رواية بنات للزمن الفصل الثاني والعشرون 22 - بقلم سارة الشمري

الكاتبة : سارة الشمري🖤

لنفترق الآن ما دام في مقلتينا بريق
وما دام في قعر كأسي وكأسك بعض الرحيق
فعمّا قليل يطلّ الصباح ويخبو القمر
ونلمح في الضوء ما رسمته أكفّ الضجر
على جبهتينا
وفي شفتينا
وندرك أن الشعور الرقيق
مضى ساخراً وطواه القدر

نازك الملائكة ..

جيلان //

واگفين بالمطبخ ابيت عمو ضافر .. نسولف وية هويدة الي بسرعة اختلطنة وياهة لان عمرهة زغير وسوالفهة بعد احلا ..

دك تليفون ريم وطلعت تخابر ورجعت شوية ..
كعدت اني اساعد هويدة وريم بالزلاطة لان هاي الشي الوحيد الي اعرفلة ..

جيلان : اتمنى اعرف اطبخ .. بس مستحيل اجرب لان احرگ المطبخ ..
هويدة : شدعوة .. كلنة جنة نگول هيج .. بس من تحطين بالج وية الطبخ وتحبين تتعلمينة .. حتى اكلج يصير طيب .. لان نفسيتج حلوة ..

جيلان : وين ماما تسمعج .. ما تحجي وياي هيج .. تخلصهة علية رزايل .. حتى لو الي نية اتعلم الطبخ .. من اكعد يمهة تضل ترزل بية وتگلي ما منج فايدة .. عاد اني ابطل ..

ريم : احم .. بما ان جيلان تسوي زلاطة .. ديلارا حبيبتي روحي للديوانية اخذي المبخرة وياج وبخريهة ..

ديلارا : مو خاف حارث هنا ؟
ريم : لا طلع حارث .. هسة خابرني گال راح يجون خطار .. وبابا يحب ريحة البخور الخليجي .. بلا امر عليج اذا تگدرين ..

ديلارا وگفت اخذت المبخرة وطلعت : ماشي رايحة ..
بقيت اسولف اني وريم وهي ما على لسانغة غير شحجت حنين وشگالت شهد .. اجيت اعيط بيهة بس عيب عمتهن كاعدة ..

حجيت واريدهة تسكت : وين صارت ديلارا شو تأخرت .. خل اروح اشوفهة ..
ريم بسرعة : لاا ..
طبگت حواجبي : شبيج ؟

ريم : مابية شي .. بس مو ردتي الشاحنة لان تليفونج حيطفى شحن ..
هزيت راسي : اي صدك وينهة ..

ريم : تلگينهة بغرفتي .. يم راسي .. واذا ملگيتيهة دوريهة بغرفة حارث لان البارحة راد ياخذهة بس ما انطيتهة ..

هزيت راسي وطلعت ..
صعدت لغرفتهة دورت عالشاحنة بس ماكو ..
رحت لغرفة حارث الي ذاك اليوم من اجينة دلتني ريم بيهة بس ما دخلتهة ..

فتحت الباب بهدوء ..
دخلت وضرب بخشمي العطر الرجالي ..
ابتسمت لا ارادياً .. الغرفة حلوة ومرتبة وما بيهة غير دشداشة رصاصي مشمورة عالجرباية ..

رحت ادور عالشاحنة .. دورت ورة ميز التلفزيون وماكو ..
رحت لجهة الميز الي يم راس الجرباية وادور ..
سمعت صوت الحمام انفتح واني بلعت العافية ..

التفتت واشوف حارث واگف بس بالمنشفة .. والخاولي الزغير على رگبتة ورافع طرف منة وينشف بشعرة ويباوعلي مستغرب ..

شهكت وانطيتة ضهري : عزززة العزاك ..
حارث : شنوو .. اني لو انتي ؟ شتسوين بغرفتي ..
حجيت واني اتأتأ كوة حجيت : هاي شسمة .. اجيت عالهاي ..

حارث : شني هي ..
جيلان : الشاحنة .. شاحنة ريم .. اجيت اخذهة .. كالت بغرفتك ..
حسيتة وراي التفتت بسرعة علي واشوفة يمي ..

فتحت عيوني من تقرب علية ..: شداتسوي ؟؟
مد ايدة وراي وسحب الشاحنة من النقطة مال الكهرباء ..
مدهة كدامي بأبتسامة جانبية : تفضلي ..

اخذتهة منة واني ما اباوعلة : شكراً .. اروح اشوف ديلارا ..
مشيت خطوتين وهو سحبني مرة ثانية ..

التفتت بخوف : شبيك ؟ اجيت اطيح ..
حك راسة بتفكير : اوگفي اريد احاجيج ..
درت وجهي : البس بالاول زين وبعدين حاجيني .. متشوف شلابس ..

طبگ حواجبة : والله على طاري اللبس .. شفناج شلابسة البارحة .. بعد لو مقصرتة اكثر ..
طبگت حواجبي : مالك حق تتدخل بية .. وبعدين مابي شي .. غير خطوبة اخوي ..

رفع حاجب ونزل الثاني معناها عصب : خطوبة اخوج مو خطوبتج .. تدرين تمنيت الي سلطة عليج واجرج من السيارة واخليج تبدلين ملابسج ..

رفعتلة حاجبي : الحمدالله لعد ما الك سلطة علية ..
قرب وجهة مني : يرادلج گرصة اذن .. لان ما تلزمين لسانج وعينج زايغة ..

طبگت حواجبي : شنو يعني عيني زايغة ؟؟
رص على سنونة : اگول من شفتي رياض اخو هويدة شصار بيج ؟..

بلعت ريگي من تقرب مني : والله مو على شكلة .. بس لان يشبه وحدة من بناتهم نسخة منهة .. لهالسبب تفاجأت ..

رفع حاجبة : وسمير الي خطب ديلارا .. شايفتة ؟؟
هزيت راسي ببرائة : اي بحثت علي بالفيس .. كتلني الفضول حتى اشوفة ..

حجة بهدوء : وشلون شفتي ؟؟ حلو ؟
انطلقت بالحجي : والله واحد يحجي مالت الله .. حلو وشخصية .. مبين محبوب ..

ردت اكمل حجيي بس جرني من زندي علي : وجج مشمش تردين تخبليني انتي ؟ ادور تمدح بي .. مو اگلج عينج زايغة ..

اباوعلة متفاجئة وموخرة ايدية لان بس انزلهن يصيرن على صدرة .. بلعت ريگي : شبيك شنو القصة غير انت سألتني ؟؟

حارث : وانتي ما صدگتي .. انطلقتي بالحجي .. وج شسوي بيج هسة ..
رفعت اكتافي : شتسوي يعني ؟ فكني .. شبيك عصبت هيج ..

تنهد ويباوع بعيوني : والله غبية ..
طبگت حواجبي : احترم نفسك .. اني مو گتلك اذا تحترمني احترمك ..

حارث : اكبر غبية الله وكيلج .. ما تحسين مثل الحايط ..
جيلان : شنو حايط شبيك حارث انهديت علية ..

حارث : تگليلي شبيك عصبت .. وج هاي مو عصبية .. هاي غيرة حرگت عشيرتي حرگ ..

رددت كلمتة بأستفهام : غيرة ؟؟؟

هز راسة وحجة بلهفة : اي غيرة .. اغار عليج والله .. هاي عيونج الناعسات من اشوفهة تضحك وية الكل وبس وياي تنگلب خزرة تخليني بدي اشعلهة كلهة بنار ونفط ..

بلعت ريگي واسمع كلامة متفاجأة ..
گلبي دكاتة مجاي اعرف شبيهة .. مغص ابطني غريب ورجفة بجسمي ..

حجيت بالگوة : حارث ..
رد بأنفعال : شنو حارث حارث حارث .. ما اسكت بعد .. احجيهة الج والتردين تسوينة سوي ..

جيلان : شنو ؟
تقرب مني وحط اصبعة جوة فكي برقة ..
عيونة جانت بيهة لمعة وتباوع بعيوني بلهفة : احبج مشمش ..

رمشت بعيوني جم مرة اريد استوعب كلمتة .. گالي احبج ؟؟

ردت احجي بس حط اصبعة على حلگي : ششش .. كلشي لا تگولين .. فكري زين وشوفي بگلبج اكو لو شوية من هالمشاعر عندج ..

هزيت راسي ودرت وجهي وطلعت اركض من الغرفة ..
ما نزلت جوة .. رحت لغرفة ريما ..
دخلت وطبگت الباب ..

گعدت عالجرباية وحطيت ايدي على گلبي صاير طبول ..
حجايتة ترن بأذني ( احبج مشمش ) ..
حارث يحبني اني ؟؟ .. من شوكت ؟؟

رفعت ايدية اباوعلهن يرجفن ..
والله لو واحد غيرة جان جبتة براشدي ..
بس هو وياه حسيت حيلي باد وتفكيري انضرب ..

گمت بهدوء هفيت على نفسي ونزلت ..
گعدت يمهن ديلارا موجودة وريم وهويدة يحطن بالاكل .. يسولفن وبالي مو يمهن حتى .. تفكيري بهاللحضة مسيطر علي حارث وبس ..

ديلارا //

اخذت المبخرة مثل ما گالت ريم ورحت للديوانية ..
دخلت وابخرهة وبالي مو عندي ابد ..

سمعت خطوات وراي التفتت وشفت رضوان واگف ويباوعلي ..
تفاجأت وتذكرت حجي مريم من گالت بابا منعة يجي للبيت خاف يشوفج ..

درت وجهي واني اريد امشي : اسفة رضوان مجنت ادري بيك هنا ..
سرعت بخطواتي اريد اطلع خاف احد يجي ..

بس هو جان اسرع مني ..
طبگ باب الديوانية وصار مقابيلي ..
فتحت عيوني : هاي شنو ؟؟

جرني بقهر وگعدني عالقنفة : عوفي الشنو اگعدي بس خل احاجيج ..
گمت بسرعة : عوفني فدوة .. اني معايزة .. بس يشوفوني وياك تثبت التهمة علية ..

طبگ حواجبة وسحبني مرة ثانية گعدني : محد يشوفج لا تخافين .. بس افهميني .. خل احاجيج ..

هزيت راسي : لا وخر خل اطلع ..
عصب وفرك وجهة : ديلارا والله اعصابي تلفانة .. لا تزيدينهة علية بعنادج ..

سكتت متوترة : احجي بس بسرعة ..
هز راسة : ماشي بسرعة .. احبج ..

فتحت عيوني : شنو ؟؟
لزم ايدي : ديلارا احبج والله .. من اول مرة اجيتكم بيهة لاربيل وجبتجن مناك .. ماخذة كل تفكيري .. عقلي ما جاي يطلعج منة ..

شلت ايدي من ايدة : رضوان شهالحجي ؟ انت خاطب هيام .. خطية هي شنو ذنبهة ؟
تعصب من سمعني : لا تخليني اكفر بهيام .. ما احبهة والله ما احبهة .. ابوهة انطانياهة گدام العالم وعيب بحقة افشلة كدامهم ..

هزيت راسي : اني معلية .. عوفني رضوان شتريد مني ..
حجة بتعب : شي واحد اريدة منج .. ارفضي سمير .. انتضريني بس احل موضوع هيام واحاجي ابوج ..

غمضت عيوني بصبر : رضوان اقطع الامل مني .. بابا ميوافق .. واذا رفضت سمير راح يگولون عندي علاقة بيك او مشاعر الك .. وبعدين انت تعرف امك شنو وهددتني .. يعني هالعلاقة هاي من اساسهة غلط .. امسحني من بالك ..

نتر بوجهي : عبالج سهلة .. حقج تحجينهة عادي .. ما حاسة بنار گلبي .. اگلج احبج ومعشعشة بگلبي وما افكر بشي ثاني غير بيج انتي .. شلون اخليج تفهمينهة بعد .. احجيهة بالكردي يلة تفهمين .. ولج حسسسي ..

يحجي بعصبية وتعب بنفس الوقت ..
عيونة حمر من العصبية ..
رجفت من نبرة صوتة تحولت للهفة وعيونة حومرت : ادري ماجاي تفهميني .. وادري بيج ما تحبيني ..

سحب ايدي وحطهة على گلبة : بس سمعي گلبي .. وحسي بي بلكي تفهمينة هو عالاقل .. والله ما تهمني لا هيام ولا ١٠٠ غيرهة .. بس انتي اريدج وياي ..

انحرمت من ابوي .. انحرمت من اخوي .. انحرمت من راسم لسنين وهو عايش بغربة .. وامي كل ما شافتني ضلت تحجي على فلانة وعلانة .. ولا مرة ارتاح بالي وصفى على شي ..

بس من شفتج انتي وعقلي استقر عليج ..
بمجرد ذكر اسمج ابتسم .. انام اشوفج بحلمي .. اگعد اتخيلج گدامي وتبتسمين .. عيونج ما تروح من بالي ..

يحجي واني جسمي يرجف .. گلبي يدك بسرعة ..
متوترة اول مرة اشوف رضوان هيج .. معقولة يحبني لهالدرجة ..

تذكرت فجأة كلام امة من اجت ذاك اليوم (بتج لا تفكرين حتى تفكير اخليهة تاخذ ابني .. اشوفهة الضيم والضلايم وحق محمد .. ومن هسة حجيت .. )

سحبت ايدي منة بسرعة .. كمت خايفة : رضوان ما افيدك .. مو الك اني ..
عفتة وطلعت اركض وهو يصيح وراي ..

دخلت للمطبخ لگيت بس ريم وحدهة ..
باوعت لشكلي واني متوترة ..
جرتني گعدتني وجابتلي مي : دلوو هدي .. شنو تفاهمتو ؟.

فتحت عيوني التفتت عليهة : انتي جنتي تدرين ؟؟
هزت راسهة : اي بس والله مو بيدي همة طلبو مني لان يحبج ..

فركت وجهي بضيقة : تحاولون عبث .. مااصير الة بيوم .. فهمتيني ريم ..
تنهدت : براحتج .. انتي اعلم ..

سكتنة من دخلت هويدة ..
حاولت اشغل نفسي بأي شي بس نضراتة الي كلهة تعب متروح من بالي .. حجية يرن بأذني .. لزمة ايدة الي يقشعر جلدي من اتذكر حرارة ايدي ..

دخلت جيلان گعدت يمنة ما ركزت وياهة ..
ما حجت هي شي .. الي يحجون جانن ريم وهويدة واني مرات اشارك بالحديث ..

كمزت من سمعت صوت خاشوكة وكعت بالكاع ..
التفتنة شفت هويدة لازمة الميز بيدهة وايدهة الثانية جانت بيهة الخاشوگة فاتحتهة وترجف ..

گمنة بسرعة وريم راحتلهة بخوف : خالة شبيج ؟؟ تعبانة من شي ؟؟
هزت راسهة : لا حبيبتي ما بية شي .. لا تخافين ..

ريم غورگت عيونهة : لا بيج شي متأكدة .. صارلج جم يوم مو على بعضج وتتعبين .. فدوة اذا بيج شي گليلي ..

لزمت خد ريم بحنان : ريمي يعمري والله مابية شي .. مجرد ارهاق .. ضغطي هابط ..
جيلان : خالة ارتاحي انتي حتى هي هم ترتاح ..

گعدت هي عالكرسي .. ريم سوتلهة عصير برتقال ومبين الخوف عليهة .. استغربت تصرفهة ..

حارث //

طلعت من البيت ومرتاااح لابعد درجة لان اعترفتلهة ..
بدلت ملابسي ونزلت ..
تذكرت رضوان .. ضربت على گصتي لا يا الله نسيتة ..

دخلت للديوانية ما لگيتة معناها محاجيهة وطالع ..
دگيت علي بس ما يرد ..

طلعت من البيت ورحت بسيارتي ..
خابرني جبران معصب : شكو شبيك ؟؟
جبران : تعال خلصني من هذا عبيس .. اكل گلبي ..

حارث : ليش شبي ؟؟ شمسوي ؟
جبران : متعارك وية اليحبهة .. وهسة يطلع حرگتة بية وبس يصيح .. ادور ما يخليني امشي ..

تأففت : وين انتو هسة ..
جبران : والله ما عدنة مكان نروحلة .. اجينة للمعمل وگاعدين بمكتبك ..
فتحت عيوني : دهر دهركم بهالليل بالمعمل .. ادري فاتحهة گهوة اني ..

جبران : اهووو لا تضل تلغي .. تعال وانت ساكت ..
حارث : جايك جايك ابو سكسوكة .. اني اعلمك ..

سديت التليفون منة ورحت للمعمل ..
لگيت الحارس بالباب سلمت علي ..
دخلت ورحت للمكتب ..

جبران : تعال فدوة خلصني من هذا .. لا يرضى يحجي ولا يرضى يخليني اروح ..
عباس : وقزرقط .. جا شني اضل وحيدي .. غير اتسودن ..

گعدت عالكرسي : هسة غير تفهموني شكو .. شبيك عباس شصاير ؟
عباس حجة بقهر : تگلي انت مجرد صديق ..

حصرتني الضحكة : ايبببااااه .. شلون تگلك صديق ..
جبران ابتسم : شهالحجي هذا .. هاي كفرت .. طلعت عن الدين ..

باوعلنة عباس وشمر باكيت الكلنس علية : تتمزهدون علية انتة وابن عمك من عمى اليعميك ..
ضحكت : من كل عقلك هسة انتة معصب لان گالتلك هيج ؟؟ شكو بيهة ؟

عباس : ولك اكلهة احبنج واريد اخطبج تگلي انت صديقي ..
جبران : خاف تحب واحد ثاني ؟؟

شال النفاضة وشمرهة علي وهو لزمهة : جبرااان صم حلگگ لا تزيدهة علية ..
حارث : انت شگتلهة من گالتلك هيج ..

عباس : تعاركت وياهة .. گتلهة انتي لووح .. لو احجي منا لباجر ما تفتهمين .. مية الف مرة كتلهة احبج .. تراسلني يومية تسأل علية واسأل عليهة واسولف وياهة واتغزل بيهة .. وهي ولا جنهة لاطشة عالكلية بت الاوادم .. مو اگللهة اخليج تكملين .. تگلي لا ما اريد اشغل بالي بغير شي .. خاب والله كرهت روحي .. جني احجي وية الحايط ..

جبران : اي عوفهة .. شكو لازگلهة .. البنات هواي ..
عباس : انجب محد گالك احجي .. هاي مالية عيني واعشگهة .. ما اعوفنهة .. بس تعبتني بأسلوبهة الرسمي ..

ابتسمت : وشمدريك ما تكون تحبك بس تتغلى عليك لان انت ذاب روحك عليهة .. جرب غير اسلوب ..

عباس : اسلوبيش ؟؟
حارث : يعني لا تهتم بيهة مثل كل مرة .. لا تحاجيهة يومية وكلساع .. هاليومين لا تراسلهة ابد .. واذا حجيت وياهة لا تلح زايد .. وانت الي تنهي المحادثة مو هي .. يعني مو هي تگلك نعست اروح انام .. لا انت گللهة مشغول احاجيج بعدين .. خووش لو لا ..

حك راسة : گلبي ما يطيني .. خافن يضل بالهة ..
جبران : خف علينة .. ليش ما تكول انت ما تكدر الا تحجي وياهة .. عبيس نفذ وانطيهة درس حتى تحترمك مو تضل ذاب روحك عليهة ..

تنهد عباس : هايهية شورك وهداية الله ..
جبران : والله عمي حارث العقل المدبر .. بدونك ما ندري وين نروح .. صارلي ساعة اريد اهدي هذا .. ومن اجيت انت سكتة ..

ريم //

راحن البنات من بعد ما تعشن وعزلنة الملابس واجة جبران اخذهن ..

گاعدة بغرفتي واگلب بالتليفون ..
اندك الباب : تفضل ..
دخل بابا بأبتسامة : الحلوة گاعدة ؟؟

عدت گعدتي وذبيت التليفون : كاعدة بابا تفضل ..
دخل گعد يمي : ليش ما صحتني واني اجيك .. ليش تتعب نفسك ..

باوعلي برفعة حاجب : ليش گالولج شايب وماكدر اصعد .. صح دخلت الخمسين بس عودي قوي لا تخافين ..
ابسمتلة : انشالله دوم يضل قوي .. ولا يحرمني من هالطلة ..

باسني بگصتي وحط راسي بحضنة : ولا يحرمني بنيتي الوحيدة ..
رفعت راسي الة : احم .. بابا عادي اسأل سؤال ؟

تنهد وعبالك عرف سؤالي شنو .. : اسألي بابا اسألي ؟

بلعت ريگي : اذا خالة هويدة هالگد حبابة وتحبني .. ليش جنت مبتعد طول هالسنوات .. ليش مجبتنة يمك ؟

مسح على شعري بحنان : خايف عليكم .. وعليج انتي بالذات ..
صورة مريم وية نعمة خلت عندي خوف .. رغم اعرف هويدة شنو ومعدنهة شنو .. بس گلت يمكن انتي ما تتقبلين تكون عندج زوجة اب .. وهم ..

باوعتلة بتساؤول : وهم شنو ؟؟ كمل بابا ليش سكتت ..

باوع بكامل وجهي : تشبهين امج بكل تفاصيلج حتى حجيج .. واذا انتي گدامي معناهة راح اضلم هويدة لان لحد هسة كل ما اشوفج اتذكر رجاء .. وجنت متطمن وانتي عند ابوي وامي ..

غورگت عيوني : بس جنت احتاجك .. يعني رغم وجود جدو وحارث .. بس انت وجودك غير .. من جنت اشوفك بكل يوم جمعة اگول محضرتلة هواي حجي وعتب احجي بي .. بس من اشوفك اسكت اگول اخاف ازعلة ويعوفني ويمشي ..

اخذني بحضنة ويمسح بدموعي : اسف .. ادري ما تكفي هالكلمة .. بس اعذريني .. عقلي وگلبي ما متصافيات ..

هزيت راسي وباوعتلة : عادي اسألك سؤال ثاني ؟؟
ابتسم : اسألي ؟

ريم : ليش ما عندك اطفال من هويدة ؟
تنهد : الله ما كتب لهسة .. حملت مرة وما جانت تدري وذبتة .. حملهة صعب ولازم تنتبه على صحتهة من اول ما تدري ..

ريم : اي بس على فكرة ترة صارلهة جم يوم تعبانة .. وحالتهة مو كلش زينة .. حبيت اكلك حتى تاخذهة للطبيب وتشوف شبيهة ؟ خاف مريضة ؟

هز راسة : الله كريم .. ارتاحي انتي هسة ونامي .. انة رايح اشوفهة ..

مريم //

فتحت عيوني من گمت اسمع صوت انفاسة المنتضمة ..
مررت ايدي على جفوني اتلمس مكان بوستة ..
باوعتلة ومسحت الدمعة من عيني .. مرجع راسة على حافة الجرباية ونايم وهو گاعد .. وراسي بحضنة من حجالي القصة عبالة غفيت ..

گمت من حضنة .. اباوع لتقاسيم وجهة .. عيونة مغمضات ورموشة الكثيفة واضحة اكثر .. خشمة الحاد ومدبب من الطرف .. شفايفة الي كلهة خطوط وشواربة مغطية نص شفتة الفوگ .. لحيتة شواربة شامتة .. ركزت بكل تفصيل بوجهة ..

همست بصوت گوة ينسمع وخانگتني العبرة : ليش حبيتك ؟ ما جان لازم احبك ..
گمت من يمة وهو ما تحرك لان تعبان ورايح بنومتة ..

طلعت من الغرفة وگعدت بالصالة ..
گمت ابجي على حالي وعلى اكتشافي الي اكتشفتة اليوم .. حبيت راسم ..

هو مو اكتشاف .. بس اني جنت اتهرب طول هالفترة .. احاول اقنع نفسي ماكو هيج شي .. ماريد احبة ..

التفتت لصورة رضا الي حاطتهة بأطار عالميز .. : ماريد اخسرك .. انت دنيتي كلهة .. اذا خسرتك اموت .. لهالسبب ما يصير احب راسم ..

تمددت عالقنفة ولميت جسمي مثل حركة الجنين ..

اتذكر هذاك اليوم بكل حذافيرة .. اليوم الغير حياتي ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤

هلوو .. اليوم البارت كلة رومنسية هم كولو جذب ؟ .. كلة اعترافات بنات زمن ..
البارت الجاي مهم .. ويحل الغموض الي بمريم .. ترقبووو ..

احببببببكم .. لا تنسون صوتو وعلقو وكلشي ينداس دوسو ..