رواية بنات للزمن الفصل التاسع 9 - بقلم سارة الشمري

الكاتبة : سارة الشمري✍🏻

أقبل رجعتك بس عندي كومه شروط
أولهن تردلي سنين محسوبه
وثانيهن شبابي الهدر بين أوراق
وسهر ذيـچ الليالي المالهن حوبه
وثالثهن دموعي الصبّن بفرگـاك
على كل دمعه أفصلك فصل منهوبه
ورابعهن تروح تسكّت الشّمات
وتگلّهم حيل أحبّه وأبقه محبوبه

دك تليفوني رفعتة شفت المتصل ريم اختي ..
رديت عليهة : ها ريما ..
ردت بصوت كوة يطلع من المناشغ : حارث فدوة الحك لجدو مدري شبي ما يتنفس ..

طفرت بسرعة واحس روحي انسحبت : ريما شبيج شجاي تحجين .. شنو ما يتنفس ..
ريم : والله ميتنفس .. تعال بسرعة فدوة .. وجهة گلب احمر ودگات گلبة بطيئة .. جيب راسم خل يشوفة .. تعالو اخذو للمستشفى .. سوو اي شي بي انقذوه فدوة ..

سديت التليفون والتفتت على راسم الي يباوعلي بنضرات قلق ..
حجيت واني اتوجه للسيارة : جدي تخربط ما يتنفس ونبضة ضعيف .. امشي بسرعة للبيت ..

صعدت بالسيارة والتفتت لراسم الي بعدة واگف بمكانة مصدوم ويباوعلي ..
عطت بي واني اضرب على باب السيارة من برة : امشييييييي بسرعة راسم ..

انتبه لنفسة واجة بسرعة ركب السيارة وشغلهة ..
مشة بنفس السرعة الي اجة بيهة ..
بس هالمرة ما گتلة قلل السرعة ابد .. اني اريدة يوصل بسرعة ..

هوة يسوق واني حاط ايدي على گلبي وما خليت دعاء ما رددتة ..
ماريد افقدة .. انحرمت من امي وهذا جان اصعب شي مر علية بحياتي ..
ماريد ينعاد هالشي علية .. ماريد انحرم من جدي ..

نزلت دمعة من عيني ومسحتهة بسرعة ..
التفتت لراسم الي وضعة جان عكس وضعي ..
اني جنت خايف وايدية ترجف وبحالة قلق ..

بس راسم جان وجهة احمر واعصابة بارزة ..
ضاغط عالستيرن ويتنفس بسرعة وينافخ بعصبية ..

ريم //

اباوع على جدي من بعد ما طلعوا الولد وهوة حاضن مريم لصدرة ..

رفع راسهة وحجة وهوة يباوعلهة بكل ما تعني الكلمة من عطف وحنان : تدرين بية كلشي سويت بس حتى تضلين مرتاحة وما تنزل دموعج ..
هزت راسهة ودموعهة تجري ..

حط ايدة على راسهة وحجة بنبرة رجاء : اذا هسة طلبت منج شي .. تسوينة ؟؟ ما ترديني ..
حجت بسرعة : اسوي كلشي علمودك .. انت بس أمرني ..

جدي : تزوجي راسم .. وگبل لا اموت .. اريد اشوف عقد الزواج گدامي ..
فتحت عيوني بصدمة واباوع لجدي ولمريم ..

مريم بقت متصنمة بمكانهة وتباوعلة مصدومة ..
قطعت الصمت زمن مرت عمي عاصم : عمي شجاي تحجي .. شلون مريم تتزوج راسم ..

حبوبتي الي شالت شيلتهة عن حلگهة ومسحت دموعهة : ما حجة الا الصح .. شني جا ما صايرة گبل .. انة اگول هذا الصح .. هم راسم يرد هنا بين اهلة واخوانة .. وهم مريم تصير جوة عصمة رجال يصونهة ..

مريم وگفت وحجت بصدمة : حبوبة شجاي تحجون .. شلون تگلولي اتزوج راسم وهوة حماي .. ماكدر جدو .. الله يخليك لا تطلب هالشي مني ..

جدو غمض عيونة حيل ..
انتبهت لرجفة ايدة تزيد ..
وجهة صار احمر ..

ديلارا گمزت ولزمت ايدة وعاطت : يممممة جدوو شبييي ..
التمينة علي نحاول نگعدة بس هوة جسمة متصلب ..

مريم تفتح دگم دشداشتة الفوگ وتبجي : ريم فدوة خابري راسم خل يجي يشوفة شبي .. فدوة لا يموت بسرعة ..

اخذت تليفوني واصابعي ترجف گوة گدرت اطلع رقم حارث لان ادري بي يم راسم ..
حجيت وياه وبلغتة وسديت الخط ..

رحت جبت مي واغسل بصدرة ..
وزمن مرت عمي تقرة علي ايات وتبجي ..
حبوبتي عوجيتهة طاحت وگعدت بالكاع تبجي وتباوعلة وتون ..

ماكو ١٠ دقايق ودخلو حارث وراسم ..
من شفناهم اجو احنة ابتعدنة لورة ..

راسم مباشرةً توجه الة ولزم وجهة ويحجي وياه بكل لهفة وخوف ووجهة احمر : يابة تسمعني ؟؟ .. فتح عيونك .. لا تحرمني منك .. دخيلك لا تموت .. لا تخليني يتيم مرتين .. تنفس بوية رحتلك فدوة .. اذا صارلك شي من وراي والله ما اتهنة ..

يابة تسمعني .. بس حاجيني ومستعد اسوي كلشي .. والله ما ارفضلك طلب .. بس لا تعوفني ..

التفت لحارث الي واگف بعيد ويباوع لجدي وحالتة يرثى لها وخايف ..
عاط بي بصوت عالي : ليييش وااكف .. حااارث شييلة وياي ..

حارث صحى على نفسة وراح بسرعة لجدي وتگابلو علي وشالو ..
مريم تبجي وتناشغ : فدوة خل اروح وياكم .. كلة من وراي ..

راسم مارد عليهة وحتى ما التفتلهة ..
وحارث مو بحال يحجي شي ..

مريم لزمت راسم من زندة بأصرار : راسم اگلكم من وراي وگع .. اريد اروح وياه .. اذا ابقى هنا اموت من القلق ..

راسم سحب ايدة منهة بسرعة وعاط بيهة : وييييين ترحيييين .. طبببي جوة .. مالج شغل انتي بالسالفة ..

طببهة وطبك الباب مال الحوش ..
مريم گعدت بالكاع تبجي وتلطم على وجهة ..

اباوع لزمن حاضنة ديلارا وتحاول تسكتهة ..
وحبوبتي گاعدة بالگاع وتبجي وما گامت ..

جيلان كعدت يم مريم وتلزم بيديهة وتحاول تهديهة لا تأذي نفسهة ..

هذا كلة يمر گدام عيني .. بس تفكيري بألي اخذوه الولد هسة ..
هذا مو جدي .. هذا ابوي ..
ما متعودة اشوفة هيج ضعيف ..

زين شلون اذا صار بي شي ؟؟ شلون ابقى من دونة .. يعني راح اكون يتيمة فعلاً هالمرة ...

راسم //

بممر المستشفى ..
حارث واگف يم الباب لان ما خلونا ندخل ..
اني گاعد عالكرسي وراسي بين ايدية وكل كلمة حجيتهة وياه ترن براسي ..

ضربت على راسي بقهر .. ليش قسيت وياه .. ليش حجيت هيج .. ليش ما رفضت بهدوء ..
ليش صيحت علي .. ليش ذكرتة بالسواه .. ليش ليش .. كلة من وراي .. كلة من ايدي ..

قاطع تفكيري صوت حارث : ارتاحيت هسة راسم .. اذا صار بي شي محد غيرك يكون المسؤول .. يعني ما تكدر تلزم لسانك .. بس حجة وانتة جبت الماضي كلة .. وهاي انتة دكتور والمفروض تعرف ان ما يصير يتعصب وهو بهاي الحالة ..

ضغطت على راسي واني احاول اسيطر على رجفة ايدية : كافي حارث .. لا تزيدهة علية بداعة اعزازك .. والله راسي راح ينفجر ..

بقيت على وضعي وحارث رايح جاي يفتر حتى ما كعد وكلساع يريد يدخل ويمنعونة ..
شوية واجو عمامي والولد .. بقو يسألون بية اني وحارث ويستفسرون بس ما انطيناهم جواب ..

وراها بنص ساعة طلع الدكتور ..
وگفت وحارث راحلة اول واحد : شلونة جدي .. ما بي شي مو ؟؟

جاوبة الدكتور وهوة يهز راسة : جلطة دماغية .. حذرناكم شكد وگلنة ما نريدة يتعرض لصدمة نفسية لان هستوة مسوي عملية .. وحالتة الصحية متدهورة ..

حارث : يعني شنو دكتور .. عدل ميت ؟؟
الدكتور : لحد الان عدل .. بس ماكدر اضمنلك هالشي اكثر من جم يوم .. والاعمار بيد الله .. وقدرة المريض ..

التفتتلة وحجيت بأصرار : دكتور اريد اشوفة ..
هز راسة : ماكدر اخليك تدخل وهوة بالعناية ..
تنفست بصبر : اني دكتور مثلي مثلك وبطاقتي موجودة .. اريد ادخل اشوف المريض ..

تنهد بقلة حيلة : ماشي بس لا تتأخر رجاءً ..
ما رديت علي ودخلت لبست ملابس مال مستشفى ..

اول ما دخلت للغرفة واجت عيني علي احس حيلي باد ..
وكفت يمة لزمت ايدة ..
مررت ايدي على لحيتة البيضة ووجهة ..
دنگت على ايدة وبستهة ..

نزلت دمعة من عيني وحجيت بخنگة : فتح عيونك يابة .. اني راسم .. مارحت .. ما عفتك ..
كوم واني موافق اسوي كلشي تريدة .. موافق اتزوج مريم .. مو هذا التريدة انتة .. يلة فتح عيونك ..

حسيت بحركة ايدة ..
فزيت وباوعتلة وهوة يفتح عيونة على كيف ..
لزمت ايدة الي تحركت وبستهة : يابة ادري بيك تسمعني ..

ما تحرك ورجع غمض مرة ثانية ..
عفتة بهدوء وانسحبت من الغرفة ..
كل تفكيري بي هوة ..
اذا صار بي شي من وراي .. مستحيل اكدر اعيش بهالتأنيب الضمير ..

طلعت وبقيت بالباب ..
الكل ساكتين بس التليفونات ما سكتت ..
خاصاً تليفون هادي كلساع تتصل علي مريم تريد تجي لهنا ..

مر يومين واني ما فارقت المستشفى ابد ..
بقيت كاعد وما نمت ..
الدكتور كال وضعة استقر شوية ..
بس لسانة ثگيل ومو بسهولة يحجي بسبب الجلطة وحرگتة راح تقل  ..

نقلوه لغرفة خاصة .. وهم ما يردون هواي ناس يمة حتى يرتاح ..

دخلت يمة وحدي ..
بس لزمت ايدة هوة فتح عيونة والتفتلي ..
تلالت دمعة من عينة اول ما شافني ..

رفعت ايدي ومسحتهة : وسفة علية اكون سبب دمعتك وانت بهالعمر ..
فتح حلگة يريد يحجي بس ما يگدر ..
بالگوووة طلع منة جم حرف : ر ....ا س م ..

راسم : امرني يابة ..
فاتح حلگة يريد يحجي بس ما يكدر ..
گمت بسرعة سحبت ورقة فارغة من دفتر عالكومدي ..  طلعت قلم من جيبي ومديتهن الة ..

راسم : اكتب الي تريدة هنا .. لا تجهد لسانك ..
اخذ القلم وايدة بيهة رجفة ..

كتب بخط متوسط ومو مرتب : تمم زواجك من مريم ..
تنهدت وباوعتلة : صار يابة .. التريدة يصير .. انت بس كوم بالسلامة ..

كتب عالورقة : عقد الزواج باجر اريد اشوفة ..
راسم : شلون باجر .. ومريم ما تدري ..
هز راسة وكتب : تدري .. روح جيبلي مريم وتعال هسة ..

فتحت عيوني مصدوم .. تدري ؟؟؟؟
طلعت من الغرفة وتوجهت مباشرةً للبيت ..
دخلت وصارت بوجهي ريما ..

حجت بلهفة : راسم شلونة جدو .. من يگولون طلعوه من العناية .. خل نروح نشوفة ..
راسم : ريما مو هسة ترحين .. صيحي مريم بالاول .. گليلهة جدي يريد يشوفج .. خل تحضر روحهة هسة بسرعة وتطلع اوصلهة ..

هزت راسهة بتفهم ودخلت ..
ورى دقايق طلعت مريم مستعجلة ولابسة شالهة وعباتهة .. : راسم يلة فدوة وديني لجدو ..

فتحت الباب وهي اجت وراي صعدت بالسيارة ..
الطريق كلة ساكتين وهي تفرك بيديهة مبينة متوترة ..

وصلت للمستشفى لگيت الولد گبالي ..
استغربوا من شافو مريم وياي ..
كتلهم جدي طلب هالشي ..

دخلتهة للغرفة وهي گلبتهة بجي وتشهك ..
حاضنتة وتبجي وهو حاط ايدة على راسهة يريدهة تسكت بس مايكدر يحجي ..

باوعلي واشرلي عليهة ..
افتهمت وباوعت لمريم : يريد يحجي وياج ..
رفعت راسهة وطبگت حواجبهة ..

سحبت الورقة والقلم وحطيتهن يم ايدة ..
اخذهن وكتب : ماريد اشوفج تبجين .. والطلبتة منج جان علمود سعادتكم ..

قرتهة مريم وباوعتلة بترجي : جدو افهمني .. اني سعادتي يم ابني ..
رجع كتب : اني قبل فضلت سعادتج عالكل .. بس هسة اريد سعادتج انتي ورضا ..

التفتلي وتنهد ورجع كمل : وسعادة راسم ..
تنهدت واني افرك وجهي .. يا سعادة هاي يابة ..

مريم نزلت دموعها وباوعتلي ورجعت باوعت لجدو ..
دنگت راسهة وتمسح بدموعهة ..
جدو كتب عالورقة : اعتبروه وصيتي ولازم تنفذونهة ..

هزت راسهة مريم وحجت بنبرة مكسورة هزتني وخلت گلبي يتعصر : الي تريدة يصير جدو .. واني موافقة ..

جدي تنفس براحة وابتسم ..
طلعت من الغرفة وبقيت واگف برة ..

اجة حارث وگف يمي وحجة بصوت ناصي : شبيك متوتر .. شصار ؟؟
التفتتلة وحجيت بنفس مستوى صوتة : جدي قنع مريم وهي وافقت تتزوجني .. واني وافقت اصلاً ..

باوعلي مصدوم ..: شلون يعني ؟؟ مريم وافقت بهالسهولة ..
راسم : جدي حاجاهة .. وهوة اصلا جان محاجيهة قبل يومين .. وهسة گال اعتبروهة وصية ولازم تنفذونهة ..

انفتح باب الغرفة وطلعت مريم ..
رفعت راسهة النة وحجت وية حارث : حارث وصلني للبيت ..

رديت قبلة : اني اوصلج ..
هزت راسهة ودنكت ومشت كدامي ..
صعدنة بالسيارة وهي تفرك بيديهة ..

حجيت بدون مقدمات : مريم هذا الزواج ماراح يقدم ولا يأخر بشي .. مجرد تنفيذ لكلام جدي ..
يعني يبقى عالورق طول ما انتي رافضة ..

هزت راسهة وما حجت شي ..
وصلتهة للبيت ..
قبل لا تنزل حجيت : باجر الصبح تجهزي نروح للمحكمة علمود العقد ..

فتحت عيونهة : بااجر ؟؟؟؟
هزيت راسي : اي .. جدي يريد يشوف العقد كدامة بأسرع وقت ..

مريم : بس بعدني حتى ما گلت لأبوي ومحد من عمامي يدري ..
تنهدت بقلة حيلة : اني احجي وياهم .. ما يحتاج تحجين انتي وية احد ..

هزت راسهة ونزلت ..
رحت لبيتنة سبحت وبدلت ملابسي وبعدين رجعت للمستشفى ..

بقيت لليل .. ورجعت للبيت لان حارث گال هو يبات يم جدي ..
كعدت يم امي وفاتحتهة بالموضوع وهي طفرت : شلوووون .. تعقد على مريم شني .. انت شتحجي راسم ..

فركت وجهي : الي سمعتيه يمة .. وباجر الصبح اخذهة واروح للمحكمة اعقد عليهة .. والعصر اجيب الشيخ يعقدلنة ..

لطمت على خدودهة : يمممة شني كالولك ما رايدة ولدي .. يممة هاي فگر ليش ما تفتهمون .. وجهة نحس .. ما اخليك تاخذهة .. سمعت لو لا ..

فركت وجهي بقلة صبر : يممة اني جاي اطيج خبر ما طلبت اذن ..
ولا تخافين ما اگعدهة وياج نفس البيت ..
اكعدهة ابيت جدي الثاني الزغير البصف البيت الجبير ..

ام راسم : اييييه مو هاي العرفتهة .. هم راح تاخذك مني مثل ما اخذت اخوك .. ولكم يمة هاي البت ساحرتكم .. طالعة على امهة .. محد منكم يسمع حجايتي ..

راسم : يمة لخاطر محمد كافي .. مريم مالهة شغل بموتة ضياء .. كلمن يموت بيومة .. وهذا امر الله .. مريم شعليهة ..
وسدي السالفة .. الموضوع انتهى ..

كمت من يمهة واسمعهة تصيح علية ..
رحت لغرفتي تمددت اريد انام بس وين يجيني النوم ..

جاي احاول استوعب الراح يصير ..
باجر راح يتحقق التمنيتة لسنوات ..
بس ما ردتة يكون بهالطريقة ..
جدي يريد يزوجنياهة وعبالة الموضوع ينتهي ويعوضني عن السواه ..

شلون اكدر اشوفهة كدامي وبأسم زوجتي وهي جانت مرت اخوي ..
حتلو جنت احبهة .. وبعدني احبهة ..
بس لو اموت ما انسى ان هي بيوم جانت بين ايدين اخوي ..

وهم على البجي البجتة .. ورفضهة واصرارهة عالرفض اكدلي ان هي تحب ضياء هواي ..
شهالتفكير راسم .. شلون ما تحبة وهوة رجلهة وابو ابنهة ..

بيت ام عامر ..//

ليلى //

كاعدة بلبيت بالصالة ..
دخل عامر وگعد يسولف وية امي ..

تنهدت بملل ..
رفعت تليفوني ودزيت رسالة عالگروب مال البنات : ضايجة .. مو ليگول عطلة .. دعزموني شبيكم ..

ردت حنين : خير انشالله فاتحين مطعم .. قبل يومين جنتي يمنة ..
براء : ولا يهمج للوشة .. تعاي باجر يمنة عالغدة ..

حنين : منو كلج تعزمين من وحدج .. ماعدنة اكل .. حتى الاندومي انقرض من السوگ ..

ليلى : مو حقة ينقرض .. بكد ما تاكلين .. يومية تطبگين ٤ وتاكلينهن بساعة وحدة ..

حنين : وشعليج انتي ؟؟ ماكلة من جدريتج .. معدتي تتحمل بكيفهة ..

براء : كافي انتي وياهة .. ليلى اذا تردين احنة نجيكم ..
حنين : تكلمي عن نفسج .. اني ماروح اگابل خلقتهة .. هاي حسودة وعينهة حارة ..

ليلى : حبيبتي بروشة مية هلا بيج .. معليج بالحقنة هاي اختج .. تعاي تغدي يمنة باجر واسويلج برياني ابو اللوز .. ومرگة سبيناغ الحامضة التحبينهة ..

حنين دزت سمايل منحرج : اكو سفن وياه لو لا ..
ضحكت عليهة لان ادري بيهة تموت عالاكل : اي اكو سفن ليش تسألين ..

حنين : حبيبتي والله مشتاقتلج وگلبي طاگ عليج .. باجر اذا ما اشوفج عالغدة يمكن تصير بية حالة نفسية .. لا شنو حالة نفسية لا لا انجن ..

ضحكت وصورت المحادثة مالتهة ونشرتهة عالحالة مال الواتساب وكتبت باجر ام بطن معزومة يمنة على برياني من ايدي ..

رجعت اراسل بالگروب ..
دقايق واجتني رسالة من رقم مسجل سمايلات ..
استغربت منو هذا ..

بس تذكرت نفسة الي سجلت رقمة هذاك اليوم بسمايلات حتى اشوف صورتة ونسيت ما مسحت رقمة ..
عززززا يعني طلع هوة هم مسجل رقمي من خابرتة .. لان شاف حالتي والحالة متطلع الا اذا جنة ثنينة مسجلين ارقام بعضنة ..

دخلت عالرسالة لگيتة داز رسالة من الحالة : هنيالهة ام بطن راح تاكل برياني من ايدج .. خايبة ما تعزميني ..

فتحت عيوني .. يا يا شهالجرأة .. شبي هذا ..
دزيتلة سمايل متعصب ورافع تك حاجب ..

دز سمايل يضحك وكتب : اعصابج يا بوي جذبت عليج .. شني هيج بخيلة وما تطيني من تمناتج (تمن) شوية ..

ليلى : بخيلة شنو .. اشو تحجي بكيفك .. انت منو ؟؟
شافهة بنفس اللحضة ورد : اذا ما تعرفيني منين المن مسجلة رقمي ..

انحرجت شأرد علي : لا مو ذاك اليوم من لگيت رقمك سجلتة بتليفوني اريد اشوفة موجود لو لا لان عبالي رقم واحد من عدنة .. ونسيت ما مسحتة بعد ..

رد : الحمدالله من نسيتي .. وهمزين خابرتيني وسجلت رقمج ..
طبگت حواجبي : صدك رقمك شجابة لجنطتي ..

رد : انة حطيتة .. ردت احجي وياج ..
ليلى : عفواً وبشنو تحجي وياي ؟؟

رد : والله تردين الصدك تحديت صاحبي اذا اكدر ارقمنج لو لا .. وهوة ضحك علية وگال ما تكدر لان ما مرقم ولا مرة بحياتي .. ومن شفتج انضربتي بية انة اخذتهة فرصة وذبيت الرقم .. بس من اول مرة ضاعت علومي ..

كررت جملتة مستغربة : ضاعت علومك ؟؟
رد : اي بالله .. عيونج الزرگ تسطر ووجهج يضوي .. ضاعت علومي ..

وجهي صار احمر .. عزة هذا لهسة متذكر وجهي ..
مسحت المحادثة بسرعة من حجة وياي عامر : شبيج توزعين ابتسامات ..

رفعت راسي وهزيتة : هيج احجي وية البنات عالگروب وعزمتهن عالغدة باجر ..

ريما //

بأختصار البيت مخبوص ..
نعمة كلساع تجي تتهدد على زمن وبناتهة ..
احنة اصلاً ما جنة بوضع زين لان صحة جدي بخطر ..

اني الربو شكلة بدة يرجعلي من الضيقة ..
جيلان وديلارا يبجن وخاصاً ديلارا شكلهة متعلقة بجدي حيل ..

ومريم اوف يمريم ..
دمعتهة ما نشفت من على خدهة ..
تعتبر نفسهة المسؤولة عن الي صار ..
والبارحة رجعت من يم جدو وكعدت تبجي اكثر من قبل .. عرفت منهة ان وافقت تتزوج راسم ..

والله حقهة تبجي وما الومهة ..
صعبة حيل .. زوجهة يتوفى وتضطر تتزوج اخو رجلهة .. ماحب هيج نوع مال زواج ..

حالياً مريم ما موجودة ..
طلعت الصبح وية راسم وگالت رايحين للمحكمة يعقدون ..

ابوي وعمامي والولد بالبداية ما قبلو على هالزواج ورفضو .. بس راسم اجة حجة وياهم الصبح وكاللهم جدي يعتبرهة وصية وهوة طلب هالشي .. عاد همة سكتوا وماكدرو يرفضون طلب جدي ..

صارت الساعة ١٢ ورجعوا من المحكمة ..
مريم مباشرةً اخذت رضا وصعدت لغرفتهة ..
زمن مرت عمي عاصم ما عاجبتهة السالفة وما قابلة عالزواج بس ما كدرت تحجي شي من شافت مريم موافقة ..

دخلت للمطبخ لگيت حارث گاعد عالكرسي ومرتكي عالميز ..
من شافني حجة بهدوء : شلونهة مريم ؟؟

رفعت اكتافي : شلونهة يعني .. تبجي من الصبح لليل .. شتردونهة تسوي مثلاً ..
تنهد بقلة حيلة : وراسم ضايگة بي الدنيا وما راضي عالزواج هذا .. بس يمكن بعدين يتفاهمون ..

ردت احجي بس دخلت جيلان : ريما وين الـــ...
سكتت من شافت حارث گاعد ..
گلبت وجهة وما عاجبهة شوفتة ..

استغربت وحجيت : گولي جيلان رايدة شي ؟؟
جيلان : الشاحنة مال التليفون وين خليتيهة ؟؟
دليتهة على الشاحنة وهي طلعت ..

التفتت لحارث : شبيهة منزعجة منك ؟؟ مسويلهة شي ؟؟
هز راسة بنفي : هو اني شايفهة حتى ازعجهة .. شو مخلصهة بالمستشفى ..

گام وطلع من المطبخ لان راسم صاحلة ..
شوية ورجع دخل : ريما روحي صيحي مريم خل تنزل اجة الشيخ يعقدلهم ..

كمت صعدت لغرفة مريم ..
دگيت الباب وفتحة رضا ..
ريما : رضاوي لعد ماما وين ..

اشر عالحمام : هنا .. من مساع تگح .. ماما مريضة ..
تنهدت واني اعرف شبيهة ..
دگيت باب الحمام : مريومة بيج شي ؟؟

ثواني وطلعت وهي لازمة بطنهة ..
عيونهة حمر وخشمهة احمر ووجهة مگلوب ..
لزمت وجهة وحجيت : مريومة تعبانة ؟؟

گعدت عالجرباية وهزت راسهة : مثل كل مرة .. بطني تمغصني ومعدتي تگلب بس ماكدر استفرغ وارتاح ..
تنهدت .. هاي حالهة من جانت زغيرة .. كل ما تضايقت لو انزعجت من شي هيج يصير بيهة ..

ريما : صدك نسيت .. يردونج جوة .. الشيخ اجة يعقدلكم ..
غمضت عيونهة بقلة حيلة وهزت راسهة : ماشي جاية ..

نزلت قبلهة وهي ورة شوية نزلت لابسة شال وعباية ووياهة رضا ..
دگيت تليفون على حارث وگتلة جاهزة مريم وواگفة يم الباب ..

اجة حارث فتح الباب شوية حتى تسمع صوت الشيخ ..
البنات واگفات يمهة جيلان وديلارا وبسمة
.. وامهة زمن واگفة على جهة هي وحبوبتي ..

حجة الشيخ وصار يقرة ايات قرءانية وبعدين طلب موافقتهة وهي انطت الموافقة ..
بمجرد ما گالت نعم وانت وگيلي ..

ونسمع صوت هلهولة رجت البيت من كثر ما عالية ..
كلنة التفتنة لنعمة الي مستمرة بالهلاهل ..

حبوبتي عاطت بيهة : شنهي هاي ولج .. شو ما تستحين ..
حجت بضحك : شكو بيهة عمة عليمن استحي ؟ غير عقدو ..

التفتت لمريم وحجت : والله ربي ما يگطع .. راح ارجع اخلص منج .. بت الفگرية ..

جيلان عاطت : شننووو ؟؟ منو الفگرية ولج ..
امها خزرتهة : جيللااان ..
حبوبتي لزمت زمن وهي مبتسمه : عوفيهة عوفيهة ..

نعمة حجت ومبينة ناوية على عركة : ياهو الفگرية غير امج .. وانتن مثلهة .. ومثل ما خلصت من هاي اختج .. هم راح اخلص منجن انتن ..

جيلان تقدمت منهة : ليسمعج ايگول كاعدين ابيت الخلفج .. ترة انتي الجاية متطفلة هنا .. تموتين عالكتل ..

نعمة وجهة صار احمر : وج اني انكتل ؟؟ اني اكتل ما انكتل .. بت ام الزلم شو لسانج طويل ..

فتحت عيوني يبووو هاي شتحجي ..
جيلان لزمتهة من دشداشتهة : احترمي نفسج ولج نعمة .. وعلي اذا حجيتي على امي اشوفج شي محد مشوفجياه هنا ..

ترة مو عبالج بس انتي لسانج طويل وتضربين ..
اخذيهة تحذير مني ترة اني مو اقل منج ..
خليني احترمج واگول جبيرة وعيب امد ايدي عليهة ..
بس امي واخواتي خط احمر .. اذا تقربتي منهن والله مصايب اسوي بيج ..

نعمة وجهة گام ينطي الوان من العصبية ..
رفعت ايدهة تريد تضربهة بس هي لزمت ايدهة بسرعة وعاطت بيهة : خيييييير سالميين .. عبالج اني مريم وتمدين ايدج علية .. اكسرهة ايدج اذا انمدت بعد ..

نعمة رجعت ليورة وهي تريد تطلع : انة اعلمج ولج .. انة اعرف شلون اتصرف وياج بعد .. بس اصبريلي ..

جيلان : يلة يلة منا .. اعلى ما بخيلج اركبي ..

طلعت نعمة ورگعت الباب وراهة ..
الكل واگفين فاتحين عيونهم على جيلان ومن السوتة ..

التفتت شفت حارث واگف اباب الديوانية الداخلي وبيدة صينية الجاي وفاتح عيونة وحلگة مصدوم يباوع لجيلان ..

حبوبتي حجت براحة : ما جذب خضر من گال طالعة اعلة حبوبتهة ..
حارث من سمعهة حجة وهوة متفاجئ : اي بالله ..

رحتلة واخذت الصينية من ايدة : جيبهة ولا تتصفن ..
حارث حجة بصوت ناصي وعيونة بعدهة عليهة : عمي هي تصَفن .. انة شعلية ..

اخذت الصينية من ايدة وگرصتة وهو گمز : ااااخ .. اي ليش تگرصين .. مشور بيج ..
عفتة ومشيت واشوف زمن تسحب جيلان بعصبية وتاخذهة ..

اخذت الصينية للمطبخ ورجعت صعدت لغرفة مريم ..
لگيتهة گاعدة وتهز برجلهة ومبينة تفكر ..

حطيت ايدي على كتفهة وهي انتبهت : شبيج مريومة ..

مريم : اول مرة نعمة تطلع من البيت وهي جاية تعارك بدون ما يجي احد من الولد يطلعهة ..
منيلهة جيلان هالقوة .. جنت اگول محد يگدر لنعمة بلسانهة ..
بس هسة شفت ان يرادلهة واحد مثل لسانهة ويوگفهة عند حدهة .. هنيالهة جيلان على قوتهة ..

ابتسمت وحجيت : والله يرادلهة بخت اذا جيلان هي الراح تاخذلج حقج ..
مريم : لا اني ما اخليهة .. لان اذا حطت راسهة براس نعمة .. نعمة ما تخليهة بحالهة وتخرب حياتهة ..

هزيت اكتافي : والله مادري .. بس حسب ما اشوف ان جيلان مو سهلة .. يمكن تكسر خشم نعمة ..

تنهدت وسكتت ..
دك تليفوني ورفعتة : ها حارث ..
حارث : ريما گلي لمريم راسم يصيحهة جوة بالديوانية .. يريد يشوفهة ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري✍🏻

حبايبي اسفة ادري تأخرت عليكم بس هم ادري بيكم تعذروني ..
والله حيل مشغولة ..

ولا تنسون صوتو وعلقو وكلشي ينداس دوسو