رواية بنات للزمن الفصل الخامس 5 - بقلم سارة الشمري

الكاتبة : سارة الشمري✍🏻

صوابك ماخطاني أمعلم أيصيب
أحس جتف بجتف صفكلك أكفاي
يالبايعني صوت بسوك خرسان
مر بكل وكت تلكالي شراي
جدمي بدرب ذل أمسبك وياك
ودرب غيرك كرامه بعين ممشاي
على خدودي الدمع لوسير اغروب
تسيورة جمر لجدام حفاي

حارث //

كاعدين بالصالة ونترقب ريم وهي تقيس ضغط جدي ..
متوترين وخايفين علي ..
مريم لازمة ايدة الثانية وتبجي ..
وريم تقيس بضغطة وتبجي ..

اباوع لجدي ساكت بس وجهة احمر ..
ريم شالت الجهاز عن ايدة : ضغطة مرتفع كلش .. يعني لا سامح الله لو صاير بي شي من ورة عرايكم ..

جدي حط راس ريم ومريم بحضنة : لا جدو همة ما عليهم .. مابية شي لا تخافين ..
حبوبتي الي حجت واخيراً وهي تهز رجلهة بعصبية : اي جا صدك ما عليهم .. كل البلا بنقمة .. ربيي ما تاخذهة .. بس مثل ما كال المثل العار ما يموت ..

جبران ابتسم يحاول يلطف الجو : جدة ترة امي هاي ..
الجدة : من طاحظك وحظ امك وياك .. ما يرضى على امة ابو خيسة ..

جدي عدل گعدتة : كافي .. كوم انتة وياه كملو دربكم واطلعوا .. لا تعطلون شغلكم من وراي .. كلشي ما بية .. هسة ريمة تسويلي نومي بصرة وارد احسن .. كوم يلة ..

كمت اني وجبران وبسنة راسة : خطاك التعب جدي ..
طلعنة وصعدنة ثنينة بسيارتي ..

بس حركت السيارة دك تليفون جبران ..
رفعة وحجة : الو ..
هوة بس كال هالكلمة وبعد التليفون عن اذنة بأنزعاج من الصوت ..

ابتسمت وعرفتة عباس لان مبين من حجية طالع من التليفون ..
جبران ورة ثواني : خلصت ..؟؟ .. ياخي والله صارت عدنة مشكلة وتأخرنة لا تطلعهة من خشمنة ..

جبران ..: والله انتة الي تولي .. لا تطلعلي من التليفون .. جايين ترة بالطريق ..

جبران : وييين لا تروح مو اكلك جايين اني وحارث والله ..
سد التليفون منة ..
التفتتلة بضحك : شعندة عبيس ..
جبران : زهكان لان تأخرنة علي .. جا مو حقة ؟؟

وصلنة للكهوة ونزلنة ..
كوة حبست ضحكتي من شفت وجهة احمر ويهفي بالكارتونة من الحر ..

شمرت السويج عالطاولة كدامة وهوة كمز  : مساء الخير ..
باوعلي بالعصبية : الله لا جابك انتة وياه .. لو منخمدين ببيوتكم موش احسللكم ..

جبران : عمي اسفين وحقك علينة .. صارت مشكلة بالبيت وتأخرنة لا تلومنة .. وادور جدي ضغطة صعد وتخربط ..

عدل كعدتة : شچاه برّد .. خاب وحگ علي الزلمة تاليتة ينجلط من وراك يجبير ..
جبران فتح عيونة : وسسم اني شعلية .. اصلاً مالي ايد بالسالفة ..

عباس تأفف : اسكت كافي .. هسة شنهي وين نولي .. مال اضل گاعد هنا انسوهة .. صرت تشريب من الحر من وراكم ..

ضحكت وشلت السويج وگمت : صار مو تدلل .. كوم نفتر بالسناتر شوية واشتريلك ازبري .. وهم نگرط حامض حلو بطريقنة ..

كيف عباس عالسالفة وگامو وياي ..
عباس صديقي من ٥ سنوات .. من اهالي البصرة وشروگي كلش .. عايش بكربلا صارلة ٥ سنوات من شال لهنا ..
البنات من يشوفن شكلة ينعجبن بي بس من يحجن وياه يشردن لان ماشالله علي لسانة حلو ..

ذبيت السيارة بالكراج ونزلنة نتمشى ..
عباس تخوصر والتفتلي : وين الازبري بعد اخوك .. شو غلست ..
حارث : شكد جوعي لخاطر ربك .. دمشو اكعدو هناك بين ما اروح اشتريلكم واجي ..

جبران //

راح حارث يجيبلنة شي نشربة ..
كعدنة اني وعباس عالكرسي الي بالحافة ..
عباس بطبعة ما يحب يرقم ومن هالسوالف ودوم يحجي علينة ..

مرن من كدامنة ٢ بنات لابسات عبي وحلوات يخبلن ..
ضربت عباس بعكسي : لك شوف شوف.. صواريخ ..

طگني بخزرة بدون ما يباوعلهن حتى : جبيير ..
تأففت بملل : ياخي انتة ليش هيج .. والله لو حارث جا جابهن بنضرة .. بس انتة مابيك خير .. ما تدبرهة ..

رفعلي حاجب : انة ما دبرهة .. شنهي فيزيا لو كيميا هي .. بس السالفة بيهة عيب ومستحى ..
جبران : ديلة هسة انتة شلونك عاد .. وبعدين شيصير اذا جربت .. تصير عندك خبرة .. بس انسى اصلا متكدرلهة .. مبينة متاخذ ارقام هاي ..

اشر على روحة : ولك انة تگلي ما اكدرلهة وهي مرة .. دوگفلي وشوف ..
ضحكت لان اني عمداً حجيت هيج حتى ياخذهة بتحدي ويوافق ..

سحب ورقة من جيبة وكتب رقمة عليهة ..
طبگ الورقة وكام : اوگفلي هنا هسة اجيك ..

كام وانتبهتلة يمشي بأتجاه ذني البنات الي دخلن للمحل كلة جام ويبين الي جوة ..
طبگت حواجبي من شفتة انلطخ بوحدة منهن ووكعت اغراضهة وعلاليكهة بالكاع ..

خطية انخبص نزل هوة وياهة يلملم بيهن والتوتر مبين علي ..
شالهن وانطاهن الهة .. مدري شحجة وهوة يفر بسبحتة ووجهة احمر ..

مشت البنية وهوة اجة كعد يمي ..
رفعت حاجبي بأبتسامة : خير شبيك مختبص هيج ..
الاخ هسة يلة انتبهلي : هاه .. اكلك جبران انتة كل ما ترقم هيجي يصير بيك ..

ضحكت على شكلة : ليش شصار وياك ؟؟
صفن وهوة يحط سبحتة بحلكة ويتنهد : خووية تدوهنت .. كمت ما شوف دربي .. العيون تلطش بالحايط من حلاتهن ..

فتحت عيوني : لك خرب بليسك عبيس من اول ترقيمة حبيتهة ..
التفتلي بسرعة : هو شني الحبيتهة .. جا انتة ما يصير بيك هيج .. عليك الحمزة لا تجذب علية ..

جبران : ولك وين اكو هيج حجي .. مبين انتة انعجبت بالبنية .. والترقيم يكون للتسلية مو اكثر ..

شكلة انصدم من كلامي .. التفت يدور عالبنية لكاهة ماشية ..
ضربتة على ايدة : وين وديت الرقم ..
عباس : حطيتة بالجنطة من طاحت من ايدهة .. خايب هم يسويهة البخت وترجع اتدك علي ..

هزيت راسي : صدك تحجي عود .. هاي من اول مرة وهستوك شفتهة وهيج صار بيك .. ولك بابا اصحى .. عباااااس مو احجي وياك وين صفنت ..

اجة حارث وحط الكاسات مال العصير عالطاولة ..
مد الكلاص لعباس : هاك ..
عباس رايح بغير عالم وولا يمة ..

حارث عاط بي : هااي شمااالة ..
عباس كمز وباوع لحارث بعصبية : وسمم شمالك .. يمتة اجيت ..
ضحكت وسحبت الكلاص مال عباس وقربتة الة : اشرب خوية اشرب .. وجهك صار نومي .. ريكك نشف ..

حارث يباوعلنة برفعة حاجب : هذا شمالة ..
سولفتلة وحارث خرب من الضحك ..
حارث : الله يطيح حضك يالرجيج ..

عباس يسحب تنهيدات وهوة يشرب من العصير ..

ريم //

سويت نومي بصرة ووديتة لجدو ..
طلعت مريم من الحمام وهي لازمة بطنهة ..
رحتلهة بسرعة : مريومة شلون صرتي .. يحتاج اسويلج شي ..

كعدت عالكرسي : لا والله مايحتاج .. يعني ما تعرفين دائماً هيج .. هسة شوية وارتاح لا يهمج ..

كمت من يمهة .. سويتله عصير برتقال وانطيتة الهة .. وجهة مصوفر وعيونهة ذبلانة .. ادور الاسود گالب على شكلهة ..

عدهة حالة من جانت زغيرة وهي ان كل ما تضايقت او زعلت من شي تصير تحس نفسهة تريد تستفرغ ومعدتهة تصير تگلب بس ولا مرة استفرغت .. عبالنة من تكبر تروح منهة هالحالة بس مستمرة عدهة ..

قاطع تفكيري دك الباب الخارجي ..
لبست شالي وصحت : منوو ..
اجاني صوتهة من برة : افتحي ريما .. اني بسمة ..

ابتسمت وفتحتلهة الباب : يا مية هلا .. همزين شفنة وجهج ..
دخلت وسدت الباب واجت تبوسني : اسكتي والله گوة خلتني امي اجي .. من ورة الامتحانات ..

دخلنة للمطبخ ودخلت بسمة سلمت على مريم ..
كلت بگلبي همزين اجت بسمة عالاقل تطلع مريم من جوهة شوية ..

بسمة : شلونج مريومة شخبارج امورج ..
مريم : على الله .. انتي شخبارج ..
بسمة : والله اني حضي طايح من الامتحانات بس يلة ما بقة شي ..

دارت وجهة للباب وتدور : اخوجن الصاك هنا ..
مريم ابتسمت : اي كولي من البداية ما جاية علمودنة .. بس لا تخافين مو هنا .. طالع هوة وحارث ..

حطت ايدهة على خدهة وارتجت عالطاولة وتنهدت : احتركت لشتة والله احبة .. هسة غير يجي ..
ضربتهة اني على راسهة : وللج لا تسمعج الجدة .. والله تطيح حضج من تكولين احترگت لشتة ..

مريم : لا وتخيلي يجي جبران ويسمعج تگولين والله احبة .. عاد شلون تطيحين من عينة ..
بسمة حطت ايدهة على حلگهة : عاد انتن محد يحجي گدامجن شي .. امداجن ..

سمعت صوت الباب الخارجي ينفتح ..
طلعت شفتهم حارث وجبران يسولفون واصواتهم عالية ..
ريم : نصي صوتك انتة وياه .. وهم بسمة بالمطبخ ترة مو ..

قاطعني جبران وهو يمشط شعرة بأصابعة ويعدل قميصة بسرعة : هااااا كولي والله .. اليوم بسومة هنا ..
حارث ضحك : العاشق الولهان .. ومساع تقلد على عبيس ..

اجو يدخلون للمطبخ بس صرت كدامهم ..
صحت بصوت عالي : بسمة لبسي شالج ترة اجو الولد ..
جبران صك سنونة بقهر : خليني اتمتع .. هسة ليش الخباثة ..

حارث ضربة على راسة ..
رفعت حاجبي : جبراان ..
دخلت للمطبخ وهمة وراي ..
بسمة وگفت وهي لابسة شالهة ..

حارث سلم بأبتسامة : بسمة شلونج ..
بسمة : الحمدالله انتة شلونك ..
حارث : على الله  ..

جبران يباوعلهة وصافن عليهة ..
ضربة حارث بعكسة وهوة انتبه : بسومة شلونج ..
بسمة : الحمدالله جبران انتة شلونك ..

جبران : عال العال .. شلونج بالامتحانات ..
تأففت من شفتة راح يطول السالفة : جبران حبيبي لا تطولهة .. توكلوا بالله لان نريد نكعد وحدنة ..

باوعلي بعصبية وحارث ضحك ..
سحبة حارث وطلعوا ..
بسمة باوعتلي بغيض : منو كلج اني اريد اكعد وياج .. انتي ليش هيج نحسة ..

بمكان ثاني // ليلى

كاعدة بغرفة براء ونعزل بالاغراض الي اشتريناهن اليوم ..
دخلت حنين اخت براء : هاي بعدجن ممخلصات .. فضنهة ترة عمة هويدة اجت وراح نبدي نحضر بالعشى ..

براء ابتسمت : اجت عمة هويدة .. منو جابهة ؟؟
رفعت حاجبهة : شهالسؤال .. يعني منو يجيبهة .. اكيد رجلهة ..

ليلى : انتي شبيج .. سألت لان سمعت ان خالو رياض هوة راح يمر عليهة .. كلنا ننزل علي لان البارحة ما شفناه من اجة ..
حنين تگلب بالعلاليك الي عالجرباية : لا بعدة مجاي .. شنو اشتريتن اليوم .. جبتيلي هتفونات ؟؟

هزيت راسي : جبتلج .. بس بالاول انطيني فلوسهن يلة اسلمهن الج ..
حنين : اعوذ بالله مو ليگول بت خالج .. هسة جيبيهن واني بعد شوي انطيج ..

سحبت جنطتي واني اريد اطلعهن : اذا ما انطيتيني بعد شوي صدگي افتح كنتورج واطلعهن اضعاف ..

طلعت الكرتون مال الهتفون وانتبهت لورقة زغيرة موجودة بالجنطة ..
حنين سحبت الكارتونة وطلعت .. براء دخلت للحمام ..
ما اهتميت كد فضولي للورقة ..

فتحت الورقة لگيت مكتوب بيهة رقم .. : رقم منو هذا ..
طلعت تليفوني وكتبتة بس ما طلعلي موجود بأسم ..

بدون تفكير اتصلت عالرقم ...
ورة رنتين اجاني صوت رجال وهم غريب : الوو ..
ما رديت لان استغربت منو هذا وشيسوي رقمة بتليفوني ..

رجع حجة : الووو تفضلو  ..
رديت واني طابگة حواجبي : عفواً بس منو حضرتك ؟؟
: انة المخابر لو انتي ؟؟.. انة الاسألج انتي ياهو ..

صدك شهالغباء العلية .. داگة عالرجال واگلة انتة منو ..: لا اخوية بس فتحت جنطتي ولگيت رقمك موجود بورقة بيها .. استغربت وكلت يمكن احد من اقربائنة .. اعذرني عالازعاج ..

سمعت نبرة صوتة تغيرت : لا يابوي لا يهمج .. كل ازعاج ماكو .. تفضلي سولفي ..
فتحت عيوني : شأسولف ؟؟؟.. ترة فهمتني غلط خوية .. اني استغربت الرقم وبس .. يعني مداگة اسولف .. مع السلامة ..

سديت الخط بوجهة : هااي شنوو شبي هذا .. ليگول ما صدك ..
دخلت عالواتساب وسجلت رقمة ورحت اشوف صورتة بسبب الفضول ..

فتحت عيوني من شفت صورتة : عزا هذا نفسة الي ضربني مساع بالسوك ..
اتذكر شكلة لان ما مر هواي وقت حتى انساه ..

طلعت براء من الحمام .. : ها ام اللول ليش بعدج منازلة ؟؟ ..
سحبتهة من ايدهة ومديت التليفون : شوفي براء هذا مو نفسة الي مساع انضرب بية وطيح اغراضي بالكاع .. ابو دشداشة نيلي ..

براء : شمدريني ما رگزت بشكلة .. وبعدين منين جبتي هاي صورتة ..
ليلى : مو اني هسة اتصلت علي ..
فتحت عيونهة : شنوووو ؟؟ منين جبتي رقمة ولج .. وشعندج متصلة علي ..

حجيتلهة السالفة وهي حكت راسهة بتفكير : ايجوز وگع الرقم من عندة وهوة يلم بأغراضج وعبالة الج وحطة بجنطتج ..
ليلى : اوي شكد مسالمة لخاطر ربج .. مبينة هوة متقصد يحط الرقم بجيبي ..

براء تباوع لصورتة : بس حلو ترة ..
ليلى : يعني واذا حلو شسويلة قابل ... ارجع اخابرة مثلاً ..
امشي امشي تأخرنة على خالة هويدة عيب ..

نزلنة  اني وبراء لگينة الكل موجودين بالصالة ..
رحت مباشرةً لخالة هويدة سلمت عليهة : اگول البيت ليش منور .. اثاري خالة هويدة هنا ..

ابتسمت وحضنتني : حبيبتي منور بوجودج ..
حنين : شگد لوگية ..
رفعتلهة حاجبي بدون ماحجي ..

هويدة : گالولي طلعتن اليوم .. وين رحتن ..
براء : افترينة بالسوگ .. اخذنة جم شغلة ورجعنة ..
ليلى : اي صح .. وحتى براء اكلت گلبي بس علمود الاكل .. كلشي ما شفنة من السوگ من وراهة .. تبسط يم محلات الحلويات والاكل ..

براء : هيهي ترة على فكرة بايخة ..
اجانة صوت خالو رياض من برة : شكد تتعاركن لخاطر ربجن ..
گمنة نسلم علي ..

گعد بصف خالة هويدة ..: اي شخبارك سيد رياض .. من البارحة حضرتك جاي وما مريت علية .. شو جنك متغير .. خاف اكو وحدة منا منا ساحبة اذنك ..

حبوبتي لفت مصلايتهة وهي هستوهة تخلص صلاة : الله وايدهة .. خلنهة تسحبة .. اهم شي يعرس ..
رياض التفت على عمة هويدة : ارتاحيتي هسة من فتحتي الموجة اليومية ..

حبوبتي : شني قصدك ولك .. ما تشوف صرت شطولك .. شناقصك عن العالم وما تعرس .. شو بالشكل الله لا يضرك فلعة گمر .. العين هالوسعهة ومثل الشذر .. ووضيفة وعندك وضابط وخير من الله .. وسيد ابن رسول الله كلهة تحترمك .. عمرك وصل ٣٣ وانتة ما تريد تعرس .. جا المن متاني بعد .. لمن تعجز ..

كام رياض وگعد بصفهة وشال ايدهة وحبهة : يمة بعدني ما مستقر نفسياً .. وبعدين شلون ترديني اتخلى عن راحتي وطلعاتي وطباتي بگيفي .. الزواج عبارة عن سجن .. اذا تزوجت معناتهة بعد ارجع للبيت من وگت .. وسوالف ونگ يم راسي وفلانة گالت وفلانة سوت .. شلي بدوخة الراس ..

هويدة : مو كلهة سوة .. يمكن تلاگي بت حلال تخليك تتمنى لو متخذ قرار الزواج من زمان .. الي تخليك تحمدالله وتشكرة على النعمة الي انطاهة الك ..

رياض تأفف بملل : هويدة دخيلج لاتبالغين .. وين اكو هيج بنية بعد .. كلهن هسة ما عدهن غير رواحهن وينافسن البنات عاللبس والسوالف المابيهة خير ..

حبوبتي عاطت بي : والله انة مالي شغل .. تعرس يعني تعرس .. شني يربي يعني عيب اشوف ابني عريس لو اشوف اولادة گبل لا اموت .. ما تشوفني رجل بالدنيا ورجل بالگبر .. ارحم بحالي ..

رياض : يمة اسم الله عليج وعمرج طويل انشالله .. لاحگة تشوفين عرسي وتفرحين بية .. واني من اريد اخطب اجيج بنفسي واگلج خطبيلي ..
دارت وجهة حبوبتي وما عاجبهة الحجي ..

سمعنة صوت الباب الخارجي ينفتح وصوت اخوي عامر : يااهل الببييييت .. احممم ..
البنات لبسن حجاباتهن واني صحت : تعال ماكو احد غريب ..

دخل عامر ووراه امي واختي شهد ..
اني سبقتهم بالجية لان طلعت وية براء للسوك ومن رجعنة اجيت مباشرةً لهنا لان ادري بيهم راح يجون ..

سلمو وگعدو ..
عامر : شبيهة الحجية اليوم ؟؟
حبوبتي : اسأل خالك .. ما يرضى يعرس .. صار شطولة ..
ضحك عامر : اي مو اگول شبيهة الحجية .. رياض الموضوع ما ينسد الا تتزوج .. انطيتك خبر بعد ..

حبوبتي باوعتلة صفح : وانتة هم اسكت .. عبالك زغير انتة شني .. شو هم ضال لهسة ما عرست .. هسة درينة بيك تحبهة .. بس البت عرست وراحت بدربهة .. وانتة لهسة ما ترضى نجيب طاري العرس من وراهة ..

عامر تحولت نضراتة للعصبية ووجهة گلب احمر ..
ضرب على رجلة بعصبية : ليش بگل مرة تذكروني بهالسالفة .. مو كافي والله تعبت .. انسوهة لخاطر محمد .. انسوهة وخلوني اعرف انسى ..

طلع من يمنة وهوة عكس حالتة من دخل ..
رياض التفت لحبوبتي : يمة ليش هيج حجيتي وياه .. مو تدرين بي يكره احد يجيب طاريهة كدامة ..

ردت بعصبية : خلوه يتعلم .. شني لهسة كاتل روحة عليهة وهي ضحكت علي بدم بارد وغافلتة لا حس ولا خبر وعرست .. خلي يصحى على روحة ..

گام خالو رياض يريد يروح وراه بس امي وگفتة : رياض .. الاحسن ما تروحلة .. اكيد يريد يبقى وحدة .. لان اذا عصب يحب يعتزل بنفسة ..

كعد ويهز برجلة بعصبية ..
انزعجت من تصرف حبوبتي .. بس شنسوي حكم القوي .. مانكدر نحجي شي عليهة لان جبيرة العائلة ..

اخوي عامر جان يحب وحدة وياه وجان على علاقة بيهة .. بس كل ما يريد يخطبهة هي تكلة بعد وكت ..
ومرة جان مسافر هوة وخالو رياض براس السنة ..

بقو اسبوعين ورجعو .. من رجع درة بيهة تزوجت .. وهوة خطية جاي من السفر فرحان وجايب وياه اشكال الهداية الهة ..
انصدم صدمة عمرة من عرف بيهة تزوجت وبكل ارادتهة .. ومن خابرهة هي اعترفت بدم بارد وكالتلة ما ارهم الك واحب ابن عمي .. والي بينة جان مجرد نزوة ..

جانت الصدمة قوية علي واجتة فترة ما ينام الليل بيهة ..
مر سنتين ونص على هالسالفة ..

بالگوة گدر يرجع لطبيعتة ويختلط .. بس الاهم ان محد يجيب طاري هالسالفة كدامة ومحد يجيب طاري الزواج .. تعقدت نفسيتة من وراهة ..

قطع سلسلة افكاري صوت حبوبتي وهي تأمرنة نروح نجيب العشى وية مرت خالو ..

كمنة حضرنة الاكل وعزلنة اكل الزلم وحد واكل النسوان وحد ..
اجة خالو رياض اخذ عشاهم واحنة كعدنة بالصالة نتعشى ..

ورى ساعتين اجة رجل خالة هويدة واخذهة لبيتهم ..
واحنة رجعنة لبيتنة وعامر طول الطريق ساكت ومبين ضايج ..

بيت سيد عجاج ..
سيد عجاج متوفي (جدي)
عندة ٢ ولد و٢ بنات ..

خالو ابو عجاج الجبير وعندة ٢ ولد (عجاج _ حامد) و٣ بنات ( براء _ حنين _ اسماء )
وراه تجي امي ( ام عامر ) وعدهة ولد واحد الي هوة عامر و٢ بنات اني وشهد ..

ورى امي تجي خالتي هويدة الي هي زغيرة وعمرهة ٣٧ سنة .. متزوجة بس الله ما رزقهة بأطفال ..

واخر وازغر واحد خالو رياض .. مرات اگولة عمو ومرات خالو ومرات رياض ( مشكل يا لوز ) ..
مثل ما عرفتو هوة ما متزوج وعمرة ٣٣ .. ضابط وشخصيتة حلوة ..

وهوة هم حلو .. تدرون ليش ؟؟ .. لان اني اشبهة بالشكل .. عيونة زرگ وكبار .. بس بطبعة عصبي .. حتى احنة نخاف منة وخاصاً حنين .. لان اذا عصب يصير ما يشوف كدامة ..

اليوم الثاني / هادي //

وصلت للمعمل من بعد ما خابرني ابوي وگالي اروح امر على جدي لان يخابرة وهوة ما يرد ..
واليوم طالع وبعدة تعبان من الصار وياه البارحة ..

دخلت ورحت مباشرةً للمكتب مالتة ..
فتحت الباب واحس رجلية بادت من الي شفتة ..

جدي واگع بالگاع على ضهرة ..
عگالة طايح بالگاع ووجهة احمر ودگم دشداشتة الفوك مفتوحات ..

ركضتلة بسرعة واني اصيح بأسماء اليشتغلون برة حتى يجون يشيلونة وياي ..
التفتتلة وايدية وجسمي كلة يرجف : يابة افتح عيونك دخيلك .. دخيلك لا يصير بيك شي ..

اجو الولد شالوه وياي واني بالطريق خابرت ابوي وعمامي ورضوان ..
الطريق گلة واني ماخليت دعاء ما قريتة ..
مستحيل اتخيل حياتنة من دون صوتة لو شوفتة لو نصايحة النة وخوفة علينة وعبالك بعدنة زغار ..

وصلنة للمستشفى ومباشرةً اخذوه من عدنة وطلعونة ..
ورى دقايق اجو ابوي وعمامي والولد كلهم ..

خطية اكثر واحد مختبص هوة حارث ..
يفترون منا ويرجعون منا .. خايفين علي ..
رضوان مدنك وايدة على راسة ويدعي ..

حارث واگف يم الباب وكلساع يروح ويرجع ..
ابوي وعمامي لازميني يستفسرون مني عالصار ..

ورة شوية طلع الدكتور علينة ..
حارث حجة بلهفة : دكتور شبي جدي ..
الدكتور : ضغطة ارتفع لدرجة عالية وسبب جلطة .. وضعة الصحي متوتر كلش .. راح نسويتلة قسطرة قلبية والباقي على الله ..

حارث : دكتور اگدر اشوفة .. بس دقايق والله ..
الدكتور من بعد تفكير : ماشي بس لا تطول عندة يعني ٥ دقايق مو اكثر .. وانتة وحدك ..

دخل حارث وحدة لغرفة الانعاش ..

حارث //

دخلت للغرفة واني كل اطرافي ترجف ..
هذا مو بس جدي .. هذا ابوي ..
بالوقت الي ابوي دار وجهة عني من ماتت امي .. هوة اخذني بحضنة هوة گبرني ..

صعب علية اشوفة بهالحالة هسة ..
الاجهزة من حولة وصدرة مكشوف وعلي اشكال الوايرات ..

لزمت ايدة وحجيت بصوت خفيف : يابة تسمعني .. كوم والله ما اسوى شي من غيرك .. كوم عاقبني وصيح علية .. شتريد تسوي سوي بس افتح عيونك ..

ايدة تحرگت وفتح عيونة ..
كمت بسرعة وقربت منة ..
لسانة ثگيل وگوة يحجي : ر ... اسـ..ــم ..
حجيت بسرعة : راسم ؟؟

هز راسة ورجع حجة : خـا...برة .. خل .. يجـ..ي ..
حارث : صار يابة صار .. هسة اخابرة واخلي يجي .. انتة بس ارتاح ولا تتعب نفسك .. كلشي يهون .. اهم شي صحتك ..

طلعت من الغرفة من بعد ما طلب مني الممرض هالشي ..
طلعت تليفوني .. لگيت اكثر من مكالمة من ريما ..

ما اهتميت واتصلت على راسم .. مارد علية ..
رجعت اتصلت اكثر من مرة ..
لحد ما رد علية : على گيفك يمعود خبصتني .. والله عندي مراجعين .. شعندك ..

حارث : راسم تگدر تجي للعراق اليوم ؟؟
احتدت نبرة صوتة : ليش شكو ؟؟ صاير شي ؟؟
حارث : جدي ضربتة جلطة وحالتة مو مستقرة .. ويريد يشـو...

قاطعني بصوت كلة خوف : حاارث انتة صدك تحجي .. شنو جلطة .. مو البارحة مابي شي .. ليش هيج فجأة وگع ..

حارث : البارحة صارت مشكلة بالبيت من ورة نعمة وهوة ضغطة صعد وتعب وراهة .. بس اليوم رجع وگع بالمعمل وصابتة الجلطة ..

راسم : شلون يعني ما نرتاح من هالنقمة هاي .. وتاليهة وياهة ..

حارث : راسم اني ما خابرتك حتى تصيح .. خابرتك حتى اگلك تعال لهنا بأسرع وقت لان هوة طالب يشوفك .. دخيلك لا تعاند راسم .. انسى حتلو بس لحد ما يطيب ..

راسم : جاي حارث جاي .. على اقرب حجز راح اجي .. بس انتة ابقى متواصل وياي وگلي شيصير ..

سديت التليفون من راسم ..
رجعت گعدت يمهم وورة ساعة دخلوه لغرفة العمليات ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤

ااااااسسسسسسفة حبايبي ادري جان لازم انزل البارت البارحة بس والله مگدرت اكتب وجنت ابغداد وقبل شوية اجيت وكعدت كتبتلكم البارت ..
وهم صارت بية دكة ناقصة متسولف .. واكلت هبطة تسوى عمري ..
بس الحمدالله حليتهة 👍🏻