رواية بنات للزمن الفصل الحادي والثلاثون 31 - بقلم سارة الشمري

الكاتبة : سارة الشمري 🖤

راضي بكلشي منك كلشي يحلالي
اجيك ومن ارد فارغ ارد للغير
وعنب بس اعله مودك تارس اسلالي
يمك انسه روحي و من اكون وياك
وعلى فنجان شفتك تركع ادلالي
الواشي بلا بخت مرني و زعلك
اموت انه ولا يوم اجرحنك و زعلك
حلو كلك على بعضك و زعلك
بحلاتك فدوة بس ارضى عليه

طبك الباب واجة علية وعيونة تمشي من وجهي وتنزل لجسمي : وج مشمش شطالعة ..
درت وجهي اريد اشرد : عزا العزاك حارث ..

سحبني من ايدي حيل ورجع قربني علي : هو انة معزى لا تخافين .. والله تعزيت من شفتج ..
اجيت ادفعة بس ميندفع : حارث شجاك .. وخر لا تجي امي ..

قرب راسة من شعري وسحب نفس وغمض عيونة : وج العطر يسطر سطر ..
باوعلي من فوك ليجوة : الزنود والرجلين طالعات ..

خزرتة واريد افك ايدي : حااارث كافي خل اطلع فكني ..
جر نفس قوي يتنهد : والسلاح نازل عالخصر يصيحني اباوعلة ..
ضربتة على ايدة وخدودي احس نار اشتعلت بيهن : حااارث كااافي ..

عيونة نزلت لرجلية : الحجل يتمركص برجلج وادور مصبغة الاضافر .. يربي حتى الرجلين شحم ..
كلبي يدك سريع وخجلانة من وصفة فصلني تفصيل ..
لازم ايدي ميقبل يفكني ..

رفع عيونة بعيوني : ولج شسويتي بية .. الخدود مشمش مال عض .. والعيون المرسومات بكحل .. وج مشمشايتي اخاف عليج من العين ..

رصيت على سنوني واباوع للباب خاف احد يجي : حاااارث .. ايدي ..
هو يحجي بلهفة : عوييييناتة ودگات گلبة لحارث .. يمة رجاء الحگي لابنج ..

لويت ايدي حيل : حاااارث شجاك تخبلت .. دوووخر لا يجي احد ونروح بيهة ..
دفعتة وطلعت من المطبخ ..
دخلت للحمام بسرعة واهفي على روحي ..
اباوع بالمراية وجهي احمر كلش ..

يمة لك شسويت بية حارث ..
من ناحية خايفة لا يجي احد ويشوفنة ..
ومن ناحية ثانية متت خجل شلون فصلني تفصيل ويتغزل ..

سمعت صوت البنات نزلن من فوك ..
طلعت من الحمام ولبست عبايتي ..
حبوبتي صاحت على ديلارا وانطتهة السلاح مالتهة ..

الكل لبسن عباياتهن ..
طلعنة للسيارة شفنة حارث هو الي صاعد ..
يااا يعني هو يوصلنة .. ليش كل مرة هو ياخذنة ..

صعدنة بالسيارة واني صرت بالكرسي الوراه ..
الطريق كلة هو يباوعلي بالمراية ..
من وصلنة ..
ماما قبل لا تنزل : مو تنسن الاغراض نزلنهن وياجن ..

البنات كل وحدة شالت شي ..
اني ردت اخذ الكيك ..
لزم ايدي حارث .. : وج كيكة وتشيلين كيكة ..

نترت بي : حااارث شجاك اليوم متخبل .. عوفني خل انزل ..
حارث : مشمش اقري على روحج لا تجيج عين .. هي بس الخدود والشفة يصفنن ..

فكيت عيوني .. ضربتة على جتفة حيل : قليييييل ادب .. فكني خل انزل لا يحسون بغيابي ..
فك ايدي ومبتسم ..
نزلت اني وخجلانة من كلامة ..

دخلت للبيت حطيت الكيك عالميز ..
مشغلين الديجي ويركصن ..
ذبيت عبايتي ورحت لبسمة ..

طالعة تخبل بالبدلة الماروني النفش ..
وتسريحتها المرفوعة بالكامل مجرد خصلات بسيطة نازلة بشكل انيق .. ومكياجهة بارز ملامحهة ..

گعدت يمهة وبستهة : لج شطالعة .. تخبلين ..
باوعتلي بتوتر : اسكتي ولج والله متوترة .. احساس غريب كلهة تباوعلي ..
ضحكت : تردين هالجمال كلة ومحد يباوعلج ..

اجت ريم گعدت يمهة من الجهة الثانية : شعدجن .. شتسولفن ؟؟
باوعتلهة : بنات خوالج شعجب ما يجن ؟
ريم : هسة خابرت على ليلى گالت راح يجون ..

جيلان : اكيد خالج الصاك يجيبهن ..
رفعت حاجبهة وباوعتلي : لا تجيبين طارية فدوة .. لا تذكريني بي حتى .. هالعصبي هذا ..

ابتسمت : هو شنو من عصبي .. ليگول نازل من السما .. والله حلو لخاطر الله منين جايب هالجمال ..
ريم : بس شكل الله وكيلج .. على اقل شي يعصب ويضل يصيح وعيونة يگلبن حمر يصير يخوف .. ما عندة تفاهم ..

ضحكت : لا ما شاء الله عارفتة زين ..
رادت تحجي واجن نفسهن البنات دخلن ..
گامتلهن ريم سلمت عليهن واني گمت وراهة ..

حنين ورى ما سلمت علية ..
مدت ايدهة بشعري تتلمسة : هسة انتي شعرج ناعم .. تگصينة ليش ؟؟ اني هالشعري معطب بس ما اهون اگصة ..

اسماء : شتگصين منة .. انتي شعرج اذا گصيتي يصير جنة باروكة مهرج .. خليهن طوال عالاقل ينشالن ..

حنين باوعتلهة وعوجت حلگهة : هيهيهي بايخة ..
ليلى ضربتهة على ايديهة : حنييييين مو هنا هالحركات فدوة .. خل نرجع للبيت وتفاهمن بكيفجن ..

ضحكت اني واشرتلهن : تفضلو ..
شوية رجعن شغلن الديجي وگمنة نرگص ..
كمنة كلنة اني والبنات وحتى بسمة گومناها ويانة ..

شوية وشغلو اغنية البرتقالة ..
ريم گمزت : يمممة اموت على هاي الاغنية ..
دخلت ترگص واندمجت وهي رگصها حلو .. ادور الدگة ترگص الما يرگص ..

رحت لحنين واشرتلهة : صوري ريم بوحدها وهي ترگص وبعدين شوفي الها .. حتى بعد لا تگول ماعرف ارگص ..

حنين ضحكت وطلعت تليفونهة بسرعة : والله جبتيهة .. السوسة مسوية روحها مو مال ركص وهي اضبط من فيفي عبدو ..

ضحكت وحنين طلعت تليفونهة تصور ريم بس ..
وريم مندمجة خطية وتغني وية الاغنية وتهز ..

شوية واجت نعمة حنتهة لبسمة .. لبستهة سوار ذهب ..
كمنة نهوس احنة ونركص ..
تحنينة وياهة .. واخذنة صور كومة ..

لحد الساعة ٥ العصر كالو راح نرجع ..
لبسنا عباياتنة .. وطلعنة ..
صعدنا بالسيارة بس هالمرة جان هادي الي يسوق ..

حارث راحن وياه ريم وهويدة يوصلهن لبيتهم ..
والبنات راحن وية خالهن ..

من رجعنة بدينة تحضيرات الحنة مال جبران ..
حضرنالهم الكيك والعصاير والحنة وهالسوالف ..
اخذوهن وراحو ..

راسم //

وگفت گدام المراية واسد بالدگم الفوگ مال الدشداشة البيضة ..
اليوم حنة جبران ..
سحبت الجراوية الحمرة ولفيتهة على راسي لفة خليجي ..

دخلت مريم جانت هسة جاية من الحنة ..
اباوعلهة لابسة فستان اسود وبي حزام ذهبي .. مقسم جسمهة تقسيم وبارز بياض بشرتهة ..

ابتسمت من شافتني : شنو هالحلا ...
سحبتهة من ايدهة : اني حلو ؟ حرام عليج .. لا تجيبين طاري الحلا وانتي موجودة .. شطالعة اليوم كيكة ..

ابتسمت وباوعتلي بدلع ذوب گلبي : بس اليوم ؟ شنو يومية اني مو حلوة ؟ لو تجهيزاتي تروح بلاش ..

جريتهة من خصرهة الي : يا بلاش ؟؟ انتي بكل وكت حلوة .. اول البارحة والبارحة واليوم وباجر وعگبة .. وكل يوم انتي بعيوني يومية حلاج يزيد .. كل يوم الله يبدع بهالجمال والشكل ..

قربت راسهة وحطتة على صدري ..
حطيت خدي على شعرهة .. وايدية محاوطة خصرهة ..: واني اشوف نفسي حلوة بس بعيونك .. لان انت بنضري احلا واحن واهم واجمل شخص بحياتي .. تدري اني احبك لو لا ..

ابتسمت وتنهدت : وتدرين انة احبج اكثر لو لا .. تدرين انتي الهوى البريتي .. تدرين انتي النور الجان مفارق حياتي وهسة يلة ضويتيها بوجودج ..

حضنتني اكثر : شوف شلون تحجي انت واني ماعرف اعبر شي ..
دنگت بستهة بخدهة : لا تحجين شي .. كافي هاي عيونج الزرگ كلشي يحجن .. بس باوعيلي بيهن وانة اعرف شنو بداخلهن ..

فجأة انفتح الباب بسرعة ..
دخلت جيلان : مريم وين علبة الـ.....
ضربت على كصتهة بصدمة ..
حطت ايدهة على عيونهة وودارت وجهة وطلعت : اسفة ..

مريم ضحكت ..
اني باوعت لمريم واتأفف : هاي اختج ما شافتهة وحدة منا منا بالحنة وخطبتهة وخلصتنة منها ..

مريم : حرام عليك والله متدري خطية ..
راسم : على شنو خطية ؟ اني المفروض اتگولين خطية .. دومها گاطعة علينة لحضاتنة .. لا لازم نكعد ابيت وحدنة ..

باوعتلي برفعة حاجب : اي هذا التريد توصلة انت ..
ابتسمت : وانتي ليش معاندة هالموضوع ..
مريم : راسم تعودت على هذا البيت .. تعودت عالبنات اشوفهن كل يوم وحتى رضا تعود عليهن ..

راسم : واني ماگتلج نشيل بغير مدينة .. هو هذا بيت عمي مقابيل البيت .. شوكت ما تردين تعاي ..
رفعت اكتافهة : ماااريد .. اني مرتاحة هنا .. وعاجبني مكاني .. الا اذا جنت ممرتاح وعاد هذا موضوع ثاني ..

تنهدت واشرت عالباب : هي هاي اختج تخلي الواحد يرتاح ..
طبگت حواجبهة : رااااسم .. شبيك والله مو قصدهة .. شنو قابل متعمدة .. وبعدين شنو انت ممرتاح هنا يعني ..

باوعت بعيونهة وابتسمت : مادام انتي موجودة اني بعز راحتي .. بس هالموضوع فكري بي .. واني هسة لازم اروح تأخرت عالولد ..
بستهة بخدهة حيل .. وخرت من عدهة ..
رشيت من عطري ونزلت ..

رحت لگيتهم فاتحين الديوانية الجبيرة ومجهزينهة ..
السماعات تدگ .. اصدقاء جبران يرگصون ..
شوية واجة عباس طفة الديجي وگام يذب هوسات وهمة وياه ..

وراهة شغلو جوبي ..
گام جبران وحارث وهادي ورضوان واني ..
گامو ويانة اصدقائهم عباس و عامر ..

كمنة نرگص جوبي وطلعت حلوة لان كلنة لابسين دشاديش .. واني ورضوان لابسين جراويات ..
هادي لازم بداية الجوبي وبيدة السبحة ..
هادي اكثر واحد يعرف للجوبي .. محد يوصلة ..

ورة شوية كعدنة واجة عمي ضافر حنا جبران بأيدة ..
لحد الساعة ١١ ونص يلة الناس مشت ..
رضا غفى بحضني من بعد ما دزتة مريم بيد هادي ..
هم لابس دشداشة بيضة ..

شلتة على كتفي وهو نايم ..
دخلت للبيت تعبان وراسي مصدع من الهوسة ..

صعدت فوگ .. اول ما دخلت للصالة ..
رحت لغرفة رضا الي سويناهة الة شلنا اغراض الغرفة الثانية وجبتلة غرفة مال ولد ورتبتهة الة وكام ينام بيها ..

حطيتة عالجرباية مالتة ..
جبتلة تراك وبدلت ملابسة ..
هو فتح عيونة بنعاس : عمو .. خلص الرگص ؟
ضحكت وبستة بخدة : اي خلص والناس راحت تنام .. يلة انت هم نام .. حتى باجر تگعد من وگت ورانة زفة ..

هز راسة ورجع غمض عيونة وهو اصلاً يغفي .. دائماً يسولف وهو نايم ..
غطيتة بالبطانية وطلعت من الغرفة ..

رحت لغرفتنة ..
لگيت الاضوية طافية .. بس ضوة التيبلام الخفيف مشتغل اليم راسي ..
مريم نايمة ..
رحت للحمام سبحت وطلعت بدلت ملابسي وتمددت يم مريم ..

قربت منهة .. شعرهة بي رطوبة مبينة قبل شوية سبحانة .. طبگت حواجبي ما تتوب بهالبرد ما تشسور شعرهة ..
ممرت اصابيعي على رگبتهة بخفة واهمس يم اذنهة : مريومتي ..

طبگت حواجبهة وتحركت بأنزعاج ..
جريت خشمهة بين اصابعي واحجي : گومي اشتاقيتلج ..
حجت منزعجة وهي مغمضة عيونهة : رااسم والله تعبانة عوفني انام ..

ابتسمت وجريتهة من ايدهة حطيتهة بحضني : مشتاقلج .. ما سولفتي وياي اليوم ..
اباوعلهة تحرك براسهة مسطورة من النعاس عبالك سكرانة ..

فجأة فتحت عيونهة بسرعة وكعدت تربعت عالجرباية مفزوعة وتفرك بعيونهة ..
طبگت حواجبي مستغرب حالتها : شبيج ..
مريم : رضااا وين .. دزيتة الك بيد هادي .. وينة ..

رجعت راسي بتعب : نايم وبدلتلة وحطيتة بفراشة ..
نامي لا تخافين ..
كمزت من الجرباية وهي تلبس الروب فوك ملابسهة الخفيفة : اشوفة واجي ..

طلعت من الغرفة عالسريع ..
اباوعلهة متفاجئ .. هستوهة جانت گوة تفتح عيونهة ..
دقيقة ورجعت ..
تمشي بنعاس .. رفعت حاجبي اباوعلهة ..

فتحت الروب وشمرتة على طرف الجرباية ..
رجعت تغطت باللحاف وحطت راسهة تريد نام ..
كرصتهة من خدهة : هستوج جنتي كوة مفتحة جنج وحدة سكرانة .. احاجيج ما تردين .. بس تذكرتي رضا كمزتي ..

فركت خدهة بألم : رااسم شبييك .. اي طبعاً اكمز غير ابني ..
رفعت حاجبي : واني شنو جيس حب .. صارلي ساعة احاول احاجيج وانتي جنج وحدة سكرانة ..

حضنتني وحطت راسهة برگبتي وغمضت تريد تنام : تعبانة والله گعدت من الصبح .. انت هم اعذرني والله گوة مفتحة عيوني .. خليني انام حبابة ..

ابتسمت على شكلهة وهي مطفية من النعاس ..
حضنتهة وغطيتهة .. ونمت ..

رياض //

رجعت للبيت الساعة تقريباً ١٠ .. رجعت من وكت لان تعبان ..
دخلت للبيت .. تنهدت بملل بعدني برة وصوت حنين واصل لهنا .. ما تگدر تسولف بشكل طبيعي .. لازم تلعلع ..

وصلت لباب المطبخ ..
وگفني حجاية امي : وهاي البذاتة ريما .. بعد ولا اجتني .. كل ما كتلهة تعاي اتگلي تعبانة لو ملتهية احضر لعرس ابن عمي .. خل اشوف بلة بعد بيمن تلتهي .. بس والله وحشة عليهة واشتاقينالهة ..

گلت بگلبي اي والله وحشة عليهة ..
حنين : وما شفتيها اليوم شطالعة حبوبة .. غير تخبل .. وصفنت النسوان برگصهة ..
شوفي حتى صورتهة ..

انطتهة التليفون واسمع صوت الاغاني ..
اسمع امي تصلي عالنبي وتنشر عليهة ..
الفضول اكلني اكل ..

كحيت بصوت عالي على اساس هسة اجيت ..
حنين طفت التليفون ..
دخلت اني : السلام عليكم ..
ردو : وعليكم السلام ..

امي : ها يمة متعشي لا ..
رياض : اي يمة الحمدالله متعشي ..
باوعتلي شوية وحجت : يمة انت يمتة الله يهديك وتعرس .. شوف الاصغر منك عرسو .. انت عليش ضال ..

تنهدت بتعب : يمة فدوة سدي الموضوع .. مالي واهس لا عرس ولا غيرة .. خليني هيج مرتاح .. طبگت حواجبهة : انت مرتاح هيج بس انة ما مرتاحة .. شناقصك وما تعرس ..

جريت نفس بصبر : يمة فدوة لعينج مو هسة نحجي بالسالفة .. انة من اريد اخطب اجيج واگلج يمة اخطبيلي .. بس مو هسة ..
دارت وجهة وما عاجبهة حجيي ..
باوعت لحنين : احم .. حنين گومي اخذيلي صور ..

رفعت حاجبهة : خير عمو .. معجب بنفسك اليوم .. خو ماكو شي ..
خزرتهة : ليش تطولين السالفة .. موبايلي مابي شحن .. اخذيلي بتليفونج ..

گامت حنين واني عدلت كعدتي بحجة الصورة ..
اخذت جم صورة ...
حنين : گول جيييز ..

سحبت التليفون منهة : جيبي لا افلشة .. خل انقلهن لتليفوني .. روحي جيبيلي گلاص مي وحطي وياه هيل ..

گامت حنين تدردم للمطبخ بس مدت راسهة : عمو مو تروح يمنة يسرة ترة بي صور ولو ادري بيك تستحرم ..
رجعت هي دخلت للمطبخ ..

حددت صوري وحددت وياهن المقطع الوحيد الجان موجود ..
انطيتهن ارسال .. وصلن لتليفوني رجعت تليفون حنين وطلعت من الصور ..

استأذنت من امي وگمت ..
لاگتني حنين .. اخذت منهة الگلاص وصعدت فوگ ..
دخلت للصالة مالتي ..
كعدت عالقنفة وفتحت الفيديو ..

فتحت عيوني لا ارديا .. بلعت ريگي ..
واشوف ريم لابسة فستان قصير للركبة .. ومخصر عالجسم كلش وفوگ ما قصير بي فتحة من الجانب لفوگ الركبة .. وربع ردن ..

الفستان جان فضي لماع وكل ما تتحرك يضوي من جهة لان يعكس الاضائة مال المكان ..
ادور ترگص وتتدلع وشعرهة شطولة لونة اسود واصل لخصرهة ويتحرك وياهة ..

تغني وية الاغنية وترگص واني انلعب بحالي لعب ..
بت الاوادم شنو من جمال شايلة ..
الزنود بيض والعيون مسحوبات بكحل ..

الاغنية مال البرتقالة جاية طبق عليهة ..
وهي تغني وياهة .. : خد احلا من خد .. والوجه يا محلاه .. عالشفة ورد .. كل الورد بالكون عالشفة ورد ..

خصرهة يهز وية الاغنية .. واني عقلي انهز ..
عدت المقطع اكثر من مرة ..
اخر شي طفيت التليفون ورجعت راسي عالقنفة ..

هاي البنية من اول ما شفتهة دخلت عقلي ..
برائتهة وهدوئهة .. انوثتهة وشكلهة ..
والمشكلة اتگلي خالو .. ادري منين اجيتج خالج .. ابتليت من صرت اخو هويدة ..

كل مرة اتحجج بكلشي بس حتى اشوفهة ..
جانت كل جمعة تجينة وية هويدة ..
مرات اني اروح لهويدة اگول بلكي اشوفهة ..
بس من اخر موقف صار بيناتنة بعد ما اجت ..

اثبتلي هالشي ان هي عنيدة ..
اني عصبي مو بيدي .. بسرعة افقد اعصابي ما اتحمل .. هذا الطبع البية ماحبة ..
وهي راددت واني ماسكتت ..

من بعدهة بعد ولا اجت ..
البنات مرات يگللي اخذهن الهة ..
اگول بلكت اشوفهة بس ماكو فايدة ..
فعلاً حسيت اشتاقيتلهة .. وفشلة اسأل هويدة عليهة ..

اني اصلاً ما شايلهة من راسي ..
ادور هسة شفت هذا المقطع الي فر راسي فر ..
شصار بية .. بس اغمض ترجع ابالي صورتهة بالفستان اليلمع ..

هزيت راسي وگمت : شبيك رياض .. تعوذ من الشيطان .. البنية محرمة عليك .. على اي اساس تباوعلهة صارلك ساعة وفصلتهة تفصيل .. وهي معتبرتني خالهة .. حتى عيب علية ..

شمرت التليفون .. وگمت ..

ديلارا //

ممددة على فراشي .. لازمة بيدي تليفوني واگلب بالصور الي ناشرينهن الولد من حنة جبران اليوم وصورهم الجماعية وفيديوهات ..

اباوع على رضوان .. لابس دشداشة لونهة حليبي ووياهة شماغ لونة رصاصي واطرافة منقشة بالاسود .. وهو طويل وضخم منطيتة جاذبية وشخصية وهيبة ..

ابتسمت من شفتة ..
اشوف بالفيديوهات شلون يرگص جوبي ولاف ايدة على ايد حارث .. بقيت اتأمل بصورة ..
من بين الفيديوهات لمحت سمير گاعد على جهة ..

طفيت التليفون وذبيتة ..
تذكرت اليوم بالحنة ..
جنت فرحانة وارگص لحد ما دخلت ام سمير ووياهة بتهة .. انزعجت من شفتهن ..

من ناحية ان رفضت ابنهم ..
ومن ناحية ثانية هيام خطيبة رضوان ماريد اشوفهة ..
بقيت كاعدة وعالهوسة ما سلمت .. هو منو يسلم بالاعراس ..

التهيت وية البنات ..
شوية واجت هيام وگفت يمي ..
باوعتلي من فوك ليجوة : شدعوة متسلمين ست ديلارا ..

درت وجهي عليهة : اسفة حبي ما انتبهتلج .. تدرين هوسة وهواي نسوان ماركزت ..
اباوعلهة هي ضعيفة وقصيرة ولابسة فستان اسود وطويل كلش ..

سكتت ورجعت حجت : اگول انتي عليش رفضتي لسمير ..
فتحت عيوني وباوعتلهة .. : ماكو تطابق حبيبتي .. اني تدرون بية وافقت بالبداية .. بس ماكو نصيب ..

عوجت حلگهة : وشدعوة عليج هالگد تخافين من جم ابرة ..
تأففت : هيام شنو القصة .. على شنو الابر .. ليش اجازف واتعب نفسي .. شنو خلصن البنات ميروح يتزوج وحدة غيري .. شنو الا اني ..

طبگت حواجبهة : باوعي عيني .. ادري بيج كلش زين ليش رفضتي .. بس حطيهة ترجية بأذنج .. رضوان ميحبج ولا راح يحبج .. هو خطبني اني ورادني اني .. انتي اجيتي وتطفلتي على حياتنة .. شنو متستحين ..

بس صدگي ما اخليج تطولينة .. اني رايدتة من البداية .. ولو ما اخوه توفى جان هسة احنة متزوجين .. يعني لو تموتين ما اخليج تاخذينة ..

باوعتلهة برفعة حاجب : مريضة نفسية ..
عفتهة ومشيت ..
هزيت راسي .. مو معقولة هاي البنية .. عمرهة ١٦ سنة ولسانهة شطولة ورايدتة وهالسوالف .. شنو هاي .. والله مينلام رضوان من ميريدج ..

تنهدت وگمت طفيت الاضوية حتى انام واتجهز الصبح للزفة ..

الكاتبة : سارة الشمري🖤

مرحبا .. اسفة حييل اسفة .. ادري طولت هواي .. بس والله جنت مريضة وانتو تدرون بهالشي ..
وشكراً لكل شخص سأل علية .. احبكم كوووومة ..

ولا تنسون صوتو وعلقو وكلشي ينداس دوسو ..

وعندي طلب منكم .. اتمنى تتابعون بنت عمي الكاتبة نور حيدر ..
ادعمو قصصة وگلولهة احنة من طرف الكاتبة سارة ..
هذا حسابهة .. noorhaidar18 تابعوهة فديتكم