رواية بنات للزمن الفصل السادس 6 - بقلم سارة الشمري

الكاتبة : سارة الشمري✍🏻

أبعد ياحزن خليني مره ارتاح
خل مره بحياتي افرح بروحي
جبت اسنين عمري بس اصب دموع
أشل جروح غيري وأنزف جروحي

راسم //

من خابرني حارث واني احس الدنيا اسودت بوجهي .. ما اتخيل يموت واني مزعلة ..

اتصلت سألت على حجز اليوم للعراق ماكو ..
اضطريت احجز لعمان ومن عمان واحجز للنجف ..

ثاني يوم يلة وصلت لكربلا من بعد ما اخذت تكسي ..
حارث مستمر على اتصال وياي .. كال دخلوه للعملية وطلعوه من البارحة .. وضعة مستقر حالياً ..

وصلت للبيت الساعة ١٢ الضهر تقريباً ..
دگيت الباب الخارجي ..
انفتح وطلعلي رضا ابن اخوي ..
ابتسم : عمو راسم ..

دنگت شلتة وبستة بخدة : ليش تفتح الباب انتة .. ما يصير تطلع وحدك ..
رضا : ماما واگفتلي اباب المطبخ .. وماكو واحد من الرجال بالبيت .. كلهم يم جدو .. بس اني رجال هنا ..

بستة براسة : انتة زينت الرجال كلهم ..
سمعت صوتهة من جوة تصيح : رضا وين رحت ماما .. ويامن تسولف ..

اللحضة والشعور رجع مثل اخر مرة شفتهة بيهة ..
لا لا راسم مو هذا التريدة انتة ..
كلبي احس الدنيا كلهة صارت تسمع دگاتة ..

ايدية گامت ترجف لدرجة خفت اطيح رضا من ايدي .. نزلتة بالگاع ..
رضا : ماما تعاي .. هذا عمو راسم ..

ردت ارجع بس گلبي منعني امشي ..
ما يفصلني عن شوفتهة غير هالباب هذا ..
شلون يطاوعني گلبي اروح بدون ما اشوفهة ..

صارلي سنين ما شايفهة ..
فتحت الباب ودخلت جنطتي السحب ..
طلعت هي من المطبخ لابسه حجابهة الاسود ..

شفتهة واحس انفاسي صارت عالية من التوتر ..
گلبي ماكدر اسيطر علي ..
ابتسمت رغم عيونهة حمر من البجي : شلونك راسم .. الحمدالله عالسلامة ..

حاولت اخفي التوتر البية : الله يسلمج .. انتي شخبارج .. انشالله مرتاحة ..
هزت راسهة .. : شلون ارتاح وجدو بين الحياة والموت .. بس شنسوي ما بيدنة غير الدعاء الة ..

نزلت راسي واني احاول اتهرب من النضر الهة : الله كريم .. يلة اني استأذن .. لازم اروح للمستشفى ..
مريم : الله وياك ..

طلعت من البيت وعفت جنطتي حتى ما كتلهة عليهة ..
احس رجعت لنقطة الصفر .. كل الي سويتة حتى انساهة .. تبخر وراح من بعد ما شفتهة ..

فتحت دگم قميصي من فوگ وافرك بوجهي ..
احاول اقنع نفسي ان هي ارملة اخوي ..
لازم اغير نضرتي الهة ..
احاول ما اشوفهة هالجم يوم لحد ما يگوم جدي بالسلامة .. وارجع من حيث ما اجيت ..

توجهت للمستشفى ومن وصلت لگيت حارث بالباب ينتضرني ..
اخذني لغرفة جدي ..
تنهدت وضغطت على اعصابي ودخلت للغرفة ..

شفت الكل موجودين يمة ..
رحتلة اول واحد لان مبين هستوة گاعد ..
بس شافني حجة بلهفة : راسم .. اجيت ..

دنگت بستة براسة ورفعت ايدة وبستهة : اجيت يابة اجيت ..
حط ايدة على راسي : جنت متأكد راح تجي وما تخذلني ..

هزيت راسي بدون ما احجي شي ..
سلمت على اعمامي وعلى الولد ..
بقيت شوية وبعدين طلعت ورحت للدكتور المختص بحالة جدي حتى اسألة عن حالتة واتطمن علي ..

ورى نص ساعة رجعت للغرفة ..
راسم : يابة الدكتور ايگول بعد يومين نگدر نطلعك .. بس لازم تنتبه اكثر .. حركتك تصير اقل .. ماكو انفعالات ولا عصبية ..

باوعلي وحجة : والله انفعالاتي وعصبيتي تعتمد عليكم .. اذا ما خيبتو ضني انشالله ماكو عصبية ..

ما افتهمت قصدة بس ما اهتميت للموضوع ..
اساساً ورى ما يطلع بيومين اني ارجع للرياض ..

بقينة يمة لحد الساعة ٩ بليل ..
الناس طابة وطالعة .. واني منا تعبان اصلاً وما نايم ..

طلعنة اني وحارث للبيت ..
وصلنة واني بقيت واگف بالباب ..
التفتلي حارث : ليش وگفت .. تعال طب ..

هزيت راسي : لا ما يحتاج .. بس جيبلي جنطتي .. اروح لبيت ابوي احسن .. وهم هناك ارتاح اكثر ..
وامر على امي ..
هز راسة : براحتك لعد .. وسلملنة على عمة ام راسم ..

دخل جابلي الجنطة ورجع وصلني للبيت ومشى ..
دخلت للبيت ومباشرةً توجهت لغرفة امي ..

الباب مفتوح .. دخلت بهدوء ..
اسمعهة تسبح بالسبحة بصوت عالي ..
دنگت على راسهة وحبيتة ..
التفتتلي بسرعة : رضوان اجيت ..
شهكت من شافتني : يممة راسم ..

كعدت بالكاع يمهة وحضنتهة وهي تبوس بية وتشمني ..
حطت ايديهة على خدي : ليش هيج يمة رحت .. هذيج جيتك ما لحگت اشوفك ولا اشبع منك لان جان گلبي محترك على اخيك .. وهسة وبعد محترك ..

رفعت ايدهة وحبيتهة : اعذريني يمة بس والله شغل .. وتدرين بية ماحب هوسة الفواتح ..
ام راسم : وشگثر تضل هسة هنا .. خو ما هم نفس القبلهة ..

تنهدت : شسوي يا يمة .. انشالله يومين تلاثة وراجع .. هم لو ما مخابرني جدي جا ما اجيت ..
ام راسم : صدك نسيت ما سألتك على جدك .. بس ولو هوة الرجال شلون يرتاح اذا الفگرية مگابلتة وگاعدة .. كلة من وراهة الله وكيلك ..

طبگت حواجبي : منو ؟؟ نعمة ؟..
هزت راسهة : مگرودة ينعمة .. انة اسولف عالحية ام وجه الفگر مرت اخوك ..
فتحت عيوني : مريم ؟؟ يمة صدك تحجين انتي ..

تحولت نبرتهة للعصبية : اي صدك احجي .. جا مجذبة عليك شني .. مو هي الاخذتة وراحت بي لبغداد وبالسنة حسنة يلة نشوفة .. وتالي مات وهوة بعز شبابة .. مو هي الفگرتة .. من زغرهة وهي فگر .. من اجت للدنيا والمشاكل بدت .. ابوهة طلگ امهة .. صارت السبب بكل مشكلة تصير بين ابوهة ومرتة نعمة ..

فرگت وجهي بقلة صبر : يمة شهالخرافات هاي .. يعني ما تدرين بنعمة من يوم يومهة وهي تموت عالمشاكل .. ومريم مالهة ذنب بشي .. محد يعرفهة اكثر مني  .. مالهة بالمشاكل ولا تحب الهوسة .. اصلاً محد مضلوم غيرهة ..

ام راسم : والله احنة المضلومين .. مو هي .. مدري شمسويتلكم انتة واخوك ما ترضون اجيب طاريهة .. ما تگولون هي الحرمتنة من اخونة .. بس بت زمن واعرفهة ما ترتاح اذا ما تجر واحد بيكم وتلزگة بيهة ..

رفعت ايديهة وتدعي : ربببي كون بگد حرگة گلبي على ابني .. اريدك تدولبهة على زمانهة وما تخليهة تشوف دربهة .. واذا تاخذهة وتريحنة منهة بعد رحمة منك هاي ..

وگفت على حيلي وصحت بيهة : يممممة .. شجاج .. مادريت گلبج اسود لهالدرجة .. شلون تدعين عليهة هيج .. نسيتي هي ام حفيدج .. بس يبدو انتي اكو احد تارس راسج بهالحجي .. واني اعرف منو ..

طلعت من الغرفة ورحت لغرفتي ودعوات امي ترن براسي ..

ورى يومين // ريم //

واگفين بالمطبخ نباوع من الشباك عليهم وهمة يدخلون بجدو للديوانية .. وياهم زلم كومة .. كلهم جايين يتحمدون لجدو بالسلامة .. حتى من ضمنهم اهل مرت ابوي .. اني ماعرفهم بس سمعت حارث گال اهلهة جايين ..

يعني اهلهة اجو وهي حتى ما كلفت نفسهة تجي .. حارث عندة عادي الموضوع .. ودائماً يروح لبيت ابوي لان اغلب شغلة وية ابوي ويضطر يروحلة .. وهناك يشوفهة لمرت ابوي .. من اسألة عليهة ايگلي وشتردين منهة .. لا تحطينهة ابالج لان هي لا يمج ولا مأذيتج .. فعلاً كلامهم .. اني بعمري كلة مرايحة لبيت ابوي ابد ..

شفنا راسم يدفع بي بالكرسي المتحرك ..
سودة علية وجهة اصفر وجسمة ذبلان ..
وين راحت قوتة لجدو وهيبتة وطولة ..

دخلو الزلم للديوانية وورة شوية اجة جبران گال صبو الغدة ..

تگابلنة كلنة عالصب وحتى بسمة اجت ويانة ما عدا ام راسم الي اصلاً من مات ابهة وخلصت الفاتحة وهي بعد ما اجت .. مرات تدز رضوان على رضا ياخذة الهة ويبقة يمهة جم ساعة ويرجعة ..

طول الوقت احنة مشغولين بالاكل .. وطبعاً ما تخلى من ذبات عمة نعمة لمريم ..
دخلوا الولد اخذو السفرة والاكل ..

ورة شوية رجع الاكل وعزلنة المواعين وغسلناهة ..
والخطار ورة ساعتين راح والديوانية فرغت ومحد بقة بس اهلنة ..
عمو عاصم گال لنعمة تخلصين الاماعين وتنگلعين لبيتج وما اريد اشوفج تعتبين باب الديوانية لان يعتبرهة هي السبب بألي صارلة ..

دخلنة لجدو سلمنة علي احنة وگلبناهة مناحة وبجي اني ومريم وعهد ..
هوة گوة يحجي وحاول يهدينة : على كيفجن يابوية .. كل انسان وتاليتة هيج .. جا شلون اضل طول الدهر قوي وواگف بطولي .. ما يصير هيج يابعد ابوجن ..

رفع راسة وحجة بصوت واضح : سمعوني زين .. انة ما ضامن عمري .. ومحد بينة يدري شيصير بي .. وانة وديت خبر لراسم عبن اريد كل احفادي وحفيداتي يمي واشوفهم گبل لا اموت ..

اقتربنة احنة البنات يم رجلي اني ومريم وعهد وزينة ووعد بت عمو محمد ..
والولد كلهم وگفو يم راسة : عمرك طويل يابة .. سمالله عليك .. كلنة يمك ..

رفع ايدة : لحد يگول عمرك طويل .. جا بعد اطول من هيج .. ومثل ما گلت .. اريد حفيداتي گلهن گبال عيني يعاصم ..

عمو عاصم استغرب : وهنة يمك بوية .. شوفهن شلون ملتمات عليك وبس يردن رضاك ..
هز راسة جدي ونزلت دمعة من عينة : لا يبوية .. انة عندي سبع بنيات مو خمسة ..

السكوت عم عالمكان واحنة مستغربين وما مفتهمين شي .. والي صدمني اكثر هوة بجي جدي ...

قطع الصمت سؤال ابوي : بوية شني قصدك .. شلون سبعة ..

رفع ايدة لراسم بمعنى عدل گعدتي ..
راسم حطلة المخاد ورة ضهرة وهوة اعتدل بگعدتة .. : حارث تليفوني يمك ؟؟
حارث طلعة بسرعة : اي يابة هذا ..

اخذة منة وفتحة واحنة بعدنة مستغربين ..
اتصل بماعرف منو وفتح سبيكر ..
الهدوء مسيطر عالمكان وكلنة فضول نريد نعرف بمنو يتصل جدي ؟؟؟..

ورى ثواني اجانة صوت بنية وهالشي زاد استغرابي ..
صوت اول مرة اسمعة : الو عمي ؟؟

عمي عاصم وگف على طولة بسرعة ..
جدي : بوية زمن ..
فتحت عيوني بصدمة ولا ارادياً التفتت لمريم ..
الي هي لزمت ساعد ايدي وضغطت علي واحس برجفتهة ..

زمن : عمي وينك .. والله اجينة نموت من الخوف عليك .. خابرت عليك اول البارحة وطلعلي ولد ايگلي انتة بالمستشفى وبالعملية .. فدوة طمني عليك .. انشالله بخير ..

مريم بيهة وما تضغط على ايدي ..
لزمت ايدهة اطمنهة ..
جدي : انة مو بخير يبوية .. ولأني مو بخير اليوم خابرتج ورايد حگي منج ..

زمن : امرني عمي .. كلة جوة ايدك ..
جدي : اول شي احجيلي بنياتي شلونهن ..
عمو عاصم اقترب خطوتين وهوة يطبگ حواجبة يريد جدي يگمل وعبالك هوة عرف الموضوع ..

زمن : بخير عمي وما ناقصهن غير شوفتك .. وانشالله مو بعيد هالشي .. البارحة ما نامن من الخوف عليك وديلارا تبجي وحتى خابرن عالمعمل بلكي يعرفن اخبارك ..

جدي : والله انة ملهوف لشوفتهن اكثر منهن .. وهذا مطلبي منج يبوية .. انة تعبان وما ضل حيل بية حتى اجيهن واشوفهن واجيبلهن الصوغات اليحبنهة مثل كل مرة .. بس رايد شوفتهن گبل لا الله ياخذ امانتة ..

زمن : عمرك طويل عمي وانشالله تشوفهن ..
جدي : بوية ادري بيج فاهمتني .. وتعرفين قصدي شني .. طالبهة منج .. جيبي البنيات وتعاي لكربلا .. بلجن الحك اشبع منهن ومن شوفتهن ..

التفتت لمريم شفت دموعهة تنزل مع ان اني لهسة ما فاهمة الموضوع .. بنيات شنو .. بنات منو ؟؟ منين اجن حفيداتة ..
عمو عاصم وجهة گلب احمر ..

جدو من بعد ما حجة هيج ..
زمن بقت ساكتة وما ردت ..
جدو رجع حجة : بوية زمن وياي ؟؟

زمن : وياك عمي وياك .. ما يصير خاطرك الا طيب .. وانشالله اجيبهن واجي ..
تنهد جدي براحة : الله يطمن گلبج .. حضري روحج والبنيات .. راح اوديلج سيارة من عدنة ..

زمن : انشالله عمي .. باجر احنة جاهزين بأي وقت ..
سد التليفون منهة .. والتفت علينة ..

عمو عاصم فتح ايدي وكأنة يريد تفسير للموضوع ..
جدي : لا تباوعلي هيج .. اي بناتك ذني ..

عمو عاصم صاح بأنفعال : بوية شتگول انتة .. منين اجني بناتي .. هوة انة صارلي ٢٢ سنة شايف وجهة .. هذني العدهة مو بناتي .. هذني بناتهة هي .. هي تزوجت ورة طلاگهة مني ..

جدي : ما تزوجت .. وبناتك توم عمرهن ٢٢ سنة .. من طلگتهة انتة هي جانت حامل .. وبس درت هي حامل گبل ودتلي خبر وگالت على حملهة ..

عمو عاصم ضرب رجلة وصاح بصوت عالي : وليييش ما گالتلي انة .. مو انة ابوهن ..

جدي حجة بحدة وعصبية : شلون تريدهة تگلك وانتة سحبت بتهة من حضنهة وكتلهة انسي عندج بنية اسمهة مريم ..
لو كايلك من زمان عندك بنات .. جا رحت واخذتهن منهة بدون ما يرفلك جفن .. وهم حرمتهة منهن ..

بس هسة ما تگدر تاخذهن بالغصب لان هنة بعمر يخليهن يختارن امهن لو ابوهن ..
وهي حطت ثقتهة بية .. ونعمالله عليهة من گالتلي واحترمتني وخلتني على علم ببنياتي واشوفهن بين فترة والثانية وكبرن گبالي ..

بلعت ريگي والصدمة عقلي ماجاي يستوعبهة ..
مريم دموعهة وگفت بعيونهة ونضراتهة مرتكزة على ابوهة ..

عمو عاصم وجهة صار احمر وتراجع لورى ..
فتح اول دگمة من الدشداشة ..
يفرگ بصدرة ..
گعد على القنفة بتعب وحط ايدة على عيونة ..

ردنة نروحلة لان خفنة علي ..
بس وگفنة من شفنة مريم راحتلة ..
ثنت رجليهة وگعدت على ركبهة مريم گدامة ..
مدت ايدهة ووخرت ايدة من وجهة وحجت بهمس وعبرة مخنوگة : بــابــا ..

دار وجهة عنهة وعبالك مايريد يحط عينة بعينهة ..
حجت بنبرة تعب ودموعهة انهارت على وجهة : ليش جذبت علية ؟؟؟؟ گتلي هي شمرتج وراحت .. ما گتلي انتة سحبتني من حضنهة غصب ..

راسم فتح باب الديوانية بسرعة وطلع بعصبية ..
طلع وراه حارث ..
گام عمي عاصم وطلع من البيت كلة بدون ما يجاوب على اسألة مريم ..

رحتلهة وگومتهة وطلعتهة من الديوانية واخذتهة لغرفتهة ..
كاعدة تبجي وتحجي بحرگة : ليش هيج سوة .. ليش جذب علية ..

لزمت ايدهة : مريومة لا تلومينة من دون متسمعين منة شي .. اكيد عندة اسباب خلتة يگول هالشي ..

مريم : ماكو شي يجبرة يجذب علية .. هوة مو بس جذب علية .. هوة خلاني جوة رحمة نعمة طول هالسنين .. وخلاني اصم حلگي واسمع حجيهة من اتگلي امج شمرتج بدون ما تباوعلج بس علمود تتزوج واحد تحبة .. اسكت من اسمعهة تكول هيج .. تدرين ليش ؟؟ لان اكول هي تحجي الحقيقة وما جذبت ..

بس الي الحقيقة شنو ؟؟ هي ما تزوجت .. هي بقت طول سنوات تربي بناتهة وحدهة وبدون رجال ..

لزمت ايدهة لان شفت وجهة صار احمر وتحجي بأنفعال : مريومة هدي يگلبي .. صدگيني اكو حقيقة ورة هالشي ..
هزت راسهة بألم : شنو الحقيقة ؟؟ بمنو اصدك بعد ..

ما كملت كلامهة وحطت ايدهة على بطنهة بألم .. : اااه ..
تنهدت وعرفت اجتهة حالة الغثيان ..
كامت للحمام بسرعة وسدت الباب واسمعهة تگح بخنگة ..

ورة دقايق طلعت وهي مستندة عالباب ووجهة احمر ..
مسحت دموعهة وحجت : اني رايحة ..
لزمتهة من ايدهة : وين ؟؟

مريم : رايحة اعرف الحقيقة كلهة .. بكل مرة اسألة ليش انفصلتوا .. هوة ايگلي بسبب مشاكل قديمة ..
بس هسة راح اعرف شنو هالمشاكل .. ومجبور يگلي ..

طلعت مريم من الغرفة واني رجعت نزلت للديوانية ..
شفتهم بعدهم كاعدين .. حتى راسم وحارث موجودين ..
ابوي أشرلي اكعد يمة ..

رحت گعدت بصفة ..
جدي التفت على رضوان : رضوان ؟؟
رضوان : امرني يابة ..
جدي : باجر من الصبح .. تروح انتة وجبران لأربيل .. تجيبون ام مريم واخواتهة وتجون ..

رضوان : اني ؟؟
جدي : اي انتة .. مرة اخذتك وياي لأربيل من رحت لحجي ابو جليل ..
رضوان : اي اتذكرة واتذكر مكانة ..
جدي : باجر تروحلة وهوة يدليك على مكان المزرعة البيهة زمن ..

رضوان هز راسة وسكت .. اباوع لهادي وجبران مبينين معصبين بس ساكتين ..

جيلان //

كاعدين اني وديلارا بغرفتهة ..
بالنة مشغول على جدو .. ديلارا كلساع وبجت ..
دخلت علينة ماما ووجهة ما بي اي تعبير غير الحدة : كومن حضرن اغراضجن .. باجر نروح لكربلا لبيت اهلجن ..

كمت بسرعة بخوف .. وديلارا عاطت : ليييش .. جدو بي شي مو .. لا تگليلي مات فدوة ..
امي : لا تفاولين .. هوة هسة خابرني .. گال ماكدر اجي واريد اشوف البنات لان ماضامن عمري .. وباجر تجي سيارة تاخذنة ..

ديلارا تنهدت بأرتياح وگعدت عالجرباية ..
اني طابگة حواجبي واباوع لامي : ماما انتي دتسمعين الي تگولينة .. شلون يعني باجر نروح ..
وجدو گال همة ميدرون عن وجودنة اصلاً .. ويدرون بيج تزوجتي .. ماما فهميني فدوة ..

امي : لا تطولن السالفة .. مو دوم انتن تردن تتعرفن على اهلجن وعلى اختجن مريم .. باجر راح تشوفنهم وتتعرفون عليهم .. واكيد ما راح ندخل عليهم فجأة .. عمي راح يمهدلهم الموضوع ويگللهم قبل لا نروح ..

طلعت من الغرفة واني التفتت لديلارا الي تباوعلي بحيرة ..
تنهدت : حضري جم غرض الج بجنطة وبعدين نفتهم السالفة منهة ..

طلعت من غرفة ديلارا ورحت لغرفتي ..
طلعت جنطة سحب وسطانية .. حطيت بيهة الاغراض الي احتاجهن واني كل تفكيري بباجر ..

شلون راح يستقبلونة ؟؟ بابا راح يحبنة لو لا .. اخواني راح يحبونة لو هم مثل امهم ميحبونة لان بنات زمن ..
ومريم ؟؟ اووف يمريم .. شكد تمنيت اشوفج بالحقيقة .. على كثر ما اسمع جدي ايگول نسخة من زمن بالشكل وطيبة گلبهة ..

امي عيونهة زرگ وحيل بيضة وشعرهة ذهبي بي شگار .. والي يشوفهة ويانة ميصدگ هي امنة .. لانهة ناعمة وجسمهة متوسط ..

بس اني وديلارا ما نشبهة .. جدو ايگول انتن طالعات على اهلجن .. يعني عيون سود وبياض وشعر اسود .. بس الحلو ان عيونة كبار .. وخاصاً اني .. عيوني گبار وناعسات ..

اسألة كومة تدور براسي عن المجهول الي باجر جاي .. راح اشوف اعمامي .. واهم شي جدي الي اشتاقيتلة كولش وبالي يمة ..
بس الاهم من هذا كلة .. هوة مريم شنو شعورهة تجاه امي ..

مريم //

طلعت من بيت جدي ورحت لبيت ابوي .. فتحت باب المطبخ لاگتني نعمة ..
باوعتلي بعصبية : انتي شعندج جاية لبيتي ولج ..
رصيت على سنوني : ابوي وين ؟؟

رفعتلي حاجب : شتردين منة ؟؟
عفتهة ومشيت ودخلت للصالة مموجود ..
رحت لغرفتة .. لگيتة كاعد عالجرباية وحاط راسة بين ايدي ..

نعمة دخلت وراي وهوة رفع راسة علية ..
التفتت لنعمة : اريد احجي وية ابوي وحدنة .. بعد اذنج ..
باوعتلي صفح وما عاجبهة كلامي .. بس طلعت وعود سدت الباب بس عافتة مفتوح شوية ..

تأففت وطبگتة كلة ..
التفتتلة لگيتة يباوعلي بنضرات اسف ..
تقدمت يمة وصرت كدامة : عفتني بدون ما تنطيني جواب .. وهالمرة ما اخليك تروح بدون ما تجاوبني .. ليش جذبت علية .. والاهم من هذا كلة ليش انفصلت انتة وزمن .. اريد اعرف كلشي ..

نزل راسة وحجة : مشكلة قديمة ..
قاطعتة : شنو هي المشكلة .. مليت من هالحجي ..

حجة كلمة وحدة بدون مقدمات : نعمة ..
ضحكت بسخرية : بس گلت مشكلة .. ما اجة غير اسم نعمة .. شبيهة نعمة شسوت ؟؟

غمض عيونة وضغط على راسة : قبل سنوات اجت گالتلي ان زمن جاي تتقرب من اخوي حافظ (ابو راسم) وهوة ما ينطيهة مجال ويرفضهة وهي لازگتلة ..

اني ما صدگت بالبداية .. بس هي بقت يم عن يوم تزيد براسي حجي لدرجة صرت اشك بأقل حركة او كلمة تطلع من زمن ..
عقل ما ضل براسي لدرجة صرت اوهس .. وحتى امد ايدي عليهة ..

بس هي جانت تسكت علمودج .. كل ما تسألني عن السبب ما اكللهة لان ما اريدهة تجذب علية ..

لحد ما يوم دخلت لگيتهة تحجي وية حافظ بمطبخ بيت اهلي وتسولف وياه ..
بدون ماعرف بشنو يحجون .. دخلت سحبتهة من المطبخ ووديتهة لبيتي .. ردت اضربهة بس امي وگفت گبالي وحلفتني ما اضربهة ..

وانة ردت احرگ گلبهة .. وماكو غيرج ..
اخذتج من عدهة بالگوة وطردتهة من البيت ..

اخوي حافظ عبالة انة سحبتهة علمود موضوع ثاني .. ما جان حاط ابالة هالسالفة كلهة ..
بس ورة فترة هوة عرف .. واجة عصبي والا شوية يمد ايدة علية ويضربني ..

كال حجي نعمة كلة جذب .. وزمن ما شفنة منهة غير الادب وكل كلام حلو وولا مرة تجاوزت حدهة بحجاية .. ومن جنت كاعد بالمطبخ وياهة هي جانت تسألني عليك واتكلي دير بالك علي لان هالفترة متغير واكيد عندة مشكلة بالشغل ..

بيومهة حسيت بالذنب .. بس ما رحتلهة وولا سألت عليهة .. لان بنفس الوقت وصلني خبر من ابوي ان هي تريد تتطلگ ..
رفضت اروح للمحكمة .. ماريد اطلگهة ..

جانت كل ماتريد تشوفج اني ما اقبل .. اگول يمكن ترجع علمودج .. اگول يمكن ما تگدر تعيش بدون بتهة ..
بس كلة تبخر من گالتلي ان متقدملهة واحد وهي موافقة .. ومنتضرة تتطلگ ..

رحت للمحكمة مباشرةً .. والي اعرفة ان هي موقعة عالطلاك وموافقة ..
رحت اني واطيت موافقتي عالطلاق الغيابي ..

من يومهة بعد ما سمعت عنهة اي شي ..
غير ورة فترة سألت واحد من معارفي بأربيل وگالو صارن عدهة ٢ بنات .. كلت معناهة تزوجت صدك ..

اسمعة واني مصدومة ..
من نعمة الي ما توقعت حاقدة لهالدرجة .. منة هوة الي ما توقعتة تصرف بهالطريقة الهمجية وهي ان يحرم ام من بنتهة علمود كرامتة .. لو من امي الي ما طالبت القانون عن بنتهة الجبيرة بس علمود بناتهة الثنين يبقن عدهة وما يگتشفهن ابوي ..

كمت من يمة وطلعت واني احس نفسي الضحية الوحيدة بالموضوع .. اي اني الضحية ..
ابوي اخذني من حضن امي وشمرني بيد نعمة الما ترحم .. امي الله عوضهة ابنات .. بس اني ما تعوضت بأم ..

رجعت للبيت ورحت مباشرةً لغرفتي بدون ما اشوف احد ..
لگيت رضا غافي بالگاع وهوة يباوع عالتلفزيون ..

طفيت التلفزيون وشلتة وحطيتة عالجرباية ..
تمددت بصفة واخذتة بحضني ..
صرت ابوسة بخدودة وراسة واشمة ..
واني اگول بگلبي شلون گدرت تبقى طول هالسنين بعيدة عن بتهة واني ابني ماكدر بدونة ساعات ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤
هلو حبايبي شلونكم .. هالمرة البارت قصير ادري .. بس ملحگت اكتب هواي .. وهم بي احداث ..

احبكم كومة .. ولا تنسون صوتو وعلقو وكلشي ينداس دوسو ..