رواية بنات للزمن الفصل الخمسون 50 - بقلم سارة الشمري

الكاتبة : سارة الشمري🕊

كثر ما فكري يمك وانتَ بيه تدور
صرت حته من اغمض هم اشوفنّك
صرت بيك انه عايش وانتَ بيه تعيش
وبعد ما گمت احبك صرت احبنك

( تفاعلو بالقصة وكثرو تعليقات عالفقرات حبايب گلبي .. احبببكم 🕊)

بعدني يم السيارة وصحت : حاارث ..
التفت علية حارث الي جان يصيح .. الشرطة كلهم التفتو علية ..

هالشي انطة فرصة لأمين يمد ايدة للشرطي ويسحب السلاح من ايدة ومباشرةً وجهة على حارث ..

بنفس اللحضة اطلق رصاصة استقرت بجسم حارث ..
الضربة جانت عن قرب خلت حارث يوگع على ضهرة ..

ركضت بكل سرعتي : حاااااررررث ...
تجاهلت حارث ورجلية لا ارادياً راحن لامين ..
دفرت ايدة شمر المسدس بالگاع  ..

شديت قبضة ايدي بكل قوة ورفعتهة وضربتة بنص جبهتة خليتهة يتهوى للگاع مسطور ..
قيدو الشرطة واني ركضت لحارث ..

لازم زندة مكان الرصاصة ومغمض عيونة وراص سنونة بألم : ااااه ..
گعدتة ورصيت على جرحة واعيط بي : مو گتلك لا تجي .. گتلك ابقى بمكانك .. لييييش تعاااند ..

سندتة وگف على رجلي : سيييد رحمة لاهلك اسكت .. هذا الحيوان لهسة ما بردت نار گلبي منة ..
صعدتة بالسيارة وافتريت صعدت اني : وتااالي وياك متگلي .. هاي سواية تسويهة .. لو جاية الطلقة بصدرك ..

جريت خاولي زغير من الجكمجة وحطيتة على جرحة ..
هو حجة بألم : بعد كلمن ويومة .. اذا مقدرلي اموت .. معناها هذا امر الله .. بس مادري شلون خلص هذا الزفت من ايدي ..

تنهدت بقلة صبر واسوق بسرعة : وحق ربك لو ما متصوب جا شوفتك شلون من يتعاند سيد رياض ..

ضحك بألم : ايباااااااه .. عود ملازم ويخوفنة بالرتبة .. لا تنسى ترة انت خاطب اختي .. انت عصبي واني اعاند .. ابطل ما اخليك تاخذهة .. كلمن بدربة ..

نترت : دباااوع لحالك قبل لا تهدد .. هسة وكتهة هالسوالف ..
حارث بضحكة الم : انت البديت .. تحملني لعد ..

فركت وجهي : شحجي وياك بعد ما تگلي .. حتى بهيج وضع تتمضحك ..
حارث : شتريدني اسوي لعد .. اگعد اعيط وابجي من الالم ..

جريت تنهيدة وسحبت تليفوني اتصلت على راسم گتلة يسبقني للمستشفى لان حارث تصوب وهو اجة يتخبل ويصيح ويحلف بية خاف بي شي واني ما احجي ..

لحد ما حارث سحب التليفون مني وحجة : لا تللح دكتورنة مابية شي .. جااين بالطريق ..
سد التليفون منة ..

وصلنة للمستشفى .. مباشرةً دخلو للعملية حتى يطلعون الرصاصة ..

ورة شوية اجة راسم يركض ويلهث وخايف ..
حجيتلة الي صار .. وهو عصب من تصرفات حارث ..

ما مرت غير ربع ساعة والمستشفى انملى ..
ابو حارث وابو هادي وهادي وجبران ورضوان وعامر  .. كلهم منتضرين شوكت يطلع ..

جبران يفتر يروح ويرجع ويرجف ويلوم بروحة ويحمل نفسة المسؤولية ..
احاول افهمهم ان حالتة مو خطيرة بس محد يقتنع ..

اخر شي راسم ما تحمل ينتضر راح بدل ملابسة ودخل علي ..

ديلارا //

جنت گاعدة بالصالة يم حبوبتي وامسد برجليهة ..
هي توصي بية مثل العادة كل ما اگعد يمهة وتبدي ..
من تعرسين هيج وهيج صيري ولا تسوين هيج .. ونصايحهة الما تخلص ..

نزلت جيلان يمنة .. امي هم اجت گعدت يمنة ..
بابا جان فوگ بغرفتة نايم لان جانت الدنيا ضهر وحارة وهو قبل شوية رجع من المعمل .. وراح ينام شوية ..

گمنة بسرعة على صوت بابا ينزل من الدرج عالسريع ويصيح ويخابر مدري منو : وتاااللليييهة وييية تصرفاتة هذا المخبل .. شلوونة هسة خو ما بي شي .. متأذي شنو ..

حبوبتي : سترك يا ربي .. شنهي السالفة ادور .. ولك عااصم تعااالي ..
ابوي دخل للصالة مستعجل على صوت امي وسد التليفون : ها يمة ..

حبوبتي : شنهي سالفتك وياهو التحجي وياه وياهو المتأذي .. احجي طيحت گلوبنة ..
حجة بسرعة : حارث يمة حارث .. رايح لبيت هذا امين ابو المخدرات ومتهجم علي .. وهذاك الـ... ضاربة بالسلاح ..

حبوبتي لطمت على صدرهة : اناا امممك يحااافظ .. شبيييي الولد ..
امي : فدوة خو ما متأذي هواي ..

باوعت لجيلان ترجف وعيونهة تباوع لبابا ..
ابوي دار وجهة يريد يطلع : مادري مادري ..
جيلان بسرعة تمسكت بيدة والدمعة واگفة بعينهة وحجت برجفة : حارث مات مو .. لا تجذب علية گلي الصدك ..

ابوي باوعلهة ثواني ما حجة وهي رجعت هزت ايدة الباقية متمسكة بيهة وصاحت ودموعهة انهارت على وجهة : جااوبني بابا گلي حارث مات وانت ما تحجي .. حارث راح بدون ما اشوفة مو ؟

بابا حجة وهو يتنهد : لا ما مات بابا ارجعي .. خل اروح اشوفة .. انة اخابر واطمنكم ..
هزت راسهة بلا : فدوووة بابا خل اروح وياك .. بس اشوفة بعيوني .. ادري بي يحس بية يمة ..

نتر بيهة : وين ترحيين .. ارجعي هناك العالم وجماعتة ..
هزت راسهة وحجت بترجي : امنعني بكلشي تريدة .. لا تزوجني الة .. وزوجني بأي واحد تريدة .. بس لا تمنعني من شوفتة هسة فدوة بابا .. اذا مات حارث اني اموت وراه حطهة ابالك ..

تنهد ويباوعلهة ثواني .. بلع ريگة ورفع عيونة توجهت علية : تعاي الزمي اختج خل اطلع ..
سحب ايدة منهة وهي گعدت بالگاع تبجي وتعيط وراه ..

امي لزمتهة من ايديهة بعصبية : شبيييييج تخبببلللتي .. شنو هالحجي هذا .. شهالتصرفات جيلان .. شعليج بحارث ..

جرت ايديهة بعصبية من امي وگامت تعيط : ايييي اني تخبلت .. عقل ماكو براسي .. راح تموتوني.. على ساعة تجون تلگوني حارگة روحي .. كلة من ورة ابوي .. يدري بية احب حارث وحارث يحبني بس هوو عاااند وطردة ..

وهسة هم ما ياخذني الة .. ويحرمني منة ..
راد يزوجني لواحد ماعرفة وهددني يگلج على علاقتي بحارث اذا رفضت ..

كملت بصوت اعلى وصياح : بس هسة بعد ما يهمني .. شتسوون سوو .. اذا حارث صار بي شي والله اموت روحي وراه ..
وخلي ابوي يرتااح واني ارتاااح ..

طلعت من الصالة وصعدت فوگ ..
امي واگفة مصدومة وتباوع لمكان جيلان ..
باوعتلي وحجت برجفة : امشي .. امشي ورة اختج لا تسوي بروحهة شي .. لا تعوفينهة وحدهة .. امشييي ..

صعدت فوگ بسرعة لغرفة جيلان لگيتهة گاعدة بالگاع وشبعانة بجي ..
گعدت كدامهة : جيلان .. حبيبتي لا تخافين انشالله مابي شي ..

هزت راسهة بتعب : دلو مليت والله .. شسويتلة اني وهيج يعاقبني .. مو بنتة اني .. ويدري سعادتي وية حارث .. ورغم هالشي يمنعني منة ..
وهسة ميريدني اروح الة .. والله ادري بي اني اعرف حارث بس يشوفني راح يطيب .. وجودي يمة يقوي والله ..

اخذتهة بحضني وهي تبجي وتناشغ ..

راسم //

وية ما دخلت لغرفة العمليات لاگاني الدكتور هستوة مخلص .. شافني وابتسم : دكتور راسم هنا ؟
هزيت راسي بقلق : الي سويتلة العملية ابن عمي .. شلون صار هسة ..

ذب الجفوف مالتة بأبتسامة : بأحسن حال لا تخاف علي .. الرصاصة بيدة وماكو شي خطير ومو يم العضم وطلعناهة .. ونزف هواي دم وگدر يتحمل لان بنيتة قوية ماشالله .. عكسك بهذاك اليوم من السجينة شگت صدرك نزفت دم وضغطك نزل ..

ابتسمت : صحيح .. حارث بنيتة قوية ومهتم بالرياضة .. وجسمة ماخذ عالقوة .. واني مهتم بعقلي ومهنتي ومهمل التغذية .. شلون ما تريد ضغطي ينزل ..

هو ضحك : يابة الف سلامة على گلبكم ثنينكم ..
راح هو ..
ووراه همة طلعو حارث ودخلو بالعناية المركزة المزدوجة هي وغرفة العمليات وحدة بصف الثانية ..

دخلت اني وراهم والممرضين يفترن بالغرفة گالو شي ربع ساعة ويفكة البنج ويطلعونة لغرفة خاصة ..
اباوعلهم يباوعولنة ومبتسمين ..

حارث وجهة مصوفر وحاطيلة مغذي ولافين زندة ونايم بدون قميص ..
حجة واحد من الممرضين بضحكة : لا تخاف علي دكتورنا .. كلشي ما علي جنة ورد ..

الممرض الثاني هم ضحك : اي بطل ماشالله علي ..
طبگت حواجبي واباوعلهم : ما فهمت شبي ..

الثاني حجة : شسوة بينة يا دكتور .. والله مدري اضحك مدري اسكت ..
راسم : ليش .. شسوة ..
الاول : ايگل للدكتور ما تگدر تطلع الرصاصة بدون بنج ..

ابتسمت واني هستوني استوعب قصدهم ..
الثاني : اني ما شايف واحد داخلة بيدة رصاصة وما خايف واجانة حتى يضحك .. هو شاف الابرة وانگلب حالة .. ايگل للدكتور اتحمل اني مالك شغل ما يحتاج بنج ..

الاول : الله وكيلك يا دكتور يمكن بالربع ساعة مگابلة وگاعد ما يرضى لا نشد كانونة ولا يضرب ابرة البنج ..

الي يشوفة مو ايگول جبير .. وعضلاتة تسد عين الشمس .. ويخاف من ابرة .. ايدة تنزف دم ويتألم ورصاصة داخلة بيدة وما مهتم بگد ما مهتم بالابرة ..

بالگوة خلانة نحقنة الابرة .. وما خلى دعوة ومسبة وغلطة ما وجهة على الي اسمة امين مدري منو ..

ضحكت واباوع لحارث .. من صغرة يتخبل من الابر ..
وبقت عندة هاي الحالة لحد ما كبر وهو عندة الابر فد شي مرعب ..

بدة يون .. وگعد بس بعدة تحت تأثير البنج وبدة يدردم وويسولف وياي مو واعي لنفسة ..
حارث : ااااخ الله يطلع حوبتي وضيمي بيك .. شسويت بية ما تگلي .. والله لو بيدي احرگگ حرگ ..

ضحكت : يلة ابو عباد عدت سلامات .. خل يولي بعد لزموه وخلصت منة ..
حجة بقهر : شخلللصت منة .. واگفلي عضم ابلعومي .. ما يطيني مشمش ..
فتحت عيوني : هذا حجيك على عمي عاصم ..

عاط بية : لا تجييب اسمة .. ربببي بس لو تحط بيدي عود شخاطة وهو گدامي لاحرگة حرگ .. ما يخليني انام الليل ..

ضحكت وحطيت ايدي على حلگة : هووووب يمعوود لساانك .. ترة واگف برة هو ..
اجو الممرضين : من رخصتك دكتور خل نطلعة لغرفة ..

هزيت راسي بسرعة : على بختك وين تطلعة .. هذا اذا طلع وسمعو شيحجي يضيع مستقبلة والله .. عوفو خل يصحصح وعلى مسؤوليتي ..
راحو همة وحارث يدردم وحتى غلط يغلط ..

اخر شي كام يسولف وحدة : مشمش .. والله غصباً على ابوج .. اخذج اخذج .. هو بس خل يفك حلگة .. بعد ما اگول عمي .. بعد غريب علية هو مادام طردني .. من يروح فدوة لعيونج النايمات .. ومن يتكحلن يصيرن جنهن عيون ذيب ..

ضحكت على سوالفة وطلعت تليفوني وصورتة ..
وهو يدردم وگام يوصف بجيلان ويعبر عن شوقة الهة وممزوجة بعصبية من عمي عاصم .. بأختصار طلع ضيم گلبة بالسوالف هسة .. همزين محد موجود من الممرضين وبس اني وياه ..

من شفتة بدة يصحصح ويرجع طبيعي ويباوعلي ويسأل شوكت اجيت وشلون صارت ايدي ..
صحت الممرضين طلعو لغرفة وحدة ..

رحت اني بدلت ملابسي ورجعتلة ..
كلهم ملتمين علي ..
يتحمدولة بالسلامة ..

عمي عاصم حجة بهدوء : ما عندك غير العافية حارث .. الحمدالله عدت على خير ..
حارث بهدوء وبي ثگل بصوتة : الله يعافيك ..

حصرتني الضحكة واني اتذكر سوالفة مال مساع ..
جبران واگف ويتعذر منة : والله بعد لو اموت ما احط هذا السم بحلگي .. تدري لو صاير بيك شي من وراي شجان راح يصير بية ..

حارث : لا تطوخونهة كلهة اصابة واجت بأيدي .. حتى ما رادو يحطولي بنج من كد ما سهلة .. بس اني رفضت ..
فتحت عيني : الله علييك ..

هو باوعلي : شبيك ما مصدك .. حتى اسأل الدكتور ..
هزيت راسي بضحكة : مصدگ حبيبي عندي ثقة بكلامك ما يحتاج اسأل ..

شوية ودگ تليفون هادي .. باوع لابوي : هذولة الاهل .. راح اطمنهم واجي ..
طلع هادي يخابر برة ..

ودخل عباس بسرعة : يااا خوووية يا حوييرث .. هاي سواية تسويهة .. لو ميييت وين اوولي انة ..
حارث : اجة المتفائل .. جفييينيي شرك وشر فالك الحلو .. كلشي ما بية ..

عباس : دخل تطيب ايدك وارد اكسرهة الك .. على عملتك مال المزعطة هاي ..
رياض : الايد الثانية الي ..

عمي ضافر حجة : واني اكسر راسك على هالدگة .. هسة بالله شستفاديت ..
حارث : بردت نار گلبي عالسواه بأبن عمي ..

باوعلي وحجة : وانت ما تريد رجلية تكسرهن .. بعد فصخوني وكلمن يكسر بكيفة ..

شوية وطلعو من الغرفة وبقيت اني يمة ..
هو باوعلي : خير ليش بعدك واگف .. ترة الدكتور گال خل ينام ساعتين وبعدين طلعو .. يلة اطلع خل انام شوية سطرتوني بسوالفكم ..

ابتسمت : ما شبعت نوم .. هستوك گعدت من البنج .. وابداعات طلعت منك ..
طبگ حواجبة : هاي نضرتك مو خالية .. شني السالفة ..

طلعت تليفوني وشغلت الفيديو مالتة وهو يحجي ومو واعي ..
فتح عيونة على وسعهن وهو يسمع روحة يغلط على عمي عاصم : نصيييي ابن الاوادم لا يسمعة ترة گاعد برة .. استر علية ..

ضحكت ونصيت الصوت ..
كمل الفيديو وهو عيونة تتوسع : هاي سوالفي واوصف بمشمش كدام الدكاترة ..
هزيت راسي بأي ..

طبگ حواجبة بعصبية : لا راسم عليك الله صدك ..
ضحكت : لا تخاف محد موجود بس اني ..
تنهد بأرتياح : خوفتني ابن الاوادم ..

سديت التليفون وصميتة بجيبي وتنهدت : اي حبيبي من اليوم وجاي تحترمني وتسمع حجايتي .. ترة عندي دليل عنك يوديك ورة الشمس ..

هز ايدة : دمشي امشي اطلع برة خل انخمد ..
ردت اطلع ودك تليفوني فتحت خط : الو ..
: الو راسم .. اني ديلارا ..

راسم : هلا ديلارا ..
ديلارا : راسم فدوة .. اتصلت على رضوان وما يجاوب .. واتصلت عليك .. اذا حارث محد يمة انطي التليفون .. جيلان تريد تحجي وياه .. راح تتخبل من البجي وما تصدك حارث مابي شي ..

راسم : ماشي انطيهة التليفون ..

رجعت للغرفة طبگت الباب ..
حارث فتح عيونة بملل : خييير المن رجعت ..
مديتلة التليفون : اتصال الك .. يردون يتحمدولك بالسلامة ..

دار وجهة للصفحة الثانية : كللهم نايم بعدين يخابرون مابية حيل اسولف ..
ابتسمت وفتحت سبيكر وعليت الصوت
وهي حجت وتبجي : حارث تسمعني ؟

هو فتح عيونة بسرعة والتفتلي وسحب التليفون وحجة بلهفة : جيلان ؟؟
شهكتهة وصلت لهنا : حارث حبيبي ما بيك شي مو .. ما متأذي ..

حارث : يا بعد اهل حارث .. ما بية شي اصابة بسيطة ...
جيلان : والله ردت اموت من الخوف .. عبالي عفتني ..
حارث : شلون اعوفج اني .. غير انتي روحي .. لا تبجين يا بعدهم كلهم .. يا بعد عاصم وعشيرتة ..

فتحت عيوني : حاااارث ..
هز راسة بعدم اهتمام ..
والمصيبة جيلان وياه : ايي ما خلاني اجي اشوفك ..

حارث : اي همزين ما اجيتي .. عالم تارسة المستشفى ..
جيلان : حبيبي يعني صدك ما بيك شي .. ما متأذي ..
حارث : لا مشمشتي ما بية شي .. سمعت صوتج هالشي كلش كافي علية ..

بعد مرور اسبوع // براء ..

گاعدين عالسفرة نتغدة .. اليوم عندي عطلة ..
مجتمعين كلنة .. بابا كاعد وعمو رياض وامي والبنات وحبوبتي .. بس الولد لا ..

عمو رياض يباوعلنة ويبتسم واني مستغربة ..
حنين حجت : خيرك عمي .. رايد شي .. ليش تتبسم ..
ابتسم بالزايد : زاعجج بأبتسامتي يعني ؟

حنين : لا حبيبي ابتسم شگد متريد .. بس گلي شنو سبب الابتسامة لان ضلت تحوس بگلبي وشككتني بروحي .. وجهي بي شي ؟

ابوي باوعلهة : بابا حنين انتي كبرتي بعد ومو زغيرة .. اعقلي وبطلي هاي السوالف مال الجهال .. كبري عقلج ..
رياض : اي والله .. عقلج ما يساوي نص بيضة .. حسبالج بعدج طفلة انتي .. العالم كامت تجي خطابة ..

حبوبتي كملت : اربطوهة بالحمزة بلكت تعقل .. فدوة لاسمة مجرب ينطي المراد بالايد .. انت اخذهة واضرب راسهة بالشباك مال الامام وهو ينطيهة العقل والتثگل ..

حنين تباوعلهم وفاتحة حلگهة ..
حجت وهي منقهرة : شحجيت هسة اني وكلكم گلبتو علية .. شسويت اني ؟
لمت حلگهة دليل على زعلهة : دوم ترزلون بية .. محد بيكم متحملني ..

عمو رياض ضحك : والمگرود شلون راح يتحملج مادري ..
حنين رفعت راسهة علي ومثل العادة دوم من باب الضحك ترد على عمو رياض : هو وينة المگرود ؟ خل يجي عود بعدين الله كريم ..

بالعادة من تحجيهة هيج تتشاقة .. لان دوم يگلولهة الله يعين المگرود .. مسمينة بالبيت ومعروف الي ياخذ حنين هو المگرود ..

بابا حجة : ابشرج اجة المگرود ..
حنين : وينة يحسرة .. يسمع حجيكم علية ويشرد ..

رياض : الموضوع ما بي شقة .. خابرو جماعة وخوش ناس يردون بنية من عدنة ..
حنين : اي اذا يردون بنية اكيد براء .. مو هي الجبيرة .. اني ماتزوج قبلهة ..

فتحت عيوني : شنوو لا عيني ما اتزوج .. اني اريد اتخرج يلة .. بقتلي سنة ..
عمو رياض باوع لابوي : والله بعد انت تفاهم وياهن .. هادي حفيد حجي خضر وخوش ولد والله ينحلف بأخلاقة ..

حنين فتحت عيونهة على وسعهن ..
ذبت الخاشوگة وتدنت علية شاورتني : عزا بعينج وافقي وافقي .. هذا لو تفرين عكا ومكة ما تلگين واحد مثلة ..

باوعتلهة وهمست : خيييير .. ليش مو انتي الي توافقين ..
حنين : غير انتي الغبيرة الجبيرة .. شلون اعرس قبلج .. اني لو بيدي جا هسة كلت اي ..

عمو رياض : شتبسبسن انتي وياهة .. عيب تتشاورن گدام احد ..
حنين : عمو جاي اقنع ببراء .. على ابن الحجي ..

رياض رفع تك حاجب : وانتي شعليج بأبن الحجي ..
حنين : شلون شعلية .. اذا رفضت ياخذون منك ريم .. هسة ايگولون شنو احنة انطيناهم وهمة ما ينطون ..

عمو رياض : لا مالج شغل بهاي السالفة .. لا تخافين على مستقبلي .. ولا تقنعين براء ما يحتاج ..
ابوي ضحك : اقنعي روحج انتي .. الولد جاي عليج مو على اختج ..

حنين بهتت ثواني وبعدين فتحت حلگهة : علية اني ؟
عمو رياض مدنك ياكل : اي انتي .. من خابرني البارحة وخطبج .. اني رجعت خابرت ريم وسألتهة ليش انتي .. كالت هو سألني يريد من عندكم بنية .. وهي كالتلة الجبيرة متريد زواج هسة تريد تتخرج بالاول بعدلهة سنة .. والاصغر منهة متخرجة وكاعدة .. واخو عليج ..

ضحكت والتفتت على حنين وهمستلهة : ها ما توافقين ..
هي وخرت وگامت بسرعة وصعدت فوگ وعمي وابوي يضحكون عليهة ..

ابوي التفتلي : اي براء ؟
التفتت : ها بابا ؟
ابوي : انتي گايلتلي ومنطيتني خبر تتخرجين يلة تتزوجين ،،
هزيت راسي ..

كمل : وقبل يومين خابرني واحد وخطبج .. اني ما گلت علي لان ردت اسأل عن الولد بالاول .. وطلع دكتور بجامعتكم اسمة ضيغم ..

طبگت حواجبي : دكتور ضيغم ؟؟ خاطبني ؟
هز راسة : اي .. والناس كلهة تحمد بأخلاقة .. واني من اول ما خابرني كتلة بنتي ما تريد تتزوج الا بعد التخرج .. گال ماكو مشكلة هسة بس خطوبة وورة ما تتخرج نتزوج اذا الله راد ..

باوعتلة ثواني : الله كريم بابا .. بس انطيني وقت افكر ..
ابتسم : اخذي راحتج بابا وفكري شكد متردين .. وروحي حاجي اختج الشردت وكلشي ما افتهمنة منهة .. ترة هادي خوش ولد وما يحتاج نسأل عنة لان نعرفة كلش زين ..

استأذنت وگمت بهدوء واني افكر ليش استاذ ضيغم خطبني ..

دخلت لغرفة حنين ..
شفتهة تفتر بالغرفة وتسولف وية روحهة ..

حجيتلهة الي گالة بابا .. : بابا ايگول گليلهة خل تفكر زين ولا تستعجل .. ترة هادي خوش ولد وما ينرفض ..

حنين مدت ايدة وگامت تعدد على اصابعهة : والله لو انة صايع و قمرجي وعرگجي وابو نسوان .. هم موافقة علي ..

گعدت بالگاع سوت روحهة مغمي عليهة : انتي من كل عقلج تحجين .. هو هذا هم ينرفض .. امداني اذا ارفضة ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🕊

مرحباً للكل .. بارت لعيونكم الحلوة ..
بصراحة ما ردت اخلي فضولكم يزيد اكثر على حارث وهو بالتالي كلشي ما بي واصابتة بسيطة 😂 شفتو شلون اني اراعي شعوركم ..

بس حبابين علقو عالفقرات شگد متگدرون ..
احببببكم .. 🕊