رواية بنات للزمن الفصل العشرون 20 - بقلم سارة الشمري

الكاتبة : سارة الشمري🖤

أحس متغير أني ومالي خلك الناس
وأحس تعبان كَلبي من الوكت مقهور
مثل غيمة حزن تمطر علي كبريت
وأنه بنار عايش والدموع تفور
كل يوم الأمس مثل الفلم ينعاد
وباجر والأمس والجاي نفس الطور
ناعور الوكت يسكيني جان أشعار
وأفتر الوكت وإنه الصرت ناعور

بنات للزمن ..
البارت التاسع عشر ..

ديلارا //

گاعدة بغرفتي .. كل ما اتذكر حجي مرت عمي اكعد ابجي .. شلون اجت وغلطت على امي وصيحت عليهة من وراي .. بس والله مالي ايد بالسالفة .. مابيني وبينة شي ..

صارلي جم موقف وياه وهذا كلشي ..
تذكرت هذاك اليوم ورة ما تعارك وياي من ورة ابن خالة ..

جنت گاعدة بالحديقة الي نادراً ما اكعد بيهة ..
شفت الباب انفتح ودخلت عهد بت عمي ووراهة رضوان ..
ابتسمت ورحت اسلم عليهة لان هي متزوجة ومو دائماً هنا ..

سلمت عليهة واخذت ابنهة منهة الي يخبل واني اموت عالجهال .. : يمة فدوة حبيبي يخبل .. ماشالله ..
عهد ضحكت : كدامج .. اخذي وخلصيني ..

بستة بخدة : ليش حرام عليج اكو واحد ينطي هيج مخلوق يجنن .. بس الخدود مال عض ..
عهد : لا تشوفينة هيج بريئ ترة الليل كلة يبجي ومثولني ..

ابتسمت : لعد ابلاش حطو الجنة تحت اقدام الامهات ..
عهد : فعلا منطقي .. يلة خل ندخل جوة ليش نسولف بالباب ..
ديلارا : اي تفضلو لعد ..
التفتت شفت رضوان يباوعلي ومبتسم ..

درت وجهي ومشيت وية عهد دخلنة جوة ..
گمت سويت جاي وواگفة بالمطبخ احط البسكت والكليجة بالمواعين ..

دخل رضوان للمطبخ وگف يم الميز ..
ما التفتت حتى .. مد ايدة واخذ كليجة من الماعون واكلهة ..

حجة بصوت هادئ : بعدج ماخذة على خاطرج من ذاك اليوم ؟؟
باوعتلة بهدوء : طاك اليوم ماصار غير جدال بسيط .. اختلاف افكار ..

طبگ حواجبة : شلون اختلاف افكار ؟؟
ديلارا : يعني انت تريدني التزم بقوانينكم وعاداتكم .. واني متعودة على عادات غيير .. واختلافنة بالافكار هو ان انت متشدد زيادة عن اللزوم واني حسب العشتة تفكيري متفتح ..

طبگ حواجبة : يعني هسة انتي ما جاي تشوفين نفسج غلطانة من واگفة بنص الحوش تسولفين وية سمير ..

سحبت نفس بقلة صبر : اولاً اني مطلعت اسولف .. طلعت اجيب المواعين .. وثانياً انت ليش لهالدرجة مكبرهة ورغم هو ما سوة شي ..

رضوان : ديلارا افهميهة .. احنة ما عدنة بنات يطلعن يسولفن وية واحد غريب وبنص الحوش ووحدهم .. هذا تفكيرنة احنة .. متعودين على هالشي ..

ديلارا : بس اني ممتعودة .. شوف رضوان اني فهمت هالشي .. وطول ما اني هنا راح احاول ما يتكرر هالموضوع .. هايهية ؟

هز راسة : ما اريدج تحسين انتي بسجن .. بس هالشي يتجاوز قابليتنة وتفكيرنة .. يعني نستصعبهة بمعنى اصح ..

ردت احجي بس دخل تمار ابن عهد يزحف للمطبخ ويسوي دادا ..
ابتسمت : توتي حبيبي وين جاي لا ينگلب عليك الجاي ..

بستة بخدة التفتت لگيت رضوان طالع ..
اخذت توتي وديتة لامة ورجعت اخذت الجاي والكليجة ..

مسحت دموعي واني بعدني مستغربة شنو الي خلاه يگل لامة اريد بت عمي .. زين هو مو خاطب بت خالة .. ليش هسة يريدني الي ؟؟

شوية ودخلت مريم گالت بابا يصيحج ..
خفت وبلعت ريگي : ليش ؟؟ خاف معصب ..
مريم : لا يريد يحاجيج بموضوع ..

ديلارا : مريم عليج الله خاف علمود موضوع رضوان .. ترة والله ما بيني وبينة شي ..
مريم : وج والله مو علمود رضوان .. يريد يحجي وياج على غير موضوع .. يلة مسحي دموعج وغسلي وجهج وتعاي ..

هزيت راسي وهي طلعت ..
گمت للحمام غسلت وجهي بمي بارد ..
لبست شالي وطلعت للصالة ..

دخلت لگيت حبوبتي وبابا ومريم .. والي استغربتة هي امي .. امي متبقى بالمكان اذا بابا موجود .. شعجب هنا ..

باوعتلي وهي متوترة ..
بابا ابتسم : هلا ببنيتي .. تعاي بابا يمي ..

افرك بيدية ورحت گعدت يمة ..
حاوط ايدة على كتفي وباسني بگصتي ..

حجة بهدوء وتنهيدة : سمعيني بابا .. انة صح ما جنت وياجن طول هالسنوات .. ولا شفتجن من كبرتن لا من دخلتن مدرسة .. لا فرحت على فرحجن ولا اخذتجن بحضني اذا زعلتن ..

ابتسم وحط ايدة على خدي : بس الله شاهد بهالشهرين ونص ذني بس مجرد عندي علم انتن بناتي وقطعة مني .. صرتن عزيزات علية وروحي وحالجن من حال اخوتجن ومريم ..

غورگت عيوني وابتسمت : الله يخليك ويحفضك النة بابا ..
هز راسة وباسني براسي : انة اليوم جبتج احجي وياج واريدج تسمعيني ..

هزيت راسي بأصغاء ..
كمل كلامة : بابا جايينج خطابة .. وخوش ناس ..
باوعتلة مصدومة : خطابة ؟؟ منو ..

عاصم : ابن خال راسم .. اسمة سمير ..
فتحت عيوني وكمت بسرعة : شنووو ..
طبگ حواجبة : وشبيج مخترعة بابا .. سامعة شي ..

هزيت راسي : لا بابا هو اني منين اعرف الولد ..
باوعلي بشك : جا شبيج كمزتي من سمعتي اسمة .. جنتي متوقعة غير احد يعني ؟؟

طبگت حواجبي : لا والله .. بس يعني ما متوقعة اني اتزوج هسة ..
امي باوعتلي : ماما لا تخافين .. اذا جنتي رافضة محد راح يجبرج على شي ..

ابوي باوعلي : فكري بالموضوع زين .. الولد عمرة ٢٦ ومحامي واخلاقة عالية .. وكلنة نعرفة .. لا تستعجلين واخذي راحتج ..

هزيت راسي وطلعت ..
رحت لغرفتي واجت وراي مريم .. : ديلارا ..
التفتت عليهة : مريم عفية ماريد اتزوجة ..

مريم : ليش متردينة ؟؟
تأففت : ما متخيلة اني اتزوج بهالطريقة .. واحد مااعرفة ولا شايفتة .. مجرد ان اوافق علي من وضيفتة واخلاقة .. يمكن ما نتفاهم وشخصياتنة مختلفة ..

لزمت ايدي : ديلارا اگعدي اريد احاجيج ..
گعدت مستغربة : شنو شبيج ؟
مريم : البارحة بليل اجة رضوان على بابا وحجة وياه ..

طبگ حواجبي : عن شنو ..

مريم : خطبج منة .. وگالة اني اريد بت عمي .. بس بابا رفض .. واليوم من رحت حجيت وية جبران وافتهمت منة گال ابوي تعارك وية رضوان وگلة انتة مو گد الثقة شلون تباوع لبتي بهالطريقة .. ورضوان طالع معصب وابوي مانعة من دخلة البيت ..

اسمعهة واني مصدومة .. : هذا كلة صار من وراي .. ادري رضوان شجاه علية ..
رفعت اكتافهة ..
لزمت ايدي : ديلارا وافقي على سمير ..

هزيت راسي : ماكدر مريم .. ماكدر اتزوج بهالطريقة هو اني شعرف عن الولد ..

مريم : اذا ما تزوجتي سمير معناها رضوان راح يبقى وراج لحد ما يقنع بابا ويخطبج .. وصدگيني اذا تزوجتي رضوان ما راح ترتاحين .. والسبب كلة من امة .. ماريدج تشوفين بام رضوان الي شفتة اني من نعمة .. وخوب انتي سمعتي كلامهة البارحة شتسوي اذا تزوجتي رضوان ..

تذكرت كلامهة وسرت رجفة بجسمي بس بمجرد التفكير : لا مستحيل .. اصلاً اني ما اتزوجة ..

لزمت خدي : لهالسبب اگلج فكري زين بموضوع سمير .. اذا وافقتي تجنبين نفسج من ام رضوان وهم ممكن يتصلح موضوع بابا ورضوان ..

هزيت راسي وهي طلعت ..
غمضت عيوني .. يربي والله اني مو حمل هالسوالف .. شنو رضوان شنو سمير .. منو گاللهم اني اريد اتزوج ..

دخلت امي للغرفة ..
گعدت يمي وتنهدت : ديلارا بتي الزغيرة كبرت وصارت عروس ..

حطيت راسي بحضنهة ولزمت ايدهة : ماما خل نرجع لاربيل .. نرجع لبيتنة .. احنة مو اجينة علمود جدو .. وهسة جدو مموجود .. شعدنة باقين هنا ..

حطت ايدهة على شعري : انتي ما تعرفين تفكيرهم شنو .. لو الدنيا تنگلب ميخلونجن ترحن بعد .. انتن بناتهم وهمة ميقبلون ان بناتهم تعيش بعيد وبدون رجال وحدهن ..

رفعت راسي الهة : ماما تفكيرهم ممتعودين علي .. ابسط شي ماما اني ماريد اتزوج بهالطريقة .. شنو واحد ماعرفة وما شايفتة اتزوجة ..

مو لازم اكون اعرفة واعرف اطباعة حتى اشوف اذا نكدر نتأقلم ونعيش سوة .. هذا زواج وعمر كامل مو يوم ويومين ..

لزمت ايدي : اكو فترة خطوبة .. تعرفي علي بهالفترة .. ولا تخافين انتي هادئة وعاقلة وتتأقلمين وية كلشي ..

نزلت راسي : ماما مااريد اتزوج سمير ..
رفعت راسي وباوعت بعيوني طابگة حواجبهة : ديلارا باوعيلي .. انتي رافضة سمير بس لهالسبب لو اكو شي ثاني ؟.

طبگت حواجبي : شنو شي ثاني ؟
رفعت حاجبهة بشك : رضوان الة ايد بالموضوع ..
فتحت عيوني : لا والله ماما شگد كلت مابيني وبينة شي..

هزت راسهة ووكفت : على كل حال اخذي راحتج بالتفكير لان گال هسة خل اخلص من خطوبة جبران ووراهة التفت لسالفة ديلارا ..

طلعت امي من الغرفة ..
گمت افرك بوجهي .. يربي شلون ورطة هاي ..
اذا هاي امي الواثقة بية وعايشة وياهة عمري كلة هم شكت بية وعبالهة رافضة بسبب رضوان ..

لعد ابوي اذا سمعني شيگول .. اكيد هم راح ايگول عندي شي وية رضوان ورفضت سمير علمودة ..

ريم //

نزلت من فوگ على اصوات البنات هستوهن دخلت ..
سلمت عليهن واني ارحب بيهن ..

حنين : عمة هويدة عمو رياض ايكول ..
خشنت صوتهة وحجت بغرور تقلد عمهة رياض : گولن لهويدة اخوج الضابط ينتضرج بالديوانية وما يتغدة الا وياج ..

ضحكت خالتي ومشت للديوانية ..
ليلى : والله لو يسمعج تقلدين علي ..
حنين : اوي فدوة اسكتي خل اقلد مادام هو مو هنا .. طلع الجية من خشمي .. الطريق كلة يرزل ..

كعدن البنات عالقنفات مال الصالة ..
براء : وانتي شسويتي وترزلتي ..
حنين : شسويت يعني .. هو علج استحيت افتح الجامة واشمرة .. لزگتة بالكرسي مال السيارة .. قابل كفرت وين اودي يعني ..

فتحت عيوني : لا ماشالله كلشي ما مسوية .. زين وما شمرج من السيارة .. والله لو اسويهة بحارث يمكنبعد لو اموت ما يخليني اصعد سيارتة .. عندة السيارة خط احمر ..

حنين : والله لو ما العيب جان نزلني من السيارة بنص الشارع ..
براء : والله انتي لسانج طويل وتستاهلين الكتل ..

ريما : لا عاد كلشي ولا حنين .. الي محليهة اصلاً لسانهة .. سوالفهة تخبل ..
حنين حطت شالهة على وجهة : استحيت ..

ضحكت وطلعت خالتي من الديوانية : يلة يبنات منو تساعدني بتحضير الاكل ..
ابتسمت وگمت والبنات كلهن وياي ..

تجمعنة بالمطبخ ونضحك ونصب بالاكل ..
حنين تفتح الجداري وتشم : اافففيييش .. والله حتى الاوكسجين ما ينعش هيج ..

خالتي : ام بطن مو بيدج .. وخري خل اصب ..
صبت صينية جبيرة وحطت من كلشي واخذتهة وراحت للديوانية ..

ودتهة ورجعت تريد تصب ويانة ..
اباوعلهة وجهة احمر وكلساع تطبگ حواجبهة وتغمض ..
وگفت يمهة والبنات ملتهيات يسولفن ..
حجيت بصوت ناصي : خالة بيج شي ؟ تعبانة ؟

هزت راسهة بأبتسامة : لا حبيبتي بس صداع ..
ابتسمتلهة وحجيت بشقة : روحي تغدي انتي وية اخوج الضابط واحنة هنا نحط اكلنة لا تخافين ..

غسلت ايديهة وابتسمتلي ..
حنين حجت بصوت : شتبسبسين انتي وبتج صارلجن ساعة .. مو عيب تتشاورن كدامنة .. معناهة تحجن علينة ..

خالتي نشفت ايدهة : والله انتي حتى الواحد يستخسر يحجي بيج ..
طلعت خالتي .. اسماء سوت ايدهة على شكل مسدس وحطتهة بنص جبهة حنين : بوووووم ..

گمنة شلنة الاكل .. عالطاولة وگعدنة ناكل ..

ريم : بنات صدك ترة الخميس العقد مال ابن عمي .. نروح نعقدلهم بحفلة بسيطة بدون هوسة .. وترة معزومات انتن ..

حنين : افا عليج .. اول الحاضرين اني ..
ابتسمت : ايي حتى اعرفجن على بنات عمي .. وخاصاً جيلان خابصتهة بيجن ..

شهد : جيلان وحدة من التوم الي گلتي عنهن مو ؟؟
هزيت راسي : ايي .. اخوات مريم ..

حنين : همزين من هسة گلتي عالخطوبة .. حتى ابدي اسوي شعري من هسة .. اشوفلة جارة ..
ضحكت : شبي شعرج يخبل .. لايگ لوجهج لا تسويلة شي ..

حنين : ها يعني اعوف التغيير لعرسي حتى يتفاجئون بية ..
ليلى : هذا يا مخبل اليقبل بيج ..

حنين : حبيبتي اصلا هنيالة .. بس تدرين شنو .. اني اريد فد مواصفات ابالي ..
حطيت ايدي على خدي : وشنو هنة ؟

حنين حطت لگمة بحلگهة وذبت الخاشوكة .. : اول شي اريدة يسولف هواي .. يعني شايفة اني شكد احجي واسولف .. اريدة يسولف اكثر مني ..

براء ضربت على خدهة : يممممة مصيبة سودة اذا صدك ..

حنين ما اهتمت : ثاني شي اريد شعرة ناعم .. حتى اضمن مستقبل جهالي ميطلعون علية .. وثالث شي والاهم هو ان يكون مسودن .. يعني شاخط ..

اسماء : هو مادا يخطبج معناهة مسودن وشاخط .. شهالمواصفات هاي بربج .. اكو وحدة تريد واحد يحجي هواي ..

حنين بأنفعال : اييي اني .. مليت يختي من اسولف وية ذني واتحمس وهنة بس صافنات بوجهي .. اريد شخص يتحمس وياي ويسولف مثلي .. مو اگعد وجني احاجي حايط ..

ضحكت : حقج حقج .. عايشة معاناة ..

مريم // بعد يومين ..

اليوم عقد جبران على بسمة .. البارحة طلعنة اني والبنات اشترينة ملابس للعقد ..

گعدت الصبح .. سمعت صوت المي بالحمام يعني راسم بعدة مطالع ..
رحت للحمام مال الصالة غسلت ولبست دشداشة طويلة ونزلت ..

لگيت حبوبتي بالصالة مثل العادة ..
لگيت امي يمهة وحبوبتي تحجي وياهة تگللهة كومي ذبي الاسود .. وهي متقبل ..

اخر شي حبوبتي شمرت عليهة الثوب المشتريتة : كووومي لا تعاندين .. ذبي ثوبج .. شني هاي عفية نسوان تموتن عالاسود .. مو هاي نعمة هالذبتة اليوم على خطبة ابنهة بدون لحد يگللهة ..

امي تنهدت واخذت الثوب وگامت ..
حبوبتي باوعتلي : يلة يمة گفضن (خلصن) شغلجن حتى ترحن من وكت .. لا تعطلن الوادم ..

هزيت راسي : انشالله حبوبة ..
دخل راسم سلم على حبوبتي واني رحت للمطبخ اسوي الريوك حتى اگعد البنات .. الساعة بال٩  ..

خلصت الريوك ورحت گعدت البنات ..
ديلارا گعدت بهدوء وگامت بأبتسامة ..
الا جيلان شلعت گلبي .. نومهة ثگيل وسحلتهة سحل يلة گامت ..

تريگنة سوة .. عزلت المطبخ ..
صارت الساعة ١٠ اجت امي گالت روحن حضرن روحجن واني اسوي الغدة ..
رحت لغرفتي جبت النفنوف وگعدت رضا نزلتة جوة يم حبوبتي ورحت يم البنات .. لان گالو ورة الغدة نروح ..

گعدت جيلان تحطلي مكياج واني اگللهة ماريد وهي تگلي ميصير بأعتبار بعدج عروس .. شكو شي اگللهة ماريدة تحطة ..

اخر شي اجت تحطلي رموش واني عطت بيه : وعلي الزگهن بخشمج .. وخريييهن شنو هاي .. ما متعودة احط هالكد .. هو اني جان حدي مسكارة وحمرة .. شهالهوسة هاي ..

جيلان ضحكت : هايهية على كيفج .. اصلا متحتاجين رموش .. وعدساتج من الله ماركة .. حتى مكياج مكثرت لا تجذبين ..

اجت ديلارا سحبت شعري ونزل بالزايد ..
اباوع لشكلي عجبتني النتيجة ..

لبست النفنوف الي اختارتة الي جيلان البارحة ..
لونة جويتي مخصر عالجسم ومن جوة مثل ذيل السمكة .. وبالخصر حزام ذهبي سادة والرداناتن للعكس وتور .. خفيف ..

طلعت من الغرفة وصحت رضا حتى ابدلة ملابسة من هسة لان هو اصلا ميوصخ ملابسة او يدمرهن .. مرتب ومو متهجم بأكلة بسيط ..

اخذتة للغرفة وبدلتلة ملابسة ..
لبستة بنطرون وسترة وهو مكيف بيهن ..
واني ابوس بي ..

جبت الساعة الي اشتراهة الة راسم ذاك اليوم على گدة .. لبستهة الة وهو يسوي صرت مثل عمو راسم ..

بستة بخدة حيل : يمممة عين النبي على وليدي طالع يخبل .. لا يحسدونك ..

سمعت صوت راسم من الباب يغني ويباوع علينة : هذا اللون عليك يجنن يشبه لون عيونك .. نضرات العالم ما تطمن احذر لا يحسدونك ..

وگفت بتوتر واني من ذاك اليوم اهرب نضراتي منة ..
رضا باوع لراسم : عمو راح تلبس مثل لبسي ..
ابتسم راسم : لا مو مثل لبسك .. بس هم البس حلو مثلك ..

طلع دشداشة بيضة من الكنتور ووياهة الشماغ السعودي الي بي احمر ..
راح للغرفة الثانية بدل ملابسة ورجع ..

وگف گدام المراية يلبس بالشماغ ورضا واگف يمة وصافن علي ..
اني ملتهية اعزل بملابس رضا وبالغرفة بس بالي يمهم ..

رضا ضحك وحجة يقلني : يمممة عين النبي عليك طالع تخبل لا يحسدونك ..
ضحك راسم وشالة گعدة عالمراية وباسة بخدة ..
اخذ العطر مالتة ورش من عندة لرضا ورجع رش الة ..

رضا گالة نزلني يريد يروح يشوف ملابسة لبيبي ..
نزل رضا يركض ..
اني فتحت الكنتور اريد اطلع الذهب مالتي حتى البسة ..

حسيتة واگف وراي ..
بلعت ريگي حاول ما ابين توتري بس مو بيدي من يتقرب مني مدري شيصير بية ..

رجف جسمي من حسيت بأصابعة على رگبتي وضهري علي ..
وخر طرف شعري عن اذني وقرب راسة مني ..
بلعت ريگي ودوختني ريحة العطر الي هستوة حاطة ..

حجة بصوت ناصي وبي بحة ويدوخ : عين النبي عليج انتي .. اقري المعوذات وشيلي ام سبع عيون .. ما مستعد تصيبج عين على هاي عيونج الي جاذبيتهة اقوى من قانون نيوتن ..

حجاهة وطلع .. حطيت ايدي على گلبي وگعدت عالجرباية ..
لا لا شجاي يصير .. مو هذا الي اريدة .. ماكدر ابقى هالشكل .. ماريد احبة ..

جيلان //

تجهزنة اني وديلارا ..
لبست فستان قصير جوة الركبة ضيگ و ربع ردن وبي نقش يلمع لونة احمر نبيذي (ماروني) .. لبست وياه حذاء اسود مفتوح ولبست حجل ذهبي بي اجراس من زمان عندي جابة الي جدو من جنت بصف الثاني متوسط ..

عفت شعري مفتوح بس شوية سويت بي تموج لان قصير .. حطيت مكياج خفيف بس الحمرة طوختهة شوي ..
لبست العباية ونزلت اني وجيلان ..

حبوبتي باوعتلنة وتصلي عالنبي ..
مريم هم نزلت ..
دخلت امي : يلة ماما حارث ينتضر برة ..

التفتت بسرعة : وليش حارث ؟؟؟؟

زمن : منو ياخذنة يعني ؟؟ جبران العريس ووياه ابوه والشيخ .. وهادي ياخذ امة وخالتة الزغيرة بسيارتة واحنة ما نرهم نروح وية نعمة ..

عندج حل ثاني مثلاً ست جيلان ..
ديلارا : دمشي هسة شنو قابل راح ياكلج حارث ..

طلعن من البيت وحبوبتي ماراحت ..
السيارات برة تنتضر .. واني بالمطبخ اعدل بشكلي ..
گعدت امي ليگدام .. وليورة مريم وديلارا ورضا ..

حارث يصعد بالغراض بالخانة الورة كيك وعصاير وهالسوالف ..
طلعت من المطبخ وحارث التفتلي ..

وگف وضل متفاجئ ..
بلعت ريگ نضراتة گصتني گص ..
رافع تك حاجب ومنزل الثاني .. صرت اعرف هاي حركتة يسويهة من يعصب ..

كملت مشيتي للسيارة وصوت اجراس الحجل يرن ..
جان اكو حفرة منحنيات بالگاع ومتجمع المي بيهن ..

رفعت عبايتي لا تتبلل .. وطلعن شوية من رجلية لان لابسة قصير .. ورجلي بينت لان جنت لابسة حذاء مفتوح من گدام ومصبغة اضافري ..

فتح عيونة بالزايد من شاف رجلية ووجهة گلب احمر ..
خفت واجيت اطگهة ركضة بس صاح بية : اوووكفي ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤

هلو بنات .. طبعاً بارت اليوم ما خليت القفلة قوية لان مثل متعرفون باجر وعگبة ماكو بارت لان استراحتي ..

احبكم كووووووومة .. ولا تنسون صوتو وعلقو وكلشي ينداس دوسو ..