رواية بنات للزمن الفصل الخامس عشر 15 - بقلم سارة الشمري

الكاتبة : سارة الشمري🖤

هاك أخذ جرحك بعد ما أشتهيك
وكلمة انه اهواك تحچيها
وبس أوخر عنك اسنينك تطيح
اسنين عمرك .. عمري لمتجيها
ابگـاع خدينك أنه العاكس ضواي
آبمعنى آخر ........ انه لمحليها
ذكرياتك صارن ... الطف ويزيد
حيل اكرهك من يمر طاريها

جبران //

ما رديت على مريم وطلعت وطبگت الباب وراي ..
صعدت سيارتي وطلعت من البيت كلة ..
مشيت واني ماعندي اي مكان اروحلة ..

شوية ووگفت سيارتي على جهة ..
نزلت الجامة اريد الهوى يدخل لصدري ..

غمضت عيوني واتذكر ذاك اليوم المشؤوم المايطلع من بالي ..

بأيام الفاتحة مال جدي ..
جنت واگف بالفاتحة .. جانت روحي طالعة وگوة مسيطر على دمعتي گدام العالم .. من اختنگ كلش اروح على جهة ابجي وحدي وارجع ..

ومرة جنت راجع لبيتنة .. بعدني ما واصل وشفت بسمة طالعة من بيتنة لابسة بس العباية وبدون شال وبيدهة علاگة وتمشي رايحة لبيتهم الي ما يبعد الا جم شارع عن بيتنة ..

الي وگفني مو بس بسمة لا ..
وگفت من شفت ولد يمشي وراهة وهي مدنگة وتمشي وما منتبهتلة ..

عضيت شفتي بعصبية ومشيت وراه گلت ماريد اسوي شي ويطلع ما جاي عليهة وهذا طريقة ..

جان هذا تفكيري لحد ما سمعتة يصوفرلهة ويحجي : دباوعيلنة شدعوة هالثگل ..

بسمة سرعت بمشيتهة واني جني گمز براسي سحلتة من ورة من البدي ..
ضربتة بوكس على وجهة طيحتة بالكاع واسمع صوت بسمة الخايفة : جبرررانن عوفة فدوة ..

لزمتة من ياختة وضربتة مرة ثانية وهو يباوعلي خايف : جبران ؟؟
ما استغربت من عرفني لان الكل هنا يعرفنة على معرفة جدنة الحاج خضر ..

لزمتة من فكة : ولك انت گدهة تتحارش بأهلنة يا عار ..
هز راسة : اسف والله فدوة بس عوفني ..
ضربتة راشدي سطرتة سطر : وعلي اذا بعد شفتك تمر من هذا الشارع حضك اطيحة سمعت لو لا .. ما راح اسويهة عشاير لان اخاف على سمعتهة وانت احمد ربك ..

گام طفر بسرعة وشرد ..
التفتت لبسمة الخايفة وتلطم على خدهة ..
رصيت على سنوني : امشي گدامي ..

مشت وهي خايفة ووصلت لباب بيتهم وفتحت الباب ودخلت واني وراهة ..

بس دخلت جريتهة من زندهة واني اصلاً اعصابي جانت منتهية : شمطلعج برة وحدج .. وما لابسة شال ولا جواريب ورجليج طالعات .. ادري طالعة تستعرضين بت الاوادام ..

باوعتلي بخوف : مو لابسة عباية والله واجيت جبت ذني الغراض وكلهة بالفاتحة قابل منو تجي وياي ..

عطت بيهة : والله لانعل ابو الغراض .. شلون تطلعين وحددددج وهذا الكلب يفتر وراج ..

بسمة : جبران والله ماعرفة شبيك ايدي اذتني ..
تيهتهة ولزمت راسي الدنيا تفتر بية لان صارلي جم يوم لا ماكل وعلى فرد وگفة ..

لزمتني بسمة بخوف : جبران شبيك ..
گعدت على كرسي المطبخ وهي تباوعلي بخوف : جبران فدوة شبيك ..

هزيت راسي : مابية شي .. ضغطي هبط ..
گامت بسرعة طلعت لبن من الثلاجة حطتة بگلاص وحطت فوگاه ملح ..

تقربت مني ودنگت علية : اشرب هذا هسة تصير زين بين ما اسويلك شي تاكلة ..
هزيت راسي واخذت الكلاص : لبن كافي ما اشتهي اكل ..

بسمة : لعد شلون تريد تطيح گدام العالم ..
شربت الگلاص نصة وحطيتة عالميز ..
اباوعلهة شلون خايفة ووجهة احمر ..

ركزت بملامحهة وما صرت اركز بشنو تحجي ..
عيونهة الكبار ورموشهة المكحلات عيونهة كد ما ثخينات .. بياض بشرتهة البارز اكثر باللون الاسود ..
شامتهة الي بخدهة ..
شفايفهة الزغار وورديات بدون كلشي ..

بدون وعي للي جاي اسويه ..
حطيت ايدي على خدهة وسحبتهة وخليت شفتي فوگ شفتهة ..
مغمض عيوني وناسي كلشي وهي تدفع بية واني متمسك بية ..

دفعتني حيل وضربتني على صدري ..
وگفت واني هستوني استوعب شجاي اسوي .. تخبلت جبران ..

التفتت عليهة واگفة حاطة ضهر ايدهة على حلگهة ودموعهة نزلت ..
حجيت بتوتر : بسمة ..

حجت برجفة الواضحة على كل جسمهة وايديهة : اطلع برة ..
جبران : بسمة اسمعيني ..
حجت بصوت اعلى : اطلع برة اگلك اطلع .. ماريد اشوف وجهك ..

طلعت من البيت كلة ورحت مباشرةً لبيت ابوي الفارغ لان كلهة ابيت جدي ..
صعدت لغرفتي گعدت عالجرباية وافرك بوجهي احاول استوعب اني شسويت ..

جبران شسويت .. لك هاي بسمة ..
هاي الي تحبهة من جان عمرك ١٨ سنة ..
حبيتهة على نقاوتهة وروحهة الحلوة ومرحة .. شلون هيج سويت بيهة ..

فزيت من صفنتي على صوت الجام يندگ علية ..
رفعت راسي شفتة حارث ..
نزلت الجامة ..: ها حارث ..

حارث : شبيك شعندك واگف هنا .. شفت سيارتك واگفة خابرتك اكثر من مرة ما تجاوب .. نزلت عليك .. بيك شي ؟؟

هزيت راسي وطلعت التليفون وفعلاً داگ علية اكثر من مرة ومكالمات من مريم وجيلان .. كل هذا واني ما سمعتة ..

حارث يباوعلي بقلق : جبران باوعلي بيك شي ؟؟
هزيت راسي : لا ما بية شي بس تعبان شوية ..
حارث : هاي ما تمشي علية .. حرك سيارتك وامشي نگعد بشي مكان نحجي بي ..

هزيت راسي وسديت الجامة .. راح هوة لسيارتة واني حركت ..
رحت لحديقة جبيرة وبيهة كراسي ..
اجة وراي حارث ..

گابلني وگعد : احجي شبيك ..
ما ترددت وحجيتلة كلشي لان حارث كلشي يعرف عني ويدري بية احب بسمة .. واني ما اضم علي شي ..

يباوعلي مصدوم ..
اخر شي دفعني من جتفي وعاط بية : ولك جبران تخبلت .. شلون تسوي هيج .. تستغل خوف البنية عليك ..

هزيت راسي بتعب : گتلك مو بيدي وما سيطرت .. نسيت روحي ..
يباوعلي معصب : من طاحظك وحظ روحك .. تدري ذرة ثقة هسة ما بقت عدهة اتجاهك ..

نزلت راسي : ادري .. وهذا القاهرني .. شسوي حارث بس فهمني ..

حارث : شتسوي يعني .. اخطبهة واذا وافقت حاجيهة واعتذر منهة .. گللهة اي شي بس لطش عملتك السودة ..

رفعت عيوني وطبگت حواجبي : حارث شجاي تحجي .. شنو اتزوج وجدي هستوة متوفي ..

حارث : اني ما گتلك روح تزوج .. گتلك اخطبهة عالاقل .. وعود خل تمر فترة وبعدين تزوج ..

هزيت راسي : لا حارث .. ماكدر .. شلون وهادي اكبر مني ما متزوج .. واني بعدني ما مستعد ..

حارث : جبران لا تخبلني .. هادي ما راح يحجي ولا ابوك وتدري بيهم كلش زين .. واذا انت تدري بروحك تحبهة بعد عليمن ما مستعد ..

فركت وجهي : الله كريم .. عود احاجي ابوي .. ويحلهة الف حلال ..
گمت ورحت لسيارتي وحارث بسيارتة ..

حارث //

جاذبتني شخصية جيلان ..
وعندي فضول كلش قوي حتى اعرف شبيهة هيج تضوج مني وما اعتقد سبب المي ضوجتهة ..

من سألتهة بالسوگ وكالت على سالفة المعمل واني كل ما اتذكر اضحك ..
لعد شگد گلبج اسود .. عنيدة ..

اني شايف اليعصب تنگلب خلقتة ..
بس هي بت الاوادم تصير حلوة ..
بياض وجهة يصير احمر ..

عيونهة الناعسات الگبار السود من تسلهم بيهن وما تباوعلي .. ما يرحن من بالي ..
مرات بودي اگللهة لا تديرينهن خل اتمتع بجمال عيونج ..

بس مرات تعصبني بأسلوبهة لان عدهة قلة ادب ولسانهة متبري منهة .. والاكثر من هذا عصبية وتاخذ حقهة وابسط شي عرايكهة وية نعمة ..

دخلنة اني وجبران لبيت جدي ..
هو راح للديوانية لان خاف بسمة بعدهة موجودة بالبيت ..

دخلت اني من باب المطبخ ..
اول ما دخلت شفت بس جيلان بالمطبخ ..
بسرعة گامت وحجت : حارث وين جبران .. ما اجة وياك .. خل يجي اريد احاجي ..

حارث : جبران بالديوانية هسة اجينة سوة .. بس اول شي گليلي بسمة هنا ؟
هزت راسهة : لا مشو قبل شوية هي وامهة .. شوية خل اروح لجبران ..

صرت كدامهة : وين مشمش وين .. هنا خال راسم ورضوان .. جاي بشغل على ابوج .. تردين تطبين عليهم شنو ..

رجعت هي ليورة وگعدت عالكرسي : هسة شلون بلة راح اموت .. اريد اعرف شبيهة بسمة بجت وجبران شبي عصب وطلع .. شمسوي للبنية ..

ابتسمت على شكلهة شلون تحوس : هسة انتي عليمن حارگة دمج .. ايجوز الولد ما يريد يحجي .. اسرارة هاي ..
باوعتلي برفعة حاجب : انتي تدري مو ؟؟

ابتسمتلهة ورفعت تك حاجب : طبعاً .. اخذيهة قاعدة .. جبران وراسم ما يضمون علية ولا شي ..

جيلان باوعتلي ببرائة ورمشت مثل الاطفال : حباب احجيلي ..
صفنت بيهة : لا ترمشين بت الاوادم هنة من غير شي يسطرن ..

فتحت عيونهة : ها ؟؟
عضيت شفتي .. شحجيت ؟: اگول هنة منا عيونج حولة ادور ترمشين بيهن ..

عوجت حلگهة : اوووي عشتو .. اذا اني عيوني حولة .. والله جنت ساطرة الكلية بيهن ..
رفعت حاجبهة وابتسمت : حتى اسأل دلاور ..

طبگت حواجبي واني هستوني اتذكر دلاور المايع ..
تذكرت بيوم الي شفتهة بالكلية ورحتلة وهو يأشر عليهة يگلي هاي البنية احبهة بس بعدني ممعترفلهة ..

فركت وجهي بعصبية : لا تجيبين طارية گدامي .. هالمخنث هذا ..
جيلان : ليش شبي ؟ والله لو تشوفة شلون جان بالكلية يومية يجيبلي شاني .. مرات يجيبلي لفات ايگلي خاف جوعانة .. ما يدخل للمحاضرة اذا ميسلم علية ..

هي تحجي واني رافع حاجب ومنزل الثاني گوة لازم اعصابي : وانتي مكيفة بي مو .. علمود قوطية ولفة هيج تحجين .. خو كولي احبة بعد بقت على هاي ..

فتحت عيونهة : لا مو لهالدرجة .. يعني مجرد زميل .. وانت ليش هيج ضجت .. غير صديقك هوة ؟؟

حارث : لا صديقي ولا احبة .. صديق جبران ..
عفتهة وطلعت من المطبخ واني مادري ليش عصبت من سمعتهة تمدح بي .. ما لگت غير دلاور المخنث ..

راسم //

خالي خلص شغلة وية عمي عاصم و استأذن وطلع ..
اباوع لجبران گاعد يمة حارث ويتنادسون .. وهادي گاعد بالجهة الثانية ..

حارث يأشرلة احجي ..
جبران يهز براسة ..

عمي عاصم انتبهلهم : شبيك انت وياه .. احجي صاير شي ؟؟
جبران : احمم .. يابة رايد احاجيك بموضوع ..

عاصم : احجي اسمعك ..
جبران : يابة بس فدوة لا تتعصب .. يعني بهداوة ..

عاصم : هسة غير يحجي .. لازم مسويلك مكسورة ..
جبران : لا يابة .. بس ردت اگلك رايد اخطب ..

طبگت حواجبي مستغرب وعمي عاصم نفس الشي ..: شلون شلون ؟؟ جبران لا تختبر اعصابي ..

جبران : يابة فدوة بس اعصابك .. واني اگول يعني بس اخطب وخل تخلص هالفترة ووراهة اتزوج ..

عمي عاصم بعصبيتة المعتادة عاط بية : ولك عليمن متوازي .. اخوك الجبير ما اجاني وگالي اريد اتزوج .. وانت هسة جدك توة طالع اربعينة وتريد تتزوج ..

جبران بلع ريگة : هذا هو يابة بس لا تعصب مو زين عليك .. بس گلت عود بس خطوبة هسة وبعدين عود اتزوج ..

عمي يباوعلة بعصبية : ومني هاي التريد تاخذهة ..
جبران بلع ريگة : بسمة بت خالتي ..

عمي ينافخ بعصبية : البنية ما تفيدك .. البارحة اخوهة من جان هنا گال جايين عليهة خطابة وخوش ناس ما ينردون ..

جبران طفر : شنو شنو .. شنو خطابة يابة .. والله ماخليهة تتزوج ..
عمي رص على سنونة : جبرررراااان ..

جبران : يابة والله ما اسكت .. ما اخليهة تتزوج لو تنگلب الدنيا .. بسمة اني اريدهة واحبهة من زمان .. واذا ما خطبتلياهة اني اروح لاخوهة واحجي وياه ..

عمي فرك وجهة بتعب : من يمتة تحبهة منعول الوالدين ؟؟ شجابك لهالدرب ..
جبران : يابة والله من زمان احبهة .. شسوي ..

عاصم : وشلون ازوجك گبل اخوك الجبير ..
هادي : يابة صدك جذب .. شكو بيهة ؟؟ خل يتزوج معليكم بية ؟؟ اني عود لاحگ بعدين عالزواج ..

جبران : اي يابة فدوة .. هادي ماعندة مشكلة .. خابر اخوهة وگلة لا يطيهم خبر ..
عاصم : ولك عبالك السالفة هينة غير احاجي عمامك بالاول .. انة ما اسوي شي اذا ما اگل لاخوي ضافر لان الجبير ..

هادي : وهم لازم تحاجي حبوبتي نشوفهة اذا توافق هسة تخطب ..

جبران : اي حاجيهم يابة هسة ..
عاصم : جبرررااان .. لا تصير خفيف .. اثگل ترة البنية ما طايرة واخوهة گال مو هسة ارجعلهم خبر .. لا تستعجل ..

سكت جبران .. للدقيقة مرت ابالي لحضة الي اترجى بجدي ما يزوج مريم .. هزيت راسي وغمضت عيوني اطرد هالذكرى من بالي وگلت بگلبي : الله يرحمك يابة ..

استأذنت منهم اني وگمت اخذت اوراقي وطلعت ..
صعدت فوگ ..
فتحت باب الغرفة جانت ضلمة وباااردة ..

استغربت شنو مريم نايمة من وكت اليوم ..
ردت ارجع اكعد بالصالة الفوگ لان ما انام هسة ..
سمعت صوتهة تشهگ ..

فتحت الضوة بسرعة ورحتلهة ..
شفتهة نايمة والعرگ يتصبب من جبينهة وتهلوس شكلهة تحلم ..

لزمت وجهة وامسح العرك عن راسهة : مريم .. مريم اگعدي .. صحصحي .. فتحي عيونج مريومة ..

ترجف وتردد بحجي مينفهم .. ابني .. رضا .. لا تاخذونة ..
لازم وجهة .. ضربت على خدهة بخفيف : فتحي عيونج مريم .. هذا كابوس .. مريم اصحي ..

فتحت عيونهة وفزت مخترعة وتتنفس بسرعة .. : اسم الله على كيفج ..
جبتلهة كلاص مي وهي حاطة ايدهة على گلبهة ..

التفتتلي : رضا وين ؟؟
سحبت الريموت مال السبلت وطفيتة : رضا جوة يلعب هو وزينة ويمهم جيلان ..

رفعت ايدهة حطتهة على حلگهة ودموعهة گامت تجري وتبعتهة شهگات ..
تقربت منهة وخرت ايدهة : ليش ليش .. ليش البجي .. شبيج مريم .. احد مضوجج بشي .. ايدج توجعج ..

هزت راسهة بلا ..
طبگت حواجبهة وحطت ايدهة على بطنهة وغمضت عيونهة متألمة ..
استغربت شنو بعدهة عدهة هاي الحالة ؟؟

حطت ايدهة على حلگهة وطفرت للحمام وسدت الباب ..
گمت بسرعة وراهة .. دگيت باب الحمام : مريم بيج شي .. اطلعي خل اشوفج ..

ما ردت بس اسمعهة تگح ..
شوية وطلعت من الحمام غاسلة وجهة وعيونهة حمر ..
راسم : شبي وجهج .. بعدهة هاي الحالة عندج ؟؟

هزت راسهة ودموعهة نزلت ..
راحت تمددت عالجرباية وغطت راسهة ..
حجت بصوت مبحوح : فدوة لا تجيب رضا هسة ماريدة يشوفني هيج ..

تنهدت وتقربت منهة .. حطيت ايدي على گصتهة وخدهة حرارتهة زينة ..
طلعت ايدهة من اللحاف وهي تباوعلي ساكتة ..

سحبت العلاگة مال العلاج ..
فكيت ايدهة وگعدت احطلهة المرهم وهي ساكتة وصافنة ولا جنهة البارحة ..

لفيت ايدهة بشاش جديد ..
گمت حطيت ايدي على جبينهة وصرت اردد بصوت مسموع

: بسم الله الرحمن الرحيم ..
الم نشرح لك صدرك .. ووضعنا عنك وزرك .. الي انقض ضهرك .. ورفعنا لك ذكرك .. فأن مع العسر يسرا .. ان مع العسر يسرا .. فأذا فرغت فأنصب والى ربك فأرغب ..

بسم الله الرحمن الرحيم ..
قل اعوذ برب الناس .. ملك الناس .. اله الناس .. من الشر الوسواس الخناس .. الذي يوسوس في صدور الناس .. من الجنة والناس ..
صدق الله العضيم ..

اباوعلهة مغمضة عيونهة وايدي على جبينهة وتستمعلي ..
وخرت ايدي وطفيت الضوة وطلعت ..

جيلان //

..

لازمة بيدي تليفوني .. اراسل بريما .. وما سكتت بس تحجي عن اهل مرت ابوهة وتحمد بيهن ..

اجتني رسالة من حارث .. : شو متصل مشمش .. ويامن تحجين ؟
رفعت حاجبي : شنو هالسؤال .. تطفل ؟

حارث : لا فضول ؟
جيلان ابتسمت : احجي وية دلاور ..
حارث : شنوووو .. صدك تحجين ؟؟

جيلان : لا اتشاقة معندي رقمة .. احجي وية ريم ..
حارث : اها .. هنيال ريم .. كل ما اشوفهة لازمة التليفون تگلي احجي وية جيلان .. والله عدجن خلگ ..

جيلان : وحد عنك .. مو ليل ونهار تحاجي بنات .. وهم تسولف وية الولد واسرارهم عندك ..

حارث : اي هاي التردين توصليلهة انتي .. لا تحاولين ما اگلج ..
جيلان : شهالنحاسة .. والله من مساع گاعدة وبس افكر ..
حارث : واني شعلية ..

جيلان : ها خوش .. يلة روح .. باي ..
حارث : وهاي صدگ زعلتي ..

جيلان : لا يابة على شنو ازعل .. مو انت متريد تحجي .. شعليك بية .. اني هم اروح لان عندي الي يحجن وياي .. وهم ذكرتني بدلاور اروح اراسل صديقتي تارة اسألهة علي .. خطية دوم هو يسأل علية ..

حارث : غضب عليج وعلى صخمان وياج ..
جيلان : شنو شبيك عصبت مو هسة تگلي شعلية بيج ..
حارث : بت الاوادم تمشين بالعناد انتي ؟ تدرين بية اكره هالمخنث هذا .. وانتي ما على لسانج غيرة ..

جيلان : وليش تضوج .. تغار منة شنو ؟؟ لو الا متعصب مثلك يلة تحبة ..
شفتة راح الاتصال منة .. يعني غلق النت ..

ليش حجيت هيج مادري .. ايگولون اصعب شي عالرجال لنا يقارنونة برجال ثاني ..
بس شسوي احب اغيضة ..

راسم //

كعدت عالقنفات مال الصالة ..
رجعت ضهري عالقنفة وغمضت عيوني ..
وتاليهة وياي شنو ..
لا اكدر اشيل حبهة من گلبي ولا اگدر ابين حبي الهة ..

انفتح الباب ودخل رضا متحمس : وين ماما ..
ابتسمتلة : تعال رضاوي .. ماما نايمة ..
نزل الورقة الي بأيدة بأحباط : ياا ليش .. ردت اشوفهة شرسمت ..

راسم : شو تعال شوفني شرسمت ..
اجة يمي بحماس حط الوانة واقلامة عالطبلة ومدلي رسمتة : هاي شوف .. رسمت ماما ..

گعدت بالگاع اني وياه واستندت عالطبلة ..
باوعت لرسمتة جانت رسمة طفل بسيطة ..
بنية ومسويلهة فستان وشعرهة طويل ..
ما جان ملونهة بس العيون باللون الازرگ ..

ابتسمت : هاي انت رسمتهة ..
رضا : اي بس زينة شوية ساعدتني بيهة ..
سحبت القلم وگلبت الورقة على الجهة الثانية : تعال نرسمهة اني وياك من جديد ونسويهة احلا من هاي ..

ضحك بحماس : اييي بس سويهة حلوة حتى اشوفهة لخالة جلاتين واگللهة امي احلا من باجي زمن ..

صغرت عيوني : ليش خالتك جلاتين تگلك امهة احلا من امك ..
رضا : اي تگلي امي عيونهة زرگ واحلا من امك ..

باوعت لجهة باب الغرفة ودنگ علي حجيت بصوت خفيف : اگلك سر ويبقى بيني وبينك ؟
هز راسة : اي اي ..

همست يمة : معليك بخالتك جلاتين .. ماما مريم احلا من باچي زمن بهواي .. اصلاً ماكو وحدة بحلاة ماما مريم ..
رضا : يعني ماما احلا وحدة بالعالم ..
هزيت راسي : بالظبط ..

سحبت القلم وصرنا نرسم اني وياه وهو حيل متحمس ..
حجة بكل برائة وهو مدنگ ويلون : انت مو تصير اخو بابا ضياء ..
راسم : اي ..

حجة وهو بعدة مدنگ وبكل بساطة وبرائة گال : لعد ليش بابا ضياء مو مثلك ..

راسم : اي حبيبي همة مو كل اخوان يتشابهون ..
رضا : ليش ما طلعتو تتشابهون .. بابا ما طلع يشبهك ما يحبني مثلك ..

طبگت حواجبي : لا بابا .. ابوك جان يحبك .. ماكو واحد ما يحب ابنة ..

هز راسة وباوعلي ببرائة : لا بابا ما جان يحبني .. شوف انت ترسم وياي وتشتريلي سيارة .. وتگلي سر .. وتلعب وياي طوبة بالحديقة العصر .. وتطيني تليفونك اشوف بي افلام كرتون .. مو صح ..

هزيت راسي واني اريدة يكمل كلامة : اي صح ..
ابتسم وكمل ببساطة : بابا ضياء ما جان هيج .. ما يشتريلي العاب .. ومن يشوفني يصيح علية ويطردني .. ومرة ضربني ومن گمت ابجي هو گام يبجي وياي ..

هو ما يحبني .. ومن گلت لماما بابا ما يحبني گالت اني احبك .. وگالت هو تعبان من الشغل ..

يحجي واني اسمع كلامة مصدوم ..
ليش ضياء جان يعامل رضا بهالطريقة ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤

هلو حبايبي شلونكم .. طبعاً اعذروني عالتأخير بس اليوم جمعة ..
ومن هسة اگللكم اذا تردون التنزيل يومي معناها يوم الجمعة والسبت استراحة الي .. يعني باجر ماكو بارت 😘

احبكم .. ولا تنسون صوتو وعلقو وكلشي ينداس دوسو ..