رواية بنات للزمن الفصل الحادي والعشرون 21 - بقلم سارة الشمري

الكاتبة : سارة الشمري🖤

غيابك حبيبي شلون أصّبر الروح
يا حال الي يظل على حالي من تروح
جرحك بالكلب داويته بس ما طاب
وبطاري السفر زيدت قلبي جروح
ما أنساك لو سافرت عشر سنين
وشوكت ما ترد باب القلب مفتوح
يمي إنت وأحس بيك بعيد
وأبد ما فكرت يجي يوم مني تروح

جيلان //

حارث : اوووگككفي ..

وگفت متوترة من نضراتة .. شبي هيج يباوعلي ؟ يمة يخوف ..
التفتت علي : ها ..

باوع للسيارة وحجة بصوت ناصي بس مبين علي العصبية لان راص سنونة : وجعاااا .. شلابسة ..

باوعت على روحي ورجعت باوعتلة وحجيت ببرائة : عباية ..

تقرب مني وحجة وهو رافع تك حاجب ومنزل الثاني : وج بت الاوادم احد گايلج انتي المعرسة .. شني هاي حمرتج تگل للواحد تعال باوعلي .. وادور هذا اللابستة برجلج شني جنة مال رگاصات .. وانوب لابسة قصير ..

باوعتلة بعصبية : هاي شبيك اكلتني وشربتني .. عادي شكو بيهة غير خطوبة اخوية واذا لبست هيج ..

فرك وجهة وحجة مبين يحاول يتفاهم وياي بهدوء : وج مشمش مو العالم كلهة برة وزلم .. شلون تطلعين هيج ؟؟

جيلان : واني شنو راح اگعد بنص الزلم .. هنة بس نسوان .. وبعدين انت شحارگ عصك شكو هالكد متعصب .. شتريد اسوي يعني ؟؟

حارث : امشي بدلي اللابستة وامسحي حمرتج ..
تيهت العباية وتخوصرت : لااا بللللة ..

باوع للفستان من فوك ليجوة لان انفتحت العباية ..
جر نفس وضرب على راسة وفرك وجهة : ادور لابسة احمر يربببيييي ..

عفتة ومشيت عالسريع وصعدت بالسيارة والبنات وامي ملتهيات يسولفن ..
طبگت الباب وجان مقعدي وراه ..

الطريق كلة رافع تك حاجب ومنزل الثاني وعيونة تباوعلي بالمراية ..
اني كلساع اباوعلة من اشوفة يباوعلي ادير وجهي ..

مريم حجت : حارث لعد ريم ويامن تجي ؟
ما جاوبهة واصلاً ما سمعهة مبين ..

مريم حجت بصوت اعلى : حااااارث ..
انتبه لنفسة : ها ها مريم .. ما سمعتج ..
مريم : جاي اگول ريما وين ليش ما اجت ويانة ؟

حارث : ريم بسيارة ابوي وياهة هويدة وبنات اخوتهة .. گالت اني عزمتهن وعيب اعوفهن وحدهن ..
طبگت حواجبي وحجيت بصوت خفيف : اي عيني تخاف تعوف حنين ومدري منو بوحدهن .. قابل ياكلونهن ؟؟

وصلنة لبيت اهل بسمة وهو اصلاً قريب بس لان سيارات هواي و يمشون على كيف وصلنة قبل بوقت ..

حارث وگف السيارة يم الباب كلش بحيث بس ننزل مباشرة ندخل حتى خطوتين ماكو ..
جهة الباب الي كاعدة يمة امي هي الي صارت يم الباب .. والجهة الي كاعدة بيهة اني جانت على جهة الشارع ..

امي فتحت الباب ونزلت ..
اني هم اجيت افتح الباب وانزل بس حارث التفت علينة بكامل جسمة ..
حجة وهو طابك حواجبة : كلجن تنزلن من هذا الباب يلة .. غطن وجوهجن منا العالم كلجن مكياج .. يلة ..

رفعت حاجبي وباوعتلة وجانت نضراتة بس علية ويحجي بصيغة الجمع ..
من رفعتلة حاجبي خزرني .. هذا شبي اليوم ؟؟

تأففت وغطيت وجهي بالعباية ونزلت ..
هو نزل وطبگ الباب ..

دخلنة لبيتهم استقبلونة بالسلام الحلو ..
دخلت واشوف بسمة طالعة تخبل ماشالله ..
لابسة فستان بنفسجي طوخ وهي بيضة ومربربة شوية وطالع يخبل عليهة .. تسريحتهة مفتوحة بس من ورة مرفوعة ببف خفيف ..

دخلت بوستهة وباركتلهة ..
ماجان اكو هوسة لان بعدة جدو مصارلة هواي من توفى ..

گعدت يم بسمة .. : شطالعة ولج .. متگليلي اخوي شلون بي اليوم ؟؟
ابتسمت بخجل : كافي جيلان والله اني گوة گاعدة من الخجل كلهة تباوعلي ..

جيلان : اي طبعاً غير العروس .. اكيد كلهة تباوعلج ..

التفتت ودخلن ريم ووياهة مجموعة بنات ومرت ابوهة ..
گمت حضنتهة حيل : مشتااااقتلج العوبة وين صرتي ؟ ليش تأخرتو ..

ريم : تأخرت علمود البنات .. عيب قابل اعوفهن ..
عوجت حلگي : اي عيني بالعافية عليهن ..
جرتني من ايدي : تعاي اعرفج عليهن ..

اخذتني لجهتهن وهنة ماشالله حلوات ..
عرفتني عليهن وهنة سلمن بكل رحابة خاصاً احلا وحدة بيهن الي اسمها ليلى ..

اجت على اخر وحدة : وهاي الحلوة حنين ..
باوعتلهة : يا انتي حنين ؟؟
سلمت عليهة : ريم هواي تحجي عنج ..

حنين ضحكت : فديتها ريمي الوحيدة الرافعة معنوياتي ..
رفعت حاجبي واني مادري ليش مقهورة منهة على گد ما ريم خابصتني بيهة : ترة ما گلت تمدحج .. گلت تحجي عنج ..

تقلصت ابتسامتهة وعوجت حلگهة : عندي ثقة بريمي متحجي عني شي غير الكلام الحلو ..
ريم : احممم .. هاي شنو لا تتعاركن ..
جيلان : لا شكو نتعارك .. مبينة محبوبة ..

باوعتلهة ودرت وجهي ورجعت التفتت عليهة : على فكرة شعرج حلو .. احب الكيرلي ..
ضحكت هي : ايييي هسة ارتاحيتلج .. حسيتج ما تنبلعين .. بس هسة حبيتج ..

ليلى خزرتهة : حنيييين ..
ابتسمت على فطارتهة : صريحة ماشالله ..

جريت ريم من ايدهة : تعاي ريم خل نگعد يم بسمة ننصب عليهة ..
حنين جرتهة من ايدهة : وييين اكعدي نستحي وحدنة هنا منعرف احد ..

باوعتلهة : قابل ياكلونجن شنو ؟؟ وبعدين ما مليتن منهة .. خل اشوفهة اني ..
حنين : لاحگة تشوفينهة .. هسة نستحي وحدنة ..

اجيت احجي بس ريم سحبت ايديهة بعصبية : كااافي انتي وياهة .. ادري مطي اني وتسحبن بية كل وحدة من جهة .. شوفن العالم شلون تباوعلنة .. وخرررن خل اروح احاجي ديلارا ..

عافتنة ومشت واني وحنين وحدة باوعت بوجه الثانية والبنات يضحكن علينة ..
شهد حجت : طنجرة (جدر) ولقت غطاها ..

باوعت لحنين وضحكت ..
بدت وحدة تقرة مواليد واحنة نصفگ ..

شوية وگالو راح يعقدون ..
اخذنة بسمة يم الباب ومفتوح شوية ..
الشيخ بدة يعقدلهم ..

هي خايفة ومتوترة .. انطت الموافقة وعمتهة هلهلت وابتدت الصلوات عالنبي ..
توجهنالهة بالتبريكات ..

اجت نعمة .. وواحد ليش يجذب مبينة الفرحة عليهة .. بس ولو ليش ما تفرح .. بت اختهة ماخذتهة لابنهة ووين تلگى مثل بسمة ..

اجت حطت بيدهة قرءان ولبستهة بتوت (اساور) ذهب وحطت بيدهة قرءان وباستهة براسهة ..
شوية وگالو راح يدخل جبران .. البنات كلهن لسن عبايات بس احنة خواتة وريم ما لبسنة ..

دخل جبران وخطية مستحي ومدنگ .. وخالاتة هواي كل شوية وحدة بايستة .. لحد ما وصل للكوشة ..
گعد يمهة وهي حالهة مو احسن منة مدنگة وتفرك بيديهة ..

رفع الشال الخفيف الابيض عن وجهة وحبهة راسهة ..
شو هذا من شافهة زاح المستحى وبعد ما نزل عينة عنهة ..

طلعنالة علبة الذهب وصرنة ننطي وهو يلبس ..
كلساع ياخذ كلينس ويمسح گصتة ووجهة ..
اني اصور بي وشبعانة ضحك وفرحانة الهم ..

كعدت بصفة : جبران على كيفك .. باكيت الكلينس خلص ..
التفتلي وخزرني : وخري جنج فيفي عبدو .. حجلج يرن جنة مال رگاصات .. اني برة واسمعة ..

جيلان : يوو باع الجذب .. شطلع دمبك مو حجل .. عوفك من الحجل .. شوف الگمر الكاعد بصفك .. كيكة ام الفرولة ..

ابتسم والتفت عليهة وباسهة بخدهة ..
هي وجهة گلب طماطة .. اني من يمي استحيت عزا العزاك جبران ..
ضربتة اني على كتفة ..
هو ضحك : نتذوق الكيكة شبيج ..

شوية وطلع .. ووراهة بنص ساعة اجت السيارات ..
وگفت البس بعبايتي واجت ريم : جيلان حارث ايگول من تطلع خل تغطي وجهة ..

تأففت : شبي اخوج اليوم علية .. مساع رزلني على لبسي .. وهسة يكلي غطي وجهج .. شبي لبسي ..

ضحكت ورفعت اكتافهة ..: الله اعلم ..
مشت وراحت لبنات خوالهة على گولتهة ..

لبست عبايتي وطلعنة كلنة ..
غطيت وجهي وكلمن صعدت بالسيارة الي اجت بيهة ..

گاعدين بالسيارة ومنتضرين السيارة الگدامنة لان كاطعة طريقنة مدري سيارة منو ..

شوية واجة واحد يمشي نسخة من هاي ليلى بت اخت مرت ابو ريم ..
رفع ايدة لحارث بمعنى اعتذار لان سيارتة هو الگاطعة الطريق ..

شهگت لا اراديا بصوت عالي : يممممة هذا منو ؟؟
ما اشوف الا حارث التفتلي ووعيونة يردن يطگن وشريان بارز بگصتة .. شوية ووجهة گلب احمر ..

بلعت ريگي من نضرتة .. : شبيك تباوع ؟ مو يشبه ليلى بت اخت مرت ابوك .. لهالسبب حجيت ..
امي رصت على سنونهة وخزرتني : جيلللان ..

درت وجهي وسكتت .. شبي علية اليوم هذا .. ما طلع لبس كلساع يريد يهجم علية ..
حرك السيارة واسمع من انفاسة ينافخ لان مبين ..

وصلنة للبيت ..
ونزلت واني مطنگرة .. رحت مباشرةً لغرفتي بدلت ملابسي وسبحت ..

نزلت جوة وخابرتني ريم گالت احضر ملابسهة الشتوية حتى باجر ندزهن الهة لان الشتا جاي ..

گلت لحبوبتي عليهن ودلتنة بمكانهن ..
صعدت اني ومريم للمخزن الفوگ ..
مريم باقية واگفة بالباب ..

التفتت عليهة : متدخلين ..
مريم تتلفت بالغرفة بخوف : لا انتي جيبيهن .. اني انتضرج برة ..
باوعتلهة بشك : بيج شي ..

هزت راسهة بلا اباوع گصتهة بدت تعرگ ووجهة احمر ..
طلعت الجنطة الي گالت عليهة جنطة ريم ..
حطيتهة بالباب والتفتت عليهة : يلة امشي ..

صافنة عالغرفة وما منتبهة علية ..
لزمتهة من ايدهة : مريييم وين صافنة ..
انتفضت هي بشكل غريب ورجعت ليورة ..

هزت راسهة ونزلت عالسريع : مابية شي ..
اضطريت انزل الجنطة سحل بوحدي ..

راسم //

دخلت للبيت من بعد ما راح الشيخ ..
رحت لغرفتي ذبيت الغترة والعگال ..

فجأة دخلت مريم وجهة احمر وتتنفس بسرعة ..
طبگت الباب ورجعت ضهرهة علي وايدهة على گلبهة ..

رحتلهة بسرعة : مريومة بيج شي ؟
ما تباوعلي ما منتبهتلي ..

رفع راسهة بيدي وحطيت عينهة بعيني وحجيت بهدوء بس من داخلي خايف عليهة : مريم باوعيلي حبيبي شبيج .. احد مأذيج ؟؟

باوعتلي لحضات وعيونهة غورگت ..
طبگت حواجبهة وحطت ايدهة على حلگهة ورگضت للحمام ..
تأففت عرفت صاير وياهة شي لان ما تجيهة هاي الحالة الا من تضوج ..

بقيت انتضرهة لحد ما طلعت من الحمام ..
رحتلهة لزمت وجهة بيدية وامسح دموعهة بأصابعي : متأذية ؟

هزت راسهة ب اي .. اشرت على معدتهة : معدتي توجعني وماكدر استفرغ ..
راسم : من شنو .. احد مزعلج ..

هزت راسهة وخنگتهة العبرة : رحت اني وجيلان للمخزن الفوگ نجيب الملابس الشتوية ..

بلعت ريگهة واني عرفت شبيهة .. تذكرت من جان عمرهة ١٤ سنة حبستهة نعمة بذاك المخزن وقفلتة عليهة بليل .. جانت رايدة تبقيهة بي بس ريم اجت گالت اسمع صوت مريم فوگ .. من صعدنة فوگ لگيناهة رابطتهة بحبل وهي ترجف وصافنة عبالك مو بوعيهة ..

فزيت متفاجئ من حسيت بأيدين مريم حاوطتني وراسهة على صدري ..
حضنتهة وايدي على شعرهة : ليش خايفة يروحي ؟؟ ما تگدر تسويلج شي بعد ..

اخذتهة گعدتهة عالجرباية وكعدت اني وسحبت راسهة حطيتة على رجلية ..
العب بشعرهة واتأمل شكلهة الي ترتيبة وخلقة مابي ولا غلطة .. بس يمكن حضهة عكس شكلهة ..

حجت بصوت هادئ : احجيلي قصة ..
ابتسمت وكرصتهة من خشمهة : مو تتدللين .. بس مو قصة هي موقف حلو ووياه بيت شعر ..
هزت راسهة وتستمعلي ..

مررت اصابعي على كذلتهة وحجيت : القصة تحجي عن الاستاذ والشاعر حمدي الحمدي ..
بيوم من الايام راح الشاعر حمدي للناصرية ..

وبالطريق صار عطل بالسيارة العبرية الي هو راكبهة ..
وگفت قريبة يم التل العباسي والي يسمونة هسة (ام العباس)

وصادف ان الجو جان حار وصيف .. اضطر الشاعر والركاب ينزلون من السيارة وينتضرون يمهة لحين ما تتصلح السيارة ..

وبأثناء هالشي .. جانت اكو وحدة ضمن الركاب لابسة خمار ..
ومن قوة الهوى طار الخمار وكشف عن وجهة ..

مررت ضهر اصابعي على خدهة بخفة : وجانت غاية بالجمال .. هام بشكلهة الشاعر حمدي ..

تصلحت السيارة وطلبو من الركاب يرجعون للسيارة ..
الشاعر حمدي تمنى لو ياخذ العطل وقت اكثر ويبقى هو يتأمل هالحسن الي الله سبحانة خالقة ..

وما الگة الا ان يرتجل هالابيات الي تعبر عن حالة وتگول ..

هل گعدة يلاهي دمهلينة ..
عليها من البيابي دمهلينة ..
على هونج يدنية دمهلينة ..
مادام اضعونة انطبگن سوية ..

باوعت لعيونهة مغمضات وغافية ..
دنگت بست جفونهة .. بقيت كاعد ما اتحرك خاف تكعد ..

حارث // اليوم الثاني ..

گاعد ابيت ابوي بالديوانية ويمي رضوان ..
يهز برجلة بعصبية ..
تنهدت : رضوان بس على كيفك .. يعني هو الولد شمسوي .. ما بيهة شي اذا خطبهة ..

عاط بية : شني ما بيهة شي .. حارث لا تخبلني .. اني ذاك اليوم شفتة شلون يباوعلهة ويسولف وياهة .. وهي منطيتة مجال وهو عبالة هم انعجبت بي .. ما يدري هي هاي طبيعتهة ..

تنهدت : هسة شتريد تسوي ..
فرك وجهة : مادري حارث .. خاف توافق علي ..
حكيت راسي بتفكير واني تصعب علية حالة ابن عمي وصاحبي ..

تذكرت موقف جبران هم نفس الشي ..
التفتتلة وابتسمت : ليش ما تجرب تحاجيهة .. يمكن تقتنع بيك .. يعني مثل ما سوى جبران .. وتعرف الباقي انت .. بلكت تضبط وياك مثلة ..

رضوان : جبران جان يدري بيهة تحبة .. ديلارا ما عندي وياهة ذكرى زينة .. يعني على گد السلام واضا اباوعلهة حتى ما ترفع عينهة علية .. يعني حتى ما حاطتني ابالهة ..

رفعت اكتافي : يا اخي جرب .. يمكن هي من نوع البنات الي ميبينون حبهم .. يمكن هي هم معجبة بيك ..

حك لحيتة : شلون اشوفهة ؟ تدري بية ما اروح لبيت جدي ..
ابتسمت : ولا يهمك خليهة علية ..

رفعت تليفوني واتصلت على ريم گتلهة انزلي ننتضرج بالديوانية ..
شوية ودخلت ريم گعدت يمنة ..

باوعتلنة : اي احجو شبيكم ..
حجيتلهة على رضوان بعد ما طلبنة منهة متحجي شي ..

باوعت لرضوان : زين شلون هسة .. شتريدوني اسوي ..
حارث : بكل بساطة .. انتي مو گلتيلي اروح لبيت جدي اجيبلج ملابسج الشتوية ..

هزت راسهة : اي ..
ابتسمت : المطلوب منج تخابرين جيلان هسة وتگليلهة جيبي ديلارا وياج وتعالن وية حارث عزلن وياي الملابس وهم اعزمجن عالعشا .. وبس ..

طبگت حواجبهة : وليش اسوي هيج ؟ شتردون ..
تأففت بقلة صبر : ما ماخذة من ذكائي ولا شوية .. وج نريدج تخابرينهن حتى تسويلنة فرصة تخلي رضوان يشوف ديلارا ويحجي وياهة يحاول يقنعهة ..

رفعت حاجبهة : يعني مثل ما سوت جيلان لجبران وبسمة ..
رفعت حاجبي : اعوذ بالله حتى هاي حجتهة الج ..

ريم : المهم هسة .. اني ما اعرف اجذب ..
رضوان : ريما اول مرة اطلب منج شي .. ماريدهة توافق على سمير .. بس اريدهة تنتضرني لبين ما تهدئ الامور بيني وبين عمي .. ساعديني هالمرة ..

تنهدت : امري ل الله ..
طلعت تليفونهة واتصلت على جيلان ..
سحبتة منهة وشغلت مكبر الصوت ولزمتة بيدي ..

جيلان : هلو ريمي ..
ريم : هلو جلاتينة .. شلونج ..

ضربتهة وحجيت بصوت خفيف : وكت الشلونج هسة مو مساع تتخابرن انتن ..
جيلان : الحمدالله .. اذا خابرتي على ملابسج ترة جاهزات بالجنطة بس كون يجي اخوج الغثيث ياخذهن ..

فتحت عيوني واشرت على نفسي : غثيث ؟؟
ردت احجي بس رضوان حط ايدة على حلگي ..

ريم : اگول جيلان ليش متجين تساعديني نرتب ملابسج سوة ..
جيلان : هنة هدوم .. شسوي جاية وياج ..
ريم : اي مو حتى هم الم ملابسي الصيفية واضمهن .. يلة تعاي لا تصيرين نحسة ..

جيلان : ماشي اشوف امي شتگول ..
ريم : احم .. وجيبي وياج ديلارا .. هم نتونس شوية نسولف ..

جيلان : والله ما اوعدج .. ديلارا صارلهة جم يوم نفسيتهة مو كلش زينة مشوشة من ذاك اليوم ..
حارث اشرلي كملي حجي : ليش شبيهة ؟؟ هي متريدة شنو ؟؟ اذا متريدة معناها خل ترفض محد يجبرهة ..

جيلان : اتگول اذا رفضت راح يگولون عندي شي وية رضوان وبيناتنة شي .. وج هي امي وشكت بيهة عاد شلون بابا .. واصلا تردين الصراحة اني اريدهة توافق ..

رضوان طبگ حواجبة ..
ريم : ليش ؟؟

جيلان : يعني اذا رفضت راح تشد وياهة ام رضوان .. وانتي ما سمعتي حجيهة ذاك اليوم وشنو من تهديدات .. وبعدين هو خاطب بت خالة ..
واني اشوف بدل هالهوسة كلهة .. توافق على سمير .. هم خوش ولد ويشتغل .. والاهم من هذا كلة ان حلو وشخصية ..

ريم : احممم .. جيلان لازم تجيبين ديلارا خل تطلع من جوهة شوية .. يلة احجي وياج بعدين هسة سدي ..
سدت التليفون منهة ..

رضوان يهز برجلة بعصبية ..: كلهة واگفة ضدي .. شمصخم اني بس اريد افتهم .. امي ضدي وعمامي ضدي ادور هسة حتى خواتهة ضدي .. مناك راسم ايگول مريم تريدهة توافق على سمير وهسة جيلان هم تريدهة لسمير ..

باوعت اني لريم بعصبية : وهاي بت عمج وين شايفة صخمان وتگول حلو وشخصية ..

ريم ضربتني على رجلي : وكتك هسة انت ..

گام رضوان يريد يطلع ووگفتة : وين رايح يمعود ؟؟
رضوان : رايح اهج .. بعد شعندي ؟؟
حارث : وين متريد روح .. بس من اخابرك واگلك ديلارا هنا انت تعال ..

هز راسة وطلع ..
ريم باوعتلي : وشلون يشوفهة اذا جيلان اجت ؟؟ ما سمعتهة هي ممقتنعة برضوان ..

رفعت اكتافي : هاي بعد يمج .. انتي حاولي تلهينهة بسالفة اي شي .. يلة اني رايح اجيبهن واجي ..

طلعت ورحت لبيت جدي ..
نزلت ورحت اسولف وية حبوبتي ..

شوية ونزلت جيلان .. لابسة بنطرون اسود مخطط بأبيض ووياه قميص نيلي ضيگ بس رداناتة عريضة ..
شعرهة الاسود القصير جوة اكتافهة بشوية وعايفتة مفتوح ..

بلعت ريگ وبقيت اباوع لكل تفصيل بيهة ..
حتى رمشة عيونهة البطيئة عبالك تصوير مبطئ .. هالحركة منتبه الهة عدهة مثل عمي عاصم وهادي ..

حبوبتي حجت : رايحة لعرس شني ولج .. شعدج متزينة ..
جيلان : حبوبة انعزمت عالعشا .. قابل اروح بالدشداشة يلة ترتاحين .. غير اكشخ ..

حجيت بگلبي والله لو تلبسين كونية هم اشوفج حلوة بكل الحالات ..

حارث : ريم گالت انتي وديلارا .. وينها ؟
جيلان لبست حجابهة : هسة تجي ..

نزلت ديلارا .. هم مبدلة بس مبينة الضوجة بيهة ..
استأذنت من حبوبتي وطلعنة ..
حطيت الجنطتين بالسيارة مال ملابس ريم ..

صعدت اني بكرسيي ..
انفتح الباب الگدام وصعدت جيلان بصفي ..
باوعتلهة متفاجئ وابتسمت : حي الله مشمش .. شعجب گدتي يمي ؟؟

جيلان : عيب مو حلوة بحقك نعوف الكرسي الگدام فارغ .. وبما اني الجبيرة گعدت يمك ..

استغربت : شلون الجبيرة .. انتن توم ..
جيلان : لا اني صرت قبلهة بخمس دقايق .. اني الجبيرة ..

ابتسمت : احلا جبيرة .. نورتي السيارة ..
جيلان : شكراً منورة بوجود صاحبهة ..

حركت السيارة وابتسامتي على وجهي اول مرة تحجي وياي مبتسمة وبحوار طبيعي ..
ضحكت على روحي الي يشوفني ايگول متغزلة بية ..

وصلتهن للبيت وهنة نزلن .. ونزلت الغراض ..
خابرت على رضوان گتلة يجي .. شوية واجة ..

گعدنة بالصالة ..
خابرت ريم گتلهة دزي ديلارا للديوانية بشغل واني راح اطلع برة ..
گمت اريد اطلع وانضربت رجلي بالطبلة وانگب الجاي كلة على دشداشتي ..

رجلي كلهة طاح عليهة جاي .. واني اتعقد من الدبگ ..
طلعت من الديوانية ودخلت للصالة ..
اسمع اصواتهن بالمطبخ .. صعدت لغرفتي ..

ذبيت دشداشتي ودخلت للحمام ..
سبحت عالسريع هم لان اريد اروح اشوف عباس وجبران ..

لبست البرنص .. حطيت الخاولي على راسي وطلعت واني انشف ..

طلعت واشوف جيلان يم الميز مدري شتدور ..
من شافتني گمزت ..

الكاتبة : سارة الشمري🖤

هلووو .. مشتاقتلكم .. اعذروني البارحة منزلت بس والله مشغووولة ..
واني كلتلكم قبل اذا مصارلي مجال ما انزل وادري بيكم تتفهموني .. وفعلاً كلامكم والله يفتح النفس ويخلي الواحد ميكدر مينزل ..

اعشقكم مو بس احبكم ❤️.. ولا تنسون صوتو وعلقو وكلشي ينداس دوسو ..