رواية بنات للزمن الفصل الحادي والخمسون 51 - بقلم سارة الشمري

الكاتبة : سارة الشمري🕊

ياسيّدة إبريل.. واللي ورا ابريل
إنتي حقيقيّه.. لو ابريل يكذب! ͏
͏ ͏
لو كذّبو شهرك هل القال.. والقيل
ماصدّق الكذبه.. ولا تحمّل الذنب ͏
͏ ͏
من ليلة البارح وانا احط وآشيل
وتهب ضحكاتك على البال ويهب ͏

شعرٍ تبجّله الشواعير.. تبجيل
من زود ماصِدقه على القلب ينصب ͏

(تفعلو رجاءً وعلقو عالفقرات فدوة .. احبككم🕊)
ديلارا //

دخلت للمطبخ بليل اريد اشرب مي ..
شفت امي گاعدة عالطاولة وساندة عكس ايدهة عالطاولة وحاطة جف ايدهة على راسهة وتباوع للگدامهة ..

استغربت حالتهة : ماما ؟ حبيبتي شبيج ..
فزت هي وباوعتلي : دلو ؟ ما بية شي حبيبتي روحي نامي ..
انتبهتلهة متوترة ..

تقدمت منهة وانتبهت للطاولة شفت فد شي طولاني رفيع موجود عالطاولة : شنو هذا ماما ،، محرار ؟؟

ردت اخذة وهي لزمت ايدي : عوووفي .. خل اشوف الضيم النتيجة ..
گامت وگفت : نتيجة شنو ماما ؟

حجت وهي تفرك بيديهة متوترة ونصت صوتهة : نتيجة الحمل ..
فتحت عيوني بفرحة : مااااماااا .. يعني انتي ..

حطت ايدهة على حلگي : لااا اوگفي خل اتأكد بعدهة ما مبينة ..
باوعت للجهاز گالبتة على وجهة متبين النتيجة ..

دخل بابا للمطبخ وباوعلنة : شعدجن هنا ؟
باوع لامي : وين رحتي گعدت ما لگيتج ..
امي حجت بتوتر : ها ؟ اي هسة جنت صاعدة ..

شلت الاختبار وهي صاحت : عووفي ولج ..
ابوي طبگ حواجبة : شبيجن شكو ؟
ابتسمت وباوعتلة : بابا حاجيهة .. متقبل تخليني اشوف نتيجة اختبار الحمل ..

هو فتح عيونة على وسعهن : اختبار منو ولج ؟
فتحت عيوني وياه : اميييي .. والله امي ..
ارتخت حواجبة وباوع لامي : ها ؟ زمن حامل ؟
امي هزت راسهة : لا بلكي لا ..

طبگ حواجبة : وليش لا .. شكو بيهة ..
امي : يااا صدك تحجي عاصم .. بهالعمر ..

استغليت سوالفهم وشلت الاختبار ..
ضحكت وباوعت للنتيجة خطين وواضحات ..
ضحكت : مبروووووك ماما حامل ..

ابوي جرة من عندي بفرحة : احلفيي ..
امي لطمت على خدهة : عزززة العزاني ..
ابوي باوعلهة بعصبية : عليييمن تعزين بروحج .. شني بايگتة لو حرام ..

امي : ياا عاصم شبيك .. شنو بهالعمر وعندي حفيد وبنتي حامل .. العالم شتگول ؟
ابوي ابتسم : شتگول يعني ؟ عبالهم كبرت وراحت قوتي شني .. بعد وبعد بية كل الحيل ..

وجهي صار احممر من الخجل وامي شهگت : هاي شبييك منا البنية شنو هالحجي ..
ضحك ابوي وگرصهة من خدهة وباسهة : يحلاتج بعدج تستحين .. هالمرة هم اريد توم ..

حبست ضحكتي وانسب حل ان اطلع واعوفهم وحدهم ..
صعدت فوگ وفتحت باب غرفة جيلان وحجيت بحماس : احزززري الاخبار شنو ؟

جيلان : شنو ؟؟
حركت حواجبي : ماما حامل ..
طبگت حواجبهة : شنو ؟ تتشاقين مو ؟

استغربت : لا ما اتشاقة .. شبيج مصدومة .. ترة بعدهة زغيرة ..
جيلان : واذا زغيرة .. شتگول العالم ..

عصبت منهة : انتي شبيج بابا .. شيحجون يعني .. على گولة بابا بايگتة لو حرام .. العمر معلي بهالشي ..
رفعت اكتافهة : وابوج فرحان يعني .. يلة الله يهني شناقصة .. خل يكثر بالبنات ويشوفهن الضيم ..

تنهدت : جلاتينة لا تشوفين هاي النبرة لامي .. والله تضوج خطية .. هي اصلاً مستحية ..
طبگت حواجبهة : حبيبتي اني هم حريصة على امي .. واعرف شنو اتصرف ..

طلعت من يمهة معصبة من طريقة كلامهة ..
شنو عبالك مسوية ذنب .. لعد واذا حامل شنو يعني ..
مو هاي مرت عمو ضافر هم جابت بهذا العمر .. واصلاً عمو ضافر اكبر من بابا ..

دگ تليفوني .. سحبتة باوعت للأسم .. عصبيتي وضوجتي كلهة تبخرت ..
فتحت خط ورديت : الو ..

رضوان : هي الو لو ترد الروح .. شگد سامعة من العالم .. بس منج عبالك بلسم ..
ابتسمت : احسن خليهة بس مني هيج ..

رضوان : اي طبعاً .. شلونج حبيبي شخبارج ..
هزيت راسي عبالك هو كدامي : الحمدالله بخير حبيبي انت شلونك ..
رضوان : اسمع بصوتج وتگليلي حبيبي .. وهسة تسأليني شلونك ؟ من كل عقلج ..

ضحكت : هايهية حبيبي وصل الجواب ..
جر تنهيدة : دلوو ما الله هداج علية وتخليني اقرب موعد العرس .. هسة شمنتضرين بس اريد افتهم ..

توترت وارتبكت : ها .. لا حبيبي مو هسة لا تستعجل .. خلينة شوية نتعرف على بعضنة بالاول ..
رضوان : غريب اني وتتعرفين علية ..

سكتت ما حجيت ..
رضوان : دلة .. يروحي انتي .. سولفيلي شبيج ؟ عليمن خايفة .. ليش تتهربين .. تخافين مني ؟
حجيت بسرعة : لا والله ابد مو منك ..

رضوان : جا شبيج .. ليش هيج تتوترين من اجيب طاري العرس .. وما تردين اقربة .. سولفيلي ؟
بلعت ريگي وحجيت مترددة : خايفة من عمتي ام راسم ..

رضوان : وليش تخافين يا بعد هلي .. تخافين وانة موجود .. شتسويلج يعني ؟؟
تنهدت : لا مو هيج .. بس هي تبقى امك .. وادري بيهة ما تحبني وما تريدني .. واني خوافة والله واقل حجاية اگوم ابجي ..

رضوان : حسستيني امي هولاكو .. والله طيبة وحبابة .. بس هي مشكلتهة الوحيدة قابلة للشحن .. وبسلامة نعمة خلصت عمرهة تشحن بيهة ..
من قبل لا امج تعوف ابوج وهي تحجي براسهة تگللهة هاي زمن تودد لرجلج على ابوي ..

شهگت : ياااا ..
رضوان : اي ومن راحت امج ومريم تزوجت ضياء وراحو لبغداد .. هي دارت على مريم وضلت تشحن بيهة عليهم وهاي اخذت ابنج وشردت بي لبغداد بعد ما تشوفينة ..
وورة ما توفى ضياء هم ضلت تحجي براسهة وتگللهة هاي نحس من اجت للدنيا بدت المشاكل وامهة ابوهة تطلگو من وراهة وموتت ابنج ..

امي عقلهة ياخذ على سوالف نعمة ..
شگد حاولنة نحسن تفكيرهة ونفهمهة ان هالشي غلط ومريم مالهة ذنب وهذا امر الله ..
بس تأثير نعمة جان اقوى عليهة ..

حتى من تشوفنة ندافع لمريم تضل تحجي علينة وتگول جارتكم الهة وخلتكم تگلبون علية ..

تنهدت وانقهرت على اختي ..
حجيت : اگلك انت عبالك هدأتني بكلامك هذا .. ترة زوددت خوفي .. اذا مريم بعيدة عنهة وتكرهة .. شلون اني راح اصير وياهة نفس البيت ..

ضحك : واني هذا الاريد اوصلة الج .. امي ما شافت من طيبة مريم شي ولا عاشت وياهة وشافت اخلاقهة وتربيتهة شنو .. مجرد تسمع من نعمة وتحكم ..

وهسة انتي راح تعيشين وياهة وتشوفينهة معدنج واصلج .. عامليهة بأسلوب حلو وطريقة حلوة وداريهة ..
وداعتلج تطلعلج حنيتهة وطيبة گلبهة ..

وصدگي بالتالي من تشوف تصرفج .. حتى على مريم تتغير وتصير زينة وياهة .. لان راح تعكسين بتصرفاتج تربية زمن واخلاقهة الي انغرست بيج ووباقي بناتهة ..

ابتسمت : قنعتني ..
ضحك : اي جا شعبالج .. ولا تخافين اني وياج و اعرف طبع امي زين .. وداعة عيونج امي لا من النوع التدبر مكيدة ولا التسوي اعمال مدري شنو اصلاً تتخبل من هالسوالف وحجيتلج شسوت ابيت خالي من شافت حاطيلي حرز بمخدتي .. هي هاي امي .. لسانهة عام عليهة وتطلع الي بگلبهة بلسانهة ..

تنهدت : والله خليهة تطلع لسانهة علية وتحجي البگلبهة .. ولا تبتسم بوجهي وبداخلهة حاقدة علية وكارهتلي ..

رضوان : والله صحيح ..

ريم//

نزلت من فوگ لاگتني خالتي شايلة بيدهة سيوفي ..
ابتسمت من شافتني مبدلة : عين الله عليج .. يمة لا يحسدج اخوي لا تطبين علي ..
ضحكت : هسة يسمعج ..

دنگت بستة لسيف ..
رحت للديوانية لاگاني حارث شافني ورفع حاجب : امشي امشي هذا خبصنة خبص ..
كمل وهو يعلى صوتة يسمع بي : يحجيهة بوجهي ادور ايگلي ما جاي عليك روح صيح مرتي ..

ابتسمت بخجل ..
حارث دار وجهة ومشة ايدة لحد الان ملفوفة وحاط مسند .. اسمعة يدردم ويسولف : عالم شبعانة حب .. واني شابع الي ابالي شتايم .. النة الله ..

دخلت للديوانية شفتة گاعد عالقنفة ..
لابس قميص اسود وبنطرون رصاصي ..
من شافني وگف بأبتسامة ..
حجيت بهدوء : السلام عليكم ..

اجة علية وطبگ الباب مال الديوانية : هلا بريم الفلا .. هلا يتالي صبري ..
سحبني باسني بخدي وطول ببوستة ..

مرر خشمة على خدي ونزل لرگبتي ..
رجفت ووخرت لورة وهو مجلب بية : عفية لا تجي خالتي ..
باوع بعيوني وجر تنهيدة : خالتج ملتهية بأبنهة .. خليني اني ملتهي بيج .. شبيج خايفة والله ما اكلج ..

هزيت راسي وحطيت ايدي على رگبتي : لا مو خايفة بس عفية اغار والله جلدي يقشعر ..
رفع تك حاجب : اي وانشالله هم باجر گليلي اغار .. والله لو مو تغارين ..

توسعت عيوني بخجل ..
هو ضحك ..
عيونة نزلت لشفتي واختفت ابتسامتة وحجة : من شفايفج هم تغارين ؟

ميلت راسي بعدم فهم .. ما خلاني استوعب ثانية الا واخذ شفتي بشفايفة وصار يتفنن بيهن ..
حبس عني الهوة وجسمي كلة يرجف وايدي على صدرة شادة قميصة بأصابعي بتوتر ..

حسيت بحاجتي للهوة .. ضربتة على صدرة بخفة ..
هو وخر راسة ويتنفس بسرعة : خرب بليسج .. شبيج ؟
حطيت ايدي على حلگي واتنفس سريع : شنو تريد تخنگني ..

ابتسم وجر تنهيدة : والله مادري عنج بس اني عن نفسي متت ما اختنگت ..
طبگت حواجبي : لا تجيب طاري الموت ..

جرني گعدني عالقنفة وهو بصفي : شسوي .. اني روحي تروح من اشوف عيونج .. تصفني وتاخذني بغير عالم ..
طلع تليفونة وفتحة ومدري شطلع ..
رياض : تدرين اخذتلي اسبوع ما انام بليل من ورة هذا المقطع ..

شغل التليفون ..
فتحت عيوني على وسعهن ..
التصوير مالتي وبس اني طالعة .. بالحنة مالت جبران ..
ارگص على اغنية البرتقالة لا يربي ادور مندمجة واهز بخصري .. والمصيبة النفنوف قصير وبي فتحتين من الجوانب ..

عضيت شفتي بعصبية : هذا شجابة الك .. هو بس عد حنين .. هي دزتة الك مو ..
ضحك : اني نقلتة منهة .. وعساني لا نقلتة .. اسبوع ما انايم .. وين ما ادير وجهي اشوف النفنوف الفضي ..

جرني قربني علي وحجة بهمس : واردد بالاغنية .. خد احلا من خد والوجه يا محلاه عالشفة ورد .. الاغنية لزگت براسي وبلساني .. حتى صرت اخاف اغنية بالشغل وتروح هيبتي .. وكلة من وراج ..

ريم : اني شعلية .. حنين دازتة الك ..
رياض : هذا النفنوف بعدة عندج ؟
طبگت حواجبي : اي ليش ؟

حجة ببرود : تحرگينة وتذبينة .. بعد ماكو هيج لبس ورگص گدام العالم ..
فتحت عيوني : شنووو .. ليش ؟

ابتسم صفح : شنو الليش .. سيد رياض مرتة ما تلبس هيج .. يغار عليهة ..
حبست ابتسامتي : هنة بس نسوان .. عادي شنو قابل لابستة گدام الزلم ..

طبگ حواجبة بعصبية : شنو زلم .. شنو هالمنطق هذا .. وهذني النسوان ما عدهن زلم شنو ويگعدن يسولفن يمهم .. ما تصرفلي هاي السوالف ..

سكتت من شفتة عصب ..: يعني شنو هسة تريدني احرگة صدك ..
رياض : لا يعني مو تحرگينة ..
حك رگبتة بأبتسامة : البسي بس الي ..

رفعت حاجبي : صار .. خالللو ..
رفع راسة بسرعة وطبگ حواجبة : وخلخالة خلخلت عضامج .. خالو شنو ؟ يابة حرام ..
ابتسمت : ماشي اسفة .. حضرة الملازم ..

جر نفس بعصبية : گولي رياض .. شنو تبزز بلسانج من تگولينه .. ريييياض ..
رفعت اكتافي : لساني مياخذ علي كدامك .. لان تعودت اگول خالو .. احسهة عيب ..

رفع ايدة : لا مو عيب ولا شي .. العيب انج تسميني خالو .. وحرام هم .. گليلي رياض .. شلون بلة .. اريد اسمع اسمي من لسانج ..

انفتح الباب ودخل حارث : ليش يعني لسان فيروز مثلاً .. لو حنجرة ام كلثوم ..

گمزت بسرعة وسحبت ايدي من بين اديناتة وگمت ..
رياض باوعلة بعصبية : خيييير .. امشي اطلع برة اريد احاجي مرتي ..

حارث تلفت بالديوانية وباوع لصورتة المعلگة .. رجع باوع لصورة جدو وبابا : هاي ديوانيتنة حسب ما جاي اشوف .. تطرد منو منهة ؟

تأفف رياض : يا اخي انت الله مسلطك علية .. روح تزوج والتهي بمرتك وعوفني بحالي ..
حارث : عايز نصايحك اني شنو .. لعلمك ترة اني هم خطبت بس ما انطوني ..

رياض نتر : واني انطوني .. شعلييية بيك بعد ..
حارث اشر بأصبعة على راسة : بكيييفي .. ما عندي شغل وعمل .. اخبببث .. مثل ما خبث علية هذاك .. اني هم اخبث عليك .. زين مني وخليتك تگعد وياهة ربع ساعة ..

ضحكت اني وطلعت وهمة ضلو يسولفون او بالاصح يتناگرون .. وخاصاً حارث صاير طبعة ممل فديتة ويتدخل بأبسط الاشياء لان بابا منعة من الروحة للمعمل الا لمن تطيب ايدة كلش ..

وهو يگعد بالصالة مثل عجوز البيت .. جيبي هاي وشيلي هاي .. والمصيبة يعيب علية .. شني هاي ضفيرتج صفح شهاللعبان نفس ..
ويفتر يجي علينة للمطبخ ويضل يستفسر وينطي اقتراحات مالهة اي داعي ..

براء //

داومت اليوم واني شاغلة بالي فكرة ان استاذ ضيغم خطبني ..
دخلت للقاعة جانو كم واحد وثنين بنات موجودين ..

رحت للأخير گعدت بالمقعد الي اغلب الاحيان اگعد بي .. وافنان يمي .. احنة البنات اغلبنة نگعد بالاخير حتى ناخذ راحتنة اكثر ..

دخلت افنان گالت : صباح الخير ..
اجت گعدت يمي : صباحووو ..
رديت بأبتسامة : صباح النور ..

رجعت صفنت : شبيج صافنة وين رحتي ..
هزيت راسي : اذا اگلج يمكن متصدگين ..
باوعتلي بحماس : شنو گولي ؟
براء : البارحة بابا حجة وياي على واحد متقدملي .. واحزري منو طلع ؟

حركتلي حواجبهة : ابو خشم مزورگ مو ؟ دكتور ضيغم ..
فتحت عيوني حيل : شمدرررييييج ؟؟؟
رفعت اكتافهة : هو اجة حجة وياي .. سألني عليج گال خو ما مرتبطة لو مخطوبة ؟ وگتلة لا ..

براء : اي وبعد شگال ؟
افنان : سأل عن اسمج الكامل من گتلة براء فضل عجاج الـ... هو عرف عمج رياض گال بنت اخو ملازم رياض .. اني گتلة اي دكتور وبس ..

رفعت حواجبي : زين ليش اني ؟ ليش مو انتي مثلاً ؟
ابتسمت : وليش مو انتي .. شناقصج يعني ؟ احلا مني وهادئة وشاطرة ومرتبة واخلاق ..
ابتسمت : لا لا خجلتيني .. مو لهالدرجة..

قاطع حديثنة دخول الدكتور ..
بدت المحاضرة .. واحنة مركزين ..
لحد ما انتهت وطلع الدكتور ..

بعد ساعة كاملة يلة تبدي المحاضرة الثانية ..
الطلاب كلهم يطلعون برة للكافتريا ..
بس اني مجنت احب اطلع ولا اختلط بأحد غير افنان وكم بنية ويانة وهم علاقتي مو كولش قوية بيهن مثل افنان .. مجنت اطلع الا للضرورة ..

القاعة فارغة بس اني بيهة .. افنان راحت تجيبلي شي اكلة وتجي ..
اندك الباب اني رفعت راسي شفت دكتور ضيغم واگف بالباب : علوية براء اگدر احجي وياج ..

بلعت ريگي : بشنو دكتور ..
اجة علية وگعد بيني وبينة ستيج كامل ..
حجة بهدوء : براء مادري اذا حاجاج ابوج عني او لا ..
هزيت راسي : اي دكتور انطاني خبر ..

ضيغم : حلو .. ادري الموضوع فاجئج وجان لازم اسألج بالاول .. بس ما عرفت شلون افاتحج بالموضوع .. واني جاي حتى اگلج كم كلمة ..

رفعت راسي بأصغاء : شنو ؟
ابتسم : ان كان جوابج اي او لا .. انتي راح تبقين طالبتي .. يعني اذا رفضتي لا تفكرين حتى 1% ان ممكن اشد وياج لانج رفضتيني ..

سكتت واباوعلة بهدوء ..
هو كمل كلامة وابتسامتة على شفتة بهدوء ويحجي بثقة ورزانة : وبصراحة مادري ليش انتي بالذات اختاريتج .. عجبني اسلوبج وطريقة احتشامج رغم عباية بس أناقة..

رفعت حاجبي .. هذا يتغزل شنو ؟
كمل كلامة : وبنفس الوقت ذكية .. ومو دائماً نلگى وحدة ذكية وحلوة بنفس الوقت ..

گام وگف بأبتسامة ويعدل بسترتة : الي عندي گلتة .. واسف عالازعاج .. وفكري بكلامي زين .. ولا تستعجلين بقرارج .. اي شي تأمرين بي اني حاضر ..

هزيت راسي : شكراً دكتور ..
طلع هو من القاعة اني جريت نفس ..
اباوع للقلم بيدي عرگان ..

دخلت افنان بيدهة لفتين وبطلين مي ..: شعندة ابو خشم مزورگ هنا .. شراد منج ؟
اخذت بطل المي من ايدهة وشربت منة وباوعتلهة وحجيتلهة الي گالة وهي تاكل باللفة مالتهة ..

بعد اسبوع ..

واگفين عالشباك مال غرفتي .. المشية جايين على حنين هانم ..
نزل خطيبهة من السيارة واحنة نباوعلة من فوگ ..

حنين حطت خدهة عالشباك وفاتحة حلگهة وتحجي بفهاوة : يمااااااي .. شلون اصبح بوجهك يومية .. شمسوية اني ربي وهيج راضي علية شو خلصت عمري اعيب عالعالم .. لا لا يمة اني تجيني سكتة قلبية اذا فتحت عيوني من النوم وشفت هذا الازبري كدامي ..

وخرت راسهة وتباوعلة وحاطة گصتهة عالشباك وتجر تنهيدة كل وحدة اطول من الثانية وهي مركزة بي بفهاوة شلون مبتسم ويضحك ويسلم على ابوي وعمي رياض واخواني : شوف المشية يربي .. راح ابجي بعد ماكدر ..

اسماء : على شنو تبجين ولج ..
حنين تسوي روحهة تريد تبجي .. دفعت اسماء من كتفهة بخفة ولا مبالاة : گلبي گام يوجعني .. هيج هيج گلبي جنة وصلة مسح ومعصورة .. افكر شلون الزم لساني كدامة وما اگلة جنك ازبري تنگرط گرط ..

حبيت ايدي وجه وگفة : الحمدالله على نعمة العقل .. مو بعيدة عنج والله تسوينهة .. خطية الولد مبين فقير وحباب .. شلون بلوة وگعت على راسة ..

اشرتلنة بيدهة عالباب ببرود : يلة يلة برة .. اطلعن سولفن برة ..
حطت راسهة عالمخدة : واني احلم بهذا الكراميل الي الله تعبان بي وانطانياه .. برة برة جاي اگول ..

تخوصرت : حبيبتي غرفتي هاي .. انتي اطلعي برة ..
حنين : ما اطلع .. اريد اشوف زوجي من يطلع .. فدوة لعينة شفتي شلون فرحان بية .. ممصدگ ..

اسماء : شوف هاي الراح تموت .. على كيفج بابا ترة الشكل مو كلشي .. يمكن اخلاقة مو زينة وبس شكلة حلو ..
حنين حطت اصبعهة على حلگهة : اششش .. على اساس اني بنت الهدى ..

ضحكت على حالهة .. كلش داخلة جو ..

// حارث ..

هادي الي جان الاعزب الوحيد الباقي وياي ..
قبل يومين رجعو خبر الموافقة الة ..
واليوم المشية مال الزلم ..

اني مبدل ملابسي .. لابس بنطرون اسود وقميص اسود .. ولابس المسند الطبي مال الايد الي لونة نيلي ومحاوط رگبتي بحزام حتى تمنع حركة ايدي .. همزين بأيدي اليسرة ..

كلهم ملتمين ابيت جدي ومن هناك يطلعون للمشية ..
اني بسيارتي وعباس الي يسوق واگفين براس الشارع ..
لان من بعد ما طردني عمي عاصم بعد ما دخلت لبيت جدي ولا بيتة ابد .. حدي لبيت راسم وارجع ..

بس والله اخذهة اخذهة لو بعد مية سنة ..
عبالة من يطردني ابطل ..
هو متونس وفرحان وحبيبتة يمة وادور حامل ..
اني حارمني من مشمشتي حتى ما يخليهة تجي لبيتنة خاف اشوفهة .. شگد نحس .. اني اعلمك ..

طلعت السيارات واحنة مشينة وراهم ..
وصلت المشية لبيت عجاج واستقبلونة احسن استقبال ..

ورة تقريباً ساعة طلعنة من يمهم وكلشي تمام ..
هادي فرحان .. وعمي عاصم هم فرحان الة .. جا ما تفرحلي اني شمالك ..

طلعنة من يمهم وراحت السيارات لبيت جدي ..
وراسم اصر ان اروح وياهم واني رفضت كتلة ماروح لبيت جدي .. هو گال تعال لبيتي لا تروح لبيت جدي ..

وصلت ووگفت سيارتي اباب بيت راسم ..
وراسم نزل من سيارتة منتضرني انزل يمة ..
نزلت من السيارة ..

وگفني صوت عمي عاصم : حارررث ..
التفتت علي باوعتلة بدون ما ارد ..
واگف ويمة ابوي .. الناس دخلت جوة للديوانية ..

اشرلي على بيت جدي : وين رايح .. تعال طب عيب من العالم ..
رفعت حاجبي : البيت الانطرد منة ما ارجعلة الا يرجعلي حقي ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

وضع حنين بعد ما شافت هادي 😂☝🏻

الكاتبة : سارة الشمري🕊

اتمنى حبيتو البارت حبايبي .. احببببكككم كووومة .. تفاعلو حبايبي ..
ولا تنسون صوتو وعلقو وكلشي ينداس دوسو .. احبببكم 🕊❤️