رواية بنات للزمن الفصل الثلاثون 30 - بقلم سارة الشمري

الكاتبة : سارة الشمري🖤

احسك تختلف عن كل الناس
بعيوني اشوفك علنجم عالي
واشوفن دمعتك ما جنها تنزل ماي
ذهب تنزل دمعتك تجدح اتلالي
الك بستان عمري بكل ثمن مزروع
راضي بكلشي منك كلشي يحلالي
اجيك ومن ارد فارغ ارد للغير
وعنب بس اعله مودك تارس اسلالي

بعد مرور شهرين ..

حارث //

گاعد بالمكتب واحاجي بمشمش ..
صارت شي بحياتي ما اگدر بدونة ..
كل يوم اسمع صوتهة واروح لبيت جدي اشوفهة ..

تعلقت بيهة وروحي صارت مدمنة عليهة ..
صح نتعارك بس ما نتزاعل ..
هي تعاند واني عصبي .. بس ثنيناتنة ما نكدر بدون بعضنة ..

گاعد احاجي بيهة واتغزل : الليل كلة احلم بعيونج الناعسات .. ادور ذاك اليوم حاطتلهن كحلة .. والله لو بيدي اضل مگابلهن وگاعد وما امل .. غير عذاب گلبي ذني ..

جيلان : سلامة گلبك حبيبي ..
حارث : اروووح فدوة للتگول حبيبي .. مشمشايتي جبران بعد اسبوع لزواجة ..

جيلان : اي ادري ..
حارث : واني گتلج اخطبج وگلتي خل يخلص عرس جبران يلة مو صحيح ؟؟
جيلان : الله كريم .. عود من يخلص زواج جبران نحجي بالموضوع ..

تنهدت : وج مو احبج بعد ما اگدر اتحمل اكثر ..

على هاي حجايتي وانفتح الباب ودخل عمي عاصم ..
وكفت بسرعة باوعتلة متفاجئ ما متوقع جيتة ..
هو طابگ حواجبة .. بس لا سمعني ..

حجة بعصبية : ماا تصيرلك جارة ابد ابو النسوان .. يمتى تتربى مادري .. گووووم ..
سديت التليفون : ها عمي وين ؟؟

نتر بوجهي : خابر رضوان وعامر وتعال شوفو المكينة الجديدة وشدوهة .. وخلي رضوان يتأكد ما بيهة نقص وحموهة زين .. يللة ..

هزيت راسي وگمت بسرعة ..
رحت لمكتب عامر : حضرة المدير يردونك القيادة ..
استغرب وباوعلي : منو ؟؟
ابتسمت : عمي عاصم ..
هو گام سحب الجاكيت مالتة : ها جابو المكينة الجديدة .. يلة جاي ..

طلعنة اني وياه برة وخابرت رضوان طلع عامر مخابرة وجاي قبل بوقت ..
نزلنة المكينة الجديدة اني والعمال ..
فكيناهة وگعدنة ناخذ بتعليمات رضوان الي يشد بيها ..

جيلان //

سديت التليفون من حارث ..
نزلت جوة للصالة حبوبتي ما موجودة .. اكيد بغرفتهة ..

الكل مخبوصين بتجهيزات زواج جبران ..
البارحة جابو الغرفة وشدوهة .. وهو جان مرتب الشقة مالتة بالطابق الفوك ابيتهم مثل راسم ..

بقيت كاعدة بالمطبخ يم امي واساعدهة بتحضير الغدا يعني الاشياء البسيطة بس ..

ورة ساعتين تقريباً رحت گعدت بالصالة ..
نزلن ديلارا ومريم وگعدن يمي ..
شغلت التلفزيون على قناة مزيكا ...

شفت اغنية مصطفى حجاج (يا منعنع ) احبهة ..
گمت وگف وفكيت شالي وشديتة على خصري ..
مريم فتحت عيونهة : ها شكو شعندج ؟

حركت حواجبي بأبتسامة واغني وياهة واحرك شعري وارگص مصري بطريقة مضبوطة واحرك بخصري ..

يا بتاع النعنع يا منعنع .. يا منعنع يا منعنع ..
هات هدية للمتدلع .. واتدلع واتدلع ..

الي سايب البي يولع ..
وبعذاب البي بيتمتع ..
واما اجي اقولو اقابلك .. يتمنع .. يتمنع ..
يبتاع النعنع يا منعنع يا منعنع ..

دنگت على مريم واهز بكتفي بدلع واغني ..

نور عيني والبي من جوا ..
مين غيرو .. وغيرو مين هوا ..
دا تاعبني وبرضو عاجبني ..
ولا حولة ليا ولا قوا ..

وگفت ركص من سمعت صياح حبوبتي : يالمفلوووكة ..

التفتت واشوف حبوبتي واگفة ..
والطامة الكبرى ان حارث واگف وراهة وفاتح حلگة يباوعلي بفهاوة ..
شهكت وفكيت الشال عن خصري ..

حبوبتي تباوعلي بعصبية : وما ترضن من اگول اساميجن مال رگاصات .. طلعتي اضبط منهن .. دهر دهرج اي والله ..

وجهي صار احمر من الاحراج والبنات يضحكن علية : اهووو حبوبة غير عرس اخوي ..
حبوبتي : وجعوووو .. اخوج عاتب عليج وگايلج ارگصيلي ..

باوعت لديلارا : خايبة وانتي طفي هذا ثول راسي ثول ..
باوعت اني لحارث شفتة يباوعلي بأبتسامة ورافع حاجبة ..

طلعت من الصالة ومريت من يمة هو همس : احترركووو ..

ما باوعتلة حتى وصعدت فوك ..
اهفي على وجهي .. يبو والله فشلة .. ادور اني اندمجت زيادة ..

شوية ودگ تليفوني شفت رقمة ..
رديت علي : الو ..
حارث : احترگو بنار ونفط ..
جيلان : منو همة ؟؟؟

حارث : ابليس وربعة .. وج شهالرگص والتدلع هذا .. وتاعبني وعاجبني .. زين ما انفضحت گدام البنات ..

ضحكت : ليش تنفضج ؟؟
حارث : غير مفهي بيج ولج صرت جني زعطوط ما اندل دربي .. سطرتيني سطر ..

ابتسمت بخجل : حاارث كافي ..
حارث : شني كافي .. شحجيت اني .. غير جنج العافية ادور لابسة وردي ..

جيلان : حاارث شبيك كافي غير الموضوع ..
حارث : خو ما هم ترگصين هيج بعرس جبران ؟؟
ابتسمت : طبعاً لعد شلون ما ارگص ..

حارث : وعلي ابتلي بيج اذا رگصتي هيج .. عيب بوية هذا رگص ما يصير گدام العالم ياخذن عليج غير نضرة ..
جيلان : وشعلية بيهن اني ..المهم اتونس ..

حارث : مشمشة لا تعاندين .. ما ترگصين هيج .. خوش ؟؟
جيلان : اي اي عود الله كريم منا للعرس ..

مريم //

الساعة صارت ب ٣ الضهر ..
راسم گال راح انام وگعديني ب٣ ..
دخلت للغرفة شفتهة ضلمة والبردات مسدودة ..

ذبيت حجابي وقراصتي ..
تقربت منة نايم على ضهرة بدون قميص ولا شي ..
يمة بهالبرد هذا ..
حاط ايدة على عيونة وانفاسة منتضمة ..

گعدت على طرف الجرباية وشلت ايدة عن عيونة ..
حجيت بصوت ناصي : راسم .. راسم يلة اگعد ..
تحرك وهمهم بنعاس : همممم ..

قربت وجهي منة : يلة گوم الساعة ٣ .. مو گلت گعديني ..
فتح عيونة بنعاس ..
باوعلي وابتسم وهو شبه مغمض : بعدني نعسان .. تعاي اخذيلج غفوة وياي ..

وخرت اني : لا يا غفوة .. بعد نص ساعة نطلع اني والبنات للسوك .. ناقصني جم غرض للعرس بعد ..
ابتسم وجرني من ايدي بصفة ..: نص ساعة هواي ..

حطيت راسي على صدرة ..
ابتسمت بخباثة واتذكر مرات شلون يگعدني ..
ردت اسوي مثلة ..
رفعت راسي ولزمت خشمة بين اصابعي : راااسم كوووم ... اشتاقيتلك صارلك هواي نايم ..

ابتسم بدون ما يفتح عيونة ..
قربت راسي من وجهة وبستة بخدة حيل مثل ما يسوي هو .. : اوووف شلون حبة ترد الروح وتنطي طاقة ..

نزلت راسي على رگبتة اني مستندة بيدية على صدرة ..
حطيت خشمي على رگبتة ومررتة بخفة وسحبت نفس : هو عطر لو اوكسجين منعش هذا ..

فز هو وگلبني على ضهري يضحك ويحجي بصوت كلة نوم : ليش تتحارشين .. مو گتلج نعسان ..
باوعتلة برفعة حاجب : وحد عنك مو هيج تگعدني انت .. حتى تعرف شلون تصير من متخليني انام واني نعسانة ..

دنگ باسني بخدي : تتحمليني ما عندج غير حل ..
ابتسمت وهو رجع نام على ضهرة ..
حطيت راسي على صدرة ..
مررت ايدي بخفة عالوشم الي بصدرة من جهة اليسار ..

باوعتلة : راسم كل ما اريد اسألك على هذا الوشم انسى ... شوكت سويتة وشنو معناه ؟؟
ابتسم وحط ايدة فوگ ايدي : سويتة قبل ١٠ سنوات .. قبل لا تتزوجين بأشهر ..

مريم : وشنو معناه ؟؟
ابتسم : ضياء شال حرف مرام بالمحبس حتى تبقى وياه .. واني شلت حرفج بگلبي حتى تبقين وياي دوم ..

طبگت حواجبي : بس هذا مو حرفي .. ممبين حرف شنو اصلاً ..
باوعلي بعيون ذابلة من النوم : هذا حرم (م) بالكتابة المسمارية القديمة اول كتابة بالعالم ..

باوعتلة متفاجئة وباوعت للوشم : شلون خطر على
عقلك ؟؟ الكتابة المسمارية ..

راسم : ردت اسوي شي مختلف .. والي يشوفة محد يفهمة بس اني ..
تقرب مني اكثر : وهسة انتي صرتي تفهمينة ..

ابتسمتلة تقربت بستة بخدة بخفة ..
تقرب يريد يبوسني واندك الباب ..
جيلان : مرييييم يلة تأخرنة .. جبران ينتضرنة ..

راسم تأفف : اختج هاي اكثر مزعجة شفتهة بحياتي ..
مريم : يلة جاية وراج ..
التفتت علي : لا تحجي عليهة .. ما اقبل ..

گمت بدلت ملابسي ونزلت ..

ريم //

كاعدة بالصالة مال بيتنا .. الملل والضوجة كاتلتتي ..
من ذاك اليوم الي تعاركت بي وية رياض واني بعد ما رحت لبيت اهل هويدة ..
البنات يدزن علية واني ارفض ما اروح .. وهنة مرات يجني ..

كاعدة بالصالة واگلب بالقنوات بملل ..
دگ تليفون خالة وجان يمي ..
صحت بصوت عالي لان هي بالمطبخ : خالة تليفونج يدگ ..

حجت وهي بالمطبخ : شوفي منو ؟؟
رفعت التليفون : رقم غريب ..
طلعت من المطبخ : جاوبي شوفي منو ..
حطت ايدهة على حلگهة ودخلت للحمام تستفرغ .. خطية الحمل طلع من خشمهة ..

انگطع الاتصال .. عفتة ..
ثواني ورجع دگ ..

رديت : الوو ..
ماكو رد ..
طبگت حواجبي : الوووو .. منو ؟

اجة صوت رجالي : الوووو ..
ريم : الو .. تفضل منو ؟
: هذا مو تليفون هويدة ؟؟

ريم : اي .. هذا تليفون هويدة .. منو اگللهة ؟؟
حجة ببرود : گليلهة حضرة الملازم رياض عجاج ..
باوعت للتليفون متفاجأة .. لعد ليش رقم غريب ؟؟

حجيت بدون نفس : اعذرنة خالو معرفتك .. رقمك ممسجل ..
رياض : ولا يهمج هو هذا رقم جديد .. بس كلمة خالو مو جنهة جبيرة علية ..

طبگت حواجبي : بكيفك .. ملازم رياض .. تفضل شتريد ..
رياض : شأريد يعني ؟؟ اريد اختي وينهة ؟؟ قابل متصل على تليفونج ..

عصبت من اسلوبة : خالتي بالحمام وگالت ردي بمكاني .. معبالي انت لان الرقم غريب .. عود من تطلع خالتي اخليهة تخابرك .. ما اشغلك اكثر من هيج حضرة الملازم.. مع السلامة ..

سديت التليفون بوجهة .. والله ينرفز بأسلوبة .. عصبي زيادة عن اللزوم .. بس ولو مثل ميگولون الهواشم دمهم حار ..

طلعت خالتي من الحمام : ها ماما منو المتصل ..
باوعتلهة واقلدة : حضرة الملازم رياض عجاج ..
هي هزت راسهة : ولا يتوب من سوالفة ..
اخذت تليفونهة وراحت تتصل علي ..

شكد يغث لخاطر الله .. شدعوة هالكد شايف نفسة وعصبي .. ليگول محد ملازم وحلو غيرة ..

حارث //

طلعت من بيت جدي واني مسطور سطر ..
شنو من جسم شنو من خصر .. ادور تهز ويمنعنع ..
والله ثولتني ثول .. وشعرهة القصير تتحرك ويتحرك وياهة ..

رحت للكهوة لان عباس ينتضرني ..
شفتة يخابر ويضحك .. عرفتة يخابر حبيبتة ..
من شافني ترخص منهة وسد التليفون ..

باوعلي : حيي هالزول ..
حارث : الله يحييك .. شعندك تتمضحك ..
عباس : يخوي ترد روحي من احاجيهة .. غير احبنهة ..

حارث : وشوكت ناوي تخطبهة ؟
تنهد من گلبة : لونها علية جا من اليوم مشيت خطابة عليهة .. بس هي الما ترضى تريد تتخرج يلة ..

ابتسمت : عبالهة ما تخليهة انت تكمل شنو ..
عباس : لا والله كتلها اخليج تكملين .. بس هي ماترضى ..
حارث : يلة خليها كلشي بوقتة حلو ولا تستعجل .. تعرفوا على بعضكم اكثر ..

دك تليفوني جان جبران : ها عريسنا ..
جبران : حارث تعال اخذني من بيت صاحبي ..
حارث : ليش سيارتك وين ؟؟
جبران : موجودة بس راسي دايخ ماكدر اسوق .. يمكن ضغطي نزل ..

حارث : ديلة جايك وين صاير البيت ؟؟
اخذت العنوان منة وگمت اني وعباس ..
رحنة للبيت مال صديقة شفت سيارتة بالباب ..

باوعت لگيتة گاعد بسيارتة ..
هو اجة كعد ليورى لان عباس گاعد گدام ..
التفتت علي : ها شبيك .. سيارتك منو يجيبهة ؟

جبران يفرك براسة : امشي امشي اني باجر اجي اخذهة .. تفشلت كدام الولد والله عيب ؟
حركت سيارتي : ليش شكو ؟ منو هذا صاحبك ؟

جبران : هذا صديقي بالاعدادية جان اسمة امين .. جان مسافر صارلة سنين .. وهسة رجع واجيت اشوفة ..
وراسي گام يفتر طول الگعدة افرك براسي وهو حس علية .. يگلي خوما بيك شي .. عاد اني خابرتك تجي تاخذني لان ماكدر اسوق ..

عباس باوعلة : امشنة للمستشفى خلهم يقيسون ضغطة ..
جبران : لا يابة ما يحتاج .. هسة من ارجع اخلي راسم يشوفلياه .. بس اريد انام ..

باوعتلة بالمراية وجهة اصفر ويفرك بعيونة ..
يغمض حيل ويرجع يفتح يريد يركز ..
حارث : جبران متأكد مابيك شي .. خل نروح للمستشفى نتأكد ..

جبران : حارث والله مابية شي .. من الصبح ماماكل شي .. وهسة شربت جاي يم الولد ومعدتي فارغة .. بس اريد ارجع للبيت ..

تنهدت وسكتت .. وصلتة للبيت ونزلت وياه ..
عباس اصلاً نزلتة قريب على مكان عندة شغل بي ..

نزل جبران ومباشرةً تمدد عالقنفة بالصالة ..
شوية ونزل راسم .. قاس ضغطة ..
راسم باوعلة : ما بي شي ضغطك وطبيعي .. اكل اي شي وابقى متمدد هذا اكيد ارهاق ..

شوية واجت مريم بيدهة صينية اكل .. اكيد راسم كاللهة ..
حطتهة كدام جبران ..

جيلان //

اليوم الحنة مال جبران ..
البيت مخبوصين خبص ..

واحنة نفتر .. ريم وهويدة من الصبح اجن ..
من ١٢ احنة نحضر بنفسنة ..
لان نريد نروح لحنة بسمة .. ولازم نرجع من وقت لان حنة الولد بليل ويرادلهم تجهيزات ..

افتر بالغرفة وخبصتهن خبص وهنة كل وحدة تجهز بروحهة .. 
جيلان : وين الحجل مالتي ؟؟

مريم تخط كحل عالمراية : هذا عالميز عمية ما تشوفين ..

لبستة ورجعت للمراية : رييييما .. الماشات وين ؟ كلهن حطيتيهن بشعرج .. لعد واني ؟ عايفتلي جم وحدة ..
ريم : والله ثبتت شعري بيهن .. وانتي وينة شعرج وتسويلة تسريحة هو قصير .. عوفي هيج ..

انفتح الباب ودخلت امي ..
باوعتلهة بأعجاب وصوفرت : اوووو زمزومة شطالعة ؟؟ كيكة ..
باوعتلي بأبتسامة : انتي الكيكة بس بعد لا تگولين زمزومة اطيح حضج ..

جانت لابسة قفطان مغربي لونة اخضر طوخ والحزام مالتة ذهبي .. ومحليتة بالسوارات الذهب الي لابستهن .. وهي جسمهة حلو ومتناسق يعني لا ضعيفة ولا سمينة عدهة معالم جمال حلوة .. وحيل بيضة تشبه مريم ..

التفتت على ديلارا الي تلبس بحذائهة : فضيهة يا امي لا تأخرنة .. الساعة ب ١ ونص .. يلة انزلن حتى نروح للحنة ..

وگفت كدام المراية اخذت جم صورة وحدي واني والبنات وبعدين نزلت قبلهن ..

بس نزلت الدرج صاحتني حبوبتي ..
رحتلهة ..
جنت لابسة فستان بنفسجي طووخ قصير وضيق مفصل الجسم وربع ردن وبارز بياض جسمي .. لابسة وياه كعب اسود مفتوح من كدام وطالعة اضافري الي مصبغتهن بأحمر .. ولابسة الحجل مالتي ابو الاجراس ..

دخلت للصالة : ها حبوبة ؟
حبوبتي : تعاي حبوبة تعاي ..
رحت كعدت يمهة : عين النبي عليج حبوبة .. اقري معوذات ونشري على روحج .. زنودج ورجليج طالعات جنهن شحم ..

ابتسمت :يشبهوني بيج حبوبة والله ..
ضحكت هي : شو ناوشيني ذيج العلاكة الجبيرة ..
گمت جبتهة الهة وهي طلعت منهة علبة حمرة جبيرة واكو بعد بالعلاكة ..

مدتهة الي : هاج حبوبة .. انتن خلصتن عمرجن بعيدات عني .. وما جايبتلجن شي ابد .. وهذني وصيت عليهن وية ذهب مرت اخوجن .. البسنهن اليوم بالعافية ..

ابتسمت : شنو هاي حبوبة والله ماكو داعي .. وجودج كافي .. وهم جدو ما جان يقصر بشي .. حتى شوفي هذا الحجل هو جابة ..
حبوبتي : ميخاف حبوبة .. حقجن هذا ..

فتحت العلبة ورفعت الكلادة ..
فكيت عيوني على وسعهن : حبووبة شنو هاي شطولهة الكلادة .. هاي اذا البسهة توصل جوة خصري .. ادور الزنجيل متين حيل ..

باوعتلي وهزت ايدهة : هاي گلادة ؟؟ طلعتي كلشي ما تفتهمين .. ولج حبوبة هاي موش كلادة ..
طبگت حواجبي : لعد شنو هاي ؟؟
اخذتهة من ايدي : هاي يسمونهة سلاح وهيج ينلبس .. وطلعي ايدج ..

دخلتهة من فوگ راسي ودخلت ايدي هم ..
صارت من كتفي اليسار نازلة على خصري من جهة اليمين .. مثل الجنطة الي تنلبس صفح ..

ابتسمت وگمت وگفت وبين اكثر : شكد حلو .. اول مرة اسمع بالسلاح الذهب ..
هو شكلة مو سلاح .. مثلث شكلة واطرافة جنهن لفاليف .. وحلو بس ثكيل ..

باوعتلي : بالعافية حبوبة .. وهذا لاختج .. من تجي اخليهة تلبسة ..
دنگت بست ايدهة وتشكرت منهة ..

گمت دخلت للمطبخ ..
شوية ودخلت نعمة .. لابسة دراعة خليجية زرگة ..
حقها غير شسمنهة ماكو فستان يصيرلهة ..

باوعتلي من فوگ ليجوة ..: ليگول ما شايفات ذهب ..
حركت شعري بحركة برود : ليش مقهورة حبيبتي .. مو هاي انتي تارسة روحج ذهب .. فوگ اللماع مال الدراعة لابسة ذهب .. منو الما شايف ..

نعمة : سمعي ولج ضبي لسانج احسلج .. لا تسوين عرايك اليوم ترة مالي خلگج .. حنة ابني اليوم ..

رفعت حاجبي : حاجي روحج بالاول .. شوفي منو البدة ويريد يسوي مشاكل ..
دخلت امي للمطبخ ..

اباوع لنعمة فتحت عيونهة ووجهة صار احمر من شافت لبس امي ليگول بنت عشرين ..
رحت لامي : يممة ماشالله على امي .. طالعة تخبلين .. اقري المعوذات لا تنحسدين .. ربي كون كزازة بنص عين الي يشوف امي وميصلي عالنبي ..

نعمة اجت تحجي بس انفتح باب المطبخ الخارجي ودخل بابا ..
امي مثل العادة من يدخل هو هي تطلع ..
دارت وجهة وطلعت واباوع بابا عيونة ما انشالت عن الباب الي طلعتة منة امي ..

نعمة باوعتلة وعيونهة گلبن حمر من العصبية ..
عاطت : بعععد روووح ورة ام الزلم .. شعندك واگف بعدك ..
دارت وجهة وطلعت من المطبخ لبيتهة ..

بابا باوعلي .. فرك وجهة بتوتر ودار وجهة هو هم وطلع ..
ضحكت واني اتذكر شكل نعمة من شافت امي ..
هي وييين وامي وين ..

نعمة ضخمة وسمينة .. حتى من تمشي جنهة رجال ..
وجهة مدور وسمين عيونهة كبار زيادة عن اللزوم ومن تخزر تخوف ..

قاطع تفكيري الباب رجع انفتح ..
التفتت شفتة حارث يباوعلي وكصني بنضراتة كص ..
عززا ادور اني لابسة قصير ..
ماكدر اطلع لان هو يم الباب ..

طبك الباب واجة علية وعيونة تمشي من وجهي وتنزل لجسمي : وج مشمش شطالعة ..
درت وجهي اريد اشرد : عزا العزاك حارث ..

سحبني من ايدي حيل ورجع قربني علي : هو انة معزى لا تخافين .. والله تعزيت من شفتج ..

هذا شكل حرف (م) بالكتابة المسمارية .. يعني وشم راسم ..

الكاتبة : سارة الشمري ✍🏻

مرحبا حبايبي مشتاقتلكم كومة والله ..
ادري طولت عليكم .. بس والنبي مريضة ولحد الان مريضة ..
والله لا يشوفكم شصار بية والنبي كمت اوهس خاف بية فايروس واني حتى مطالعة باب البيت ..

المهم اشكر كل وحدة انتضرتني وسألت علية .. والنبي فرحت حيل من ما لگيت ولا وحدة معلقة بكلام مو حلو وكلكم تسألون علية .. ومو جديدة عليكم هاي دائماً تعذروني وتتفهمون ..

وحاليا والله بعدني مريضة والله العضيم .. ونزلت اليوم بارت هادئ واحداثة بسيطة لخاطركم ومو اكيد التزم هالفترة لحد ما اصير احسن شوية ..

احبكم .. ولا تنسون صوتو وعلقو وكلشي ينداس دوسو ..