رواية بنات للزمن الفصل الثاني والخمسون 52 - بقلم سارة الشمري

الكاتبة : سارة الشمري🕊

كون يمك
الف هنياله الكعد هالليله يمك
انا احبك وانا احب كل حرف بأسمك
وانا احس يجرن سوى دمي ويادمك
كون يمك
كون احظنك
كون ابوسك
كون اشمك
كون احط راسي على صدرك
كون اظمك
الله لاينطيه كل من راد
يحرمني ويحرمك
كون يمك....كون يمك

(تفاعلو حبايبي وعلقو عالفقرات وصوتوو .. احببكم🕊)

: وين رايح .. تعال طب عيب من العالم ..
رفعت حاجبي : البيت الانطرد منة ما ارجعلة الا يرجعلي حقي ..

ابوي رص سنونة : حااارث عوف هالسوالف وتعال ..
حارث : ماعوفهة .. وهذا البيت گتلك ما اطبة لحد ما ترجعولي حقي ..

عمي عاصم تنهد بقلة صبر : شتريد اني انطيك بس تعال سلم على حبوبتك .. تسأل عليك لان ما تجيهة ..
كتفت ايدية : الي اريدة تعرفونة كلش زين .. اذا ما انطيتوني الي ابالي .. هذا البيت لو تصير بي الجنة هم ما اطبلة ..

عمي عاصم تقدم علية وصار مقابيلي : يعني اخر كلام هذا ..
رفعت راسي گدامة بعناد : اي اخر كلام .. هذا الي عندي .. وحبوبتي عود انتو بلغوهة سلامي ..

درت وجهي اريد اصعد بالسيارة .. ايدة لزمت جتفي حيل بدون ما ادير وجهي وگفت وهو وراي ..
اقترب وحجة بهمس : شايف اذا اجتني زعلانة بيوم .. تحلللم اخلييك تشوف اضفرهة ..

جريت نفس لداخلي حيل واني الفرحة دخلت لگلبي بس ما بدلت نضرتي ..
درت وجهي الة وبعدني نفس نضراتي : لا توصيني بجيلان ابد ..

تنهد حيل : بنتي تضمهة بين عيونك .. تدري ليش وافقت عليك .. لان شفت بعيونهة الخوف ورادت تموت من سمعت بيك بالمستشفى .. وعرفت هي شگد تحبك ..

ابتسمت برفعة حاجب : اعرف هالشي كلش زين ..
باوعت لراسم وهو يباوعلي مبتسم رفعلي حواجبة ..

ابوي اشرلي : شمنتضر بعد .. يلة تعال ادخل جوة .. مو هذا الردتة صار ..

رفعت اكتافي : اعذرني يابة .. المناسبة الي تخليني ادخل لهذا البيت هي يوم تتسجل جيلان بأسمي .. بس هسة لا .. في امان الله ..

درت وجهي لراسم : يلة ابو حافظ ..
راسم صعد بسيارتة واني بالصدر ..
حرك السيارة راسم ولاف عالشارع الثاني ..

اني هنا شلت قناع القوة وصحت : لككككك رااااااسم .. مشمش راح تصير الييي ..
لزمتة من جتفة : انت سمعت الحجاه لو اني جاي احلم ..

راسم يضحك علية : سمعت والله سمعت .. واخيراً راح تتزوج ..
حارث : ولك اي .. الاصغر مني عرسو واني بعدني .. بس يلة مو مشكلة ..

سكتت شوية واني الفرحة مالية وجهي : گتلك اخذهة اخذهة .. غصباً علي ..
راسم : دكاافي هسة لا تخربهة على روحك بهاي سوالفك ..

حطيت ايدي على گلبي وغمضت واجر نفس بفرحة ..
اااااه هم وانزاح عن صدري .. مشمشتي راح ترجعلي .. الف الحمدالله والشكر الك ياربي .. صبرت ونلت ..

ديلارا //

بليل گاعدين بالصالة اني وامي وجيلان وحبوبتي وبسمة ..
الناس من مساع مشو من بعد ما ضيفناهم ..

حبوبتي فرحانة وتباوع لبسمة : بسمة حبوبة .. من تردين گلي لخالتج باجر تحضر روحهة حتى نروح لبيت سيد عجاج نشوف جنتهة .. خوش حجي ؟

بسمة بأبتسامة : انشالله حبوبة ..
گمت گعدت بصفهة : بسبوسة .. شلونة جبران وياج .. خو ما مأذيج ..

ابتسمت وهزت راسهة بنفي : لا الحمدالله .. يعني صرت اعرف اتعامل وية الوضع .. وهو اصلاً من نفسة بدة يمنع روحة منهن .. وخاصاً من شاف شصار بحارث .. وهم لان اني حامل .. واني هم اساعدة يطلع عن جوة ..

ابتسمت : والله نيالة جبران على هيج وحدة .. هاي نعمة داعيتلة بليلة القدر ..
ضحكت : لا والله نيال رضوان بيج ..
همست بصوت اقل : ونيال ام راسم هم ..
تنهدت : اسكتي لا تذكريني .. خايفة ..

قاطعنة صوت بابا وهو يريد يدخل مثل العادة يتحمحم خاف اكو احد غريب .. حبوبتي حجت : تعال يمة مامش احد ..
جيلان من سمعت صوتة گامت تريد تطلع ..

لاگاهة بالباب وگاللهة : تعاي ارجعي .. بعد لا تشردين من تشوفيني ..
جيلان نزلت راسهة وحجت بضوجة : اعذرني بابا .. تعبانة اريد انام ..

بابا : اگعدي گتلج .. اريد احاجيج ..
تنهدت جيلان ورجعت ليورة ..
بابا گعد عالقنفة وفتح العلاگة البيدة وطلع من عدهة تليفون بالباكيت جديد ومدة لجيلان : تعاي هاج اخذي ..

جيلان متفاجئة : المن هذا !!!
بابا : المن يعني ؟ .. الج غير .. اني اخذت تليفونج .. هاج هذا بمكانة .. جديد هستوة نازل ..
جيلان : شكراً بس ما محتاجتة .. خلي عندك ..

تنهد بقلة صبر : جيلان بابا لا تدولبيني .. تعاي اخذي .. وهذا خط (سيم كارت) هم جديد وياه ..
بسمة تباوعلي متفاجئة واني اكثر منهة ..

جيلان تقدمت بهدوء واخذتة من ايدة وهي طابگة حواجبهة .. بعدهة لهسة ضايجة منة ..
حجة بهدوء : باجر اطلعي للسوگ وشوفي شتردين اخذي .. الاربعاء عقد هادي .. والخميس عقدج انتي وحارث ..

فتحت عيوني على وسعهن وباوعت لجيلان مصدومة ..
كلنة مصدومين نباوعلة ..
قطع الصمت حبوبتي بفرحة : يمممة صلاااوااات عالنبي .. الله هداك يمة ووافقت .. والله فرحت گلبي ..

گام وگف وراح لجيلان الي تباوعلة مصدومة ..
حط ايدة على خدهة : هاي عيونج .. اذا نزل من عدهن دمع وانتي يمة .. بعد اخلي يحلم يشوفج .. سمعتيني لو لا .. ترة لخاطرج وافقت ..

رفعت ايديهة وارتمت بحضنة وصارت تبجي ..
هو يمسح على ضهرهة ويبوس براسهة : لا تبجين بابا .. اني وافقت حتى بعد لا تبجين .. عليمن هالدموع بعد ؟

حجت من بين دموعهة : دموع الفرح بابا ..
ضحك وضربهة على راسهة بخفة : شو ما تستحين ؟
وخرت عنة هي ودنگت على ايدة وباستهة ..

ماما حضنتهة وتباركلهة .. وحبوبتي هم ..
الفرحة گامت تشع من عيونهة ..
طلعت من الصالة واني وراهة ..

راحت لغرفتهة ودخلت اني وسديت الباب وهي صاحت : راااح اتزووج حارث .. يا الله ممصدكة بابا وافق .. والله قطعت الامل .. ايييسسست ..
ابتسمت واخذتهة بحضني ..

حجت بتنهيدة فرح : راح ارجع اسمع صوتة وضحكتة .. واسمع مشمشايتي مرة ثانية .. اسمع غزلة .. واسمع كلمة احبج ..
فرحت لفرحتهة حيل ..

طلعت تليفونهة وسجلت ارقامنة واتصلت على ريم وحجتلهة الي صار وهي تفاجأت بس فرحت طبعاً ..

مريم //

گاعدة بالغرفة وگدامي رضا وبيدة الكراسة ويكتب ..
واني وياه واردلة ..
لحد ما خلص .. فتحتلة البلي لعب نص ساعة وطفيتة حتى ينام ..

نومتة بغرفتة .. غفى رضا واني اباوع للساعة وين صار راسم .. تأخر اليوم ..
كمت لغرفتي اخذت تليفوني اريد اتصل علي ..

انفتح الباب ودخل هو .. جنت لابسة دشداشة قصيرة ربع ردن وسودة واطرافهة منقشة بتور احمر .. وعريضة كلوش اشتريتهة جديد حتى لا اتضايق من انام ..

من شفتة تخوصرت : بعد وكت .. لو باقي بعد هناك مو احسن .. وين جنت .. ويامن تفتر بنص الليل الساعة ب١١ ونص .. كل هذا تتونس مو ..

اني احجي وهو يباوعلي مبتسم .. تقدم علية وذب سترتة عالطبلة مال المراية ..
يتنفس بهدوء ..

عوجت حلگي وعصبت اكثر : ليش ما ترد علية .. ما عندك شي تگولة مو .. ما تعرف اتگول عندي زوجة تنتضرني بالبيت وعايفهة وحدهة ..

مد ايدة حاوط خصري وسحبني ناحيتة ..
مبتسم وجر تنهيدة : حتى وانتي معصبة تخبلين .. والسمن لايگلج .. ولابسة اسود ادور .. شلون بحالي ؟

برطمت وخنگتني العبرة .. من ورة الحمل والهرمونات صرت حساسة وعلى كلشي ادمع .. : سمنانة مو .. عرفت والله زايد وزني .. البنات ايگللي لا جذب ..

طبگ حواجبة : شبيج راح تبجين .. علمود وزن شنو ..
مريم : لعد شنو ؟ يخرب جسمي ..

ابتسم : واذا خرب .. تخافين محد ياخذج وما تتزوجين شنو ؟؟
رفعت حاجبي : لا عيني .. يزيد وزني ويخرب جسمي .. وانت تروح تدور غيري وبعد اصير ما اعجبك من اسمن ..

تقرب عضني من خدي .. جريت راسي ليورة : اااخ ..
ابتسم وباوعلي بهيام : وج انتي جنتي ضعيفة واني جنت عاشگج .. وهسة جنج تفاحة وهاي الخدود عندج وتردين ادور غيرج .. مسودن اني لو عقلي ضارب ..

طبع شفتة على خدي حيل وطول ببوستة يلة وخر ..
حجيت بهدوء : وين جنت ؟ ليش جاي متأخر ..
تنهد : ابوج وافق على حارث يزوجة جيلان .. وحارث فرحان اليوم وصارلة ساعة يفتر .. ويخطط ويسولف ..

ابتسمت بفرحة : صدددك بابا وافق على زواج حارث وجيلان .. يااا عمررري والله يستاهلون .. جيلان اكيد هسة فرحانة حيل ..

انتبهت لنضراتة على شفتي ارتخت ضحكتي ..
حتى عيونة من يرمش ببطئ ..
حجة بهدوء : فرحيني اني وياج .. مو گلبي خلص ..

ابتسمت ورفعت ايدية ورة رقبتة ..
سحبتة الي وطبگت شفتي فوگ شفتة ..
هو مباشرةً حط ايدة على خدي وهو صار يتفنن بالبوسة اكثر مني ..

انفاسة حارة وتضرب بوجهي .. كل شوي يوخر ينطيني مجال اتنفس ويرجع ياخذ شفتي مرة ثانية ..
نزل على رگبتي واكتافي وهو ينزل طرف الدشداشة عن كتفي ..
دوخني وياه بهدوئة وحنانة المعتاد ..

ووووو ... ما توقع تردون تعرفون الباقي ..

الاربعاء // ريم ..

افتر بغرفتي واجهز نفسي .. بعد ساعة ويجي حارث ياخذنة ونطلع وية المشية علمود عقد هادي وحنين ..

حيل فرحانة .. ومختبصة بنفس الوقت ..
خلصت مكياج خالتي هويدة وگعدت اني اني اتمكيج ..
ما حطيت مكياج طوخ .. لان خالتي گالت لا تغيرين بشكلج هواي وخلي التغيير لعرسج احسن ..

طلعت نفنوفي لونة اسود وبي حزام احمر ومن جوة ذيل سمكة واطرافة احمر .. بدون اكمام وحضرت وياه شال وگلت احطلة دنابيس واثبتة لان رياض ميقبل ..
على گولتة (حرم سيد رياض عجاج ما تلبس مكشف) ..

سمعت صوت سيارة جوة ..
شهگت عزة بعيني اجة حارث واني بعدني ممخلصة ..

جريت النفنوف عالجرباية ودگ تليفوني ..
رفعتة رقم رياض رديت بأستعجال وفتحت الصوت وحطيت التليفون عالميز : الو ..

رياض : ها حبيبي .. شبيج فحطانة ..
جريت البدي مالتي واني ابدل : ما فحطانة بس مستعجلة اريد اخلص مابقى وقت ..

رياض : شبي صوتج بعيد .. عليمن مستعجلة ..
جريت النفنوف اريد البسة وحجيت بدون وعي واني مخبوصة بالنفنوف افتح بالقيطان مالتة : مو حاطة التليفون عالميز وجاي ابدل .. النفنوف يشلع الگلب ..

سكت شوية وبعدين حجة بتنهيدة : اويلي عليك سيد رياض .. اگلج بدلي وانزلي جوة اني بالديوانية مالتكم ..
طبگت حواجبي : انت الي اجيت هسة لو حارث ..

رياض : اني يابة اني .. تعاي گتلج ..
سديت التليفون وبدلت عالسريع .. لبست حذاء كعب شوي عالي ووياه حجل ناعم .. رشيت عطر ..

جريت الشال الاحمر حرير ناعم بلون الحزام واطراف الفستان .. لفيتة على اكتافي وغطيت فتحة الصدر الي على شكل ٧ وشوي نازلة ..

نزلت جوة .. خالتي طلعت من الديوانية بيدهة علاليك اكيد هو جايبهن ..
ابتسمتلي من شافتني : ماشالله عين النبي عليج .. يمة تخبلين ..

باوعتلهة منحرجة : خالة رياض صاحني يريد يشوف النفنوف ..
ضحكت : اي ماما اخذو راحتكم لا تستحين ..

ابتسمتلهة .. هي طلعت واني دخلت ..
طبگت الباب وراي ..
هو رفع راسة وذب التليفون من ايدة ..

باوعلي مبتسم وعيونة مشت على الفستان الي مقسم جسمي ..
الشال جنت لابستة ولازمتة حتى لا ينفك ..

شفتة طول بسكوتة حجيت بأبتسامة خجل : هلو ..
فتح ايديناتة بترحيب وهو يجي علية : هلا بعد بيتي ..

اخذني بحضنة وسحب نفس من عطري ..
رفع راسة ليفوگ وجر تنهيدة : احترگوووو ..
طبگت حواجبي : شبيك ؟؟؟

باوعلي : وج شهالعطر .. يسطر سطر ..
رفعت طرف من الشال اشمة : يا يعني هيج قوي .. بالعكس دائماً اخلي منة .. وهادئ ..

ابتسم وباوع للشال : ليش لابسة الشال .. ذبي محد هنا ..
هزيت راسي : ها .. لبستة خاف يجي بابا لو حارث ..
ابتسم : عفية .. بس هسة ماكو لا بابا ولا حارث .. شو ذبي ..

فتحت عيوني لان جنت لابسة مكشوف : لا لا عوفة ..
مد ايدة جر الشال بهدوء من ايدي : ليش اعوفة .. شو وخري ايدج .. الشال مغطي النفنوف كلة ..
انسحب الشال من عندي لان جان حرير وناعم ويزلگ ف انسحب بسهولة ..

فتح عيونة على وسعهن وهو عيونة تباوع لاكتافي وبداية صدري ورگبتي ..
وجهة صار احمر : شنو هذا ولج ..

بلعت ريگي : ها شنو .. فستان ..
نتر : ادري صخمان .. اني شحاااجي .. مو گتلج ما تلبسين مكشوف ..

اشرت عالشال : البس وياه شال والله .. احطلة دنابيس واغطي اكتافي ..
جر نفس بقلة صبر : روحي بدلي .. ماكو روحة بهذا الزفت ..

رفعت اكتافي : لاااا شنو مااا ..
طبگ حواجبة بعصبية وصاح : شنو هو الماا تعاندين شنيي ؟؟ امشيي بدلي لا ابتلي بيج يلللللة ..

حجيت بترجي واني خنگتني العبرة : فدوة خل البسة حباب والله ما عندي جديد بس هذا .. هذنيج اشتريتهن لعرسي ميصير البسهن هسة ..

رجع زمخ بية : امشششييي بدلللي .. ليش تخليني اصيح .. بدلي لا اشگة عليج والله ..
غورگت عيوني وصارن حمر ..

حجيت بعصبية مخنوگة من العبرة : خوش راح ابدلة .. بس اذا حجيت وياك بعد تعال عاتبني ..
درت وجهي اريد اطلع ونزلت دمعتي .. اكره روحي بهالاوقات .. حقهم من جانو يسموني ام دميعة ..

ردت اطلع صدك انقهرت ..
جرني من زندي بعصبية : اوووگفي وين رايحة ..
نترت : ويين يعني ؟؟ ابدل هذا الزفت على گولتك .. وخر عني ..

زفر انفاسة بعصبية : عليمن بجيتي ؟
مسحت دمعتي بسرعة : مااا بجيت ..
طبگ حواجبة ونتر : اي مو خروف اني ما افتهم .. عليش تتبجين ..

درت وجهي بزعل ومبرطمة ..
دار وجهي بيدة : من احاجيج باوعيلي .. تبجين على فستان .. شنو هالقابلية .. جاهل انتي؟؟ ..

طبگت حواجبي ورجعت غورگت عيوني : اي هاي الافتهمتهة انت .. صياحك علية وعصبيتك واتگلي ابتلي بيج واشگة عليج .. هذني ما ابجي عليهن .. بس ابجي عالفستان مو ؟ ..

جريت ايدي منة وكملت : اي اني جاهل يلة .. زعطوط اني ابجي عالفستان .. هايهية ؟؟
شنو فايدة كلامي هسة .. بعد صرت على ذمتك وتورطت بوحدة زعطوطة وام دميعة .. اذا تريد روح بكيفك ..

باوعلي بعصبية : لا صدك بهذا كلامج اثبتيلي انج جاهل .. شنو اروح شنو تورطت ..
هسة هذا حجييج كلة لان گتلج بدلي الفستان مع ان انتي الغلطانة واني محذرج من قبل وگايلج هذا اللبس ممنوع ..

نزلت دموعي : اي هايهية واني گتلك راح ابدلة .. شكو رجعتني ..
جر نفس بقهر : جا شني تگليلي اذا حاجيتك بعد تعال عاتبني .. شلون بلة اخليج ترحين وانتي زعلانة ..

جريت شهگة من ورة دموعي ..
هو تنهد .. مسح دموعي بأصابعة : كافي لا تبجين .. هايهية عمي اسف .. بس بعد لا تناشغين ..

مسحت دموعي واني بعدني زعلانة ..
سحبني باس راسي : لا تگلبين وجهج علية ..
الشهگة تطلع مني لا ارادياً بس تنزل دموعي ..

هو عاط بية : بوية البسي بكيفج بس كافي لا تناشغين .. والله شلعتي گلبي .. شلون اخلصهة وياج اني .. اذا على اقل شي وگمتي تناشغين .. واني على اقل شي اعصب .. شلون نگضيهة بلة ..

نزلت راسي بضوجة : مو لازم البسة خلص .. خل يولي ..
ابتسم بهدوء : لا البسي يخبل عليج .. بس الشال ما ينذب .. ممنوووع ..
رفع راسي بأصابعة وعينة بعيني : خووش حجيي ؟؟

هزيت راسي ..
باسني بخدودي ثنينهن .. رجع باس خشمي .. : ابتسمي يلة .. وبعد لا تبجين .. خلي دمعتج عزيزة ..

ابتسمت بهدوء ..
جريت نفس وحجيتهة لاول مرة اگولهة : احــبــك .. رياض ..

ارتخت ملامحة وباوع بعيوني ونضراتة تحجي كل حب .. : شيخلص هالاسبوعين ربييي ..
ضحكت وجريت الشال من ايدة والفة على اكتافي ..

فجأة انتبهت : ياااا .. هاي اني بجيت ونسيت مكياجي .. ليش هيج فدوة ..
ابتسم : والله تخبلين ..

سلم علية وبعدين طلع واني صعدت فوگ عدلت مكياجي من جديد وسويت شعري بتسريحة بسيطة ..
ثبتت الشال زين بدنابيس ..

سمعت صوت سيارة هالمرة سيارة حارث ..
لبست عبايتي .. ونزلت .. طلعنة اني وخالتي صعدنة بالسيارة ..
اخذنة حارث ولاگينة السيارات الباقية ..

مشينة وياهم ووصلنة لبيت سيد عجاج ..
نزلنة احنة النسوان دخلنة نهوس من الباب ..

مباشرةً رحت لحنين گاعدة بالكوشة ولابسة فستان فيروزي مكشوف الاكتاف ومبين شوي من فتحة الصدر .. شعرهة مفتوح كلة وبس حاطة تاج زغير يلمع .. وگذلتهة بجهة وحدة بطريقة حيل مرتبة وانيقة ..

گعدت يمهة واباركلهة وهي مبتسمة : اگلج تعاي ..
نصيت عليهة : ها ؟
حنين : شو هذني ايگللي سوي روحج مستحية .. عيب من العالم .. شلون يعني ماعرف استحي جذب ..

ضحكت من گلبي : لا حبيبتي معليج بيهن .. ابقي على طبيعتج .. هو المستحى ذبة وشعور يعني مو تعلوم ..
هزت راسهة : اي هايهية لعد .. معلية بيهن ..

شغلو اغاني وگمنة رگصنة .. وجيلان الفرحة تشع بعيونهة .. وحتى حارث خطية فرحان ومتلهف حيل ..

ورة شوية عقدولهم ..
ودخل هادي .. خطية مستحي كلش ومبتسم ..
اجة گعد بصفهة باسهة بگصتهة .. وهالمرة فعلاً شفت الخجل بعيون حنين ..

گصو الكيك وحطيتلهم بماعون حتى واحد يوكل الثاني ..
هادي انطة الحنين وهي هم وكلتة ..
هو ملتهي يسولف وية خالتة الي تباركلة ومستحي بس يضحك والله يسلمج والله يحفضج ..

حنين اشرتلي نصيت عليهة وحجت : شلون كيك وياكل كيك .. اني راح اموت ..
ضحكت متت من الضحك .. خرب بليسج حنين ..

اجينة احنة اخذنة وياهم صور وهو كلساع ياخذ كلينس ويمسح گصتة .. ويسترق النضر الهة بين فترة والثانية ..
لبسهة الذهب وبعدين طلع ..

من طلع اجن البنات اخواتهة وبنات خالتهة ..
گعدن يمهة وستفسرن وهي رايحة بغير عالم ..
رفعت ايدهة البيهة الحلقة وحجت : هذا الحلقوم الهسة طلع .. صار زوجي اني ؟؟

ضحكت هزيت راسي : ايييي ..
جرت تنهيدة : يا بعد هلي .. شفتي شلون يباوعلي كلساع ويدنگ مستحي .. والله ردت اگلة باوع يعيني لا تستحي خل اشبع شوف بيك ..

ليلى ضربت على خدهة : خييييية .. هاي البنية وعلي تفشششل .. ليگول هي الرجال مو هو .. ولج عيييب ..

هزت راسهة بعدم اهتمام ..

خلصت الحفلة ورجعنة للبيت ..

بليل تقريباً الساعة ١٢ .. نزلت للمطبخ اجيب مي ..
شفت الضوة مفتوح استغربت ..

دخلت شفت حارث .. فاك المسند وحتى اللفاف ..
كتفة مكان الجرح كلة دم والقطن الگدامة هم كلة دم ..

اخترعت من المنضر ودخلت اركض ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🕊

صباح الخير ان كان صباحاً ومساء الخير ان كان مساءً ..
احب اعتذر منكم على التأخير الي صار .. واتمنى تعذروني ..

اكو بعض البنات كالو عامر ليش ما لگيتيلة وحدة .. 😂 منين اجيبلة وحدة يمعودات .. انتو دورو .. يمكن ازوجة وحدة منجن .. شتگولن 🤓

والقصة ما بقالهة شي وتخلص اذا ملاحضين ..

احبببببكم .. لا تنسون صوتو وعلقو وكلشي ينداس دوسو ..