رواية بنات للزمن الفصل التاسع عشر 19 - بقلم سارة الشمري

الكاتبة : سارة الشمري🖤

وينك؟؟
يا فرح يومي وأمسي
يا دفى نبضي وهمسي
كل دقّه في خفوقي
كل لحظة فيها شوقي
تحترق بلهفة عيوني
وينك؟!!
أنا تعلّمت الهوى تحت يمناك
درست معنى العشق حسب اختياري
مبغاك تعشقني ولكنّي
أبغاك لا ضاقت الدّنيا تصير داري

جيلان //

اباوع امي وجهة اصفر وتباوعلهة مصدومة : انتي شجاي تحجين .. ثمني كلامج .. شنو شمسوية بنتي ومنو بيهن ..

تقدمت على جيلان وجرتهة من زندهة : هاي الحية بتج .. بواگة الزلم .. بس ولو ما ينعتب عليهة مادام انتي امهة ..

رحت اني سحبت منهة ديلارا ووگفت بوجهة : هييي احترمي نفسج وخليني محترمة شيباتج .. شنو تايهين الج تجين ترزلين وتطلعين حجي من كيفج ..

نترت بية : ما مطلعة حجي .. ابني اليوم گلب البيت علية يگلي بت عمي الي .. من دهر الدهر بت عمة ودهر امهة ام السحورة ..

حبوبتي عاطت بيهة : من دهر الدهرج انتي .. بوية انة شمسوية ومبتلية بهيج جناين وحدتهن تگل للثانية الوگاحة والعرامة عندي .. امشي ولج اطلعي .. مو صارلج شهور ما مشوفتنة ويهج .. وبس بالعرايك استادية ..

ام راسم : اييي عمة اشوف من اجت زمن گلبتي علية .. هم فرت راسج ..
حبوبتي : خايبة ما تنجبين موش احسلج .. هو انة يمتة صرت وياج حتى اگلب عليج .. يمتة شوفتني الراحة انتي ونقمة ذيج ..

امي جرت ديلارا من زندهة : احجي شكو بينج وبين رضوان .. شجاي تحجي ..
فتحت عيوني : ماما صدك جذب شهالسؤال هذا .. هاي تتبلى عليهة ..

امي ما باوعتلي حتى وعيونهة على ديلارا : جاوبيني وديري بالج تجذبين ..
ديلارا هزت راسهة وعيونهة مغورگة : ماما والله ماكو شي بيناتنة .. اصلاً مادري عن شنو جاي تحجي ..

ام راسم نترت : جذذذااابة .. شمسوية للولد وجاي متسودن علية ويگلي ماريد بت خالي ..

دخل راسم وصاح : يمممة شجاي تسوين شجايبج هنا ..
ام راسم : لا تحاول تمنعني .. هاي ام الزلم وبناتهة ما كفت ايدهة عني ..

راسم سحبهة من ايدهة ويطلعهة : يمة لخاطر محمد امشي نحجي بالبيت .. بس اسكتي ..
وخرت ايدهة منة : ما اسكت .. هذني نحسس .. وانت ضل اركض ورة مريم ام وجه الفگر ..

التفتت على امي وحجت : سمعيني زين ولج .. بتج لا تفكرين حتى تفكير اخليهة تاخذ ابني .. اشوفهة الضيم والضلايم وحق محمد .. ومن هسة حجيت ..

طلعت من البيت وراسم وراهة ..
ديلارا گامت تبجي : ماما والله ما بيني وبينة شي .. مجرد على گد السلام .. لا تصدگين بحجيهة ..

امي هزت راسهة وسحبتهة من ايدهة ودخلتهة للغرفة ..

راسم //

اخذت امي ومشيت للبيت ..
وصلتهة وهي الطريق كلة تصيح ..
خابرت رضوان وگتلة يجي للبيت ..

گعدت گدامهة وهي تصيح : يمة فدوة كافي .. شهالحجي هذا .. شنو فگر .. كلمن ويومة وهذا امر الله ..

خزرتني : بالله انتة ما ينعتب عليك .. فارتك فر مسويتك محبس .. حتى حجاية ما تخليني احجي عليهة .. شني من مصيبة هاي ..

دخل رضوان مطنگر ومعصب ..: ها راسم ..
راسم : اگعد فهمني السالفة ..
رضوان : شأفهمك مو تدري بية ماريد بت خالي ولزگوهة بية ..

امي نترت : وليش ما تريدهة شبيهة .. لو الا من بنات ذيج الحية ياللهة ترتاحون ..
جريت نفس : يمممة بس خل نفتهم منة ..

لتفتت لرضوان : وانت .. سالفة بت خالي عوفهة على جهة .. وگلي شني سالفة ديلارا .. شعندك وياهة خليت امي راحت هدت عليهة .

فتح عيونة : شنو شنو .. وين رحتي ؟؟ يمة تردين تسودنيني انتي شلون ترحين تهدين عليهة ..
امي : جا عبالك اسكتلهة شني .. خوش والله ماخذة ولدي فلاحة ملاجة .. وتردون ما احجي ..

عطت بيهم .: كااافي .. گوم انتة .. كوم للديوانية نحجي وحدنة .. اذا اگعد وياكم هيج للصبح ما اخذ لا حگ ولا باطل ..

اخذتة للديوانية وامي تدردم ..
سديت الباب : احجي .. شني السالفة ..

باوعلي بعصبية : شني السالفة يعني .. ابن خالك سمير گايل لامة تخطبلة ديلارا واليوم امي اسمع خالي يحاجي امي بالسالفة يگللهة راح اخابر ابوهة واخطبهة منة ..

سكت ويهز رجلة بعصبية ..
طبگت حواجبي : اي وبعدين .. شنو العصبك بالموضوع ..
رضوان : شنو شنو العصبني .. شنو يخطبهة راسم .. والله راح تخبلوني ..

راسم : وعليمن نخبلك رضوان شبيك .. هو الولد شمسوي .. شعليك انتة .. رايدهة شنو ..

رفع راسة : جا اني شحجي من الصبح لهسة .. امي ما گالتلك شنو .. راسم اني رايدهة واحبهة .. وامي لازگتلي ببت خالي .. ادور هسة تگلي الا اخلي ابن اخوي ياخذهة وما اخليك تاخذهة انتة .. شني تفشلني گدام اخوي ..

راسم : رضوان انت مقتنع بحجيك .. يعني عيب من خالي شلون انت مو خاطب بنتة ..
ضرب على گصتة بنفاذ صبر : بوية والله ماخاطبهة .. وماريدهة وما اطيقهة .. هو شمرهة علية .. وين لاگيهة يناسب بيت حجي خضر ..

طبگت حواجبي : رضوان شهالحجي هذا .. عيب يبقى خالك ما يصير تحجي هيج .. وبعدين هو شناقصة ويدور نسب عالي ..

رضوان : اني مالي شغل بهالحجي .. هذا سمير ما اخلي يخطبهة .. وهسة اني رايح لعمي عاصم واگلة بتك اريدهة الي .. ودير بالك تحاول تمنعني ..

ضربتة على ضهرة : اصلاً اذا ما رحت وگتلة هسة حضك اطيحة .. لا تخلي التحبهة تروح لغيرك .. گوم اني وياك ..

ابتسم بفرحة وگام ..
رحنة لبيت عمي ..

دخلنة للديوانية لگينة عمي عاصم وعمي ضافر وحارث وجبران ..
كاعدين يشربون جاي ..

سلمنة وگعدنة ..
راسم : عمي ابو هادي .. رضوان حاي يريد يطلب منك طلب .. ويحاجيك بسالفة ..

عمي عاصم : اي يابة احجي .. اسمعك .. خو ما محتاج شي ..
رضوان : لا عمي ما محتاج شي الحمدالله .. بس جايك بطلب اتمنى ما تردني ..

عمي عاصم : گول يابة انشالله ما اقصر ..
رضوان سحب نفس وبعدين حجة : عمي اريد اطلب منك ايد بنتك ديلارا ..

عمي عاصم طبگ حواجبة : لمنو ؟؟
رضوان : الي عمي ...
عمي عاصم ضحك متفاجئ والتفت على عمي ضافر : يتشاقة وياي شني ..

عمي ضافر طابگ حواجبة : بوية رضوان انت مو خاطب بت خالك .. شلون هسة تريد تخطب ديلارا ..

رضوان : عمي مو تدرون بت خالي ما خاطبهة برضاتي .. خالي گدام العالم گال بتي الك .. واني الله وكيلك مارايدهة ..

عمي عاصم طابگ حواجبة : وهسة شني تريد تاخذ بتي فوگ بت خالك .. بوية تسودنت انتة شني .. شهالوزة هذا .. تزوج بت خالك ايجوز تحبهة وية الايام ..

رضوان : ما احبهة عمي .. انة احب ديلارا ولهالسبب اجيت وخطبتهة منك ..
عمي عاصم گام وتقرب منة : شلون شلون .. تحبمن ؟؟

رضوان وگف : اي عمي احب ديلارا .. واريدهة الي وماريدهة تصير لغيري ..
عمي سحبة من ياختة بسرعة ..

كلنة لزمناه عالسريع : عمي على كيفك مو هيج تنحل ..
عمي عاصم طابك حواجبة : ولك مخليك تدخل عليهن وانة عبالي عادهن مثل خواتك .. ولك خاطب انتة وراح تتزوج وتالي عينك تصد لبتي .. هاي ثقتي بيك ولك ..

رضوان : لا عمي والله مو هيج .. ما باوعتلهة بنضرة مو زينة .. وما حاجيتهة شي .. بس مو بيدي والله .. تدرون بية بت خالي ما اريدهة ..

عمي عاصم : شوف ولك ما ردت اوصلهة لهذا الحد .. بت خالك تاخذهة وما تفشلنة گدام خالك .. وبتي تنساهة غصباً عليك .. شني ذنبهة بت العالم تعوفهة .. واسمعني زين .. باب المطبخ بعد ما توصلة .. واذا تريد تجي لهنا حدك للديوانية وتطلع .. ما يتأمن بيك بعد .. افتهمت ..

جبران : يابة شني السالفة مو هيج ..
رضوان رص على سنونة : بأمرك عمي .. التريدة يصير .. طالع ..
طلع رضوان من البيت ..

التفتت لعمي عاصم وحجيت بقهر : هذا الشبل من ذاك الاسد ..
حارث لزمني من ايدي وحجة بهمس : رااسسسم ..

هزيت راسي : هذولة انتو .. بس تعرفون تذبون الحجاية وما تدرون بيهة تكسر الگلب .. تحجون وتالي تتندمون ..

حارث يسحبني لبرة : راااسم كافي اسكت شبيك نسيت روحك ..

طلعت مختنگ وهو وراي : حارث شبيهم ويانة .. كل ما شافو واحد حب بت عمة گلبو ضدة وعبالك مسوي جريمة .. گبل جدي .. وهسة عمي .. يحجون وكل حجاية شكبرهة تضل بالگلب وتالي يعتذرون ما عبالك حجو شي ..

نزل راسة حارث وفرك وجهة ..
استغربت توترة : انت شبيك ادور ..
باوعلي ورفع اكتافة وبلع ريگة ..

طبگت حواجبي : جيلان مو ؟؟
تنهد وتأفف وحط راحة ايدي على عيونة ويفرگهن ..

رفعت ايدية : اوووه هنا كملت السالفة .. عفية عليك .. بوية احنة شطايح علينة وحبينة بنات زمن .. كلهة بس تسمع بنات زمن تگب علينة ليگول بكيفنة هي ..

حارث هز راسة بضيقة .. دگ تليفونة وهو گام ..
رحت اني دخلت للبيت ..
صعدت فوك مباشرةً ..

بدلت ملابسي وتمددت عالجرباية ..
سحبت مخدة مريم ونمت على وجهي ..

شميت عطرهة ابتسمت على العطر ... مبين ريحة شامبو لان كل ما ادخل للحمام وتكون هي هستوهة طالعة منة اشم هالعطر مال الشامبو ..

سمعت حركة الباب ينفتح ..
عدلت گعدتي .. دخلت مريم وگفت من شافتني بس بعدين ذبت عبايتهة ..
استغربت : وين جنتي ؟؟

مريم : شنو نسيت مو گتلك ريم عازمتنة ..
تنهدت : ما جنت متوقع راح ترحون .. يعني من بعد الصار ..

مريم : اصلاً ما ردنة نروح .. بس حبوبتي گالت روحن وعيب من مرت عمجن وريم اول مرة تعزمجن .. وهم من رحنة ما طولنة فهمنة الوضع لريم وبس تعشينة وشربنة جاي خابرنة حارث اجة علينة ..

هزيت راسي : ديلارا شلونهة خو ما زعلت ..
مريم : شلون ما تزعل .. ديلارا حساسة وما متعودة على هيج شي .. لو جيلان جان ممكن الوضع يكون احسن لان تگدر ترد .. بس ديلارا خلصتهة بجي ..

راسم : مريم امي مو قصدهة شي بس لان تدرين برضوان خاطب بت عمي وهي رايدتهة الة .. ومن سمعت برضوان رايد ديلارا ويحبهة ما گدرت تسكت ..

طبگت حواجبهة : يحبهة ؟؟
هزيت راسي : اي يحبهة .. يعني اكيد تدرين بي ما يحب هيام .. ومادري شوكت بس حاب ديلارا .. وهسة خطبهة من ابوج ..

وگفت بصدمة : شنوووو .. وابوي شگال ؟
عضيت شفتي بقهر : رفض يعني شگال .. ومنعة يدخل للبيت ..
حطت ايدهة على گلبهة : اووف خوفتني .. والله عبالي وافق ..

گمت وگفت ورحتلهة : وليش ما يوافق بلة .. شبي رضوان ..
مريم : بكل بساطة خاطب .. وهم امك متريدهة .. 

نترت بوجهة : انتي شلون تفكرين هيج .. مو اگلج يحبهة ..
مريم : عادي فترة وينساهة .. تجي هيام تخلي ينساهة ..

سحبتهة من ايديهة وباعتلهة بعصبية : ليش هالگد تشوفونهة سهلة .. الگلب اذا حب وحدة .. لو مية وحدة تجي ما تاخذ مكانهة .. لا تقررون من كيفكم وتگولون ينسى .. محد يگدر ينسى لو مرت سنين ..

رمشت جم مرة : راسم ايدي اذتني .. محجيت شي اني .. خفت على ديلارا من امك لا تأذيهة ماريدهة تشوف الي شفتة من نعمة ..

رصيت سنوني وقربت وجهي منهة : اذا جان يحبهة ما يخلي جنس مخلوق يتعرضلهة بحجاية ..

مريم : الحب وحدة ميكفي .. اذا ماكو راحة ميفيد الحب ..

ارتخت ملامحي وباوعت بعيونهة واحس بضعف يعصر گلبي : واذا ما حصلت التحبة لو تموت ما تلگة الراحة ..
الحب وحدة من يجي يجيب الراحة وياه اذا جان من الطرفين .. بس اذا جان من طرف واحد ..

ابتسمت بقهر : بس الله وهالواحد يدرون بي شلونهة راحتة ..
تباوع بعيوني وطابگة حواجبهة مستغربة من كلامي ..
متوترة من قربي عليهة بگد ضياعي من اشوف بحر عيونهة ..

لزمت ايدهة اليسار ورفعتهة ..
مررت اصابعي على مكان النبض ..
استقرت على الشريان الينبض بطريقة واضحة بيدهة دليل على توترهة ..

نزلت شفايفي وبست راحة ايدة (باطن كفهة) ..
بلعت ريگهة وسحبت ايدهة بسرعة ..
نزلتهة وصارت تفرك بثوبهة بتوتر .. : راسم شجاي يصير وياك .. ليش تتصرف هيج ؟؟

عيوني بعدهة مركزة على عيونهة : تباوعيلي بهاي عيونج وتردين ما اتصرف هيج ..
رفعت عيونهة متفاجأة : هاا ؟؟ راسم ..

مديت ايدي حاوطت خصرهة : عيون راسم .. كلشي لا تحجين .. بس ابقي باوعيلي بعيونج ..

دارت وجهة متوترة رجعت لزمت فكهة بخفة ورجعتة لجهتي : لا تديرين عيونج .. مو گتلج اذا ما حصلت التحبة ما تلگة الراحة ..

مررت ايدية على حواجبهة وعيوني مركزة بعيونهة وبس : اني هاي راحتي لگيتهة ..
سمعت كلامي وفتحت عيونهة بصدمة ..

خشمي لامس خشمهة الناعم ..
حجت بصوت كلة رجفة : راسم ..
ما خليتهة تكمل الا واخذت شفتهة بشفتي مثل المغمض سنين وسمع كلمة حلال ..

شفتهة ترجف وهي خانسة ..
لزمت خدهة واني ناسي روحي ..
وخرت عنهة حتى تلتقط انفاسهة ..

باوعتلهة وكصتي على كصتهة مغمضة عيونهة وتتنفس بشكل مو منتضم من الرجفة ..
فتحت عيونهة ورفعتهن لعيوني ..

وخرت بسرعة من انتبهت ..
رجعت ليورة .. سحبت شالهة من الكرسي مال المراية وحجت بتوتر بدون ما تباوعلي وطلعت : رضا بقة جوة اروح اجيبة حتى ابدل ملابسة ..

طلعت من الغرفة ..
حطيت ايدي على گلبي الينبض بشكل عنيف ..
ابتسمت واتذكر توترهة ورجفتهة .. اعترفتلهة بحبي بطريقة غير مباشرة وهي فهمتهة واضح من صدمتهة ..

ريم // اليوم الثاني ..

فتحت عيوني بنعاس .. الغرفة ضلمة ..
گمت واني مكسلة من النعاس بس لازم اگوم لان اذا بقيت نايمة راح اتكسل بالزايد وتخرب نومتي ..

غسلت وجهي .. باوعت للبجامة مالتي عريضة سودة وبيهة رسومات حمرة مال ميكي ماوس ..
عفت شعري مفتوح بس لبست طوگ احمر .. هاي يومية هيج لبسي تراكات بالبيت لان محد غريب هنا ..

طلعت من غرفتي وامشي وافرك بعيوني وتركيزي صفر ..
نزلت الدرج واباوع عالقنفات حارث كاعد وحدة ..

نزلت الدرج واريد اروحلة بس لحضة ..
باوعتلة بغباء .. شفتة طابگ حواجبة ومبتسم بنفس الوقت ..
فتحت عيوني وهستوني اركز .. هذا مو حارث ..

درت وجهي وطگيتهة ركضة .. اقرب غرفة گدامي جانت غرفة ابوي وخالتي هويدة ..
دخلت وطبگت الباب واتنفس بسرعة ..
هويدة : ريمي سمالله ماما شبيج ؟؟

باوعتلهم بأحراج لان دخلت بدون ما ادگ الباب ..
جان بابا بيدة اوراق وخالتي ترتب بالملابس بالكنتور ..

بلعت ريگي : اكو رجال بالصالة .. واني شردت ..
خالتي : يووو اي هذا رياض .. عذريني حبيبتي ما گتلج لان جنتي نايمة .. هو هسة يمشي اصلا بس جاي على اوراق ياخذهن من ابوج ويوصلهن لعامر بطريقة ..

ابوي ابتسم : ليگول شايفة جني مو بشر .. على هالخرعة ..
هزيت راسي : لا بس عبالي حارث .. من شفت الزي العسكري شردت ..
كملت بجذب : همزين ما شافني منطيني ضهرة ..

درت وجهي اريد اطلع : عن اذنكم اخذو راحتكم ..
ابوي سحبني من ورة من فانيلتي : وييين حلتلج السالفة كلساع طالعة عالولد .. اوگفي خل اخذلج طريق ..

طلع بابا گدامي وحجة : يابة سيدنة بعد اذنك بت اختك تريد تطلع ..
خالتي هويدة ابتسمت : دير وجهك يعني ..

انطانة ضهرة واني طلعت اركض للمطبخ ..
يبووو شهالفشلة هاي ..
شوية وسمعت صوتة طلع ووراه بابا ..
دخلت خالتي هويدة .. : تريگتي ماما ..

هزيت راسي : لا .. بعدني ..
هويدة : دكعدي لعد .. خل اصبلج كلاص حليب ووياه جبن عرب وخبز سمسم ..
ابتسمت : منين جبن عرب ؟؟

هويدة : حارث اليوم طلع من الصبح ابوج وداه بشغل لبيت جدج .. وهو جابة وياه ..
كعدت اكل وهي اصلاً تتريگ وية بابا ..

اباوعلهة شكد منضمة بشغلهة وحركاتهة واسلوبهة ..
حتى لبسهة .. تلبس دشاديش طوال وردان طويل بس حلوات عليهة وكلهن تطريز خليجي يخبلن عليهة .. وهي اصلا حلوة ..

حجيت بأبتسامة : اگول خالة ؟؟
هويدة : گولي حبيبتي ..
ريم : ليلى وشهد عزموني ابيتهم .. وبراء وحنين واسماء هم عزمني ابيتهم .. اممم عادي اني اعزمهن ..

ابتسمتلي : بكيفج حبيبتي ليش لا ..
ابتسمت : يعني اذا اعزمهن يجن ؟؟
ضحكت : ولوو .. حنين تطفرلج من التليفون ..

گمت بحماس : لعد راح اخابرهن .. حتى من يجن هم اعزمهن على خطوبة جبران ..

مريم //

بالمطبخ كاعدين .. من البارحة وعقلي مو براسي ..
كل ما اتذكر احس بالرجفة تسري بكامل جسمي ..
يعني راسم يحبني ؟؟ بس لا ما لازم يحبني ..

اني ما استاهلة .. شناقصة ويحب وحدة ارملة ..
اني گتلة بنفسي اروح اخطبلك ..
والاهم من هذا كلة اني ماكدر احبة ..
حتلو فكرت مجرد تفكير راح امحي هالفكرة من بالي ..
لازم اسيطر على مشاعري .. ماريد اضعف ..

قطع تفكيري صوت ابوي من الصالة : مريومة بابا وين صار الجاي ..
اخذت الجاي ورحت للصالة ..
حطيتة كدامة وصبيتلة استكان ولحبوبتي ..

اسمع ابوي يسولف وية حبوبتي : يمة اليوم اجو خطابة على ديلارا .. وخوش ولد ما ينرد ..
فتحت عيوني .. شنووو بس لا قصدة رضوان .. بس راسم كال ابوج رفض ..

حبوبتي سبقتني بالسؤال : ومنو هذا الماينرد ؟؟

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الفيديو اهداء مني لراسم 😋 عن لسانة يعني 😍

الكاتبة : سارة الشمري🖤

ادرررري بدون متگولون البارت قصير .. بس والله البارحة كوني كوة افتحهة من النعاس ومكدرت اكتب اكثر ..

احبكككككم .. ولا تنسون صوتو وعلقو وكلشي ينداس دوسو ..