليهة .. لا تخلينهة تطلع .. اني اروح اشوف ريما واجي ..

طلعت من الغرفة عالسريع ..
نزلت جم درجة اباوع من فوك بلكي اشوف ريما وية النسوان بس ماكو ..

رحت لغرفتهة فتحت الباب دورتهة ماكو ..
نزلت بسرعة وتوجهت لغرفة جدو ..
فتحتهة واشوف ريم لازمة مخدتة ودافنة وجهة بيهة وبس شهكاتهة تطلع ..

رحتلهة وگعدت يمهة ودموعي گامت تنزل .. : ريما ..
رفعت راسهة وانهارات بالزايد من شافتني : جيلان راح جدو راح ..

حضنتهة وامسح بدموعهة وهي تشهك ..
صرت ابجي بالزايد واني الي احاول اكون قوية وما انهار مثلهن ..

حجت وهي تناشغ : عرفت راح يصير هيج .. من شفتة بالمستشفى عرفت وكتلج هم ..
نضراتة جانت مختلفة .. وحتى من اخذنة بحضنة وعبالك جان يدري اخر مرة يشوفنة بيهة ..

جيلان فدوة اني شلون ابقى بدونة ..
هو امي وابوي واهلي وناسي ودنيتي كلهم ..
تكفي علية شوفتة كل يوم ..

يعني ما راح اشوفة بعد ..
ما احضنة وابوس ايدة .. وهو يشمني ويگلي افيش يوردتي ..
ما يوصي حارث بية ويگلة لا تزعلهة هاي المدللة مالتي ..

تحجي بحرگة وتشهك ودموعهة مالية وجهة ..

ريما : والله ما جذب ابوي من گال طاح عمود البيت .. هو سندنة .. وكلنة عايشين بعزة وبختة ..

من مات عمي حافظ هوة الي اخذ بيد راسم وضياء ورضوان وصارلهم اب مو بس جد ..

ومن ماتت امي هوة رباني بالفترة الي جان بيها ابوي عازل نفسة من ورة حالة الحزن ..
ومن تزوج ابوي وراح بغير بيت بقينة اني وحارث بحضن جدي الي ما حسسنة بغياب ابونة بيوم ..

ومريم الي رفض يخليهة تروح لبيت ابوهة لان يخاف عليهة من نعمة ..
زوجهة لضياء بس حتى يخلصهة من عذاب نعمة واهتم بسعادتهة ..

رفعت راسهة الي وكملت : وانتن .. صارلجن اب وجد وسند طول هالسنين ..
وما حجة لابنة شي ولا كالة عندك بنات رغم الة كامل الحق ان يعرف بس هوة سكت ..
بس حتى ما تنحرمن من امجن وتعيشن بدونهة ..

گليلي هسة شلون راح نعيش كلنة وهو جان ابونا وسندنة بهالدنيا .. ما تخلى عنة بيوم وكبرنة وخاف علينة .. وهسة راح ..

اخذتهة بحضني واحاول اقوية : راح نعيش مثل ما هو رادنة .. راح نمشي مثل ما ربانة .. ونكمل مثل ما جان رايدنة نصير .. بينة قوتة وعزتة وشايلين اسمة .. وما يحب يشوفنة بيوم ضعيفين هيج ..

وخرت راسهة من حضني ولزمت وجهة : انتي مو تگولين يسميج وردتي ..
هزت راسهة ب أي ..

كملت واني امسح دموعهة : معناتهة ما يريد يشوفج تبجين وتنوحين وتذبلين هيج .. دموعج ما راح ترجعة النة .. گومي توضي وصلي وادعيلة بالرحمة .. ترة هذا الي يفيدة هسة مو دموعج .. دموعج راح تأذي مو اكثر ..

هزت راسهة بأيجاب ومسحت دموعهة ..
رجعت حضنتني وحجت : فعلاً ما جذب جدو من گال تشبهين حبوبتي شهلة بقوتج ..

عفتهة گامت دخلت للحمام ..
طلعت من الغرفة .. صعدت لغرفة ريم ..
دخلت وسديت الباب ..

گعدت بالكاع وخارت كل قوة بية ..
گمت ابجي واشهك وانوح ..
گوة مسيطرة على نفسي ما اعيط ..

هذا ابوي وسندي .. واحنة اجينة هنا علمودة ..
وهو هسة راح .. الناس راح تنهش عضامنة ..
ما اتوقع ابوي راح يخلينة نرجع منين ما اجينة ..

واني ماكدر اتحمل ابقى هنا واتذكر اني اجيت لهنا علمود جدي وبس ..

اليوم الثاني // حارث //

ناصبين جادر والديوانية متروسة .. ناس تروح وناس تجي ..
ابوي وعمي عاصم جوة يم الزلم ..

وعمي محمد وراسم وهادي واگفين بالباب يسلمون عالناس التجي ..

جبران كل ساعة يطلع برة يبجي ويرجع عيونة حمر ويوگف ويانة ..

واگفين وواحدنة يحاول يسند الثاني ..
دموعي گوة لازمهة مانگدر نكعد نبجي مثل النسوان هسة گدام الزلم .. كلفة علينة الزلمة تطيح دمعتة ..

حسيت بأيد على جتفي .. رفعت راسي شفتة عباس .. : حارث روح ارتاح شوية .. من البارحة من رجعتو من النجف وانتة واگف وما گعدت .. مو زين هالتعب كلة ..

هزيت راسي بلا : خليني هنا عباس .. اذا كعدت وحدي معناتهة اگلبهة بجي .. عالاقل هسة ما ابجي گدام الزلم ..

تنهد وحجة : براحتك ..
گمت وگفت من شفت رياض ووياه عامر متوجهين الي حتى يسلمون رغم همة البارحة جانو رايحين ويانة بالجنازة ..

حضني رياض وهوة يطبطب على ضهري : عضم الله اجركم .. وانشالله مثواه الجنة ..
هزيت راسي وسلمت علي : اجرنا واجرك ابو فضل .. ما قصرت ..

سلمت على عامر الي اعرفة من زمان وصديقي ..
عباس هم سلم عليهم لان يعرفهم وخاصاً عامر لان يشتغل بالفرع الثاني مال المعمل الي اشتغل بي اني .. ابوي وضف عامر كمدير للفرع لان شاطر بهيج شغل .. واني هم صرت اشتغل وياه بنفس المعمل وتكونت صداقة حلوة بيناتنة ..

وعباس بحكم جياتة الي للمعمل ويشوف عامر هواي .. تعرف علي وتكونت صداقتهم ..
وهالشي ينطبق على رياض .. اكثر اوقات اجازتة يخلصة يم عامر .. واني اشوفة هناك ..

مرات من اروح لبيت ابوي وهو يكون جاي على اختة الي تكون مرت ابوي واشوفة هناك ..

زلمهم اخلاق عالية وينحلف بيهم ..
سادة وولد رسول الله .. الناس تحبهم من طيبتهم ..

حتى هويدة مرت ابوي ولا مرة شفت منهة شي مو زين او حجاية مو زينة او كلمة تزعج ابد ..
هواي جنت اروح لبيت ابوي بحكم الشغل وهم ابوي يودي علية .. اشوف استقبالهة بكل هدوء وترحيب وتصر الا ابقى اتغدا يمهم ..

اذا هي هيج دوم وما عدهة شي ويانة ..
لعد ليش ابوي هيج من تزوجهة وگطع عنة من الاسبوع للأسبوع يلة نشوفة .. وحتى هي ما تجي لبيت جدي ..

اني بالنسبة الي ما يأثر بية هالشي لان مو زغير ..
واكدر اشوف ابوي بأي وقت واروحلة لبيتة شوكت ماريد وهو يمر علية للشغل كل يومين لو تلاثة ..

بس ريم يأثر عليهة هالشي ..
ماتكدر تشوفة من تشتاقلة .. وما تگدر تروحلة للبيت .. وولا مرة بعمرهة دخلت لبيتة ..
اشوف الحزن بعيونهة ولو بيدي اشيلة واحطة بگلبي وما اخلي الحزن بگلبهة ..

اگول امي ماتت لسبب .. وهو حتى تعيش ريم ..
لازم احافظ عليهة واحميهة ..
اذا صار بيهة شي ما اسامح روحي ..
ما عندي اهل غيرهة ..

بعد مرور اسبوعين //////

كاعد گدام ابوي بالمكتب واسمع كلامة واني حاير : بس يمكن هالشي ما يعجب ريم ..

هز راسة : ريم جانت باقية بالبيت علمود ابوي .. وهسة كل ما تبقى اكثر بهالاجواء والحزن مغيم عليهة راح تسوء حالتهة .. لا تنسى عدهة ربو ويجي من حالات الاكتئاب ..

حارث : بس يابة ريم ما متعودة علـ ...
سكتت ماكدرت اكمل ..
وهو كمل بتنهيدة : ما متعودة علية مو .. حارث ريم بتي .. ومصيرهة ترجع لبيت ابوهة ..

حارث : مو بس عليك ما متعودة .. حتى على هويدة .. يعني هي ما شايفتهة غير مرة لو مرتين .. منو يگول ريم تتقبلهة .. او حتى هويدة تتقبل ريم .. ماريد ريم تعيش الي عاشتة مريم ..

هز راسة : حارث .. اول شي بيت جدك راح يقيد ريم لان راسم راح ينتقل لهناك وياخذ الطابق الفوك هوة ومريم .. وبنات عمك عاصم هم باقيات هنا لان عمك ما يخليهن يرحن بعد .. بهالمعنى حتى انت راح تتقيد وهنة يتقيدن وياك ..

طبگت حواجبي : المعنى ؟؟
حجة بأصرار : المعنى تجيب اختك وتگعدون ابيت ابوكم معززين مكرمين .. ولا تخاف من هويدة .. ترة تخاف ربهة وگلبهة طيب ودوم تسألني عليكم وخاصاً على ريم .. يعني مو مثل نعمة ..

تنهدت : يصير خير يابة يصير خير .. اني امهد الموضوع لريم واحاجيهة .. واذا ما قبلت ما اغصبهة على شي ..

ابو حارث : هسة انت حاجيهة ورجعلي خبر ..
گمت اريد اطلع : اليوم حاول تمر على ريم شوية .. ترة تعبانة لهسة .. بلكت من تشوفك تصير احسن ..

هز راسة : انشالله ..

طلعت من المعمل وصعدت سيارتي ورحت للبيت ..
راسم حاليا مسافر للسعودية يرتب امور نقلة ويجي لهنا يستقر .. كلفني اني ارتب الطابق الفوگ .. وفعلاً صار يومين من جبت ولد يعدلون بي من صبغ وتعديلات وتغليف وهالسوالف ..

دخلت للبيت ..
حبوبتي ويمهة نسوان عمامي كاعدات بالصالة ..
الحزن مخيم عالكل ..
البيت من ندخلة نحسة تايه وبي نقص ..
ماكو صوت جدي ولا ضربة عوجيتة ولا صياحة علية ..

صعدت الدرج وتوجهت لغرفة ريم ..
بعدني ما داك الباب وانفتح بسرعة ..

طلعت جيلان خايفة وتبجي ..
من شافتني حجت بخوف واضح وترجف : حاارث ..
طبگت حواجبي : شكو شبيج .. على كيفج ..

كوة طلعت الكلمة منهة وهي تأشر عالغرفة : فدوة الحگ على ريم اختنگت مدري شبيهة ..
سمعت كلمتهة واني تخبلت ..
دفعتهة ودخلت بسرعة للغرفة ..

واشوف ريما طايحة بالكاع ووجهة مطعون احمر على ازرگ ..
العرك يتصبب من وجهة ..

نزلتلهة بسرعة ورفعت راسهة بحضني : ريما فتحي .. تنفسي حبيبتي تنفسي ..
تفتح وتغمض وتگح بخنگة ..

عطت بجيلان : بسرعة افتحي ذني المجرات طلعي البخاخ مال الربو بسرررعة ..
راحت هي بسرعة تدور عالبخاخ ..

لزمت راس ريم وادلك برگبتهة من القصبات الهوائية حتى يدخللهة اوكسجين : ريما يگلبي بس لا تگحين وتنفسي على كيفج ..

التفتت لجيلان : فضييييييهة ..
جابتة بسرعة واخذتة منهة وحطيتة بحلگ ريم وصرت اضغط بي ..
اضغط بس ما يطلع بخاخ ..

هزيتة بيدي ورجعت بخيت طلع فارغ ..
لطشتة بالكاع واحس اعصابي تدمرت ..
اختي راح تموت بدية .. شسوي ..

صحتني عيطة جيلان : اخذذذذهة للمستشفى شتنتضر .. راح تموت ..
شلتهة بين ايدية وجيلان فتحتلي الباب وحطت شال على راس ريما ..

نزلت الدرج بسرعة وكلهة طلعت وراي ..
يحاجوني واني ولا يمهم ..
حطيتهة بالسيارة وسديت الباب ومشيت بكل سرعتي للمستشفى ..

وصلت للمستشفى ونزلتهة من السيارة واخذتهة للطوارئ مباشرةً ..
گلتلهم بيهة ربو واختنگت ..

حطولهة جهاز الاوكسجين مدري بخاخ ..
طلعوني برة لان خبصتهم خبص ..

ربع ساعة ودخل ابوي يركض .. وياه جبران ..
حجة بلهفة وخوف : وينهة حارث .. بتي وين .. شبيهة ..

حارث : اختنگت والبخاخ جان مخلص مال الربو ..
حجة بعصبية : شلون مخلص .. منو المسؤول على علاجهة مو انتة .. شلون ما تتأكد ..

فركت راسي : مادري .. انت شايفني هسة بحال بخاخ .. وهي اصلاً بأخر سنتين ما صارت تستخدمة هواي يعني بالصدفة .. وما جنت حاط ابالي يصير هيج ..

گعد عالكرسي وحجة بعصبية : بس تگعد مباشرةً اخذهة لبيتي .. اخليهة كدام عيني وانة الاهتم بيهة بعد ..

سكتت ما حجيت شي .. بس مقرر اذا ترفض ريم ما اخلي يجبرهة تروح وياه .. اهم شي هي ونفسيتهة والباقي ما يهمني ..

ورة دقايق طلع الدكتور ..
رحتلة بلهفة : دكتور بشرني ..

حجة بهدوء : اهدئ لا تخاف ما بيهة شي .. حطينالهة بخاخ .. وتنفسهة رجع طبيعي .. بس فقدت الوعي بسبب الاجهاد بالتنفس والسعال القوي ..

كعدت عالكرسي بأرتياح ..
ابو حارث : زين دكتور اريد اشوفهة ..
الدكتور : راح ننقلهة للغرفة هسة .. وتگدر تشوفهة .. وانشالله بس تگعد ونتأكد من وضعهة تگدرون تطلعونهة اليوم ..

راح الدكتور وورة شوية طلعوهة واخذوهة لغرفة خاصة ..
گاعدين يمهة وهستوهة بدت تستعيد وعيهة ..

وخرت الجهاز من حلگهة ..
ابوي گعد بصفهة ودنگ باس راسهة : گعدت بنيتي .. الحمدالله على سلامتج بوية ..

ريم باوعت لأبوي ونزلت دموعهة : بـــابـــا انت يمي ..
حضنتة وگامت تبجي ..
وجعني گلبي بحركتهة هاي .. لهالدرجة مفتقدتة .. واقل كلمات منة نزلت دموعج ..

تقربت منهة وهي باوعتلي ..
دنگت عليهة .. مديت ايدي مسحت دموعهة وبستهة بخدهة : ها ريمي ام دميعة .. هيج تخوفيني عليج .. وطلع ما بيج شي .. واليوم نطلعج من المستشفى ..

ريم : اختنگت بالتراب واحنة نعزل بالمخزن ونلم بالاغراض مال الفاتحة .. طلعت البخاخ لگيتة مخلص .. همزين جيلان اجتني ..

ابوي حجة بأصرار : بعد لا تخافين .. ومن اليوم وجاي انتي تبقين كدام نضري .. واني المسؤول عن علاجج .. سمعتي لو لا ..

تباوع مستغربة : شلون يعني ؟؟
ابو حارث : يعني راح اخذج تعيشين ابيتي .. ابيت ابوج .. ومكانج الي المفروض تكونين موجودة بي .. وياي وكدام عيوني ..

حجت كلمة وحدة خلتني ابتسم : وحارث ؟؟؟

ابتسمتلهة : اني ماعندي مشكلة .. اذا انتي وافقتي اني اكون وياج .. بس اذا ما تردين ترحين محد راح يغصبج على شي او يجبرج ..

قاطعتني وحجت بلهفة : موافقة .. شوكت اطلع ..
ابوي ابتسم براحة : خل يخلص المغذي ويجي الدكتور يشوفج يلة ..

سكتت ما حجيت شي ..
مادام هي موافقة الباقي ما يهم .. اهم شي محد يجبرهة ..

خلص المغذي وورة شوية اجة الدكتور ..
تأكد من حالتهة زينة وطلعناهة للبيت وهي مبتسمة الطريق كلة ..

وصلنة للبيت ولگيناهم بوجهنة يستقبلونة ..
دخلت ريما للبيت واجن البنات يتحمدن الهة بالسلامة ..

اجت جيلان گعدت يمهة وعيونهة مغورگة : خفت من شفتج ما تتنفسين واني ماعرف شسوي .. المرة الثانية تأكدي من البخاخ ممخلص ..

ريم هزت راسهة وهي تمسح دموعهة الي على اقل شي وينزلن .. : اصلاً لو ما انتي موجودة جان اني هسة مختنگة ومحد يدري بية ..

حضنتهة جيلان وريم بادلتهة الحضن ..
تنهدت بملل : اذا خلصتن هالحب ممكن تحضرن اغراض ريما حتى نروح لبيت ابوي ..
التفتت لريم : جهزي اغراضج حتى ورى العشى نمشي ..

هزت راسهة ..
باوعت لجيلان الي واگفة وتباوعلي بهدوء ..
درت وجهي اريد اطلع بس رجعت التفتت لجيلان : صح نسيت اكلج .. ما انتبهت وصيحت عليج مساع بس ما جنت بوعيي ..

هزت راسهة : عادي ما صار شي ..

ريم ///

حضرت اغراضي الي صارن ٢ جنط ..
من وفاة جدو لهسة واني احس الدنيا مسودة بوجهي ..
احس بوحشة علي بشكل مو طبيعي ..

مشتاقتلة حيييل ومفتقدة صوتة بالبيت ..

بس من عرفت راح اروح وية ابوي واحس الفرحة مو سايعتني ..
يعني كل يوم اشوفة .. واعيش وياه .. واتسمى عايشة ابيت ابوها ..

شكد تمنيت اكون حالي من حال باقي البنات ..
اشوفة من يگعد الصبح .. اتريك وياه واسولف ..
ومن يحتاج شي يصيحني ..
هواي مفتقدة هالشغلات .. بس هسة راح اكون وياه ..

جانب مني فرحان .. والجانب الثاني خايف من مرت ابوي هويدة ..
راح تستقبلني وتحبني لو راح تعاملني مثل معاملة نعمة لمريم ..

على گد ما فرحانة على كد ما متوترة من الي جاي .. شلون راح اتعود عليهة .. شلون اشوفهة وية ابوي واني اتخيل امي بمكانهة ..

فززني صوت ابوي وهو يحجي وياي : ريمي وصلنة .. يلة بابا انزلي ..

نزلت من السيارة رفعت راسي اباوع عالبيت من برة ..
اول مرة بحياتي اجي لبيت ابوي .. جملة غريبة بس فعلاً ولا مرة اجيت لهنا ..

البيت من برة جبير وشكلة نازك وحلو ..
دخلت وابوي كدامي وحارث يمشي بصفي ..

فتح الباب ابوي ودخلنة من باب الصالة ..
اول ما دخلنة اجتنة مرت ابوي مبتسمة وحجت بترحيب : مية هلا بيكم ..

ابوي ابتسم : هلا بيج ..
حارث بهدوء : بيج اكثر هويدة ..

اني بقيت ساكتة ..
تقدمت علية بأبتسامة وحجت بهدوء : ريم .. الحمدالله على سلامتج .. انشالله ماعندج غير العافية ..

هزيت راسي : الله يسلمج .. شكراً ..
دخلنة للصالة وكعدنة ..
اني لازكة بحارث .. متوترة حيل ..

هويدة : احطلكم عشا ؟؟
ابوي : لا يابة متعشين يم اهلي .. بس ريمي تعبانة ولازم ترتاح .. غرفتهة جاهزة ؟؟

حجت بأبتسامة : غرفتهة جاهزة .. وغرفة حارث اصلا جاهزة من زمان .. اذا تريد ترتاح براحتهة ..

ابوي حجة بأبتسامة : گومي بابا روحي ارتاحي ونامي لان تعبتي اليوم ..
هزيت راسي وگمت وية هويدة وهي اخذت جنطتي تسحب بيهة ..

صعدت الدرج وهي تمشي كدامي ..
اباوع للبيت شكد حلو ومرتب ..
وارجع واباوع لهويدة شكد نازكة وحلوة ..

وصلنة لغرفة وهي دخلت كدامي فتحتلي الباب ..
دخلت وراهة للغرفة ..

حجت بأبتسامة : وهاي غرفتج ..
القيت نضرة سريعة عالغرفة الي جانت حلوة ومرتبة ..
هزيت راسي بأبتسامة بسيطة : شكراً ..

سدت الباب هي ودخلت جنطتي ورفعتهة حطتهة عالجرباية ..
التفتتلي : الغرفة حاولت اخليهة مرتبة شكد ماكدر .. بس بالتالي ما اعرف ذوقج .. بما انج اجيتي بعد بكيفج الي تردين غيري بيها ..

رفعت اكتافي بهدوء : عادي ما عندي شي خاص اسويه .. والغرفة حلوة .. عاشت ايدج شكراً ..

ابتسمت بفرح : فرحت لان عجبتج ..
استغربت تصرفاتهة واسلوبهة الحلو .. تخيلتها العكس بما ان وحدنة بالغرفة ..

شكلهة فهمت تفكيري وحجت : ريم اني اريدج تاخذين راحتج هنا .. بالتالي هذا بيت ابوج .. بس ماريدج تتقيدين بسببي .. يعني لا تتوقعين مني اعاملج بطريقة مو زينة ..

لزمت ايدي وحجت بحنان : ابوج حيل يحبج .. ودائماً يسولف عنج .. وصدگي من كلامة عنج وحبة الج اني حبيتج رغم ما شايفتج غير جم مرة ..

ابتسمتلهة لا ارادياً ..
كملت كلامهة : اني مو من النوع الي تتصرف تصرفات زوجة الاب القاسية .. اتمنى ما تاخذين عني هيج فكرة ..
واذا احتاجيتي اي شي لا تترددين واطلبي مني .. واحاول ما اقصر بأي شي اتجاهج ..

ابتسمت : شكراً خالة ..
هزت راسهة ولزمت ايدي : هذا حقج من زمان .. ماكو داعي تتشكريني ..

وگفت : وهسة اخذي راحتج وبدلي وارتاحي ..
هزيت راسي بأي وهي طلعت ..

بدلت ملابسي وتمددت اريد انام ..
رفعت تليفوني شفت رسالة من جيلان ..
دازتلي : وحشة عليج بومة ..

ابتسمت ودزيتلهة : هسة تتغزلين لو تغلطين .. شنو بومة ..
ثواني ودزتلي : ثنينهن .. بس استحليت فراشج .. وبنفس الوقت ضوجة لان ماكو انتي بالغرفة .. تعودت عليج ..

ريما : تعودي بدوني .. بعد اني هنا ابقى .. عود من تشتاقيلي تعاي شوفيني ..
جيلان : صدك نسيت .. مرت ابوج شلونها وياج .. خوما سمعتج حجاية ..

ريما : والله تردين الصدك لا .. وحتى صدمتني بكلامهة الحلو وكالت اخذي راحتج بالبيت ولا تتقيدين بية والي تردينة اطلبي مني .. وحتى كالتلي حبيتج على حب ابوج .. صدمتني ..

جيلان : شفتي .. شگتلج اني .. مو گتلج من شفتهة بفاتحة جدو مبينة خوش مرة وحبابة .. حتى من كلامهة مبينة هادئة وطيوبة .. بس بعدنة بالبداية .. وانتي حاولي تكسبينهة بتصرفاتج يعني لا تعيشين وياهة دور الي بايگة منهة ابوها ..

ريما : لا شدعوة يابة .. اني ما افكر بهالطريقة .. واحاول اتجنب اي مشكلة تصيرلي وياهة ..

قاطعني الباب الي يندك ..
حجيت بصوت : تفضل ..
انفتح الباب ودخلت هويدة ..

استغربت بيدهة صينية ..
حطتهة عالميز يم راسي شفت بيهة ماعون فواگه مقطعة ..
حطت العلاگة يم راسي : هذا علاجج .. البخاخ لازم يبقى يم راسج .. وهاي فواكه تفيدج لان بعدج تعبانة ..

هزيت راسي بأحراج : ليش تعبتي نفسج مجان اكو داعي ..
ابتسمت : ماكو تعب حبيبتي .. يلة تصبحين على خير ..

ابتسمتلهة : وانتي من اهلة ..
طلعت هي من الغرفة ..
طلعت تليفوني وصورت الماعون ودزيتة لجيلان كتبتلهة : تخيلي جايبتلي هذا الماعون ومدللتني ..

جيلان : اكلي حبيبتي اكلي .. بعد شتردين .. ادور ما قابلين عالمرة ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري✍🏻

هلو حبايبي .. شلونكم ..
طبعاً ادري راح تگولون اسرعتي بالبارت ..
بصراحة اني حبيت اتجاوز موضوع وفاة الجد لا اكيد بي هواي حزن ..
واني نفسي من اكتب حيل انقهر واضوج .. ف سرعت الاحداث بكد ما اكدر ..

ارآكم حبايبي بالبارت ..
احببببببكم ... ولا تنسون صوتو وعلقو وكلشي ينداس دوسو .. ❤️