رواية بنات للزمن الفصل الثاني عشر 12 - بقلم سارة الشمري

الكاتبة : سارة الشمري 🖤

انا المشتاكلك بــــــــس رايد انســــــــاك
واريدنك تجيني ولا تجيني
وماريد التقي فد يوم وياك
من الكاك كون انطيك عيني
مدمن بيك حد منازع الروح
ما تدري بقدر شوكي وحنيني
يمدمن بيك ما فكرت فد يوم
اشتريتك بالغلا ما تشتريني ؟

ليلى //

گاعدة بغرفتي واراسل عالگروب مال البنات ..
وطبعاً حديث الگروب جان بت زوج خالتي ..

حنين : باجر اروح لبيت عمتي .. منو تروح ..

شهد : شكد حشرية .. شعليج انتي ؟؟
حنين دزت سمايل يباوع صفح : عادي نتعرف ..

رديت عليهة : اگول حنونة بلا تفاهة .. هي غير تتعود علي بيت ابوها بالاول .. لا تضايقون عالبنية من اول يوم ..

براء : اي صح .. وبعدين احنة شعلينة .. قابل هي وين جاية .. غير لبيت ابوها .. احنة شكو نروح نزعجهة ..

حنين : بس ماكدر انام بليل من الفضول .. يعني اريد اشوف بت عمتي الجديدة ..

اسماء : سويتيهة بتها .. ايجوز البنية متتقبلهة ..
حنين : وليش يمة متتقبلهة .. وين تلگى مثل عمتي هويدة .. والله تشيلهة بالصلوات ..

شهد : اي شبيجن .. مو دوم تسمعن عمتي اتگول اتمنى يجيبها تعيش يمنة لان تحس بتأنيب ضمير وما تريد تحس ان هي السبب الي خلى ابوهم يبتعد عنهم ..

براء : زين شتتوقعون اطباعهة .. او شكلهة ..

ليلى : اتوقع تكون حلوة .. وتكون طيبة وهادئة .. يعني مرتبة وهيج شي ..
اسماء : اني هم احسهة هيج .. واتوقع تكون حلوة مثل اخوها حارث لان شفتة مرة من اجة على عمو رياض ..

شهد : اي صح اني هم اتوقعها هيج .. لان خالتي هويدة اتكول حبابة ..

حنين مثل العادة كسرت التوقعات : لا والله اني اتوقعها وكحة ومزينة راسهة .. ولسانهة طويل .. وقصيرة ومدهربة .. وما يعجبهة العجب ..

براء : حبيبتي لا تشبهيج العالم بيج ..
حنين دزت سمايل منصدم : وجججججع .. شبية اني لا قصيرة ولا مدهربة ..

ضحكت اني ودزيت : لا والله قصيرة ومدبدبة ولسانج طويل ووكحة وما يعجبج العجب ..

حنين : هاااا .. اشوف گلبتن علية .. المهم هسة .. ليلى باجر شتسوون غدا ..

تنهدت بملل لان گلبت السالفة عالاكل مباشرةً ..
هالبنية شكد تاكل بس ما يبين بيها .. شكد احسد هيج ناس ..

اجاني اشعار من نفس الرقم مال ذاك الولد ..
دخلت عالرسالة : السلام عليكم ..

بدون تفكير كتبت : وعليكم السلام .. تفضل ؟؟
كتب : حجيت وياج مرتين وانة لهسة ما اعرف اسمج .. يبت الناس اخذتي عگلي ..

انصدمت من جرأتة .. : شنووو !!

كتب : هي شني الشنو .. مو شفتج لهسة وعيونج مرسومة ابالي .. كل ما اتذكرهن يتدوده حالي .. بس گليلي شسمج ..

ابتسمت مادري ليش من كلامة ..
بس كتبت : على فكرة ترة اني مو من النوع الي تحاجي شباب وما الي بهالسوالف مال الحب والخرابيط .. يعني طلبك مو عندي ..

كتب : كفيلج الله ولا انة مال هالسوالف .. وبيوم الشمرتلج الرقم هاي جانت اول واخر مرة سويتهة .. وهم سويتهة من ورة صاحبي لان تحداني وگالي مو كدهة .. وانة ما رضيتهة على روحي وگمت شمرتلج الرقم .. ومن يومهة ما ناسي شكلج ..

استغربت : يعني ممرقم بنات من قبل ..
كتب : لا والله ما مرقم .. انتي اول وحدة .. واذا تگولين مالج بسوالف الحب .. هم مالج بالصداقة .. يعني ما بيهة شي اذا تعرفت عليج .. وسولفنة ..

كتبت : اممممم .. اوك موافقة ..

كتب : همزين .. انة اسمي عباس .. وعمري ٣٢ من البصرة وعايش بكربلاء ..

دزيتلة : واني ليلى .. عمري ٢١ من كربلاء ..

عباس : محلى الاسم .. يليلة ..

دزيتلة : هاا ..
عباس : ها شبيج يعني ما اتغزل بصديقتي ..

كتبت : بعدنة ما گلنة حلال ..
عباس : انة من يوم الشفتج گلت حلال ..

ليلى : اذا راح تبقى تحجي هالشكل معناتها اني امشي .. لو تغير الموضوع ..
عباس : لا عمي سكتت .. يلة سولفيلي عليج ..

ديلارا //

گاعدة بالمطبخ .. من توفى جدو لليوم واني احس ما بقى بحياتي لون ..
شلون ما اشوفة وانحرم منة .. احاول اكون قوية .. بس مو بيدي اشتاقلة ..

البيت گئيب .. ريم صارلهة يومين من راحت لبيت ابوها ..
مريم اكثر وحدة متأثرة بوفاة جدو .. منعزلة بغرفتهة .. وما تنزل الا للضرورة ..

قاطع تفكيري دخول جبران للمطبخ ..
شافني كاعدة اجة كعد كدامي ..
كرص خدي : شلونهة الحلوة ..

ابتسمتلة بخفيف : ع الله .. انت شلونك ..
تنهد : ملل وضوجة وگئابة .. البيت ما ينطب ..
ديلارا : اي والله خنگة ..

جبران : مريومة شلونهة .. ما جاي اشوفهة ..
ديلارا : مريم بغرفتهة .. صدفة تنزل .. الا صدك .. راسم شوكت يجي ..

جبران : بهاليومين انشالله .. ومن يجي بعد يستقر هنا .. حتى الطابق الفوگ خلص تعديل .. حارث ما بقة شي ما سواه ..

دك تليفونة هو ستأذن وگام ..
بقيت گاعدة بمكاني .. شوية الا ودخلن مجموعة نسوان ..
گمت بسرعة شلت الاستكان مالتي ورحبت بيهن : اهلا بيكم تفضلو تفضلو ..

سلمن علية بترحيب ..
وحدة جبيرة حجت : ما شاء الله انتي وحدة من التوم بنات عاصم مو .. منو منهن ..
هزيت راسي : اي خالة اني ديلارا ..

ابتسمت : الله يحفضج من العين حبيبتي ..
دخلت هي جوة بالصالة يم حبوبتي ..

طلعت الصينية والاستكاين وگعدت اصبلهن جاي ..

دخل رضوان للمطبخ ..
حجة بهدوء : صبي جاي .. خوالي هنا .. مال ٤ نفرات ..
هزيت راسي وجاي اصب بالجاي ..

حجيت بتسائل : يعني النسوان الي اجن هسة يصيرن اخوالك ..
رضوان : اي مرت خالي واختهة وبتهة ..

هو گعد عالكرسي بين ما احط الكليجة بالمواعين ..
دخلت جيلان عالسريع وبدون ما تنتبه لوجود رضوان : وج دلو هذني النسوان حطن عينهن عليج .. شو يسألني عليج هسة وگالن خو ما مخطوبة ..

طگيتهة خزرة ..
شلت الصينية وحجيت : هاي الصينية جاهزة رضوان ..
گام رضوان رافع حاجب وما عاجبة الحجي ..

جيلان حجت بأحراج : ها رضوان شلونك .. اعذرني ما شفتك ..
رضوان : لا يابة معذورة وينج ووين السلام ..

طلع من المطبخ وجيلان تباوع بعصبية : اوووي هذا شبي .. شحجيت قابل هسة اني وهيج عصب ..

كرصتهة من زندهة : وجعوي .. هذني التحجين عليهن يصيرون اخوالة ..
جيلان : وشگلت عليهن اني .. سبيتهن مثلاً ..

سمعت حبوبتي تصيح عالجاي ..
شلت صينية النسوان واخذتهة ..

دخلت النسوان وعيونهن ما فارقتني ..
حطيتلهن الجاي .. وردت اطلع ..
صاحتني نفسها المرة : استريحي حبيبتي خل نشوفج ..

حبوبتي باوعتلهة وما عاجبهة : لا يمة عدهة شغل .. اختهن جاي تنقل لغرفة رجلهة وهنة يساعدنهة .. روحي كملي شغلج حبوبة ..

هزيت راسي وطلعت همزين نقذتني حبوبتي ..
رحت للمطبخ ..
باوعت من الشباك عالديوانية لگيت الاماعين مال الولد الي يبات بالمعمل ياخذولة اكل منا وهسة المواعين راجعة وعايفينهة برة ..

حطيت شالي على راسي وطلعت حتى اجيبها لان بس يشوفهة ابوي يضل يحجي لان ما يقبل عالهوسة ..

دنگت شلتهن من الگاع بس اختل توازني وطاح القبق (الغطاء) مال الجدر بالكاع وطلع صوت ..

سمعت صوت جاي من جهة الحمامات الرجالية : الله الله .. على كيفج ..
التفتت شفت ولد شاب لابس دشداشة سودة ويمشي علية ..

دنك شال القبق وحطة فوك الجدرية وهوة يباوعلي : انتبهي لا يوگعن ..
هزيت راسي ودرت وجهي اريد امشي : شكراً ..

رجع حجة : انتي منو ؟؟ ما شايفج هنا قبل ..
حجيت بهدوء : اني بنت عاصم ..

راد يحجي بس قاطعنة صوت رضوان العصبي من الديوانية : خيييير سمير .. من شوكت تسولف وية نسوانة بالباب ..

التفتتلة وطبگت حواجبي : ما حجة شي ترة ..
قاطعني بعصبية وخزرة : امشي طبي جوة ..
سمير : يابة اسف بس وكع الماعون منهة وشلتة .. ما حجيت شي ..

رضوان : وشني ما عدهة ايدين وتشيل الماعون .. لو الا تتصرف من وحدك انتة ..
ديلارا : رضوان ترة الموضوع ما يستاهل هالعصبية ..

باوعلي بصوت حاد : وانتي ليش بعدج واگفة .. امشي جوة لا ابتلي بيج ..
عصبت وما حجيت شي دخلت للمطبخ ..

ذبيت الاماعين عالسنك ..
ذبيت شالي عالكرسي بعصبية ..
على شنو كل هالعصبية .. قابل شحجة الولد ..
احنة ما عدنة مشكلة نحجي وية ولد بالحدود بس همة متحفضين زيادة عن اللزوم ..

انفتح باب المطبخ ودخل رضوان بعصبية واني حتى شالي ما لابستة : شمطلعج برة ..
رجعت ليورة : اجيب الاماعين البرة باقيات من البارحة ..

نتر بوجهي : احد عتب عليج وگالج جيبي الصخام .. لو مكيفة تسولفين وياه وحلالج الجو من سمعتي بأمة حاطة عينهة عليج ..

فتحت عيوني : شنووو .. عيب عليك تحجي هيج .. وبعدين ما صار شي ترة .. وهو طلع بالصدفة .. واذا انت تشوف هالموقف عيب .. ف احنة عدنة عادي وما بيها شي اذا حجيت وية احد بدون تجاوز الادب .. وهو شال الماعون من وگع مني .. يعني ساعدني ..

قرب خطوة مني : وانتي ما عندج ايد تشيلين الماعون ..

تأففت بنرفزة : هسة انت ليش حارك اعصابك .. مو ذاك اليوم گتلي البسي حجاب واحترمي تقاليدنا .. واني لبستة وما حجيت شي .. وهسة اگلك انت هم احترم حريتي ولا تقيدني عالطالعة والنازلة .. ترة ما الك حق تتحكم بية ..

دخلت جيلان بسرعة : شبيكم اصواتكم طالعة .. شكو ؟؟
هزيت راسي وسحبت شالي من الكرسي : ماكو شي ..

ردت اطلع بس صارت بوجهي بت خالة يطلع عمرهة تقريباً ١٦ سنة ..
استغربتها من شافت رضوان ابتسمت وعدلت حجابهة وحجت بخجل : شلونك رضوان ..

رضوان وعينة ما نزلت عني وبعدة يخازر .. : هلا هيام ..
دار وجهة وطلع ..
طلع رضوان ويمكن دخل وكعد يم الزلم وهي بعدهة تباوع عالباب .. هاي شبيهة ..

جيلان طابگة حواجبهة مستغربة مثلي : ترة مشة ووصل عليمن صافنة بعد ..
انحرجت هي ونزلت راسهة بأبتسامة خجل : ها اي ما انتبهت ..

طلعت هي من المطبخ ورجعت للصالة ..
جيلان تباوعلهة : هاي شبيهة مفهية .. وتعاي انتي شعندة وياج رضوان ..

حجيتلهة الموقف والي حجاه وهي عصبت : هذا شبي ؟؟ شنو حسدناه من گلنة هادئ .. وبعدين مالة حق يحاسبج ..

رفعت اكتافي ..
رجعت حجيت : الا صدك شعندج وية حارث گالبة خلقتج علي ذاك اليوم ..
تأففت بملل : اففف لا تذكريني بي .. خلينا خلصانين منة همزين راح لبيت ابوه ..

شو هستوها كملت حجايتهة وانفتح باب المطبخ ودخل حارث : السلام عليكم ..
ابتسمت اني وباوعت لجيلان الي گلبت خلقتهة : ابن الحلال بذكرة يبين ..

حارث ابتسم : ليش تحجون علية شني ؟؟
جيلان باوعت وهي رافعة تك حاجب : ايگول المثل .. لو ذكرت الجلب حضر العصا ..

دارت وجهة وطلعت من المطبخ ..
حارث وجهة الابيض گلب احمر من العصبية ورافع حاجب ومنزل الثاني دليل على عصبيتة ..

طلع ورگع الباب بكل قوتة ..
گمزت من قوة الضربة .. : بسم الله شبيهم ذولة ..

من طلع رجعت جيلان دخلت للمطبخ : همزين مشة ..
باوعتلهة بعصبية : شبيج وية الولد .. ترة الصوج كلة بيج .. هو كلشي ما مسوي وولا حجة شي .. بس انتي لسانج شطولة .. وتردينة ما يحجي عليج .. وفوگاهة انتي الكارهتة ..

باوعتلي بملل ..
طلعت صينية وحطت بيهة كاسة ..
صبت شوربة تمن وحليب من الي سوتهة امي قبل شوية لحبوبتي وحطت شكر يمهة ..

ديلارا : وين ماخذتهة هاي ..
جيلان شالت الصينية وهي تطلع : لمريم ما اكلت شي مساع ..

جيلان //

كل ما اشوف حارث اتذكر من حجة علية بالتليفون ذاك اليوم .. لا تگلولي تبالغين .. بس لهسة اتذكر من گالي ولي وزقنبوت وشايفة روحج وجذابة ..
واني مو بهالسهولة انساهن ..

اخذت الصينية مال الشوربة وصعدت لغرفة مريم لان صارلهة جم يوم متاكل زين وحيل ضعفت ..

دخلت لگيتهة نايمة عالجرباية ..
اقتربت منهة .. كعدت على طرف الجرباية ..
حجيت بصوت خفيف : مريومة ؟؟

همهمت بصوت تعبان : هممم ..
مررت ايدي على شعرهة الناعم البي لون شگار خفيف : البرنسس ام شعر الحلو متگوم تاكل شوربة شوية ..

دارت وجهة الي : ما اشتهي شي ..
جيلان : بس هيج راح تتمرضين ومساع رضا گال ماما صايرة مريضة وبس تنام ..

مريم : شسوي مالي نفس بشي ..
درت وجهي وتنهدت بتمثيل : خسارة .. شلون شوربة تمن وحليب وبعدهة حارة .. ووياهة رشة شكر .. حرامات راح ترجع بماعونهة ..

ابتسمت : جيلان ترة اني مو رضا تضحكين علية بهالحجي ..
رفعت اكتافي : والله تصرفاتج مثل رضا .. وهم هوة اعقل منج .. عالاقل من يجوع يجيني يگلي خالة جلاتين اريد بطاطا .. وهسة انتي حتى شوربة متقبلين تاكلين .. يلة گومي لخاطري اكلي لگمتين ..

عدلت گعدتهة وابتسمت : راحت ريما وانتي اجيتي بمكانهة يعني .. هم هيج جانت تلح ..
رفعت الخاشوگة وحطيتهة بحلگهة : شنسوي ندللج ونخاف عليج .. غير اختنا الجبيرة ..

مديتلهة الخاشوگة وهي صارت تاكل : عاشت ايدج طيبة ..
جيلان : لا وين هم يلة اسوي اندومي .. هاي امي سوتهة ..

وگفت الخاشوگة بيدهة ثواني .. رجعت كملت اكل : مو اگول انتي گلتي ذاك اليوم اذا اسوي شي اگلب المطبخ كلة ..

ابتسمتلها واباوع لشكلهة وهي تاكل بهدوء واللكمة تاخذ شوية يلة تاكلهة مو ليگول شوربة ..
شكلهة نسخة من امي .. عيونهة شعرهة خشمهة حلگهة حتى حركاتهة ..

ريم //

مر يومين من اجيت لبيت ابوي ..
انزل بس بوقت الاكل والاوقات الي يكون ابوي موجود بيهة .. بعدني متوترة رغم ما شفت شي مو زين من هويدة ..

رفعت راسي للساعة جانت ب ٥ العصر ..
گمت بملل .. شلت شعري الطويل بالقراصة ..
لبست طوگ بشعري على شكل ارنب حتى يلزم گذلتي ..

طلعت من غرفتي ونزلت للصالة ماكو احد ..
توجهت للمطبخ شفت هويدة واگفة وتحضر اكل ..
تعمدت اطلع صوت بخطواتي حتى تنتبه لوجودي ..

التفتت علية وابتسمت : ريما .. تعاي حبيبتي ..
ابتسمت واني مقررة اطلع من القوقعة الي حابسة نفسي بيها : اجيت اشوف اذا محتاجة اساعدج بشي .. انشالله ما اكون ازعجتج ..

ابتسمتلي : بالعكس .. تعالي .. اني اصلا امل وحدي هنا .. واذا تگعدين يمي اكون ممنونة ..

كعدت عالكرسي : اساعدج بشي ؟؟
هويدة : ساعديني بشي واحد ..
هزيت راسي : شنو هو ..

حطت ماعون گدامي : تذوقيلي هذا البورك وانطيني رأيج بي ..
شلت قطعة منة واكلتهة : عاشت ايدج .. طيب ..

ابتسمت وصارت تذوقني من المقبلات الي مسويتهن وفعلاً جان اكلهة طيب ..

حجيت بأبتسامة : بس ترة ميصير تنطيني من كلشي خاشوگة بس واني اضل اريد اتذوق متخليني ..

ضحكت هي : احسن .. ماريدج تشبعين .. ضمي جوعتج للعشى ما بقى شي ويجي ابوج وحارث ..

شوية ودخل حارث ..
ابتسم من شافني بالمطبخ ..: الحلوة بينت اليوم .. شلونج ؟
ابتسمتلة : الحمدالله .. وراح اكون احسن اذا استعجلتوا انتة وبابا حتى نتعشى لان جوعانة ..

على حجايتي دخل ابوي : يخسى الجوع ريما هانم ..
باسني براسي ..
هويدة حجت بأبتسامة : الله يساعدك ابو حارث ..
ابوي ابتسم : ويساعدج بوية .. يلة حضروا العشا بين ما نصلي ..

هويدة : من عيوني ..
گمت وياهة : واني اساعدج بي حتى نخلص عالسريع ..
طلعو حارث وبابا ..
هويدة بضحك : لا واضح الجوع بيج ..

ابتسمت وشلت السفرة للصالة ..
حضرنة الاكل بين ما صلو همة وبعدين اجتمعنة عالاكل ..

هويدة طبعها حلو .. ومبينة حبابة ومو مال مشاكل ..

اذا جان هذا طبعهة الحقيقي وما عدهة مشكلة ويانة .. لعد ليش ابوي طول هالسنوات جان بعيد عنة ومو كلش يختلط ويانة .. شنو الي خلاه يبتعد ..

خلصنة عشا وگمنة اني وهويدة شلنة الاماعين ..
هي اخذتلهم الجاي واني بالمطبخ اعزل بالاكل حتى نغسل الاماعين ..

اجت هي تغسلهن وياي ..
دك تليفونهة وهي رفعتة ..: هلا حنين ..
.. الحمدالله انتو شلونكم ..
باوعتلي وابتسمت .. اي وريم هم الحمدالله زينة ..

.. ليش اني شوكت ما اجيت بعزيمة الجمعة مو تدرين بأمي ما ترضى الا اجي وهذا شرطهة على ابو حارث ..

.. حنين انتي على شنو مستعجلة ترة باجر خميس يعني الجمعة عگب باجر .. ليش داگة هسة تنطين خبر ..

باوعتلي ورجعت ابتسمت .. اهاااا .. اي گولي هيج من البداية .. ماشي اشوفهة وارجعلج خبر .. مع السلامة ..

باوعتلي وابتسمت : هاي حنين بت اخوي تسلم عليج ..
ابتسمت : الله يسلمج ويسلمهة ..

هويدة : احنة عدنة عادة بعائلتنة وهي ان كل جمعة ننجمع ابيت اهلي كلنة لو عالغدا لو عالعشا .. والبنات من عرفن بيج اجيتي حابات يتعرفن عليج .. وهسة داگة حنين تطلب مني اخذج وياي للجمعة حتى تشوفينهن .. وبنفس الوقت تغيرين جو .. شتگولين ..

ابتسمت وحسيت بأحراج بس بنفس الوقت ماكدر اروح ..

ريما : اممم خالة والله ماگدر اروح لان مثل متعرفين اربعين جدو بعدة ما طالع واني سمعت من حبوبتي ان ميصير اروح لبيت احد واحنة عدنة ميت وبعدة بالاربعين .. وهم باجر خميس نسوي ثواب لجدو واكيد الجمعة هم يسوون ..

اعتذريلي من البنات انشالله على غير مرة ..
اني هم حابة اتعرف عليهن بس الفرصة متسمح ..

هويدة : ولا يهمج حبيبتي .. انشالله الجايات اكثر .. والبنات اكيد يتفهمن ..

مريم //  ورة ٣ ايام ..

گاعدة بغرفتي الجديدة من بعد ما جبرتني حبوبتي انتقل للطابق الفوگ الي جهزوه جديد لان حسب كلامهة اتگول لازم من يجي رجلج يلگاج گدامة وانتي تستقبلينة ..

كاعدة ابدل بملابس رضا ..
شفتة ضايج ومطنگر ..

لزمت خدودة : شبي حبيبي ضايج .. منو مزعلة ..
رفع راسة وبرطم : انتي ..
ابتسمتلة : وشمسويتلك انتي .. گولي حتى اروح اعاقبهة ..

حجة بلهفة زعلان : انتي مو گلتي هذيج المرة اجيبلك السيارة ام الريموت .. صار هواي وما جبتيلياهة ..

مريم : امممم .. نسيتها .. يعني غير تذكرني بالاول .. وبعدين اني مطالعة حتى اشتريلك .. من اروح للسوگ اجيبلكياهة ..

دار وجهة زعلان ..
اندك الباب هو گمز وراح يركض يفتحة ..

فتح الباب وصاح : عموووو راسم ..
گمت بسرعة لان مادري بي يجي اليوم اصلاً ..

شالة راسم ويبوسة : هلا بالسبع .. شلونك حبيبي ..
رضا مجلب برگبتة : زين .. جبتلي السيارة ؟؟

راسم : وشلون ما اجيبهة .. ام الريموت الردتهة ووحدة بدون ريموت .. بعد شتريد ..

حجيت بهدوء : الحمدالله على سلامتك ..
التفتلي راسم : الله يسلمج .. شلونج ؟؟
هزيت راسي :  الحمدالله ..

رضا : يلة عمو طلعلي السيارة حباب ..
استغربت : منين عرفت رضا يريد سيارة ..
ابتسم وباوع لرضا : هو حجة وياي من تليفون حارث .. وگال جيبلي وياك سيارة ..

نزلة بالگاع وراح جاب الجنط مالتة ..
طلعتلة اني ملابس من الكنتور وحطيتهن عالجرباية ..

هو فتح الجنطة وطلع كارتونة حجمهة وسط مال سيارة ورضا طار بيها ..
گعدو هو وراسم يركبون بيها ويشغلونهة ..
اخر شي اخذها رضا : اني راح اخذهة اشوفهة لزينة ..

طلع رضا .. وراسم گام ..
حجيت بهدوء واني اطلع ملابسة الي لابسهن من الجنطة حتى اغسلهن : حضرتلك ملابس اذا تريد تسبح لو تبدل .. راح انزل احضرلك شي تاكلة ..

يباوعلي مستغرب : مريم ماكو داعي تتعبين نفسج .. اني متعود واعرف اسوي كلشي وحدي .. مو شي جديد علية ..

باوعتلة بهدوء : راسم اني اعتبر هالشي واجبي .. يعني حتلو جنت انت متعود تسوي كلشي وحدك .. بس هسة اني اعتبر نفسي مسؤولة وهالشي واجب علية ..

سكتت شوية وحجيت : وهم شي ثاني .. اعرف انت هم انجبرت على هذا الزواج .. واساساً جان غلط .. بس لا تتقيد بية .. يعني انت هم الك حياتك وجان لازم تكون احسن من هيج .. يعني انت مناقصة شي حتى تتزوج وحدة ارملة ..

بس لا تخاف .. شوكت ما حبيت تتزوج اني راح اكون اول وحدة مأيدتك على هذا القرار وبنفسي راح اساعدك بهالشي ..

يباوعلي وطابگ حواجبة : اي والله يابة ما تقصرين .. اشكرج ..
راد يدخل للحمام بس حجيت اني : احضرلك الاكل ..

حجة بدون ما يلتفتلي : لا .. من اطلع اروح اشوف امي ..
دخل للحمام ..

طلعت ملابسة للحمام الي موجود بالصالة ..
الطابق الفوگ بي غرفتين وصالة .. وحمامين واحد بالغرفة الجبيرة والثاني بالصالة .. ف الغسالة حاطينهة بالحمام مال الصالة ..

حطيتهن بالسلة وگعدت اعزل الملابس الملونة وحد والملابس البيض وحد حتى اغسلهن ..
حطيت اول وجبة الملابس البيض وشغلت الغسالة ..

نزلت اشوف رضا وين .. لان نعمة هنا وخاف تسويلة مشكلة ..
دخلت للصالة لگيتة يلعب هو وزينة بالگاع ..
گاعدة بس ديلارا عالقنفة يمهم ..

گعدت اني عالقنفة يمهة وهي ابتسمت : الحمدالله على سلامة راسم ..
رديتلهة الابتسامة : الله يسلمج ..

ديلارا طبعها هادئ مثل ريم .. حتى بالشكل يتشابهن ..
بس جيلان بالعكس .. نفس طبع حبوبتي .. تضحك وتسولف وتختلط .. وحتى بالشكل تشبه حبوبتي ..

دخلت جيلان شافتنة وابتسمت : اووو الحلوات هنا ...
رضا طفر بسرعة : خالة جلاتين شوفي .. عمو راسم جابلي هاي السيارة ..

جيلان بادلتة الحماس : شو بلة .. اللله لونهة ازرگ .. انت تحب اللون الازرگ ؟؟
رضا : اييي همة الولد يحبون الازرگ .. بس اني احبة لان مثل عيون امي ..

ابتسمت على كلامة ..
جيلان مدت لسانهة بطفولية : مو بس امك عيونهة زرگ .. امي هم عيونهة زرگ ..
رضا تخوصر : بس امي احلا ..

جيلان : لا امي احلا  ..
رضا : دا اكولج امي احلا مو بكيفج .. خوش ؟؟؟
جيلان : اوووي فدوة يحجي بغدادي ..

رضا دار وجهة عنهة وطنشهة وكمل لعب ..
گعدت يمنة جيلان شو شوية ودخلت نعمة بيدهة المكناسة ..

باوعتلنة وحدة وحدة من فوگ ليجوة وما عاجبهة گعدتنة ..
ديلارا باوعتلي بأرتباك وسكتت واني هم سكتت ..

بس هيهات جيلان تسكت ..
حطت رجل فوك رجل ودارت شعرهة صفح وتفر طرفة بأصبعهة : خيييير عزيزتي شبيج تباوعين جنج ما شايفة .. اكو شي ؟؟

نعمة حجت بسخرية : اشوف الملائكة مجتمعات اليوم ..
جيلان : فعلاً .. بس الشياطين تحوم حولهن ماشالله ..

نعمة وجهة گام ينطي الوان ..
واني اباوع لجيلان واگول نيالج على جرأتج ..

نعمة التفتت لرضا وزينة وحجت بعصبية : گومو اريد اكنس ..
جيلان بعناد : لا ميگومون .. عوفيهم يلعبون ..

نعمة تخوصرت : وياهو اليكنس .. حضرتج ام اضافر ..
جيلان : اي اني اكنس من يخلصون لعب .. عندج شي ثاني .. 

نعمة شمرت المكناسة وطلعت تدردم : طبجن طوب .. خلنة البيت يخيس وصخ ..
جيلان صاحت وراهة : بعدنة ما شايفين بيتج .. عود من نشوفة نحجي ..

التفتت لجيلان :جيلان لا تتعاندين وياهة خاف تسويلج شي ..
جيلان : ختولي .. متگدر تسويلي شي .. بس اذا انطيتهة مجال راح تاكلني .. هاي يرادلهة واحد مثل لسانهة ..

تنهدت وگمت : بما ان انتن هنا .. اني اروح اگمل الملابس .. رضا يمجن ..
جيلان : روحي لا يضل بالج .. اني يمة ..

صعدت فوگ .. طلعت وجبة ملابس وخليت غيرهة ونشفتهن ..
دخلت للغرفة لان توقعت يكون راسم نزل وراح لامة ..

فتحت الباب ودخلت لگيت راسم ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري 🖤

هلو حبايبي شلونكم انشالله بخير ..
رأيكم بالبارت .. ورأيكم بالغلاف الجديد .. منو احلا هذا لو القديم ..

احبكم .. لا تنسون صوتو وعلقو وكلشي ينداس دوسو 😘