رواية بنات للزمن الفصل الرابع 4 - بقلم سارة الشمري

الكاتبة : سارة الشمري ✍🏻

عاتبني ابعتابك خل ترد روحي
اوهسني . . ابدلالك . . ياشتل شمام
حتى ازهك . . وشوفك وينها اجروحي
بيه اشبع غرورك . .
يا أعز جتال
يتمايل غنج لو بيه . . ثكل نوحي
تعاتبني اعله حالك . .
صار بيك الصار
جاشدل اجروحك هاي وشتوحي
كبل حبك . . جبل مالاح طرفي السيل
هسه اول زخاخ
ايغطن سفوحي !

الشاعر : عريان السيد خلف ..

حارث ...

دخل علينة جدي ووجهة احمر ..
رحتلة بسرعة وجبران طفر ..

لززمتة من جتفة وهو ساند جسمة على حافة الباب : يابة شبيك .. تعبان شتحس ..
جبران : حارث گعدة عالكرسي ما تشوفة ما يكدر يوگف ..

ردت الزم ايده بس ما حسيت الا بضربة على رگبتي من ورة .. ما تألمت على گد ما گمزت متفاجئ من ضربة جدي الي بالسبحة ..: هااي شنيي يابة ..

عدل وگفتة ورجع طبيعي ولزمني من قميصي : ولك اني تفشلني گدام العالم .. اني من تالي عمري واحد مثلك يخرب سمعتي ..

يهز بية من قميصي ويحجي بعصبية : يابة بس اوگف فهمني شمسوي ..
الجد : ولك اني من حطيتك يم التليفون حتى تگضي شغل لو تتغزل ابنات العالم ..

عطت بوجه جدي متفاجئ : دهر دهرهة يمتة لحگت تگلك وشلون گالتلك واني ما طلعت من المكتب اصلاً ..

جبران فتح عيونة : ولك بس لا هاي الگلت جنهة بيگيسي لسانهة طلعت مخابرة على تليفون المعمل ..
عضيت شفتي وطگيتة خزرة ..

باوعت لجدي : يابة جذب ماكو هيج شي .. محد خابر عالتليفون من الاصل ..
لزم اذاني : جا وهاي الدهر دهرهة ياهي وشني اليمتة لحگت تگلي هاا ..

بلعت ريگي : هيج بوية .. حجاية وطلعت .. بس والله وراسي ما تغزلت بيهة .. اكبر جذابة وتتبلى علية لسانهة شطولة ..
دفعني بعصبية : ولك لا تحلف براسك جذب .. ولا تگلي جذابة وتتبلى عليك .. شنهي تعلمني بسوالفك ..

سكتت بعصبية وهو گعد عالكرسي بتعب : سويت بية جالي من احترگ الخلفك ..
دخل ابوي على اخر حجاية : هسة الخلفة شعلي يابوية ..

جدي : جا ما ربيتة زين .. لا من شغلة لا سوالف بيهة حظ .. ليل ونهار وية بنات العالم ..
عفتهم يحجون وسحبت روحي من المكتب وجبران وراي ..

صعدت بسيارتي وجبران وياي ..: بس اريد اعرف شلون وصلتلة الحجي .. اذا هوة التليفون گدام عيني وهوة ما اجة اصلاً ..

جبران ضحك : بعد ما يرادلهة عقل .. اگيد عدهة رقمة الخاص وخابرتة علي ..
تنهدت وهزيت ايدي : ديلة بالله ويحجي علية وهوة رقمة عد البنات ..

جبران : قابل تقارن روحك بي .. هوة علمود الشغل وانتة الله العالم ..
حارث : والله عاد جيب اليفهم الجدة ان هوة يخابرهن علمود الشغل ..

طبگ حواجبة وباوعلي : شقصدك .. لا ولك بس لا ..
هزيت راسي بضحك : بالضبببط .. والله الا اگل لحبوبتي ..

حركت سيارتي وتوجهت لبيتنة ..

ريم ../

كاعدين بالمطبخ اني وحبوبتي .. وزينة ورضا يلعبون يمنة ..
اباوع لحبوبتي تلگط تولة وتستغفر بصوت ناصي ..

اني واگفة يم الطباخ هستوني حطيت المي عالنار مثل ما گالت حبوبتي ..
وگفتي صايرة گبال الباب .. شفت باب الحوش الخارجي انفتح ودخلو حارث وجبران ..

حارث يريد يدخل وجبران يحاول يمنعة ويجر بي ويضحك بس مايگدرلة ..
دخل حارث للمطبخ وحجة : جدة شهلة الحگي .. كاعدة تسوين تولة والماي تمشي من جواج ..

حبوبتي بسرعة رفعت رجلهة : ولك يا ماي الجواي .. منين يجي الماي ..
جبران ضحك : لا جدة قصدة نايمة ورجليج بالشمس بهذا المعنى يعني ..

الجدة : شنهي قصدك ولك .. شمالني ..
حارث : جدة لو اسولفلج شعرفت .. كل ما اتذكر اشب نار من العصبية .. اكول اني هيج يسوي بحبوتي ..

الجدة : خايب دحجي مو فتيت گلبي .. راح اهبدك بهالجدر على راسك .. شنهي السالفة ..
حارث : جايج بالحجي جايج .. اليوم كشفتلج جدي يحاجي بت .. وشنهي من بت يجدة ..

الجدة : اوگف اوگف شنهي هالحجي ولك .. ما تستحي تحجي على جدك .. وهو من حجة وية بت جا غير لأجل شغل .. جا عبالك الوادم كلهة سوايتك ..

طگيت حارث بخزرة : حارث شنو هالحجي .. ادور لا هيج ولا هيج تتهم جدو يحاجي بنات .. شو صاير ما تستحي انتة ..

حارث : جدة انة وياج بموضوع الشغل .. يعني اذا جانت عالشغل مو لازم تخابرة على تليفون المعمل .. مو اللازم هيج .. بس لا يجدة .. حجي خضر منطيهة رقم تليفونة الخاص .. وما اسولفلج شني من بت ..

باوعتلة حبوبتي بشك : شنهي ولك گول ..؟؟
حارث : حجية مو بت طرگاعة .. صوتهة يجيب التايه ويصحي النايم .. وتتنعوص من تحجي مبينة بت عشرين يجدة .. تخيلي تحجي وهي تتدلع وية جدي .. اويلي عليج يشهلة راح سوگج ..

شمرت حبوبتي عود التولة على حارث : وانة شمالني اصدگك ولك .. هذا ابو حافظ هذا .. عشرة عمر .. ولا مرة سوة هيج شي ..

عضيت شفتي وخزرتة : حارث كافي سد الموضوع ..
طبگ حواجبة وباوعلي : وليش اسدة .. شوفي جدة اذا ما مصدگة هذا جبران يمج وأسألي هوة جان گاعد من طب جدي ورزلني وضربني علمود هاي البت لان درة بية حجيت وياهة وعبالة راح اخذهة منة ..

حبوبتي ضربت على رجلهة بعصبية : شنننهييي .. يضربك ويرزلك لخاطر وحدة غريبة مدري منين ما منين جاية .. هاي تاليهة العشرة حجي خضر وانتة راح تطب بال٨٠ وتدور هالسوالف ..

حارث : جدة ايگولون الواحد من يصير عمرة ٧٠ سنة عبالك عمرة ١٧ سنة .. وخوفج من حجي خضر ..

الجدة بحزم : خايبة يريما .. تعاي سوي التولات ذني وحطيهن كلهن بجدر خل اوديهن لعمج محمد .. طلع حجي خضر شبعان ومو بعازة التولات ...

كامت وبيدهة عوجيتهة وتمشي وهي رافعة راسهة وعبالك ما هامهة وانطتنة ضهرهة ودخلت للصالة ..
حارث ضحك : اويلي انتبهتولي عالمشية ..

ضربتة على جتفة حيل : انتة ما تستحي .. شنو هالحجي هذا .. وبعدين انتة تعرف بجدو مو مال هالسوالف .. ليش تسوي مشاكل ..

فرك جتفة : ليش مو مال هالسوالف .. ايجوز اني طالع علي بهالطبع هذا .. وبعدين صارلهم هواي ما متعاركين .. خل شوية نشوف حماس ..

جبران : والله اليوم تشوفون التشمر مال الحجي على اصولة .. حبوبتي ما تسكت والله لتجيبهة مربع ..

وفعلاً ورة ساعة تقريباً كاعدين بالصالة اني وحبوبتي وجبران وحارث ..
حبوبتي ساكتة بس مبينة موقوتة ..
واني وجبران نسولف ..
وحارث بيدة تليفونة ويراسل ويضحك .. اكيد يحجي وية وحدة من صاحباتة ..

دخلو جدو وعمو محمد وعمو عاصم ووياه هادي ..
جدو : السلام عليكم ..
ردينا السلام بهدوء واحنا نوگف ..
حارث ضم تليفونة بحماس ..

حبوبتي ما ردت السلام ودارت وجهة عنة ..
عمو محمد طبگ حواجبة وباوعلنة واشر براسة بمعنى شكو شبيها امي ..

جدو : السلام لالله .. لو ما تدرين يم حافظ .. شجاج ما تسمعين ..
حبوبتي ردت من ورة خشمهة وهي بعدهة دايرة وجهة عنة : اييه .. هلا ..

جدو طبك حواجبة : شني شمالج تردين من ورة خشمج .. زعطوط گاعد جدامج ..
حبوبتي التفتتلة وحجت بأحترام مصطنع : وعليكم السلام .. گواك الله .. ويساعد بختك .. ارتاحيت هسة يخضر ..

جدو : خضر شني .. شو لا ابو حافظ لا حجي .. ما تگليلي شجايج اليوم يشهلة ..
حبوبتي : انة بعز بختي وگايمة بالعلية .. بس شوف ياهو اليدور لوفات ومسوي روحة عصبي عالوادم ..

جدو عصب : شننهيي قصدج احجي .. لا تلوفين بالحجي .. حجايتج ذبيهة بوجهي ..

قربت من حارث وضربتة بدون لحد ينتبه : ارتاحيت هسة من علگتهة .. وين تروح من جدو اذا درى بيك ..
رفع اكتافة بلا مبالاة : متعود عالرزايل لا تخافين ..

حبوبتي : جا خوش من كونك تريدني اذبهة بوجهك .. ما تگلي هاي كبرتك ومشيب واحفادك بطولك ورايح تدور نساوين .. كللش يحجي ماكو احترام لولدك للعشرة .. ما گلت انة رجال جبير وعيب وفشل اروح احاجي بنات ..

جدي يباوعلهة وهوة فاتح عيونة وعاط بيهة يقاطعهة : اوووكفي ولج شنهي هذا الحجي .. منين جايبتة ووين لگيتي .. شني مسودن واروح اسوي هالسواية هاي .. شو ما تعرفين تحجين .. ضبي لسانج يمرة ..

حبوبتي عوجت حلگهة : انة لساني مضبوب .. بس عالحك ما اسكت تدري بية .. راد ردود انتة وحتى مو ناگص غير تصبغ هالشعرات البيض وتطلع بهدوم جبران الضيگة ..

جبران فتح عيونة : وشبيهن هدومي جدة ..

حجة عمو عاصم وبخزرة لجبران يحاول يهدي الوضع : يمة تهدي بالله عليج .. ترة ابوي تعبان .. مو انتي دوم تگلين لنعمة لا تتلگين رجلج بالعرايك والمشاكل وهوة توة راد من الشغل .. شو انتي هسة صرتي نفسهة ..

جدي رفع ايدة : عوفهة عوفهة .. انا امك اعرفهة من تتسودن وتدور طلايب ..
حبوبتي تأشر على روحهة بعصبية : انة مسودنة يخضر ..؟؟؟؟ ما تحاجي روحك اليوم كاتل الولد علمود وحدة ما معروف اصلهة ولان حاجي وياهة ..

التفتت لحارث الي بلع ريگة وحجة بهمس : اييه اكلناهة ..
جدي فتح عيونة والتفت لحارث : وللك حارث شگايل لحبوبتك .. شمصخم من حجي علية ..

حارث : احم .. والله جدو ما حجي غير الحگ .. يعني البت الرزلتني وضربتني علمودهة مساع منين خابرتك وگالتلك انة حاجيتهة .. اكيد من تليفونك الشخصي لان تليفون المعمل كدامي وما عفتة ولا دقيقة .. وبعدين شني اول تالي النسوان تتدخل بشغل المعامل .. السالفة بيهة ان ..

طبگت حواجبي واني اشوف جدو توتر من كلام حارث ..
تدارك الموضوع وكال بعصبية : ولك حويرث انتة تحاسبني وتسوي بية هيج .. وهاي البت ابوها صاحبي وهوة خابرني من رقمة وگال ابنكم متحرش ابتي وگوة سگتة ..

حبوبتي فتحت عيونهة وغطت نص وجهة بالشيلة : يا يا يا دهر دهرك حويرث .. خزيتني وخليتني اصدگگ .. ولج ريما گومي جيبي التولة وصبي الغدة خل ابو حافظ ياكل كونة تعيبان ..

جدي گام ودخل لغرفتة : ماريد التولة اكليهة انتي .. شبعتوني بحجيكم المابي فايدة ..
حارث يباوع لجدي من دخل ورجع باوع لحبوبتي : شكد فطيرة .. انتي صدگتي بت صاحبة .. بوية ذني الدروب مالاتي كلهن اعرفهن ...

دفعتة من ورة وطلعتة لان اذا بقى گاعد يعلگهة يلة يرتاح ..

بعد مرور ٤ اشهر ..

حارث //

كاعد بالمطعم وهي گدامي ..
شكلهة حلو بس ما داخلة مخي .. شنسوي نتونس ..

باوعتلي وبدلع ماصخ : حبيبي شكراً عالهدية .. ذوقك يجنن ..
لزمت ايدهة وحجيت بنبرة صوتي المخصصة لهالسوالف : حبيبتي اصلاً قليلة بحق جمالج .. الواحد حتى يحتار شنو يجيب لهالوجه الحلو ..

دنگت راسهة : اوووي حبيبي خجلتني مدا اعرف شنو اگول ..
احترگو عشيرتج وعشيرة الاوي لعبتي نفسي حشى خلقة الله ..

تصنعت الابتسامة : اروح فدوة لليخجلون اني .. بعمري ما جنت متوقع احب بهالطريقة ..
رفعت عيونهة الي ورمشت اكثر من مرة : ولا اني حبيبي .. انتة اول شخص بحياتي احبة ..

حارث : واني هم حبيبتي سراوي ..
طبگت حواجبهة : سراوي منو ..
فتحت عيوني : سراوي اختي .. اسف حبيبتي قصدي طيبة ..

طبگت حواجبهة بعصبية : لك طيبة منو .. شبيك حارث اني اية ..
تأففت بملل : نسيت .. جل من لا يسهو ..
عاطت بوجهي : شنو نسيت .. انتة صدك تحجي ..

كمت بعصبية : سمعي ولج لا ترفعين صوتج علية .. ويلة ولي .. لعبتي روحي وانتي تتماوعين ..
عفتهة ومشيت ورحت دفعت الحساب وطلعت ..

ركبت سيارتي ومشيت ..
دك تليفوني رفعتة شفتة رقم راسم الدولي ..
ابتسمت : حي الله دكتورنة الغالي ..

راسم : الله يحييك حارث شلونك ..
حارث : الحمدالله انتة شخبارك ..وينك يا اخي البارحة اتصل عليك وما تجاوب ..

راسم : تليفوني مقفول وما بية حيل اشحنة ..
حارث : ما بيك حيل لو انتة قافلة عمداً ما تريد ازعاج ..
راسم : ومنو ليحب الازعاج .. هسة المهم گلي شكو ماكو .. البارحة جدي لكيتة متصل علية بس ما رجعت اتصلتلة .. هم تعرف ليش متصل؟؟ ..

استغربت : لا .. ايجوز عندة موضوع مهم وياك .. وانتة حضرتك سادهة علي من كل الجهات .. ما تخلي يحجي وياك .. يا اخي انسى الصار وافتح صفحة جديدة .. ليش گلبك لهالدرجة اسود ..

راسم : اني گلبي اسود ؟؟ .. حارث مو انت ما تعرف شبي گلبي .. ما تعرف شصاير بي ..
حارث : شلون ما اعرف .. وهوة منو اليعرف بيك غيري .. بس يعني ما يصير كل هالسنوات وانتة شايل بگلبك ..

راسم : شسوي هذا اني هيج .. ما اكدر انسى بسرعة .. كل مرة اشوفة بيهة اتذكر حجية وعبالك هسة حجاه ..

حارث : راسم انتة ما تدري بجدي شكد متندم لان سوة هيج وخلاك تبتعد هالكد .. وهسة جاي يحاول يخليك ترجع وتصير گبال عينة خاف لا سامح الله يفقدك مثل ما فقد ضياء وابوك ..

راسم : كلة لا يحاول .. ما ارجع بعد .. هوة اني هنا وما مرتاح .. شلون اذا رجعت وهي كدام عيوني ..
والي صار بأبوي وضياء هذا امر الله ويومهم هذا .. يعني اذا اجيت يمة راح يمنعني من الموت شنو ..

نزلت من السيارة لان وصلت للبيت : والله بعد هالموضوع تحلونة بينكم .. اني ما اتدخل .. لان تدري هذيج المرة من تدخلت شصار .. جدي ضل يسوي انتة اصلا ما تحاول تقنعة ومكيف لان تسافرلة .. وعاد جدي وتعرفة شلون يفهم الموضوع مثل ما هوة يريد ..

دخلت للمطبخ شفت مريم واگفة يم الطباخ كدام الجدر مدري شتطبخ .. وريم كاعدة عالطاولة وكدامهة الملزمة لان حالياً جاي تمتحن اخر سنة بالكلية ..

راسم بعدة عالخط وياي : لا تتدخل انتة اصلاً .. اذا سألك گلة ما يرضى حتى افتح الموضوع وياه .. ومن يخابرني هوة اني اعرف شلون ارد علي ..

باوعت لمريم بأبتسامة ما گدرت ما اسلم عليهة لان صدفة نشوفهة صارلهة اسبوع من طلعت من العدة : مريومة شلونج .. اگول المطبخ منور اليوم ..

ابتسمت : الحمدالله حارث انتة شلونك .. منور بوجودك ..
حارث : اذا انتي مرتاحة معناتهة احنة بخير ..

سمعت صوت راسم بالتليفون بنبرة هادئة تختلف عن انفعال قبل شوية : وصللهة سلامي حارث ..
باوعت لمريم : مريومة هذا راسم يسلم عليج ..

مريم ابتسمت : الله يسلمك ويسلمة .. سلملي علي ..
كالتهة واخذت ماعون الشوربة وطلعت من المطبخ واسمعهة تصيح لرضا حتى توكلة ..

راسم حجة واسمع صوت تنهيدتة : حارث شلونهة .. نعمة خو ما مأذيتهة .. اذا احتاجت شي گلي ..

ردت احجي بس باوعت لريم مدنگة راسهة ومدموجة بالكتاب ..
طلعت من المطبخ وصعدت لغرفتي : عيب عليك .. شنو قابل وين ذابينهة ابين غرب .. واذا احتاجت شي قابل احنة شنو هنا ..

واذا على نعمة لا تخاف .. مريم مو زغيرة هسة وتكدر تتصرف وهم لا تخاف مادام حبوبتي موجودة معناتهة واگفة لنعمة بالمرصاد ..

خلصت مكالمتي من راسم وبدلت ملابسي ونزلت لان عندي طلعة اني وجبران وية صاحبنة عباس وينتضرنة هسة بالگهوة ..

جيلان //

رفعت ايدي اباوع الساعة ١ ونص ..
امتحاناتنة صادفت الضهر والجو حار لان بداية العطلة الصيفية والناس عطلت وبقت الگليات اخر شي ..

اجت تارة وبيدهة گهوة انطتنياهة : هاج ..
رفعت حاجبي : احد طلب منج گهوة ..

تثاوبت وحجت : امداج مو صوجج .. اني مطفية لان البارحة الليل كلة اقرة واليوم الصبح نمت بس ساعة وكعدت اراجع .. وهسة ميتة من النعاس ومطفية وجبت گهوة حتى اصحصح .. كلت يمكن انتي هم مثولة مثلي وجبتلج .. بس ما تستاهلين ..

هفيت بالملزمة على وجهي : اول شي اني تدرين بية حدي للساعة ١١ وعقلي بعد ما يستوعب اي معلومة لهالسبب ما اقرة ورة ١١ ..

اشرت عالكهوة : وثاني شي شهالقرف حشى نعمة الله بهالحر اكو واحد يشرب گهوة حارة عالاقل جان جبتي كهوة مثلجة .. اني ميتة من الحر والتوتر لو جايبتلي قوطية شاني باردة احسن ..

تارة : ديلة عيني .. مو زين وذكرتج .. تتشرط حضرة جنابهة ادور الا شاني ..
شفت دلاور جاي من بعيد .. تأففت بملل : اببد مو وگتة والله ..

وگف يمنة بأبتسامة : سلام جوجو شلونج ..
تارة : الله يهالجوجو والله من تجي انتة احس نفسي صرت حايط ..
دلاور : اسف ما انتبهتلج ..
تارة ضحكت : واضح والله واضح ..

ابتسمتلة : هلاو دلاور .. الحمدالله انتة شلونك ..
دلاور : الحمدالله بأحسن حال .. وشفتج هسة من بعيد وجهج احمر وتهفين من الحر .. جبتلج قواطي شاني باردة مثل ما تحبين ..

ابتسمت واخذتهن منة : شككرا دلاور والله اجت بوقتهة لان ميتة حر ..
دلاور : شتگولين لو اعزمج على غدة ورة الامتحان مالتج ..

رديت بسرعة : لا يمعود .. ويني ووين الغدة .. ورانة دراسة هم يلة نلحگ نرجع للبيت ندرس ..
رفعت ايدي باوعت للساعة وگمت : حتى هسة امتحاني راح يبتدي .. يلة باي اشوفك بعدين ..

سحبت تارة المطفية كوة تمشي ..
دخلت امتحنت .. خلصت ورة ساعتين وطلعت وجانت الساعة ٣ ونص ..

طلعت تعبانة ومباشرةً اخذت تكسي ورجعت للبيت ..
دخلت للبيت كعدت عالقنفة ..

سمعت صوت من غرفة امي ..
كمت بهدوء وباوعت من الباب الي جان مفتوح شوية ..

عصرني گلبي واني اشوفهة تبجي وحاضنة قطعة ملابس طفل .. او بالاحرى ملابس مريم اختي ..

تنهدت ونزلت دمعة من عيوني .. اوووف ماما والله لو بيدي اسوي كلشي بس حتى تشوفينهة ..

جبران //

نزلت من الدرج ولاگاني حارث وهوة مبدل مثل العادة يكشخ لأقل طلعة ..
سمعنة صوت صياح بالمطبخ ..
نزلنة عالسريع ..

دخلت واشوف امي واگفة ولازمة رضا من اذانة وتصيح علي : كسسسر بيدك .. اثول انتة .. منو عاتب عليك تجيب مي ..

رضا ودموعة تنزل وخايف : والله ما ادري طاح من ايدي .. اسف والله ..
ردت احجي بس دخل رضوان من برة بسرعة وسحب رضا من ايدة بعصبية وحطة وراه : ايييدج لا تمدينهة علي ..

رحت وگفت كدام رضوان .. وحارث شال رضا ..
جبران : رضوان على كيفك ..
عاط رضوان بعصبية : شني على كيفي .. ما تشوف الولد يناشغ .. هي تريدهة من الله يسوي شي حتى تكتلة .. يابة ما تردينهة ابيتج ما كلنة شي وبقت كاعدة هنا ..

تكرهين امة ما كلنة شي ..بس مو كافي ساكتين عليج يومية تكتلينة ونكول جبيرة وانتي كارهتة على كره امة ..
واليوم مادة ايدج علي علمود كلاص لا هاي واكفة .. والله من اليوم اذا مديتي ايدج على ابن اخوي اني بعد اتصرف واخذهم واروح لبيت ابوي وفنة اليحجي ..

امي عاطت بي : وللك ترفع صوتك علية .. هاي تاليهة تربيتك .. وهذا امة شامرتة وما تعرف ارضة وين ويكسر بالاماعين ويوصخ ويمشي واحنة النضف مو .. عليش كاتلتكم المحنة على بت زمن ..
حتى ولدي صارو ضدي من وراهة .. ما الله ياخذهة ويفكني منهة ..

فتحت عيوني ودرت وجهي على امي التصيح بعلو صوتهة : يممممة لا تدعين عليهة واستغفري ربج ..ولا تنسين هي اختي شلون ما تردين اوكف وياهة واني ما صرت ضدج بس من اشوف الغلط ما اسكت ..

حارث يحاول يسكت رضا الي شبع بجي من صوت الصياح : يمعودين گولو يالله .. عمة نعمة هوة كلاص ما صار شي نجيبلج درازن بس اسكتي لا يسمع عمي ..

دخلت مريم تلهث وذبت سلة الملابس بالكاع .. : شكو شصاير .. شبي رضا ..
راحت واخذتة من حارث وهي تحاول تسكتة ..
رضوان التفتلهة : مريم اخذي رضا وروحي لغرفتج .. واذا بعد احد تعرض لرضا بس كليلي ..

مريم طبگت حواجبهة وباوعت لنعمة : ليش شسوت .. ضربتة شنو ..
رضا هز راسة بسرعة واشر على خدة : اي ماما والله ضربتني مرتين بوجهي ورجعت سحبت اذني .. ماما والله مادري وزلك من ايدي الكلاص ..

عافت رضا بالكاع وحجت بعصبية وهي تتقدم من امي بس اني بالنص : وتاليهة شنو وياج بس فهميني .. ما اكتفيتي بضربج الي سنين على اقل شي .. ادور هسة راجعة تعيدين الماضي على ابني .. والله اذا مديتيهة لأيدج على ابني اكسرهة ..

طبگت حواجبي وباوعتلهة : مرررييييييم .. لا تزيدين الطين بلة اخذي رضا وامشي .. خلوهة تعدي على خير ..

امي وخرتني من كدامهة : اوكف اوكف شنو تعدي على خير وهاي بت ال### تكلي اكسر ايدج ..
ولج اني تكليلي اكسرهة لأيدج .. شو تعاي ..

ما اشوفهة الا ساحبة مريم من شعرهة ولاوية ايدهة ورة ضهرهة وطبعاً قوة مريم الضعيفة صفر مقارنة بضخامة امي وطولهة ..

رضا كام يبجي بالزايد ومجلب برجل امة ويحاول يسحبهة ..
اني وحارث نحاول نفك امي عن مريم بس امي مجلبة بشعر مريم بكل قوتهة ولاوية ايدهة ومريم تصيح : عبالج كبرتي ولسانج يطول علية ولج .. هسة اعلمج يبت زمن شلون تطولين لسانج علية ..

صحت بوجه امي : يمممممة فكيييهة لخاطر الحسين كطعتي شعرهة وايدهة راح تكسرينهة ..

رضوان يحاول يفك رضا عن امة بس هوة يبجي ويناشغ ومجلب برجلهة ..
اني وحارث نحاول نفك امي عن مريم والعياط مالتهة والصياح اضن الشارع كلة سمعة ..

حارث : عمة تهدي بالله وفكيهة .. شني من ايد هاي عفية اصابع ما تنفك .. وج عممممة ايد البنية كلبت زركة فكيهة ..

على هذا صياحنة ما انتبهنة من انفتح الباب ودخل جدي وابوي وهادي ..
نبهتني عيطة امي من جرهة ابوي من شعرهة يلة فكت مريم وطيحتهة بالكاع ..

ابوي يسحب امي من شعرهة ويطلعهة : وج بت الـ..### انتي ما اتوبين الا تنضربين يلة ترتاحين ..
طلعهة ابوي واخذهة لبيتنة ..

التفتت لمريم لگيت هادي حاطهة بحضنة وهي لازمة راسهة وتبجي : مو كافي يعني كل هالسنوات وهي مستقوية علية .. ادور هسة تريد تستقوي على ابني ..

رضا حضنهة ويبجي ..
كمزنة كلنة على صوت رضوان وهي يركض : يااابة ..
التفتنة بسرعة لجدو الي وجهة گلب احمر ويفتح بدكم دشداشتة ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤

حبايبي شلونكم ..
اعذروني عالتأخير بس يمكن راح اخلي التنزيل يكون بين يوم ويوم لحد ما شوية اصير احسن 😘
واتمنى تتفهموني 🙏🏻

احبكم .. ولا تسون صوتو وعلقو وكلشي ينداس دوسو ..